ဘုရားသခင့်စကားတော်ကို ကျင့်သုံးသူများ ပျော်ရွှင်မှုတွေ့ရှိ

“ဒီစည်းဝေးကြီးဟာ ဘုရားသခင်နိုင်ငံတော်လုပ်ငန်း တိုးပြီးဆောင်ရွက်နိုင်ဖို့ ကျွန်တော်တို့ကိုပြင်ဆင်ပေးတဲ့ ယေဟောဝါရဲ့အစီအစဉ်တွေထဲက နောက်ထပ်တစ်ခုဖြစ်တယ်လို့ ကျွန်တော်တို့အသိအမှတ်ပြုကြပါတယ်” ဟူ၍ ယေဟောဝါသက်သေများ၏ “ဘုရားသခင့်စကားတော်ကိုကျင့်သုံးသူများ” ခရိုင်စည်းဝေးကြီးအစပိုင်းတွင် ဟောပြောသူတစ်ဦးကပြောခဲ့သည်။ “ပျော်ရွှင်တဲ့မိသားစုဘဝနဲ့ပတ်သက်ပြီး သွန်သင်မှုခံယူရဖို့၊ ယေဟောဝါအဖွဲ့အစည်းနဲ့ နီးနီးကပ်ကပ်နေရန် အားပေးခံရဖို့၊ နိုင်ငံတော်လုပ်ငန်းမှာ ကျွန်တော်တို့ရဲ့ဇွဲကို ဆက်ထိန်းသိမ်းထားရန်လှုံ့ဆော်ခံရဖို့နဲ့ ဆက်ပြီးစောင့်နေကြရန်လိုတယ်ဆိုတာကို သတိပေးခံရဖို့ အသင့်ရှိနေကြပါတယ်” ဟုဆက်၍ပြောခဲ့၏။

၂၀၀၀၊ မေလနောက်ပိုင်းမှစ၍ သန်းနှင့်ချီသောဘုရားသခင့်စကားတော်ကိုကျင့်သုံးသူများနှင့် သူတို့၏မိတ်ဆွေတို့သည် အလွန်အရေးကြီးသည့်ကျမ်းစာပညာကို သင်ယူရန် ကမ္ဘာအရပ်ရပ်မှ ထောင်ချီသောဒေသများသို့ စုရုံးရောက်ရှိခဲ့၏။ သူတို့သည် စည်းဝေးကြီးသုံးရက်အတွင်း ဘာကိုသင်ယူခဲ့သနည်း။

ပထမနေ့—ယေဟောဝါ၏ လုပ်ဆောင်တော်မူရာများကို မမေ့လျော့ခြင်း

အဖွင့်ဟောပြောချက်၌ သဘာပတိက စည်းဝေးကြီးများတွင် ယေဟောဝါအား စည်းလုံးစွာဝတ်ပြုခြင်းမှရရှိသော ကောင်းချီးများကို တွေ့ကြုံခံစားကြရန် ပရိသတ်အားဖိတ်ခေါ်ခဲ့သည်။ မိမိတို့၏ယုံကြည်ခြင်းတိုးပွားလာကာ တစ်ဦးချင်းစီ ယေဟောဝါနှင့်ဆက်ဆံရေး ခိုင်ခံ့မြဲမြံလာမည်ကို တက်ရောက်သူအားလုံးအား စိတ်ချစေခဲ့သည်။

ကျွန်ုပ်တို့တစ်ဦးစီ၏ပျော်ရွှင်မှုအတွက် လိုအပ်ရာကို “ပျော်ရွှင်သောဘုရားသခင်” သိတော်မူ၏။ (၁ တိမောသေ ၁:၁၁၊ ကဘ) သို့ဖြင့် ယေဟောဝါ၏နှုတ်မြွက်စကားတော် သမ္မာကျမ်းစာသည် အကောင်းဆုံးဘဝလမ်းစဉ်ကိုဖော်ပြပေးကြောင်း “ဘုရားသခင့်အလိုတော်ဆောင်ခြင်းက ပျော်ရွှင်မှုဖြစ်စေ” ဟောပြောချက်က ပေါ်လွင်စေခဲ့သည်။ (ယောဟန် ၁၃:၁၇) အခြေအနေအမျိုးမျိုးအောက်တွင် ဘုရားသခင့်အလိုတော်ဆောင်ပုံကိုတင်ပြသည့် ရှေ့မီနောက်မီယေဟောဝါသက်သေများနှင့် လူတွေ့မေးမြန်းခန်းအတော်များများက ကျွန်ုပ်တို့၏ဘဝကို ပို၍အဓိပ္ပာယ်ရှိစေသည်။ “ယေဟောဝါ၏ကောင်းမြတ်ခြင်းအပေါ် ရွှင်ပျခြင်းရှိလော့” ဟူသည့်နောက်ဟောပြောချက်က “ဘုရားသခင်ကျင့်တော်မူသည်နည်းတူကျင့်” သူများအနေနှင့် ခရစ်ယာန်တို့သည် မိမိတို့၏အသက်တာတွင် “ကောင်းမြတ်ခြင်းအမျိုးမျိုး” ကိုတင်ပြလိုကြသည်ဟု အလေးအနက်ဖော်ပြခဲ့သည်။ (ဧဖက် ၅:၁၊ ၉) ယင်းကိုတင်ပြသည့် အထင်ရှားဆုံးနည်းတစ်နည်းမှာ သတင်းကောင်းဟောပြောခြင်းနှင့် တပည့်ဖြစ်စေခြင်းအားဖြင့်ဖြစ်သည်။—ဆာလံ ၁၄၅:၇။

