သာ၍ကြီးမြတ်သောအရာအတွက် များစွာသောစွန့်လွှတ်ခြင်း

ဂျူလီယက်စ် အိုဝို ဘဲလို ပြောပြသည်

အာလာဒရာaတစ်ဦးအဖြစ် ကျွန်တော်သည် ၃၂ နှစ်ကြာအမှုထမ်းခဲ့သည်။ ယုံကြည်ခြင်းကုထုံးနှင့် ဆုတောင်းခြင်းများသည် ကျွန်တော်၏အခက်အခဲများကိုဖြေရှင်းပေး၍ အဖျားအနာအားလုံးကို ပျောက်ကင်းစေမည်ဟု ကျွန်တော်ယုံကြည်ခဲ့သည်။ အကိုက်အခဲသက်သာစေသည့်ဆေးမှအစ မည်သည့်ဆေးဝါးကိုမျှကျွန်တော်မဝယ်ခဲ့ဖူးပါ။ ထိုနှစ်များအတွင်း ကျွန်တော်၏မိသားစုမှ မည်သူမျှဆေးရုံမတက်ခဲ့ဖူးပါ။ ကျွန်တော်၏ကလေးတစ်ဦးဦး ဖျားနာသည့်အခါတိုင်း သူတို့ပြန်ကျန်းမာလာသည်အထိ နေ့ရောညပါ ကျွန်တော်ဆုတောင်းခဲ့ပါသည်။ ဘုရားသခင်သည် ကျွန်တော်၏ဆုတောင်းချက်များကို နားညောင်း၍ ကျွန်တော့်ကိုကောင်းချီးပေးနေသည်ဟု ယုံကြည်ခဲ့သည်။

ကျွန်တော်သည် နိုင်ဂျီးရီးယားအနောက်ပိုင်း အာကူရီမြို့မှအထင်ရှားဆုံးလူမှုရေးအသင်းဖြစ်သော အက်ဂ်ဘာ ဂျာလီး အသင်းဝင်တစ်ဦးဖြစ်ပါသည်။ ကျွန်တော်၏မိတ်ဆွေများမှာ ကျွန်တော်တို့မြို့၌အချမ်းသာဆုံးနှင့် ဩဇာအရှိဆုံးသူများဖြစ်ကြသည်။ အာကူရီဘုရင် ဒယ်ဂျီ သည် ကျွန်တော့်အိမ်သို့မကြာခဏလာရောက်လည်ပတ်ခဲ့သည်။

ကျွန်တော်သည် ဇနီးခြောက်ယောက်နှင့် အပျော်မယားများစွာရှိသည့် မယားပြိုင်ထားသူတစ်ဦးလည်းဖြစ်ခဲ့သည်။ ကျွန်တော်၏စီးပွားရေးလုပ်ငန်းမှာ တိုးတက်အောင်မြင်ခဲ့သည်။ ကျွန်တော့်အတွက် အရာအားလုံးသည်အဆင်ပြေခဲ့သည်။ သို့သော်လည်း ယေရှု၏ပုလဲပုံဥပမာထဲမှခရီးသွားကုန်သည်ကဲ့သို့ ကျွန်တော်သည် သာ၍အဖိုးထိုက်သောအရာတစ်ခုအတွက် ဇနီးငါးယောက်၊ ကျွန်တော်၏အပျော်မယားများ၊ ချာ့ချ်၊ လူမှုရေးအသင်းနှင့် လောကထင်ပေါ်ကျော်ကြားမှုများကို စွန့်လွှတ်လိုက်သည်။—မဿဲ ၁၃:၄၅၊ ၄၆။

ကျွန်တော်အာလာဒရာတစ်ဦးဖြစ်လာခဲ့ပုံ

၁၉၃၆ ခုနှစ်၊ ကျွန်တော်အသက် ၁၃ နှစ်အရွယ်တွင် အာလာဒရာများနှင့်ပတ်သက်၍ ပထမဆုံးအကြိမ်ကြားခဲ့ရသည်။ ဂါဘရီရယ်လ် အမည်ရှိမိတ်ဆွေတစ်ဦးက ကျွန်တော့်ကိုဤသို့ပြောသည်– “ခရစ်တော်တမန်တော်များအသင်းကို မင်းသွားလည်မယ်ဆိုရင် ဘုရားသခင်စကားပြောတာကိုကြားရလိမ့်မယ်။”

