ဘုရားသခင့်နိုင်ငံတော်ကြွေးကြော်သူများမှတ်တမ်း

ယေဟောဝါသည် မိမိလူမျိုးအတွက် ကွန်းခိုရာနေရာကို ပြင်ဆင်ပေး

တောင်ပေါ်လမ်းတွင် အရိပ်အာဝါသကောင်းသောကွန်းခိုရာနေရာသည် မြင်တွေ့လိုက်ရသည့် နွမ်းလျနေသူခရီးသွားတစ်ဦးအဖို့ အလိုလားအနှစ်သက်ဆုံးမြင်ကွင်းဖြစ်၏။ နီပေါလ်၌ ယင်းသို့ကွန်းခိုရာနေရာများကို ချောက်တရာဟုခေါ်သည်။ ချောက်တရာပီပီတစ်ခုသည် ထိုင်၍ အနားယူရန်အရိပ်ကောင်းသော အရွက်ဝေဝေဆာဆာရှိညောင်ပင်တစ်ပင်အနီးတွင် တည်ရှိမည်။ ချောက်တရာတစ်ခုတည်ခြင်းမှာ ကောင်းမှုပြုခြင်းတစ်ရပ်ဖြစ်ပြီး အလှူရှင်အများစုကို အမည်မဖော်ပြထားချေ။

နီပေါလ်မှတွေ့ ကြုံမှုများက ဤအစီအစဉ်စနစ်ရှိ နွမ်းလျသော “ခရီးသည်” များစွာအတွက် ယေဟောဝါဘုရားသခင်သည် ရွှင်လန်းမှုနှင့် ဝိညာဉ်ရေးရာလန်းဆန်းမှု၏ရင်းမြစ် မည်သို့ဖြစ်လာပုံကို ဖော်ပြပေးသည်။—ဆာလံ ၂၃:၂။

• လီလေကူမာရီသည် ခမ်းနားလှသည့် နှင်းလွှမ်းသောထိပ်ရှိဟိမဝန္တာတောင်တန်းများကို တွေ့ မြင်ရသော အလွန်လှပသည့် ပေါ့ကရာမြို့တွင်နေထိုင်၏။ သို့သော် မိသားစုအတွက် ငွေရေးကြေးရေးပူပန်မှုရှိရာ ရှေ့ရေးအတွက် မည်မည်ရရမျှော်လင့်ချက် မရှိဟုခံစားမိခဲ့သည်။ သူ့ထံသို့ ယေဟောဝါသက်သေတစ်ဦး လည်ပတ်လာရာ သမ္မာကျမ်းစာ၏တောက်ပသောမျှော်လင့်ချက်က သူ့အား လှုံ့ဆော်ပေးလိုက်ရာ ချက်ချင်းပင်အိမ်တွင်းကျမ်းစာသင်အံမှုကို တောင်းခံခဲ့သည်။

လီလေကူမာရီသည် ထိုသင်အံမှုကိုနှစ်သက်သော်လည်း မိသားစု၏အပြင်းအထန်ဆန့်ကျင်မှုကြောင့် ယင်းကို ဆက်ရန်မလွယ်ကူခဲ့ချေ။ သို့သော် သူအရှုံးမပေးခဲ့ပါ။ ခရစ်ယာန်စည်းဝေးများကို သူမှန်မှန်တက်ရောက်ခဲ့ပြီး ကြားသိရာများကိုလက်တွေ့ကျင့်သုံးခဲ့သည်၊ အထူးသဖြင့် ဇနီးသည်၏လက်အောက်ခံမှုကိစ္စရပ်တွင် ဖြစ်သည်။ ရလဒ်အနေဖြင့် သူ၏မိခင်နှင့် ခင်ပွန်းတို့က လီလေကူမာရီ၏ကျမ်းစာလေ့လာမှုသည် မိသားစုတစ်စုလုံးကို အကျိုးပြုနေကြောင်း နားလည်လာလေသည်။

ယခု သူ၏ခင်ပွန်းနှင့် ဆွေမျိုးအတော်များများသည် ဘုရားသခင်၏နှုတ်မြွက်စကားတော်ကို လေ့လာနေကြပြီ။ မကြာသေးမီက ပေါ့ကရာမြို့တွင်ကျင်းပသွားခဲ့သော စည်းဝေးကြီး၌ လီလေကူမာရီသည် အစီအစဉ်ကို မိမိ၏ဆွေမျိုးသားချင်း ၁၅ ဦးနှင့်အတူ တက်ရောက်ခဲ့၏။ သူကဤသို့ပြောပြသည်– “ကျွန်မရဲ့မိသားစုဟာ အခုဆိုရင် စစ်မှန်တဲ့ဝတ်ပြုရေးမှာ တစည်းတလုံးတည်းရှိနေကြတဲ့အပြင် ကျွန်မမှာလည်း စစ်မှန်တဲ့စိတ်ငြိမ်သက်မှုရထားလို့ ကျွန်မတို့ရဲ့အိမ်ဟာ ကွန်းခိုရာတစ်နေရာဖြစ်လာပါပြီ။”

