ထက်ကြပ်မကွာ လိုက်လျှောက်ရမည့် စံနမူနာ

^၁ ယေရှုသည် အသက်ရှင်ခဲ့သမျှတွင် အကြီးမြတ်ဆုံးလူသားဖြစ်ကြောင်း မငြင်းဆန်နိုင်ပါ။ တပည့်တော်များအတွက် စုံလင်သောပုံသက်သေကို ကိုယ်တော်ချမှတ်ခဲ့သည်။ ကိုယ်တော်၏ စုံလင်ခြင်းစံနှုန်းကို မမီနိုင်ကြသော်လည်း “ခြေတော်ရာကို ထပ်ကြပ်မကွာလိုက်လျှောက်” ကြရန် ကျွန်ုပ်တို့တိုက်တွန်းခံရကြသည်။ (၁ ပေ. ၂:၂၁၊ ကဘ) သူတစ်ပါးအား သမ္မာတရားကို ဇွဲလုံ့လဖြင့် ဟောပြောခြင်းတွင် ယေရှုနှင့် အတတ်နိုင်ဆုံးတူညီရန် ကြိုးစားချင်စိတ် ရှိသင့်သည်။

^၂ ယေရှုသည် ဟောပြောသူတစ်ဦးထက်မကပါ; ကိုယ်တော်သည် အမြင့်မြတ်ဆုံးသောဆရာဖြစ်တော်မူသည်။ “လူပရိသတ်တို့သည် ကိုယ်တော်၏ သွန်သင်ပုံကို လွန်စွာအံ့သြကြကုန်၏။” (မ. ၇:၂၈၊ သတင်းကောင်း) အဘယ်ကြောင့် ဤမျှထိရောက်တော်မူသနည်း။ “ကိုယ်တော်၏ သွန်သင်ပုံကို” အနီးကပ် စစ်ဆေးကြည့်ကြစို့။

^၃ ယေရှုနောက် မည်သို့လိုက်လျှောက်နိုင်ပုံ– ယေရှုသည် ဖခင်၏ သွန်သင်မှုကို ခံယူခဲ့ရသည်။ (ယောဟန် ၈:၂၈) ကိုယ်တော်၏ ရည်ရွယ်ချက်မှာ ယေဟောဝါကို ဂုဏ်တင်ပြီး နာမတော်အားဘုန်းထင်ရှားစေရန် ဖြစ်သည်။ (ယော. ၁၇:၄၊ ၂၆) ကျွန်ုပ်တို့ ဟောပြောသွန်သင်သည့် ရည်ရွယ်ချက်သည်လည်း ယေဟောဝါအား ဂုဏ်တင်ရန်ဖြစ်သင့်သည်။ ကိုယ့်ကိုယ်ကို ဂုဏ်တင်ရန်အတွက် မဟုတ်ပါ။

^၄ ယေရှုသွန်သင်လေသမျှသည် ဘုရားသခင့်နှုတ်ကပါဌ်တော်အပေါ်အခြေခံ ဖြစ်ပါသည်။ မှုတ်သွင်းခံ ကျမ်းစာစောင်များ၌ ရေးသားထားချက်များကို ကိုယ်တော် အမြဲကိုးကားတော်မူ၏။ (မ. ၄:၄၊ ၇; ၁၉:၄; ၂၂:၃၁) တရားနာသူများကို သမ္မာကျမ်းစာသို့ ကျွန်ုပ်တို့ညွှန်ကြားလိုကြသည်; ဤနည်းအားဖြင့် အမြင့်မြတ်ဆုံးသော အာဏာပိုင်အပေါ်အခြေပြု၍ ကျွန်ုပ်တို့ဟောပြောသွန်သင်နေကြောင်း သူတို့အား သိရှိစေပါသည်။

^၅ လိုရင်းတိုရှင်း၊ လက်တွေ့ကျကျ၊ ရှုပ်ထွေးခြင်းမရှိသော အကြောင်းပြချက်များကို ယေရှုအသုံးပြုခဲ့သည်။ ဥပမာ၊ ဘုရားသခင်ခွင့်လွှတ်မှုကို မည်သို့ရရှိနိုင်ကြောင်းရှင်းပြရာတွင် အခြားသူများကို ကိုယ်တိုင်ခွင့်လွှတ်ရန်လိုကြောင်း ကိုယ်တော်တိုက်တွန်းသွားသည်။ (မ. ၆:၁၄၊ ၁၅) နိုင်ငံတော်သတင်းကို လက်တွေ့ကျကျ ရိုးရိုးရှင်းရှင်း တင်ပြဖို့ ကြိုးစားသင့်သည်။

