အငြိမ်းစားယူခြင်း—သီအိုကရက်တစ်လှုပ်ရှားမှုအတွက် ပွင့်လျက်ရှိသောတံခါးတစ်ခုလော

အငြိမ်းစားယူခြင်း—များစွာသောသူတို့အတွက် ၎င်းသည် နှစ်ရှည်လများ ဖိစီးမှုနှင့် စိတ်အနှောင့်အယှက်ဖြစ်ဖွယ်တံခါးကြီး ပိတ်သွားခြင်းဖြစ်၏။ များစွာသောသူတို့သည် ငြီးငွေ့ဖွယ်ကောင်းသော သို့မဟုတ် ယောက်ယက်ခတ်နေသော နေ့စဉ်လုပ်ငန်းဆောင်တာများ၌ ချောင်ပိတ်မိနေပြီးနောက် အငြိမ်းစားယူခြင်းက ကိုယ်ပိုင်လွတ်လပ်ခွင့်နှင့် သက်သောင့်သက်သာရှိမည့် နှစ်များအတွက် တံခါးဖွင့်ပေးရန် မျှော်လင့်စောင့်စားတတ်ကြသည်။ သို့သော်လည်း အားလုံးတို့အတွက် ထိုတံခါးသည် ငြီးငွေ့ဖွယ်ကောင်းပြီး ပင်ပန်းနွမ်းနယ်ဖွယ်ဖြစ်လေ့ရှိ၏။ အပန်းဖြေခြင်းနှင့် ဝါသနာရပ်များသည် အလုပ်ကဲ့သို့ တန်ဖိုးရှိသည့်အမြင်မျိုးကို လုံးလုံးမပေးချေ။

ယေဟောဝါသက်သေများအတွက်မူ အငြိမ်းစားယူခြင်းသည် ‘လှုပ်ရှားမှုအတွက် အလွန်ကြီးစွာသောတံခါးတစ်ချပ်’ ပွင့်သွားစေနိုင်၏။ (၁ ကောရိန္သု ၁၆:၉) အသက်အရွယ်ကြီးရင့်လာခြင်း၌ ပြဿနာနှင့် ကန့်သတ်မှုများရှိသည်မှန်သော်လည်း အချို့သောသက်ကြီးရွယ်အိုတို့သည် ယေဟောဝါ၏အကူအညီတော်အားဖြင့် ကိုယ်တော့်အမှုထမ်းခြင်းကို တိုးချဲ့နိုင်ကြောင်းတွေ့ မြင်ကြလေသည်။ နယ်သာလန်နိုင်ငံတွင်ရှိသော သက်ကြီးရွယ်အိုခရစ်ယာန်အချို့၏ တွေ့ ကြုံမှုများကို သုံးသပ်ကြည့်ပါ။ ၁၉၉၅ လုပ်ငန်းတော်နှစ်အတွင်း ၁,၂၂၃ ယောက်ထက်မကသော ရှေ့ဆောင်များ (အချိန်ပြည့်ဘုရားသခင့်နိုင်ငံတော်ကြွေးကြော်သူများ) အနက်မှ ၂၆၉ ယောက်တို့သည် အသက် ၅၀ နှင့် ထိုထက်အသက်ကြီးသောသူများဖြစ်ကြသည်။ ထိုအထဲမှ ၈၁ ယောက်သောသူတို့သည် ၆၅ နှစ်နှင့် ထိုထက်အသက်ကြီးသူများဖြစ်ကြသည်။

