ဆွေမျိုးတစ်ဦး နှင်ထုတ်ခံရသောအခါ ခရစ်ယာန်သစ္စာစောင့်သိမှုပြပါ

၁။ အဘယ်အခြေအနေသည် ခရစ်ယာန်တစ်ဦး၏ သစ္စာစောင့်သိခြင်းကို စမ်းသပ်မှုဖြစ်စေနိုင်သနည်း။

^၁ မိသားစုနှောင်ကြိုးသည် အလွန်ခိုင်မာနိုင်သည်။ ယင်းက အိမ်ထောင်ဖက်၊ သားသမီး၊ မိဘ သို့မဟုတ် အခြားရင်းနှီးသောဆွေမျိုးတစ်ဦး အသင်းတော်မှ နှင်ထုတ်ခံရသောအခါ သို့မဟုတ် သူ့ကိုယ်သူ ပေါင်းသင်းမှုရပ်စဲသောအခါ ခရစ်ယာန်တစ်ဦးအတွက် စမ်းသပ်မှုဖြစ်စေသည်။ (မ. ၁၀:၃၇) သစ္စာစောင့်သိသောခရစ်ယာန်များသည် ထိုသို့သောဆွေမျိုးတစ်ဦးကို မည်သို့ဆက်ဆံသင့်သနည်း။ ထိုသူသည် သင်နှင့်တစ်အိမ်တည်းတွင်နေထိုင်ပါက ထိုဆက်ဆံပုံကို ပြောင်းလဲသင့်သလော။ ဦးဆုံး၊ ဤကိစ္စနှင့်ပတ်သက်၍ သမ္မာကျမ်းစာပြောဆိုသည့်အရာ၊ နှင်ထုတ်ခံရသူများနှင့်ရော မိမိတို့ကိုယ်ကို ပေါင်းသင်းမှုရပ်စဲသူများနှင့်ပါ သက်ဆိုင်သည့်မူများကို သုံးသပ်ကြည့်ကြစို့။

၂။ သမ္မာကျမ်းစာအရ ခရစ်ယာန်များသည် အသင်းတော်မှနှင်ထုတ်ခံရသူများကို မည်သို့ဆက်ဆံရန်ဖြစ်သနည်း။

^၂ နှင်ထုတ်ခံရသူများအား ဆက်ဆံပုံ– ဘုရားသခင့်နှုတ်ကပါဌ်တော်က အသင်းတော်မှနှင်ထုတ်ထားသူတစ်ဦးနှင့် ပေါင်းသင်းဆက်ဆံမှုမပြုရန် ခရစ်ယာန်များအား ပညတ်ထားသည်– “ညီအစ်ကိုဟုခေါ်ဝေါ်သောသူသည် မတရားသောမေထုန်၌မှီဝဲခြင်း၊ လောဘလွန်ကြူးခြင်း၊ ရုပ်တုကို ကိုးကွယ်ခြင်း၊ ဆဲရေးကဲ့ရဲ့ခြင်း၊ သေရည်သေရက်နှင့်ယစ်မူးခြင်း၊ အနိုင်အထက်လုယူခြင်းမှစ၍ ထိုသို့သောအမှုကိုပြုသောသူနှင့် မပေါင်းဖော်ရသည်သာမက ထိုသူနှင့်အတူ စားသောက်ခြင်းအမှုကိုမျှမပြုရ . . . သို့ဖြစ်၍ ထိုသို့ဆိုးညစ်သောသူကို သင်တို့အထဲမှနှင်ထုတ်ကြလော့။” (၁ ကော. ၅:၁၁၊ ၁၃) မဿဲ ၁၈:၁၇ တွင်မှတ်တမ်းတင်ထားသော ယေရှု၏စကားသည် ဤကိစ္စနှင့်လည်း သက်ဆိုင်သည်– “သာသနာပလူကဲ့သို့လည်းကောင်း၊ အခွန်ခံကဲ့သို့လည်းကောင်း [နှင်ထုတ်ခံရသူ] ကိုမှတ်လော့။” ထိုခေတ်ကဂျူးများသည် တစ်ပါးအမျိုးသားများနှင့် အရောတဝင်ဆက်ဆံခြင်းမရှိခဲ့ကြောင်း၊ သူတို့သည် အခွန်ခံများကို အပယ်ခံများအဖြစ် ရှောင်ကြကြောင်း ယေရှု၏တရားနာသူများ ကောင်းစွာသိထားသည်။ ထိုကြောင့် ယေရှုသည် နှင်ထုတ်ခံရသူများနှင့် မပေါင်းသင်းရန် မိမိ၏နောက်လိုက်များအား သွန်သင်နေခြင်းဖြစ်သည်။—၁၉၈၁၊ စက်တင်ဘာ ၁၅၊ ကင်းမျှော်စင်၊ စာမျက်နှာ ၇-၁၀ ရှု။

