ယေဟောဝါ၏ပြန်လည်ထူထောင်ထားသော လူမျိုး ကိုယ်တော်အားကမ္ဘာတစ်ခွင်ချီးမွမ်းကြ

“လူမျိုးအပေါင်းတို့သည် . . . ယေဟောဝါ၏နာမတော်ကို [ခေါ်] စေခြင်းငှာ စင်ကြယ်သောဘာသာစကားကို သူတို့အား ငါပေးမည်။”—ဇေဖနိ ၃:၉၊ ကဘ။

၁။ ပျက်စီးခြင်းသတင်းများသည် ယုဒပြည်နှင့် အခြားလူမျိုးများအပေါ် အဘယ်ကြောင့်ပြည့်စုံခဲ့သနည်း။

ဇေဖနိဟောပြောရန် ယေဟောဝါလှုံ့ဆော်ခဲ့သော တရားစီရင်ခြင်းသတင်းများမှာ တန်ခိုးပါလိုက်လေခြင်း! ခေါင်းဆောင်များနှင့် ပြည်သူပြည်သားတစ်စုလုံးသည် ယေဟောဝါ၏အလိုတော်ကို မဆောင်ရွက်ကြသောကြောင့် ထိုပျက်စီးခြင်းသတင်းသည် ယုဒပြည်နှင့် ယင်း၏မြို့တော်ယေရုရှလင်အပေါ် ပြည့်စုံခဲ့သည်။ ဖိလိတ္တိ၊ မောဘနှင့် အမ္မုန်စသည့် အနီးတစ်ဝိုက်ရှိလူမျိုးများလည်း ဘုရားသခင့်အမျက်တော်ကိုခံရကြမည်။ အဘယ်ကြောင့်နည်း။ ယေဟောဝါ၏လူမျိုးတော်ကို ရာစုနှစ်ချီ ရက်စက်စွာဆန့်ကျင်ခဲ့ကြသောကြောင့်ပင်။ ထိုအကြောင်းကြောင့် အာရှုရိကမ္ဘာ့အာဏာစက်သည် ဘယ်သောအခါမျှ ပြန်မထူထောင်နိုင်ဘဲ ဖျက်ဆီးခံရလိမ့်မည်။

၂။ ဇေဖနိ ၃:၈ ကိုမည်သူအားပြောဆိုနေကြောင်း ထင်ရှားသနည်း။

^၂ သို့သော် ရှေးခေတ်ယုဒပြည်တွင် စိတ်ထားမှန်သူအချို့ရှိခဲ့ကြသည်။ သူတို့သည် ဆိုးသွမ်းသူတို့ကို ဘုရားသခင်တရားစီရင်ဖို့ စောင့်မျှော်ခဲ့ကြပြီး ဤစကားများ ပြောဆိုခံခဲ့ရသူများဖြစ်ကြောင်း ထင်ရှားသည်– “ထာဝရဘုရားမိန့်တော်မူသည်ကား ‘ဖမ်းဆီးလုယက်ခြင်းငှာ ငါမထမီတိုင်အောင် ငါ့ကိုငံ့လင့်ကြလော့။ တိုင်းနိုင်ငံပြည်သားအမျိုးမျိုးတို့ကို စုဝေးစေ၍ ငါ့အမျက်၊ ငါ့ဒေါသအရှိန်ကို အကုန်အစင်သွန်းလောင်းမည်ဟု ငါအကြံရှိ၏။ ငါ့ဒေါသမီးသည် မြေတစ်ပြင်လုံးကိုလောင်ရလိမ့်မည်။’”—ဇေဖနိ ၃:၈။

“စင်ကြယ်သောဘာသာစကား” မည်သူ့အတွက်နည်း

၃။ ဇေဖနိသည် အဘယ်မျှော်လင့်ချက်ပေးသော သတင်းကိုကြေညာဖို့ လှုံ့ဆော်ခံခဲ့ရသနည်း။

^၃ မှန်ပါသည်၊ ယေဟောဝါ၏ဖျက်ဆီးခြင်းသတင်းများကို ဇေဖနိကြေညာခဲ့သည်။ သို့သော် ထိုပရောဖက်သည် တကယ်ကောင်းသောမျှော်လင့်ချက်တစ်ခုကိုပါ ထည့်ကြေညာဖို့ လှုံ့ဆော်ခံခဲ့ရသည်—၎င်းမျှော်လင့်ချက်သည် ယေဟောဝါအပေါ် ဆက်တည်ကြည်ကြသူတို့အတွက် အလွန်နှစ်သိမ့်မှုဖြစ်စေမည်။ ဇေဖနိ ၃:၉ (ကဘ) ၌မှတ်တမ်းတင်ထားသည့်အတိုင်း ယေဟောဝါဘုရားသခင်က ဤသို့ကြေညာခဲ့သည်– “ထိုအခါ၊ လူမျိုးအပေါင်းတို့သည် အမှုတော်ကိုပခုံးချင်းယှဉ်၍ ထမ်းဆောင်မည်အကြောင်း ယေဟောဝါ၏နာမတော်ကို [ခေါ်] စေခြင်းငှာ စင်ကြယ်သောဘာသာစကားကို သူတို့အား ငါပေးမည်။”

၄၊ ၅။ (က) မဖြောင့်မတ်သူများ အဘယ်သို့ဖြစ်မည်နည်း။ (ခ) ၎င်းမှ မည်သူတို့အကျိုးခံစားရမည်နည်း၊ အဘယ့်ကြောင့်နည်း။