အချို့သောသူတို့သည် လောကီအလုပ်၌ရှိစဉ်က လုပ်ဆောင်ခဲ့သောနှုန်းအတိုင်း ဆက်လက်လုပ်ဆောင်ခြင်းအားဖြင့် ရှေ့ဆောင်နိုင်ကြသည်။ (ဖိလိပ္ပိ ၃:၁၆ နှိုင်းယှဉ်။) ကာရလ် အမည်ရှိ အငြိမ်းစားယူထားသောခရစ်ယာန်တစ်ဦးက “ကျွန်တော်လောကအလုပ်လုပ်တုန်းက နံနက် ၇:၃၀ မှာ ကျွန်တော်အလုပ်စလေ့ရှိတယ်။ ကျွန်တော်ပင်စင်စရတဲ့အချိန်မှာ အဲဒီအလေ့အထကိုပဲဆက်ထိန်းသိမ်းဖို့ ဆုံးဖြတ်ခဲ့တယ်။ နံနက် ခုနစ်နာရီတိုင်း ဘူတာရုံရှေ့မှာ မဂ္ဂဇင်းနဲ့ လမ်းပေါ်သက်သေခံခြင်းအားဖြင့် တစ်နေ့တာကို ကျွန်တော်အစပြုပါတယ်” ဟု ပြန်ပြောင်းပြောပြသည်။

ဂရုတစိုက်အစီအစဉ်ဆွဲခြင်းကလည်း အောင်မြင်မှု၏သော့ချက်တစ်ခုဖြစ်၏။ (သု. ၂၁:၅) ဥပမာအနေနှင့် အချို့သူတို့သည် သူတို့၏ဓမ္မအမှု၌ ကိုယ့်ကိုယ်ကိုထောက်ပံ့နိုင်ရန် ငွေအလုံအလောက်စုဆောင်းထားနိုင်ခဲ့ကြသည်။ အခြားသူများက ကိုယ်ပိုင်အသုံးစရိတ်များကို လျှော့ချပြီး အချိန်ပိုင်းအလုပ်ကိုလုပ်ရန် ဆုံးဖြတ်ကြသည်။ သီအိုဒေါရ်နှင့် အဲန်းတို့ကိုကြည့်ပါ။ သူတို့သည် အိမ်ထောင်သည်ဘဝအသက်တာကို ရှေ့ဆောင်များအဖြစ် စတင်ခဲ့ပြီး မိသားစုတာဝန်များက ရှေ့ဆောင်လုပ်ငန်းမှရပ်နားရန် တောင်းဆိုလာသည့်အချိန်အထိ လုပ်ဆောင်ခဲ့ကြသည်။ သို့သော် သူတို့၏ရှေ့ဆောင်စိတ်ဓာတ်သည် ရှင်သန်လျက်ပင်ရှိနေသေးသည်တကား! သူတို့၏သမီးများကြီးပြင်းလာသည်နှင့်အမျှ ရှေ့ဆောင်လုပ်ကြရန် အမြဲအားပေးတိုက်တွန်းခံရကြသည်။ ပို၍အရေးကြီးသည်ကား သီအိုဒေါရ်နှင့် အဲန်းတို့သည် မကြာခဏအရန်ရှေ့ဆောင်လုပ်ခြင်းအားဖြင့် ပုံသက်သေကောင်းကို တင်ပြကြသည်။ ကလေးမများကြီးပြင်းလာသောအခါ သီအိုဒေါရ်နှင့် အဲန်းတို့သည် လယ်ကွင်းလုပ်ငန်းအတွက် ပို၍အချိန်ရရန် လောကီအလုပ်ကို စ၍လျှော့ချလိုက်ကြသည်။