“ဘုရားသခင်ကဘယ်လိုစကားပြောသလဲ” ဟုသူ့အား ကျွန်တော်မေးသည်။

သူက “ငါနဲ့လိုက်ခဲ့၊ မင်းသိရလိမ့်မယ်” ဟုပြောသည်။

ကျွန်တော်သည် ဘုရားသခင်စကားပြောသည်ကို ကြားနာရန်စိတ်ပြင်းပြနေသည်။ ထို့ကြောင့် ထိုညတွင်ဂါဘရီရယ်လ်နှင့်အတူ ချာ့ချ်သို့သွားကြသည်။ သေးငယ်သောအဆောက်အဦထဲတွင် ဝတ်ပြုကိုးကွယ်သူများနှင့်ပြည့်နေသည်။ အသင်းတော်က “အသင်လူများ၊ လာကြ! ဒီနေရာမှာယေရှုရှိတယ်!” ဟူ၍စတင်ရွတ်ဆိုကြသည်။

ဤရွတ်ဆိုချိန်အတွင်း တစ်စုံတစ်ယောက်က “သန့်ရှင်းသောဝိညာဉ်တော်၊ ကြွလာတော်မူပါ!” ဟူ၍ဟစ်အော်လိုက်သည်။ နောက်တစ်ယောက်က ခေါင်းလောင်းတီးလိုက်ပြီး အသင်းတော်သည်တိတ်ဆိတ်သွားသည်။ ယင်းနောက် အမျိုးသမီးတစ်ဦးသည် ထူးဆန်းသောဘာသာစကားကို စတင်၍စိတ်လှုပ်ရှားစွာ ဗလုံးဗထွေးပြောဆိုသည်။ ရုတ်တရက် သူမဤသို့အော်လိုက်သည်– “အသင်လူများ၊ ဘုရားသခင့်သတင်းတော်ကိုနားထောင်ကြပါ! ‘မုဆိုးများ လူတွေကိုမသတ်ဖို့ဆုတောင်းကြပါ!’ လို့ဘုရားသခင်မိန့်တော်မူတယ်။” လူများအားလုံးစိတ်လှုပ်ရှားနေကြသည်။

ဘုရားသခင်သည် သူမမှတစ်ဆင့်စကားပြောသည်ဟု ကျွန်တော်ယုံကြည်ခဲ့သောကြောင့် နောက်တစ်နှစ်တွင် ခရစ်တော်တမန်တော်များအသင်းဝင်တစ်ဦးအဖြစ် နှစ်ခြင်းခံခဲ့သည်။

ယေဟောဝါသက်သေများနှင့်အစောပိုင်းတွေ့ဆုံခြင်း

၁၉၅၁ ခုနှစ်တွင် ကျွန်တော်သည် အာဒဒေဂျီ ဘိုဘိုရေ အမည်ရှိသက်သေခံတစ်ဦးထံမှ ကင်းမျှော်စင် မဂ္ဂဇင်းတစ်စောင်ကို လက်ခံရရှိခဲ့သည်။ မဂ္ဂဇင်းမှာစိတ်ဝင်စားဖွယ်ကောင်းသည့်အတွက် ယင်းကိုနှစ်စဉ်ကြေးပေး၍မှာယူပြီး မှန်မှန်ဖတ်ရှုခဲ့သည်။ ၁၉၅၂ ခုနှစ်တွင် ကျွန်တော်သည် အာဒိုး အီကီတီမြို့၌ ယေဟောဝါသက်သေများ၏ လေးရက်ကြာခရိုင်စည်းဝေးကြီးကိုတက်ရောက်ခဲ့သည်။

