‘ငါသည်သန့်ရှင်းသောကြောင့် သင်တို့သည်လည်း သန့်ရှင်းခြင်းရှိရကြမည်’

“သင်တို့၏ဘုရားသခင် ငါထာဝရဘုရားသည် သန့်ရှင်းသောကြောင့် သင်တို့လည်း သန့်ရှင်းခြင်းရှိကြလော့။” —ဝတ်ပြုရာ ၁၉:၂။

၁-၃။ (က) “သန့်ရှင်းသော” နှင့် “သန့်ရှင်းခြင်း” ဟူသည့်စကားလုံးတို့၏ အဓိပ္ပာယ်ကား အဘယ်နည်း။ (ခ) ဖြေကြားရန် လိုအပ်သော မေးခွန်းအချို့ကား အဘယ်နည်း။

“သန့်ရှင်းသော” ဟူသည့်စကာလုံးကို “၁။ . . . ဘုရားသခင့်ဘုန်းတန်ခိုးတော်နှင့် ဆက်စပ်မှုရှိသော; အလေးအမြတ်ထားအပ်သော။ ၂။ ဝတ်ပြုကိုးကွယ်မှု သို့မဟုတ် ကြည်ညိုလေးစားမှု ခံရသော သို့မဟုတ် ခံရရန်ထိုက်တန်သော . . . ၃။ တိကျသော သို့မဟုတ် မြင့်မားသော စာရိတ္တစံနှုန်းရှိ ဘာသာရေးဆိုင်ရာ သို့မဟုတ် ဝိညာဏဆိုင်ရာစနစ်နှင့်အညီ အသက်ရှင်သော . . . ၄။ ဘာသာတရားအတွက် ရွေးချယ်ခံထားရသော သို့မဟုတ် သီးခြားဖယ်ထားခြင်းခံရသော” ဟူ၍ အနက်အဓိပ္ပာယ်ဖွင့်ဆိုထားလေသည်။ ကျမ်းစာဆိုင်ရာ ရှေ့နောက်စကားများ၌ သန့်ရှင်းခြင်းသည် “ဘာသာရေးဆိုင်ရာ သန့်ရှင်းစင်ကြယ်ခြင်း; အလေးအမြတ်ထားခြင်း” ဟု အဓိပ္ပာယ်ရပေသည်။

^၂ Insight on the Scriptures ဟူသည့် သမ္မာကျမ်းစာဆိုင်ရာ အကိုးအကားစာအုပ်အရ “မူရင်းဟေဗြဲ [စကားလုံး] ကိုဒက်ချ် သည် ဘုရားသခင်အတွက် ခွဲခြားထားခြင်း၊ သပ်သပ်ဖယ်ထားခြင်း သို့မဟုတ် သန့်ရှင်းမြင့်မြတ်စေခြင်း၊ . . . ဘုရားသခင်၏လုပ်ငန်းတော်အတွက် သီးခြားပယ်ချန်ထားခြင်းခံရသည့် အခြေအနေဟူ၍ သဘောသက်ရောက်လေသည်။”a

^၃ ဣသရေလလူမျိုးတို့သည် သန့်ရှင်းမှုရှိကြရန် မိန့်မှာခံရသည်။ “ငါသည် သင်တို့ဘုရားသခင်ထာဝရဘုရားဖြစ်၏။ ငါသည် သန့်ရှင်းသောကြောင့် သင်တို့လည်း ကိုယ်ကိုကိုယ်သန့်ရှင်းစေ၍ သန့်ရှင်းခြင်းရှိရကြမည်” ဟူ၍ ဘုရားသခင့်ပညတ်တော်က ဖော်ပြ၏။ သန့်ရှင်းမှု၏အရင်းအမြစ်ကား မည်သူနည်း။ မစုံလင်သူ ဣသရေလလူမျိုးတို့သည် မည်သို့သန့်ရှင်းမှုရှိနိုင်ကြမည်နည်း။ ထို့ပြင် သန့်ရှင်းမှုရှိရန် ယေဟောဝါ၏တောင်းဆိုမှုမှ ယနေ့ ကျွန်ုပ်တို့အတွက် အဘယ်သင်ခန်းစာ ရယူနိုင်မည်နည်း။—ဝတ်ပြုရာ ၁၁:၄၄။

