ကယ်တင်ခြင်းအတွက် လူသိရှင်ကြားကြေညာခြင်း

“ယေဟောဝါ၏နာမတော်ကို . . . [ဆုတောင်း] သောသူရှိသမျှတို့သည် ကယ်တင်ခြင်းသို့ရောက်ကြလတ္တံ့။”—ရောမ ၁၀:၁၃၊ ကဘ။

၁။ သမိုင်းတစ်လျှောက် အဘယ်သတိပေးချက်များပေးခဲ့သနည်း။

သမိုင်းက ‘ယေဟောဝါ၏နေ့ရက်’ အတော်များများကို ဖော်ပြထားသည်။ နောဧခေတ်ရေလွှမ်းမိုးခြင်း၊ သောဒုံနှင့်ဂေါမောရမြို့ပျက်သုဉ်းခြင်း၊ ဘီ.စီ.အီး. ၆၀၇ နှင့် စီ.အီး. ၇၀ တွင်ယေရုရှလင်မြို့ပျက်စီးခြင်းတို့သည် ကြီးမြတ်၍ အလွန်ကြောက်မက်ဖွယ်ကောင်းသော ယေဟောဝါ၏နေ့ရက်များဖြစ်ခဲ့ပါသည်။ ယင်းတို့သည် ယေဟောဝါကိုပုန်ကန်သောသူများအပေါ် အပြစ်ဒဏ်စီရင်သောနေ့ရက်များဖြစ်ခဲ့ပါသည်။ (မာလခိ ၄:၅; လုကာ ၂၁:၂၂) ထိုနေ့ရက်များအတွင်း များစွာသောသူတို့သည် ၎င်းတို့၏ဆိုးသွမ်းမှုများကြောင့် ဖျက်ဆီးခံခဲ့ရကြသည်။ သို့သော် အချို့မူကား ကပ်ကျော်ခဲ့ကြသည်။ ယေဟောဝါသည် သတိပေးချက်များကိုပေးကာ ကျရောက်လုဆဲကပ်ဆိုးကြီးအကြောင်း အသိပေးပြီး နှလုံးဖြောင့်မှန်သူများကို ကယ်တင်ခြင်းရရန် အခွင့်အရေးပေးတော်မူခဲ့သည်။

၂၊ ၃။ (က) ပင်တေကုတ္တေပွဲနေ့တွင် အဘယ်ပရောဖက်ပြုသတိပေးချက်ကို ကိုးကားဖော်ပြခဲ့သနည်း။ (ခ) စီ.အီး. ၃၃ ပင်တေကုတ္တေပွဲနေ့မှစ၍ ယေဟောဝါ၏နာမတော်ကိုဆုတောင်းရာတွင် အဘယ်အရာလိုအပ်ခဲ့သနည်း။

^၂ ဤအတွက် စီ.အီး. ၇၀၊ ယေရုရှလင်မြို့ပျက်စီးခြင်းသည် ထူးခြားသောပုံနမူနာတစ်ခုဖြစ်သည်။ နှစ်ပေါင်း ၉၀၀ နီးပါးမျှကြို၍ တင်ကူးဟောကြားထားသည့် ထိုအဖြစ်အပျက်ကို ပရောဖက်ယောလက ဤသို့ရေးသားခဲ့သည်– “မိုးကောင်းကင်၌လည်းကောင်း၊ မြေကြီးပေါ်၌လည်းကောင်း၊ အံ့ဖွယ်သောအရာတည်းဟူသော သွေး၊ မီးလျှံ၊ မီးခိုးတိုင်တို့ကိုငါပြမည်။ ထာဝရဘုရား၏ကြောက်မက်ဖွယ်သောနေ့ကြီးမတိုင်မီ၊ နေသည်မှောင်မိုက်အတိဖြစ်လိမ့်မည်။ လသည်လည်း သွေးဖြစ်လိမ့်မည်။” ထိုသို့သော ကြောက်လန့်ဖွယ်အချိန်အခါကို မည်သူကပ်ကျော်နိုင်မည်နည်း။ မှုတ်သွင်းခံရလျက် ယောလက ဤသို့ရေးသားခဲ့သည်– “ထိုအခါ ထာဝရဘုရားကို [ဆုတောင်း] သောသူရှိသမျှတို့သည် ကယ်တင်တော်မူခြင်းသို့ရောက်ရကြလတ္တံ့။ အကြောင်းမူကား၊ ထာဝရဘုရားမိန့်တော်မူသည်အတိုင်း ဇိအုန်တောင်၊ ယေရုရှလင်မြို့၌၊ ထာဝရဘုရားခေါ်တော်မူသောသူအကျန်အကြွင်းတို့အဖို့ ကယ်တင်ခြင်းအခွင့်ရှိရလတ္တံ့။”—ယောလ ၂:၃၀-၃၂။

^၃ စီ.အီး. ၃၃ ပင်တေကုတ္တေပွဲနေ့တွင် တမန်တော်ပေတရုသည် ဂျူးလူအုပ်နှင့် ယေရုရှလင်ရှိ ဘာသာပြောင်းဝင်လာသူများကိုဟောပြောခဲ့စဉ် ယောလ၏ ဤပရောဖက်ပြုချက်ကိုကိုးကားလျက် ယင်းသည် သူတို့အချိန်တွင် ပြည့်စုံရန်မျှော်လင့်နိုင်ကြောင်း မိမိ၏ပရိသတ်အား ပြသခဲ့သည်– “အထက်မိုးကောင်းကင်၌ အံ့ဖွယ်သောအရာတို့ကိုလည်းကောင်း၊ အောက်အရပ်မြေကြီးပေါ်၌သွေး၊ မီးလျှံ၊ မီးခိုးတည်းဟူသောပုဗ္ဗ [ရှေ့ပြေး] နိမိတ်တို့ကိုလည်းကောင်း ငါပြမည်။ ထာဝရဘုရား၏ထူးမြတ်သောနေ့ကြီးမတိုင်မီ၊ နေသည်မှောင်မိုက်အတိဖြစ်လိမ့်မည်။ လသည်လည်းသွေးဖြစ်လိမ့်မည်။ ထိုအခါထာဝရဘုရားကို ပတ္ထနာပြုသောသူရှိသမျှတို့သည် ကယ်တင်တော်မူခြင်းသို့ရောက်ရကြလတ္တံ့။” (တမန်တော် ၂:၁၆-၂၁) ပေတရု၏စကားကိုနားထောင်ခဲ့ကြသော လူအုပ်ကြီးဝင်အပေါင်းသည် မောရှေပညတ်အောက်တွင်ရှိကြရာ ယေဟောဝါ၏နာမတော်ကို သူတို့သိရှိထားကြပါသည်။ ယခုမှစ၍ ယေဟောဝါ၏နာမတော်ကို ဆုတောင်းခြင်းတွင် ထိုထက်မကပါဝင်ကြောင်း ပေတရုက ရှင်းပြခဲ့သည်။ ထူးခြားသည်ကား ၎င်းတွင် အသေသတ်ခြင်းခံရပြီးနောက် မသေနိုင်သော ကောင်းကင်အသက်တာသို့ထမြောက်တော်မူခဲ့သည့် ယေရှုခရစ်၏နာမ၌ဗတ္တိဇံခံခြင်းပါဝင်မှုဖြစ်သည်။—တမန်တော် ၂:၃၇၊ ၃၈။