• ဇာတ်နိမ့်ဇာတ်မြင့်ခွဲခြင်းမှာ နီပေါလ်တွင် တရားမဝင်သော်လည်း ယင်းသည် လူတို့၏ဘဝအသက်တာအပေါ် ပြင်းပြင်းထန်ထန်သြဇာလွှမ်းမိုးဆဲရှိ၏။ သို့ဖြင့် တန်းတူရည်တူဖြစ်မှုနှင့် မျက်နှာမလိုက်မှုတို့နှင့်ပတ်သက်၍ သမ္မာကျမ်းစာ၌ဖော်ပြထားရာကို လူများစွာက စိတ်ဝင်စားလာကြ၏။ “ဘုရားသခင်သည် လူမျက်နှာကိုမှတ်တော်မမူ” ကြောင်း သိလာရခြင်းက စူရာမာယာနှင့် သူ၏မိသားစုကို အကြီးအကျယ်ပြောင်းလဲစေခဲ့သည်။—တမန်တော် ၁၀:၃၄။

စူရာမာယာသည် ဇာတ်နိမ့်ဇာတ်မြင့်ခွဲခြားမှု၏မတရားမှုနှင့် နက်နက်ရှိုင်းရှိုင်းအမြစ်တွယ်နေသည့် မိရိုးဖလာထုံးတမ်းစဉ်လာများ၏ဝန်ထုပ်ကြောင့် စိတ်ညစ်ခဲ့သည်။ ဘာသာရေးကိုင်းရှိုင်းသောအမျိုးသမီးတစ်ဦးဖြစ်သော စူရာမာယာသည် အကူအညီအတွက် နတ်ဘုရားများထံ နှစ်ချီ၍တောင်းခံလာခဲ့၏။ သို့သော် သူ၏တောင်းခံချက်များမှာ အဖြေမရခဲ့ချေ။ တစ်နေ့၌ အော်ဟစ်အကူအညီတောင်းခံနေစဉ် သူ၏ခြောက်နှစ်အရွယ်မြေးဖြစ်သူ ဘာဘီတာက သူထံချဉ်းကပ်ပြီး ဤသို့မေးခဲ့သည်– “ဘာမှမလုပ်ပေးနိုင်တဲ့ . . . တွေရှေ့မှာ ဘာကြောင့် အော်ပြီးအကူအညီတောင်းနေရတာလဲ။”

ဤသို့မေးရခြင်းမှာ ဘာဘီတာ၏မိခင်သည် ယေဟောဝါသက်သေတစ်ဦးနှင့် သမ္မာကျမ်းစာကိုလေ့လာနေခြင်းကြောင့်ဖြစ်သည်။ ဘာဘီတာသည် မိမိ၏ဖွားအေဖြစ်သူကို ခရစ်ယာန်အစည်းအဝေးလိုက်ရန် စိတ်အားထက်သန်စွာ ဖိတ်ခေါ်ခဲ့၏။ စူရာမာယာက တက်ရောက်ကြည့်သောအခါ စိတ်စွန်းကွက်မှုလုံးဝမရှိဘဲ တစ်ဦးနှင့်တစ်ဦး သင့်သင့်မြတ်မြတ်ပေါင်းဖော်နေကြသော ဇာတ်နိမ့်မြင့်အမျိုးမျိုးရှိ လူများကိုတွေ့မြင်ရာ အံ့အားသင့်သွားသည်။ ချက်ချင်းပင် သူသည် အိမ်တွင်းကျမ်းစာသင်အံမှုတစ်ခုကို တောင်းခံခဲ့၏။ ဤရလဒ်အနေဖြင့် သူ့အိမ်နီးချင်းများ၏ ဝိုင်းကြဉ်ခြင်းကိုခံရသော်လည်း သူစိတ်မပျက်ခဲ့ချေ; ကန့်သတ်ချက်ရှိသော သူ၏ဖတ်ရှုရေးသားခြင်းစွမ်းရည်ကလည်း ဝိညာဉ်ရေးရာတိုးတက်မှုကို အဟန့်အတားမဖြစ်ခဲ့ချေ။

ရှစ်နှစ်တာကုန်လွန်ခဲ့ပြီ၊ သူ၏ခင်ပွန်းနှင့် သားသုံးယောက်အပါအဝင် သူ၏မိသားစုဝင်ခြောက်ဦးသည် ယေဟောဝါသက်သေများဖြစ်လာကြ၏။ ယခု စူရာမာယာသည် အချိန်ပြည့်အမှုတော်ဆောင်တစ်ဦး၊ မှန်မှန်ရှေ့ဆောင်တစ်ဦးဖြစ်ပြီး ယေဟောဝါတစ်ပါးတည်းသာပြင်ဆင်ပေးနိုင်သော စစ်မှန်သည့် ကွန်းခိုရာနေရာ၌ မိမိတို့၏လေးလံသောဝန်ထုပ်များကိုချထားရန် အခြားသူတို့ကို ရွှင်လန်းစွာကူညီပေးလျက်ရှိသည်။