၃၊ ၄။ နှင်ထုတ်ခံရသူများ၊ ပေါင်းသင်းမှုရပ်စဲသူများနှင့် မည်သို့သောပေါင်းသင်းခြင်းကို တားမြစ်ထားသနည်း။

^၃ ယင်းက သစ္စာစောင့်သိသောခရစ်ယာန်များသည် အသင်းတော်မှ နှင်ထုတ်ထားသူတစ်ဦးဦးနှင့် ဝိညာဏပေါင်းသင်းမှုမပြုရဟူ၍ ဆိုလိုသည်။ သို့သော် ထိုထက်မက အကျုံးဝင်သည်။ ဘုရားသခင့်နှုတ်ကပါဌ်တော်က ကျွန်ုပ်တို့သည် “ထိုသူနှင့်အတူ စားသောက်ခြင်းအမှုကိုမျှမပြုရ” ဟူ၍ဖော်ပြသည်။ (၁ ကော. ၅:၁၁) ထို့ကြောင့် နှင်ထုတ်ခံရသူတစ်ဦးနှင့် လူမှုရေးပေါင်းသင်းဆက်ဆံခြင်းကိုလည်း ကျွန်ုပ်တို့ရှောင်ကြသည်။ ယင်းကြောင့် ပျော်ပွဲစားထွက်ခြင်း၊ ပါတီ၊ ဘောလုံးကစားခြင်းတွင် သူနှင့်အတူပါဝင်ခြင်း၊ ဈေး သို့မဟုတ် ဇာတ်ရုံသို့အတူသွားခြင်း၊ အိမ်တွင်ဖြစ်စေ၊ စားသောက်ဆိုင်တွင်ဖြစ်စေ သူနှင့်အတူအစာစားရန် ထိုင်ခြင်းတို့ကို ပြု၍မရပေ။

^၄ နှင်ထုတ်ခံရသူတစ်ဦးကို စကားပြောခြင်းနှင့်ပတ်သက်၍ကော။ သမ္မာကျမ်းစာက ဖြစ်နိုင်သည့်အခြေအနေတိုင်းကို ဖော်ပြမထားသော်လည်း ၂ ယောဟန် ၁၀ က ကိစ္စရပ်များနှင့်ပတ်သက်၍ ယေဟောဝါ၏ရှုမြင်ပုံကိုရရှိရန် ကျွန်ုပ်တို့အားကူညီပေးသည်– “ထိုဒေသနာတော် မပါသောသူသည် သင်တို့ထံသို့လာလျှင် သူ့ကို သင့်အိမ်၌လက်မခံနှင့်။ မင်္ဂလာရှိစေသောဟု နှုတ်မဆက်နှင့်။” ယင်းနှင့်ပတ်သက်၍ ၁၉၈၁၊ စက်တင်ဘာ ၁၅၊ ကင်းမျှော်စင်၊ စာမျက်နှာ ၁၆ ကဤသို့ဆိုသည်– “လူတစ်ဦးအား ‘နေကောင်းလား’ ဟူ၍ ရိုးရိုးကလေးနှုတ်ဆက်ခြင်းသည် စကားစမြည်ပြောဖြစ်ရန်၊ မိတ်ဆွေပင် ဖြစ်သွားရန် ပထမဆုံးခြေလှမ်းဖြစ်နိုင်သည်။ နှင်ထုတ်ခံရသူတစ်ဦးနှင့် ထိုပထမခြေလှမ်းကို ကျွန်ုပ်တို့လှမ်းလိုကြမည်လော။”

