ဘုရားသခင်၏နာမတော်ကို အသုံးပြုခြင်းသည် မှားသလော
“ဓမ္မဟောင်းကျမ်း” ဟုခေါ်ဆိုလေ့ရှိသော မူရင်းဟေဗြဲကျမ်းစာစောင်များတွင် ဘုရားသခင်၏နာမတော်သည် יהוה (ညာမှဘယ်သို့ဖတ်ပါ) ဟူသောပုံစံဖြင့် အကြိမ်ပေါင်း ၇,၀၀၀ နီးပါး ပါရှိသည်။ တစ်နည်းအားဖြင့် ယဟဝဟဟု အက္ခရာလှယ်ထားသော ယော့ဒ်ဟီဝေါဟီဟူသော ဟေဗြဲစကားလုံးလေးလုံးသည် ဘုရားသခင့်နာမတော်ကို ကိုယ်စားပြုသည်။
ဘုရားသခင့်နာမတော်ကို အသုံးပြုခြင်းသည် မှားသည်ဟု လွန်ခဲ့သောနှစ်ပေါင်းများစွာတွင် ဂျူးတို့ အယူသီးစွာယူဆခဲ့ကြသည်။ ထို့ကြောင့် နာမတော်ကို အသံထွက်မခေါ်တော့ဘဲ သူတို့၏အရေးအသားများတွင်လည်း အခြားအသုံးအနှုန်းများနှင့် အစားထိုးခဲ့ကြသည်။ သို့သော် ကျမ်းစာဘာသာပြန်သူများစွာသည် “ယာဝေး” သို့မဟုတ် “ယေဟောဝါ” ဟူသောအမည်ကို အသုံးပြုခဲ့ကြသည်။ ထိုသို့အသုံးပြုပြန်ဆိုသောကျမ်းတစ်စောင်မှာ ကက်သလစ်ယေရုရှလင်ကျမ်းစာဖြစ်သည်။ ထိုဘာသာပြန်ကျမ်းအရ မိမိကို မည်သူစေလွှတ်သနည်းဟု ဣသရေလလူတို့မေးသောအခါ မည်သို့ပြန်ပြောရမည်နည်းဟု ဘုရားသခင်ကို မောရှေမေးချိန်တွင် ကိုယ်တော် ဤသို့ဖြေဆို၏– “‘သင်တို့ဘိုးဘေးများ၏ ဘုရားသခင်၊ အာဗြဟံ၏ဘုရားသခင်၊ ဣဇာက်၏ဘုရားသခင်၊ ယာကုပ်၏ဘုရားသခင်တည်းဟူသော ယာဝေးသည် ငါ့ကိုသင်တို့ရှိရာသို့ စေလွှတ်တော်မူပြီ’ ဟု ဣသရေလအမျိုးသားတို့အားပြောရမည်။ ထိုအမည်သည် အစဉ်ငါ့အမည်ဖြစ်၏။ လူမျိုးအစဉ်အဆက်မပြတ် ငါ့ဘွဲ့နာမဖြစ်၏။”—ထွက်မြောက်ရာ ၃:၁၅။
ယေရှုသည် ဆုတောင်းစဉ် ဘုရားသခင့်နာမတော်ကိုအသုံးပြုခြင်းနှင့်ပတ်သက်၍ ဤသို့ဆို၏– “ကိုယ်တော်၏နာမကို အကျွန်ုပ်သည် သူတို့အားပြညွှန်ပါပြီဖြစ်၍ အစဉ်ပြညွှန်ပါပြီ။” စံပြဆုတောင်းချက်တွင်လည်း “ကောင်းကင်ဘုံ၌ရှိတော်မူသော အကျွန်ုပ်တို့အဘ၊ ကိုယ်တော်၏နာမတော်အား ရိုသေလေးမြတ်ခြင်းရှိပါစေသော” ဟုယေရှုဆိုခဲ့၏။—ယောဟန် ၁၇:၂၆; မဿဲ ၆:၉။
ဆယ့်ခြောက်ယောက်မြောက် ပုပ်ရဟန်းမင်းဘင်နီဒစ်သည် မကြာသေးမီကရေးခဲ့သည့် နာဇရက်မြို့သားယေရှုဟူသောစာအုပ်တွင် ဘုရားသခင့်နာမတော်အသုံးပြုခြင်းနှင့်ပတ်သက်၍ ဤသို့ဆိုသည်ကိုသိရှိရလျှင် သင် အံ့သြသွားပေမည်– “မိမိကိုယ်တိုင်အတွက် ဘုရားသခင်အသုံးပြုခဲ့သော ယဟဝဟဟု ဖော်ပြထားသော နာမတော်ကို ဣသရေလလူတို့ မခေါ်ဆိုခြင်းမှာ . . . လုံးဝမှန်ကန်သည်၊ သို့ဖြင့် အယူမှားနတ်ဘုရားများ၏အမည်များကဲ့သို့ ဂုဏ်မငယ်စေနိုင်မည်ဖြစ်သည်။ လျှို့ဝှက်ဆန်းကြယ်ရာ၊ နှုတ်ဖြင့်မမြွက်ဆိုအပ်ရာအဖြစ် ဣသရေလလူတို့ယူမှတ်ခဲ့သော ထိုနာမကို မကြာသေးမီက ဘာသာပြန်ကျမ်းစာများတွင် ရှေးဟောင်းအမည်တစ်ခုကဲ့သို့ အသုံးပြုခြင်းမှာ မှားသည်။”
သင် မည်သို့ထင်သနည်း။ ဘုရားသခင့်နာမတော်ကို အသုံးပြုခြင်းသည် မှန်သလော၊ မှားသလော။ “ထိုအမည်သည် အစဉ်ငါ့အမည်ဖြစ်၏။ လူမျိုးအစဉ်အဆက်မပြတ် ငါ့ဘွဲ့နာမဖြစ်၏” ဟု ယေဟောဝါကိုယ်တိုင်မိန့်ဆိုခဲ့သည်ကို တစ်စုံတစ်ဦးက ကန့်ကွက်ပိုင်ခွင့်ရှိနိုင်ပါမည်လော။
[စာမျက်နှာ ၃၀ ပါရုပ်ပုံ]
ယေရှု ဆုတောင်းစဉ် ဘုရားသခင့် နာမတော်ကို အသုံးပြုခဲ့