ကျမ်းစာမေးခွန်းတွေရဲ့ အဖြေ

ဘာသာတရားအားလုံးကို ဘုရားလက်ခံသလား

ဘာသာတရားကို အမည်ခံပြီး မကောင်းတာတွေ လုပ်နေကြတဲ့အကြောင်း ကမ္ဘာ့သတင်းတွေမှာ ကြားရတတ်တယ်။ ဒါကြောင့် ဘာသာအားလုံးကို ဘုရားလက်မခံဘူးဆိုတာ သိနိုင်တယ်။ (မဿဲ ၇:၁၅) အမှန်အတိုင်းပြောရရင် လူအများစုက မှားယွင်းတဲ့ ဘာသာတရားတွေနဲ့ လှည့်စားခံနေရတယ်။—၁ ယောဟန် ၅:၁၉ ကိုဖတ်ပါ။

ဒါပေမဲ့ ဘုရားသခင်က ကောင်းမြတ်ရာနဲ့ မှန်ကန်ရာကို နှစ်သက်မြတ်နိုးတဲ့ စိတ်ရင်းကောင်းသူတွေကို သတိပြုမိပါတယ်။ (ယောဟန် ၄:၂၃) အဲဒီလိုလူတွေကို ကိုယ်တော်ရဲ့ တရားစကားကို မှတ်တမ်းတင်ထားတဲ့ကျမ်းထဲက အမှန်တရားတွေ သင်ယူဖို့ ဖိတ်ခေါ်နေပါတယ်။—၁ တိမောသေ ၂:၃–၅ ကိုဖတ်ပါ။

ဘုရားလက်ခံတဲ့ ဘာသာတရားကို ဘယ်လို ခွဲခြားသိနိုင်မလဲ

ယေဟောဝါဘုရားက ဘာသာရေးနောက်ခံအမျိုးမျိုးက လူတွေကို အမှန်တရားနဲ့ အချင်းချင်းမေတ္တာပြဖို့ သင်ပေးပြီး စုစည်းနေပါတယ်။ (မိက္ခာ ၄:၂၊ ၃) ဒါကြောင့် တစ်ယောက်နဲ့တစ်ယောက် မေတ္တာပြပုံကို ကြည့်ပြီး ဘုရားလက်ခံတဲ့ ဘာသာကို ခွဲခြားသိမြင်နိုင်ပါတယ်။—ယောဟန် ၁၃:၃၅ ကိုဖတ်ပါ။

စစ်မှန်တဲ့ဝတ်ပြုသူတွေဟာ သူတို့ရဲ့ ယုံကြည်ချက်နဲ့ အသက်ရှင်နေထိုင်ပုံကို ဘုရားရဲ့လမ်းညွှန်ချက်တွေအပေါ် အခြေခံထားပါတယ်။ ဘုရားရဲ့လမ်းညွှန်ချက်တွေကို ကျမ်းစာမှာ တွေ့နိုင်တယ်။ (၂ တိမောသေ ၃:၁၆) သူတို့ဟာ ဘုရားသခင်ရဲ့ နာမည်ကိုလည်း ဂုဏ်တင်ကြပါတယ်။ (ယေရမိ ၃၃:၂) ဘုရားသခင့်နိုင်ငံတော်ကသာ လူသားတွေရဲ့ တစ်ခုတည်းသော မျှော်လင့်ချက်ဖြစ်တယ်လို့ သူတို့ ယုံကြည်ပြီး အဲဒီနိုင်ငံကိုပဲ ထောက်ခံကြတယ်။ (ဒံယေလ ၂:၄၄၊ ၄၅) စစ်မှန်တဲ့ဝတ်ပြုသူတွေဟာ ‘အလင်းကို ထွန်းလင်း’ တဲ့အနေနဲ့ လူသားချင်းတွေကို ကောင်းမှုပြုပြီး ယေရှုကို တုပနေကြတယ်။ (မဿဲ ၅:၁၆) ဒါကြောင့် ဘုရားသခင့်နိုင်ငံတော်က လုပ်ဆောင်ပေးမယ့် အရာတွေကို တစ်အိမ်တက်ဆင်းသွားပြီး ပြောပြနေကြပါတယ်။ ဒီအချက်တွေကိုကြည့်ပြီးတော့လည်း ဘုရားလက်ခံတဲ့ဘာသာတရားကို ခွဲခြားသိနိုင်ပါတယ်။—မဿဲ ၂၄:၁၄; တမန်တော် ၅:၄၂; ၂၀:၂၀ တို့ကိုဖတ်ပါ။