ကျွန်ုပ်တို့၏မဂ္ဂဇင်းများကို အကောင်းဆုံးနည်းဖြင့် အသုံးပြုပါ

^၁ သတင်းစာများရောင်းသည့်ဆိုင်တစ်ခုတွင် သင်ဘာတွေ့ရှိနိုင်သနည်း။ မဂ္ဂဇင်းများဖြစ်သည်။ လမ်းထောင့်ဆိုင်တွင် အဘယ်အရာပေါ် မျက်စိတန်းရောက်တတ်သနည်း။ မဂ္ဂဇင်းများဖြစ်သည်။ စာပို့လုလင်ကို ဝန်လေးစေသည်ကား အဘယ်နည်း။ မဂ္ဂဇင်းများဖြစ်သည်။ သို့ဖြစ်သောကြောင့် လူအများသည် ဘာကိုဖတ်နေကြသနည်း။ မဂ္ဂဇင်းများဖြစ်သည်။ အသက် ၁၀ နှစ်မှ ၁၈ နှစ်အရွယ်ရှိ လူငယ် ၁၀ ဦးအနက် ၉ ဦးနှင့် ထပ်တူရာနှုန်းရှိ လူကြီးများပါ လစဉ်အနည်းဆုံးမဂ္ဂဇင်းတစ်စောင်ကို ဖတ်ရှုလေ့ရှိသည်။ ဤလောကသည် မဂ္ဂဇင်းကိုစိတ်ဝင်စားသည်။

^၂ စိတ်နှလုံးဖြောင့်မတ်သူများ ကင်းမျှော်စင် နှင့် နိုးလော့! အပေါ်စိတ်ဝင်စားလာရန် ကျွန်ုပ်တို့ပြုလုပ်ပေးနိုင်မည်လော။ ကျွန်ုပ်တို့သည် ကင်းမျှော်စင် နှင့် နိုးလော့! ကိုစိတ်ဝင်စားမည်ဆိုလျှင် ထိုသို့ပြုလုပ်နိုင်ပါသည်။ အဘယ်အရာက အကူအညီပေးမည်နည်း။ ဤအကြံပြုချက်များကို သုံးသပ်ကြည့်ပါ။

▪ မဂ္ဂဇင်းများကိုဖတ်ပါ– မိမိ၏တိုက်နယ်တွင် ကြေညာသူ ၃ ဦးအနက် ၁ ဦးသာလျှင် ကင်းမျှော်စင် နှင့် နိုးလော့! မဂ္ဂဇင်းတိုင်းကို အစမှအဆုံးဖတ်လေ့ရှိသည်ဟု နယ်လှည့်ကြီးကြပ်မှူးတစ်ဦးက ပြောသည်။ အသင်ကော။ ဆောင်းပါးတစ်ခုစီကို သင်ဖတ်ရှုသည့်အခါ ‘ဤအကြောင်းကို မည်သူတန်ဖိုးထားမည်နည်း။—မိခင်တစ်ဦး၊ မသိဝါဒီတစ်ဦး၊ စီးပွားရေးသမားတစ်ဦး၊ လူငယ်တစ်ဦးလော’ ဟု မိမိကိုယ်ကိုမေးပါ။ မဂ္ဂဇင်းဝေငှရာ၌ သင်အသုံးပြုနိုင်မည့် အချက်တစ်ချက်နှစ်ချက်ကို သင့်ကိုယ်ပိုင်စာစောင်တွင်မှတ်သားထားပါ။ ထို့နောက် ဝါကျတစ်ကြောင်းနှစ်ကြောင်းဖြင့်သာ ယင်းအကြောင်းကို မည်သို့စိတ်ဝင်စားစေနိုင်မည်ကို စဉ်းစားကြည့်ပါ။

