အကြမ်းဖက်မှုကို—သူတို့အသုံးချရခြင်း အကြောင်း

ယူ.အက်စ်.အေ၊ ကိုလာရာဒိုပြည်နယ်၊ ဒဲန်ဗာမြို့တွင် ၂၇ ပတ်သားအရွယ် ကလေးငယ်တစ်ဦး လမစေ့ဘဲမွေးဖွားလာခဲ့သည်။ ဆေးရုံတွင်သုံးလမျှကြာပြီးနောက် သူ့မိဘများရှိရာအိမ်သို့ပြန်နိုင်ခဲ့သည်။ သုံးပတ်အကြာတွင် ထိုကလေးသည် ဆေးရုံသို့ပြန်ရောက်လာသည်။ အဘယ်ကြောင့်နည်း။ သူ့ဖခင်ကတအားဆွဲခါလိုက်သောကြောင့် အကြီးအကျယ်ဦးနှောက်ဒဏ်ရာရခဲ့သည်။ ဖခင်ဖြစ်သူက ကလေးငိုသံကိုသည်းမခံနိုင်ခဲ့ချေ။ ထိုယောက်ျားလေးမှာ မျက်စိကွယ်ပြီး မသန်မစွမ်းဖြစ်ခဲ့ရသည်။ မျက်မှောက်ခေတ်ဆေးပညာက စိုးရိမ်ဖွယ် သူ၏မွေးဖွားပုံမှ သူ့ကိုကယ်တင်နိုင်ခဲ့သော်လည်း သူ့ဖခင်၏အကြမ်းဖက်မှုမှ မကာကွယ်ပေးနိုင်ခဲ့ချေ။

မရေမတွက်နိုင်သောကလေးငယ်များသည် ကမ္ဘာပေါ်တွင် အကြမ်းဖက်မှုအများဆုံးဖြစ်သည့် နေရာတစ်ခု—အိမ်—တွင် မတော်မတရားပြုခံရ၊ ရိုက်ပုတ်ခံရ သို့မဟုတ် အသတ်ခံနေကြရသည်! အမေရိကန်ပြည်ထောင်စုတစ်ခုတည်းတွင် တစ်နှစ်လျှင် ကလေးငယ် ၅,၀၀၀ ခန့်သည် သူတို့မိဘများ၏လက်ချက်ဖြင့် သေဆုံးနေကြရကြောင်း အချို့ခန့်မှန်းကြသည်! ကလေးငယ်များသာ ခံနေရသည်မဟုတ်။ ကမ္ဘာ့ကျန်းမာရေးမဂ္ဂဇင်းအရ အမေရိကန်ပြည်ထောင်စုတွင် “သားဖွားနိုင်သည့်အရွယ်ရှိ အမျိုးသမီးများ ထိခိုက်ဒဏ်ရာရခြင်း၏ အဓိကအကြောင်းရင်းသည် ဇနီးကိုမတော်မတရားပြုမူခြင်းဖြစ်သည်။” အခြားနိုင်ငံများတွင်ကော။ “[ဖွံ့ဖြိုးဆဲနိုင်ငံများတွင်] အမျိုးသမီးသုံးပုံတစ်ပုံ သို့မဟုတ် တစ်ဝက်ကျော်ကျော်တို့မှာ သူတို့ကြင်ဖော်၏ ရိုက်နှက်ခြင်းကိုခံနေရကြောင်း သုံးသပ်ချက်ကဆိုသည်။” မှန်ပါသည်၊ အကြမ်းဖက်မှုသည် အထူးသဖြင့်အိမ်တွင် အလွန်အန္တရာယ်ပြုလျက်ရှိသည်။

လင်ယောက်ျားနှင့် ဇနီးသည်များစွာတို့သည် မိမိတို့၏သဘောထားကွဲလွဲမှုများကို အကြမ်းဖက်မှုဖြင့်ကြိုးစားဖြေရှင်းကြ၏။ အချို့နိုင်ငံများတွင် ဆရာမိဘများသည် မိမိတို့၏အမျက်ကို ကလေးများအပေါ်သွန်းလောင်းကြသည်။ အနိုင်ကျင့်သူတို့သည် အပျော်သက်သက် အားနည်းသူများကိုအနိုင်ယူကာ အကြမ်းဖက်ကြသည်။ လူတို့သည် အဘယ်ကြောင့် ဤမျှအကြမ်းဖက်လာကြရသနည်း။