သန့်ရှင်းမှု၏အရင်းအမြစ်နှင့် ဣသရေလတို့ ဆက်စပ်နေပုံ

၄။ ယေဟောဝါ၏သန့်ရှင်းမှုကို ဣသရေလတို့၌ မည်သို့နမူနာတင်ပြထားသနည်း။

^၄ ယေဟောဝါဘုရားသခင်ကို ဣသရေလတို့၏ဝတ်ပြုကိုးကွယ်မှုနှင့် ပတ်သက်စပ်လျဉ်းသည့်အရာအားလုံးတို့ကို သန့်ရှင်းသည်ဟု ယူမှတ်ရမည်ဖြစ်ပြီး ထိုကဲ့သို့ပင် ပြုမူရမည်ဖြစ်သည်။ အဘယ်ကြောင့် ထိုသို့ပြုမူယူမှတ်ရမည်နည်း။ အကြောင်းမှာ ယေဟောဝါသည် သန့်ရှင်းမှု၏မူလအမြစ်ဖြစ်တော်မူသောကြောင့်ဖြစ်၏။ သန့်ရှင်းသောတဲတော်၊ ဝတ်စားတန်ဆာများနှင့် အလှအပများကို ပြင်ဆင်ခြင်းဆိုင်ရာ မောရှေ၏မှတ်တမ်းသည် “သန့်ရှင်းသော . . . ပြားကိုလည်း ရွှေစင်နှင့်လုပ်၍ တံဆိပ်ပေါ်မှာ အက္ခရာတင်သကဲ့သို့ ‘ထာဝရဘုရားအား သန့်ရှင်းခြင်း’ ဟု အက္ခရာတင်” လေ၏ဟူသည့်စကားများဖြင့် နိဂုံးချုပ်ထားသည်။ ရွှေစင်နှင့်ပြုလုပ်ထားသော အဆိုပါ . . . ကို ယဇ်ပုရောဟိတ်မင်းကြီး၏ခေါင်းပေါင်းတွင် ကပ်ထားပြီး ၎င်းက သူ့ကို အထူးသန့်ရှင်းသောလုပ်ငန်းတော်အတွက် သီးခြားဖယ်ထားသည်ဟု အဓိပ္ပာယ်သက်ရောက်စေလေသည်။ နေရောင်တွင် တဖိတ်ဖိတ်တောက်နေသော ဤကမ္ပည်းထိုးထားသည့်အမှတ်အသားကို ဣသရေလလူမျိုးတို့တွေ့ မြင်ရသောအခါ ယေဟောဝါ၏သန့်ရှင်းမှုနှင့်ပတ်သက်၍ သူတို့သတိပေးနှိုးဆော်ခံရလေ့ရှိသည်။—ထွက်မြောက်ရာ ၂၈:၃၆; ၂၉:၆; ၃၉:၃၀။

၅။ မစုံလင်သူ ဣသရေလလူမျိုးကို သန့်ရှင်းသည်ဟု မည်သို့ယူမှတ်နိုင်မည်နည်း။

^၅ သို့သော် ဣသရေလလူမျိုးတို့သည် မည်သို့ သန့်ရှင်းမှုရှိလာနိုင်မည်နည်း။ ယေဟောဝါနှင့် သူတို့၏ရင်းနှီးသောဆက်ဆံမှု၊ ကိုယ်တော့်ကို စင်ကြယ်စွာဝတ်ပြုကိုးကွယ်မှုအားဖြင့်သာဖြစ်သည်။ ကိုယ်ကာယနှင့် ဝိညာရေးစင်ကြယ်မှုဖြင့် သန့်ရှင်းစွာကိုယ်တော့်ကိုဝတ်ပြုကိုးကွယ်နိုင်ရန်အလို့ငှာ “သန့်ရှင်းတော်မူသောဘုရား” နှင့်ဆိုင်သည့် တိကျမှန်ကန်သောအသိပညာကို သူတို့လိုအပ်သည်။ (သု. ၂:၁-၆; ၉:၁၀) ထို့ကြောင့် ဣသရေလလူမျိုးတို့သည် စင်ကြယ်သော ရည်ရွယ်ချက်၊ စင်ကြယ်သော နှလုံးအားဖြင့် ဘုရားသခင်ကို ဝတ်ပြုကိုးကွယ်ရမည်ဖြစ်သည်။ အရေခြုံသော အဘယ်ဝတ်ပြုကိုးကွယ်မှုပုံစံကိုမဆို ယေဟောဝါ ရွံရှာတော်မူလေသည်။—သု. ၂၁:၂၇။

ဣသရေလတို့ကို ယေဟောဝါရှုတ်ချရသည့်အကြောင်း

၆။ မာလခိခေတ်ရှိ ဂျူးတို့သည် ယေဟောဝါ၏စားပွဲတော်ကို မည်သို့ပြုမူဆက်ဆံခဲ့ကြသနည်း။

^၆ ညံ့ဖျင်း၍ အပြစ်အနာအဆာများရှိသော ပူဇော်သကာများကို ဗိမာန်တော်သို့ စိတ်မပါ့တပါဖြင့် ဣသရေလလူမျိုးများ ယူဆောင်လာစဉ်အခါက ၎င်းကို ရှင်းလင်းစွာသရုပ်ဖော်ပြထားလေသည်။ “‘သင်တို့ကို ငါအလိုမရှိ၊ သင်တို့ပြုသောပူဇော်သကာကို ငါလက်မခံ’ ဟု ကောင်းကင်ဗိုလ်ခြေအရှင်ထာဝရဘုရားမိန့်တော်မူ၏။ . . . ‘သင်တို့က “ထာဝရဘုရား၏စားပွဲတော်သည် ညစ်ညူး၏။ တင်ထားသောဘောဇဉ်ပူဇော်သကာသည် ယုတ်မာ၏” ဟု ဆိုသောကြောင့် စားပွဲတော်ကို ရှုတ်ချကြပြီ။ တစ်ဖန် သင်တို့က “အမှုတော်ကိုဆောင်ရွက်၍ ပင်ပန်းစွတကား!” ဟု ဆိုလျက် ကဲ့ရဲ့သံကိုပြုတတ်ကြသည်’ ဟု ကောင်းကင်ဗိုလ်ခြေအရှင်ထာဝရဘုရားမိန့်တော်မူ၏။ ‘လုယူသောအကောင်၊ ခြေဆွံ့သောအကောင်၊ နာသောအကောင်ကို ဆောင်ခဲ့ကြပြီ။ ထိုသို့သောပူဇော်သကာကို ဆောင်ခဲ့ကြပြီတကား။ သင်တို့လက်မှ ငါခံရမည်လော’ ဟု ထာဝရဘုရားမေးတော်မူ၏” ဟူ၍ သူတို့၏ညံ့ဖျင်းသောပူဇော်သကာများကို မိမိ၏ပရောဖက်မာလခိမှတစ်ဆင့် ယေဟောဝါရှုတ်ချတော်မူခဲ့သည်။—မာလခိ ၁:၁၀၊ ၁၂၊ ၁၃။

