ထုံးတမ်းစဉ်လာနှင့် အမှန်တရား ဆန့်ကျင်ဘက်ဖြစ်နေသောအခါ

အန္တရာယ်ရှိသည်—သောက်သုံးရေမဟုတ်ပါ။ ဤသို့သောသတိပေးချက်များကို တွေ့မြင်နေကျဖြစ်ပေမည်။ ဒေသအများ၌ လူတို့သည် သူတို့သောက်သုံးသည့်အရာများကို သတိပြုနေကြရသည်။ အကြောင်းမှာ အချို့သော ရေဖြန့်ဝေမှုများသည် “အဆိပ်အတောက်” များဖြင့် အဆိပ်သင့်ခံနေရသည်။ စာအုပ်တစ်အုပ်ကဆိုသည်မှာ ဤညစ်ညမ်းမှု၏အကျိုးဆက်ကြောင့် ရေသည် “အသက်ကို ထောက်ပံ့ကာကွယ်သောအရာ” တစ်ခုဖြစ်မည့်အစား “ရောဂါဆိုင်ရာများနှင့် . . . ဓာတုညစ်ညမ်းမှုများကို ကူးစက်ပျံ့နှံ့စေသည့်အရာ” တစ်ခုဖြစ်လာနိုင်သည် ဟူ၏။—ရေထုညစ်ညမ်းမှု။

အမှန်တရားရေကို ညစ်ညမ်းစေခြင်း

အမှန်တရားနှင့်ဆန့်ကျင်ဘက်ဖြစ်သော ထုံးတမ်းစဉ်လာများသည် ညစ်ညမ်းနေသည့်ရေဖြန့်ဝေမှုများနှင့် ဆင်တူသည်။ ကျွန်ုပ်တို့သည် အထင်အမြင်မှားစေသည့်စိတ်ကူးများနှင့် အတွေးအခေါ်များဖြစ်သော မှားယွင်းသည့် “အဆိပ်အတောက်” အားဖြင့် ညစ်ညမ်းနေသည့်ထုံးတမ်းစဉ်လာများ—လူမျိုးဆက် တစ်ဆက်မှတစ်ဆက်သို့ လက်ဆင့်ကမ်းလာသော သတင်း၊ ယူဆချက်များ၊ ယုံကြည်ချက်များ သို့မဟုတ် ဓလေ့များ—ကို သဘောရိုးဖြင့် စွဲကိုင်မိနေနိုင်သည်။ ညစ်ညမ်းနေသည့်ရေနည်းတူ ယင်းသည် မရေမတွက်နိုင်သည့်ထိခိုက်နစ်နာမှု—ဝိညာဏထိခိုက်နစ်နာမှု—ကို ဖြစ်စေနိုင်သည်။

ကျွန်ုပ်တို့၏ထုံးတမ်းစဉ်လာအရဖြစ်သော ဘာသာရေးယုံကြည်ချက်များသည် ကျမ်းစာပေါ်တွင်အခြေခံသည်ဟု ထင်မှတ်သည့်တိုင် ကျွန်ုပ်တို့အားလုံးသည် ယင်းတို့ကို အချိန်ယူ၍ ဂရုတစိုက်ဆင်ခြင်သုံးသပ်သင့်သည်။ မာတင်လူသာသည် သူ့ခေတ်၏ထုံးတမ်းစဉ်လာယုံကြည်ချက်ကို ကိုင်စွဲ၍ ဂိုပါနီဂပ်စ်ကိုရှုတ်ချခဲ့စဉ် သူ၌ ကျမ်းစာအထောက်အကူရှိသည်ဟု ယုံကြည်ခဲ့ကြောင်း အမှတ်ရပါ။ သို့ရာတွင် လူသာသည် ‘အလွန်ကြည်ညိုသောစေတနာစိတ်နှင့် နှုတ်ကပါဌ်တရားတော်ကိုခံယူ၍ မှန်သည်မမှန်သည်ကိုသိခြင်းငှာ စေ့စေ့ကြည့်ရှုကြ’ သူများဖြစ်သော ရှေးခေတ်ဗေရိမြို့သားများ၏ ပုံသက်သေကောင်းကို လိုက်လျှောက်ရန် ပျက်ကွက်ခဲ့သည်။—တမန်တော် ၁၇:၁၀၊ ၁၁။