လူတို့အကြမ်းဖက်လာရခြင်းအကြောင်း

လူသားတို့သည် ပင်ကိုသဘာဝအရ အကြမ်းဖက်တတ်သည်ဟု အချို့ကဆိုသည်။ အမေရိကန်ပြည်ထောင်စုတွင် ယေဘုယျအားဖြင့် အကြမ်းဖက်ရာဇဝတ်မှု လျော့နည်းလာသော်လည်း လူငယ်များကြားတွင် တိုးများနေသည်။ အကြမ်းဖက်မှုကိုစိတ်ဝင်စားခြင်းသည်လည်း တိုးများလာနေပါသည်။ အဓိကရုပ်မြင်သံကြားကွန်ရက်သုံးခုက ရာဇဝတ်မှုဇာတ်လမ်းများကို နှစ်ဆတိုးပြပြီး လူသတ်မှုများကိုမူ သုံးဆတိုးပြနေပါသည်။ မှန်သည်၊ ရာဇဝတ်မှုသည် စီးပွားဖြစ်နေသည်! စိတ်ရောဂါကုဆရာဝန် ကားလ်မယ်နယ်က ဤသို့ဆိုသည်– “ကျွန်ုပ်တို့သည် အကြမ်းဖက်မှုကို သည်းခံရုံမျှမက သတင်းစာနဖူးစည်း၌ပင် ဖော်ပြကြသည်။ ယင်းကို ရုပ်မြင်သံကြားအစီအစဉ်များ၏ သုံးပုံတစ်ပုံ သို့မဟုတ် လေးပုံတစ်ပုံက ကလေးများကိုဖျော်ဖြေစရာအဖြစ် အသုံးပြုကြသည်။ ခွင့်ပြုလိုက်လေခြင်း! ချစ်စွာသောမိတ်ဆွေတို့၊ ယင်းကိုကျွန်ုပ်တို့နှစ်သက်ကြသည်။”

မကြာသေးမီကပြုလုပ်ခဲ့သော သိပ္ပံလေ့လာမှုများအရ ဦးနှောက်၏ဇီဝဖြစ်စဉ်နှင့် ပတ်ဝန်းကျင်တို့သည် အဓမ္မပြုလိုစိတ်နှင့် များစွာဆက်စပ်နေသည်ဟူ၍ဖြစ်သည်။ အယ်လီနွိုက်တက္ကသိုလ် သက်ငယ်သုတေသနဌာနမှ ဒေါက်တာမားကက်စ်ခရူစီက “ကလေးများရင်ဆိုင်နေရသော ဆိုးသွမ်းသည့်ပတ်ဝန်းကျင်သည် အကြမ်းဖက်မှုကူးစက်ပျံ့နှံ့ခြင်းကို ဖန်တီးနေသည်ဟု ကျွန်ုပ်တို့အားလုံးကောက်ချက်ချစရာဖြစ်နေပြီ။ ပတ်ဝန်းကျင်မှဖြစ်ရပ်များက လူတို့ကိုပို၍စိတ်လိုက်မာန်ပါပြုစေသည့် ဦးနှောက်တွင်းဒြပ်စင်ပြောင်းလဲမှုများကို အမှန်ပင်ဖြစ်ပေါ်နေစေသည်” ဟုဆိုသည်။ ဦးနှောက်အတွင်းဟူသောစာအုပ်က “မိသားစုအဆောက်အအုံပြိုကွဲခြင်း၊ ကြင်ဖော်မဲ့မိဘများ တိုးများလာခြင်း၊ ပစ္စည်းဥစ္စာချို့ငဲ့မြဲချို့ငဲ့နေခြင်းနှင့် မူးယစ်ဆေးဝါးအလွန်အကျွံစွဲခြင်းတို့သည် အမှန်အားဖြင့် ဦးနှောက်၏ဓာတုဖြစ်စဉ်ကို အဓမ္မပြုလိုသည့်အမူအကျင့်သို့ရောက်စေသည်၊ ယင်းသည် တစ်ချိန်ကမဖြစ်နိုင်ဟုယူဆခဲ့သည့်အရာဖြစ်သည်” ဟုဆိုသည်။

ဦးနှောက်အတွင်းပြောင်းလဲမှုများသည် အဓမ္မပြုလိုစိတ်ကိုဟန့်တားသည့် ဆီရိုတိုနင်ဟုခေါ်သော ဓာတုပစ္စည်း၏ အတိုင်းအတာလျော့ကျမှု ပါဝင်သည်ဟုဆိုကြသည်။ အရက်သေစာသည် ဦးနှောက်ရှိဆီရိုတိုနင်အတိုင်းအတာကို လျော့ကျစေနိုင်ကြောင်း လေ့လာမှုများကဖော်ပြ၏။ သို့ဖြင့် ကြာမြင့်စွာကပင်သိရှိထားသည့် အကြမ်းဖက်မှုနှင့် သောက်ကြူးခြင်းကွင်းဆက်နေခြင်းအတွက် သိပ္ပံနည်းကျအခြေခံရှိစေသည်။