၇။ ဘီ.စီ.အီး. ငါးရာစုက ဂျူးတို့သည် အဘယ်မသန့်ရှင်းသော လုပ်ရပ်များကို လုပ်ဆောင်ခဲ့ကြသနည်း။

^၇ ဂျူးတို့၏မှားယွင်းသောပြုမူကျင့်ကြံမှုတို့ကို ရှုတ်ချရန်အတွက် မာလခိကို ဘုရားသခင်အသုံးပြုတော်မူခဲ့လေသည်။ ၎င်းမှာ ဘီ.စီ.အီး. ငါးရာစုအတောအတွင်း၌ ဖြစ်ကောင်းဖြစ်မည်။ ယဇ်ပုရောဟိတ်များသည် ညံ့ဖျင်းသောပုံသက်သေကို တင်ပြကြကာ သူတို့အပြုအမူသည် သန့်ရှင်းမှုလုံးဝမရှိပေ။ ထိုဦးဆောင်မှုနောက်သို့လိုက်ကြသော လူတို့သည် သူတို့၏ဇနီးသည်များကို ကွာရှင်းပြတ်စဲကြသည့်အထိပင် စံချိန်စံနှုန်းများ၌ လျော့ရဲနေကြသည်။ . . . “‘သင့်အသက်ပျိုစဉ်အခါ လက်ထပ်၍ နောက်တစ်ဖန်သစ္စာမစောင့်၊ ပြစ်မှားသောb မယားတစ်ဖက်နှင့် သင့်တစ်ဖက်၌ ထာဝရဘုရားသည် သက်သေဖြစ်တော်မူ၏။ ထိုမယားသည် သင်၏အဆွေခင်ပွန်း၊ သင်ဖွဲ့သော ပဋိညာဉ်နှင့်ဆိုင်သောမယားဖြစ်သတည်း။ . . . သို့ဖြစ်၍ ကိုယ်စိတ်သဘောကို ချုပ်တည်းကြလော့။ အသက်ပျိုစဉ်အခါ လက်ထပ်သောမယားကို သစ္စာဖျက်၍ မပြစ်မှားကြနှင့်။ မယားကိုစွန့်ခြင်းအမှု . . . ကို ငါမုန်းသည်’ ဟု ဣသရေလအမျိုး၏ဘုရားသခင်၊ ကောင်းကင်ဗိုလ်ခြေအရှင်ထာဝရဘုရားမိန့်တော်မူ၏” ဟူ၍ မာလခိရေးသားခဲ့သည်။—မာလခိ ၂:၁၄-၁၆။

၈။ ကွာရှင်းပြတ်စဲမှုနှင့်ပတ်သက်၍ မျက်မှောက်ခေတ်ရှုမြင်ပုံသည် ခရစ်ယာန်အသင်းတော်အတွင်းရှိသူအချို့တို့ကို မည်သို့ထိခိုက်ခဲ့သနည်း။

^၈ မျက်မှောက်ခေတ်အချိန်၌ ကွာရှင်းပြတ်စဲမှုကို အလွယ်တကူပင်ပြုနိုင်ကြသော တိုင်းနိုင်ငံအများ၌ ကွာရှင်းပြတ်စဲမှုနှုန်းသည် ထိုးတက်သွားခဲ့သည်။ ယင်းသည် ခရစ်ယာန်အသင်းတော်ကိုပင် ထိခိုက်လာ၏။ အချို့သောသူတို့သည် အခက်အခဲအတားအဆီးများကို အောင်မြင်ကျော်လွှားကာ အိမ်ထောင်ရေးကို အောင်မြင်မှုရှိအောင် ကြိုးစားရန် အကြီးအကဲများ၏အကူအညီကို ရှာယူမည့်အစား လျင်မြန်စွာပင် ကွာရှင်းပြတ်စဲလိုက်ကြသည်။ သားသမီးများသည် စိတ်လှုပ်ရှားမှုဆိုင်ရာ မြင့်မားသောတန်ဖိုးကို ပေးဆပ်ကြရသည်။—မဿဲ ၁၉:၈၊ ၉။

၉၊ ၁၀။ ယေဟောဝါကို ဝတ်ပြုကိုးကွယ်မှုအပေါ် ကျွန်ုပ်တို့သည် မည်သို့အလေးအနက်ထားစဉ်းစားဆင်ခြင်မှု ပြုသင့်သနည်း။