၅။ လူတစ်ဦးနှင်ထုတ်ခံရသောအခါ အဘယ်အရာများကို သူဆုံးရှုံးသနည်း။

^၅ မှန်ပါသည်၊ အဆိုပါလထုတ် ကင်းမျှော်စင် စာမျက်နှာ ၂၃ ကဖော်ပြသည့်အတိုင်းဖြစ်သည်– “ခရစ်ယာန်တစ်ဦးသည် အပြစ်ကိုအညံ့ခံကာ နှင်ထုတ်ခံလိုက်ရသောအခါ များစွာအဆုံးခံရပါသည်။ ဘုရားသခင်ရှေ့ သူ၏မျက်နှာသာရအနေအထား; . . . ခရစ်ယာန်ဆွေမျိုးများနှင့်ရှိခဲ့သည့် ပေါင်းသင်းဆက်ဆံမှုများစွာအပါအဝင် ညီအစ်ကိုများနှင့် နှစ်လိုဖွယ်ပေါင်းသင်းမှုတို့ဖြစ်သည်။”

၆။ ခရစ်ယာန်တစ်ဦးသည် တစ်အိမ်တည်းတွင်နေထိုင်သော နှင်ထုတ်ခံရသည့်ဆွေမျိုးတစ်ဦးနှင့် ပေါင်းသင်းဆက်ဆံမှုအားလုံးကို ရပ်ဆိုင်းရန်လိုအပ်သလော။ ရှင်းပြပါ။

^၆ တစ်အိမ်တည်းနေသူများတွင်– ယင်းက နှင်ထုတ်ခံရသော မိသားစုဝင်တစ်ဦးနှင့် တစ်အိမ်တည်းတွင်နေထိုင်သော ခရစ်ယာန်များသည် နေ့စဉ်လုပ်ငန်းဆောင်တာများလုပ်ဆောင်စဉ် ထိုသူနှင့် စကားပြောခြင်း၊ အတူစားခြင်းနှင့် ပေါင်းသင်းခြင်းကိုရှောင်ရမည်ဟု ဆိုလိုသလော။ ၁၉၉၁၊ ဧပြီ ၁၅၊ ကင်းမျှော်စင်၊ စာမျက်နှာ ၂၀ ရှိအောက်ခြေမှတ်ချက်တွင် ဤသို့ဖော်ပြသည်– “ခရစ်ယာန်အိမ်ထောင်တစ်ခုတွင် နှင်ထုတ်ခံရသောဆွေမျိုးတစ်ဦးရှိလျှင် ထိုသူသည် နေ့စဉ်အိမ်တွင်းရေးသာမန်ကိစ္စများအဝင် ဖြစ်နေဆဲသာဖြစ်မည်။” ထို့ကြောင့် နှင်ထုတ်ခံရသော မိသားစုဝင်တစ်ဦးသည် အစာစားသည့်အခါ သို့မဟုတ် အခြားအိမ်မှုကိစ္စများ လုပ်ဆောင်သည့်အခါ မည်သည့်အတိုင်းအတာအထိ ပါဝင်ရမည်ကို မိသားစုဝင်များက ဆုံးဖြတ်မည်ဖြစ်သည်။ သို့တိုင် မနှင်ထုတ်မီကနှင့် ဘာမှကွာခြားမှုမရှိဟု သူတို့နှင့်ပေါင်းသင်းနေသောညီအစ်ကိုများက ထင်သွားမည်ကို သူတို့အလိုရှိကြမည်မဟုတ်ပေ။

၇။ မိသားစုဝင်တစ်ဦး နှင်ထုတ်ခံရသောအခါ အိမ်တွင်း၌ ဝိညာဏပေါင်းသင်းမှု မည်သို့အပြောင်းအလဲရှိမည်နည်း။