ယနေ့ အကြမ်းဖက်မှုတိုးများလာခြင်းတွင် အခြားအကြောင်းရင်းတစ်ခုရှိသေးသည်။ ယုံကြည်စိတ်ချရသော ပရောဖက်ပြုချက်ဆိုင်ရာစာအုပ်တစ်အုပ်ဖြစ်သည့် သမ္မာကျမ်းစာက “အဆုံးစွန်သောနေ့ရက်တို့သည် ကျပ်တည်းခဲယဉ်းသော ကာလဖြစ်မည်ကို သိမှတ်ကြလော့။ လူတို့သည်တစ်ကိုယ်ကောင်းစိတ်ရှိ၍ ငွေကိုသာလျှင် တပ်မက်ကြလိမ့်မည်။ သူတို့သည် ကြွားဝါ၍ မိမိတို့ကိုယ်ကိုအထင်ကြီးလျက် . . . အကြင်နာကင်းမဲ့သူ၊ ရက်စက်ကြမ်းကြုတ်သူ၊ သူတစ်ပါးအသရေကိုဖျက်သူ၊ အကြမ်းဖက်သူ၊ ရိုင်းစိုင်းသူများဖြစ်ကြလိမ့်မည်။ ကောင်းမြတ်သည့်အရာဟူသမျှကို မုန်းကြလိမ့်မည်။ သူတို့သည် သစ္စာဖောက်၍ အရမ်းမဲ့ပြုမူလျက် မာန်မာနကြီးကြလိမ့်မည်။ . . . ထိုသူတို့ကိုရှောင်ရှားလော့။” (၂ တိမောသေ ၃:၁-၅၊ သတင်းကောင်း) မှန်ပါသည်၊ ယနေ့ကျွန်ုပ်တို့တွေ့မြင်နေရသော အကြမ်းဖက်မှုသည် “နောက်ဆုံးကာလ” နှင့်ပတ်သက်သည့် သမ္မာကျမ်းစာပရောဖက်ပြုချက်၏ ပြည့်စုံမှုတစ်ခုဖြစ်သည်။

ဤအချိန်ကို အထူးအကြမ်းဖက်သောအချိန်ဖြစ်စေသည့် နောက်အရာတစ်ခုရှိသေးသည်။ သမ္မာကျမ်းစာက “မြေကြီးနှင့်ပင်လယ်သည် အမင်္ဂလာရှိ၏။ အကြောင်းမူကား၊ [စာတန်] သည် မိမိကာလတစ်ခဏသာရှိသည်ကိုသိ၍၊ ပြင်းစွာသောအမျက်ဒေါသနှင့်တကွ သင်တို့ရှိရာသို့ဆင်းလေပြီ” ဟုဆိုသည်။ (ဗျာဒိတ် ၁၂:၁၂) စာတန်နှင့်သူ၏နတ်ဆိုးတို့သည် ကောင်းကင်မှနှင်ချခံခဲ့ရပြီး ယခုသူတို့သည် လူသားတို့အပေါ်အမင်္ဂလာရောက်ဖို့ အာရုံစိုက်ရန်မူနေကြသည်။ စာတန်သည် “အာကာသကောင်းကင်၏တန်ခိုးကို အစိုးရသောမင်း” အဖြစ် “ငြင်းဆန်သောသူတို့၌ပြုပြင်သောဝိညာဉ်တော်” ကိုအသုံးပြုကာ မြေကြီးကို အကြမ်းဖက်မှုတိုးများလာသောနေရာဖြစ်စေခဲ့ပြီ။—ဧဖက် ၂:၂။

သို့ဖြစ်လျှင် မျက်မှောက်ခေတ်လောက၏ အကြမ်းဖက်သည့် “လေ” ကို ကျွန်ုပ်တို့မည်သို့ရင်ဆိုင်နိုင်မည်နည်း။ ထို့ပြင် ခြားနားမှုများကို အကြမ်းမဖက်ဘဲ မည်သို့ဖြေရှင်းနိုင်မည်နည်း။

[စာမျက်နှာ ၃ ပါ အကျဉ်းဖော်ပြချက်]

မရေမတွက်နိုင်သောကလေးငယ်များသည် ကမ္ဘာပေါ်တွင် အကြမ်းဖက်မှုအများဆုံးဖြစ်သည့်နေရာတစ်ခု—အိမ်—တွင် မတော်မတရားပြုခံရ၊ ရိုက်ပုတ်ခံရ သို့မဟုတ် အသတ်ခံနေကြရသည်!