^၉ အထက်တွင် ကျွန်ုပ်တို့တွေ့ မြင်ခဲ့ရသည့်အတိုင်း ယေဟောဝါသည် မာလခိခေတ်၌ အလွန်ဆိုးဝါးလှသော ဝိညာဉ်ရေးအခြေအနေကြောင့် ယုဒတို့၏အနှစ်သာရမရှိသော ဝတ်ပြုကိုးကွယ်မှုကို ပြင်းထန်စွာရှုတ်ချခဲ့ပြီး မိမိသည် စင်ကြယ်သောဝတ်ပြုကိုးကွယ်မှုကိုသာ လက်ခံမည်ဖြစ်ကြောင်း ဖော်ပြခဲ့သည်။ ၎င်းက စစ်မှန်သောသန့်ရှင်းမှု၏အရင်းအမြစ်ဖြစ်သည့် စကြဝဠာပိုင်သအုပ်စိုးရှင် ယေဟောဝါဘုရားသခင်အား ကျွန်ုပ်တို့ဝတ်ပြုကိုးကွယ်ခြင်းဆိုင်ရာ အရည်အသွေးနှင့်စပ်လျဉ်း၍ အလေးအနက်ထားစဉ်းစားစရာ မဖြစ်စေသင့်ပေလော။ ကျွန်ုပ်တို့သည် သန့်ရှင်းသောလုပ်ငန်းတော်ကို ဘုရားသခင်ထံ အမှန်ပင်ပေးဆက်နေပါသလော။ ဝိညာဉ်ရေးအရ သန့်ရှင်းသောအခြေအနေတွင် ကျွန်ုပ်တို့ရှိနေကြပါသလော။

^၁၀ ၎င်းက ကျွန်ုပ်တို့၌ စုံလင်မှုရှိရမည်ဟု မဖြစ်နိုင်သောအရာကို ဆိုလိုနေခြင်းမဟုတ်သကဲ့သို့ ကျွန်ုပ်တို့ကိုယ်ကိုကျွန်ုပ်တို့ အခြားသူများနှင့်နှိုင်းယှဉ်သင့်သည်ဟူ၍လည်း မဆိုလိုပေ။ သို့သော် ၎င်းက ခရစ်ယာန်ယောက်စီယောက်တိုင်း သူ သို့မဟုတ် သူမ၏အခြေအနေအတွင်း၌ အကောင်းဆုံးသောနည်းဖြင့် ဘုရားသခင်ကို ဝတ်ပြုကိုးကွယ်နေသင့်သည်ဟု ဆိုလိုပေသည်။ ယင်းက ကျွန်ုပ်တို့၏ဝတ်ပြုကိုးကွယ်မှုအရည်အသွေးကို ရည်ညွှန်း၏။ မြင့်မြတ်သောလုပ်ငန်းတော်သည် ကျွန်ုပ်တို့၏အကောင်းဆုံး—သန့်ရှင်းသောအမှုတော်ကိုဆောင်ခြင်း—ဖြစ်သင့်သည်။ ၎င်းကို မည်သို့ပြီးမြောက်အောင်မြင်စေနိုင်မည်နည်း။—လုကာ ၁၆:၁၀; ဂလာတိ ၆:၃၊ ၄။

စင်ကြယ်သောနှလုံးက စင်ကြယ်သောဝတ်ပြုကိုးကွယ်မှုကိုဖြစ်စေ

၁၁၊ ၁၂။ မသန့်ရှင်းသောအမူအကျင့်သည် အဘယ်မှပေါက်ဖွားလာခြင်းဖြစ်သနည်း။

^၁၁ နှလုံးထဲ၌ရှိသောအရာသည် လူတစ်ဦးပြောဆိုပြုမူရာများအားဖြင့် ထင်ရှားလာလိမ့်မည်ဟု ယေရှုရှင်းလင်းစွာသင်ကြားပေးတော်မူခဲ့သည်။ မိမိကိုယ်ကိုတော်တည့်ဖြောင့်မတ်သည်ဟု ယူဆသော်လည်း သန့်ရှင်းမှုကင်းမဲ့သည့် ဖာရိရှဲများကို ယေရှုက “အချင်းမြွေဆိုးအမျိုးတို့၊ သင်တို့သည် အဆိုးဖြစ်လျက် ကောင်းသောစကားကို အဘယ်သို့ပြောနိုင်မည်နည်း။ စိတ်နှလုံးအပြည့်ရှိသည်အတိုင်း နှုတ်မြွက်တတ်၏” ဟု မိန့် ကြားတော်မူခဲ့လေသည်။ ထို့နောက် ကိုယ်တော်က ဆိုးညစ်သောလုပ်ရပ်သည် နှလုံး သို့မဟုတ် အတွင်းလူထဲရှိ ဆိုးညစ်သောအတွေးများမှ ပေါက်ဖွားလာကြောင်း ဖော်ပြတော်မူသည်။ “ခံတွင်းမှထွက်သောအရာမူကား နှလုံးထဲကထွက်လာ၍ လူကိုညစ်ညူးစေသောအရာဖြစ်၏။ မကောင်းသောကြံစည်ခြင်း၊ လူအသက်ကိုသတ်ခြင်း၊ သူ့မယားကိုပြစ်မှားခြင်း၊ မိန်းမလွတ်နှင့်မှားယွင်းခြင်း၊ သူ့ဥစ္စာကိုခိုးခြင်း၊ မမှန်သောသက်သေကိုခံခြင်း၊ သူ့အသရေကိုဖျက်ခြင်းအရာတို့သည် နှလုံးထဲကထွက်လာ၍ လူကိုညစ်ညူးစေသောအရာဖြစ်ကြ၏” ဟု ကိုယ်တော်မိန့်တော်မူခဲ့သည်။—မဿဲ ၁၂:၃၄; ၁၅:၁၈-၂၀။