^၄ စင်ကြယ်သောဘာသာစကား ပေးအပ်ခံရမည်မဟုတ်သော လူတို့ရှိမည်။ သူတို့ကိုသတိပြုမှတ်သားကာ ပရောဖက်ပြုချက်က ဤသို့ဆိုသည်– “ဝါကြွားသောသူတို့ကို သင့်အလယ်၌ ငါပယ်ရှားမည်။” (ဇေဖနိ ၃:၁၁) ထို့ကြောင့် ဘုရားသခင့်ပညတ်တော်များကို အထင်အမြင်သေးပြီး မဖြောင့်မတ်ရာကိုပြုကျင့်သော မာနထောင်လွှားသူများသည် ဖယ်ရှားခံရကြမည်။ ၎င်းမှ မည်သူတို့အကျိုးခံစားရမည်နည်း။ ဇေဖနိ ၃:၁၂၊ ၁၃ ကဤသို့ဖော်ပြသည်– “နှိမ့်ချဆင်းရဲသောအမျိုးကို သင့်အလယ်၌ငါ [ယေဟောဝါ] ချန်ထားမည်။ ထိုသူတို့သည် ထာဝရဘုရား၏နာမတော်ကို ခိုလှုံကြလိမ့်မည်။ ကျန်ကြွင်းသောဣသရေလအမျိုးသားတို့သည် မတရားသောအမှုကိုမပြုရကြ။ မုသာမပြောရကြ။ သူတို့နှုတ်၌ လှည့်စားတတ်သောလျှာမရှိရ။ အဘယ်သူမျှမကြောက်စေဘဲ စားသောက်လျက်၊ အိပ်လျက်နေရကြလိမ့်မည်။”

^၅ ရှေးခေတ်ယုဒပြည်မှ တည်ကြည်သောအကြွင်းအကျန်သည် အကျိုးခံစားရမည်ဖြစ်သည်။ အဘယ့်ကြောင့်နည်း။ ဤစကားများနှင့်အညီ သူတို့လုပ်ဆောင်ခဲ့ကြသောကြောင့်တည်း– “တရားတော်အတိုင်းကျင့်၍ စိတ်နှိမ့်ချသောပြည်သူပြည်သားအပေါင်းတို့ ထာဝရဘုရားကိုရှာကြလော့။ ဖြောင့်မတ်ခြင်းနှင့် စိတ်နှိမ့်ချခြင်းကိုလည်းရှာကြလော့။ ထာဝရဘုရားအမျက်ထွက်တော်မူသောနေ့၌ သင်တို့သည် ပုန်းရှောင်ရာကို တွေ့ကောင်းတွေ့ကြလိမ့်မည်။”—ဇေဖနိ ၂:၃။

၆။ ဇေဖနိပရောဖက်ပြုချက်၏ ပထမပြည့်စုံချက်တွင် အဘယ်အရာဖြစ်ပျက်ခဲ့သနည်း။

^၆ ဇေဖနိပရောဖက်ပြုချက်၏ ပထမပြည့်စုံချက်တွင် ဘုရားသခင်သည် ဘီ.စီ.အီး. ၆၀၇ ၌သစ္စာမဲ့ယုဒပြည်ကို ဗာဗုလုန်ကမ္ဘာ့အာဏာစက်အား သိမ်းပိုက်ခွင့်ပြုခြင်းဖြင့် ၎င်းကိုဒဏ်စီရင်ခဲ့သည်။ ပရောဖက်ယေရမိအပါအဝင် အချို့သူများသည် အသက်ချမ်းသာရခဲ့ကြပြီး အခြားသူတို့မူ သုံ့ပန်းဘဝ၌ ယေဟောဝါအားဆက်၍တည်ကြည်ခဲ့ကြသည်။ ဘီ.စီ.အီး. ၅၃၉ တွင် ဗာဗုလုန်နိုင်ငံသည် ဘုရင်ကုရု၏အုပ်စိုးမှုအောက်ရှိ မေဒိနှင့်ပေရသိနိုင်ငံကြောင့် အရေးနိမ့်ခဲ့သည်။ နှစ်နှစ်ကြာပြီးနောက် ကုရုသည် ဂျူးလူမျိုးအကြွင်းအကျန်ကို မိမိတို့မွေးရပ်မြေသို့ ပြန်ခွင့်ပြုသောအမိန့်စာ ထုတ်ပြန်ခဲ့သည်။ အချိန်တန်သော် ယေရုရှလင်ဗိမာန်တော်ကို ပြန်တည်ဆောက်ခဲ့ကြပြီး လူတို့အားပညတ်တော်ကိုညွှန်ကြားပေးဖို့ ယဇ်ပုရောဟိတ်အဖွဲ့ကို ပြန်ဖွဲ့စည်းခဲ့သည်။ (မာလခိ ၂:၇) သို့ဖြင့် ယေဟောဝါသည် ပြန်လည်ထူထောင်လာသော အကြွင်းအကျန် တည်ကြည်နေသရွေ့ကာလပတ်လုံး သူတို့ကိုကြီးပွားတိုးတက်စေခဲ့သည်။

၇၊ ၈။ ဇေဖနိ ၃:၁၄-၁၇ မှပရောဖက်ပြုချက်စကားများသည် မည်သူတို့နှင့်သက်ဆိုင်သနည်း၊ သင်အဘယ်ကြောင့်ထိုသို့ဖြေသနည်း။