ယေရှုခေတ်မှ ဂျူးအချို့တို့အပေါ် ထုံးတမ်းစဉ်လာယုံကြည်ချက်များကဖြစ်စေခဲ့သော ထိခိုက်နစ်နာမှုကို စဉ်းစားကြည့်ပါ။ သူတို့၏ထုံးတမ်းစဉ်လာများသည် မှန်ကန်သည်ဟု စိတ်အားထက်သန်စွာ သူတို့ယုံကြည်ခဲ့ကြသည်။ ယေရှု၏တပည့်တော်များ ထုံးတမ်းစဉ်လာများကို မစောင့်ထိန်း၍ သူတို့ပြင်းပြင်းထန်ထန်ဆန့်ကျင်ကန့်ကွက်သောအခါ ဤမေးခွန်းအားဖြင့် သူတို့ကို ယေရှုစိန်ခေါ်ခဲ့သည်– “သင်တို့သည် အဆက်ဆက်ခံသော နည်းဥပဒေသကိုအမှီပြု၍ ဘုရားသခင်၏ပညတ်တော်ကို အဘယ်ကြောင့်လွန်ကျူးကြသနည်း။” (မဿဲ ၁၅:၁-၃) ဘာများမှားနေသနည်း။ ပရောဖက်ဟေရှာယ၏ စကားများကို ယေရှုကိုးကားပြရာတွင် ပြဿနာကို ကိုယ်တော်ဖော်ပြခဲ့သည်– “လူတို့စီရင်သောပညတ်တို့ကိုသွန်သင်၍ နည်းဥပဒေသပေးလျက်ပင် [ဘုရားသခင်] ကို အချည်းနှီးကိုးကွယ်ကြ၏။”—မဿဲ ၁၅:၉; ဟေရှာယ ၂၉:၁၃။

မှန်ပါသည်၊ ဘုရားသခင်စတင်ပေါ်ပေါက်စေခဲ့သော အမှန်တရားများနေရာတွင် လူတို့စတင်ပေါ်ပေါက်စေသော သို့မဟုတ် ပို၍ဆိုးသည်မှာ နတ်ဆိုးများစတင်ပေါ်ပေါက်စေသော အကြံအစည်များကို အစားထိုးလိုက်ကြသည်။ ဥပမာ၊ ကျမ်းစာစောင်များအပေါ် ထိုးထွင်းသိမြင်ခြင်း၊ အတွဲ ၁၊ စာမျက်နှာ ၅၀၆ (လိပ်) က ဤသို့ရှင်းပြသည်– “လူတစ်ဦး မိမိ၏ဥစ္စာပစ္စည်းများကို ‘ကော်ဘန်’ သို့မဟုတ် ဘုရားသခင်ထံ ဆက်ကပ်အပ်နှံသောလက်ဆောင်ပစ္စည်းအဖြစ် ကြေညာလိုက်သည်နှင့် ဆင်းရဲကောင်းဆင်းရဲနေမည့် သူ့မိဘများ၏လိုအပ်ရာများကို ဖြည့်စွက်ပေးရန် ယင်းတို့ကိုအသုံးမပြုနိုင်တော့ပေ။ သို့သော်လည်း သူကရွေးချယ်မည်ဆိုလျှင် ယင်းဥစ္စာပစ္စည်းများကို သူသေဆုံးသည့်အချိန်အထိ မိမိအတွက်အသုံးပြုနိုင်သည်ဟု ထိုအချိန်က ဖာရိရှဲများ သွန်သင်ကြသည်။” အမှန်တရားနှင့်ဆိုင်သောရေကို ညစ်ညမ်းစေသော လူ့ဉာဏ်ပညာသည် ဂျူးတို့၏ဝိညာဉ်ရေးအပေါ် ဆိုးကျိုးများသက်ရောက်စေခဲ့သည်။ အများစုသည် ကြာရှည်စွာကပင် သူတို့စောင့်မျှော်ခဲ့သည့် မေရှိယကိုပင် ငြင်းပယ်ခဲ့ကြသည်။