^၁၂ သန့်ရှင်းမှုမရှိသောလုပ်ရပ်များသည် အလိုအလျောက်သာဖြစ်ခြင်း သို့မဟုတ် ကြိုတင်စီစဉ်မှုမရှိဘဲဖြစ်ခြင်း မဟုတ်ကြောင်း ကျွန်ုပ်တို့နားလည်ရန် ယင်းက အကူအညီပေးလေသည်။ ၎င်းတို့သည် လျှို့ဝှက်ဆန္ဒများနှင့် စိတ်ကူးယဉ်မှုများဖြစ်ကောင်းဖြစ်မည့် နှလုံးထဲ၌ ပုန်းလျှိုးနေသည့် ညစ်ညူးသောအတွေးများ၏ရလဒ်ဖြစ်လေသည်။ ထို့ကြောင့်ပင် ယေရှုက “‘သူ့မယားကိုမပြစ်မှားရ’ ဟူသောရှေးပညတ်စကားကို သင်တို့ကြားရပြီ။ ငါပညတ်သည်ကား ကိလေသာစိတ်နှင့် သူ့မယားကိုကြည့်ရှုသောသူသည် စိတ်နှလုံးထဲ၌ ထိုမိန်းမနှင့်ပြစ်မှားပြီ” ဟူ၍ ပြောနိုင်ခဲ့ခြင်းဖြစ်သည်။ တစ်နည်းအားဖြင့်ဆိုရလျှင် မတရားမေထုန်နှင့် သူ့မယားပြစ်မှားခြင်းတို့သည် မည်သည့်လုပ်ရပ်မျှ မလုပ်ကိုင်မီအချိန်ကပင် နှလုံးထဲ၌ အမြစ်တွယ်နေနှင့်ပြီးဖြစ်သည်။ သို့နှင့် အခြေအနေအခွင့်အခါကြုံလာသောအခါ မသန့်ရှင်းသောအတွေးအခေါ်များသည် မသန့်ရှင်းသောအပြုအမူများဖြစ်လာလေသည်။ မတရားမေထုန်ပြုခြင်း၊ သူ့မယားပြစ်မှားခြင်း၊ လိင်တူဆက်ဆံခြင်း၊ ခိုးဝှက်ခြင်း၊ ဘုရားသခင်ကို ပြစ်မှားခြင်း၊ အယူဖောက်ပြန်ခြင်းတို့သည် ထင်ရှားသောရလဒ်အချို့ဖြစ်လာလေသည်။—မဿဲ ၅:၂၇၊ ၂၈; ဂလာတိ ၅:၁၉-၂၁။

၁၃။ မသန့်ရှင်းသောအတွေးအခေါ်များသည် မသန့်ရှင်းသောလုပ်ရပ်များကို ပြုလုပ်စေနိုင်ခြင်းနှင့်စပ်လျဉ်းသော ဥပမာအချို့ကား အဘယ်နည်း။

^၁၃ ၎င်းကို အနည်းနည်းအဖုံဖုံအားဖြင့် ဥပမာပြနိုင်ပေသည်။ အချို့သောနိုင်ငံများတွင် လောင်းကစားရုံများသည် မှိုလိုပေါက်လာသောကြောင့် လောင်းကစားရန် အခွင့်အလမ်းများ တိုးများလာလေသည်။ လူတစ်ဦးသည် ဤအတုအယောင်ဖြေရှင်းနည်းကို အသုံးပြုကာ သူ၏ငွေရေးကြေးရေးပြဿနာများကို ဖြေရှင်းရန်ကြိုးစားဖို့ သွေးဆောင်ခံရနိုင်သည်။ လှည့်စားတတ်သောတွေးတောမှုက ညီအစ်ကိုတစ်ဦးအား သူ၏ကျမ်းစာမူများကို လျော့ပေါ့လိုက်ရန် သို့မဟုတ် ငြင်းပယ်လိုက်ရန် သွေးဆောင်နိုင်သည်။c နောက်ဥပမာတစ်ခုတွင် တီဗွီ၊ ဗီဒီယို၊ ကွန်ပျူတာ သို့မဟုတ် စာအုပ်များမှတစ်ဆင့် ညစ်ညမ်းသောစာပေ၊ ရုပ်ရှင်များကို အလွယ်တကူရရှိနိုင်ခြင်းက ခရစ်ယာန်တစ်ဦးအား မသန့်ရှင်းသည့်အမူအကျင့်ကို ပြုကျင့်သွားစေနိုင်သည်။ သူ၏ဝိညာဏလက်နက်စုံများကိုသာ လျစ်လျူရှုလိုက်ပါက သူမသိလိုက်မီအချိန်မှာပင် စာရိတ္တယိုယွင်းခြင်းအတွင်းသို့ ကျရောက်သွားမည်ဖြစ်သည်။ သို့သော် အများအားဖြင့် အပြစ်ပြုခြင်းအတွင်းသို့ကျရောက်သွားခြင်းသည် စိတ်ထဲမှ စတင်လေ့ရှိသည်။ မှန်ပေသည်၊ “မိမိတပ်မက်သောစိတ် ဆွဲငင်ဖြားယောင်းခြင်းကိုခံသောသူမည်သည်ကား အပြစ်သွေးဆောင်ခြင်းသို့ရောက်တတ်၏။ တပ်မက်သောစိတ်သည် ပဋိသန္ဓေယူ၍ ဒုစရိုက်ကို ဖွားတတ်၏” ဟူသည့် ယာကုပ်၏စကားသည် အဆိုပါကဲ့သို့သောအခြေအနေမျိုး၌ ပြည့်စုံလေသည်။—ယာကုပ် ၁:၁၄၊ ၁၅; ဧဖက် ၆:၁၁-၁၈။

၁၄။ များစွာသောသူတို့သည် မသန့်ရှင်းသော အမူအကျင့်များမှ မည်သို့ပြန်လည်ကောင်းမွန်လာကြသနည်း။