၄။ ခရစ်ယာန်များသည် အဘယ်သတင်းစကားကို အနှံ့အပြားကြေညာခဲ့ကြသနည်း။

^၄ ပင်တေကုတ္တေပွဲနေ့မှစ၍ ခရစ်ယာန်များသည် ရှင်ပြန်ထမြောက်ခဲ့သူ ယေရှုနှင့်ပတ်သက်သည့် သတင်းစကားကို ဖြန့်ကြသည်။ (၁ ကောရိန္သု ၁:၂၃) လူသားများသည် ယေဟောဝါဘုရားသခင်၏ဝိညာဉ်ရေးသားများအဖြစ် မွေးစားခံရနိုင်ကြောင်း၊ အသစ်သော “ဘုရားသခင်၏ဣသရေလ” တွင်ပါဝင်နိုင်ကြောင်း၊ ယင်းဝိညာဉ်ရေးလူမျိုးသည် ‘ယေဟောဝါ၏ဂုဏ်ကျေးဇူးတော်များကိုကြေညာ’ ကြလိမ့်မည်ဖြစ်ကြောင်းကို သူတို့သိရှိစေခဲ့ကြသည်။ (ဂလာတိ ၆:၁၆; ၁ ပေတရု ၂:၉) သေသည့်တိုင်သစ္စာရှိသူများသည် ယေရှုနှင့်အတူ အမွေခံဖက်များအဖြစ် ကိုယ်တော်၏ကောင်းကင်နိုင်ငံတော်တွင် မသေနိုင်သောကောင်းကင်အသက်တာကို အမွေခံကြမည်ဖြစ်သည်။ (မဿဲ ၂၄:၁၃; ရောမ ၈:၁၅၊ ၁၆; ၁ ကောရိန္သု ၁၅:၅၀-၅၄) ထို့ပြင် ဤခရစ်ယာန်များသည် ယေဟောဝါ၏ ရောက်လာတော့မည့် ကြီးမြတ်၍ ကြောက်မက်ဖွယ်ကောင်းသောနေ့ရက်ကို ကြွေးကြော်ကြရမည်ဖြစ်သည်။ သူတို့သည် ဂျူးလောကအား ထိုအချိန်အထိ ယေရုရှလင်မြို့နှင့် ဘုရားသခင့်လူမျိုးဟုဆိုသူများအပေါ် ကျရောက်ခဲ့သော မည်သည့်ဘေးသင့်မှုထက်ကိုမဆို သာလွန်သည့်ဆင်းရဲခြင်းကို တွေ့ကြုံကြရလိမ့်မည်ဖြစ်ကြောင်း သတိပေးကြရမည်ဖြစ်သည်။ သို့သော်လည်း ကပ်ကျော်မည့်သူများ ရှိပါလိမ့်မည်။ မည်သူတို့နည်း။ ယေဟောဝါ၏နာမတော်ကို ဆုတောင်းသူများဖြစ်ကြသည်။

“နောက်ဆုံးအချိန်၌”

၅။ ယနေ့ အဘယ်ပရောဖက်ပြုချက်ပြည့်စုံမှုများ ဖြစ်ပျက်နေသနည်း။

^၅ ထိုစဉ်ကအခြေအနေများသည် ယနေ့ကျွန်ုပ်တို့တွေ့မြင်နေရသည့်အရာများကို နည်းများစွာဖြင့် ပုံတင်ပြခဲ့သည်။ ၁၉၁၄ ခုနှစ်ကတည်းက လူသားများသည် ‘အမှုကုန်ချိန် [“ဆုံးခန်းချိန်၊” ကဘ]’၊ ‘ဤကပ်ကမ္ဘာကုန်သောအချိန် [“စနစ်ဆုံးခန်း၊” ကဘ] နှင့် “နောက်ဆုံးအချိန်” အဖြစ် ကျမ်းစာ၌ရည်ညွှန်းထားသော အထူးအချိန်ကာလတွင် အသက်ရှင်နေကြပါသည်။ (ဒံယေလ ၁၂:၁၊ ၄; မဿဲ ၂၄:၃-၈; ၂ တိမောသေ ၃:၁-၅၊ ၁၃၊ ကဘ) ကျွန်ုပ်တို့၏ရာစုနှစ်တွင် ရက်စက်သောစစ်ပွဲများ၊ မထိန်းချုပ်နိုင်သော အကြမ်းဖက်မှု၊ လူ့အဖွဲ့အစည်းနှင့် ဝန်းကျင်ယိုယွင်းပျက်စီးမှုတို့က ကျမ်းစာပရောဖက်ပြုချက်၏ပြည့်စုံမှုကို ထူးခြားစွာ မှတ်သားဖော်ပြပါသည်။ ယင်းတို့အားလုံးသည် ယေရှုပရောဖက်ပြုထားသော ပုဗ္ဗ [ရှေ့ပြေး] နိမိတ်တွင်ပါဝင်ပြီး လူသားအပေါင်းသည် ယေဟောဝါ၏ အလွန်ကြောက်မက်ဖွယ် နောက်ဆုံးအပြီးသတ်နေ့ရက်ကို တွေ့ကြုံကြရတော့မည်ဖြစ်ကြောင်း ညွှန်ပြပါသည်။ ယင်းသည် “ကမ္ဘာဦးမှစ၍မဖြစ်စဖူး နောင်၌လည်းမဖြစ်လတ္တံ့သော ကြီးစွာသောဒုက္ခ” ၏အထွတ်အထိပ်ဖြစ်သော အာမဂေဒုန်စစ်ပွဲတွင် အဆုံးတိုင်မည်ဖြစ်သည်။—မဿဲ ၂၄:၂၁; ဗျာဒိတ် ၁၆:၁၅။