^၇ သို့သော် ၁၉၈၁၊ စက်တင်ဘာ ၁၅၊ ကင်းမျှော်စင်၊ စာမျက်နှာ ၂၀ ကနှင်ထုတ်ခံရသူ သို့မဟုတ် ပေါင်းသင်းမှုရပ်စဲသူနှင့်ပတ်သက်၍ ဤသို့ထောက်ပြသည်– “ယခင်ကရှိခဲ့သော ဝိညာဉ်ရေးနှောင်ကြိုးတို့သည် လုံးဝပြတ်တောက်သွားပြီဖြစ်သည်။ သွေးသားအရင်းအချာများအပါအဝင် သူ၏ဆွေမျိုးများနှင့်ပတ်သက်၍လည်း ထိုသို့ပင်ဖြစ်သည်။ . . . ယင်းက အိမ်တွင်ရှိခဲ့မည်ဖြစ်သည့် ဝိညာဏပေါင်းသင်းမှုတွင် အပြောင်းအလဲရှိစေပါမည်။ ဥပမာ၊ ခင်ပွန်းသည် နှင်ထုတ်ခံရသည်ဆိုလျှင် မိသားစုသင်အံမှုကျင်းပရာတွင် သို့မဟုတ် ကျမ်းစာဖတ်ရှုခြင်းနှင့် ဆုတောင်းခြင်းကို ဦးဆောင်ရာတွင် သူနှင့်အတူ သူ၏ဇနီးနှင့်သားသမီးများသည် သက်သောင့်သက်သာရှိကြမည်မဟုတ်ပေ။ ထမင်းစားသည့်အခါမျိုးတွင် သူဆုတောင်းလိုလျှင် သူ့အိမ်၌ သူဆုတောင်းပိုင်ခွင့်ရှိသည်။ သို့သော် ကျန်သူတို့သည် မိမိတို့ဘာသာ ဘုရားသခင်ထံ တိတ်တဆိတ်ဆုတောင်းနိုင်သည်။ (သု. ၂၈:၉; ဆာ. ၁၁၉:၁၄၅၊ ၁၄၆) အိမ်၌ရှိသော နှင်ထုတ်ခံရသူတစ်ဦးသည် မိသားစုကျမ်းစာအတူဖတ်သည့်အခါ သို့မဟုတ် ကျမ်းစာလေ့လာသည့်အခါ ပါဝင်လိုလျှင်ကော အသို့နည်း။ သူသည် ဝင်ပြီးသွန်သင်ရန်မကြိုးစား၊ ဘာသာရေးအယူအဆများကို ဝင်ပြောမည်မဟုတ်ဘဲ နားထောင်ရုံ နားထောင်မည်ဆိုလျှင် ကျန်လူတို့က သူ့အား ပါဝင်ခွင့် ပြုကောင်းပြုပါလိမ့်မည်။”

၈။ တစ်အိမ်တည်းတွင်နေထိုင်သော နှင်ထုတ်ခံရသည့် ကလေးငယ်တစ်ဦးနှင့်ပတ်သက်၍ ခရစ်ယာန်မိဘများ၌ အဘယ်တာဝန်ရှိသနည်း။