^၁၄ ဝမ်းသာစရာမှာ အားနည်းမှုကြောင့် အပြစ်ပြုမိသူ ခရစ်ယာန်များစွာတို့သည် စစ်မှန်သောနောင်တကို တင်ပြကြကာ အကြီးအကဲများက ထိုကဲ့သို့သောသူများကို ဝိညာဉ်ရေးအရ ပြန်လည်ထူမပေးနိုင်ကြခြင်းပင်ဖြစ်သည်။ နောင်တမယူသည့်အတွက်ကြောင့် နှင်ထုတ်ခံရသောသူများစွာတို့သည်ပင် နောက်ဆုံး အမြင်မှန်ရပြီး အသင်းတော်အတွင်း၌ ပြန်လည်ပါဝင်လာကြသည်။ မသန့်ရှင်းသည့်အတွေးအခေါ်များကို နှလုံးထဲ၌ အမြစ်တွယ်ခွင့်ပြုလိုက်သောအခါ စာတန်သည် မည်မျှလွယ်ကူစွာ သူတို့ကိုလွှမ်းမိုးသွားနိုင်ကြောင်း သိရှိလာလေသည်။—ဂလာတိ ၆:၁; ၂ တိမောသေ ၂:၂၄-၂၆; ၁ ပေတရု ၅:၈၊ ၉။

ကျွန်ုပ်တို့၏အားနည်းချက်များကို ရင်ဆိုင်ရန် စိန်ခေါ်ချက်

၁၅။ (က) ကျွန်ုပ်တို့၏အားနည်းချက်များကို အဘယ်ကြောင့်ရင်ဆိုင်ဖြေရှင်းရမည်နည်း။ (ခ) ကျွန်ုပ်တို့၏အားနည်းချက်များကို အသိအမှတ်ပြုရန် ဘာက အကူအညီပေးမည်နည်း။

^၁၅ ကျွန်ုပ်တို့၏နှလုံးကို ဓမ္မဓိဋ္ဌာန်ကျကျ သိရှိနိုင်ရန်အတွက် ကြိုးစားအားထုတ်ကြရမည်။ ကျွန်ုပ်တို့၏အားနည်းချက်များကို ရင်ဆိုင်ရန်၊ ၎င်းတို့ကို အသိအမှတ်ပြုရန်၊ ထို့နောက် ၎င်းတို့ကို အောင်နိုင်ရန် တလိုတလားရှိပါသလော။ ကျွန်ုပ်တို့ မည်သို့တိုးတက်နိုင်ကြောင်း ရိုးသားပွင့်လင်းသောမိတ်ဆွေတစ်ဦးကို မေးမြန်းပြီး သူ၏အကြံဉာဏ်ကို နားထောင်ရန် တလိုတလားရှိပါသလော။ သန့်ရှင်းမှု ဆက်ရှိနိုင်ရန် ကျွန်ုပ်တို့၏ချို့တဲ့ချက်များကို အောင်နိုင်ရမည်ဖြစ်သည်။ အဘယ်ကြောင့်နည်း။ အကြောင်းမှာ စာတန်သည် ကျွန်ုပ်တို့၏အားနည်းချက်များကို သိသောကြောင့်ဖြစ်၏။ သူ၏ပါးနပ်သော နည်းစနစ်များကိုအသုံးပြုကာ အပြစ်နှင့်မသန့်ရှင်းသော အမူအကျင့်များပြုမိအောင် ကျွန်ုပ်တို့ကို ဆွပေးလိမ့်မည်။ ကျွန်ုပ်တို့သည် ယေဟောဝါ၏ဝတ်ပြုကိုးကွယ်မှု၌ ဘယ်တော့မျှ အသုံးမဝင်၊ စင်ကြယ်မှုမရှိတော့ဘဲဖြစ်သွားစေရန် သူ၏ကောက်ကျစ်စဉ်းလဲသောလုပ်ဆောင်မှုအားဖြင့် ကျွန်ုပ်တို့ကို ဘုရားသခင်၏မေတ္တာတော်မှ ခွဲခွာရန် သူကြိုးစားနေလေသည်။—ယေရမိ ၁၇:၉; ဧဖက် ၆:၁၁; ယာကုပ် ၁:၁၉။

၁၆။ ပေါလု၌ အဘယ်တိုက်ပွဲဖြစ်နေသနည်း။

^၁၆ “ငါ့အထဲမှာ ငါ့ဇာတိပကတိ၌ ကောင်းသောအရာတစ်စုံတစ်ခုမျှမတည်သည်ကို ငါသိ၏။ အကြောင်းမူကား ငါသည်ကျင့်ချင်သောစိတ်ရှိသော်လည်း၊ ကောင်းစွာကျင့်တတ်သောအခွင့်ကို ရှာ၍မတွေ့နိုင်။ ငါသည် ကျင့်ချင်သောအကျင့်ကောင်းကိုမကျင့်၊ မကျင့်ချင်သောအကျင့်ဆိုးကိုကျင့်၏။ . . . ငါသည် အတွင်းလူအားဖြင့် ဘုရားသခင်၏ပညတ်တရားတော်ကိုနှစ်သက်၏။ သို့သော်လည်း ငါ့ကိုယ်အင်္ဂါများ၌ရှိသောတရားတစ်ပါးသည် စိတ်ဝိညာဉ်တရားကိုဆိုင်ပြိုင်တိုက်လှန်သဖြင့် ငါ့ကိုယ်အင်္ဂါများ၌ရှိသော အပြစ်တရားလက်သို့ ငါ့ကိုဖမ်းသွားအပ်နှံသည်ကို ငါမြင်၏” ဟူ၍ ရောမသို့ရေးသော စာစောင်ထဲ၌ တမန်တော်ပေါလုသက်သေခံခဲ့သည့်အတိုင်း သူ၌ ကိုယ်ပိုင်အခက်အခဲများနှင့် စမ်းသပ်မှုများရှိလေသည်။—ရောမ ၇:၁၈-၂၃။