၆။ (က) ယေဟောဝါသည် စိတ်နှိမ့်ချသောသူများကိုကယ်တင်ရန် မည်သို့လုပ်ဆောင်တော်မူခဲ့ပြီနည်း။ (ခ) ကပ်ကျော်နိုင်ပုံနှင့်ပတ်သက်သော ပေါလု၏အကြံပြုချက်ကို မည်သည့်နေရာတွင်တွေ့နိုင်သနည်း။

^၆ ဖျက်ဆီးခြင်းနေ့ရက် နီးသည်ထက်နီးကပ်လာသည်နှင့်အမျှ စိတ်နှိမ့်ချသူများ၏ကယ်တင်ခြင်းအတွက် ယေဟောဝါလုပ်ဆောင်ပေးနေတော်မူသည်။ ကိုယ်တော်သည် ဤ “ဆုံးခန်းချိန်” အတွင်း ဘုရားသခင်၏ဝိညာဉ်ရေးဆိုင်ရာ ဣသရေလလူများမှ နောက်ဆုံးကျန်ကြွင်းသူများကိုစုသိမ်းပြီးဖြစ်၍ ၁၉၃၀ ပြည့်လွန်နှစ်များမှစ၍ မိမိ၏မြေကြီးကျေးကျွန်များအား “အသီးသီးဘာသာစကားကိုပြောသော လူအမျိုးအနွယ်ခပ်သိမ်းတို့အထဲမှ ထွက်၍၊ အဘယ်သူမျှမရေမတွက်နိုင်သော လူများအပေါင်းတို့” ကိုစုသိမ်းစေခြင်းအပေါ် အာရုံစိုက်စေတော်မူခဲ့ပြီ။ ဤသူတို့သည် အုပ်စုတစ်စုအနေဖြင့် အသက်ရှင်၍ “ကြီးစွာသောဆင်းရဲဒုက္ခထဲက” အရှင်လတ်လတ် “ထွက်မြောက်” လာကြပါသည်။ (ဗျာဒိတ် ၇:၉၊ ၁၄) သို့သော် တစ်ဦးစီအနေဖြင့် မည်သို့ ကျိန်းသေကပ်ကျော်နိုင်မည်နည်း။ တမန်တော်ပေါလုက ဖြေဆိုပေးပါသည်။ ကပ်ကျော်ရန်အတွက် အလွန်ကောင်းသောသွန်သင်ချက်ကို ရောမအခန်းကြီး ၁၀ တွင် သူဖော်ပြပေးပါသည်။ ၎င်းသည် သူ၏ခေတ်တွင်သက်ဆိုင်ခဲ့သကဲ့သို့ ကျွန်ုပ်တို့အချိန်တွင်လည်း ထပ်၍သက်ဆိုင်ပါသည်။

ကယ်တင်ခြင်းအတွက် ဆုတောင်းချက်

၇။ (က) အဘယ်မျှော်လင့်ချက်ကို ရောမ ၁၀:၁၊ ၂ တွင်ဖော်ပြထားသနည်း။ (ခ) ယေဟောဝါသည် ယခု “သတင်းကောင်း” ကို အဘယ်ကြောင့် သာ၍တိုးချဲ့ဟောပြောစေနိုင်တော်မူသနည်း။

^၇ ရောမကျမ်းကို ပေါလုရေးခဲ့ချိန်တွင် လူမျိုးတော်အဖြစ်မှ ဣသရေလလူမျိုးကို ယေဟောဝါငြင်းပယ်တော်မူပြီးဖြစ်သည်။ သို့တိုင် တမန်တော်က ဤသို့အခိုင်အမာပြောဆိုခဲ့သည်– “ဣသရေလလူတို့သည် ကယ်တင်တော်မူခြင်းသို့ရောက်စေခြင်းငှာ၊ ငါ၏စေတနာအလိုရှိ၍ ဘုရားသခင်ကိုဆုတောင်းလေ့ရှိ၏။” သူ၏မျှော်လင့်ချက်မှာ ဂျူးတစ်ဦးချင်းစီအနေဖြင့် ဘုရားသခင့်အလိုတော်နှင့်ဆိုင်သည့် တိကျမှန်ကန်သောအသိပညာကိုရရှိခြင်းအားဖြင့် ကယ်တင်ခြင်းရစေရန်ဖြစ်သည်။ (ရောမ ၁၀:၁၊ ၂) ထို့ပြင် “ဘုရားသခင်၏သားတော်ကို ယုံကြည်သောသူအပေါင်းတို့သည် ပျက်စီးခြင်းသို့မရောက်၊ ထာဝရအသက်ကိုရစေခြင်းငှာ၊ ဘုရားသခင်သည် မိမိ၌တစ်ပါးတည်းသောသားတော်ကို စွန့်တော်မူသည်တိုင်အောင် လောကီသားတို့ကိုချစ်တော်မူ၏” ဟုယောဟန် ၃:၁၆ တွင်ဖော်ပြထားသည့်အတိုင်း ယုံကြည်ခြင်းတင်ပြကြသော တစ်ကမ္ဘာလုံးရှိလူသားများကို ယေဟောဝါသည် ကယ်တင်ခြင်းရရှိစေလိုတော်မူ၏။ ယေရှု၏ရွေးနုတ်ဖိုးပူဇော်သကာသည် ထိုမြင့်မြတ်သောကယ်တင်ခြင်းလမ်းကို ဖွင့်ပေးခဲ့ပါသည်။ နောဧခေတ်နှင့် ယင်းနောက် အခြားတရားစီရင်ရာနေ့များတွင်ကဲ့သို့ ယေဟောဝါသည် “သတင်းကောင်း” ကိုကြွေးကြော်စေခဲ့ကာ ကယ်တင်ခြင်းလမ်းကို ပြညွှန်ပေးတော်မူ၏။—မာကု ၁၃:၁၀၊ (ကဘ) ၁၉၊ ၂၀။

၈။ ပေါလု၏ပုံနမူနာအတိုင်း စစ်မှန်သောခရစ်ယာန်များသည် ယနေ့ မည်သူတို့အား စေတနာစိတ်တင်ပြနေကြသနည်း၊ မည်သို့အားဖြင့်နည်း။

