ဘုရားသခင့်နိုင်ငံတော် ကြွေးကြော်သူများ မှတ်တမ်း

အိုင်ယာလန်တွင် ကျမ်းစာသမ္မာတရားကို ဆက်လက်ဟောပြော

မကြာသေးမီနှစ်များက သာယာလှသော အိုင်ယာလန်နိုင်ငံတွင် မငြိမ်မသက်မှု အတော်အတန်ဖြစ်ပျက်ခဲ့လေသည်။ တစ်ချိန်တည်းတွင် အိုင်ရစ်လူမျိုးများသည် သူတို့ထံသို့ ယေဟောဝါသက်သေများ သယ်ဆောင်လာသော သမ္မာကျမ်းစာသတင်းတရားကို လိုလိုလားလားတုံ့ ပြန်ခဲ့ကြသည်။ အိုင်ယာလန်မှ အောက်ပါတွေ့ ကြုံမှုများက ယင်းကို သက်သေထူလျက်ရှိ၏။

▪ ဒူဘလင်မြို့တွင် ယေဟောဝါသက်သေတစ်ဦးနှင့် သူ၏သမီးငယ်လေးတို့သည် တစ်အိမ်မှတစ်အိမ်ဟောပြောခြင်းလုပ်ငန်းတွင် ပါဝင်လုပ်ဆောင်လျက်ရှိကြ၏။ သူတို့သည် ကက်သီအမည်ရှိသော ကလေးတစ်ပုံတစ်ပင်နှင့် အလုပ်အလွန်များလျက်ရှိသည့် အမျိုးသမီးတစ်ဦးနှင့် တွေ့ဆုံခဲ့လေသည်။ သက်သေခံက မည်သို့ဟောပြောရသည်ကို သင်ကြားနေဆဲရှိသည့် သူ၏သမီးငယ်သည် သူမနှင့် သတင်းတရားအနည်းငယ်မျှ ဝေမျှနိုင်မနိုင် မေးလေသည်။ ကက်သီသဘောတူ၍ ကလေးမလေးက ရိုးရိုးရှင်းရှင်းနှင့် ကောင်းစွာစဉ်းစားထားသော ဟောပြောချက်ကိုတင်ပြခဲ့သည်။ ကက်သီမှာ ကလေးမလေး၏ ပေါ်လွင်လှသော ရိုးသားမှု၊ ယဉ်ကျေးမှုတို့ကြောင့် စိတ်ထဲစွဲမှတ်သွားပြီး ကျမ်းစာဝေစာပေးကမ်းခြင်းကို လက်ခံခဲ့လေသည်။

နောက်ပိုင်း ကက်သီက ဧည့်သည်မလေး၏ ကောင်းစွာပြင်ဆင်လာမှုနှင့် အပြုအမူများကို ပြန်ပြောပြသည်။ “ကလေးမလေးတစ်ယောက်က စိတ်ဝင်စားစရာကောင်းလှတဲ့ သတင်းတရားတစ်ခုကို အရွယ်နဲ့မလိုက်အောင် ပြောပြနိုင်တာကို ကျွန်မအထင်ကြီးသွားမိတယ်” ဟူ၍ သူမက ဆို၏။ “နောက်တစ်ကြိမ် ယေဟောဝါသက်သေတွေလာရင် သူတို့ပြောတာကို ကျွန်မနားထောင်မယ်လို့ စိတ်ပိုင်းဖြတ်ထားတယ်။”

ထိုအတောအတွင်း၌ပင် ကက်သီမှာ ဂုတ်ခ်နှင့် ကာရီနိုင်ငံများ၏နယ်နိမိတ်အနီး၊ အိုင်ယာလန်အနောက်တောင်ပိုင်းရှိ မြို့ငယ်လေးသို့ပြောင်းရွှေ့ခဲ့သည်။ နောက်ပိုင်းမကြာမီအချိန်၌ ယေဟောဝါသက်သေများ သူမ၏အိမ်သို့ လာရောက်လည်ပတ်ကြရာ သူတို့ကို အိမ်ထဲသို့ ခေါ်ဖိတ်ခဲ့လေသည်။ ကျမ်းစာကို မှန်မှန်လေ့လာမှုပြုရန် သူမလက်ခံခဲ့ပြီး ယခု သူမ၏သားသမီးအချို့နှင့်အတူ အသင်းတော်စည်းဝေးများကို တက်ရောက်လျက်ရှိသည်။ သူမကို သတင်းကောင်းမျှဝေလိုသော ကလေးမလေး၏ စစ်မှန်သည့်အလိုဆန္ဒအတွက် ကက်သီ အလွန်ဝမ်းမြောက်ရလေသည်။