သူတို့၏သမီးများ အချိန်ပြည့်ဓမ္မအမှုလုပ်ငန်းသို့ ဝင်ရောက်သွားပြီး အိမ်မှထွက်ခွာသွားကြသည့်နောက် အဲန်း ရှေ့ဆောင်စလုပ်သည်။ တစ်နေ့တွင် သီအိုဒေါရ်ကို အလုပ်မှထွက်ရန် သူမအားပေးခဲ့သည်။ “ကျွန်မတို့နှစ်ယောက်စလုံး ရှေ့ဆောင်လုပ်နိုင်ပါတယ်” ဟု သူမအကြံပေး၏။ သီအိုဒေါရ်က မိမိ၏ရည်ရွယ်ချက်များကို အလုပ်ရှင်အား ပြောပြခဲ့သည်။ သူအံ့သြသွားခဲ့ရသည်မှာ သူ၏သူဌေးက “ဟိုး [ကောင်းကင်] အပေါ်က ခင်ဗျားရဲ့သူဌေးအတွက် အချိန်ပြည့်အလုပ်လုပ်ပေးချင်နေတယ်ထင်တယ်” ဟု ပြော၍ သူ့ကို အချိန်ပိုင်းအလုပ်ပေးခြင်းအားဖြင့် အကူအညီပေးခဲ့သည်။ ယခု သီအိုဒေါရ်နှင့် အဲန်းတို့သည် ရှေ့ဆောင်လုပ်ငန်းတွင် အတူတကွ ရွှင်လန်းစွာ အမှုဆောင်လျက်ရှိကြလေသည်။

အချို့သူတို့သည် သူတို့၏ဘဝအသက်တာ၌ ပေါ်ပေါက်လာသောအခြေအနေများကို တုံ့ပြန်သောအားဖြင့် ရှေ့ဆောင်စလုပ်ကြလေသည်။ သမီးနှင့်မြေး သေဆုံးခြင်းက သက်ကြီးရွယ်အိုမောင်နှံစုံတစ်စုံအတွက် သူတို့၏ကျန်ရှိသောအသက်တာကို အသုံးချသည့်နည်းလမ်းနှင့်ပတ်သက်၍ အကြီးအကျယ်စဉ်းစားစရာဖြစ်စေခဲ့သည်။ (ဒေသနာ ၇:၂) ပူဆွေးဝမ်းနည်းမှု၏ ဝါးမျိုခြင်းကိုခံမည့်အစား အချိန်ပြည့်လုပ်ငန်းကို စတင်လုပ်ဆောင်ခဲ့ကြသည်။ ယခု သူတို့ပျော်ရွှင်စွာအမှုထမ်းလာသည်မှာ ရှစ်နှစ်ကျော်ခဲ့ပြီတကား!

ဝန်ခံရမည်မှာ အချိန်ပြည့်ဓမ္မအမှုတွင် ဆက်လက်ပါဝင်နိုင်ရန် လက်တွေ့ကျသောဆုံးဖြတ်ချက်ကို ချရပေသည်။ ဥပမာအနေနှင့် အဲန်စ်နှင့် သူ၏ဇနီးရစ်ခ်သည် သူတို့၏ကလေးများ အိမ်ခွဲသွားလျှင်သွားခြင်း ရှေ့ဆောင်စလုပ်ကြသည်။ ထို့နောက်မကြာမီပင် ယခင်စီးပွားရေးအလုပ်ဖော်တစ်ဦးက အဲန်စ်ကို အကျိုးအမြတ်များသော လုပ်ငန်းတစ်ခု ကမ်းလှမ်းခဲ့သည်။ “ကျွန်တော်တို့မှာ အကောင်းဆုံးအလုပ်ရှင် ရှိနေပါပြီ။ ကျွန်တော်တို့ သူ့ကို မစွန့်လွှတ်ချင်ဘူးဗျာ!” ဟု အဲန်စ် အဖြေပေးခဲ့သည်။ အဲန်စ်နှင့် သူ၏ဇနီးတို့သည် ယေဟောဝါ၏ “လုပ်ငန်းတော်” ၌ ဆက်လက်လုပ်ဆောင်နေခဲ့ကြသောကြောင့် သူတို့အတွက် အခြားလုပ်ငန်းတော်အခွင့်အရေးများ ပွင့်လာခဲ့သည်။ သူတို့သည် တိုက်နယ်လုပ်ငန်း၌ နှစ်ပေါင်း ၂၀ ကျော်ကြာ အမှုထမ်းဆောင်ခဲ့ပြီး ယနေ့ထက်တိုင် ရှေ့ဆောင်များအဖြစ် ဆက်လက်လုပ်ဆောင်နေကြသည်။ သူတို့၏ကိုယ်ကျိုးစွန့်လမ်းစဉ်အတွက် သူတို့နောင်တရခဲ့ကြသလော။ “ယေဟောဝါအလိုရှိမယ်ဆိုရင် နောက်သုံးလကျရင် ရွှေရတုနှစ်ပတ်လည်လို့ခေါ်ကြလေ့ရှိတဲ့ ကျွန်တော်တို့ရဲ့ နှစ် ၅၀ မြောက်မင်္ဂလာနှစ်ကို ကျင်းပဖို့ မျှော်လင့်ပါတယ်။ ဒါပေမဲ့ ကျွန်တော်တို့ရဲ့ တကယ့်ပျော်ရွှင်ချမ်းမြေ့စရာမင်္ဂလာနှစ်ဟာ ကျွန်တော်တို့ရှေ့ဆောင်လုပ်တဲ့အချိန်ကစတယ်လို့ ယုံကြည်စိတ်ချမှုအပြည့်နဲ့ ကျွန်တော်တို့ပြောရဲပါတယ်” ဟု မကြာသေးမီက ထိုမောင်နှံစုံတို့ ရေးသားခဲ့ကြသည်။