^၇ အဆိုပါပြန်လည်ထူထောင်ခြင်းအကျိုးကို ခံစားကြရမည့်သူတို့နှင့်စပ်လျဉ်း၍ ဇေဖနိက ဤသို့ကြိုဟောခဲ့သည်– “အိုဇိအုန်သတို့သမီး သီချင်းဆိုလော့။ အိုဣသရေလအမျိုး ကြွေးကြော်လော့။ အိုယေရုရှလင်သတို့သမီး စိတ်နှလုံးအကြွင်းမဲ့ ဝမ်းမြောက်ရွှင်လန်းလော့။ ထာဝရဘုရားသည် သင်၏အပြစ်ဒဏ်တို့ကိုပပျောက်စေ၍ သင်၏ရန်သူတို့ကို ပယ်ရှားတော်မူပြီ။ ဣသရေလအမျိုး၏ရှင်ဘုရင် ထာဝရဘုရားသည် သင့်အလယ်၌ရှိတော်မူ၏။ သင်သည် နောက်တစ်ဖန် ဘေးဥပဒ်နှင့်မတွေ့မကြုံရ။ ‘မစိုးရိမ်နှင့်’ ဟု ယေရုရှလင်မြို့အားလည်းကောင်း၊ ‘လက်အားမလျော့စေနှင့်’ ဟု ဇိအုန်တောင်အားလည်းကောင်း ထိုအခါဆိုရ၏။ ‘သင်၏ဘုရားသခင်ထာဝရဘုရားသည် သင့်အလယ်၌ရှိ၍ တန်ခိုးကြီးသောဘုရားသည် သင့်ကိုကယ်တင်တော်မူလိမ့်မည်။ သင်၌အားရ၍ ဝမ်းမြောက်တော်မူလိမ့်မည်။ ချစ်ခြင်းမေတ္တာ၌ကျိန်းဝပ်၍ သီချင်းဆိုခြင်းနှင့်တကွ သင်၌ဝမ်းမြောက်တော်မူလိမ့်မည်။’”—ဇေဖနိ ၃:၁၄-၁၇။

^၈ ထိုပရောဖက်ပြုချက်စကားများသည် ဗာဗုလုန်သုံ့ပန်းဘဝမှစုသိမ်းခံရပြီး မိမိတို့ဘိုးဘွားပိုင်နိုင်ငံသို့ ပြန်ခေါ်ဆောင်ခံခဲ့ရသော အကြွင်းအကျန်ကိုရည်ညွှန်းနေသည်။ ယင်းကို ဇေဖနိ ၃:၁၈-၂၀ တွင်ရှင်းပြထား၍ ကျွန်ုပ်တို့ဤသို့ဖတ်ရှုရသည်– “‘ကဲ့ရဲ့ခြင်းဝန်ကို သင်ထမ်းရာအကြောင်းတည်းဟူသော သင်နှင့်ဝေး၍ ဓမ္မပွဲကိုမခံရဘဲ ညှိုးငယ်လျက်ရှိသောသူတို့ကို ငါ [ယေဟောဝါ] စုဝေးစေမည်။ သင့်ကိုညှဉ်းဆဲသောသူအပေါင်းတို့ကို ထိုအခါငါစီရင်မည်။ နာသောသူကို ချမ်းသာပေးမည်။ နှင်ထုတ်ခြင်းခံရသောသူကို သင်းဖွဲ့စေမည်။ အရှက်ကွဲခြင်းကိုခံရရာပြည်အရပ်ရပ်တို့၌ ချီးမွမ်းခြင်းဂုဏ်အသရေကိုပေးမည်။ ထိုကာလ၌ သင်တို့ကိုတစ်ဖန်ငါဆောင်ခဲ့၍ စုဝေးစေသဖြင့် သိမ်းသွားခြင်းကိုခံရသောသူတို့ကို သင်တို့မျက်မှောက်၌ တစ်ဖန်ဆောင်ခဲ့ပြန်သောအခါ မြေကြီးသားအမျိုးမျိုးတို့တွင် ချီးမွမ်းခြင်းဂုဏ်အသရေကို သင်တို့အားပေးမည်’ ဟု ထာဝရဘုရားမိန့်တော်မူ၏။”

၉။ ယေဟောဝါသည် ယုဒပြည်နှင့်ပတ်သက်၍ ကိုယ်တော်တိုင်၏နာမတော်ကို မည်သို့ကျော်ကြားစေခဲ့သနည်း။

^၉ ဘုရားသခင့်လူမျိုးတော်၏ရန်သူများဖြစ်ကြသော အနီးတစ်ဝိုက်ရှိနိုင်ငံများ၏ ထိတ်လန့်မှုကို မြင်ယောင်ကြည့်ပါလေ! ယုဒပြည်သူပြည်သားများသည် လွတ်မြောက်မည့်မျှော်လင့်ချက်လုံးလုံးမရှိဘဲ အင်အားကြီးဗာဗုလုန်နိုင်ငံ၏ သုံ့ပန်းအဖြစ် ခေါ်ဆောင်သွားခံခဲ့ရသည်။ ထို့ပြင် သူတို့၏နိုင်ငံသည် လွင်တီးခေါင်ဖြစ်လေသည်။ သို့ရာတွင် အနှစ် ၇၀ ကြာပြီးနောက် ဘုရားသခင့်တန်ခိုးတော်ကြောင့် မိမိတို့နေရင်းပြည်သို့ ပြန်ရောက်ခဲ့ကြရ၍ ရန်သူနိုင်ငံများမှာမူ ပျက်စီးစပြုလေသည်။ ထိုတည်ကြည်သောအကြွင်းအကျန်ကို ယေဟောဝါပြန်ခေါ်ဆောင်ခဲ့ခြင်းဖြင့် ကိုယ်တော်တိုင်၏နာမသည် ကျော်ကြားခဲ့သည်တကား! ကိုယ်တော်သည် သူတို့ကို “မြေကြီးသားအမျိုးမျိုးတို့တွင် ချီးမွမ်းခြင်းဂုဏ်အသရေ” ဖြစ်စေခဲ့သည်။ အဆိုပါပြန်လည်ထူထောင်ခြင်းသည် ယေဟောဝါအားလည်းကောင်း၊ ကိုယ်တော့်နာမတော်ခံယူထားသူတို့ကိုလည်းကောင်း ချီးမွမ်းဂုဏ်တင်စေခဲ့သည်တကား!