▪ တူလမောဒေသတွင် သက်သေခံများသည် ဂျဲအမည်ရှိသော အမျိုးသမီးတစ်ဦးနှင့် ခုနစ်နှစ်ကျော်ကြာမျှ ကျမ်းစာဆွေးနွေးမှုများ ပြုလုပ်ခဲ့ကြသည်။ တစ်ခါတစ်ရံ၌ သူမသည် စိတ်ဝင်စားမှုရှိပြီး စာပေစာတမ်းများကို လက်ခံထားသော်လည်း တစ်ခါတစ်ရံ၌ သူမ၏စိတ်ဝင်စားမှုမှာ အားနည်းနေတတ်သည်။ တစ်နေ့၌ ဖရဲ့ဆက်စ်အမည်ရှိသော သက်သေခံတစ်ဦးနှင့် အဖော်တစ်ဦးတို့သည် ဂျဲထံသို့ သွားရောက်လည်ပတ်ခဲ့ရာ သူမ၌ အလွန်မှ သဘောထားမတိုက်ဆိုင်သောစိတ်ဓာတ်ဖြစ်နေကြောင်း တွေ့ ရှိရ၏။ “ကျွန်မတို့ ဘာပြောပြော ပိုဆိုးလာတာပဲရှိတယ်။ နောက်ဆုံးတော့ ကျွန်မတို့ကို ထွက်သွားဖို့ သူပြောပြီး တံခါးကို ဆောင့်ပိတ်လိုက်တယ်” ဟူ၍ ထိုသက်သေခံက ပြောပြသည်။

ဖရဲ့ဆက်စ်က နောက်ထပ်သွားရောက်လည်ပတ်ခြင်းသည် ထပ်တူလက်ခံမှုမျိုးကိုသာ ဖြစ်စေလိမ့်မည်ဟု စဉ်းစားမိခဲ့လေသည်။ ‘သတင်းတရားကို သူတကယ်စိတ်ဝင်စားမှုမရှိဘူးဆိုရင် သူ့ဆီသွားလည်ပတ်ဖို့ မထိုက်တန်တော့ဘူး’ ဟု ဖရဲ့ဆက်စ် ယူမှတ်ခဲ့၏။ သို့သော်လည်း ထိုကိစ္စကို သူမ၏လင်ယောက်ျား သောမတ်စ်နှင့်ဆွေးနွေးခဲ့ရာ သူက ပို၍မျှော်လင့်ချက်ထားခဲ့သည်။ နောက်တစ်ကြိမ် ထိုဒေသသို့ရောက်သောအခါ ဂျဲထံသို့ ထပ်သွားလည်ပတ်ခဲ့သည်။ သူမမှာ ခင်ခင်မင်မင်ရှိနေပြီး ကင်းမျှော်စင်နှင့် နိုးလော့! မဂ္ဂဇင်းများကို အတွဲလိုက်လက်ခံယူခဲ့သည်။ နောက်ထပ်လည်ပတ်မှုများသည်လည်း နှစ်လိုဖွယ်သာဖြစ်ပြီး သောမတ်စ်နှင့် ဖရဲ့ဆက်စ်တို့သည် သူမနှင့် မှန်မှန်အိမ်တွင်းကျမ်းစာသင်အံမှုတစ်ခုကို အစပြုခဲ့လေသည်။

အဘယ်ကြောင့် ပြောင်းလဲသွားရသနည်း။ သက်သေခံများကို သူမမချေမငံဆက်ဆံခဲ့ချိန်က မီးဖွားပြီး၍ ဆေးရုံမှ သူမဆင်းလာခါစသာရှိသေးကြောင်း ဂျဲရှင်းပြသည်။ ဖွားခါစကလေးကို နို့တိုက်ရကာ ပို၍ကြီးသောကလေးကို အစာခွံ့ကျွေးရသောကြောင့် သူမမှာ တစ်ညလျှင် တစ်နာရီခွဲမျှသာ အိပ်ခဲ့ရသည်။ “ဘာသာရေးအကြောင်း ဆွေးနွေးပြောဆိုတာကို နောက်ဆုံးမှပဲ ကျွန်မလုပ်ချင်တော့တယ်” ဟု ဂျဲပြောသည်။

နှစ်လအတွင်း စည်းဝေးအားလုံးကို ဂျဲတက်ရောက်လာပြီး လေးလအတွင်း လယ်ကွင်းဓမ္မအမှုတွင် သူမပါဝင်လာသည်။ သူမ ကျမ်းစာစလေ့လာသည့်အချိန်မှစ၍ ဆယ်လအကြာတွင် သူမနှစ်ခြင်းခံခဲ့လေသည်။ ယခု ဂျဲ၏ကိုယ်ပိုင်တွေ့ ကြုံမှုက ဓမ္မအမှုတွင် သူမကို အကူအညီပေးလျက်ရှိ၏။ “တော်တော်ရိုင်းစိုင်းတဲ့သူ တစ်ယောက်ကို ကျွန်မတွေ့တယ်ဆိုရင် ပိုပြီးနားလည်မှုရှိဖို့ ကျွန်မကြိုးစားပါတယ်။ အဲဒါနဲ့ပတ်သက်ပြီး ကျွန်မအမြဲမှတ်သားထားတယ်။ ကျွန်မပြန်သွားတဲ့အခါ အခြေအနေပြောင်းကောင်း ပြောင်းသွားမယ်လေ; အဲဒီလူက အခြေအနေကောင်းသွားပြီး ပိုလက်ခံလာကောင်းလက်ခံလာမှာပေါ့” ဟူ၍ သူမပြောပြလေသည်။