စာရှုသူများအမေး . . .
လူမျိုးတစ်မျိုးက တခြားလူမျိုးထက် ပိုမြင့်မြတ်တယ်လို့ ဘုရားသခင် ရှုမြင်သလား
▪ မရှုမြင်ပါဘူး။ သမ္မာကျမ်းစာမှာ ဒီလိုရှင်းရှင်းလင်းလင်း ဖော်ပြထားပါတယ်– ‘ဘုရားသခင်သည် မျက်နှာလိုက်တော်မမူ။ လူအမျိုးမျိုးတို့တွင် ဘုရားသခင်ကို ကြောက်ရွံ့၍ ဖြောင့်မတ်ခြင်းတရား ကျင့်သုံးသောသူကို နှစ်သက်လက်ခံတော်မူ၏။’—တမန်တော် ၁၀:၃၄၊ ၃၅။
ဒီကိစ္စမှာ ဘုရားသခင်ရဲ့အမြင်က မစုံလင်တဲ့ လူသားတွေရဲ့ အမြင်ထက် အများကြီး သာလွန်မြင့်မြတ်တယ်။ လူမျိုးတစ်မျိုး (အများအားဖြင့် ကိုယ့်လူမျိုး) က တခြားလူမျိုးထက် ပိုမြင့်မြတ်တယ်လို့ လူအတော်များများက ယူမှတ်ကြတယ်။ အဲဒီလိုဘက်လိုက်မှုမျိုးကို ချားလ်စ် ဒါဝင်ရဲ့ အတွေးအခေါ်မှာ တွေ့ရပါတယ်။ သူက ဒီလိုရေးသားခဲ့တယ်– “အနာဂတ်တစ်ချိန်ချိန်မှာ . . . ယဉ်ကျေးသိမ်မွေ့တဲ့ လူသားမျိုးနွယ်တွေဟာ မျိုးပြုတ်လုမတတ်ဖြစ်သွားပြီး ရိုင်းစိုင်းတဲ့ လူသားမျိုးနွယ်တွေက အစားထိုးဝင်ရောက်လာပါလိမ့်မယ်။” ဝမ်းနည်းစရာကောင်းတာက လူအများစုဟာ ကိုယ့်အမျိုးကပဲ ပိုမြင့်မြတ်တယ်လို့ ယူဆတဲ့သူတွေရဲ့ မတရားဖိနှိပ်မှုကို ခံနေရရှာတယ်။
အခြေခံအကြောင်းရင်း တစ်စုံတစ်ရာကြောင့် လူမျိုးရေး သာလွန်မြင့်မြတ်မှုဆိုတဲ့ ခံစားချက်ဝင်လာတာလား။ ဥပမာ၊ မျိုးရိုးဗီဇအရ တချို့လူမျိုးက သာလွန်မြင့်မြတ်ပြီး တချို့လူမျိုးကျတော့ နိမ့်ကျတယ်ဆိုတဲ့ သိပ္ပံအထောက်အထား ရှိပါသလား။ မျိုးရိုးဗီဇပညာရှင်နဲ့ အောက်စဖို့ဒ်တက္ကသိုလ်ပါမောက္ခ ဘရိုင်ယန် ဆိုက်စ်က ဒီလိုပြောတယ်– “တိကျတဲ့ မျိုးနွယ်စုတစ်မျိုးမျိုးအတွက် ဒါမှမဟုတ် လူမျိုးတစ်မျိုးမျိုးအတွက် မျိုးရိုးဗီဇအခြေခံအကြောင်းရင်း မရှိပါဘူး။ . . . မျိုးရိုးဗီဇကို ကြည့်ပြီး ဂရိလူမျိုး ဒါမှမဟုတ် အီတာလျံလူမျိုး ခွဲခြားလို့ရသလားဆိုပြီး ကျွန်တော် အမြဲ အမေးခံရတယ်။ ခွဲခြားလို့မရဘူးလို့ ဖြေရမှာပဲ။ . . . ကျွန်တော်တို့ဟာ ဆွေမျိုးနီးစပ်တွေပါ။”