“မျက်မြင်မရသောအရှင်အား မြင်ရဘိသကဲ့သို့ ဆက်လက်စွဲမြဲပါ” ဆွေးနွေးချက်က ခိုင်ခံ့သောယုံကြည်ခြင်းသည် မျက်မြင်မရသောဘုရားသခင်အားတွေ့မြင်စေရန် ထောက်ကူပေးပုံကို ပေါ်လွင်စေခဲ့သည်။ ဝိညာဉ်ရေးလူများသည် မိမိတို့အဘယ်အရာစဉ်းစားနေသည်ကိုပင် ဘုရားသခင်၏သိရှိနိုင်စွမ်းရှိခြင်းအပါအဝင် ကိုယ်တော့်အရည်အသွေးများကို သိရှိထားကြကြောင်း ဟောပြောသူကဖော်ပြခဲ့သည်။ (သု. ၅:၂၁) လူတွေ့မေးမြန်းခံရသူများက ယုံကြည်ခြင်းသာ၍ခိုင်မြဲစေဖို့နှင့် မိမိတို့အသက်တာတွင် ဝိညာဉ်ရေးအကျိုးစီးပွားများကို ရှေ့ဦးထားဖို့အတွက် တက်လှမ်းခဲ့သည့် ခြေလှမ်းများကို ပြောပြခဲ့ကြသည်။

“အံ့သြဖွယ်အမှုများကိုပြုတော်မူရှင်—ယေဟောဝါအားချီးမွမ်းလော့” အဓိကဟောပြောချက်ဖြင့် နံနက်ပိုင်းအစီအစဉ်ကို အဆုံးသတ်ခဲ့သည်။ ယင်းက ယေဟောဝါအကြောင်း ပိုသိရှိလာလေ အံ့သြဖွယ်အမှုများပြုတော်မူရှင်အဖြစ် ကိုယ်တော့်ကို ချီးမွမ်းစရာရှိလာလေဖြစ်သည်ကို သဘောပေါက်အောင် ပရိသတ်အား ကူညီပေးခဲ့၏။ ဟောပြောသူက ဤသို့ဆိုခဲ့သည်– “အခုအချိန်မှာတောင် ကျွန်တော်တို့အတွက် ဘုရားသခင်လုပ်ဆောင်ပေးနေတဲ့ အံ့ဖွယ်အမှုအားလုံးနဲ့အတူ ကိုယ်တော်ရဲ့အံ့ချီးဖွယ်ဖန်ဆင်းရာတွေကို စေ့စေ့ကြည့်ရှုဆင်ခြင်တဲ့အခါ လှိုက်လှိုက်လှဲလှဲလေးမြတ်တန်ဖိုးထားစိတ်နဲ့ ကိုယ်တော်ကိုချီးမွမ်းဖို့ လှုံ့ဆော်ပေးခံကြရပါတယ်။ အတိတ်ကာလက မိမိလူမျိုးတော်အကျိုးအတွက် ကိုယ်တော်ပြုလုပ်ခဲ့တဲ့ အံ့ဖွယ်အမှုတွေကို လေးလေးနက်နက်တွေးတောတဲ့အခါ ကိုယ်တော်ကို ကျွန်တော်တို့ချီးမွမ်းချင်လာကြတယ်။ နောက်တော့ ယေဟောဝါလုပ်ဆောင်ပေးမယ့် အံ့ဖွယ်ရာတွေနဲ့ပတ်သက်တဲ့ ကတိတော်ကိုစေ့စေ့စဉ်းစားချိန်မှာ လေးမြတ်တန်ဖိုးထားကြောင်းတင်ပြဖို့ နည်းလမ်းတွေကိုလည်း ကျွန်တော်တို့ရှာဖွေကြပါတယ်။”

ဤလောက၏ဖိစီးမှုများသည် အဆုံးနီးကြောင်းအတည်ပြုနေသည်ကို ပရိသတ်အားလုံးအား သတိပေးသည့် “ကောင်းမှုပြုရာတွင် လက်မလျှော့နှင့်” ဟောပြောချက်ဖြင့် မွန်းလွဲပိုင်းအစီအစဉ်ကို စတင်ခဲ့၏။ (၂ တိမောသေ ၃:၁) သို့သော် လက်မလျှော့ခြင်းအားဖြင့် “စိတ်ဝိညာဉ်သည် ကယ်တင်ခြင်းသို့ရောက်အံ့သောငှာ ယုံကြည်သောသူဖြစ်” ကြောင်း ကျွန်ုပ်တို့သက်သေပြသနိုင်သည်။—ဟေဗြဲ ၁၀:၃၉။

