သင့်သားသမီးများကို သွေးအလွဲသုံးခြင်းမှ ကာကွယ်ပေးခြင်း

^၁ “ဖွားမြင်သောသားသမီးတို့သည် [ယေဟောဝါ] ဆုချ၍ပေးသနားတော်မူသော အမွေဥစ္စာဖြစ်ကြ၏။” (ဆာ၊ ၁၂၇:၃) ယေဟောဝါထံတော်မှ ဤမျှတန်ဖိုးရှိအမွေ ရထားမည်ဆိုလျှင် မိဘများအနေနှင့် ပျော်ရွှင်စရာကောင်းသော်လည်း တစ်ကြိမ်တည်း လေ့ကျင့်သွန်သင်၊ ပြုစုပျိုးထောင်ကာကွယ်ပေးရန် ကြီးလေးသောတာဝန်ရရှိထားပါသည်။ ဥပမာ၊ သားငယ်သမီးငယ်များကို သွေးသွင်းခြင်းကိစ္စမှ ကာကွယ်ပေးထားရန် အတတ်နိုင်ဆုံးစီစဉ်ထားပါသလော။ သွေးသွင်းခံရတော့မည်ဆိုလျှင် သင့်ကလေးများ မည်သို့တုံ့ပြန်ကြမည်နည်း။ အရေးပေါ်ကိစ္စတွင် သွေးမသွင်းမဖြစ်ဟုဆိုသည့်အခါ ထိရောက်စွာမည်သို့ပြုလုပ်ကြမည့်အကြောင်းကို မိသားစုလိုက် ဆွေးနွေးထားပြီးပြီလော။

^၂ ဤသို့သောအခြေအနေများအတွက် မိသားစုအသင့်ရှိစေရန် ပြင်ဆင်ခြင်းသည် စိုးရိမ်စရာ၊ စိတ်အနှောင့်အယှက်ဖြစ်စရာအကြောင်းမဟုတ်ပါ။ ဘဝအခြေအနေကို ကြိုတင်မသိနိုင်၍ ပြင်ဆင်မထားနိုင်သော်လည်း မိဘများအနေနှင့် သွေးသွင်းခြင်းမှ သားသမီးတို့ကိုကာကွယ်ပေးနိုင်ရန် ကြိုတင်ပြုလုပ်ပေးနိုင်သည့်ကိစ္စ များစွာရှိပါသည်။ ဤတာဝန်များကိုပျက်ကွက်မည်ဆိုလျှင် ဆေးကုခံရသည့်အခါ သင့်ကလေးကို သွေးသွင်းမိကြမည်။ မည်သို့ပြုလုပ်နိုင်ကြသနည်း။

^၃ ခံယူချက်ခိုင်မာရန် အရေးကြီး။ သွေးနှင့်ပတ်သက်သည့် ဘုရားသခင့်ပညတ်နှင့်စပ်လျဉ်း၍ အသင်ကိုယ်တိုင်၏ ခံယူချက်များ မည်မျှခိုင်မာသနည်း။ ရိုးသားမှု၊ စာရိတ္တကောင်းမှု၊ ကြားနေမှုနှင့် ဘဝကဏ္ဍအသီးသီးဆိုင်ရာ ဘုရားသခင့်ပညတ်ချက်များကို သွန်သင်ပေးသကဲ့သို့ ဤကိစ္စတွင်လည်း ယေဟောဝါစကားနားထောင်ရန် သွန်သင်ပေးပါသလော။ တရားဟောရာ ၁၂:၂၃ တွင် “အသွေးကိုမစားမည်အကြောင်း သတိပြုလော့” ဟုဘုရားသခင့်ပညတ်က မိန့်မှာထားသည်အတိုင်း သဘောထားပါသလော။ အငယ် ၂၅ ကဤသို့ထပ်ဆိုသည်။ “သင်သည် ယေဟောဝါနှစ်သက်တော်မူဖွယ်သောအမှုကိုပြုသဖြင့် ကိုယ်တိုင်မှစ၍ သားမြေးတို့သည် ချမ်းသာစွာနေရမည်အကြောင်း အသွေးကိုရှောင်ရမည်။” ဖျားနာသောသင့်ကလေးကို ‘သွေးသည် သက်သာစေမည်’ ဟုဆရာဝန်ကပြောမည်။ သို့သော် အရေးအကြောင်းမပေါ်မီ သင့်အတွက်လည်းကောင်း၊ သားသမီးများအတွက်လည်းကောင်း သွေးကိုငြင်းဆန်ရန် စိတ်ဆုံးဖြတ်ထားပြီးသားဖြစ်ရမည်။ ဘုရားသခင့်ပညတ်ကိုချိုးဖောက်၍ အသက်ကို အနည်းငယ်တိုးရှည်စေခြင်းထက် ယေဟောဝါနှင့်သင်၏ဆက်ဆံရေးကို ပိုတန်ဖိုးထားသင့်သည်။ ယခုဘုရားသခင့်မျက်နှာသာတွေ့ခြင်းနှင့် အနာဂတ်တွင် ထာဝရအသက်ရရေး တို့ပါဝင်ပတ်သက်နေပါသည်။

