ပြန်လည်ပတ်မှုများပြုလုပ်ခြင်းအားဖြင့် သင်၏ဂရုစိုက်မှုကို တင်ပြပါ

^၁ တစ်အိမ်မှတစ်အိမ်သွား၍ စိတ်ဝင်စားသူများကို ရှာဖွေခြင်းက သင်သည်အခြားသူတို့အား နိုင်ငံတော်သတင်းတရားကို ကြားနာစေလိုစိတ်ရှိကြောင်း ဖော်ပြသည်။ ထိုကြောင့် ဇန်နဝါရီလအတွင်း သင်စာပေစာတမ်းဝေငှခဲ့သော အိမ်များထံသို့ မသွားမနေ ပြန်သွားပါ။ ဤနည်းကား အခြားသူများကို သင်ဂရုစိုက်ကြောင်း တင်ပြသည့် ကောင်းမွန်သောနည်းတစ်နည်းဖြစ်သည်။

^၂ ဩဂုတ် ၁၊ “ကင်းမျှော်စင်” ဝေငှခဲ့မည်ဆိုလျှင် ဤနည်းဖြင့် ပြန်စကားစဖို့ ကြိုးစားကြည့်ပါ–

▪ “အရင်တစ်ခါက ဘုရားသခင်ရဲ့နိုင်ငံတော်အကြောင်း၊ နိုင်ငံတော်ဟာ ကျွန်တော်တို့အတွက် ဘာလုပ်ပေးမယ် ဆိုတဲ့အကြောင်း ပြောဆိုခဲ့ကြတယ်။ အဲ့ဒီနိုင်ငံတော်ဟာ မကြာခင် ဒီကမ္ဘာမြေကြီးကို ပရဒိသု ဖြစ်စေတော့မယ်။ အဲ့ဒါကို ပုံဖော်နိုင်ချင်မှ ပုံဖော်နိုင်မယ်။ ဒီအတိုင်းပဲ ဖြစ်လာလိမ့်မယ်။ [ထရ စာအုပ်ပါ ရုပ်ပုံကို ရည်ညွှန်းပါ။] ဒီလိုပရဒိသုမျိုးကို ကျမ်းစာထဲမှာ ကတိပေးထားတယ်။” [ဆာလံ ၇၂:၇၊ ၁၆; ဟေရှာယ ၃၅:၅၊ ၆ ဖတ်။] ဘုရားသခင်သည် လူအပေါင်းတို့အား ကိုယ်တော်၏ ကမ္ဘာသစ်တွင် အသက်ရှင်နေထိုင်ရန် ဖိတ်ခေါ်နေကြောင်း ပြောပြပြီးနောက် ဗျာဒိတ် ၂၂:၁၇ ကိုဖတ်ပါ။ စိတ်ဝင်စားပုံရှိမည်ဆိုလျှင် ဤအကြောင်းကို ပိုရှင်းပြရန် နောက်တစ်ခေါက်ပြန်လာလိုကြောင်း ပြောဆိုပါ။

^၃ “ကြည့်ရှုလော့” ဘရိုရှာ ဝေငှထားသည့်အိမ်များသို့ ပြန်သွားရာ၌ အသုံးပြုရန် အကြံပြုချက်မှာဤသို့–

▪ “ကျွန်တော်တို့အားလုံး ပျော်ချင်ကြတဲ့လူတွေပါပဲ။ ဒါပေမဲ့ တစ်နည်းမဟုတ်တစ်နည်းနဲ့ ပျော်ရွှင်မှု ပျောက်ဆုံးသွားကြတယ်။ သေခြင်းက ပျော်ရွှင်မှုကို ပျောက်စေရုံမက ဝမ်းနည်းခြင်းနဲ့ စိတ်မကျေနပ်မှုကိုပါ ဖြစ်စေတယ်။ အရင်တစ်ပတ်က ဆွေးနွေးခဲ့တဲ့အတိုင်းပဲ ယေဟောဝါဘုရားသခင်ဟာ သေခြင်းကို အဆုံးတိုင်စေတော့မယ်။ ဒါပေမဲ့ သူဘယ်လိုလုပ်ပေးမလဲ။ အဲ့ဒါကို ရှင်းပြဖို့ပြန်လာတာပါ။” ထရ စာအုပ်ကို အသုံးပြုပြီး စာတန့်လောကကို ဖျက်ဆီး၍ ကမ္ဘာသစ်ဖြစ်ပေါ်လာရန် ယေရှုအား ယေဟောဝါဘုရားသခင် မည်သို့အသုံးပြုမည်ကို ရှင်းပြပါ။ အချိန်ကြာကြာ မနေပါနှင့်။ စိတ်ဝင်စားမှု တင်ပြမည်ဆိုလျှင် နောက်တစ်ပတ် ပြန်လာဖို့ရန် စီစဉ်ပါ။