မိသားစုအသက်တာနှင့်စပ်လျဉ်း၍ အဘယ်ကျမ်းစာဆုံးမစကားပေးခဲ့သနည်း။ “ဘုရားသခင့်စကားတော်ကို နာခံလော့” ဟူသည့် စည်းဝေးကြီး၏ ပထမဆုံးအခန်းဆက်ဟောပြောချက်ကို “အိမ်ထောင်ဖက်ရွေးချယ်ရာတွင်” အပိုင်းနှင့်စတင်ခဲ့သည်။ အိမ်ထောင်ဖက်ရွေးချယ်ခြင်းသည် လူတို့ပြုလုပ်ရသည့် အရေးအကြီးဆုံး ဆုံးဖြတ်စရာများမှတစ်ခုဖြစ်သည်။ ထို့ကြောင့် ခရစ်ယာန်များသည် အိမ်ထောင်ပြုရန် ရင့်ကျက်သည့်အထိ စောင့်ဆိုင်းလိုကြပြီး ‘သခင်ဘုရား၌သာအိမ်ထောင်ပြု’ ကြရန်ဖြစ်သည်။ (၁ ကောရိန္သု ၇:၃၉) နောက်အခန်းဆက်ဟောပြောချက်က ခရစ်ယာန်မိသားစုအားလုံး ခိုင်ခံ့သည့်ဝိညာဉ်ရေးမိသားစုများအဖြစ် အောင်မြင်မှုရှိရန် ယေဟောဝါအလိုတော်ရှိကြောင်း ဆွေးနွေးပြီး ယင်းကိုဖြစ်မြောက်အောင်မြင်ရန် လက်တွေ့ကျသောနည်းများကိုပေးခဲ့သည်။ ဘုရားသခင်အားချစ်ဖို့ မိမိတို့ကလေးများကို သွန်သင်ပေးရာတွင် ကိုယ်တော့်ကိုချစ်သည့် မိဘများ၏မေတ္တာမှစတင်ကြောင်း နောက်ဆုံးအခန်းဆက်က မိဘများအားအသိပေးခဲ့သည်။

“ကောလာဟလများနှင့် အတင်းအဖျင်းကို သတိပြု” ဟောပြောချက်မှ စိတ်လှုပ်ရှားဖွယ်သတင်းများကိုကြားရသောအခါ အံ့ဩစရာများဖြစ်တတ်သော်လည်း ယုံလွယ်လွန်းသူမဖြစ်ဘဲ ပညာရှိစွာတုံ့ပြန်သင့်ကြောင်း အားလုံးသိမြင်နိုင်ရန် ကူညီပေးခဲ့၏။ ခရစ်ယာန်များသည် မှန်ကန်ကြောင်းမိမိတို့သိရှိထားသည့် ဘုရားသခင်နိုင်ငံတော်သတင်းကောင်းကိုဟောပြောရန် ပို၍အခွင့်သာကြသည်။ နောက်ဟောပြောချက်ဖြစ်သော “‘ကိုယ်၌စူးသောဆူး’ ကိုရင်ဆိုင်ဖြေရှင်းခြင်း” သည် စိတ်သက်သာရာရစေပြီး စိတ်အားတက်စေကြောင်း များစွာသောသူတို့တွေ့ရှိခဲ့ကြ၏။ စုံစမ်းနှောင့်ယှက်မှုများကို ကျွန်ုပ်တို့မပြတ်ကြုံတွေ့ရသော်ငြား ယေဟောဝါသည် မိမိ၏သန့်ရှင်းသောဝိညာဉ်တော်၊ နှုတ်မြွက်စကားတော်နှင့် ကျွန်ုပ်တို့၏ခရစ်ယာန်ညီအစ်ကိုအသင်းအပင်းအားဖြင့် ခွန်အားပေးနိုင်သည်ကို သိရှိရန်ထောက်ကူပေးခဲ့သည်။ ဤကိစ္စတွင် တမန်တော်ပေါလု၏ ကိုယ်တိုင်အတွေ့အကြုံမှ အားပေးမှုများစွာရရှိသည်။—၂ ကောရိန္သု ၁၂:၇-၁၀; ဖိလိပ္ပိ ၄:၁၁၊ ၁၃။

ပထမနေ့ကို “ယေဟောဝါ၏အဖွဲ့အစည်းနှင့်အတူ ရင်ပေါင်တန်းလျှောက်လှမ်းနေခြင်း” ဟောပြောချက်နှင့်အဆုံးသတ်ခဲ့သည်။ အထူးသဖြင့် ဘုရားသခင့်အဖွဲ့အစည်းတိုးတက်ခဲ့သော ဤကဏ္ဍသုံးရပ်ကို သုံးသပ်ဆင်ခြင်ခဲ့၏– (၁) ယေဟောဝါထံမှ ဝိညာဉ်ရေးအလင်း တိုး၍နားလည်လာခြင်း၊ (၂) ကျွန်ုပ်တို့ကို ဘုရားသခင်အပ်နှင်းထားသောဓမ္မအမှုနှင့် (၃) အဖွဲ့အစည်းဆိုင်ရာလုပ်ထုံးလုပ်နည်းများကို အခန့်သင့်အချိန်တွင် ပြုပြင်ပြောင်းလဲပေးခြင်းတို့ဖြစ်သည်။ ထို့နောက် ဟောပြောသူက ယုံကြည်စိတ်ချစွာဤသို့ဆိုသည်– “ရှေ့မှာဖြစ်လာမယ့် အဖြစ်အပျက်တွေကိုမျှော်ပြီး ကျွန်တော်တို့စိတ်လှုပ်ရှားနေကြပါတယ်။ အစက ကျွန်တော်တို့မှာရှိခဲ့တဲ့ ယုံကြည်စိတ်ချမှုကို အဆုံးထိဆက်ရှိစေဖို့ အကြောင်းခိုင်လုံတယ်ဆိုတာကို သံသယဝင်စရာရှိပါသလား” ဟူ၍ ဟောပြောသူကမေးခဲ့၏။ (ဟေဗြဲ ၃:၁၄) အဖြေက ရှင်းပါသည်။ ၎င်းက သင်သည် ဘုရားသခင်၏မိတ်ဆွေဖြစ်နိုင်! အမည်ရှိ ဘရိုရှာအသစ်ကို ထုတ်ဝေဖို့ဖြစ်စေခဲ့သည်။ ၎င်းသည် ယေဟောဝါအကြောင်း သင်ယူရန် ပညာရေးအကန့်အသတ်ရှိသူများနှင့် စာဖတ်စွမ်းရည်နည်းသူများကို ကူညီရန် အစွမ်းထက်သောသွန်သင်ခြင်းအထောက်အကူပြုစာပေဖြစ်မည်။