စည်းဝေးကြီး၌ မြင်တွေ့ခဲ့ရသောအရာများသည် ကျွန်တော့်အတွက်စွဲမှတ်စရာဖြစ်ခဲ့သည်။ ယေဟောဝါသက်သေတစ်ဦးဖြစ်လာရန် အလေးအနက်စဉ်းစားခဲ့သော်လည်း ထိုစိတ်ကူးကိုဖျောက်ပစ်လိုက်သည်။ ပြဿနာမှာ ထိုအချိန်တွင်ကျွန်တော်၌ဇနီးသုံးယောက်နှင့် အပျော်မယားတစ်ယောက်ရှိနေသည်။ ဇနီးတစ်ယောက်တည်းနှင့် ဘယ်နည်းနှင့်မျှနေနိုင်မည်မဟုတ်ဟု ကျွန်တော်ထင်ခဲ့သည်။

အာကူရီမြို့သို့ကျွန်တော်ပြန်ရောက်သောအခါ အာဒဒေဂျီအား ကျွန်တော့်ထံမလာတော့ရန်ပြောလိုက်ပြီး ကင်းမျှော်စင် နှစ်စဉ်ကြေးကိုလည်းမမှာယူတော့ပါ။ ကျွန်တော်၏ချာ့ချ်တွင် ပို၍လှုပ်ရှားဆောင်ရွက်လာသည်။ နောက်ဆုံးတွင် ခရစ်တော်တမန်တော်များအသင်း၌ပါဝင်ကတည်းက ဘုရားသခင်သည်ကျွန်တော့်အားကောင်းချီးပေးခဲ့သည်ဟု ကျွန်တော်ဆင်ခြင်မိခဲ့သည်။ ကျွန်တော်သည် ဇနီးသုံးယောက်ယူခဲ့ပြီး ကလေးများစွာထွန်းကားခဲ့သည်။ ကိုယ်ပိုင်အိမ်ကိုဆောက်လုပ်ခဲ့သည်။ ကျွန်တော်ဆေးရုံတစ်ခါမျှမတက်ဖူးခဲ့ပါ။ ဘုရားသခင်သည်ကျွန်တော့်ဆုတောင်းချက်များကို တုံ့ပြန်နေသည်ဟုထင်ရသည်ဖြစ်၍ အဘယ့်ကြောင့် ဘာသာပြောင်းရမည်နည်း။

စိတ်ဓာတ်ကျခြင်းနှင့်အတူထင်ပေါ်ကျော်ကြားလာခြင်း

ကျွန်တော်သည် ချာ့ချ်သို့ငွေများစွာစတင်၍ ပါဝင်လှူဒါန်းလာသည်။ မကြာမီ ချာ့ချ်အတွင်းရေးကိစ္စများကို သိနိုင်သည့်အနေအထားဖြစ်သော ချာ့ချ်အကြီးအကဲတစ်ဦးအဖြစ် ကျွန်တော့်ကိုခန့်အပ်လိုက်သည်။ ကျွန်တော်တွေ့ မြင်ရသည့်အရာများက ကျွန်တော့်ကိုအနှောင့်အယှက်ဖြစ်စေခဲ့သည်။ သင်းအုပ်နှင့် “ပရောဖက်များ” တို့သည်ငွေကိုတပ်မက်ကြကာ သူတို့၏လောဘက ကျွန်တော့်ကိုအထိတ်တလန့်ဖြစ်စေခဲ့သည်။

ဥပမာ၊ ၁၉၆၇ မတ်လတွင် ကျွန်တော်၏ဇနီးအသီးသီးအားဖြင့် ကလေးသုံးဦးရလာသည်။ ကင်ပွန်းတပ်အခမ်းအနားကို ချာ့ချ်တွင်ပြုလုပ်ရသည့်ထုံးစံရှိသည်။ ထို့ကြောင့် ကျွန်တော်သည်လက်ဆောင်များ—ငါး၊ လင်မနစ်ရည်နှင့် အချိုရည်များ—ကိုအခမ်းအနားပြင်ဆင်မှုအတွက် သင်းအုပ်ဆရာထံသို့ယူသွားသည်။