^၄ မှန်သည်။ ယေဟောဝါသက်သေများသည် အသက်ကိုတန်ဖိုးထားကြသည်။ သူတို့မသေလိုကြပါ။ ယေဟောဝါကိုချီးမွမ်းထောမနာပြုကာ အလိုတော်ကိုဆောင်ရွက်နိုင်ဖို့ အသက်ရှင်လိုကြသည်။ ထိုကြောင့်ဆေးရုံသို့သွားပြီး ကလေးများကိုပါဆေးကုခံခြင်းဖြစ်သည်။ ဆရာဝန်များ၏ကုသမှုကိုခံရာတွင် သွေးလိုသည်ဟုဆိုသည့်အခါ သွေးအစား အခြားကုသ နည်းကိုစီစဉ်ပေးရန် တောင်းဆိုကြပါသည်။ သွေးအစားအသုံးပြုစရာ များစွာရှိပါသည်။ အတွေ့အကြုံများသောဆရာဝန်တို့ ယင်းကိုအသုံးပြုနေကြပါသည်။ ဤအစားထိုးအစီအစဉ်သည် အရမ်းကုသနည်းမဟုတ်ဘဲ ဆေးဘက်ဆိုင်ရာစာပေများတွင် မှတ်တမ်းတင်ထားသည့် ဆေးကုနည်းများဖြစ်ပါသည်။ သွေးမသုံးဘဲ ကောင်းစွာကုသပေးခြင်းဖြင့် ကျွန်ုပ်တို့နှင့်ဝိုင်းဝန်းကူညီနေသောဆရာဝန်များ ကမ္ဘာတစ်လွှားရှိသည်။ သို့ဖြစ်သော်လည်း သွေးမသုံးဘဲ သက်သေခံကလေးများကိုကုသပေးမည့် ဆရာဝန်များရှာတွေ့ရန် အခက်အခဲကြုံတွေ့တတ်သည်။

^၅ လိုက်လျောကူညီပေးလိုသောဆရာဝန်ကို ရှာယူခြင်း။ လူနာကိုဆေးကုပေးရာတွင် ဆရာဝန်များထည့်စဉ်းစားရသည့်အရာ များစွာရှိပါသည်။ သွေးမပါဘဲ သင့်ကလေးကိုကုသပေးရန် တောင်းဆိုသည့်အခါ သူ့အတွက် စိန်ခေါ်ချက်တိုးများလာစေသည်။ အချို့ဆရာဝန်များက စာရွက်စာတမ်းကိုဖြည့်စွက်လက်မှတ်ထိုးမည်ဆိုလျှင် သွေးနှင့်ပတ်သက်သည့်လူကြီးတစ်ဦးဖြစ်သော လူနာ၏အလိုကို လိုက်လျောရန်အသင့်ရှိကြမည်။ စိတ်ထားရင့်ကျက်သောကလေးများ ဆေးကုသမှုနှင့်ပတ်သက်၍ ကိုယ်ပိုင်ဆုံးဖြတ်ချက် ချပိုင်ခွင့်ရှိသည်ဟု တရားရုံးက အသိအမှတ်ပြုထားသောကြောင့် စိတ်ထားရင့်ကျက်သည့် ကလေးများဖြစ်သည်ဟု တင်ပြနိုင်သော အသက်အရွယ်မရောက်သေးသူတို့ကို ကုသပေးရန် ဆရာဝန်အချို့သဘောတူညီမည်။ (ရင့်ကျက်သောလူငယ်ဟု သတ်မှတ်ခံရရန် ဘာပါဝင်ကြောင်းသိဖို့ ကင်းမျှော်စင် ဇွန် ၁၅၊ ၁၉၉၁၊ စာမျက်နှာ ၁၈-၂၀ ကိုရှု။) သို့ရာတွင် အထူးသဖြင့်နို့စို့သူငယ်များဖြစ်သည့် ကလေးများကို သွေးသွင်းခွင့်ရမှ ကုသပေးမည်ဟု ဆရာဝန်အချို့ဆိုပေလိမ့်မည်။ အများအားဖြင့်ဆိုလျှင် ကလေးကိုကုသပေးသည့်အခါ သွေးကိုလုံးဝမသုံးပါဟု အာမခံသည့်ဆရာဝန် အလွန်နည်းပါသည်။ ဆေးဘက်နှင့်ဥပဒေဘက်ဆိုင်ရာအကြောင်းပြချက်များကြောင့် ဤသို့အာမ,မခံနိုင်ဟု ဆရာဝန်အများဆိုသည်။ မည်သို့ဆိုစေ သွေးနှင့်ပတ်သက်၍ ယေဟောဝါသက်သေများ၏ဆန္ဒကိုလိုက်လျောပြီး သူတို့ကလေးများကို ကုသပေးလိုသည့်ဆရာဝန်အရေအတွက် တိုးများလာပါပြီ။

^၆ ယင်းကြောင့် သင့်ကလေးအတွက် သင့်တော်သောဆရာဝန် ရှာဖွေရာတွင် ယေဟောဝါသက်သေများကိုလိုက်လျောပြီး သွေးအသုံးမပြုဘဲ ခွဲစိတ်ကုသပေးခဲ့သော်လည်း သွေးအသုံးမပြုပါဟု အာမခံရန် တရားဥပဒေခွင့်ပြုချက်မရှိဟု ယူမှတ်သောဆရာကို တွေ့ထားသည်ဆိုလျှင်ကော။ တစ်ကြိမ်တည်းတွင် ပြဿနာပေါ်စရာအကြောင်းမရှိပါဟု သူကနှစ်သိမ့်ပေးမည်ဆိုလျှင်ကော။ ဤမည်ကား ရွေးချယ်စရာအကောင်းဆုံးဖြစ်သည်ဟု သင်ဆုံးဖြတ်ကောင်းဆုံးဖြတ်မည်။ ဤကဲ့သို့သောအခြေအနေမျိုးတွင် ဆက်ကုသပေးခွင့်ပြုနိုင်မည်ထင်မည်။ သို့ရာတွင် သင့်ကလေးငယ်ကို ကုသပေးရန်ခွင့်ပြုခြင်းက သွေးသွင်းခွင့်ပေးခြင်းမဟုတ်ကြောင်း ရှင်းလင်းပြတ်သားစေပါ။ ဤလမ်းစဉ်လိုက်ခြင်းက သင့်အားလိုက်လျောသည်ဟု ယူမှတ်စရာအကြောင်းမရှိစေဘဲ သွေးအသွင်းမခံပါဟု ဆုံးဖြတ်ခြင်းသည် သင့်တာဝန်ဖြစ်သည်ကို သိနားလည်စေပါ။