အဲဒီတွေ့ရှိချက်တွေက ကျမ်းစာဖော်ပြရာတွေနဲ့ ကိုက်ညီပါတယ်။ လူယောက်ျားတစ်ဦးနဲ့ လူမိန်းမတစ်ဦးကို ဘုရားသခင်ဖန်ဆင်းပြီး သူတို့ကနေတစ်ဆင့် လူသားအားလုံး ဆင်းသက်လာတယ်ဆိုပြီး ကျမ်းစာမှာ ဖော်ပြထားတယ်။ (ကမ္ဘာဦး ၃:၂၀; တမန်တော် ၁၇:၂၆) အဲဒါကြောင့် ဘုရားသခင့်အမြင်မှာ လူမျိုးတစ်မျိုးပဲ ရှိနေတာဖြစ်တယ်။
လူတစ်ယောက်ရဲ့ အသားအရောင် ဒါမှမဟုတ် မျက်နှာပုံပန်းသဏ္ဌာန်က ဘုရားသခင်အတွက် လုံးဝအရေးမကြီးဘူး။ ကိုယ်တော်အတွက် ပိုပြီးအရေးကြီးတာက ကျွန်ုပ်တို့ရဲ့ အတွင်းစိတ်ပဲ။ “လူတို့သည် သူတစ်ပါး၏ ပုံပန်းသဏ္ဌာန်ကိုကြည့်၍ အကဲဖြတ်ကြသည်။ ငါမူကား စိတ်နှလုံးကိုကြည့်၍ အကဲဖြတ်သည်” လို့ဘုရားသခင် မိန့်ဆိုခဲ့ပါတယ်။ (၁ ရာ. ၁၆:၇၊ Contemporary English Version) ဒီအချက်ကို အမှတ်ရမယ်ဆိုရင် ကျွန်ုပ်တို့အတွက် တကယ့်ကို အားပေးမှုဖြစ်စေနိုင်ပါတယ်။ ဘယ်လိုအားဖြင့်လဲ။
လူမျိုးရေးနောက်ခံ ဘယ်လိုပဲရှိနေပါစေ ကျွန်ုပ်တို့အတော်များများဟာ ကိုယ့်ရဲ့ပုံပန်းသဏ္ဌာန်ကို စိတ်အလိုမကျတတ်ဘူး။ ကျွန်ုပ်တို့ဟာ ကိုယ့်ရဲ့ပုံပန်းသဏ္ဌာန်ကို နည်းနည်းပဲ ပြုပြင်နိုင်ကြပေမဲ့ အရေးအကြီးဆုံးဖြစ်တဲ့ ကျွန်ုပ်တို့ရဲ့ အတွေးအခေါ်တွေနဲ့ ခံစားချက်တွေကိုတော့ တိုးတက်အောင် ပြောင်းလဲနိုင်စွမ်း ရှိကြပါတယ်။ (ကောလောသဲ ၃:၉-၁၁) ကိုယ့်ကိုယ်ကိုယ် ရိုးရိုးသားသား ဆန်းစစ်ကြည့်မယ်ဆိုရင် ကိုယ့်လူမျိုးက တခြားလူမျိုးထက် အနည်းဆုံးတော့ ပိုသာတယ် ဒါမှမဟုတ် ပိုနိမ့်ကျတယ်ဆိုပြီး ခံစားတတ်ကြတာကို သတိပြုမိမှာပါ။ ဘယ်ရှုမြင်ချက်ကမှ ဘုရားသခင်ရဲ့တွေးခေါ်ပုံနဲ့ မကိုက်ညီတဲ့အတွက် အဲဒီအတွေးမျိုးကို စိတ်ထဲကနေ ဖယ်ရှားဖို့ ကြိုးစားရမယ်။—ဆာလံ ၁၃၉:၂၃၊ ၂၄။
ကိုယ့်ကိုယ်ကိုယ်နဲ့ တခြားသူတွေကို ဘုရားသခင် ရှုမြင်သလို ရှုမြင်ဖို့ ကြိုးစားမယ်ဆိုရင် ဘုရားသခင်ရဲ့အကူအညီ ရရှိမယ်ဆိုတာ ယုံကြည်စိတ်ချနိုင်တယ်။ ကျမ်းစာက ကျွန်ုပ်တို့ကို ဒီလိုသတိပေးတယ်– ‘ထာဝရဘုရားသခင်သည် အထံတော်၌ စုံလင်သော စိတ်နှလုံးရှိသူတို့ဘက်တွင် တန်ခိုးတော်ပြတော်မူခြင်းငှာ မျက်စိတော်သည် လျင်မြန်၍ မြေကြီးတစ်ပြင်လုံးကို တစ်ပြိုင်နက် နှံ့အောင် ကြည့်ရှုလျက်ရှိ၏။’ (၆ ရာ. ၁၆:၉၊ သမ္မာ) ကျွန်ုပ်တို့ဟာ ဘယ်လူမျိုးပဲဖြစ်နေပါစေ အဲဒီအချက်က မှန်ကန်ပါတယ်။