ဝတ်ပြုသည့်နေ့တွင် သင်းအုပ်ဆရာက အသင်းတော်တစ်ခုလုံးရှေ့တွင် ဤသို့ပြောသည်– “ဒီချာ့ချ်ကသူဌေးတွေဟာ ကျွန်ုပ်ကိုအံ့အားသင့်စေတယ်။ သူတို့ဟာကင်ပွန်းတပ်အခမ်းအနားကိုကျင်းပချင်ကြပြီး သူတို့ယူလာတဲ့အရာတွေကတော့ အချိုရည်နဲ့ငါးပဲ။ အသားမပါဘူး! ဆိတ်မပါဘူး! စဉ်းစားကြည့်ပါ! ကာဣနဟာ ဘုရားသခင်ကို ကြီးမားတဲ့မျောက်ဥတွေနဲ့ ယဇ်ပူဇော်ခဲ့ပေမဲ့ သွေးမပါတဲ့အတွက် ဘုရားသခင်ဟာအဲဒီပူဇော်သကာကို လက်မခံခဲ့ဘူး။ ဘုရားသခင်ဟာသွေးပါတဲ့အရာများကိုလိုလားတယ်။ အာဗေလဟာ တိရစ္ဆာန်တစ်ကောင်ကိုပူဇော်ခဲ့ပြီး သူ့ရဲ့ပူဇော်သကာဟာအသိအမှတ်ပြုခံခဲ့ရတယ်။”

ထိုအခါ၊ ကျွန်တော်အလွန်ဒေါသထွက်မိသည်။ သို့သော် ကျွန်တော်သည်ချာ့ချ်ကိုဆက်လက်တက်ရောက်ဆဲဖြစ်သည်။ တဖြည်းဖြည်းနှင့်ကျွန်တော်သည် လူမှုရေးနှင့် ကျွန်တော်တို့ကလပ်အသင်း၏စည်းဝေးများကိုတက်ရောက်သည့်ကိစ္စတွင် ပို၍ပါဝင်လာသည်။ တစ်ခါတစ်ရံ ဘုရားသခင့်နိုင်ငံတော်ခန်းမမှ အစည်းအဝေးများကိုတက်ရောက်ပြီး ကင်းမျှော်စင် နှစ်စဉ်ကြေးကိုပြန်လည်မှာယူခဲ့သည်။ သို့သော်လည်း ယေဟောဝါသက်သေတစ်ဦးဖြစ်လာဖို့ အဆင်သင့်မဖြစ်နိုင်သေးပါ။

ယေဟောဝါကိုဝတ်ပြုရန်ဆုံးဖြတ်ချက်

၁၉၆၈ ခုနှစ်တွင် ကျွန်တော့်အားပြောင်းလဲစေသည့်အရာ ဖြစ်ပေါ်လာခဲ့သည်။ တစ်နေ့တွင် မာလာဝီရှိ ယေဟောဝါသက်သေများကို ရက်စက်ကြမ်းကြုတ်စွာနှိပ်စက်ညှဉ်းပန်းခြင်းအကြောင်း ဖော်ပြထားသည့် ကင်းမျှော်စင် ဆောင်းပါးတစ်ပုဒ်ကိုဖတ်ရသည်။ သူမ၏ယုံကြည်ခြင်းကိုအလျော့ပေးဖို့ ငြင်းဆိုသည့်အတွက်ကြောင့် သစ်ပင်တစ်ပင်တွင်ချည်နှောင်ခံရပြီး ခြောက်ကြိမ်ဗလက္ကာရပြုခြင်းခံခဲ့ရသည့် ၁၅ နှစ်အရွယ်မိန်းကလေးတစ်ဦး အကြောင်းဖော်ပြထားသည်။ ထိတ်ထိတ်လန့်လန့်နှင့် ကျွန်တော်သည်မဂ္ဂဇင်းကိုချပစ်လိုက်သော်လည်း ထိုအကြောင်းကိုဆက်လက်တွေးတောစဉ်းစားနေမိသည်။ . . . ထိုညနေပိုင်းတွင် မဂ္ဂဇင်းကိုတစ်ဖန်ပြန်၍ဖတ်ရှုမိသည်။