^၈ အိမ်တွင်နေထိုင်သောကလေးတစ်ဦး နှင်ထုတ်ခံရလျှင် ခရစ်ယာန်မိဘတို့သည် သူ့အား ပြုစုပျိုးထောင်ရန် တာဝန်ရှိဆဲဖြစ်သည်။ ၁၉၈၉၊ နိုဝင်ဘာ ၁၅၊ ကင်းမျှော်စင်၊ စာမျက်နှာ ၂၀ က ဤသို့ဖော်ပြသည်– “သူတို့သည် သူ၏စားဝတ်နေရေးကို ဆက်လက်ကြည့်ရှုသွားမည်ဖြစ်သကဲ့သို့ သူ့အား ဘုရားသခင့်နှုတ်ကပါဌ်တော်နှင့်အညီ ဆက်၍သွန်သင်ဆုံးမရန်လိုသည်။ (သု. ၆:၂၀-၂၂; ၂၉:၁၇) သူသည် နှင်ထုတ်ခံထားရသော်လည်း မေတ္တာရှိသောမိဘတို့သည် သူနှင့် အိမ်တွင်းကျမ်းစာသင်အံမှုပြုရန် စီစဉ်နိုင်သည်။ သူတစ်ဦးတည်းနှင့် သင်အံမှုပြုခြင်းမှ ပြုပြင်ပေးသောအကျိုးကျေးဇူးကို ပို၍သူခံစားရကောင်းရပေမည်။ သို့မဟုတ် မိသားစုသင်အံမှုအစီအစဉ်တွင် သူဆက်၍ပါဝင်နိုင်သည်ဟု သူတို့ဆုံးဖြတ်ကြပေမည်။”—အောက်တိုဘာ ၁၊ ၂၀၀၁၊ ကင်းမျှော်စင်၊ စာမျက်နှာ ၁၆-၁၇ ကိုလည်းရှု။

၉။ ခရစ်ယာန်တစ်ဦးသည် တခြားစီနေသော နှင်ထုတ်ခံရသည့်ဆွေမျိုးတစ်ဦးနှင့် အဘယ်အတိုင်းအတာအထိ အဆက်အသွယ်ပြုသင့်သနည်း။

^၉ တစ်အိမ်တည်းမနေသော ဆွေမျိုးများ– “နှင်ထုတ်ခံရသူ သို့မဟုတ် အပေါင်းအသင်းရပ်စဲသူသည် တခြားစီနေထိုင်သောဆွေမျိုးတစ်ဦးဖြစ်လျှင် အခြေအနေသည်ကွာခြား၏” ဟု ၁၉၈၉၊ ဧပြီ ၁၅၊ ကင်းမျှော်စင်၊ စာမျက်နှာ ၂၀ ကဖော်ပြသည်။ “ထိုဆွေမျိုးနှင့် ဆက်သွယ်မှုမရှိသလောက်ဖြစ်နိုင်ပေမည်။ အဆက်အသွယ်ပြုဖို့လိုသည့် မိသားစုကိစ္စအချို့ရှိလျှင်ပင် အတတ်နိုင်ဆုံး အနည်းအကျဉ်းသာပြုမည်ဖြစ်သည်။” သို့မှသာ နောင်တမယူဘဲ အပြစ်ပြုနေ “သူနှင့် မပေါင်းဖော်ရ” ဟူသော ဘုရားသခင့်ပညတ်တော်နှင့် ညီညွတ်မည်ဖြစ်သည်။ (၁ ကော. ၅:၁၁) သစ္စာစောင့်သိသောခရစ်ယာန်များသည် ထိုသို့သောဆွေမျိုးတစ်ဦးနှင့် မလိုအပ်ဘဲ ပေါင်းသင်းဆက်ဆံခြင်းကိုရှောင်ရန် ကြိုးစားသင့်ကာ ဆောင်ရွက်ဆဲ လုပ်ငန်းဆက်ဆံမှုများကိုပင် နည်းနိုင်သမျှနည်းစေဖို့ဖြစ်သည်။—၁၉၈၁၊ စက်တင်ဘာ ၁၅၊ ကင်းမျှော်စင်၊ စာမျက်နှာ ၂၁-၂၂ ကိုလည်းရှု။

၁၀၊ ၁၁။ ခရစ်ယာန်တစ်ဦးသည် နှင်ထုတ်ခံရသောဆွေမျိုးတစ်ဦးကို အိမ်သို့ ပြောင်းလာခွင့်မပြုမီ သုံးသပ်ရမည့်အရာများကား အဘယ်နည်း။

