“ယေဟောဝါလော” “ယာဝေးလော”

“မျိုးမစစ်သော၊” “မျိုးစပ်ထားသော၊” “ပါစင်အောင်လွဲသော”။ ဤမျှတိကျပြတ်သားသောဝေါဟာရများကို ဟေဗြဲကျမ်းပညာရှင်များအသုံးပြုရန် ဘာကဖြစ်စေခဲ့သနည်း။ အငြင်းပွားမှုမှာ “ယေဟောဝါ” သည်ဘုရားသခင့်နာမတော်၏ ဆီလျော်သောအင်္ဂလိပ်အသံထွက်ဟုတ်မဟုတ်ဖြစ်သည်။ ဤအငြင်းပွားမှုသည် အနှစ်တစ်ရာကျော်တိုင် ဖြစ်ပွားခဲ့၏။ ယနေ့ ကျမ်းပညာရှင်အများစုသည် နှစ်သံပါသည့် “ယာဝေး” ကိုကြိုက်နှစ်သက်ပုံပေါက်သည်။ သို့ရာတွင် “ယေဟောဝါ” ဟူသောအသံထွက်သည် အမှန်ပင် “ပါစင်အောင်လွဲသော” အသုံးအနှုန်းလော။

အငြင်းပွားမှု၏ဇာစ်မြစ်၌

သမ္မာကျမ်းစာအရ ဘုရားသခင်ကိုယ်တော်တိုင် လူသားများအား မိမိ၏နာမတော်ကို ဖော်ပြခဲ့သည်။ (ထွက်မြောက်ရာ ၃:၁၅) ဘုရားသခင်၏ရှေးကျေးကျွန်များသည် ထိုနာမကို လွတ်လွတ်လပ်လပ် အသုံးပြုခဲ့ကြကြောင်း ကျမ်းစာအထောက်အထားရှိသည်။ (ကမ္ဘာဦး ၁၂:၈; ရုသ ၂:၄) ဘုရားသခင့်နာမတော်ကို အခြားလူမျိုးများလည်း သိခဲ့ကြသည်။ (ယောရှု ၂:၉) ဗာဗုလုန်တွင် ပြည်နှင်ဒဏ်ခံရပြီးပြန်လာသော ဂျူးများသည် လူမျိုးအသီးသီးတို့နှင့် ထိတွေ့ခဲ့ပြီးနောက် အထူးသဖြင့်မှန်ကန်ခဲ့သည်။ (ဆာလံ ၉၆:၂-၁၀; ဟေရှာယ ၁၂:၄; မာလခိ ၁:၁၁) သမ္မာကျမ်းစာ၏စကားပြန်အဘိဓာန်က ဤသို့ဆိုသည်– “ပြည်နှင်ခံရချိန်လွန်ပြီးနောက်တွင် တိုင်းတစ်ပါးသားများစွာတို့သည် ဂျူးဘာသာတရားကို ကြိုက်နှစ်သက်ခဲ့ကြကြောင်း အထောက်အထားမြောက်မြားစွာရှိပါသည်။” သို့ရာတွင် စီ.အီး. ပထမရာစုတိုင်လေသော် ဘုရားသခင့်နာမတော်နှင့်ပတ်သက်၍ အယူသီးခြင်းတစ်ခု ပေါ်ပေါက်ခဲ့သည်။ တဖြည်းဖြည်းနှင့် ဂျူးလူမျိုးသည် ဘုရားသခင့်နာမတော်ကို ပွင့်ပွင့်လင်းလင်းအသုံးမပြုရုံမက အချို့က ယင်းကို လုံးဝအသံမထွက်ရန်တားမြစ်ခဲ့၏။ သို့ဖြင့် ၎င်း၏အသံထွက်အမှန်သည် ပျောက်ဆုံးခဲ့သည်— သို့မဟုတ် အမှန်ပင်ပျောက်ဆုံးခဲ့သလော။

အမည်နာမတစ်ခု၌အဘယ်အရာပါဝင်သနည်း

ဟေဗြဲဘာသာစကားတွင် ဘုရားသခင်၏နာမတော်ကို יהוה ဟုရေးသည်။ လက်ယာမှလက်ဝဲဘက်သို့ ဖတ်ရလေ့ရှိသည့် အဆိုပါအက္ခရာလေးလုံးကို အများအားဖြင့် တက်တြာဂရမ်မီတန်ဟု ခေါ်ကြသည်။ သမ္မာကျမ်းစာ၌ ဖော်ပြထားသည့် လူများနှင့်နေရာများ၏အမည်တို့တွင် မြင့်မြတ်သောနာမ၏ အတိုကောက်ပုံစံပါရှိသည်။ အဆိုပါကိုယ်ပိုင်အမည်များမှ ဘုရားသခင့်အမည်နာမကို မည်သို့အသံထွက်ပုံနှင့်ပတ်သက်၍ သဲလွန်စအချို့ပေးနိုင်မည်လော။