ကျွန်တော်သည်သမ္မာကျမ်းစာကို အရေးတကြီးစတင်လေ့လာမှုပြုသည်။ အသိပညာတိုးပွားလာသောအခါ ချာ့ချ်သည်ကျွန်တော်တို့ကို မည်မျှလမ်းလွဲစေခဲ့ပြီကို သိမြင်လာသည်။ ရှေးအချိန်၌ကဲ့သို့ပင် ကျွန်တော်တို့၏ယဇ်ပုရောဟိတ်များသည် ‘အဓမ္မအမှုကိုပြု’ သူများဖြစ်ကြသည်။ (ဟောရှေ ၆:၁၀) ဤသို့သောသူများသည် ယေရှုကြိုတင်သတိပေးခဲ့သည့် မိစ္ဆာပရောဖက်အဝင်များဖြစ်ကြသည်! (မဿဲ ၂၄:၂၄) သူတို့၏ရူပါရုံများနှင့် တန်ခိုးရှိသောလုပ်ရပ်များကို ကျွန်တော်မယုံကြည်တော့ချေ။ မှားယွင်းသောဘာသာကိုအဆက်ဖြတ်၍ အခြားသူများလည်းထိုသို့ပြုရန်ကူညီဖို့ကျွန်တော်ဆုံးဖြတ်ချက်ချလိုက်သည်။

ကျွန်တော့်ကိုချာ့ချ်တွင်ဆက်ရှိနေရန်အားထုတ်မှုများ

ကျွန်တော်ချာ့ချ်မှနုတ်ထွက်ဖို့ ဆုံးဖြတ်ကြောင်းကို ချာ့ချ်အကြီးအကဲများသိမြင်လာသောအခါ ကျွန်တော့်ထံလူလွှတ်၍ တောင်းပန်ကြသည်။ အရေးပါသောအလှူရှင်တစ်ဦးကို သူတို့လက်မလွတ်ချင်ကြပေ။ အာကူရီမြို့ရှိ ခရစ်တော်တမန်တော်များအသင်း၏ နာယက ဘာဘာ အက်ဂ်ဘာ တစ်ဦးအဖြစ်ကျွန်တော့်ကိုကမ်းလှမ်းကြသည်။

သူတို့ကိုကျွန်တော်ငြင်းဆိုခဲ့ပြီး အဘယ့်ကြောင့်ငြင်းဆိုရသည်ကိုပြောပြသည်။ ကျွန်တော်ဤသို့ပြောခဲ့သည်– “ချာ့ချ်ဟာကျွန်တော်တို့ကို လိမ်ညာခဲ့တယ်။ လူကောင်းအားလုံးကောင်းကင်သွားမယ်လို့ပြောကြတယ်။ ဒါပေမဲ့ ကျွန်တော်ကျမ်းစာကိုဖတ်ခဲ့ပြီးပြီ၊ ၁၄၄,၀၀၀ သောသူများသာ ကောင်းကင်တက်ကြမယ်လို့ ကျွန်တော်လက်ခံယုံကြည်တယ်။ တခြားဖြောင့်မတ်တဲ့လူတွေဟာ မြေကြီးပရဒိသုမှာ နေထိုင်ကြမယ်။”—မဿဲ ၅:၅; ဗျာဒိတ် ၁၄:၁၊ ၃။