^၇ သွေးပြဿနာလျော့နည်းစေမည့်၊ သို့မဟုတ် မပေါ်စေမည့်ကုသနည်းကို ရွေးချယ်နိုင်စရာအကြောင်းရှိမည်ဆိုလျှင် စိုးရိမ်စရာမရှိသောလမ်းစဉ်ကို အသင်လိုက်မည်ကားအမှန်။ သွေးမသွင်းပါဟု သဘောတူညီမည့်ဆရာဝန်ကို အတတ်နိုင်ဆုံးရှာယူပါလိမ့်မည်။ အကောင်းဆုံးကား ပြဿနာများကို ကြိုမြင်ထားရန်ဖြစ်သည်။ သဘောထားကြီးပြီး ကူညီလိုစိတ်ရှိသောဆရာဝန်ကို အတတ်နိုင်ဆုံး ကြိုတင်ရှာဖွေထားပါ။ ဖြစ်နိုင်မည်ဆိုလျှင် မိမိအလိုကိုမလိုက်လျောလိုသည့် ဆရာဝန်များနှင့်ဆေးရုံများကို ရှောင်ပါ။

^၈ အချို့နိုင်ငံများတွင် ဆေးကုခ မည်သူပေးမည်အပေါ်မူတည်၍ သွေးသွင်းခြင်းပြဿနာကို ဖြေရှင်းနိုင်ပါသည်။ မိဘများမှာ ကျန်းမာရေးအာမခံချက် သို့မဟုတ် အခြားအာမခံတစ်ခုခုရှိမည်ဆိုလျှင် လူနာများစိတ်ကို မလိုက်လျောလိုသည့်ဆရာဝန်များ၊ ဆေးရုံဝန်ထမ်းများလက်ထဲ သားသမီးများကိုမရောက်စေရန် အကူအညီရမည်။ ကုသခငွေ ကောင်းကောင်းပေးနိုင်မည်ဆိုလျှင် ဆရာဝန်များနှင့်ဆေးရုံများ ကောင်းစွာဂရုစိုက်ပေးတတ်သည်။ ဆေးရုံ သို့မဟုတ် ဆရာဝန်က ကလေးရွှေ့ပြောင်းပေးခြင်းကို လက်ခံရန် မိဘများငွေရှိမရှိပေါ်မူတည်သည်။ ကိုယ်ဝန်ဆောင်မိခင်များ၊ ကိုယ်ဝန်ရှိစဉ် မိမိကျန်းမာရေးကိုဂရုစိုက်ရန် အထူးအရေးကြီးသည်။ ဤသို့ပြုလျှင် ရက်မစေ့မီသားဖွားခြင်းနှင့် အခြားပြဿနာများ ဖြစ်စရာမလိုပါ။ အကြောင်းမှာ ရက်မစေ့မီမွေးသောကလေးများနှင့် သူတို့တွေ့တတ်သောပြဿနာများအတွက် အများအားဖြင့် သွေးသွင်းတတ်သည်။

^၉ ယေဟောဝါသက်သေများသည် နောက်ဆုံးအရေးကြုံမှ သွေးကိစ္စကိုတင်ပြတတ်သည်ဟု ဆရာဝန်အချို့ တစ်ခါတစ်ရံညည်းညူကြသည်။ ဤသို့မဖြစ်သင့်ပါ။ ဆေးရုံသို့သွားရသည်၊ ဆရာဝန်နှင့်ဆေးကုသရသည်ဆိုလျှင် သွေးနှင့်ပတ်သက်၍ သက်သေခံမိဘများသည် မိမိတို့၏စိတ်ထားကို ဦးဆုံးတင်ပြထားသင့်သည်။ ခွဲစိတ်ကုသရန်လိုလျှင် မေ့ဆေးပေးဆရာဝန်နှင့် စောစောစီးစီးတွေ့ဆုံခွင့်တောင်းဆိုပါ။ ခွဲစိတ်ပေးမည့်ဆရာဝန် စီစဉ်ပေးပေမည်။ ဆေးရုံတင်စာရွက်စာတမ်းများကို အသေအချာစစ်ဆေးသင့်သည်။ ကန့်ကွက်စရာရှိလျှင် ပယ်ဖျက်ခွင့်သင့်မှာရှိသည်။ မရှင်းမလင်းမဖြစ်စေရန် ဆေးရုံတင်စာရွက်စာတမ်းပေါ်တွင် ဘာသာရေးနှင့်ဆေးဘက်ဆိုင်ရာအကြောင်းများကြောင့် အဘယ်နည်းဖြင့်မျှ သွေးကိုမသွင်းလိုကြောင်း၊ ခွင့်လည်းမပြုကြောင်း ပြတ်ပြတ်သားသားရေးထားပါ။

^၁၀ ယေဟောဝါအဖွဲ့အစည်းမှ အကူအညီ။ သင့်သားသမီးများကို သွေးပြဿနာမှကာကွယ်ပေးရန် ယေဟောဝါအဖွဲ့အစည်းက အဘယ်အစီအစဉ်များ ပြုလုပ်ထားပြီနည်း။ များစွာရှိသည်။ သွေးအကြောင်း၊ သွေးအစားအသုံးပြုသည့် အစီအစဉ်များအကြောင်းသိရှိစေရန် အသင်းမသည် စာပေများစွာကိုထုတ်ပေးထားခဲ့ပြီ။ ယင်းအကြောင်းနှင့်ပတ်သက်၍ How Can Blood Save Your Life? ဘရိုရှာအပြင် အခြားစာပေများကိုလည်း ဖတ်ရှုခဲ့ပြီးပြီ။ အသင်းတော်ရှိ သင့်ညီအစ်ကိုညီအစ်မများလည်း သင့်ကိုကူညီပေးရန် အသင့်ရှိကြပါသည်။ အရေးအကြောင်းပေါ်လျှင် ၂၄ နာရီလုံးလုံး ဆေးရုံတွင် စောင့်ကြပ်ပေးမည့်သူရှိရန် အကြီးအကဲများ စီစဉ်ပေးနိုင်ပါလိမ့်မည်။ ဖြစ်နိုင်လျှင် လူနာ၏မိဘ၊ သို့မဟုတ် နီးစပ်သောဆွေမျိုးတစ်ဦးနှင့်အတူ အကြီးအကဲစောင့်ပေးလျှင် ကောင်းသည်။ အများအားဖြင့်ဆိုလျှင် ဆွေမျိုးမိတ်သဟာများ ပြန်သွားပြီးနောက် ညအချိန်တွင် သွေးသွင်းပေးတတ်ကြသည်။