ယေဟောဝါ၏ဝတ်ပြုရေး ချီးမြှောက်ခံခဲ့ရ

၁၀၊ ၁၁။ ဇေဖနိ၏ပြန်လည်ထူထောင်ခြင်းဆိုင်ရာ ပရောဖက်ပြုချက်သည် အဘယ်အချိန်၌အဓိကပြည့်စုံဖို့ဖြစ်သနည်း၊ ယင်းကို ကျွန်ုပ်တို့မည်သို့သိရှိရသနည်း။

^၁၀ ခေတ်သက္ကရာဇ်ပထမရာစုတွင် ဣသရေလအကြွင်းအကျန်ကို စစ်မှန်သောဝတ်ပြုရေးသို့ ယေရှုခရစ်စုသိမ်းခဲ့သောအခါ အခြားပြန်လည်ထူထောင်ခြင်းတစ်မျိုး ဖြစ်ပေါ်ခဲ့သည်။ ၎င်းသည် ဖြစ်လတ္တံ့သောအရာ၏အရိပ်ဖြစ်၏၊ အကြောင်းမှာ၊ ပြန်လည်ထူထောင်ခြင်း၏ အဓိကပြည့်စုံချက်သည် အနာဂတ်၌ရှိသေးသည်။ မိက္ခာ၏ပရောဖက်ပြုချက်က ဤသို့ကြိုပြောခဲ့သည်– “နောက်ဆုံးသောကာလ၌ ထာဝရဘုရား၏အိမ်တော်တည်သောတောင်သည် တောင်ကြီးတောင်ငယ်တို့၏ထိပ်ပေါ်မှာ ချီးမြှောက်၍တည်လိမ့်မည်။ ခပ်သိမ်းသောလူစုတို့သည် ထိုတောင်သို့ စည်းဝေးကြလိမ့်မည်။”—မိက္ခာ ၄:၁။

^၁၁ အဘယ်အချိန်၌ ထိုသို့ဖြစ်မည်နည်း။ ပရောဖက်ပြုချက်ပြောသည့်အတိုင်း “နောက်ဆုံးသောကာလ”—ဤ ‘နောက်ဆုံးနေ့ရက်များ’ အတောအတွင်းဖြစ်ပျက်လိမ့်မည်။ (၂ တိမောသေ ၃:၁) ယင်းသည် လက်ရှိအစီအစဉ်စနစ်ဆိုး အဆုံးမတိုင်မီ၊ မှားယွင်းသောဘုရားသခင်များကို တိုင်းနိုင်ငံများဝတ်ပြုကိုးကွယ်နေဆဲအချိန်တွင် ဖြစ်ပျက်ပါလိမ့်မည်။ မိက္ခာ ၄:၅ က ဤသို့ဆိုသည်– “လူမျိုးအပေါင်းတို့သည် ကိုယ်ဆိုင်သောဘုရား [သခင်] ၏နာမကိုခိုလှုံလျက် ကျင့်နေတတ်ကြ၏။” စစ်မှန်သောဝတ်ပြုသူများကော။ မိက္ခာ၏ပရောဖက်ပြုချက်က ဤသို့ဖြေဆိုသည်– “ငါတို့မူကား၊ ကိုယ်ဆိုင်သောဘုရားသခင် ထာဝရဘုရား၏နာမတော်ကို ကာလအစဉ်အမြဲခိုလှုံလျက် ကျင့်နေကြမည်။”

၁၂။ ဤနောက်ဆုံးကာလတွင် စစ်မှန်သောဝတ်ပြုရေးသည် မည်သို့ချီးမြှောက်ခံခဲ့ရပြီနည်း။

^၁၂ ထို့ကြောင့် ဤနောက်ဆုံးကာလတွင် “[ယေဟောဝါ] ၏အိမ်တော်တည်သောတောင်သည် တောင်ကြီးတောင်ငယ်တို့၏ထိပ်ပေါ်မှာ . . . တည် [လေပြီ]။” ယေဟောဝါ၏မြင့်မြတ်သော စစ်မှန်သည့်ဝတ်ပြုရေးသည် ပြန်လည်ထူထောင်ခံခဲ့ရ၍ ခိုင်မြဲစွာတည်ထောင်နေပြီ၊ အခြားဘာသာတရားရှိသမျှအားလုံးထက် ချီးမြှောက်ခံခဲ့ရပြီဖြစ်သည်။ မိက္ခာ၏ပရောဖက်ပြုချက် ကြိုဟောထားသည့်အတိုင်း “ခပ်သိမ်းသောလူစုတို့သည် ထိုတောင်သို့ စည်းဝေးကြလိမ့်မည်။” စစ်မှန်သောဝတ်ပြုရေးကိုလိုက်စားသူတို့သည် “[သူတို့] ၏ဘုရားသခင် [ယေဟောဝါ] ၏နာမတော်ကို ကာလအစဉ်အမြဲခိုလှုံလျက်ကျင့်နေကြမည်။”

၁၃၊ ၁၄။ ဤလောကသည် အဘယ်အချိန်၌ “နောက်ဆုံးသောကာလ” အချိန်ပိုင်းသို့ဝင်ခဲ့သနည်း၊ ထိုအချိန်မှစပြီး စစ်မှန်သောဝတ်ပြုရေးနှင့်ပတ်သက်၍ မည်သို့ဖြစ်ပျက်နေသနည်း။

^၁၃ ၁၉၁၄ ခုနှစ်တွင် ဤလောကသည် “နောက်ဆုံးသောကာလ”—၎င်း၏နောက်ဆုံးနေ့ရက်များ—အချိန်ပိုင်းသို့ဝင်ခဲ့ကြောင်း ကျမ်းစာပရောဖက်ပြုချက်ပြည့်စုံ၍ ဖြစ်ပျက်နေသည့်အဖြစ်အပျက်များက တင်ပြသည်။ (မာကု ၁၃:၄-၁၀) ယေဟောဝါသည် ကောင်းကင်မျှော်လင့်ချက်ရှိသော တည်ကြည်သည့်ကောင်းကင်အတန်းအစားအကြွင်းအကျန်ကို စစ်မှန်သောဝတ်ပြုရေးသို့ စုသိမ်းစပြုကြောင်း သမိုင်းကတင်ပြသည်။ ထို့နောက် မြေကြီးပေါ်ထာဝစဉ်အသက်ရှင်ဖို့ မျှော်လင့်သော “ဘာသာစကားအဖုံဖုံပြောသည့် လူအမျိုးမျိုး၊ အနွယ်နွယ်၊ အစုစုမှ . . . လူအုပ်ကြီး” သည်စုသိမ်းခံရသည်။—ဗျာဒိတ် ၇:၉၊ ကဘ။