ညစ်ညမ်းမှုကို ခရစ်ယာန်ဘောင်က ထပ်ဆင့်

ယေရှုသေဆုံးပြီးနောက်ပိုင်းတွင်လည်း ထပ်တူ ဝိညာဉ်ရေးပျက်ပြားမှု ဖြစ်ပျက်ခဲ့သည်။ ကိုယ်တော့်နောက်လိုက်များဟု ဆိုသူများစွာသောသူတို့သည် အသစ်သောသွန်သင်ချက်များအတွက် အခွင့်အာဏာအနေနှင့် နှုတ်တိုက်ထုံးတမ်းများကို အကိုးအကားပြုကြသည်။ မက်ကလင်းတော့နှင့် စထရောင်းတို့ရေးသားသော Cyclopedia of Biblical, Theological, and Ecclesiastical Literature ၏အလိုအရ အချို့သောအမည်ခံခရစ်ယာန်များက ဤကဲ့သို့သောထုံးတမ်းစဉ်လာများသည် “တမန်တော်ခေတ်မှ အဆင့်ဆင့်လွှဲပြောင်းပေးပို့ခဲ့သော၊ သူတို့ခေတ်အချိန်အထိတိုင် သန့်စင်စွာထိန်းသိမ်းထားခဲ့သည့် ကနဦးခရစ်ယာန်ချာ့ချ်များက တမန်တော်များနှုတ်မှရရှိသော လမ်းညွှန်ချက်များဖြစ်သည်” ဟု ထင်မှတ်ကြသည် ဟူ၏။—ကျွန်ုပ်တို့စာလုံးစောင်းထား။

အမှန်တကယ်၌ ဤထုံးတမ်းစဉ်လာအများတို့သည် မစင်ကြယ်သော၊ မှားယွင်းသည့် အကြံအစည်များဖြစ်ကြသည်။ Cyclopedia ရှင်းပြချက်အရ ဤအသစ်သောအတွေးအခေါ်များသည် “အခြားထုံးတမ်းစဉ်လာများနှင့်သာမကဘဲ သူတို့လက်ထဲတွင်ရှိသော တမန်တော်များ၏လက်ရေးစာပေများနှင့်ပင် ကွဲပြားသည်။” ယင်းသည် လုံးလုံးမမျှော်လင့်ထားသည့်အရာ မဟုတ်ပေ။ ခရစ်ယာန်များအား တမန်တော်ပေါလု ဤသို့သတိပေးခဲ့သည်– “ခရစ်တော်၏တရားကိုမလိုက်၊ လူအဆက်ဆက်ခံသော နည်းဥပဒေသနှင့် လောကီတရားနုကိုလိုက်၍ လောကီပညာနှင့် အချည်းနှီးသောပရိယာယ်အားဖြင့် သင်တို့ကို အဘယ်သူမျှမလုယူမဖျက်ဆီးစေခြင်းငှာ သတိပြုကြလော့။”—ကောလောသဲ ၂:၈။

ယနေ့ များစွာသော ထုံးတမ်းစဉ်လာယုံကြည်ချက်များသည်လည်း ‘တမန်တော်များ၏လက်ရေးစာပေများနှင့် ကွဲပြားသည်။’ ခရစ်ယာန်ဘောင်သည် သုံးပါးပေါင်းတစ်ဆူ၊ မီးငရဲ၊ မသေနိုင်သော လူ့ဝိညာဉ်စိုးလ်၊ လူမျိုးရေးစိတ်ဓာတ်နှင့် အရုပ်ကိုးကွယ်မှုကဲ့သို့သော နတ်ဆိုးမှုတ်သွင်းသည့် အကြံအစည်အမျိုးမျိုးအားဖြင့် အမှန်တရားရေကို အဆိပ်သင့်စေကြသည်။a (၁ တိမောသေ ၄:၁-၃) ခရစ်ယာန်ဘောင်၏ ထုံးတမ်းစဉ်လာသွန်သင်ချက်များဖြစ်လာသော နတ်ဆိုးသွန်သင်ချက်များ၏ သားကောင်ဖြစ်ရသူတို့အပေါ်လွှမ်းမိုးထားသည့် ဝိညာဏဖျားနာမှုကို သမိုင်းကသက်သေထူလျက်ရှိသည်။—ဟေရှာယ ၁:၄-၇ နှိုင်းယှဉ်။

ဤကဲ့သို့ အမှန်တရားကိုညစ်ညမ်းစေခြင်းသည် အမှန်အားဖြင့် လူသားအစကနဦးမှဖြစ်သည်။ စာတန်သည် လိမ်လည်လှည့်ဖြားမှုဖြင့် လူ့စိတ်သဘောကို အဆိပ်သင့်စေခြင်းတည်းဟူသော ဧဒင်၌ သူစတင်ခဲ့သည့်အစီအစဉ်ကို ဆက်လုပ်ဆောင်နေသည်။ (ယောဟန် ၈:၄၄; ၂ ကောရိန္သု ၁၁:၃) နောဧခေတ်ရေလွှမ်းမိုးပြီးနောက် ကမ္ဘာတစ်ဝန်း လူ့မိသားစုပျံ့နှံ့သွားသည်နှင့်အမျှ ယဉ်ကျေးမှုအသီးသီးမှ လူများသည် နတ်ဆိုးမှုတ်သွင်းသော အတွေးအခေါ်နှင့် အကြံအစည်များအားဖြင့် လူ့အသိပညာရေလှောင်ကန်များကို တမင်တကာအဆိပ်သင့်ခံရခြင်း၏ သားကောင်များဖြစ်လာကြသည်။