^၄ “စစ်မှန်သောငြိမ်းချမ်းရေးနှင့် လုံခြုံမှု—ယင်းကိုမည်သို့တွေ့ရှိနိုင်မည်နည်း” [လိပ်] အိမ်သို့ ပြန်သွားသည့်အခါ ဤတိုတုတ်သောတင်ဆက်ပြောဆိုပုံကို အသုံးပြုလိုပေမည်–

▪ “အခု ကမ္ဘာ့ခေါင်းဆောင်တွေဟာ ငြိမ်းချမ်းရေးနဲ့ လုံခြုံမှုကို မဖြစ်ပေါ်စေနိုင်ကြဘူး။ ယေဟောဝါဘုရားသခင်တစ်ပါးတည်းပဲ လုပ်ပေးနိုင်တယ်။ ကျွန်တော်တို့ ဘာလုပ်ရမယ်ဆိုတာကို ကျမ်းစာက ဖော်ပြထားတယ်။ [စာမျက်နှာ ၁၇၅၊ အပိုဒ် ၁ နှင့် ၂ ပါအချက်များကို ဆွေးနွေးပြီး ဟေရှာယ ၂၆:၄ ကိုဖတ်။] ဒီစာအုပ်က ဘယ်လိုအကူအညီပေးနိုင်တဲ့အကြောင်း ပြပေးချင်တယ်။”

^၅ “ဘုရားသခင်သည် ကျွန်ုပ်တို့အားအမှန်ပင်ဂရုစိုက်တော်မူသလော” ဘရိုရှာ ဝေငှထားသည့်အိမ်တွင် ဤအကြံပြုချက်ကိုအသုံးပြုနိုင်သည်–

▪ ‘ဘုရားသခင်ဟာ ကျွန်တော်တို့ကို တကယ်ဂရုစိုက်ရဲ့လား’ ဆိုတဲ့ အရေးကြီးမေးခွန်းကိုဖြစ်ပေါ်စေတဲ့ ဒီဘရိုရှာတစ်စောင်ကို အရင်တစ်ခေါက်က ကျွန်တော်ထားခဲ့တယ်။ ဒီဘရိုရှာကို ပြန်သုံးသပ်ကြည့်တဲ့အခါ ဘယ်လိုဆုံးဖြတ်ချက် မျိုးချခဲ့ပါသလဲ။ [တုံ့ပြန်ဖို့ရန် ခွင့်ပြုပါ။] ငြိမ်းငြိမ်းချမ်းချမ်းနဲ့နေထိုင်နိုင်မဲ့ ပရဒိသုကမ္ဘာသစ်ကို ကတိထားတဲ့ ကျမ်းချက်တွေကိုဖတ်ခဲ့ရလို့ အားရှိမယ်ထင်တယ်။ [စာမျက်နှာ ၂ နှင့် ၃ ပါရုပ်ပုံများကို ပြပြီး ကမ္ဘာသစ်ရဲ့ နှစ်လို့ဖွယ်ရာအချို့ကို ညွှန်ပြပါ။] ခင်ဗျားနဲ့ ခင်ဗျားချစ်မြတ်နိုးရတဲ့သူတွေဟာ ဒီလိုမျိုးကမ္ဘာမှာ နေထိုင်ချင်ကြမှာပဲ။ အဲ့ဒါနဲ့ပတ်သက်လို့ စာမျက်နှာ ၃၁၊ အပိုဒ် ၁၆ မှာပြောဆိုထားတာကို သတိပြုပါ။” အပိုဒ်ကိုဖတ်ပြီးနောက် ယေဟောဝါကိုရှာခြင်းဆိုသည်မှာ ကိုယ်တော်နှင့် ကိုယ်တော့်ရည်ရွယ်ချက်များကို တိုးသိလာရန် ကိုယ်တော့်နှုတ်ကပါဌ်တော် သမ္မာကျမ်းစာကို လေ့လာခြင်းဖြစ်ကြောင်းထောက်ပြပါ။

^၆ ယေဟောဝါသည် ကိုယ်တော့်သိုးကို ဂရုစိုက်တော်မူသောမေတ္တာရှင် သိုးထိန်းတစ်ဦးအနေနှင့် အပြစ်ဆိုဖွယ်ရာ မရှိသော ပုံသက်သေကို ချမှတ်ထားတော်မူပြီ။ (ယေဇ. ၃၄:၁၁-၁၄) မေတ္တာဖြင့် ဂရုစိုက်တော်မူသော ကိုယ်တော့်ပုံသက်သေကို စိတ်ရင်းမှန်ဖြင့် ကျွန်ုပ်တို့အတုယူကြခြင်းသည် ကိုယ်တော့်အလိုတော်နှင့်တွေ့ပြီး ကျွန်ုပ်တို့၏မေတ္တာကို ထင်ရှားစေကာ သူတစ်ပါးအတွက် အကျိုးကျေးဇူးများ သက်ရောက်စေသည်။