^၁၄ ပထမကမ္ဘာစစ်ကတည်းကစ၍ ယနေ့အထိ ယေဟောဝါ၏နာမတော်ကို ခံယူထားသူတို့၏ဝတ်ပြုရေးသည် ကိုယ်တော့်ညွှန်ကြားမှုအောက် အင်တိုက်အားတိုက် ရှေ့သို့ချီတက်ခဲ့ပြီ။ ယေဟောဝါအားဝတ်ပြုကိုးကွယ်သူတို့သည် ပထမကမ္ဘာစစ်ပြီးနောက် ထောင်ပေါင်းအနည်းငယ်သာရှိရာမှ ယခုဆိုလျှင် နိုင်ငံပေါင်း ၂၃၅ နိုင်ငံတွင် အသင်းတော်ပေါင်း ၉၁,၀၀၀ ခန့်၌စုရုံးကာ အရေအတွက်ခြောက်သန်းခန့်ရှိပြီ။ ဘုရားသခင့်နိုင်ငံတော်သတင်း ကြေညာသော ဤသူများသည် နှစ်စဉ်နာရီသန်းတစ်ထောင်ကျော် ဘုရားသခင်အားလူသိရှင်ကြားချီးမွမ်းကြသည်။ ယေဟောဝါသက်သေများသည် ယေရှု၏ဤပရောဖက်ပြုချက်စကားကို ပြည့်စုံစေနေကြကြောင်း ထင်ရှားသည်– “လူမျိုးအပေါင်းတို့အား သက်သေဖြစ်မည်အကြောင်း နိုင်ငံတော်နှင့်ယှဉ်သောဧဝံဂေလိတရားကို လော [က] နိုင်ငံအရပ်ရပ်ရှိသမျှတို့၌ ဟောရလိမ့်မည်။ သို့ပြီးမှ အဆုံးသည်ဖြစ်လတ္တံ့။”—မဿဲ ၂၄:၁၄။

၁၅။ ဇေဖနိ ၂:၃ သည် ယခုမည်သို့ပြည့်စုံနေသနည်း။

^၁၅ ဇေဖနိ ၃:၁၇ ကဤသို့ဖော်ပြသည်– “သင်၏ဘုရားသခင် [ယေဟောဝါ] သည် သင့်အလယ်၌ရှိ၍ တန်ခိုးကြီးသောဘုရားသည် သင့်ကိုကယ်တင်တော်မူလိမ့်မည်။” ဤနောက်ဆုံးကာလတွင် ယေဟောဝါ၏ကျေးကျွန်များခံစားရသော ဝိညာဉ်ရေးရာကြွယ်ဝမှုသည် တန်ခိုးအကြီးဆုံးဘုရားသခင်အဖြစ် ကိုယ်တော်အား ‘သူတို့အလယ်၌’ ရှိစေခြင်း၏ တိုက်ရိုက်အကျိုးဆက်ဖြစ်သည်။ ယင်းသည် ဘီ.စီ.အီး. ၅၃၇ တွင် ရှေးခေတ်ယုဒပြည်ပြန်လည်ထူထောင်ချိန်က အမှန်ဖြစ်ပျက်ခဲ့သကဲ့သို့ ယနေ့လည်းအမှန်ဖြစ်ပျက်နေသည်။ ထို့ကြောင့် ဇေဖနိ ၂:၃၊ [ကဘ] က “မြေကြီးပေါ်ရှိ နူးညံ့သိမ်မွေ့သောသူအပေါင်းတို့ ယေဟောဝါကို ရှာကြလော့” ဟုဆိုရာတွင် ကျွန်ုပ်တို့ခေတ်၌ မည်သို့အဓိကပြည့်စုံကြောင်း တွေ့မြင်နိုင်သည်။ “အပေါင်းတို့” ဟုဆိုရာ၌ ဘီ.စီ.အီး. ၅၃၇ တွင် ဗာဗုလုန်သုံ့ပန်းဘဝမှပြန်လာခဲ့ကြသော ဂျူးအကြွင်းအကျန် ပါဝင်သည်။ ယခုအခါ ကမ္ဘာချီဟောပြောခြင်းလုပ်ငန်းကို တလိုတလားတုံ့ပြန်သူများ၊ “[ယေဟောဝါ] ၏အိမ်တော်တည်သောတောင်” သို့တဖွဲဖွဲဝင်လာကြသော မြေတစ်ပြင်လုံးရှိ နိုင်ငံအားလုံးမှ စိတ်နူးညံ့သူများကို ပုံဆောင်သည်။

စစ်မှန်သောဝတ်ပြုရေးထွန်းကား

၁၆။ မျက်မှောက်ခေတ်ရှိ ယေဟောဝါကျေးကျွန်များ၏ ကြီးပွားမှုကို ကျွန်ုပ်တို့၏ရန်သူများ မည်သို့တုံ့ပြန်ပုံရသနည်း။