ဒုတိယနေ့—ဘုရားသခင်၏ အံ့ဖွယ်အမှုတို့ကို ပြောကြားနေလော့

နေ့စဉ်ကျမ်းချက်သုံးသပ်ပြီးနောက် စည်းဝေးကြီး၏ဒုတိယနေ့ကို အခန်းဆက် “ဘုရားသခင့်စကားတော်၏အမှုဆောင်များ” ဟောပြောချက်ဖြင့်စတင်ခဲ့သည်။ ပထမပိုင်းက ကျွန်ုပ်တို့ကမ္ဘာချီဟောပြောခြင်းလုပ်ငန်း၏ လက်ရှိအောင်မြင်မှုကိုအာရုံစိုက်စေခဲ့၏။ သို့ရာတွင် ဘုရားသခင့်နိုင်ငံတော်သတင်းကောင်းကို ငြင်းပယ်သူလူအများက ဤလုပ်ငန်း၌ရှိသော ကျွန်ုပ်တို့၏ခံနိုင်ရည်ကို စိန်ခေါ်လျက်ရှိသည်။ ရှေ့မီနောက်မီကြေညာသူအတော်များများက လျစ်လျူရှုမှု သို့မဟုတ် ဆန့်ကျင်မှု၏စိန်ခေါ်မှုကိုရင်ဆိုင်ရန် မိမိတို့၏ စိတ်နှင့်နှလုံးတို့ကို ခိုင်ခံ့စေခြင်းဖြင့် ခရစ်ယာန်ဓမ္မအမှုတွင် မိမိတို့၏ရွှင်လန်းမှု ဆက်ထိန်းထားခဲ့ပုံကို ရှင်းပြခဲ့သည်။ ဒုတိယအပိုင်းက ယေဟောဝါသက်သေများသည် စနစ်တကျနည်းနှင့် အလွတ်သဘော နှစ်နည်းစလုံးဖြင့် နေရာတကာမှလူတို့ထံရောက်ရှိရန် ကြိုးစားကြကြောင်း စည်းဝေးကြီးတက်ရောက်သူများကို ဆော်သြခဲ့၏။ နောက်ဆုံးအပိုင်းက ခရစ်ယာန်အားလုံးသည် မိမိတို့၏ကိုယ်ပိုင်ခရစ်ယာန်ဓမ္မအမှုကို တိုးချဲ့နိုင်သည့်နည်းလမ်းအသွယ်သွယ်ကို ဖော်ပြပေးခဲ့သည်။ ယင်းသို့တိုးချဲ့ဆောင်ရွက်နိုင်ရန်အဆင်မပြေမှုနှင့် ကိုယ့်အလိုကိုငြင်းပယ်ရမှုတို့ရှိလျှင်ပင် ကျွန်ုပ်တို့သည် ဘုရားသခင့်နိုင်ငံတော်ကို ဦးထိပ်ထားသင့်ကြောင်း ဟောပြောသူက အလေးပေးဟောခဲ့သည်။—မဿဲ ၆:၁၉-၂၁။

ရုပ်ပစ္စည်းများကို အတောမသတ်အာသာငမ်းငမ်းဖြစ်နေသည့် ဘုရားတရားမဲ့လောကတွင် ကျွန်ုပ်တို့နေထိုင်ကြသောကြောင့် “ကိုယ့်ခြေပေါ်ကိုယ်ရပ်တည်လျက် ဘုရားဝတ်၌မွေ့လျော်ခြင်းကို ပျိုးထောင်ပါ” ဟောပြောချက်သည် အချိန်သင့်အခါသင့်ဖြစ်ခဲ့၏။ ဟောပြောသူသည် ၁ တိမောသေ ၆:၆-၁၀၊ ၁၈၊ ၁၉ အပေါ် သူ၏မှတ်ချက်အချို့ကိုအခြေခံ၍ လမ်းမှားရောက်စေနိုင်သည့်အပြင် သောကဝေဒနာများစွာရစေနိုင်သည့် ငွေတပ်မက်ခြင်းကိုရှောင်ရန် ဘုရားဝတ်၌မွေ့လျော်ခြင်းက ခရစ်ယာန်များကို ထောက်ကူပေးနိုင်ကြောင်း ရှင်းလင်းခဲ့သည်။ ကျွန်ုပ်တို့၏စီးပွားရေးသည် မည်သို့ပင်ဖြစ်ပါစေ၊ ပျော်ရွှင်မှုသည် ယေဟောဝါနှင့်ကျွန်ုပ်တို့ဆက်ဆံရေး၊ ကျွန်ုပ်တို့၏ဝိညာဉ်ရေးကောင်းမှုအပေါ်မူတည်ကြောင်းကိုလည်း ပေါ်လွင်စေခဲ့သည်။ “ဘုရားသခင် ရှက်ကြောက်စရာအကြောင်းမရှိစေခြင်း” ဟောပြောချက်တွင် တင်ဆက်သွားသည့်အချက်များက များစွာသောသူတို့ကို အကြီးအကျယ်လှုံ့ဆော်အားပေးမှုဖြစ်ခဲ့သည်။ ယေဟောဝါသည် မိမိ၏သစ္စာရှိသက်သေခံများကို မည်သည့်အခါမျှမေ့မည်မဟုတ်ကြောင်းကို အလေးအနက်ပြောခဲ့သည်။ “မနေ့၊ ယနေ့၊ နောင်ကာလအစဉ်အမြဲ မပြောင်းမလဲနေတော်မူ” သောယေရှုခရစ်၏ပြိုင်ဘက်ကင်းစံနမူနာက ခံနိုင်ရည်ရှိရှိဖြင့် အသက်ပြေးပွဲတွင်ဆက်ပြေးနေရန် လူအများကို ကူညီပေးမည်ဖြစ်သည်။—ဟေဗြဲ ၁၃:၈။