၁၇။ ပေါလုသည် အားနည်းချက်များကို ကြိုးစားတိုက်လှန်ရာ၌ မည်သို့အောင်မြင်မှုရရှိခဲ့သနည်း။

^၁၇ ပေါလု၏ကိစ္စ၌ အရေးကြီးသောအချက်မှာ သူ၏အားနည်းချက်များကို သူအသိအမှတ်ပြုခဲ့ခြင်းပင်ဖြစ်သည်။ အားနည်းချက်များရှိလျက်ကယ် “ငါသည် [ဝိညာဏ] အတွင်းလူအားဖြင့် ဘုရားသခင်၏ပညတ်တရားတော်ကိုနှစ်သက်၏” ဟူ၍ သူပြောဆိုနိုင်ခဲ့၏။ ပေါလုသည် ကောင်းသောအရာကို ချစ်မြတ်နိုးကာ ဆိုးသောအရာကို ရွံမုန်းလေသည်။ သို့သော်လည်း ကျွန်ုပ်တို့အားလုံးတိုက်လှန်နေရသော စာတန်၊ ဤလောကနှင့် အသွေးအသားတိုက်လှန်မှုမျိုးကို သူတိုက်လှန်ခံရစမြဲဖြစ်သည်။ ထို့ကြောင့် သန့်ရှင်းနေမြဲနေပြီး ဤလောကနှင့် ယင်း၏အတွေးအခေါ်တို့မှ တသီးတခြားနေနိုင်ရန်အတွက် ထိုတိုက်ပွဲကို ကျွန်ုပ်တို့မည်သို့အောင်မြင်နိုင်မည်နည်း။—၂ ကောရိန္သု ၄:၄; ဧဖက် ၆:၁၂။

မည်သို့သန့်ရှင်းနေမြဲနေနိုင်မည်နည်း

၁၈။ သန့်ရှင်းမှုကို ကျွန်ုပ်တို့မည်သို့ဆက်လက်ထိန်းသိမ်းနိုင်မည်နည်း။

^၁၈ တိုက်လှန်မှု အနည်းဆုံးပြုရသောလမ်းစဉ်သို့လိုက်ခြင်း သို့မဟုတ် ကိုယ်အလိုသို့သာလိုက်နေခြင်းအားဖြင့် သန့်ရှင်းမှုကို ရရှိမည်မဟုတ်ချေ။ ထိုကဲ့သို့သော ပုဂ္ဂိုလ်မျိုးသည် မိမိ၏အပြုအမူအတွက် အမြဲဆင်ခြေတက်နေမည်ဖြစ်ပြီး အပြစ်ကို အခြားသို့လွှဲရန် ကြိုးစားလိမ့်မည်ဖြစ်သည်။ ကျွန်ုပ်တို့သည် ကိုယ့်လုပ်ရပ်အတွက် ကိုယ်တာဝန်ယူတတ်အောင် သင်ယူဖို့လိုမည်ဖြစ်ပြီး မိသားစုနောက်ခံ သို့မဟုတ် မျိုးရိုးဗီဇကြောင့် ကြမ္မာက မိမိတို့အားမျက်နှာသာမပေးဟု ယိုးစွပ်ကြသောသူအချို့နှင့် မတူဖို့လည်းလိုပေသည်။ ပြဿနာ၏အရင်းအမြစ်သည် လူတစ်ဦး၏နှလုံးထဲ၌ တည်၏။ သူ သို့မဟုတ် သူမသည် ဖြောင့်မတ်ခြင်းကို ချစ်မြတ်နိုးသလော၊ သန့်ရှင်းခြင်းကို တမ်းတသလော၊ ဘုရားသခင်၏ကောင်းချီးကို ခံစားလိုသလော။ “ဒုစရိုက်ကိုလွှဲရှောင်၍ သုစရိုက်ကိုပြုလော့။ သူတစ်ပါးနှင့်အသင့်အတင့်နေခြင်းကို ရှာ၍မီအောင်လိုက်လော့” ဟူ၍ ဆာလံဆရာပြောဆိုခဲ့စဉ်က သန့်ရှင်းမှုရှိရန်လိုအပ်ခြင်းကို ကောင်းစွာသဘောပေါက်နားလည်စေသည်။ တမန်တော်ပေါလုက “မေတ္တာစိတ်သည် လျှို့ဝှက်ခြင်းနှင့်ကင်းစေလော့။ ဆိုးညစ်သောအမှုကို စက်ဆုပ်ရွံရှာကြလော့။ ကောင်းမွန်သောအမှု၌ မှီဝဲဆည်းကပ်ကြလော့” ဟူ၍ ရေးသားခဲ့သည်။—ဆာလံ ၃၄:၁၄; ၉၇:၁၀; ရောမ ၁၂:၉။

၁၉၊ ၂၀။ (က) ကျွန်ုပ်တို့၏စိတ်ကို မည်သို့တည်ဆောက်နိုင်မည်နည်း။ (ခ) ထိရောက်သောကိုယ်ပိုင်လေ့လာမှုက အဘယ်အရာကို ဖြစ်ပေါ်စေသနည်း။