ဝိညာဏရေးရာညစ်ညမ်းမှု၏ အကျိုးဆက်များ

ဤကဲ့သို့သော ဝိညာဏရေးရာညစ်ညမ်းမှုက မည်သည့်ထိခိုက်နစ်နာမှုများကို ဖြစ်စေနိုင်သနည်း။ ကျွန်ုပ်တို့၏ ခန္ဓာကိုယ်ကျန်းမာရေးအပေါ် ညစ်ညမ်းသောရေကဖြစ်စေသည့် အကျိုးဆက်များနှင့် ယင်းကိုနှိုင်းယှဉ်နိုင်သည်။ အာဏာပိုင်တစ်ဦးက ဤသို့ဆိုသည်– “လူပေါင်းသန်း ၂၀၀ ခန့်သည် ညစ်ညမ်းသည့်ရေကြောင့်အရေပြားပေါ်တွင်ဖြစ်သည့် ရှစ်စတိုဆိုမာသန်စွဲနာ (ဗီလဟာဇီယာ သန်စွဲရောဂါ) [သွေးအားနည်းခြင်း၊ နာကျင်မှုဝေဒနာခံရခြင်း၊ သာမန်ဖျားနာခြင်းနှင့် သေခြင်းကိုပင်ဖြစ်စေသည့် အရေပြားရောဂါ] ၏ သားကောင်ဖြစ်ကြရသည်။ ညစ်ပတ်သည့်ရေများဖြင့် ဆေးကြောသန့်စင်ကြသည့်အတွက်ကြောင့် လူသန်းငါးရာတို့သည် မျက်စိကန်းခြင်း၏အဓိကအကြောင်းတရားဖြစ်သော မျက်ခမ်းစပ်ရောဂါဖြစ်ကြရသည်။ . . . လူသားမျိုးစိတ်အဝင်ဖြစ်သောသူ နှစ်ဘီလီယံခန့်တို့သည် အန္တရာယ်ကင်းသည့်သောက်သုံးရေ မရှိကြပါ။” (Our Country, the Planet) သန်းပေါင်းများစွာသောသူတို့သည် မှားယွင်းသည့်နတ်ဆိုးသွန်သင်ချက်များနှင့် ရောနှောနေသည့် ထုံးတမ်းစဉ်လာများကို လိုက်လျှောက်ခြင်း၏အကျိုးဆက်အဖြစ် ဝိညာဉ်ရေးအားနည်းခြင်း၊ ကန်းခြင်းနှင့် သေခြင်းပင် ဖြစ်နေကြသည်။—၁ ကောရိန္သု ၁၀:၂၀၊ ၂၁; ၂ ကောရိန္သု ၄:၃၊ ၄။

ဥပမာအနေနှင့် လူများစွာတို့သည် ယေရှုခရစ်နှင့် ကိုယ်တော်၏ခမည်းတော်၊ ယေဟောဝါဘုရားသခင်စပ်ကြားရှိ ဆက်နွှယ်မှုနှင့်ပတ်သက်၍ ရှုပ်ထွေး သို့မဟုတ် ကန်းနေကြသည်။ ယင်းက ခရစ်ယာန်များဖြစ်သည်ဟုဆိုသူအချို့ကြားတွင် ဘုရားသခင်၏မြင့်မြတ်သောနာမတော်ဖြစ်သော ယေဟောဝါကို ခရစ်ယာန်ဂရိကျမ်းစောင်များမှ ချန်လှပ်ထားရန်အတွက် ထုံးစံဖြစ်လာစေသည်။ Journal of Biblical Literature တွင် ဂျော့ ဟောက်ဝဒ်က ဤသို့ဆိုသည်– “ကျွန်ုပ်တို့၏အမြင်တွင် ဤတက်တြာဂရမ် [မီတန်] ကို ဖယ်ရှားခြင်းသည် ရှေးတစ်ပါးအမျိုးသားခရစ်ယာန်များ၏စိတ်ထဲတွင် ‘သခင်ဘုရား’ နှင့် ‘သခင်ခရစ်တော်’ အကြား ဆက်နွှယ်မှုနှင့်စပ်လျဉ်း၍ ရှုပ်ထွေးမှုကို ဖြစ်ပေါ်စေသည်။”