^၈ ပေါလုသည် ဂျူးနှင့်တစ်ပါးအမျိုးသားနှစ်မျိုးစလုံးအပေါ် မိမိ၏စိတ်စေတနာရှိကြောင်း တင်ပြလျက် အခွင့်အရေးရတိုင်း ဟောပြောခဲ့သည်။ သူသည် “ယုဒလူနှင့်ဟေလသလူတို့ကို ဖြားယောင်းသွေးဆောင်လေ၏။” ဧဖက်ရှိအကြီးအကဲများကို သူက ဤသို့ပြောခဲ့သည်– “သင်တို့အကျိုးပြုစုရာ တစ်စုံတစ်ခုကိုမျှငါမထိမ်မဝှက်။ လူစုဝေးရာ၌လည်းကောင်း၊ အိမ်များ၌လည်းကောင်း၊ သင်တို့အားဟောပြော၍ ဆုံးမသြဝါဒပေးသဖြင့်၊ ဘုရားသခင်ရှေ့တော်၌ နောင်တရခြင်းတရားကိုလည်းကောင်း၊ ငါတို့သခင်ယေရှုခရစ်ကိုယုံကြည်ခြင်းတရားကိုလည်းကောင်း၊ ယုဒလူ၊ ဟေလသလူတို့အား သက်သေခံသည်အကြောင်းအရာကို သင်တို့သိကြ၏။” (တမန်တော် ၁၈:၄; ၂၀:၂၀၊ ၂၁) ထပ်တူစွာပင် ယနေ့ယေဟောဝါသက်သေများသည် ခရစ်ယာန်ဟုအခေါ်ခံသူများထံတွင်သာမက လူအားလုံးထံတွင် “မြေကြီးစွန်းတိုင်အောင်” ဟောပြောခြင်းဖြင့် သာ၍အသုံးတော်ခံနေကြပါသည်။—တမန်တော် ၁:၈; ၁၈:၅။

“ယုံကြည်ခြင်း ‘တရား’” ကိုဝန်ခံခြင်း

၉။ (က) အဘယ်ယုံကြည်ခြင်းမျိုးရှိရန် ရောမ ၁၀:၈၊ ၉ ကအားပေးထားသနည်း။ (ခ) ကျွန်ုပ်တို့၏ယုံကြည်ခြင်းကို မည်သည့်အချိန်တွင် မည်သို့ဝန်ခံသင့်သနည်း။

^၉ ကယ်တင်ခြင်းရဖို့အတွက် တည်ကြည်သောယုံကြည်ခြင်းလိုအပ်ပါသည်။ တရားဟောရာ ၃၀:၁၄ ကိုကိုးကားလျက် ပေါလုက ဤသို့ကြေညာခဲ့သည်– “‘တရားတော်သည်သင်နှင့်နီး၏။ သင်၏နှုတ်၌လည်းကောင်း၊ သင်၏နှလုံး၌လည်းကောင်းရှိသည်ဟုဆို၏။’ ထိုသို့ဆိုသော်၊ ငါတို့ဟောသောယုံကြည်ခြင်း ‘တရား’ ကိုဆိုလိုသတည်း။” (ရောမ ၁၀:၈) ထို “ယုံကြည်ခြင်း ‘တရား’” ကိုကျွန်ုပ်တို့ဟောပြောကြစဉ် ယင်းသည် ကျွန်ုပ်တို့၏နှလုံးတွင် သာ၍စွဲကျန်ရစ်လာပါသည်။ ပေါလုနှင့်ပတ်သက်၍လည်း ထိုသို့ပင်ဖြစ်ခဲ့ပြီး သူ၏ထပ်ဆင့်စကားများက ထိုယုံကြည်ခြင်းတရားကို အခြားသူများအားဝေငှရာတွင် ပေါလုနည်းတူဖြစ်လိုသော ကျွန်ုပ်တို့၏သန္နိဋ္ဌာန်ကို ခိုင်မြဲစေနိုင်ပါသည်– “သင်သည် သခင်ယေရှုကို ‘နှုတ်ဖြင့်ဝန်ခံ’ ၍၊ ဘုရားသခင်သည် သူ့ကိုသေခြင်းမှထမြောက်စေတော်မူပြီဟု စိတ်နှလုံးထဲ၌ယုံကြည်လျှင်၊ ကယ်တင်ခြင်းသို့ရောက်လိမ့်မည်။” (ရောမ ၁၀:၉) ယင်းသည် နှစ်ခြင်းခံသည့်အချိန်၌ အခြားသူများရှေ့မှောက်တွင် ဝန်ခံရုံမျှသာမဟုတ်ဘဲ သမ္မာတရား၏မြင့်မြတ်သော အပိုင်းကဏ္ဍအားလုံးအကြောင်း လူထုရှေ့ ဇွဲရှိရှိသက်သေခံခြင်းဖြင့် အဆက်မပြတ်ပြုသော ဝန်ခံခြင်းဖြစ်ရမည်။ ထိုသို့သော သမ္မာတရားသည် ပိုင်သအုပ်စိုးရှင်ယေဟောဝါ၏နာမတော်မြတ်အပေါ်; ကျွန်ုပ်တို့၏ဘုရင်နှင့်ရွေးနုတ်ရှင် သခင်ယေရှုခရစ်အပေါ်နှင့် ထည်ဝါသော ဘုရားသခင့်နိုင်ငံတော်၏ ကတိတော်များအပေါ် အာရုံစူးစိုက်စေပါသည်။