^၁၁ ဆေးရုံမတင်မီ ဆရာဝန်များ၊ ခွဲစိတ်ပေးမည့်ဆရာများ အစရှိသူတို့နှင့် အကျိုးအကြောင်းများ စုံစုံလင်လင်ပြောပြထားပါ။ လိုအပ်မည်ဆိုလျှင် အရည်အချင်းရှိသောညီအစ်ကိုတစ်ဦးကို ခေါ်သွားပါ။ သွေးပြဿနာပေါ်မှ ပြောပြရန် မစောင့်နေပါနှင့်။ အစကနဦးကတည်းက သွေးနှင့်ပတ်သက်သည့် သင့်သဘောကို ကြိုတင်အသိပေးထားပါ။ လိုအပ်နေ၍ ဖြစ်နိုင်မည်ဆိုလျှင် ပြဿနာကိုဖြေရှင်းပေးရန် အကြီးအကဲများကို ခေါ်ထားပါ။

^၁၂ တရားရုံး ပတ်သက်လာခြင်းကို ကြိုမြင်ထား၍ ကိုင်တွယ်ခြင်း။ အကယ်၍ ဆရာဝန်၊ သို့မဟုတ် ဆေးရုံက သင့်ကလေးကိုသွေးသွင်းပေးရန် တရားရုံးအမိန့်တောင်းဆိုမည်ဆိုလျှင်ကော။ ဤအချိန်တွင် ဆက်လုပ်ကိုင်နိုင်စရာ ဘာမျှမရှိတော့ဟုထင်မှတ်ကာ လက်မြှောက်ရမည်လော။ မဟုတ်ပါ။ သွေးသွင်းခြင်းကို ရှောင်ကြဉ်နိုင်ပါသေးသည်။ ဤအရေးအကြောင်းအတွက် ကြိုတင်စီစဉ်ထားနိုင်ပါသည်။ မည်သို့ပြုလုပ်နိုင်သနည်း။

^၁၃ ဤကိစ္စများနှင့်စပ်လျဉ်းသည့် ဥပဒေအချို့ကို ကြိုတင်သိထားခြင်းသည် ခုခံကာကွယ်နိုင်ရန် အထောက်အကူများစွာပေးသည်။ သိရှိထားသင့်သည့်အကြောင်းတစ်ခုကား မိမိသားသမီးများအတွက် ဆေးကုသမှုကို လက်ခံခြင်း၊ သို့မဟုတ်ငြင်းဆန်ခြင်းအခွင့်ကို မိဘများတွင် အပြည့်အဝမရှိခြင်းဖြစ်သည်။ လူကြီးများအနေနှင့် ကုသနည်းကို မိမိစိတ်တိုင်းကျ လက်ခံယူခြင်း၊ ငြင်းပယ်ခြင်းအခွင့်ရှိသော်လည်း မိဘများအနေနှင့် သူတို့ကလေးအတွက် ဘာသာရေးခံယူချက်များ အကြောင်းပြလျှင်ပင် ကုသမှုကိုငြင်းဆိုခွင့်မရချေ။

^၁၄ ဤအခြေခံမူကို ၁၉၄၄ ယူအက်စ်တရားရုံးချုပ်၏ဆုံးဖြတ်ချက်တွင် ဤအတိုင်းဖော်ပြသည်။ “မိဘများ မိမိအသက်ကိုစတေးလိုလျှင် စတေးနိုင်သည်။ သို့သော် သူတို့သားသမီးများသည် ကိုယ်တိုင်ရွေးချယ်ဆုံးဖြတ်ခွင့်ပြုနိုင်သည့် အရွယ်မရောက်မချင်း မိဘများအနေနှင့် သားသမီးများကို စတေးခွင့်မရှိပါ။” ကလေးငယ်တို့၏ကျန်းမာရေးနှင့်လူမှုဖူလှုံရေးအတွက် ဤအခြေခံမူကို ကလေးလူမှုဖူလှုံရေးဥပဒေများတွင် ပါရှိသည်။ ဤဥပဒေများသည် ကလေးကိုမတော်မလျော်ပြုခြင်းမှလည်းကောင်း၊ ဆေးဝါးကုသမှု မပေးခြင်းမှလည်းကောင်း ကာကွယ်ပေးရန် ရည်ရွယ်ချက်ဖြင့် ရေးဆွဲထားခြင်းဖြစ်သည်။