လူ့ဝိညာဉ်စိုးလ်သည် မသေနိုင်ဟူသည့် ကျမ်းစာနှင့်မညီညွတ်သောထုံးတမ်းစဉ်လာကဖြစ်ပေါ်စေသည့် ရှုပ်ထွေးမှု၊ အယူသီးမှုနှင့် ကြောက်ရွံ့မှုတို့ကိုလည်း စဉ်းစားကြည့်ပါ။ (ဒေသနာ ၉:၅; ယေဇကျေလ ၁၈:၄ နှိုင်းယှဉ်။) ဘိုးဘေးကိုးကွယ်မှုတွင် ချုပ်နှောင်ခံနေရသူ သို့မဟုတ် လူသေများ လာဒုက္ခပေးမည်ကို အမြဲကြောက်ရွံ့ကာအသက်ရှင်နေရသူ မည်မျှရှိသနည်း။ ဤယုံကြည်ချက်ကပင် မိမိကိုယ်ကိုနှင့် အခြားသူများကို သတ်ဖြတ်ရန် လူတို့အားလှုံ့ဆော်ပေးခဲ့သည်။

ဂျပန်လူမျိုးများစွာတို့က သေဆုံးပြီးနောက် သူတို့၏ခွဲထွက်သွားသောဝိညာဉ်များသည် တမလွန်ဘဝတွင် ပြန်ဆုံကြလိမ့်မည်ဟု ထင်မှတ်ကြသည်။ ထို့ကြောင့် ကိုယ့်ကိုယ်ကိုသေကြောင်းကြံသောမိဘအချို့တို့သည် သူတို့၏သားသမီးများကိုပါ သတ်ခြင်းသည်အကောင်းဆုံးဖြစ်မည်ဟု ထင်ကြသည်။ An English Dictionary of Japanese Ways of Thinking က ဤသို့ရှင်းပြသည်– “ဂျပန်တွင် ကိုယ့်ကိုယ်ကိုသေကြောင်းကြံခြင်းသည် အမြဲပြစ်တင်ရှုတ်ချစရာမဟုတ်ဘဲ လူတစ်ဦး၏ကြီးလေးသောအပြစ်ကို ဝန်ချတောင်းပန်ရန် လက်သင့်ခံဖွယ်သောနည်းလမ်းအဖြစ် သဘောပိုက်တတ်ကြသည်။ . . . မိသားစုလိုက် ကိုယ့်ကိုယ်ကိုသေကြောင်းကြံခြင်းကိုပင် စာနာထောက်ထားသည့်စကားလုံးများဖြင့် သတင်းစာတွင် ဖော်ပြကောင်းဖော်ပြထားပေလိမ့်မည်။”

ထုံးတမ်းစဉ်လာများကို ဆန်းစစ်ပါ

ထုံးတမ်းစဉ်လာယုံကြည်ချက်များနှင့် ဓလေ့များကို အဆင်အခြင်မဲ့လိုက်လျှောက်ခြင်းသည် အန္တရာယ်ရှိသောကြောင့် ကျွန်ုပ်တို့ဘာလုပ်သင့်သနည်း။ ပထမရာစုကုန်ခါနီးအချိန်တွင် တမန်တော်ယောဟန်က ခရစ်ယာန်ချင်းတို့အား ဤအကြံဉာဏ်ကိုပေးခဲ့သည်– “ချစ်သူတို့ ခပ်သိမ်းသောစိတ်ဝိညာဉ်တို့ကို မယုံကြနှင့်။ စိတ်ဝိညာဉ်တို့သည် ဘုရားသခင်နှင့်စပ်ဆိုင်သည် မစပ်ဆိုင်သည်ကို စုံစမ်းကြလော့။ အကြောင်းမူကား မိစ္ဆာပရောဖက်အများတို့သည် ဤလောကသို့ သွားကြပြီ။” (၁ ယောဟန် ၄:၁; ၁ သက်သာလောနိတ် ၅:၂၁ ကိုလည်းရှု။) ထုံးတမ်းစဉ်လာတစ်ခုသည် အန္တရာယ်ရှိသည် မရှိသည်ကို ကျွန်ုပ်တို့မည်သို့သိရှိမည်နည်း။ သင်ယုံကြည်သည့်အရာကို ဆန်းစစ်ဖို့ရန် အခွင့်အာဏာပိုင်ကဲ့သို့သော စင်ကြယ်ခြင်းဆိုင်ရာစံနှုန်းလိုပေသည်။