၁၀။ ရောမ ၁၀:၁၀၊ ၁၁ နှင့်အညီ ဤ “ယုံကြည်ခြင်း ‘တရား’” ကိုမည်သို့ကိုင်တွယ်ရမည်နည်း။

^၁၀ တမန်တော်က “ဖြောင့်မတ်ရာသို့ရောက်ခြင်းငှာ စိတ်နှလုံးဖြင့်ယုံကြည်ရ၏။ ကယ်တင်ခြင်းသို့ရောက်ခြင်းငှာ နှုတ်ဖြင့်ဝန်ခံရ၏။ ကျမ်းစာလာသည်ကား၊ ‘ထိုကျောက်ကိုအမှီပြုသောသူမည်သည်ကား၊ ရှက်ကြောက်ခြင်းမရှိနိုင်ရာ’ ဟုလာသတည်း” ဟူ၍ဆက်ဖော်ပြထားရာ ဤ “ယုံကြည်ခြင်း ‘တရား’” ကိုလက်မခံ၊ မကျင့်သုံးသောသူ မည်သူမျှ ကယ်တင်ခြင်းရမည်မဟုတ်ပါ။ (ရောမ ၁၀:၁၀၊ ၁၁) ဤ “ယုံကြည်ခြင်း ‘တရား’” ၏တိကျမှန်ကန်သောအသိပညာကိုရယူပြီး အခြားသူများကိုပြောပြရန် လှုံ့ဆော်ခံရစေဖို့ ၎င်းကို ကျွန်ုပ်တို့၏နှလုံးတွင် ဆက်လက်ပြုစုပျိုးထောင်ပေးရမည်။ ယေရှုကိုယ်တော်တိုင်က ကျွန်ုပ်တို့ကို ဤသို့သတိပေးတော်မူ၏– “မျောက်မထားသောဤလူမျိုးဆိုးတွင် အကြင်သူသည်ငါ့ကိုလည်းကောင်း၊ ငါ့စကားကိုလည်းကောင်းရှက်၏၊ လူသားသည်မိမိအဘခမည်းတော်၏ ဘုန်းအာနုဘော်ကိုဆောင်လျက်၊ သန့်ရှင်းသောကောင်းကင်တမန်အခြံအရံတို့နှင့် ကြွလာသောအခါ ထိုသူကိုရှက်တော်မူလတ္တံ့။”—မာကု ၈:၃၈။

၁၁။ သတင်းကောင်းကို မည်သည့်အတိုင်းအတာအထိ ကြွေးကြော်ရမည်နည်း၊ အဘယ်ကြောင့်နည်း။

^၁၁ ပရောဖက်ဒံယေလ တင်ကူးဟောပြောခဲ့သည့်အတိုင်း ဘုရားသခင့်နိုင်ငံတော်အကြောင်း သက်သေခံခြင်းသည် မြေကြီးစွန်းတိုင်အောင် ပျံ့နှံ့သွားစဉ် ဤဆုံးခန်းချိန်တွင် “ပညာရှိသောသူတို့သည်” “ကောင်းကင်မျက်နှာကြက်၏အရောင်အဝါကဲ့သို့” ထွန်းလင်းနေကြသည်ကို တွေ့ရှိရ၏။ သူတို့သည် “လူအများတို့ကိုဖြောင့်မတ်ခြင်းတရားလမ်းထဲသို့သွင်း” နေကြပြီး ယေဟောဝါသည် ဆုံးခန်းချိန်နှင့်ပတ်သက်သောပရောဖက်ပြုချက်များကို ပိုရှင်းလင်းသည်ထက် ရှင်းလင်းစေတော်မူသောကြောင့် စစ်မှန်သောအသိပညာသည် အမှန်ပင် တိုးပွားကြွယ်ဝလာပါသည်။ (ဒံယေလ ၁၂:၃၊ ၄) သမ္မာတရားနှင့် ဖြောင့်မတ်ခြင်းကိုချစ်မြတ်နိုးသူအားလုံးကပ်ကျော်ရန်အတွက် ဤကယ်တင်ခြင်းသတင်းစကားသည် မရှိမဖြစ်အရေးကြီးသည်။

၁၂။ ဗျာဒိတ် ၁၄:၆ တွင်ဖော်ပြထားသည့် ကောင်းကင်တမန်၏လုပ်ငန်းတာဝန်နှင့် ရောမ ၁၀:၁၂ သည် မည်သို့ဆက်နွှယ်သနည်း။

^၁၂ တမန်တော်ပေါလုက ဤသို့ဆက်ပြောသည်– “ယုဒအမျိုး၊ ဟေလသအမျိုးကိုမရွေး၊ လူအပေါင်းတို့ကိုအစိုးရသောအရှင်တစ်ပါးတည်းရှိ၍၊ ကိုယ်တော်ကို [ဆုတောင်း] သောသူအပေါင်းတို့၌ ကျေးဇူးကြွယ်ဝတော်မူ၏။” (ရောမ ၁၀:၁၂) ယနေ့ “သတင်းကောင်း” ကိုကမ္ဘာတစ်ခွင်လုံး—လူအားလုံးထံ၊ မြေကြီးစွန်းတိုင်အောင်—သာ၍ပင်ကျယ်ပြန့်စွာ ဟောပြောရမည်ဖြစ်သည်။ ဗျာဒိတ် ၁၄:၆ ပါကောင်းကင်တမန်သည် ကောင်းကင်အလယ်၌ဆက်၍ပျံဝဲလျက်ရှိပြီး “မြေကြီးပေါ်မှာနေသောသူတည်းဟူသော အသီးသီးဘာသာစကားကိုပြောသော လူအမျိုးအနွယ်ခပ်သိမ်းတို့အား ထာဝရဧဝံဂေလိတရားကိုဟော” ပြောရန် ကျွန်ုပ်တို့ကို တာဝန်အပ်နှင်းထားပါသည်။ ယင်းက တုံ့ပြန်သူများအပေါ် မည်သို့အကျိုးဖြစ်ထွန်းမည်နည်း။

ယေဟောဝါ၏နာမတော်ကို ဆုတောင်းခြင်း

၁၃။ (က) ကျွန်ုပ်တို့၏ ၁၉၉၈ နှစ်ချုပ်ကျမ်းချက်ကား အဘယ်နည်း။ (ခ) ၎င်းကျမ်းချက်သည် ယနေ့ အဘယ်ကြောင့် အသင့်လျော်ဆုံးဖြစ်သနည်း။