^၁၅ မိဘများ၏မတော်မလျော်ပြုမှု၊ လျစ်လျူရှုမှုမှ ကလေးများကိုကာကွယ်ပေးခြင်းကို ခရစ်ယာန်မိဘများ မကန့်ကွက်ပါ။ သို့သော် ကလေးများကိုဥပေက္ခာပြုခြင်းဥပဒေများ၊ အထက်ပါတရားရုံးချုပ်၏ အဆိုကို ယေဟောဝါသက်သေများ၏သားသမီးများနှင့်ပတ်သက်၍ လွဲမှားစွာအရေးယူ အသုံးပြုတတ်ကြပါသည်။ အဘယ်ကြောင့်နည်း။ သက်သေခံမိဘများအနေနှင့် သူတို့သားသမီးများကို “အသက်စတေးရန်” စိတ်ဆန္ဒလုံးဝမရှိကြပါ။ ထိုသို့သာဆိုလျှင် အစကနဦးကပင် ဆေးရုံသို့ကလေးများကို အဘယ်ကြောင့်သွားပြကြမည်နည်း။ ယင်းအစား သက်သေခံမိဘများသည် သားသမီးများအတွက် ဆေးကုသမှုကို တလိုတလားပြုပေးပါသည်။ သားသမီးများကိုချစ်ကြ၍ ကျန်းကျန်းမာမာရှိစေလိုကြသည်။ သို့သော် သားသမီးများအတွက် အကောင်းဆုံးဆေးဝါးကုသမှုကိုရှာပေးရန် မိမိတို့၌ ဘုရားပေးတာဝန်ရှိသည်ဟု သူတို့ယူမှတ်ကြပါသည်။ ကလေးများ၏ကျန်းမာရေးပြဿနာများကို သွေးအသုံးမပြုဘဲ ဖြေရှင်းပေးလိုကြသည်။ သွေးမပါဘဲကုသပေးခြင်းသည် သွေးသွင်းကုသခြင်းထက် ကောင်းသည်၊ ပြဿနာကင်းရှင်းစေသည်သာမက ထိုထက်အရေးကြီးသည်ကား၊ သူတို့သားသမီးများအား အသက်ပေးပိုင်ရှင်၊ ယေဟောဝါဘုရားသခင်၏ မျက်နှာသာနှင့်တွေ့စေသည်။

^၁၆ သွေးမပါဘဲဆေးကုသခြင်းအစီအစဉ်၏အကျိုးကို မြင်လျက်ပင် ဆရာဝန်များနှင့်ကလေး လူမှုဖူလှုံရေးအရာရှိများသည် အချို့အခြေအနေများတွင် သွေးသွင်းကုသနည်းကို သာမန်နည်းအဖြစ်ယူမှတ်ကာ အသက်ပင်ကယ်ဆယ်နိုင်သည်ဟု ဆိုကြသည်။ သို့ဖြစ်၍ သက်သေခံမိဘများက သွေးသွင်းခြင်းကိုကန့်ကွက်သည့်အခါ ပြဿနာတက်လာကြသည်။ ယေဘုယျအားဖြင့်ဆိုလျှင် မိဘများသဘောတူညီချက်မပါဘဲ ဆရာဝန်များအနေနှင့် ကလေးများကို ကုသခွင့်မရှိပါ။ ထိုကြောင့်သွေးသွင်းကုသရန် မိဘများသဘောမတူသည့်အခါ ဆရာဝန်များ၊ အခြားဆေးရုံဝန်ထမ်းများက တရားရုံးအမိန့်ကို တရားသူကြီးတစ်ဦးထံမှရရှိရန် ကြိုးစားကြသည်။ ဆေးဝါးကုသမှုကို လျစ်လျူရှုထားသည်ဟု စွပ်စွဲချက်ဖြင့် ကလေးကိုကာကွယ်ပေးရန် ကလေးလူမှုဖူလှုံရေးအရာရှိ၊ ဆရာဝန်များ၊ ဆေးရုံအာဏာပိုင်များထံမှတစ်ဆင့် ဤကဲ့သို့သော တရားရုံး၏အမိန့်စာကို ရရှိနိုင်ကြသည်။a

^၁၇ များသောအားဖြင့် မိဘများကိုပင်အကြောင်းမကြားဘဲ သွေးသွင်းခြင်းကိုခွင့်ပြုသည့် တရားရုံးမှ အမိန့်စာများကို လွယ်ကူစွာထုတ်ပေးကြသည်။ အရေးတကြီးဆေးကုသပေးရန်အကြောင်းပေါ်နေ၍ မိဘများကို အကြောင်းမကြားဘဲ ဤသို့အလျင်အမြန်ပြုလုပ်လိုက်ရကြောင်း ဆရာဝန်၊ ဆေးရုံအုပ်ချုပ်သူများနှင့် ကလေးလူမှုဖူလှုံရေးအရာရှိတို့ ဆင်ခြေပေးလေ့ရှိသည်။ သို့ရာတွင် စစ်ဆေးမေးမြန်းလိုက်သည့်အခါ တကယ့်အရေးအကြောင်းမရှိမီ နောင်တွင်သွေးသွင်းပေးရန် လိုအပ်လာလျှင် “အဆင်သင့်” ရှိနေရန် တရားရုံးအမိန့်ယူထားခြင်းဖြစ်သည်ဟု ဖြေဆိုကြသည်။ သင့်ကလေး၏အုပ်ထိန်းသူများအနေနှင့် သင့်ကလေးများအတွက် ဆရာဝန်များ၊ ဆေးရုံအုပ်ချုပ်သူများ ကလေးလူမှုဖူလှုံရေးအရာရှိများ ဘာပြုလုပ်ပေးနေသည်ကို အမြဲသိရှိခွင့်ရှိသည်။ တရားရုံးအမိန့်စာကို ကြိုးစားယူနေကြကြောင်း သင်သိရှိသင့်၍ တရားရုံးရှေ့ မိမိရှုထောင့်ကိုတင်ပြခွင့်ပေးသင့်ကြောင်း ဥပဒေအရ တင်ပြနိုင်ပါသည်။