သမ္မာကျမ်းစာသည် ယင်းကဲ့သို့သော အခွင့်အာဏာပိုင်ဖြစ်သည်။ ယေရှုခရစ် ဤသို့မိန့်ဆိုခဲ့သည်– “သမ္မာတရားအားဖြင့် သူတို့ကို သန့်ရှင်းစေတော်မူပါ။ ကိုယ်တော်၏နှုတ်ကပါဌ်သည် သမ္မာတရားဖြစ်ပါ၏။” (ယောဟန် ၁၇:၁၇) ကိုယ်တော်က ဤသို့လည်းမိန့်ဆိုသေးသည်– “ကိုးကွယ်သောသူမှန်သမျှတို့သည် ခမည်းတော်ကို နာမ်ဝိညာဉ်နှင့်လည်းကောင်း၊ သစ္စာတရားနှင့်လည်းကောင်း ကိုးကွယ်ရမည့်အချိန်ကာလသည် လာ၍ယခုပင်ရောက်လျက်ရှိ၏။” (ယောဟန် ၄:၂၃) ဘုရားသခင်မှုတ်သွင်းတော်မူသောနှုတ်ကပါဌ်တော်ကို အသုံးပြုခြင်းအားဖြင့် လူနှင့်နတ်ဆိုးတို့၏ အတွေးအခေါ်များနှင့်ဆိုင်သော ညစ်ညမ်းသည့်ရေများအစား စင်ကြယ်သည့် သမ္မာတရားရေကို သင်ရရှိပေမည်။—ယောဟန် ၈:၃၁၊ ၃၂; ၂ တိမောသေ ၃:၁၆။

ညစ်ညမ်းစေသည့်အရာ အနည်းငယ်ကပင် ကြောက်မက်ဖွယ်သော အကျိုးသက်ရောက်မှုရှိနိုင်ကြောင်း မမေ့ပါနှင့်။ တစ်ခါတစ်ရံ နှစ်ချီ၍ကြာပြီးမှ အကျိုးအာနိသင်ပေါ်လာတတ်သည်။ ကမ္ဘာ့ထိန်းသိမ်းစောင့်ရှောက်ရေးသမဂ္ဂ၏ဥက္ကဋ္ဌဟောင်း စရင်ဒက် ရပ်ဖာက ဤသို့ဆိုသည်– “ညစ်ပတ်သောရေသည် အန္တရာယ်အကြီးမားဆုံးသော ကမ္ဘာ့လူသတ်ကောင်ကြီး ဖြစ်လာပေပြီ။ ယင်းကိုအသုံးပြုသောကြောင့် အနည်းဆုံး လူနှစ်သောင်းငါးထောင် နေ့စဉ်သေနေကြသည်။” ဝိညာဉ်ရေးဆိုင်ရာ ညစ်ညမ်းနေသည့်ထုံးတမ်းစဉ်လာများသည်လည်း သာ၍ပင်အန္တရာယ်ရှိပေသည်။

နှစ်ချီ၍ သင်လိုက်လျှောက်ခဲ့သည့် ထုံးတမ်းစဉ်လာယုံကြည်ချက်သည် အမှန်တရားနှင့်ဆန့်ကျင်ဘက်ဖြစ်နေလျှင် ယင်းမှရုန်းထွက်ရန် သင်သတ္တိရှိသလော။ သတိပေးချက်များကို လိုက်နာပါ။ သင့်ထုံးတမ်းစဉ်လာများသည် ဘုရားသခင်၏ စင်ကြယ်သောနှုတ်ကပါဌ်တော်အမှန်တရားနှင့် ကိုက်ညီမှုရှိမရှိ သေချာအောင်လုပ်ခြင်းအားဖြင့် သင့်မိသားစုနှင့် သင့်ကိုယ်ကို ကာကွယ်ပါလေ။—ဆာလံ ၁၉:၈-၁၁; သု. ၁၄:၁၅; တမန်တော် ၁၇:၁၁။

[အောက်ခြေမှတ်ချက်များ]

[စာမျက်နှာ ၇ ပါ ရုပ်ပုံ]

ဘုရားသခင့်နှုတ်ကပါဌ်တော်အမှန်တရားသည် သန့် ရှင်းကြည်လင်သည့်ရေ စီးဆင်းနေသော မြစ်နှင့်တူသည်