နံနက်ပိုင်းအစီအစဉ်ကို ယေဟောဝါသက်သေများ၏စည်းဝေးကြီးများတွင် အမှတ်ထင်ထင်ဖြစ်လေ့ရှိသော နှစ်ခြင်းဟောပြောချက်ဖြင့် နိဂုံးချုပ်သည်။ ရေတွင်နှစ်ခြင်းခံခြင်းဖြင့် ယေရှု၏ခြေရာကို လိုက်လျှောက်သည့် ဆက်ကပ်အပ်နှံထားသည့်လူသစ်များကို မြင်တွေ့ရခြင်းမှာ တကယ့်ရွှင်လန်းမှုပါတကား! (မဿဲ ၃:၁၃-၁၇) ဤခြေလှမ်းလှမ်းကြသူအားလုံးသည် ဘုရားသခင့်စကားတော်ကို ကျင့်သုံးသူများအဖြစ် များစွာဆောင်ရွက်ခဲ့ပြီးဖြစ်သည်။ ထို့ပြင် သူတို့သည် နှစ်ခြင်းခံသောအခါ သတင်းကောင်း၏ ခန့်အပ်ခံအမှုဆောင်များဖြစ်လာကြပြီး ယေဟောဝါ၏နာမတော် သန့်ရှင်းမြင့်မြတ်ခြင်းတွင် ပါဝင်နေကြောင်းသိရှိရခြင်းမှ ပျော်ရွှင်မှုများစွာရရှိလာသည်။—သု. ၂၇:၁၁။

“‘အမှားနှင့်အမှန် နှစ်ရပ်စလုံးကို ခွဲခြားသိမြင်ရန်’ ရင့်ကျက်မှုလိုအပ်” ဟောပြောချက်က အချက်ကျသောဆုံးမစကားကိုပေးသည်။ အမှား၊ အမှန်နှင့်ပတ်သက်သော လောကစံနှုန်းများသည် ဝမ်းနည်းဖွယ်ရာကောင်းလောက်အောင် မလျော်မကန်ဖြစ်နေသည်။ ထို့ကြောင့် ကျွန်ုပ်တို့သည် ယေဟောဝါ၏စံနှုန်းများကို မှီခိုအားထားဖို့လိုအပ်သည်။ (ရောမ ၁၂:၂) ဘုရားသခင်၏နည်းလမ်းတော်များကို တိကျမှန်ကန်စွာနားလည်ရန်နှင့် ရင့်ကျက်သည်ထက်ရင့်ကျက်လာရန် ကြိုးစားအားထုတ်ဖို့ အားလုံးကိုတိုက်တွန်းခဲ့သည်။ သို့ဖြင့် ကျွန်ုပ်တို့၏ပိုင်းခြားသိမြင်နိုင်စွမ်းသည် လက်တွေ့အသုံးချခြင်းဖြင့် “ကောင်းကျိုးမကောင်းကျိုးကို ပိုင်းခြား” တတ်ရန် လေ့ကျင့်ပေးခံရမည်ဖြစ်သည်။—ဟေဗြဲ ၅:၁၁-၁၄။

ထို့နောက် “ဝိညာဉ်ရေးရာကို ပြုစုပျိုးထောင်ခြင်း၌ ကြိုးစားအားထုတ်ခြင်း” အခန်းဆက်ဟောပြောချက်ကိုကြားရသည်။ ခရစ်ယာန်စစ်များသည် ဝိညာဉ်ရေးရာကို ပြုစုပျိုးထောင်၍ထိန်းသိမ်းထားရန် အရေးကြီးကြောင်း အသိအမှတ်ပြုကြ၏။ ၎င်းတွင် အားထုတ်လုပ်ဆောင်ရသော ဖတ်ရှုခြင်း၊ လေ့လာခြင်းနှင့် ဆင်ခြင်တွေးတောခြင်းတို့ပါဝင်သည်။ (မဿဲ ၇:၁၃၊ ၁၄; လုကာ ၁၃:၂၄) ဝိညာဉ်ရေးလူတို့သည် “ဆုတောင်းခြင်းနှင့် တိုးလျှိုးအသနားခံခြင်းအမျိုးမျိုး” တို့ကို ဆက်၍လုပ်ဆောင်ကြသည်။ (ဧဖက် ၆:၁၈၊ ကဘ) ကျွန်ုပ်တို့၏ဆုတောင်းချက်များသည် ကျွန်ုပ်တို့၏ယုံကြည်ခြင်းနှင့် ဆည်းကပ်ဝတ်ပြုခြင်းတို့၏အတိမ်အနက်၊ ဝိညာဉ်ရေး အနိမ့်အမြင့်အပြင် အဘယ်အရာများကို “သာ၍အရေးကြီးသောအရာများ” အဖြစ်ရှုမြင်မှုတို့ကိုပါ ဖော်ပြနေကြောင်း နားလည်သဘောပေါက်ကြ၏။ (ဖိလိပ္ပိ ၁:၁၀၊ ကဘ) နာခံမှုရှိသောကလေးသည် ကြင်နာသောဖခင်နှင့် ရင်းနှီးသောဆက်ဆံရေးခံစားရသကဲ့သို့ ယေဟောဝါနှင့် နွေးထွေးပြီးမေတ္တာပါဆက်ဆံရေးကို ပြုစုပျိုးထောင်ရန်အရေးကြီးကြောင်းကိုလည်း ပေါ်လွင်စေခဲ့သည်။ ကျွန်ုပ်တို့တွင် စစ်မှန်သောဘာသာတရားရှိထားခြင်းထက်မက ‘ဘုရားသခင်ကိုမြင်ရဘိသကဲ့သို့’ ခိုင်ခံ့သောယုံကြည်ခြင်းတည်ဆောက်လိုစိတ်ရှိရမည်။—ဟေဗြဲ ၁၁:၆၊ ၂၇။