^၁၈ ဤဥပဒေများရှိသည့်တွက် မိမိနှင့်သဘောလိုက်လျောမည့်ဆရာဝန်တစ်ဦး သိရှိထားခြင်း၏တန်ဖိုးကို အထင်မသေးပါနှင့်။ သူနှင့်အတူ တွဲလုပ်ဆောင်ကာ သင့်ကလေး၏ရောဂါကို သွေးအသုံးမပြုဘဲ ကုသပေးရန်အစီအစဉ်ကိုပြုလုပ်ပေးရန် ကူညီပေးပါ။ သို့မဟုတ် ထိုသို့သောကုသမှုကိုပေးမည့် ဆရာဝန် သို့မဟုတ် ဆေးရုံသို့ ကလေးကိုပြောင်းရွှေ့လိုက်ပါ။ ဆရာဝန်၊ ဆေးရုံအုပ်သို့မဟုတ် ကလေးလူမှုဖူလှုံရေးလုပ်သားတစ်ဦးတစ်ယောက်သည် တရားရုံးအမိန့်ကိုရယူရန် ကြိုးစားနေကြောင်းသိမည်ဆိုလျှင် ထိုသို့ပြုလုပ်ရန် စီစဉ်နေသလောဟု မေးမြန်းသင့်သည်။ ယင်းကိုတစ်ခါတစ်ရံ တယ်လီဖုန်းဖြင့် လျှို့ဝှက်ပြုလုပ်ကြသည်။ တရားရုံးတင်ဖို့ကြံစည်နေကြမည်ဆိုလျှင် တရားသူကြီးရှေ့ မိမိ၏ရှုထောင့်ကိုတင်ပြနိုင်ရန် အကြောင်းကြားသင့်သည်ဟု သဘောပေါက်စေပါ။ (သု၊ ၁၈:၁၇) အချိန်ရမည်ဆိုလျှင် ရှေ့နေတစ်ဦးအကူအညီလိုက တောင်းဆိုနိုင်သည်။ တစ်ခါတစ်ရံ ရှေ့နေများကို တရားရုံးက သတ်မှတ်ပေးသည်။ သင့်မှာ ကိုယ်တိုင်ရွေးချယ်ထားသည့် သို့မဟုတ် တရားရုံးခန့်အပ်ပေးသည့်ရှေ့နေရှိမည်ဆိုလျှင် သက်ဆိုင်ရာအခြေအနေများအောက် အကောင်းဆုံးချေပနည်းကား အဘယ်နည်းဖြစ်သည်ကို သူသိရှိနိုင်ရန် အသင်းမ၏ တရားရေးဌာနထံမှ အကျိုးအကြောင်းများတောင်းဆိုနိုင်ပါသည်။

^၁၉ သွေးသွင်းမခံသည့်အတွက် တရားရုံးတင်ခံရလျှင် သင့်ကလေး၏အသက် သို့မဟုတ် ကျန်းမာရေးကိုထိန်းသိမ်းပေးရန် သွေးသည်အလွန်အရေးကြီးကြောင်း ပြောဆိုချက်တို့သည် အလွန်မှန်ကန်ပုံရှိမည်။ တရားသူကြီးသည် ဆေးဝါးပညာကို ကျွမ်းကျင်သူမဖြစ်သည့်အတွက် ဆရာဝန်၏ဆေးဘက်ဆိုင်ရာအထူးကျွမ်းကျင်မှုကြောင့် သဘောတူဝန်ခံတတ်သည်။ အထူးသဖြင့် မိဘများအား ပြောဆိုတင်ပြခွင့်မပြု၊ ဆရာဝန်အားသာ သွေး၏ “အရေးတကြီး” လိုအပ်မှုကိုတင်ပြခွင့်ပြုသည့်အခါ ထိုသို့ဖြစ်တတ်သည်။ ဤသို့သော တစ်ဖက်သတ်ဆန်သည့်တရားစွဲဆိုမှုတို့သည် အမှန်တရားကို မပေါ်လွင်စေပါ။ အမှန်မှာ သွေးလိုသည့်အချိန် နှင့် အဘယ်ကြောင့်လိုအပ်သည်ဟု ဆရာဝန်များ၏ထင်မြင်ချက်သည် စိတ်အထင်သာဖြစ်၍ မသေချာသောကိစ္စဖြစ်သည်။ အများအားဖြင့်ဆိုလျှင် ကလေးအသက်ကိုကယ်ရန် သွေးမသွင်းမဖြစ်ဟုဆိုစဉ်ပင် ထပ်တူရောဂါအခြေအနေကို သွေးမသွင်းဘဲ ကိုင်တွယ်ကုသပေးခဲ့သည့် အတွေ့အကြုံရှိ အခြားဆရာဝန်တစ်ဦးကမူ ရောဂါကုသနည်းတွင် သွေးမလိုပါဟု ဆိုပေမည်။

^၂၀ သင့်ကလေး၏ “အသက်ကယ်ဆယ်ပေးသော” သွေးသွင်းခြင်းကို သင်အဘယ်ကြောင့်ငြင်းပယ်နေရသနည်းဟု ရှေ့နေ သို့မဟုတ် တရားသူကြီးတစ်ဦး မေးမြန်းမည်ဆိုလျှင် သင်ဘာလုပ်မည်နည်း။ သင့်ကလေးသေသည့်တိုင် ဘုရားသခင်သည် ပြန်ရှင်စေမည်ဟု အခိုင်အမာယုံကြည်ထားသည့် ရှင်ပြန်ထမြောက်ခြင်းခံယူချက်ကို ရှင်းပြလိုစိတ် ချက်ချင်းပေါ်လာ၍ ထိုသို့ဖြေဆိုပါက သင်သည် ဘာသာရေးရူးနေသူဖြစ်၍ သင့်ကလေးကို သူကာကွယ်ပေးရန်လိုပြီဟု တရားသူကြီးအားဆုံးဖြတ်စေပါလိမ့်မည်။ အကြောင်းမှာ ကလေး၏ကာယကျန်းမာမှုကိုသာ သူအဓိကထားစိုးရိမ်နေသည်။