^၁၀ ထို ကင်းမျှော်စင် က ပေါ်ပေါက်နိုင်သည့် နောက်အခြေအနေတစ်ခုကို အာရုံစိုက်စေသည်– “တခြားစီနေသော သား သို့မဟုတ် မိဘတစ်ဦးကဲ့သို့ ရင်းနှီးသောဆွေမျိုးတစ်ဦးသည် နှင်ထုတ်ခံရကာ နောက်ပိုင်းတွင် အိမ်သို့ပြန်လာလိုလျှင်ကော အသို့နည်း။ မိသားစုသည် အခြေအနေပေါ်မူတည်ပြီး ဘာလုပ်ရမည်ကို ဆုံးဖြတ်နိုင်သည်။ ဥပမာ၊ နှင်ထုတ်ခံရသောမိဘတစ်ဦးသည် ဖျားနာနေမည်၊ ငွေရေးကြေးရေး သို့မဟုတ် ကာယရေးအရ သူ့ကိုသူ မကြည့်ရှုနိုင်တော့ဘဲ ရှိကောင်းရှိမည်။ ခရစ်ယာန်သားသမီးတို့သည် ကူညီရမည့် ကျမ်းပေးတာဝန်နှင့် လူမှုရေးတာဝန်ရှိသည်။ (၁ တိ. ၅:၈) . . . မိဘ၏အမှန်တကယ်လိုအပ်မှု၊ သူ၏စိတ်နေသဘောထား၊ အိမ်ထောင်၏ဝိညာဏကောင်းကျိုးအတွက် အိမ်ထောင်ဦးစီး၌ရှိသည့် အလေးထားမှုပေါ်မူတည်၍ လုပ်ဆောင်နိုင်သည်။”—၁၉၈၁၊ စက်တင်ဘာ ၁၅၊ ကင်းမျှော်စင်၊ စာမျက်နှာ ၂၀။

^၁၁ သားသမီးတစ်ဦးနှင့်ပတ်သက်၍ ထိုဆောင်းပါးက ဤသို့ဆက်ဖော်ပြသည်– “တစ်ခါတစ်ရံ ခရစ်ယာန်မိဘတို့သည် ကာယရေး သို့မဟုတ် စိတ်လှုပ်ရှားမှုပိုင်းတွင် နာမကျန်းဖြစ်လာသော နှင်ထုတ်ခံထားရသည့် သားသမီးတစ်ဦးကို အိမ်တွင် ခေတ္တပြန်လက်ခံရသည့်အခါများရှိပါသည်။ သို့သော် မိဘတို့သည် ကိစ္စတစ်ခုစီတွင် အခြေအနေတစ်ခုချင်းကို ချိန်ဆနိုင်သည်။ နှင်ထုတ်ခံရသောသားသည် သူ့ဘာသာသူနေထိုင်ပြီး ယခု ထိုသို့နေနိုင်စွမ်းမရှိတော့၍လော။ သို့မဟုတ် သူသည် သက်သောင့်သက်သာနေရမည်ဖြစ်သောကြောင့်သာ အိမ်သို့ပြန်ပြောင်းလာလိုခြင်းလော။ သူ၏စာရိတ္တနှင့် စိတ်နေသဘောထားကော မည်သို့နည်း။ သူသည် အိမ်ထဲသို့ ‘တဆေး’ များယူလာမည်လော။—ဂလ. ၅:၉။”

၁၂။ နှင်ထုတ်ခြင်းအစီအစဉ်၏ အကျိုးကျေးဇူးအချို့ကား အဘယ်နည်း။

^၁၂ ယေဟောဝါကိုသစ္စာစောင့်သိခြင်း၏ အကျိုးကျေးဇူးများ– နောင်တမယူသည့် အမှားပြုသူများကို နှင်ထုတ်၍ရှောင်ရန်ဟူသော ကျမ်းစာအစီအစဉ်နှင့်ပူးပေါင်းလုပ်ဆောင်ခြင်းသည် အကျိုးရှိသည်။ ယင်းသည် အသင်းတော်၏သန့်ရှင်းမှုကို ကာကွယ်ကာ သမ္မာကျမ်းစာ၏ မြင့်မားသောစာရိတ္တစံနှုန်းများကို ထောက်ခံသူများအဖြစ် ကျွန်ုပ်တို့ကို ခြားနားစေသည်။ (၁ ပေ. ၁:၁၄-၁၆) ယင်းသည် ဖောက်ပြန်ယိုယွင်းသောသြဇာများမှ ကျွန်ုပ်တို့ကိုကာကွယ်ပေးသည်။ (ဂလ. ၅:၇-၉) ယင်းသည် မှားယွင်းသူအား သူရရှိသည့်ဆုံးမပဲ့ပြင်မှုမှ အကျိုးကျေးဇူး အပြည့်အဝခံစားခွင့်ရစေသည်။ ယင်းက “ငြိမ်သက်ခြင်းနှင့်စပ်ဆိုင်သော ဖြောင့်မတ်ခြင်းအကျိုး” ရရှိရန်လည်း သူ့အား ကူညီပေးနိုင်သည်။—ဟေဗြဲ ၁၂:၁၁။