ဝိညာဉ်ရေးတိုးတက်မှုအကြောင်းအရာကို “သင်၏တိုးတက်မှုကို ထင်ရှားပြလော့” ဟောပြောချက်တွင် ထပ်မံဆွေးနွေးခဲ့၏။ ထိုသို့သောတိုးတက်မှု ဤနယ်ပယ်သုံးရပ်ကို သုံးသပ်ခဲ့သည်– (၁) အသိပညာ၊ နားလည်သဘောပေါက်မှုနှင့် ဉာဏ်ပညာ၌တိုးပွားခြင်း၊ (၂) ဘုရားသခင့်ဝိညာဉ်အသီးများကို သီးပွင့်ခြင်းနှင့် (၃) မိသားစုဝင်များအနေဖြင့် မိမိတို့၏တာဝန်များကို ကျေပွန်ခြင်းတို့ဖြစ်သည်။

ထိုနေ့၏နောက်ဆုံးဟောပြောချက် “တိုး၍ထွန်းလင်းနေသော ဘုရားသခင့်စကားတော်အလင်းတွင် လျှောက်လှမ်းနေခြင်း” အဆုံးပိုင်းတွင် ဟေရှာယပရောဖက်ပြုချက်—လူခပ်သိမ်းအတွက်အလင်း ၁ စာအုပ်အသစ်ကိုရရှိကြသည့်အတွက် စည်းဝေးကြီးတက်ရောက်သူများ ဝမ်းမြောက်ခဲ့ကြ၏။ ဤစာအုပ်သည် ဟေရှာယကျမ်းကို အခန်းကြီးတစ်ခုချင်းစီတင်ပြထားသော နှစ်အုပ်တွဲစာအုပ်မှ ပထမတွဲဖြစ်သည်။ “ဟေရှာယကျမ်းမှာ ယနေ့ ကျွန်တော်တို့အတွက် သတင်းတစ်ခုပါတယ်” ဟုဟောပြောသူက ဖော်ပြခဲ့သည်။ “ဟေရှာယကျမ်းရဲ့ပရောဖက်ပြုချက်အတော်များများဟာ ဟေရှာယခေတ်မှာ ပြည့်စုံခဲ့တယ်ဆိုတာမှန်ပါတယ်။ . . . ဒါပေမဲ့ ဟေရှာယပရောဖက်ပြုချက်အတော်များများဟာ အခုအချိန်မှာပြည့်စုံနေပြီး တချို့ကျတော့ ဘုရားသခင်ကတိပြုထားတဲ့ ကမ္ဘာသစ်မှာပြည့်စုံမှာဖြစ်တယ်” ဟူ၍ဆက်ရှင်းပြခဲ့၏။

တတိယနေ့—ယေဟောဝါ၏စကားတော်ကို ကျင့်သုံးသူများဖြစ်ကြလော့

နေ့စဉ်ကျမ်းချက်ဆွေးနွေးခန်းဖြင့် စည်းဝေးကြီး၏နောက်ဆုံးနေ့ကို စတင်ခဲ့သည်။ ထို့နောက် “ဘုရားသခင့်အလိုတော်ဆောင်နေကြသူများအတွက် ဇေဖနိ၏အဓိပ္ပာယ်ရှိသောပရောဖက်ပြုချက်” အခန်းဆက်ဟောပြောချက်ကို တင်ဆက်ခဲ့၏။ ထင်ရာစိုင်းခဲ့သောယုဒလူတို့ကို ယေဟောဝါပြုလုပ်သကဲ့သို့ ယခုခေတ်တွင် ကိုယ်တော်၏သတိပေးချက်ကို ငြင်းပယ်သူများအား ဘေးသင့်စေမည့်အကြောင်း ဤအခန်းဆက်ဟောပြောချက်သုံးခုက ပေါ်လွင်စေခဲ့သည်။ သူတို့သည် ဘုရားသခင်အား ပြစ်မှားကြသောကြောင့် မျက်မမြင်များကဲ့သို့ လွတ်မြောက်လမ်းရှာမတွေ့နိုင်ဘဲ ခိုကိုးရာမဲ့စွာ လျှောက်သွားကြမည်။ သို့သော် ခရစ်ယာန်စစ်များသည် ယေဟောဝါကို သစ္စာရှိစွာဆက်၍ရှာနေသည့်အတွက် ဘုရားသခင့်အမျက်တော်နေ့တွင် ပုန်းရှောင်ရာကိုရမည်ဖြစ်သည်။ ထို့ပြင် သူတို့သည် ယခု ကောင်းချီးများစွာရရှိနေကြ၏။ သူတို့သည် ကျမ်းစာအမှန်တရားနှင့်ပတ်သက်သော “သန့်ရှင်းသောဘာသာစကား” ပြောဆိုခွင့်ကိုရရှိခဲ့သည်။ (ဇေဖနိ ၃:၉) “သန့်ရှင်းသောဘာသာစကားပြောဆိုခြင်းမှာ သမ္မာတရားကိုယုံကြည်ပြီး အခြားသူတွေကိုသွန်သင်ပေးရုံမက ကျွန်တော်တို့ရဲ့အမူအကျင့်တွေကို ဘုရားသခင့်ပညတ်တော်များ၊ မူများနဲ့ကိုက်ညီစေခြင်းလည်းပါဝင်ပါတယ်” ဟုဟောပြောသူက ရှင်းပြခဲ့သည်။