^၁၆ ဘီ.စီ.အီး. ၅၃၇ ပြီးနောက် ဘုရားသခင့်ကျေးကျွန်များသည် မိမိတို့မွေးရပ်မြေသို့ပြန်လာကြပြီး စစ်မှန်သောဝတ်ပြုရေး ပြန်လည်ထူထောင်လာခြင်းကို အနီးတစ်ဝိုက်မှနိုင်ငံအတော်များများက အံ့အားသင့်ခဲ့ကြသည်။ သို့တိုင် နှိုင်းယှဉ်ကြည့်လျှင် ၎င်းပြန်လည်ထူထောင်ခြင်းသည် အသေးစားဖြစ်ခဲ့သည်။ မျက်မှောက်ခေတ် ယေဟောဝါ၏ကျေးကျွန်များ အကြီးအကျယ်တိုးပွားများပြားနေပြီး ရှေ့သို့ချီတက်နေခြင်းကို ဘုရားသခင့်လူမျိုးတော်၏ရန်သူများပင်ပါဝင်သော လူအချို့တွေ့မြင်ရသောအခါ သူတို့အဘယ်သို့ပြောဆိုကြမည်ကို သင်မှန်းဆကြည့်နိုင်သလော။ ဤရန်သူအချို့သည် ယေရှုထံသို့လူများစုရုံးလာခြင်းကို မြင်တွေ့ခဲ့ကြသည့် ဖာရိရှဲများနည်းတူ ခံစားရဖွယ်ရှိသည်။ “ဤလောကသည် ထိုသူနောက်သို့ လိုက်သွားပါပြီတကား” ဟုသူတို့ဆိုခဲ့ကြသည်။—ယောဟန် ၁၂:၁၉။

၁၇။ ယေဟောဝါသက်သေများနှင့်ပတ်သက်၍ စာရေးဆရာတစ်ဦးက မည်သို့ဆိုခဲ့သနည်း၊ အဘယ်တိုးပွားမှုကို သူတို့ကြုံတွေ့ခဲ့ရပြီနည်း။

^၁၇ ဤသူတို့လည်းယုံကြည်ကြသည်ဟူသော သူ၏စာအုပ်တွင် ပါမောက္ခ ချားလ်စ် အက်စ်. ဘရက်ဒင်က ဤသို့ဆိုသည်– ‘ယေဟောဝါသက်သေများသည် မြေကြီးအနှံ့အပြား ဟောပြောခဲ့ပြီ။ ဘုရားသခင့်နိုင်ငံတော်သတင်းကောင်းကို ဖြန့်ချိဖို့ကြိုးပမ်းကြရာတွင် ကမ္ဘာပေါ်ရှိ အခြားမည်သည့်ဘာသာရေးအဖွဲ့အစည်းတစ်ခုမျှ ယေဟောဝါသက်သေများထက် ပို၍စိတ်ထက်သန်မှုနှင့် ဇွဲလုံ့လမရှိကြောင်း အမှန်ပင်ဆိုနိုင်သည်။ ၎င်းလှုပ်ရှားမှုသည် ဆက်၍တိုးတက်ကြံ့ခိုင်နိုင်ဖွယ်ရှိသည်။’ သူ့အဆိုမှန်လိုက်လေခြင်း! ထိုစကားများကိုသူရေးသားစဉ် လွန်ခဲ့သောအနှစ် ၅၀ က ကမ္ဘာတစ်ဝန်း၌ ဟောပြောခြင်းလုပ်ငန်းတွင်ပါဝင်နေသူ သက်သေခံ ၃၀၀,၀၀၀ ခန့်သာရှိသည်။ ယနေ့ ထိုအရေအတွက်၏ အဆ ၂၀ ခန့်ဖြစ်သော—ခြောက်သန်းခန့်—သည် သတင်းကောင်းဟောပြောနေခြင်းကို သူမည်သို့ဆိုမည်နည်း။

၁၈။ စင်ကြယ်သောဘာသာစကားကား အဘယ်နည်း၊ မည်သူတို့အား ဘုရားသခင်ပေးတော်မူသနည်း။

^၁၈ ကိုယ်တော်၏ပရောဖက်မှတစ်ဆင့် ဘုရားသခင်က ဤသို့ကတိပြုခဲ့သည်– “ထိုအခါ၊ လူမျိုးအပေါင်းတို့သည် အမှုတော်ကို ပခုံးချင်းယှဉ်၍ ထမ်းဆောင်မည်အကြောင်း၊ ယေဟောဝါ၏နာမတော်ကို [ခေါ်] စေခြင်းငှာ စင်ကြယ်သောဘာသာစကားကို သူတို့အား ငါပေးမည်။” (ဇေဖနိ ၃:၉၊ ကဘ) ဤနောက်ဆုံးကာလတွင် ယေဟောဝါ၏နာမတော်ကိုခေါ်ပြီး မချိုးဖျက်နိုင်သောမေတ္တာနှောင်ကြိုးဖြင့် “ပခုံးချင်းယှဉ်” စည်းလုံးစွာအမှုထမ်းကြသူတို့မှာ ယေဟောဝါသက်သေများဖြစ်၏။ ယေဟောဝါသည် သူတို့ကိုစင်ကြယ်သောဘာသာစကား ပေးအပ်ထားသည်။ ဤစင်ကြယ်သောဘာသာစကားတွင် ဘုရားသခင်နှင့် ကိုယ်တော့်ရည်ရွယ်တော်မူချက်များအကြောင်း အမှန်တရားကို မှန်ကန်စွာနားလည်ခြင်းပါဝင်သည်။ ဤနားလည်မှုကို ယေဟောဝါသာလျှင် ကိုယ်တော်၏သန့်ရှင်းသောဝိညာဉ်တော်အားဖြင့် ပေးသနားတော်မူ၏။ (၁ ကောရိန္သု ၂:၁၀) ကိုယ်တော်၏ဝိညာဉ်တော်ကို မည်သူတို့အား ပေးတော်မူခဲ့သနည်း။ ‘ကိုယ်တော်အား အုပ်စိုးရှင်အဖြစ် နာခံသောသူတို့’ ကိုသာဖြစ်သည်။ (တမန်တော် ၅:၃၂) ယေဟောဝါသက်သေများသာလျှင် အရာရာ၌ ဘုရားသခင်အား အုပ်စိုးရှင်အဖြစ် တလိုတလားနာခံကြသည်။ ထို့ကြောင့် သူတို့သည် ဘုရားသခင့်ဝိညာဉ်တော်ကိုရရှိပြီး စင်ကြယ်သောဘာသာစကား၊ ယေဟောဝါနှင့် ကိုယ်တော်၏အံ့ချီးဖွယ်ရည်ရွယ်တော်မူချက်များနှင့်စပ်ဆိုင်သော အမှန်တရားကို ပြောဆိုကြသည်။ သူတို့သည် ကမ္ဘာတစ်ဝန်း ယေဟောဝါအား အကြီးအကျယ်တိုး၍တိုး၍ချီးမွမ်းဖို့ စင်ကြယ်သောဘာသာစကားကို အသုံးပြုကြသည်။