၁၃။ မိသားစုတစ်စုသည် အဘယ်ပြုပြင်ပြောင်းလဲမှုများပြုခဲ့ပြီး အဘယ်ရလဒ်ရရှိခဲ့သနည်း။

^၁၃ တိုက်နယ်စည်းဝေးပွဲတစ်ခုတွင် ဟောပြောချက်တစ်ခုကို ကြားရပြီးနောက် ညီအစ်ကိုတစ်ဦးနှင့် သူ၏ညီမတို့သည် နှင်ထုတ်ခံရသည်မှာ ခြောက်နှစ်ရှိပြီဖြစ်သည့် အခြားတစ်နေရာတွင်နေသော သူတို့၏မိခင်အပေါ် ပြုမူဆက်ဆံပုံကို ပြုပြင်ပြောင်းလဲရန်လိုအပ်ကြောင်း သဘောပေါက်ခဲ့ကြသည်။ စည်းဝေးပွဲပြီးပြီးချင်း ထိုသူသည် သူ၏မိခင်ကိုခေါ်ကာ မိမိတို့သည် အမေကိုချစ်နေလျက်ပင်ရှိကြောင်း စိတ်ချစေပြီးနောက် ဆက်သွယ်ဖို့လိုအပ်သည့် မိသားစုကိစ္စများမရှိလျှင် သူ့အား စကားမပြောနိုင်တော့ကြောင်း ရှင်းပြသည်။ များမကြာမီ သူ၏မိခင်သည် အစည်းအဝေးများပြန်တက်ကာ နောက်ဆုံးတွင် အသင်းတော်ထဲပြန်ဝင်လာသည်။ ထို့အပြင် သူ၏မယုံကြည်သူခင်ပွန်းသည် ကျမ်းစာစလေ့လာကာ အချိန်တန်သော် နှစ်ခြင်းခံခဲ့သည်။

၁၄။ ကျွန်ုပ်တို့သည် နှင်ထုတ်ခြင်းအစီအစဉ်ကို အဘယ်ကြောင့် သစ္စာရှိရှိထောက်ခံသင့်သနည်း။

^၁၄ ကျမ်းစာတွင်ဖော်ပြထားသည့် နှင်ထုတ်ခြင်းအစီအစဉ်ကို သစ္စာရှိရှိထောက်ခံခြင်းသည် ယေဟောဝါကို ကျွန်ုပ်တို့ချစ်မြတ်နိုးကြောင်းဖော်ပြကာ ကိုယ်တော်ကိုကဲ့ရဲ့သူအား ချေပရာရောက်သည်။ (သု. ၂၇:၁၁) တစ်ဖန် ယေဟောဝါ၏ကောင်းချီးခံစားရမည်ဟု ကျွန်ုပ်တို့စိတ်ချနိုင်သည်။ ဘုရင်ဒါဝိဒ်သည် ယေဟောဝါနှင့်စပ်လျဉ်း၍ ဤသို့ရေးသားခဲ့သည်– “ငါသည် ကိုယ်တော်၏ အထုံးအဖွဲ့တော်တို့မှမလွှဲ။ ကိုယ်တော်သည် သစ္စာစောင့်သိသူကို သစ္စာစောင့်သိစွာစီရင်မည်။”—၂ ရာ. ၂၂:၂၃၊ ၂၆၊ ကဘ။