စည်းဝေးကြီးတက်ရောက်သူများသည် “ကျွန်ုပ်တို့ခေတ်အတွက် သတိပေးပုံနမူနာများ” ပြဇာတ်ကို စိတ်အားထက်သန်စွာစောင့်မျှော်ခဲ့ကြ၏။ ဤဝတ်စုံပြည့်ပြဇာတ်သည် ထောင်နှင့်ချီသောဣသရေလလူမျိုးများ ယေဟောဝါကိုမေ့ပြီး မတရားမေထုန်နှင့် မှားသောဝတ်ပြုရေးတို့တွင် ပါဝင်စပ်ယှက်အောင် အယူမှားအမျိုးသမီးများ၏ ဆွဲဆောင်မှုခံရသောကြောင့် ကတိထားရာပြည်အစပ်တွင် သူတို့အသက် ဆုံးရှုံးခဲ့ရပုံကို ဖော်ပြခဲ့သည်။ အဓိကဇာတ်ဆောင်ယာမိန်သည် အစ၌ မောဘအမျိုးသမီးများ၏ဖြားယောင်းမှုနှင့် ယေဟောဝါကိုဆည်းကပ်ဝတ်ပြုမှုတို့ကြားတွင် မည်သည့်ဘက်လိုက်ရမှန်းမဝေခွဲနိုင်ဖြစ်ခဲ့၏။ ဖိနဟတ်၏ယုံကြည်ခြင်းနှင့်ဆည်းကပ်ဝတ်ပြုမှုတို့ ပေါ်လွင်ထင်ရှားသကဲ့သို့ ဘုရားတရားမဲ့ဇိမရိ၏ မှားယွင်းသောသဘောထားနှင့် ထင်ယောင်ထင်မှားတွေးခေါ်မှုလည်း သိသိသာသာ ပေါ်လွင်ခဲ့သည်။ ယေဟောဝါအား မေတ္တာမရှိသူများနှင့်သွားပတ်သက်ခြင်း၏အန္တရာယ်ကို ကွင်းကွင်းကွက်ကွက်ဖော်ပြခဲ့သည်။

ဤပြဇာတ်က နောက်ဆက်လာမည့် “ကြားနာ၍ မေ့လျော့သောသူများ မဖြစ်ကြနှင့်” ဟောပြောချက်ကို အာရုံစိုက်စေသည်။ ၁ ကောရိန္သု ၁၀:၁-၁၀ ကိုအသေးစိတ်ဆန်းစစ်ခြင်းက ယေဟောဝါသည် ကျွန်ုပ်တို့ ကမ္ဘာသစ်တွင်အမွေခံထိုက်မထိုက် ဆုံးဖြတ်သတ်မှတ်ရန် ကျွန်ုပ်တို့၏နာခံမှုကို စမ်းသပ်တော်မူကြောင်း ဖော်ပြခဲ့၏။ အချို့သည် စနစ်သစ်ထဲဝင်ခါနီး ယခုအချိန်၌ပင် သွေးသားအလိုဆန္ဒများက ဝိညာဉ်ရေးပန်းတိုင်များကို ပျက်ပြားစေခဲ့သည်။ ‘ယေဟောဝါ၏ချမ်းသာထဲဝင်’ ရမည့်အခွင့်အရေးကို လက်လွှတ်မခံရန် အားလုံးကို အားပေးတိုက်တွန်းခဲ့၏။—ဟေဗြဲ ၄:၁။