ယူ.အက်စ်.အေ. ဝါရှင်တန် ဒီ.စီ.၊ ဝက်စလေဘာသာရေးကျောင်းမှ ဂုဏ်ထူးဆောင်ပါမောက္ခ ဂျော့ချ် ဗျူခနန်အရ အဖြေမှာ သဲလွန်စပေးနိုင်ပါသည်။ ပါမောက္ခဗျူခနန်က ဤသို့ရှင်းပြသည်– “ရှေးခေတ်ကာလများက မိဘများသည် မိမိတို့သားသမီးများကို နတ်ဘုရားတို့၏အမည်များဖြင့် မှည့်လေ့ရှိခဲ့ကြသည်။ ဆိုလိုသည်မှာ နတ်ဘုရား၏အမည်ကို အသံထွက်သည့်အတိုင်း သူတို့သားသမီးမျာ၏အမည်များကို အသံထွက်ပေလိမ့်မည်ဖြစ်သည်။ လူတို့၏အမည်များတွင် တက်တြာဂရမ်မီတန်ကို အသုံးပြုလေ့ရှိသည့်အပြင် အလယ်သရသံကို အမြဲထည့်သုံးလေ့ရှိခဲ့ကြသည်။”

သမ္မာကျမ်းစာတွင်တွေ့ရှိရသော ဘုရားသခင့်နာမအတိုကောက်ပါရှိသည့် ကိုယ်ပိုင်အမည်အချို့ကို သုံးသပ်ကြည့်ပါ။ ဟေဗြဲကျမ်းစာတွင် ယောနသန် သို့မဟုတ် ယေဟောနသန် ဟုဖော်ပြထားသော အင်္ဂလိပ်စကားဖြင့် ဂျိုနသန်၏အဓိပ္ပာယ်မှာ “ယာဟို သို့မဟုတ် ယာဟိုဝါ ပေးသနားတော်မူ၏” ဟုအဓိပ္ပာယ်ရှိကြောင်း ပါမောက္ခဗျူခနန်ကဆိုသည်။ ဟေဗြဲဘာသာစကားတွင် ပရောဖက်ဧလိယ၏အမည်သည် ဧလိယာ သို့မဟုတ် ဧလိယာဟု ဖြစ်သည်။ ပါမောက္ခဗျူခနန်အရ ထိုအမည်၏အဓိပ္ပာယ်မှာ “ကျွန်ုပ်၏ဘုရားသခင်သည် ယာဟူ သို့မဟုတ် ယာဟူဝါ” ဖြစ်၏။ အလားတူ ယောရှဖတ်၏ဟေဗြဲအမည်သည် “ယာဟို သည်တရားစီရင်ပြီ” ဟူ၍အဓိပ္ပာယ်ရသည့် ယေဟောရှဖတ် ဖြစ်သည်။

တက်တြာဂရမ်မီတန်ကို “ယာဝေး” ဟုအသံနှစ်သံဖြင့်သာ အသံထွက်ခြင်းသည် ဘုရားသခင့်နာမတော်တွင် အိုသရသံပါစေမည်မဟုတ်ပါ။ သို့ရာတွင် နာမတော်မြတ်ပါဝင်သော ကျမ်းစာအမည်များစွာတွင် အဆိုပါအလယ်သရသံသည် ဂျေဟိုနသန်နှင့် ဂျိုနသန်အမည်များ၌ကဲ့သို့ မူရင်းနှင့်အတိုပုံစံနှစ်ခုစလုံးတို့တွင် ပါရှိသည်။ ထိုသို့ဖြင့် ပါမောက္ခဗျူခနန်က နာမတော်မြတ်နှင့်ပတ်သက်၍ ဤသို့ဆိုသည်– “ဦ သို့မဟုတ် အိုသရကို ချန်ထားခြင်းမရှိချေ။ တစ်ခါတစ်ရံ ထိုစကားလုံးကို ‘ယာ’ အဖြစ်အတိုချုပ်ဆိုခဲ့ကြသော်လည်း မည်သည့်အခါမျှ ‘ယာဝေး’ ဟုမဆိုကြချေ။ . . . တက်တြာဂရမ်မီတန်ကို အသံတစ်သံတည်းဖြင့်အသံထွက်သောအခါ ယင်းကို ‘ယာ’ သို့မဟုတ် ‘ယို’ ဟုအသံပြုကြသည်။ အသံသုံးသံဖြင့် အသံထွက်သောအခါ ‘ယာဟိုဝါ’ သို့မဟုတ် ‘ယာဟူဝါ’ ဟူ၍အသံပြုခဲ့ကြပေမည်။ အသံနှစ်သံဖြင့် အတိုချုပ်ခေါ်ဆိုခဲ့မည်ဆိုလျှင် ‘ယာဟို’ ဖြစ်ပေလိမ့်မည်။”—ကျမ်းဆိုင်ရာရှေးဟောင်းသုတေသနသုံးသပ်ချက်။