^၁၉ ကိစ္စရပ်များကို ယေဟောဝါ၏ရှုထောင့်မှကြည့်မည်၊ ခရစ်တော်၏စိတ်မျိုး ရှိမည်ဆိုပါက ကျွန်ုပ်တို့သည် “ကောင်းမွန်သောအမှု၌ မှီဝဲဆည်းကပ်” နိုင်ကြမည်ဖြစ်သည်။ (၁ ကောရိန္သု ၂:၁၆) ၎င်းသည် မည်သို့ဖြစ်နိုင်မည်နည်း။ ဘုရားသခင်၏နှုတ်ကပါဌ်တော်ကို မှန်မှန်လေ့လာ၍ တွေးတောဆင်ခြင်ခြင်းအားဖြင့် ဖြစ်နိုင်မည်။ ဤအကြံပြုချက်ကို အကြိမ်ကြိမ်ပေးခဲ့ပြီးလေပြီ! သို့သော်လည်း ၎င်းကို ကျွန်ုပ်တို့အလေးအနက်ထားပါသလော။ ဥပမာအနေနှင့် သင်သည် အစည်းအဝေးသို့မလာမီ ဤမဂ္ဂဇင်းကို လေ့လာ၍ ကျမ်းချက်များစစ်ဆေးခြင်းကို အမှန်ပင်ပြုခဲ့ပြီးပြီလော။ လေ့လာခြင်းဟူသည် စာပိုဒ်တိုင်း၌ စကားစုအနည်းငယ်စီကို မျဉ်းသားခြင်းမျှပြုခြင်းကို ကျွန်ုပ်တို့မဆိုလိုချေ။ လေ့လာရန် ဆောင်းပါးတစ်ပုဒ်တွင် အဖြေရှာ၍ မျဉ်းသားခြင်းကို ၁၅ မိနစ်ခန့်နှင့်ပြုလုပ်နိုင်သည်။ ၎င်းက ထိုဆောင်းပါးကို ကျွန်ုပ်တို့လေ့လာပြီးပြီဟူ၍ အဓိပ္ပာယ်သက်ရောက်ပါသလော။ အမှန်မှာ ဆောင်းပါးတစ်ခုစီကို လေ့လာမှုပြုကာ တင်ပြထားသည့် ဝိညာဏအကျိုးကျေးဇူးများကို ရယူရန် အချိန်တစ်နာရီ သို့မဟုတ် နှစ်နာရီကြာနိုင်သည်။

^၂၀ အပတ်စဉ်တိုင်း နာရီအနည်းငယ်မျှ တီဗွီမှ လှည့်ထွက်၍ ကျွန်ုပ်တို့၏ကိုယ်ပိုင်သန့်ရှင်းမှုအပေါ်တွင် အမှန်ပင်အာရုံစူးစိုက်မှုပြုရန် ကျွန်ုပ်တို့ကိုယ်ကိုကျွန်ုပ်တို့ ဆုံးမဖို့ လိုကောင်းလိုမည်။ မှန်မှန်လေ့လာမှုပြုခြင်းက ကျွန်ုပ်တို့၏ဝိညာဉ်ရေးကို တည်ဆောက်ပေးပြီး “သန့်ရှင်းသောအကျင့်” ကို ကျင့်စေသည့် ဆုံးဖြတ်ချက်များဖြစ်သော မှန်ကန်သည့်ဆုံးဖြတ်ချက်များကို ချမှတ်ရန် ကျွန်ုပ်တို့၏စိတ်ကို လှုံ့ဆော်ပေးပေမည်။—၂ ပေတရု ၃:၁၂; ဧဖက် ၄:၂၃; ၅:၁၅၊ ၁၆။

၂၁။ ဖြေကြားရန် ကျန်ရှိနေသေးသော မေးခွန်းကား အဘယ်နည်း။

^၂၁ ယခုမေးစရာမှာ ယေဟောဝါသည် သန့်ရှင်းတော်မူသကဲ့သို့ ခရစ်ယာန်များအနေနှင့် ကျွန်ုပ်တို့သည်လည်း နောက်ထပ် အဘယ်လုပ်ဆောင်မှုနှင့် ကျင့်ကြံမှုနယ်ပယ်များတွင် သန့်ရှင်းမှုရှိနိုင်မည်နည်း။ နောက်ဆောင်းပါးက ဆင်ခြင်သုံးသပ်ထိုက်သော အကြောင်းအရာအချို့ကို တင်ပြပါလိမ့်မည်။

[အောက်ခြေမှတ်ချက်များ]

သင်မှတ်မိပါသလော

◻ သန့် ရှင်းမှု၏အရင်းအမြစ်ကို ဣသရေလတို့၌ မည်သို့ထင်ရှားဖော်ပြခဲ့သနည်း။

◻ မာလခိခေတ်၌ ဣသရေလလူမျိုး၏ဝတ်ပြုမှုသည် အဘယ်နည်းဖြင့် သန့် ရှင်းမှုမရှိဘဲ ဖြစ်ခဲ့ရသနည်း။

◻ မသန့် ရှင်းသော အမူအကျင့်သည် အဘယ်အရပ်မှ စတင်လာသနည်း။

◻ သန့် ရှင်းမှုရှိရန် ဘာကို ကျွန်ုပ်တို့အသိအမှတ်ပြုရမည်နည်း။

◻ သန့် ရှင်းမှုကို မည်သို့ဆက်လက်ထိန်းသိမ်းနိုင်မည်နည်း။