လူထုဟောပြောချက်၏အကြောင်းအရာမှာ “ဘုရားသခင့်အံ့ဖွယ်အမှုတော်များကို အာရုံစိုက်သင့်သည့်အကြောင်းရင်း” ဖြစ်၏။ ယေဟောဝါ၏ “အံ့ဖွယ်သောအမှုတော်” များသည် ကျွန်ုပ်တို့ပတ်ဝန်းကျင်ရှိ ရုပ်ပိုင်းဆိုင်ရာဖန်ဆင်းခြင်းတွင် ကိုယ်တော်၏ဉာဏ်ပညာနှင့်အာဏာတော်တို့ကို ပြခဲ့သည်။ (ယောဘ ၃၇:၁၄) ယေဟောဝါ၏ နှိုက်နှိုက်ချွတ်ချွတ်မေးခွန်းအတော်များများသည် အဆုံးမရှိဖန်ဆင်းရှင်၏တန်ခိုးကို ယောဘစိတ်စွဲမှတ်သွားစေရန် လုံလောက်ခဲ့သည်။ ယေဟောဝါသည် မိမိ၏သစ္စာရှိကျေးကျွန်များ၏အကျိုးအတွက် အနာဂတ် “အံ့ဖွယ်သောအမှုတော်” များကိုလည်း လုပ်ဆောင်ပေးမည်ဖြစ်သည်။ “ယေဟောဝါရဲ့အံ့ဖွယ်အမှုတွေ—အတိတ်ကာလက ကိုယ်တော်ပြုလုပ်ခဲ့ပြီးတဲ့အရာတွေ၊ ယနေ့အချိန် ကျွန်တော်တို့ပတ်ပတ်လည်မှာရှိတဲ့ ဖန်ဆင်းရာတွေမှာ ကိုယ်တော်ပြုလုပ်နေတာတွေနဲ့ ချဉ်းကပ်လာနေတဲ့အနာဂတ်မှာ ကိုယ်တော်ပြုလုပ်ပေးမယ့် ကတိတော်တွေ—အပေါ် အာရုံစိုက်ဖို့အကြောင်းရင်းအများကြီး ကျွန်တော်တို့ဆီမှာရှိပါတယ်” ဟူ၍ ဟောပြောသူက နိဂုံးချုပ်ခဲ့သည်။

ထိုအပတ်အတွင်းလေ့လာမည့် ကင်းမျှော်စင်သင်တန်းဆောင်းပါးကို အကျဉ်းချုပ်တင်ပြပြီးနောက် စည်းဝေးကြီး၏နောက်ဆုံးဟောပြောချက်ကို တင်ဆက်ခဲ့၏။ “ဘုရားသခင့်စကားတော်ကို ကျင့်သုံးသူတစ်ဦးအဖြစ် သင့်အခွင့်အရေးကို အလွန်တန်ဖိုးထားပါ” ခေါင်းစဉ်တပ်ထားသည့် စိတ်လှုပ်ရှားဖွယ်ဟောပြောချက်က ဘုရားသခင့်စကားတော်ကိုကျင့်သုံးသူများဖြစ်ရခြင်းသည် ဂုဏ်ယူဖွယ်ဖြစ်ကြောင်းကို အလေးပေးဖော်ပြခဲ့၏။ (ယာကုပ် ၁:၂၂) ဘုရားသခင့်စကားတော်ကိုကျင့်သုံးသူများအဖြစ် ကျွန်ုပ်တို့၏အခွင့်အရေးသည် ထူးခြား၍ ယင်းကိုအချိန်ကြာကြာကျင့်သုံးလာလေ ကျွန်ုပ်တို့၏တန်ဖိုးထားမှု ပို၍တိုးလာလေဖြစ်လိမ့်မည်ကို ပရိသတ်အား သတိပေးနှိုးဆော်ခဲ့သည်။ ဤခရိုင်စည်းဝေးကြီး၏ အကျိုးရှိသောလှုံ့ဆော်မှုသည် ဘုရားသခင့်စကားတော်ကို အတတ်နိုင်ဆုံးကျင့်သုံးသူများဖြစ်ရန်ဟူသည့် ကျွန်ုပ်တို့၏စိတ်ဆန္ဒတွင် ထင်ဟပ်ပြကြဖို့ တက်ရောက်သူအားလုံးကို အားပေးတိုက်တွန်းခဲ့သည်။ ၎င်းသည် အကြီးမားဆုံးပျော်ရွှင်မှုကိုခံစားရသည့် တစ်ခုတည်းသောနည်းဖြစ်သတည်း။

[စာမျက်နှာ ၂၅ လေးထောင့်ကွက်/ရုပ်ပုံ]

သင်သည် ဘုရားသခင့်မိတ်ဆွေဖြစ်နိုင်!

သောကြာနေ့မွန်းလွဲပိုင်းတွင် သင်သည် ဘုရားသခင့်မိတ်ဆွေဖြစ်နိုင်! ခေါင်းစဉ်တပ်ထားသော ဘရိုရှာအသစ်ကို ထုတ်ဝေခဲ့သည်။ ကမ္ဘာ့ဒေသများစွာတွင် ရှင်းလင်းလွယ်ကူစေသည့်ကျမ်းစာပညာ အလွန်လိုအပ်လျက်ရှိရာ ထိုလိုအပ်မှုကိုဖြည့်ဆည်းပေးရန် ယင်းဘရိုရှာကို အသုံးပြုသွားမည်။ ပညာရေး သို့မဟုတ် စာဖတ်စွမ်းရည်အကန့်အသတ်ရှိသူများအတွက် ကြီးမားသည့်ကောင်းချီးတစ်ခုဖြစ်လိမ့်မည်။

[စာမျက်နှာ ၂၆ လေးထောင့်ကွက်/ရုပ်ပုံ]

ဟေရှာယပရောဖက်ပြုချက် —လူခပ်သိမ်းအတွက်အလင်း

ဟေရှာယပရောဖက်ပြုချက်—လူခပ်သိမ်းအတွက်အလင်း နှစ်အုပ်တွဲမှ အတွဲ ၁ ကိုရရှိကြသည့်အတွက် စည်းဝေးကြီးတက်ရောက်သူများ ဝမ်းသာပီတိဖြာခဲ့ကြသည်။ ဤစာအုပ်တွင် ကျွန်ုပ်တို့၏ခေတ်နှင့်ပတ်သက်ပြီး ဟေရှာယပရောဖက်ပြုချက်၏ လက်တွေ့ကျတန်ဖိုးကို အလေးပေးဖော်ပြထားသည်။