^၁၃ ယောလ ၂:၃၂ ကိုကိုးကားလျက် ပေါလုက ဤသို့ကြေညာသည်– “ယေဟောဝါ၏နာမတော်ကို [ဆုတောင်း] သောသူရှိသမျှတို့သည် ကယ်တင်ခြင်းသို့ရောက်ကြလတ္တံ့။” (ရောမ ၁၀:၁၃၊ ကဘ) ယင်းကို ၁၉၉၈ ခုနှစ်၊ ယေဟောဝါသက်သေများ၏ နှစ်ချုပ်ကျမ်းချက်အဖြစ် ရွေးချယ်ထားသည့်အတွက် မည်မျှသင့်လျော်ပါသည်တကား! ယေဟောဝါအားကိုးစားလျက် ကိုယ်တော်၏နာမတော်နှင့် ၎င်းကိုကိုယ်စားပြုသည့် မြင့်မြတ်သောရည်ရွယ်တော်မူချက်များကို သိရှိစေခြင်းငှာ ရှေ့သို့တိုးရန် တစ်ခါနှင့်မျှမတူအောင် ပိုမိုအရေးကြီးနေသည်တကား! ပထမရာစုတွင်ကဲ့သို့ပင် လက်ရှိယိုယွင်းသောအစီအစဉ်စနစ်ဆိုး၏ နောက်ဆုံးကာလတွင်လည်း ဤကြွေးကြော်သံသည် ဆက်၍ပဲ့တင်ထပ်နေပါသည်– “သဘောမဖြောင့်သောဤအမျိုးမှ ကယ်တင်ခြင်းသို့ရောက်ကြလော့။” (တမန်တော် ၂:၄၀) ယင်းသည် ကမ္ဘာတစ်ဝန်းရှိ ဘုရားသခင်ကိုကြောက်ရွံ့သောသူအပေါင်းနှင့် သူတို့၏ လူထုရှေ့သတင်းကောင်းကြေညာခြင်းကို နားထောင်သောသူများသည် ကယ်တင်ခြင်းရရှိရန် ယေဟောဝါ၏နာမကို ဆုတောင်းကြဖို့ တံပိုးခရာမှုတ်ပြီး ဖိတ်ခေါ်နေသကဲ့သို့ဖြစ်သည်။—၁ တိမောသေ ၄:၁၆။

၁၄။ ကယ်တင်ခြင်းရဖို့အတွက် မည်သည့်ကျောက်ကို ကျွန်ုပ်တို့ ဆုတောင်းရမည်နည်း။

^၁၄ ဤကမ္ဘာပေါ်တွင် ယေဟောဝါ၏နေ့ရက်ကြီးကျရောက်သောအခါ အဘယ်အရာဖြစ်ပျက်မည်နည်း။ အများစုသည် ကယ်တင်ခြင်းရဖို့အတွက် ယေဟောဝါအား မျှော်ကိုးလိမ့်မည်မဟုတ်ပါ။ ယေဘုယျအားဖြင့် လူသားများသည် “တောင်များ၊ ကျောက်များတို့ကိုခေါ်လျက်၊ ‘ငါတို့အပေါ်သို့ကျကြပါ။ ပလ္လင်ပေါ်မှာထိုင်တော်မူသောသူ၏မျက်နှာနှင့် သိုးသငယ်၏အမျက်တော်ကို ကွယ်ကာ၍၊ ငါတို့ကိုဖုံးအုပ်ကြပါ’” ဟုပြောဆိုကြလိမ့်မည်။ (ဗျာဒိတ် ၆:၁၅၊ ၁၆) သူတို့၏မျှော်ကိုးရာသည် တောင်များပမာဖြစ်သော ဤအစီအစဉ်စနစ်၏အဖွဲ့အစည်းများနှင့် အသင်းအဖွဲ့များဖြစ်ကြသည်။ သို့သော် ကျောက်တကာတို့တွင် အကြီးမြတ်ဆုံးသောကျောက်၊ ယေဟောဝါဘုရားသခင်အား ယုံကြည်ကိုးစားမည်ဆိုပါက မည်မျှကောင်းလိုက်မည်ဖြစ်ခြင်း! (တရားဟောရာ ၃၂:၃၊ ၄) ကိုယ်တော့်အကြောင်း ဒါဝိဒ်မင်းကြီးက ဤသို့ဆိုသည်– “ထာဝရဘုရားသည် ငါ၏ကျောက်၊ ငါ၏မြို့ရိုး၊ ငါ့ကိုကယ်လွှတ်သောသခင် . . . ဖြစ်တော်မူ၏။” ယေဟောဝါသည် “ကယ်တင်ခြင်းသို့ရောက်ရာကျောက်” ဖြစ်တော်မူ၏။ (ဆာလံ ၁၈:၂; ၉၅:၁) ကိုယ်တော့်နာမတော်သည် “ခိုင်ခံ့သောရဲတိုက်” ဖြစ်ပြီး လာမည့်အကျပ်အတည်းအတွင်း ဤ “ရဲတိုက်” တစ်ခုတည်းကသာလျှင် ကျွန်ုပ်တို့ကို အကာအကွယ်ပေးနိုင်စွမ်းရှိသည်။ (သု. ၁၈:၁၀) ထို့ကြောင့် သန်းပေါင်းခြောက်ထောင်နီးပါးရှိသော ယနေ့လူသားများမှ လူများနိုင်သမျှများစွာတို့သည် သစ္စာရှိရှိနှင့် စိတ်ရင်းမှန်ဖြင့် ယေဟောဝါ၏နာမကိုဆုတောင်းကြဖို့ သင်ကြားခံရရန်အရေးကြီးသည်။

၁၅။ ယုံကြည်ခြင်းနှင့်စပ်လျဉ်း၍ ရောမ ၁၀:၁၄ က အဘယ်အရာဖော်ပြသနည်း။

^၁၅ သင့်လျော်စွာပင် တမန်တော်ပေါလုက ဤသို့ဆက်မေးသည်– “သို့ရာတွင်၊ မယုံကြည်လျှင် အဘယ်သို့ [ဆုတောင်း] နိုင်မည်နည်း။” (ရောမ ၁၀:၁၄) ကယ်တင်ခြင်းရဖို့အတွက် ယေဟောဝါအား [ဆုတောင်း] ရန်အလို့ငှာ “ယုံကြည်ခြင်း ‘တရား’” ကိုသူတို့၏ကိုယ်ပိုင်ဖြစ်စေရန် ကူညီပေးခြင်းမခံရသေးသူမြောက်မြားစွာရှိသည်။ ယုံကြည်ခြင်းသည် အလွန်ပင်အရေးကြီးသည်။ ပေါလုက အခြားစာစောင်တစ်စောင်တွင် ဤသို့ဆိုသည်– “ယုံကြည်ခြင်းမရှိလျှင်၊ ဘုရားသခင်၏စိတ်တော်နှင့်မတွေ့နိုင်။ အကြောင်းမူကား၊ ဘုရားသခင့်အထံတော်သို့ချဉ်းကပ်သောသူသည်၊ ဘုရားသခင်ရှိတော်မူသည်ကိုလည်းကောင်း၊ ကိုယ်တော်ကိုရှာသောသူအား အကျိုးပေးတော်မူသည်ကိုလည်းကောင်း၊ ယုံကြည်ရမည်။” (ဟေဗြဲ ၁၁:၆) သို့သော်လည်း သန်းနှင့်ချီသောသူများသည် ဘုရားသခင်ကို မည်သို့ယုံကြည်လာကြမည်နည်း။ ရောမကျမ်းစာစောင်တွင် ပေါလုက ဤသို့မေးသည်– “သတင်းမကြားလျှင် အဘယ်သို့ယုံကြည်နိုင်မည်နည်း။” (ရောမ ၁၀:၁၄) သူတို့ကြားရရန်အတွက် ယေဟောဝါစီမံပေးပါသလော။ ကိုယ်တော်စီမံပေးသည်မှာ မလွဲဧကန်ပင်! ပေါလုဆက်ပြောသောစကားကို နားဆင်ကြည့်ပါ– “ဟောပြောသောသူမရှိလျှင် အဘယ်သို့ကြားနိုင်မည်နည်း။”

