စာရှုသူများထံမှ မေးခွန်းလွှာ

ခရစ်ယာန်မိဘတွေက အသင်းတော်အစည်းအဝေးတွေမှာ နှင်ထုတ်ခံရတဲ့ကလေးတစ်ယောက်နဲ့အတူထိုင်တာ သင့်တော်သလား။

နှင်ထုတ်ခံရသူတစ်ယောက်က နိုင်ငံတော်ခန်းမထဲမှာ ဘယ်နေရာမှာပဲထိုင်ပါစေ ပြဿနာမရှိပါဘူး။ နှင်ထုတ်ခံရတဲ့ကလေးက မိဘတွေနဲ့ တစ်အိမ်ထဲမှာအတူဆက်နေထိုင်ဖို့ သင့်တော်တယ်ဆိုရင် အဲဒီကလေးကို ယေဟောဝါနဲ့ ဆက်ဆံရေးပြန်ကောင်းလာအောင် ကူညီပေးဖို့ ခရစ်ယာန်မိဘတွေကို ဒီမဂ္ဂဇင်းက အားပေးပါတယ်။ နိုဝင်ဘာ ၁၅၊ ၁၉၈၉၊ ကင်းမျှော်စင်၊ စာမျက်နှာ ၁၉ နဲ့ ၂၀ မှာ တရားဥပဒေအရ အသက်မပြည့်သေးတဲ့ နှင်ထုတ်ခံရသူကလေးဟာ မိဘတွေနဲ့အတူဆက်နေထိုင်တယ်ဆိုရင် မိဘတွေက သူ့ကို ဆက်ပြီး ကျမ်းစာသင်ပေးနိုင်တယ်လို့ ဖော်ပြထားပါတယ်။ ဒါက ကလေးအနေနဲ့ မိမိရဲ့လမ်းစဉ်ကို ပြုပြင်ပြောင်းလဲဖို့ လိုအပ်တဲ့အားပေးမှု ရရှိစေနိုင်တယ်။

နိုင်ငံတော်ခန်းမထဲမှာ နေရာယူတဲ့ကိစ္စနဲ့ ပတ်သက်လာရင် တရားဥပဒေအရ အသက်မပြည့်သေးတဲ့ နှင်ထုတ်ခံရတဲ့ကလေးဟာ မိမိရဲ့မိဘတွေနဲ့အတူ အေးဆေးငြိမ်သက်စွာထိုင်တာက ပြဿနာမရှိပါဘူး။ နှင်ထုတ်ခံရသူဟာ ခန်းမရဲ့နောက်ဆုံးတန်းမှာ ထိုင်ဖို့မလိုပါဘူး၊ ဒါကြောင့် နှင်ထုတ်ခံရတဲ့ကလေးက မိဘတွေထိုင်တဲ့နေရာမှာ အတူထိုင်မယ်ဆိုရင် မကန့်ကွက်သင့်ပါဘူး။ ကလေးနဲ့ ဘုရားသခင်ရဲ့ဆက်ဆံရေးကို ဂရုစိုက်တဲ့မိဘတွေဟာ အစည်းအဝေးတွေကနေ မိမိတို့ကလေး အကျိုးအပြည့်အဝရရှိဖို့ သေချာအောင်လုပ်ပေးချင်မှာ ဖြစ်တယ်။ ဒီကိစ္စမှာ ကလေးကို တခြားနေရာမှာ တစ်ယောက်တည်း ထိုင်ခိုင်းတာထက် မိဘတွေနဲ့အတူထိုင်တာက ပိုပြီးအကူအညီဖြစ်စေနိုင်ပါတယ်။

ဒါပေမဲ့ နှင်ထုတ်ခံရတဲ့ကလေးက မိဘတွေနဲ့အတူ မနေတော့ဘူးဆိုရင်ကော။ အဲဒီလိုဆိုရင် မိဘတွေနဲ့အတူ ထိုင်လို့မရတော့ဘူးလား။ တစ်အိမ်တည်းအတူမနေတဲ့ နှင်ထုတ်ခံရတဲ့ဆွေမျိုးနဲ့ ပေါင်းသင်းဆက်ဆံတာနဲ့ပတ်သက်ပြီး ခရစ်ယာန်တစ်ယောက်ထားရှိရမယ့် သဘောထားကို အရင်ကထုတ်ဝေခဲ့တဲ့ ကင်းမျှော်စင်မှာ ရှင်းရှင်းလင်းလင်း ဖော်ပြခဲ့တယ်။a ဒါပေမဲ့ နှင်ထုတ်ခံထားရသူတစ်ဦး အစည်းအဝေးချိန်မှာ ဆွေမျိုးတွေနဲ့အတူ အေးဆေးငြိမ်သက်စွာထိုင်တာဟာ ဆွေမျိုးတွေက မလိုအပ်ဘဲ သူနဲ့ပေါင်းသင်းမှုလုပ်တာနဲ့ ကွာခြားပါတယ်။ အကယ်၍ သစ္စာရှိတဲ့မိသားစုဝင်တွေဟာ နှင်ထုတ်ခံရတဲ့ဆွေမျိုးအပေါ် မှန်ကန်တဲ့ သဘောထားရှိတယ်၊ နှင်ထုတ်ခံရသူနဲ့ ပေါင်းသင်းခြင်းနဲ့သက်ဆိုင်တဲ့ ကျမ်းစာသွန်သင်ချက်ကို လိုက်နာဖို့ ကြိုးစားနေတယ်ဆိုရင် ဒီကိစ္စကို စိုးရိမ်စရာအကြောင်း မရှိပါဘူး။—၁ ကော. ၅:၁၁၊ ၁၃; ၂ ယော. ၁၁။

နှင်ထုတ်ခံထားရသူတစ်ဦးဟာ ဆွေမျိုးတစ်ယောက်ဘေးမှာ ထိုင်သည်ဖြစ်စေ၊ တခြားညီအစ်ကိုညီအစ်မ တစ်ယောက်ယောက်ဘေးမှာ ထိုင်သည်ဖြစ်စေ ကောင်းကောင်းမွန်မွန်ထိုင်နေသရွေ့ စိုးရိမ်စရာအကြောင်း မရှိပါဘူး။ လူတစ်ယောက် ဘယ်နေရာမှာထိုင်ရမယ်ဆိုတာကို ကန့်သတ်ထားတာက အခြေအနေတွေပေါ်မူတည်ပြီး ပြဿနာအမျိုးမျိုး ပေါ်စေနိုင်တယ်။ သစ္စာရှိဆွေမျိုးတွေအပါအဝင် အားလုံးက နှင်ထုတ်ခံရသူတွေနဲ့ပတ်သက်တဲ့ ကျမ်းစာမူတွေကို လေးစားတယ်၊ ညီအစ်ကိုညီအစ်မတွေအတွက် ထိမိလဲစရာမဖြစ်စေဘူးဆိုရင် အစည်းအဝေးတွေမှာ ထိုင်တဲ့နေရာနဲ့ပတ်သက်ပြီး စိတ်ပူစရာမရှိပါဘူး။b