ကျမ်းစာမေးခွန်းတွေရဲ့အဖြေ
သမ္မာကျမ်းစာက ဘုရားသခင့် စကားတွေကို ရေးထားတဲ့စာအုပ်လား
ဘုရားသခင့် စကားတွေက ထူးခြားမယ်လို့ သင် မထင်ဘူးလား။ ဘုရားသခင့်စကားတွေကို မှတ်တမ်းတင်ထားတဲ့ သမ္မာကျမ်းစာက တကယ်ပဲ ထူးခြားပါတယ်။ သမ္မာကျမ်းစာကို ထောင်နဲ့ချီတဲ့ ဘာသာစကားတွေနဲ့ ဘာသာပြန်ထားပြီး ဘီလီယံနဲ့ချီ ပုံနှိပ်ထုတ်ဝေခဲ့ပါတယ်။ သမ္မာကျမ်းစာရဲ့ လမ်းညွှန်ချက်တွေက လူတွေရဲ့ ဘဝပုံစံကို ပြောင်းလဲပေးနိုင်စွမ်း ရှိပါတယ်။—၁ သက်သာလောနိတ် ၂:၁၃; ၂ တိမောသေ ၃:၁၆ တို့ကိုဖတ်ပါ။
ဘယ်လူသားကမှ အနာဂတ်အကြောင်း ကြိုတင်မပြောပြနိုင်ပေမဲ့ သမ္မာကျမ်းစာမှာတော့ အနာဂတ်အကြောင်း တိတိကျကျ ကြိုတင်ဖော်ပြထားတဲ့အတွက် သမ္မာကျမ်းစာဟာ ဘုရားသခင်ဆီက လာတဲ့စာအုပ်လို့ ပြောနိုင်ပါတယ်။ ဥပမာ၊ ဟေရှာယကျမ်းကို သုံးသပ်ကြည့်ပါ။ ယေရှုမမွေးခင် နှစ်တစ်ရာကျော်က ရေးကူးခဲ့တဲ့ ကျမ်းမိတ္တူတစ်စောင်ကို ပင်လယ်သေနားက ဂူတစ်ခုမှာ တွေ့ ရှိခဲ့တယ်။ ဗာဗုလုန်မြို့ဟာ လူသူမနေတဲ့အရပ် ဖြစ်လိမ့်မယ်လို့ အဲဒီကျမ်းမှာ ကြိုဟောထားတယ်။ အဲဒီကြိုဟောချက်ဟာ ယေရှုသေဆုံးပြီးနောက် နှစ်ပေါင်းတော်တော်ကြာတဲ့အခါမှ ပြည့်စုံခဲ့တယ်။—ဟေရှာယ ၁၃:၁၉၊ ၂၀; ၂ ပေတရု ၁:၂၀၊ ၂၁ တို့ကိုဖတ်ပါ။
သမ္မာကျမ်းစာကို ဘယ်လို ရေးသားခဲ့သလဲ
သမ္မာကျမ်းစာကို နှစ်ပေါင်း ၁,၆၀၀ ကျော်အတွင်း လူပေါင်း ၄၀ လောက်က ရေးသားခဲ့တယ်။ ဒါပေမဲ့ အကြောင်းအရာကတော့ တစ်ခုတည်းဖြစ်ပြီး တစ်ကျမ်းနဲ့တစ်ကျမ်းလည်း ဆန့်ကျင်မှု မရှိဘူး။ ဘာကြောင့်လဲ။ ကျမ်းရေးသားတဲ့အခါမှာ ဘုရားသခင် လမ်းညွှန်ပေးခဲ့လို့ပါပဲ။—၂ ဓမ္မရာဇဝင် ၂၃:၂ ကိုဖတ်ပါ။
ဘုရားသခင်က ကျမ်းရေးသူတွေ ဘာရေးရမလဲဆိုတာ သိနိုင်ဖို့ တစ်ခါတလေ ကောင်းကင်တမန်တွေ၊ အမြင်အာရုံတွေ၊ အိပ်မက်တွေကို အသုံးပြုပြီး ဖော်ပြပေးတယ်။ အများအားဖြင့်တော့ ကျမ်းရေးသူရဲ့စိတ်ထဲ အကြောင်းအရာကို ထည့်ပေးလိုက်တယ်။ ကျမ်းရေးသူဟာ ဘုရားသခင်ဆီကရရှိတဲ့ သတင်းစကားကို ကိုယ်ပိုင်စကားလုံးတွေနဲ့ ရေးသားဖော်ပြခွင့်ရခဲ့တယ်။—ဗျာဒိတ် ၁:၁; ၂၁:၃–၅ ကိုဖတ်ပါ။