၁၆။ မြင့်မြတ်သောအစီအစဉ်တွင် ဟောပြောသူများ အဘယ်ကြောင့် မရှိမဖြစ်လိုအပ်သနည်း။

^၁၆ ဟောပြောသူများလိုကြောင်း ပေါလု၏အချေအတင်ပြောဆိုသောစကားမှ သိရှိရသည်။ “ကပ်ကမ္ဘာကုန်သည်တိုင်အောင်” ဤသို့ဖြစ်မည်ဟု ယေရှုဖော်ပြတော်မူခဲ့သည်။ (မဿဲ ၂၄:၁၄; ၂၈:၁၈-၂၀) ဟောပြောခြင်းသည် ကယ်တင်ခံရဖို့အလို့ငှာ ယေဟောဝါ၏နာမတော်ကိုဆုတောင်းကြရန် လူတို့ကိုကူညီပေးဖို့အတွက် မြင့်မြတ်သောအစီအစဉ်၏ မရှိမဖြစ်သောကဏ္ဍတစ်ခုဖြစ်ပါသည်။ ခရစ်ယာန်ဘောင်မှအများစုကပင် ဘုရားသခင်၏နာမတော်မြတ်ကိုဂုဏ်တင်ရန် မည်သည့်အရာကိုမျှမပြုလုပ်ကြချေ။ လူအများသည် မရှင်းပြနိုင်သော သုံးပါးတစ်ဆူအယူဝါဒတွင် ယေဟောဝါကို အခြားလက္ခဏာနှစ်ခုနှင့် ရောထွေးလိုက်ကြသည်။ ထို့ပြင် လူအများသည် ဆာလံ ၁၄:၁ နှင့် ၅၃:၁ တွင်ဖော်ပြထားသော ဤလူတန်းစားတွင် ပါဝင်နေကြသည်– “ဘုရားသခင်မရှိဟု မိုက်သောသူသည်ထင်တတ်၏။” ယေဟောဝါသည် အသက်ရှင်တော်မူသောဘုရားသခင်ဖြစ်ကြောင်းကို သူတို့သိရှိရန်လိုသည့်အပြင် လာမည့်ကြီးစွာသောဆင်းရဲခြင်းတွင် မပျက်စီးဘဲ ကယ်တင်ခံရရန် ကိုယ်တော်၏နာမတော် ကိုယ်စားပြုသည့်အရာအားလုံးကို သူတို့သဘောပေါက်နားလည်ကြရမည်ဖြစ်သည်။

ဟောပြောသူများ၏ ‘တင့်တယ်သောခြေ’

၁၇။ (က) ပြန်လည်ထူထောင်ခြင်း ပရောဖက်ပြုချက်ကို ပေါလုကိုးကားခြင်းသည် အဘယ်ကြောင့် သင့်တော်သနည်း။ (ခ) ‘တင့်တယ်သောခြေ’ ရှိခြင်းတွင် အဘယ်အရာပါဝင်သနည်း။

^၁၇ တမန်တော်ပေါလုတွင် ပို၍အရေးကြီးသည့် မေးခွန်းတစ်ခုရှိသေးသည်– “လူကိုမစေလွှတ်လျှင် အဘယ်သို့ဟောပြောနိုင်မည်နည်း။ ထိုသို့နှင့်အညီ ကျမ်းစာလာသည်ကား၊ ‘ငြိမ်သက်ခြင်း၏ဝမ်းမြောက်စရာသတင်း၊ ကောင်းကျိုးချမ်းသာ၏ဝမ်းမြောက်စရာသတင်းကို ကြားပြောသောသူ၏ခြေတို့သည် အလွန်တင့်တယ်စွတကား’ ဟုလာသတည်း။” (ရောမ ၁၀:၁၅) ဤတွင် ပေါလုသည် ဟေရှာယ ၅၂:၇ ကိုကိုးကားထားသည်၊ ယင်းသည် ၁၉၁၉ ခုနှစ်မှစ၍ သက်ဆိုင်သော ပြန်လည်ထူထောင်ခြင်းပရောဖက်ပြုချက်အဝင်ဖြစ်သည်။ ယနေ့ “ငြိမ်သက်ခြင်း၏ဝမ်းမြောက်စရာသတင်းကိုကြားပြောသောသူ၊ ကယ်တင်ခြင်းကောင်းကျိုးချမ်းသာ၏ ဝမ်းမြောက်စရာသတင်းကိုကြားပြောသောသူ” တို့ကို နောက်တစ်ဖန် ယေဟောဝါစေလွှတ်တော်မူ၏။ နာခံမှုရှိစွာဖြင့် ဘုရားသခင်၏ဘိသိက်ခံ “ကင်းစောင့်” နှင့် သူတို့၏အပေါင်းပါများသည် ရွှင်လန်းသောအသံနှင့်ကြွေးကြော်ကြ၏။ (ဟေရှာယ ၅၂:၇၊ ၈) ယနေ့ တစ်အိမ်မှတစ်အိမ်သွား၍ ကယ်တင်ခြင်းသတင်းကြွေးကြော်သူတို့၏ခြေသည် မောပန်းလာနိုင်ပြီး ဖုန်များပေကျံနေမည်ဖြစ်သော်လည်း သူတို့၏မျက်နှာထားများသည် ရွှင်လန်းနေပါသည်တကား! ငြိမ်သက်ခြင်းသတင်းကောင်းကို ကြွေးကြော်ရန်နှင့် စိတ်မသာညည်းတွားသောသူတို့အား နှစ်သိမ့်စေခြင်းငှာ သူတို့ကို ယေဟောဝါတာဝန်ပေးအပ်ထားကြောင်း သူတို့သိရှိကြပြီး ဤသူတို့သည် ကယ်တင်ခြင်းရနိုင်ရန် ယေဟောဝါ၏နာမကိုဆုတောင်းကြဖို့ ကူညီပေးနေကြပါသည်။