^၂၁ တရားရုံးသိသင့်သည်ကား ဘာသာရေးကိုင်းရှိုင်းမှုကြောင့် သွေးကိုသင်ငြင်းဆန်နေခြင်းဖြစ်သော်လည်း သင်သည် ဆေးဝါးကုသမှု မခံယူလိုသူမဟုတ်ကြောင်းဖြစ်သည်။ သင်သည် တာဝန်မကျေပွန်၊ မတော်သင့်သောမိဘတစ်ဦးမဟုတ်ဘဲ ကလေးရောဂါပျောက်ကင်းစေလိုသည့် သားသမီးကိုချစ်သောမိဘတစ်ဦးဖြစ်သည်ကို တရားသူကြီးသိရှိရန်လိုသည်။ သွေးသွင်းခြင်းအကျိုးများသည် ယင်း၏သေစေတတ်သောအန္တရာယ်နှင့် အခြားဖြစ်တတ်သည့်ဘေးများထက် ကြီးမားသည်ကို သင်သဘောမတူသောကြောင့်ဖြစ်သည်၊ အထူးသဖြင့် အန္တရာယ်များမပေးသည့် အခြားဆေးဝါးကုသနည်းများရှိသည့်အခါတွင်ဖြစ်သည်။

^၂၂ အခြေအနေအရ တရားသူကြီးအားသင်သိစေနိုင်သည်မှာ သွေးလိုသည်ဟု ဆရာဝန်တစ်ဦး၏ထင်မြင်ချက်သာဖြစ်၍ ဆရာဝန်များလည်း ကုသနည်းတစ်ယောက်နှင့်တစ်ယောက် မတူညီသည့်အတွက် သွေးအစားအခြားဆေးများသုံး၍ အများသုံးကုသနည်းကို သင့်ကလေးအတွက် အသုံးပြုလိုသောကြောင့် အခြားဆရာဝန်တစ်ဦးကို ရှာခွင့်ပြုရန် တောင်းဆိုနိုင်သည်။ ဤသို့သောဆရာဝန်တစ်ဦးကိုပင် သင်တွေ့ရှိထားပြီးပြီဖြစ်၍ သူကလည်း တရားရုံးတွင် အကူအညီဖြစ်သောသက်သေခံချက်ကို တယ်လီဖုန်းဖြင့်တင်ပြပေးလိုပေမည်။ အကြီးအကဲများကလည်း တရားသူကြီးအားသာမက တရားရုံးအမိန့်စာကို တောင်းခံနေသောဆရာဝန်အား သွေးမပါဘဲ သင့်ကလေး၏ရောဂါကို မည်သို့ထိရောက်စွာကုသပေးနိုင်ကြောင်းတင်ပြသည့် ဆေးဘက်ဆိုင်ရာ ဆောင်းပါးများကို ပေးဖတ်နိုင်ပေမည်။

^၂၃ တရားရုံးအမိန့်များကို တရားသူကြီးများက အဆောတလျင်ထုတ်ပေးခြင်းမှာ သူတို့သည် သွေး၏အန္တရာယ်ပေးမှုများကို ထည့်မစဉ်းစား၊ သတိပေးမခံရ၍ ဖြစ်သည်။ ထိုအန္တရာယ်များတွင် အေအိုင်ဒီအက်စ်ရောဂါ၊ အသည်းရောင်ရောဂါနှင့် အခြားအခြားဘေးများဖြစ်သည်။ ယင်းတို့ကို တရားသူကြီးအားတင်ပြနိုင်သည်။ သင်သည် ခရစ်ယာန်မိဘတစ်ဦးအနေနှင့် အခြားသူတစ်ဦး၏သွေးကိုအသုံးပြုကာ အသက်မွေးမြူပေးခြင်းကို ဘုရားသခင့်ပညတ်ချိုးဖောက်ခြင်းဟု ယူမှတ်ပြီး သင့်ကလေးထဲ အဓမ္မသွေးသွင်းပေးခြင်းကို မုဒိမ်းကျင့်မှုကဲ့သို့ယူမှတ်မည်ဖြစ်ကြောင်း အသိပေးနိုင်ပါသည်။ သင်နှင့်သင့်ကလေး (ကိုယ်ပိုင်ခံယူချက်များရှိနိုင်သည့်အရွယ်ရောက်နေမည်ဆိုလျှင်) ဤကဲ့သို့ ခန္ဓာကိုယ်ကိုဖျက်ဆီးခြင်းကို မည်မျှရွံရှာကြောင်းရှင်းပြနိုင်သည်။ ထိုကြောင့် ခွင့်ပြုမိန့်မပေးရန် သင့်ကလေးအတွက် အခြားဆေးကုသနည်းသုံးခွင့်ပြုပါရန် တရားသူကြီးအား အသနားခံနိုင်ပါသည်။

^၂၄ ခုခံရှင်းလင်းချက်ကောင်းမည်ဆိုလျှင် အခြားတစ်ဖက်ဖြစ်သည့် မိဘများဖြစ်သူ သင့်ဘက်ကိုလည်း တရားသူကြီးများ ရှင်းလင်းစွာတွေ့မြင်နိုင်မည်။ ထိုအခါ သွေးသွင်းလိုက်ရန် အလျင်အမြန်ခွင့်ပြုကြတော့မည်မဟုတ်ပါ။ အချို့ကိစ္စများတွင် ဆရာဝန်၏သွေးသွင်းခွင့်ကိုပင် တားမြစ်နိုင်ပြီး ယင်းအစား ဦးဆုံးအခြားကုသနည်းကို အသုံးပြုရန်၊ သို့မဟုတ် သွေးမသွင်းဘဲ ရောဂါကုသပေးမည့်ဆရာဝန်ကို မိဘများရှာယူရန် ဆုံးဖြတ်စီရင်ခဲ့ဖူးပြီ။