ပို၍လှုပ်ရှားလုပ်ဆောင်ခွင့်ရှိသောတံခါးသည် ပို၍လည်း ပျော်ရွှင်မှုရှိစေကြောင်း များစွာသောသူတို့တွေ့ရှိခဲ့ကြပြီ! အသက် ၆၅ နှစ်ပြည့်ပြီး နှစ်ပတ်ကျော်တွင် ရှေ့ဆောင်စလုပ်ခဲ့သော ညီအစ်ကိုတစ်ဦးက “လွန်ခဲ့တဲ့ဆယ်နှစ်တာ ရှေ့ဆောင်လုပ်ငန်းမှာလို ကောင်းချီးတွေနဲ့ကြွယ်ဝလှတဲ့ ဘဝအသက်တာမျိုး ကျွန်တော်တစ်ခါမှ မကြုံတွေ့မခံစားခဲ့ဖူးဘူးလို့ ပြောရမှာပဲ” ဟု ဆိုလေသည်။ “ကျွန်တော်တို့လိုအသက်အရွယ်၊ ကျွန်တော်တို့လိုအခြေအနေတွေမျိုးနဲ့ ဇနီးမောင်နှံဟာ တခြားဘာများလုပ်နေသင့်သလဲ။ ရပ်ကွက်ထဲမှာ ကျွန်တော်တို့လိုလူမျိုးတွေက အိမ်မှာ သက်သောင့်သက်သာနဲ့နေနေကြတာဟာ ဝဖိုင့်၊ အိုမင်းရင့်ရော်လာပြီး သွက်လက်မှုမရှိတော့ဘဲဖြစ်လာကြတာကို ကျွန်တော်တို့မကြာခဏတွေ့ကြရတယ်။ လုပ်ငန်းတော်က ကျွန်တော်တို့ကို စိတ်ဓာတ်ရေးမှာကော ကာယရေးမှာပါ ကျန်းမာမှုရှိစေတယ်။ ကျွန်တော်တို့ဟာ အမြဲအတူတူရှိနေတတ်ပါတယ်။ အားပါးတရရယ်မောကြပြီး ဘဝအသက်တာမှာ ပျော်ပိုက်လျက်ရှိတုန်းပါပဲ” ဟု ခုနစ်နှစ်ကျော်ကြာမျှ ရှေ့ဆောင်လုပ်လာခဲ့သော မောင်နှံစုံတစ်စုံက ပြောပြသည်။