၁၈။ သတင်းကောင်းကြေညာခြင်း၏ နောက်ဆုံးရလဒ်နှင့်စပ်လျဉ်း၍ ရောမ ၁၀:၁၆-၁၈ ကအဘယ်အရာကိုပြောသနည်း။

^၁၈ လူတို့သည် “အကျွန်ုပ်တို့ဟောပြောသောသတင်းတရားကို . . . ယုံ” သည်ဖြစ်စေ၊ မနာခံရန်ရွေးချယ်သည်ဖြစ်စေ ပေါလု၏စကားသည် မှန်ကန်ပါသည်– “လူအပေါင်းတို့သည်မကြားရကြပြီလော။ အမှန်ကြားရကြပြီ။ ‘သူတို့၏အသံသည် မြေတစ်ပြင်လုံး၌နှံ့ပြား၍၊ သူတို့၏စကားသည် မြေကြီးစွန်းတိုင်အောင်ရောက်လေပြီ’ ဟုငါဆို၏။” (ရောမ ၁၀:၁၆-၁၈) ကိုယ်တော်၏ဖန်ဆင်းခြင်းလက်ရာတော်များတွင် ထင်ရှားသည့် ‘ဘုရားသခင်၏ဘုန်းအသရေတော်ကို မိုးကောင်းကင်သည် ကြားပြော’ သကဲ့သို့ ကမ္ဘာပေါ်ရှိ ကိုယ်တော့်သက်သေများသည် “ထာဝရဘုရား၏မင်္ဂလာနှစ်နှင့်၊ ငါတို့ဘုရားသခင်အပြစ်ပေးတော်မူရာနေ့ရက်ကာလကို ကြားပြောစေခြင်းငှာလည်းကောင်း၊ စိတ်မသာညည်းတွားသောသူတို့အား နှစ်သိမ့်စေခြင်းငှာလည်းကောင်း” ကြွေးကြော်ကြရမည်ဖြစ်သည်။—ဆာလံ ၁၉:၁-၄; ဟေရှာယ ၆၁:၂။

၁၉။ ယနေ့ ‘ယေဟောဝါ၏နာမတော်ကိုဆုတောင်း’ သောသူများသည် အဘယ်အကျိုးရရှိကြလိမ့်မည်နည်း။

^၁၉ ကြီးမြတ်၍ ကြောက်မက်ဖွယ်ကောင်းသော ယေဟောဝါ၏နေ့ရက်သည် အနီးကပ်ဆုံးသို့ချဉ်းကပ်နေပေပြီ။ “ထိုနေ့ရက်ကြောင့် အမင်္ဂလာရှိ၏။ ထာဝရဘုရား၏နေ့ရက်နီးပြီ။ အနန္တတန်ခိုးရှင်ဖျက်ဆီးခြင်းဘေးကဲ့သို့ရောက်လာလိမ့်မည်။” (ယောလ ၁:၁၅; ၂:၃၁) ကျွန်ုပ်တို့၏ဆုတောင်းချက်မှာ သာ၍များပြားသောသူတို့သည် သတင်းကောင်း၏အရေးတကြီးဖြစ်မှုကို တုံ့ပြန်ကြကာ ယေဟောဝါ၏အဖွဲ့အစည်းထဲသို့ စုပြုံလာကြဖို့ဖြစ်သည်။ (ဟေရှာယ ၆၀:၈; ဟဗက္ကုတ် ၂:၃) နောဧခေတ်၊ လောတခေတ်နှင့် အယူဖောက်ပြန်သော ဣသရေလနှင့်ယုဒနိုင်ငံတို့၏ခေတ်ကာလများတွင် ဆိုးယုတ်သူတို့အပေါ် ဖျက်ဆီးခြင်းသက်ရောက်ခဲ့သည့် ယေဟောဝါ၏အခြားနေ့ရက်များကို ပြန်ပြောင်းသတိရပါ။ ကျွန်ုပ်တို့သည် ဆင်းရဲခြင်းတကာတို့တွင် အကြီးဆုံးသောဆင်းရဲခြင်း၏နှုတ်ခမ်းဝတွင် ယခုရပ်နေကြပြီး ဤကမ္ဘာမြေပြင်ပေါ်မှ ဆိုးသွမ်းမှုများကို ရှင်းလင်းဖယ်ရှားကာ ထာဝရငြိမ်သက်ခြင်းပရဒိသုအတွက် လမ်းရှင်းပေးမည့် ယေဟောဝါ၏မုန်တိုင်းကျရောက်ချိန်ဖြစ်သည်။ သင်သည် သစ္စာရှိစွာဖြင့် “ယေဟောဝါ၏နာမတော်ကို ဆုတောင်းသော” သူတစ်ဦးဖြစ်ပါမည်လော။ သို့ဖြစ်လျှင် ဝမ်းမြောက်ပါလေ! သင်ကယ်တင်ခံရမည်ဖြစ်ကြောင်း ဘုရားသခင်ကိုယ်တော်တိုင်၏ကတိတော်ကို သင်ရရှိထားသည်။—ရောမ ၁၀:၁၃။

သင်မည်သို့ဖြေဆိုမည်နည်း

◻ စီ.အီး. ၃၃ ပင်တေကုတ္တေနောက်ပိုင်းတွင် အဘယ်အသစ်သောအရာများကို ကြွေးကြော်ခဲ့ကြသနည်း။

◻ ခရစ်ယာန်များသည် “ယုံကြည်ခြင်း ‘တရား’” ကိုမည်သို့အာရုံစိုက်သင့်သနည်း။

◻ ‘ယေဟောဝါ၏နာမတော်ကိုဆုတောင်းခြင်း’ သည် အဘယ်အရာကိုဆိုလိုသနည်း။

◻ အဘယ်သဘောမျိုးဖြင့် ဘုရားသခင့်နိုင်ငံတော်တမန်များသည် ‘တင့်တယ်သောခြေ’ ရှိကြသနည်း။

[စာမျက်နှာ ၁၈ ပါ ရုပ်ပုံ]

ဘုရားသခင့်လူမျိုးတော်သည် ပွာတီရီကို၊ စီနီဂဲလ်၊ ပီရူး၊ ပါပူဝါနယူးဂီနီ—မှန်ပါသည်၊ ကမ္ဘာတစ်လွှားတွင် ကိုယ်တော်၏ဂုဏ်တော်များကို ကြေညာနေကြသည်