ကျွန်တော်၏ဇနီးများကျွန်တော့်ကိုဆန့်ကျင်ရန် ချာ့ချ်သင်းအုပ်ဆရာကကြိုးစားပြန်သည်။ ယေဟောဝါသက်သေများ ကျွန်တော်တို့အိမ်သို့မလာရန်တားမြစ်ဖို့ သူတို့ကိုပြောသည်။ ကျွန်တော်၏ဇနီးတစ်ဦးက ကျွန်တော့်အစာကိုအဆိပ်ခတ်ခဲ့သည်။ နှစ်ယောက်က ချာ့ချ်တွင်သူတို့မြင်ခဲ့ရသည့်ရူပါရုံတစ်ခုနှင့်ပတ်သက်၍ ကျွန်တော့်ကိုသတိပေးကြသည်။ ကျွန်တော်သည်ချာ့ချ်ကိုစွန့်ခွာလျှင် သေလိမ့်မည်ဟု ရူပါရုံကဖော်ပြသည်။ ထိုသို့ဖြစ်စေကာမူ ကျွန်တော်၏ဇနီးများကိုဆက်သက်သေခံပြီး ကျွန်တော်နှင့်အတူစည်းဝေးများတက်ဖို့ ခေါ်ဖိတ်ခဲ့သည်။ “အဲဒီမှာတခြားလင်ယောက်ျားတွေကို မင်းတို့တွေ့လိမ့်မယ်” ဟုကျွန်တော်ပြောသည်။ သို့ရာတွင် သူတို့တစ်ဦးမျှစိတ်ဝင်စားမှုမပြကြဘဲ ကျွန်တော်စိတ်ပျက်အားလျှော့ဖို့သာ ဆက်ကြိုးစားကြသည်။

နောက်ဆုံးတွင် ၁၉၇၀၊ ဖေဖော်ဝါရီ ၂ ရက်နေ့၌ အနီးအနားမြို့မှအိမ်သို့အပြန်တွင် အိမ်၌မည်သူမျှမရှိတော့သည်ကို တွေ့ရှိရသည်။ ကျွန်တော်၏ဇနီးများသည် သူတို့ကလေးများနှင့်အတူအိမ်မှထွက်ပြေးသွားကြပြီ။

ဇနီးတစ်ဦးနှင့်အတည်ပေါင်းခြင်း

‘အိမ်ထောင်ရေးအခြေအနေကို ယခုပြုပြင်တည့်မတ်နိုင်ပြီ’ ဟုကျွန်တော်တွေးမိသည်။ ကျွန်တော်၏ပထမဇနီးဂျဲနက်ကို အိမ်သို့ပြန်လာဖို့ဖိတ်ခေါ်ခဲ့သည်။ သူမသဘောတူခဲ့သည်။ သို့သော် သူမ၏မိသားစုကအပြင်းအထန်ကန့်ကွက်ကြသည်။ အိမ်သို့ပြန်လာဖို့ ဂျဲနက်ကိုကျွန်တော်တောင်းဆိုကြောင်းကို အခြားဇနီးများကြားသိသောအခါ သူမ၏ဖခင်အိမ်သို့သွား၍ သူမကိုရိုက်နှက်ဖို့ကြိုးစားကြသည်။ ထိုအခါ သူမ၏မိသားစုက ကျွန်တော့်ကိုအစည်းအဝေးခေါ်လိုက်သည်။

စည်းဝေးတွင် လူပေါင်း ၈၀ ခန့်ရောက်လာကြသည်။ ဆွေမျိုးဆက်အကြီးအကဲဖြစ်သူ ဂျဲနက်၏ဦးလေးကဤသို့ပြောသည်– “ငါတို့သမီးကိုပြန်ပေါင်းချင်တယ်ဆိုရင် တခြားမိန်းမတွေကိုလည်းပြန်ပေါင်းရမယ်။ မင်းရဲ့ဘာသာအသစ်ကိုပဲလိုက်စားပြီး မိန်းမတစ်ယောက်ထဲနဲ့ပဲနေချင်တယ်ဆိုရင် တခြားမိန်းမတစ်ယောက်ကိုရှာရမယ်။ ဂျဲနက်ကိုမင်းပြန်ယူမယ်ဆိုရင် မင်းရဲ့တခြားမိန်းမတွေကသူမကိုသတ်လိမ့်မယ်၊ ငါတို့သမီးကိုငါတို့မသေစေချင်ဘူး။”

များစွာဆွေးနွေးပြီးသည်နောက် ကျွန်တော်သည်ဇနီးတစ်ဦးတည်းကိုသာပေါင်းရန်ဆုံးဖြတ်ထားကြောင်း သူတို့သိလာသည်။ နောက်ဆုံးတွင် သူတို့အလျှော့ပေးလာသည်။ ဦးလေးဖြစ်သူက “မင်းမိန်းမနဲ့မင်းကို ငါတို့မခွဲတော့ပါဘူး။ သူ့ကိုပြန်ခေါ်သွားနိုင်တယ်” ဟုပြောလာသည်။