သက်ကြီးရွယ်အိုအားလုံးတို့၌ ရှေ့ဆောင်လုပ်နိုင်သော အခြေအနေမျိုး မရှိကြချေ။ ယေဟောဝါသည် ကိုယ်တော်၏လုပ်ငန်းတော်၌ သူတို့လုပ်နိုင်သော အဘယ်အရာကိုမဆို တန်ဖိုးထားကြောင်း အဆိုပါခရစ်ယာန်များ စိတ်ချနိုင်သည်။ (မာကု ၁၂:၄၁-၄၄ နှိုင်းယှဉ်။) ဥပမာအနေနှင့် ကိုယ်လက်မသန်မစွမ်းဖြစ်နေသော ညီအစ်မတစ်ဦးသည် ပုဂ္ဂလိကဆေးရုံတွင်သာ နေရရှာသည်။ သို့သော်လည်း လှုပ်ရှားမှုတံခါးမှာ သူမအတွက် ပွင့်လျက်ရှိနေဆဲပင်ဖြစ်သည်တကား! ဆရာဝန်တစ်ဦးက အချိန်များကို သူမမည်သို့ကုန်လွန်စေကြောင်း မေးခဲ့သည်။ “ကျွန်မအတွက် အချိန်ဟာ တိုတောင်းလွန်းလှပါတယ်လို့ သူ့ကို ပြောပြတော့ သူနားမလည်နိုင်အောင်ဖြစ်နေတယ်။ ကျွန်မရဲ့နေ့ရက်များဟာ စိတ်ကျေနပ်ဖွယ်လှုပ်ရှားမှုတွေနဲ့ပြည့်နေတဲ့အတွက်ကြောင့်ပါပဲလို့ ကျွန်မ သူ့ကိုပြောပြတယ်။ ကျွန်မအထီးကျန်မဖြစ်ပါဘူး။ အထီးကျန်ဖြစ်နေတဲ့သူတွေကိုလိုက်ရှာပြီး လူသားတွေအတွက် အနာဂတ်မှာ ဘုရားသခင်လုပ်ပေးမယ့်အရာတွေကို သူတို့ကို ပြောပြဖို့ကြိုးစားပါတယ်” ဟု သူမပြောပြသည်။ “အသက် ၈၀ နီးပါးရှိတဲ့ သူတစ်ဦးဆီက လူတွေ ဘာမှသိပ်ပြီးမျှော်လင့်နိုင်မှာ မဟုတ်ပါဘူး။ ယေဟောဝါဆီကို လူတွေအများကြီး ဆက်ခေါ်ဆောင်လာနိုင်ဖို့ ကျွန်မအတွက် ဆုတောင်းပေးကြပါ” ဟု ပြောဆိုလျက် ကိစ္စရပ်များကို သူမအကျဉ်းချုပ်၍ဖော်ပြခဲ့သည်။

သင်သည် အငြိမ်းစားယူရတော့မည့် အသက်အရွယ်သို့ ရောက်ပြီလော။ သက်သောင့်သက်သာရှိမည့် တံခါးဝက ဆွဲဆောင်မှုအလွန်ရှိမည်ဖြစ်သော်လည်း ယင်းသည် ကြွယ်ဝသောဝိညာဏကောင်းချီး ရရှိစေမည့် တံခါးတော့မဟုတ်ချေ။ သင်၏အခြေအနေများကို အလေးအနက်ထားစဉ်းစားပါ။ ယေဟောဝါ၏လုပ်ငန်းတော်၌ လှုပ်ရှားဆောင်ရွက်စရာများစွာရှိသည့် တံခါးသို့ သင်ဝင်ရောက်နိုင်ကောင်း ဝင်ရောက်သွားနိုင်ပေမည်။

[စာမျက်နှာ ၂၅ ပါ ရုပ်ပုံ]

အငြိမ်းစားယူခြင်းက ဓမ္မအမှုတွင် ပို၍လှုပ်ရှားမှု ပြုစေနိုင်သည်