၁၉။ စင်ကြယ်သောဘာသာစကားကိုပြောဆိုခြင်း၌ အဘယ်အရာပါဝင်သနည်း။

^၁၉ စင်ကြယ်သောဘာသာစကားပြောဆိုခြင်းတွင် အမှန်တရားကိုယုံကြည်၍ အခြားသူများကို သွန်သင်ပေးခြင်းသာမက လူတစ်ဦး၏အမူအကျင့်များကို ဘုရားသခင့်ပညတ်တော်များ၊ မူများတို့နှင့် ကိုက်ညီစေခြင်းလည်းပါဝင်သည်။ ကောင်းကင်အတန်းအစားခရစ်ယာန်များသည် ယေဟောဝါကိုရှာခြင်းနှင့် စင်ကြယ်သောဘာသာစကားကိုပြောဆိုခြင်းတွင် ဦးစီးဦးဆောင်ပြုခဲ့ကြပြီ။ ပြီးမြောက်အောင်မြင်ခဲ့ရာကို စဉ်းစားကြည့်ပါ! ကောင်းကင်အတန်းအစားသည် အရေအတွက်အားဖြင့် ၈,၇၀၀ ခန့်ပင်မပြည့်တော့သော်ငြားလည်း ခြောက်သန်းနီးပါးသောအခြားသူတို့သည် ယေဟောဝါအားရှာခြင်းနှင့် စင်ကြယ်သောဘာသာစကားကိုပြောဆိုခြင်းဖြင့် သူတို့၏ယုံကြည်ခြင်းကို တုပနေကြသည်။ ဤသူတို့သည် ယေရှု၏ရွေးဖိုးပူဇော်သကာကို ယုံကြည်ကြောင်းတင်ပြကြ၍ ဘုရားသခင့်ဝိညာဉ်ရေးဆိုင်ရာဗိမာန်တော်၏ မြေကြီးရင်ပြင်တွင် သန့်ရှင်းမြင့်မြတ်သောလုပ်ငန်းတော်ကို ထမ်းရွက်ကြကာ ဤမဖြောင့်မတ်သောလောကအပေါ် မကြာမီကျရောက်လာမည့် “ကြီးစွာသောဆင်းရဲ” ခြင်းကို ကပ်ကျော်ကြမည့် လူမျိုးအပေါင်းမှ တိုးများလာနေသောလူအုပ်ကြီးဖြစ်သည်။—ဗျာဒိတ် ၇:၉၊ ၁၄၊ ၁၅။

၂၀။ သစ္စာရှိကောင်းကင်အတန်းအစားနှင့် လူအုပ်ကြီးတွင်ပါဝင်သူတို့အတွက် အဘယ်အလားအလာရှိသနည်း။

^၂၀ လူအုပ်ကြီးသည် ဘုရားသခင့်ဖြောင့်မတ်သောကမ္ဘာသစ်ထဲသို့ ပို့ဆောင်ခံရလိမ့်မည်။ (၂ ပေတရု ၃:၁၃) ယေရှုခရစ်နှင့် ကိုယ်တော်နှင့်အတူ ဘုရင်များ၊ ယဇ်ပုရောဟိတ်များအဖြစ် အမှုထမ်းကြရန် ကောင်းကင်အသက်တာသို့ ရှင်ပြန်ထမြောက်ခံရသော ကောင်းကင်အတန်းအစား ၁၄၄,၀၀၀ တို့သည် မြေကြီးအုပ်ချုပ်ရေးအဖွဲ့သစ်ကို ဖွဲ့စည်းကြမည်။ (ရောမ ၈:၁၆၊ ၁၇; ဗျာဒိတ် ၇:၄; ၂၀:၆) ကြီးစွာသောဆင်းရဲခြင်းကို ကပ်ကျော်သူများသည် မြေကြီးကိုပရဒိသုဖြစ်စေကြပြီး ဘုရားသခင်ပေး စင်ကြယ်သောဘာသာစကားကို ဆက်၍ပြောဆိုကြလိမ့်မည်။ မူအရ ဤစကားများသည် သူတို့နှင့်သက်ဆိုင်သည်– “သင်၏သားသမီးအပေါင်းတို့သည် ထာဝရဘုရားဆုံးမသွန်သင်တော်မူသောသူဖြစ်၍ များစွာသောစည်းစိမ်ချမ်းသာနှင့် ပြည့်စုံကြလိမ့်မည်။ သင်သည် ဖြောင့်မတ်ခြင်းတရားအားဖြင့် တည်လိမ့်မည်။”—ဟေရှာယ ၅၄:၁၃၊ ၁၄။

သမိုင်းတွင် အကြီးမားဆုံးသွန်သင်ခြင်းလုပ်ငန်း

၂၁၊ ၂၂။ (က) တမန်တော် ၂၄:၁၅ ကဖော်ပြသည့်အတိုင်း စင်ကြယ်သောဘာသာစကားကို မည်သူတို့သွန်သင်ခံရဖို့လိုအပ်မည်နည်း။ (ခ) ဘုရားသခင့်နိုင်ငံတော်အုပ်ချုပ်မှုအောက်၌ မြေကြီးပေါ်တွင် အဘယ်ပြိုင်ဘက်ကင်းသော သွန်သင်ခြင်းလုပ်ငန်းကို ဆောင်ရွက်ကြမည်နည်း။