၁၉၇၀၊ မေလ ၂၁ ရက်နေ့တွင် ဂျဲနက်နှင့်ကျွန်တော်တရားဝင်လက်ထပ်ခဲ့သည်။ ကိုးရက်အကြာတွင် ယေဟောဝါသက်သေတစ်ဦးအဖြစ် ကျွန်တော်နှစ်ခြင်းခံလိုက်သည်။ ထိုနှစ် ဒီဇင်ဘာလ၌ ဂျဲနက်လည်းနှစ်ခြင်းယူလိုက်သည်။

ယေဟောဝါ၏ကောင်းချီးများကိုမွေ့လျော်ခြင်း

ကျွန်တော်တို့၏ယခင်ချာ့ချ်အသင်းသားများက ကျွန်တော်တို့သက်သေခံများဖြစ်လာပါက သေလိမ့်မည်ဟု ဟောကိန်းထုတ်ခဲ့သည်။ ယင်းသည် လွန်ခဲ့သည့်နှစ်ပေါင်း ၃၀ ခန့်ကဖြစ်သည်။ ယခုကျွန်တော်သေသွားခဲ့လျှင်ပင် ယေဟောဝါသက်သေတစ်ဦးဖြစ်လာသောကြောင့်ဟု ဆိုနိုင်မည်လော။ ကျွန်တော့်ဇနီးယခုသေဆုံးသွားလျှင် သူမယေဟောဝါသက်သေဖြစ်လာသောကြောင့်ဟူ၍ တစ်ဦးတစ်ယောက်ကဆိုနိုင်မည်လော။

ကျွန်တော်၏ကလေး ၁၇ ယောက်တို့ကို သမ္မာတရားလမ်းကိုပြဖို့ကြိုးပမ်းခဲ့သည်။ ကျွန်တော်ယေဟောဝါသက်သေတစ်ဦးဖြစ်လာချိန်တွင် သူတို့အများစုမှာလူကြီးပိုင်းဖြစ်နေပြီဖြစ်သော်လည်း သမ္မာကျမ်းစာကိုလေ့လာဖို့အားပေးခဲ့ပြီး အစည်းအဝေးများနှင့် စည်းဝေးကြီးများသို့ခေါ်သွားခဲ့သည်။ သူတို့အထဲမှငါးဦးသည် ကျွန်တော်နှင့်အတူယေဟောဝါအားဝတ်ပြုနေခြင်းက ကျွန်တော့်ကိုရွှင်လန်းမှုဖြစ်စေသည်။ တစ်ဦးမှာ အသင်းတော်၌ကျွန်တော်နှင့်အတူ အကြီးအကဲတစ်ဦးအဖြစ် အမှုထမ်းနေသည်။ အခြားတစ်ဦးမှာ အနီးအနားအသင်းတော်တစ်ခုတွင် ဓမ္မအမှုထမ်းတစ်ဦးဖြစ်သည်။ ကျွန်တော်၏ကလေးနှစ်ဦးမှာ မှန်မှန်ရှေ့ဆောင်လုပ်နေကြသည်။

ပြန်ပြောင်းစဉ်းစားကြည့်သည့်အခါ မိမိ၏ကျေးကျွန်တစ်ဦးဖြစ်လာဖို့ ကျွန်တော့်အားကူညီရာတွင် ယေဟောဝါ၏မခံစားထိုက်သောကြင်နာမှုကို ကျွန်တော်အံ့အားသင့်မိသည်။ “ငါ့ကိုစေလွှတ်တော်မူသော ခမည်းတော်သည်သွေးဆောင်တော်မမူလျှင် အဘယ်သူမျှငါ့ထံသို့မလာနိုင်” ဟူသည့်ယေရှု၏စကားများသည် မှန်ကန်လှပေစွ။—ယောဟန် ၆:၄၄။

[အောက်ခြေမှတ်ချက်များ]