^၂၅ သွေးသွင်းရန် အဓမ္မတိုက်တွန်းသူများနှင့်ဆက်ဆံရာတွင် သင့်ခံယူချက်ခိုင်ခံ့ကြောင်း တင်ပြရန် အလွန်အရေးကြီးသည်။ ကလေး၏မိဘများသည် ဩတ္တပ္ပစိတ်အနှောင့်အယှက် မဖြစ်စေရန်သဘောမျိုးဖြင့် သွေးသွင်းပေးရန်ဆုံးဖြတ်ချက်ကို မိမိတို့တာဝန်ယူဆုံးဖြတ်ခွင့်ပြုမည်လောဟု တရားသူကြီးများ (နှင့်ဆရာဝန်များ) ကမိဘများအား မေးမြန်းတတ်သည်။ သို့သော်မိဘများအနေနှင့် သွေးသွင်းပေးခြင်းကိုရှောင်နိုင်ရန် အတတ်နိုင်ဆုံးဆက်လက်လုပ်ကိုင်ဖို့တာဝန်ရှိကြောင်း လူတိုင်းကိုသိနားလည်စေသင့်သည်။ ဤအခွင့်အရေးသည့် သင့်အား ဘုရားသခင်ပေးထားသည့်တာဝန်ဖြစ်သည်။ အခြားသူအား လွှဲပြောင်းပေးနိုင်သည့်တာဝန်မဟုတ်ပါ။

^၂၆ ထိုကြောင့်ဆရာဝန်များနှင့်တရားသူကြီးများအား စကားပြောဆိုသည့်အခါ သင့်ခံယူချက်သဘောကို ရှင်းလင်းပြတ်သားစွာတင်ပြပေးနိုင်ရန် အသင့်ရှိနေရမည်။ အတတ်နိုင်ဆုံးကြိုးစားလျက်ပင် တရားရုံးအမိန့်စာထုတ်ပြမည်ဆိုလျှင် သွေးမသွင်းဘဲ ယင်းအစား အခြားကုသနည်းကိုအသုံးပြုပေးရန် ဆရာဝန်ကိုဆက်တောင်းပန်ပါ။ ဆေးဘက်ဆိုင်ရာစာပေများ၊ သွေးမသွင်းဘဲကုသပေးခြင်းနှင့်ပတ်သက်၍ အခြားဆရာဝန်တစ်ဦး၏အကြံဉာဏ်ကို သုံးသပ်ပေးရန် သူ့အားဆက်အကူအညီတောင်းဆိုပါ။ လုံးဝစိတ်ပြောင်းလဲပုံမရှိသည့်ဆရာဝန်သည် ခွဲစိတ်ခန်းကထွက်လာသည့်အခါ သွေးကိုအသုံးမပြုဘဲ ခွဲစိတ်ခဲ့ကြောင်းကြေညာခဲ့သည့်အကြိမ်ပေါင်းများစွာ ရှိခဲ့ဖူးပြီ။ ထိုကြောင့်ရုံးမိန့်ထုတ်ပြန်သည့်တိုင် မည်သည့်အရာဘဲဖြစ်ဖြစ် ဘယ်တော့မျှလက်မလျှော့ပါနှင့်။​—ဇွန် ၁၅၊ ၁၉၉၁ ကင်းမျှော်စင် “စာရှုသူများထံမှမေးခွန်းလွှာ” ကိုရှု။

^၂၇ ယေရှုက “လူတို့ကိုသတိပြုကြ။ အကြောင်းမူကား၊ သင်တို့ကို လွှတ်ရုံးသို့အပ်နှံကြလိမ့်မည်။ . . . ထိုသူတို့မှစ၍ တစ်ပါးအမျိုးသားတို့အား သက်သေဖြစ်စေခြင်းငှာ မြို့ဝန်မင်း၊ ရှင်ဘုရင်ထံသို့ ငါ့ကြောင့် သင်တို့ကိုပို့ဆောင်ကြလိမ့်မည်” ပြောခဲ့သည်ကို သတိရပါ။ ဤကဲ့သို့သောအခြေအနေမျိုးအောက်တွင် လိုအပ်သည့်အချိန်အခါ၌ ပြောဆိုသင့်၍ အကျိုးရှိမည့်စကားကိုသတိရစေရန် သန့်ရှင်းသောဝိညာဉ်တော်ကူညီပေးလိမ့်မည်ဟု ယေရှု၏ထပ်ဆင့်စကားများကြောင့် အားယူစရာအကြောင်းရှိပါသည်။​—မ၊ ၁၀:၁၆-၂၀။

^၂၈ “ပညာနှင့်အမှုစောင့်သောသူသည် အကျိုးကိုရလိမ့်မည်။ ယေဟောဝါကိုခိုလှုံသောသူသည်လည်း မင်္ဂလာရှိ၏။” (သု၊ ၁၆:၂၀) မိဘများ၊ ဝိညာဉ်ရေးဘက်ညစ်ညူးစေမည့် သွေးသွင်းခြင်းကိစ္စမှ သင့်သားသမီးကိုကာကွယ်ပေးရန် လိုအပ်သလို ကြိုတင်၍အသင့်ပြင်ဆင်ထားပါ။ (သု၊ ၂၂:၃) သားသမီးတို့၊ ဤပြင်ဆင်ချက်များကို မိဘများပြုလုပ်ပေးရာတွင် လေ့ကျင့်သွန်သင်မှုကိုခံယူကာ နှလုံးသွင်းထား၍ ကျင့်သုံးပါ။ မိသားစုအနေနှင့်လည်း “အသွေးကိုမစားမည်အကြောင်း သတိပြုလော့။” ထိုသို့ပြုသဖြင့် ယေဟောဝါ၏ကောင်းချီးနှင့် မျက်နှာသာရသောကြောင့် “ချမ်းသာစွာနေရ” လိမ့်မည်။​—တရား၊ ၁၂:၂၃-၂၅။

[အောက်ခြေမှတ်ချက်များ]