^၂၁ ကမ္ဘာသစ်တွင် စင်ကြယ်သောဘာသာစကားကိုသင်ယူဖို့ အခွင့်အရေးပေးအပ်ခံရမည့် အလွန်ကြီးမားသောအုပ်စုတစ်ခုမှာ တမန်တော် ၂၄:၁၅ ၌ပါသည့် ဤသို့ဖော်ပြခံရသူများဖြစ်သည်– “ဖြောင့်မတ်သောသူ၊ မဖြောင့်မတ်သောသူရှိသမျှတို့သည် သေခြင်းမှထမြောက်ကြလိမ့်မည်။” အတိတ်က သန်းပေါင်းများစွာသောသူတို့သည် ယေဟောဝါ၏ တိကျမှန်ကန်သောအသိပညာမရှိဘဲ အသက်ရှင်ပြီး သေဆုံးခဲ့ကြသည်။ ကိုယ်တော်သည် သူတို့ကိုစနစ်တကျ အသက်ပြန်ရှင်စေပါလိမ့်မည်။ ဤရှင်ပြန်ထမြောက်လာသူတို့အား စင်ကြယ်သောဘာသာစကားကို သွန်သင်ပေးဖို့လိုပေမည်။

^၂၂ အဆိုပါသွန်သင်ခြင်းလုပ်ငန်းကြီးတွင် ပါဝင်ရခြင်းသည် အခွင့်ထူးပါသည်တကား! ၎င်းသည် လူ့သမိုင်းတွင် အကြီးမားဆုံးသွန်သင်ခြင်းလုပ်ငန်းဖြစ်ပါလိမ့်မည်။ ယင်းတို့အားလုံးကို ခရစ်တော်ယေရှု၏ ကောင်းမြတ်သောအုပ်ချုပ်မှုအောက်ရှိ ဘုရားသခင့်နိုင်ငံတော်တန်ခိုးဖြင့် ပြီးမြောက်အောင်မြင်ပါလိမ့်မည်။ ရလဒ်အနေနှင့် ဟေရှာယ ၁၁:၉ ၌ပါသော ဤစကားများပြည့်စုံခြင်းကို လူသားများသည် နောက်ဆုံးတွင်တွေ့မြင်ကြရလိမ့်မည်– “ပင်လယ်ရေသည် မိမိနေရာကိုလွှမ်းမိုးသကဲ့သို့၊ မြေကြီးသည် ထာဝရဘုရားကိုသိကျွမ်းခြင်းပညာနှင့်ပြည့်စုံလိမ့်မည်။”

၂၃။ ယေဟောဝါ၏လူမျိုးတော်အနေနှင့် ကျွန်ုပ်တို့သည် ကြီးမားသောအခွင့်ထူးရရှိသည်ဟု သင်အဘယ်ကြောင့်ဆိုမည်နည်း။

^၂၃ မြေကြီးပေါ် ယေဟောဝါအားသိကျွမ်းခြင်းပညာ အမှန်ပြည့်မည့် ထိုအံ့ဖွယ်အချိန်အတွက် ဤနောက်ဆုံးကာလတွင် ပြင်ဆင်နေရခြင်းသည် တကယ်အခွင့်ထူးလိုက်လေခြင်း! ယခုအချိန်မှာပင် ဇေဖနိ ၃:၂၀ ၌မှတ်တမ်းတင်ထားသော ပရောဖက်ပြုချက်စကားများ၏ ကြီးကျယ်ခမ်းနားသည့်ပြည့်စုံမှုကို ကြုံတွေ့နေကြရသော ဘုရားသခင့်လူမျိုးတော်ဖြစ်ရခြင်းသည် အခွင့်ထူးပါသည်တကား! ထိုတွင် ယေဟောဝါ၏ဤအာမခံချက်ကို ကျွန်ုပ်တို့တွေ့ရသည်– “မြေကြီးသားအမျိုးမျိုးတို့တွင် ချီးမွမ်းခြင်းဂုဏ်အသရေကို သင်တို့အားပေးမည်။”

သင်မည်သို့ဖြေဆိုမည်နည်း

• ဇေဖနိ၏ပြန်လည်ထူထောင်ခြင်းဆိုင်ရာ ပရောဖက်ပြုချက်သည် အဘယ်ပြည့်စုံမှုများရှိခဲ့သနည်း။

• ဤနောက်ဆုံးသောကာလတွင် စစ်မှန်သောဝတ်ပြုရေးသည် မည်သို့တိုးတက်ကြီးပွားခဲ့ပြီနည်း။

• ကမ္ဘာသစ်တွင် အဘယ်ကြီးမားသော သွန်သင်ခြင်းလုပ်ငန်းကို ဆောင်ရွက်ကြမည်နည်း။

[စာမျက်နှာ ၂၅ ပါ ရုပ်ပုံ]

ယေဟောဝါ၏လူမျိုးတော်သည် စစ်မှန်သောဝတ်ပြုရေးကို ပြန်လည်ထူထောင်ရန် မိမိတို့မွေးရပ်မြေသို့ပြန်ခဲ့ကြ။ ယခုအချိန်၌ ၎င်း၏အရေးပါမှုကို သင်သိသလော

[စာမျက်နှာ ၂၆ ပါ ရုပ်ပုံ]

ယေဟောဝါသက်သေများသည် “စင်ကြယ်သောဘာသာစကား” ကိုပြောဆိုခြင်းအားဖြင့် ကျမ်းစာ၏နှစ်သိမ့်မှုပေးသောသတင်းကို လူတို့အားကမ်းလှမ်းနေကြ