^၆ ယေရှုသည် သူတစ်ပါး စဉ်းစားတွေးတောစေရန် ဥပမာများနှင့် မေးခွန်းများကို ကျွမ်းကျင်လိမ္မာစွာ အသုံးပြုခဲ့သည်။ (မ. ၁၃:၃၄၊ ၃၅; ၂၂:၂၀-၂၂) နေ့စဉ်ဖြစ်ပျက်တတ်သည့် သာမန်ကိစ္စများနှင့်ဆိုင်သောဥပမာများသည် ရှုပ်ထွေးသော ကျမ်းစာအယူဝါဒတို့ကို နားလည်လွယ်ကူစေသည်။ ကြားသမျှကို စဉ်းစားဆင်ခြင်ရန်အားပေးသည့် မေးခွန်းများကို နားထောင်သူများအားမေးမြန်းသင့်သည်။ ကြောင်းလမ်းမေးခွန်းများသည် အဖြေမှန်ကိုသိရှိရန် အထောက်အကူပြုနိုင်သည်။

^၇ ခက်ခဲသောကိစ္စများနှင့်ပတ်သက်၍ အကျိုးအကြောင်းပိုမိုသိရှိလိုသူများအား အချိန်ယူ၍ ယေရှုရှင်းပြပေးခဲ့သည်။ တပည့်တော်တို့နည်းတူ အမှန်စိတ်ဝင်စားသူများသည် ယေရှုတရားစကားများ၏ အနက်အဓိပ္ပာယ်ကို သိနားလည်နိုင်သည်။ (မ. ၁၃:၃၆) စိတ်ရင်းမှန်ဖြင့် မေးမြန်းကြသည့်အခါ ကျွန်ုပ်တို့လည်း ထိုနည်းထပ်တူ အကူအညီပေးသင့်သည်။ အဖြေမသိလျှင် ယင်းအကြောင်းကို စူးစမ်းလေ့လာပြီးနောက် သက်ဆိုင်ရာအကြောင်းအရာများကို ပြန်သွားပြောနိုင်သည်။

^၈ သွန်သင်ပေးရန် သရုပ်ပြသင်ခန်းစာများကို ယေရှုအသုံးပြုသည်။ ဥပမာတစ်ခုကား ဆရာသမားဖြစ်လျက်ကယ် တပည့်တော်များ၏ခြေကို ဆေးကြောပေးခြင်းဖြစ်သည်။ (ယောဟန် ၁၃:၂-၁၆) နှိမ့်ချသောသဘောကို ကျွန်ုပ်တို့တင်ပြကြမည်ဆိုလျှင် သွန်သင်ခံရသူတို့သည် တတ်မြောက်လာသမျှကို လက်တွေ့ကျင့်သုံးရန် လှုံ့ဆော်ခံရလိမ့်မည်။

^၉ ယေရှုသည် လူ့နှလုံးကိုလည်းကောင်း၊ ဖြောင့်မတ်ခြင်းကို မြတ်နိုးသောစိတ်ကိုလည်းကောင်း ဆွဲဆောင်နိုင်ခဲ့သည်။ ကျွန်ုပ်တို့လည်း ထို့အတူပြုလိုသည်။ လူသားတို့တွင်ရှိ သာ၍မြင့်မြတ်သောပုဂ္ဂိုလ်တစ်ဦးကို ကိုးကွယ်လိုစိတ်၊ အခြားသူများနှင့် အတူတကွ သင့်တင့်ငြိမ်သက် ပျော်ရွှင်စွာ နေထိုင်လိုစိတ်ကို ဆွဲဆောင်ပေးရန် ကျွန်ုပ်တို့ကြိုးစားကြသည်။

^၁၀ ဒီဇင်ဘာလအတွင်း အသက်ရှင်ခဲ့သမျှတွင် အကြီးမြတ်ဆုံးလူသားစာအုပ်ကို ဝေငှခြင်းအားဖြင့် ယေရှုနှင့်ပတ်သက်၍ ကျွန်ုပ်တို့တတ်သိထားရာများကို သူတစ်ပါးအား မျှဝေနိုင်ပါသည်။ (ဤစာအုပ်မရှိလျှင် အသင့်တော်ဆုံးဖြစ်သည့် ရှိထားရာ မည်သည့်စာအုပ်ကိုမဆို အသုံးပြုပါ။) ယေရှုသွန်သင်ခဲ့ရာများကို ကျွန်ုပ်တို့ရှင်းပြချိန်တွင် ကိုယ်တော်၏ သွန်သင်ပုံသွန်သင်နည်းများကို အတုယူခြင်းဖြင့် စိတ်ရင်းမှန်သူများသည် နားထောင်လိုစိတ် ဖြစ်ပေါ်လာစေရန် လှုံ့ဆော်တိုက်တွန်းခံရပေမည်။—မ. ၁၀:၄၀။