အဆိုပါရှင်းလင်းချက်များသည် ၁၉ ရာစုက ဟေဗြဲပညာရှင်ဂေဇေးနီးယပ်စ်၏ ဓမ္မဟောင်းကျမ်းနှင့်ပတ်သက်သည့် ဟေဗြဲနှင့်ခါလဒဲအဘိဓာန်မှ ဤဖော်ပြချက်ကို နားလည်သဘောပေါက်ရန် ထောက်ကူပေးသည်– “[ဘုရားသခင့်နာမ၏] အသံထွက်အစစ်အမှန်သည် יְהוָֹה [ယေ-ဟော-ဝါ] ဖြစ်သည်ဟု ထင်မြင်ယူဆသူများသည် သူတို့၏ယူဆချက်ကို ခုခံကာကွယ်ရန် ခိုင်လုံသောအကြောင်းပြချက်မရှိဘဲမနေပါ။ ဤသို့ဖြင့် နာမည်များစွာစတင်သည့် အတိုကောက်အသံ יְהוֹ [ယေ-ဟို] နှင့် יוֹ [ယို] တို့ကို ပိုပြီးလက်ခံနိုင်လောက်စွာ ရှင်းပြနိုင်သည်။”

သို့ပင်ငြားလည်း အဲဗ်ရက်တ်ဖော့စ်သည် သူ၏မကြာသေးမီက ဘာသာပြန်ခဲ့သော မောရှေ၏စာအုပ်ငါးအုပ်၏နိဒါန်းတွင် ဤသို့ထောက်ပြသည်– “[ဘုရားသခင်၏] ဟေဗြဲအမည်၏ အသံထွက် ‘အမှန်’ ကို ပြန်ဖော်ပြရန် နည်းဟောင်းနည်းသစ်တို့ဖြင့်ကြိုးစားခဲ့ခြင်းသည် မအောင်မြင်ခဲ့ချေ; ရံဖန်ရံခါမှကြားရသော ‘ယေဟောဝါ’ ကိုသော်လည်းကောင်း၊ ပညာရှင်များစံထားသော ‘ယာဝေး’ ကိုသော်လည်းကောင်း တိကျထင်ရှားစွာ သက်သေမပြနိုင်ကြချေ။”

ပညာရှင်ဆန်ဆန်အချေအတင် ဆက်၍ဆွေးနွေးကြဦးမည်မှာ သေချာပါသည်။ သရအမှတ်အသားနည်းစနစ်ကို မက်စရိများမတီထွင်မီက စစ်မှန်သောဘုရားသခင့်နာမတော်ကို အသံထွက်ဆိုခြင်းအား ဂျူးတို့ရပ်တန့်ခဲ့ကြသည်။ ထိုသို့ဖြင့် ယဟဝဟ (יהוה) ဗျည်းများနှင့် အဘယ်သရများတွဲဖက်ထားကြောင်း သက်သေပြရန် တိကျသောနည်းမရှိပေ။ သို့ရာတွင် ကျမ်းစာမှ အထင်ကရပုဂ္ဂိုလ်များ၏အမည်များဖြစ်သည့် တစ်ကြိမ်တစ်ခါမျှမပျောက်ခဲ့သော ၎င်းတို့၏အသံထွက်အမှန်က ဘုရားသခင့်နာမတော်၏ ရှေးခေတ်က အသံထွက်ကို သိရှိရန် ခိုင်လုံသောသဲလွန်စတစ်ခုကို ရရှိစေသည်။ ယင်းကြောင့် “ယေဟောဝါ” ဟူသောအသံထွက်သည် “ပါစင်အောင်လွဲ” ခြင်းမဟုတ်ကြောင်းကို အနည်းဆုံးတော့ ပညာရှင်အချို့က သဘောတူကြပါသည်။

[စာမျက်နှာ ၃၁ ပါ ရုပ်ပုံ]

“ယေဟောဝါ” သည် လူကြိုက်အများဆုံးဖြစ်သောဘုရားသခင့်နာမတော်၏အသံထွက်ဖြစ်ခဲ့