▪ မဂ္ဂဇင်းအရေအတွက် အတိအကျမှာယူထားပါ– လထုတ်တိုင်း မဂ္ဂဇင်းစောင်ရေ မည်မျှယူလိုကြောင်း မဂ္ဂဇင်းတာဝန်ခံ ညီအစ်ကိုအား မှာထားပါ။ ဤနည်းအားဖြင့် သင်နှင့်သင့်မိသားစုသည် မဂ္ဂဇင်းစောင်ရေအလုံအလောက် မှန်မှန်ရရှိမည်ဖြစ်သည်။

▪ မဂ္ဂဇင်းနေ့ရက်တစ်ရက် သတ်မှတ်စီစဉ်ထားပါ– အသင်းတော်များစွာသည် မဂ္ဂဇင်းများနှင့် သက်သေခံရန် နေ့ရက်တစ်ရက်ကို သတ်မှတ်ထားသည်။ အသင်းတော်၏ မဂ္ဂဇင်းနေ့တွင် သင်အားပေးနိုင်မည်လော။ သို့မဟုတ်လျှင် သင့်လုပ်ငန်းတော်အချိန်တွင် မဂ္ဂဇင်းများနှင့် တစ်အိမ်မှတစ်အိမ် သို့မဟုတ် မဂ္ဂဇင်းလမ်းကြောင်းတွင် သက်သေခံထွက်ပြီးဝေငှရန် အခါအားလျော်စွာစီစဉ်ပါ။

▪ “ကင်းမျှော်စင်” နှင့် “နိုးလော့!” ကိုစိတ်ဝင်စားပါ– ခရီးထွက်သည့်အခါ၊ ဈေးဝယ်သည့်အခါ မဂ္ဂဇင်းများကို အမြဲယူဆောင်သွားပါ။ လုပ်ဖော်ကိုင်ဖက်များ၊ အိမ်နီးချင်းများ၊ ကျောင်းနေဖက်များ သို့မဟုတ် ဆရာဆရာမများနှင့် စကားပြောဆိုသည့်အခါ ၎င်းကို ဝေငှပါ။ မကြာခဏ လေယာဉ်ဖြင့်ခရီးထွက်လေ့ရှိသော မောင်နှံစုံတစ်စုံသည် ဘေးချင်းယှဉ်ထိုင်သူ အခြားခရီးသည်တစ်ဦးအား နောက်ဆုံးထုတ်မဂ္ဂဇင်း၌ပါသော အချက်တစ်ချက်ကို တင်ပြပြောဆိုပြီး စကားစမြည်စလေ့ရှိသည်။ သို့ပြုခြင်းအားဖြင့် သူတို့သည် ဝမ်းမြောက်ဖွယ်တွေ့ကြုံမှုများစွာရရှိခဲ့ပြီ။ လူငယ်အချို့သည် ဆရာဆရာမများ သို့မဟုတ် ကျောင်းနေဖက်များ စိတ်ဝင်စားမည်ဟုထင်သော ဆောင်းပါးများကို ကျောင်းသို့ မှန်မှန်ယူလာလေ့ရှိသည်။ ကိစ္စဝိစ္စများဆောင်ရွက်ရန် သွားလာသည့်အခါ မဂ္ဂဇင်းများကို သယ်ဆောင်သွားပြီး သင့်လုပ်ငန်းပြီးသည်နှင့် ဈေးသည်များ၊ ကုန်သည်များအား ယင်းတို့ကိုဝေငှပါ။ ကျွန်ုပ်တို့အများစုသည် ဘတ်စကား စီးတတ်ကြသည်; ဘတ်စကားစောင့်နေစဉ် မဂ္ဂဇင်းများ ဝေငှကြည့်ပါ။ ဆွေမျိုးများ အလည်အပတ် ရောက်လာသည့်အခါ၊ သယ်ယူပို့ဆောင်ရေးယာဉ်များကို အသုံးပြုသည့်အခါ၊ သို့မဟုတ် ချိန်းချက်ထားချိန်အတွက် စောင့်နေရသည့်အခါ အသုံးပြုဖို့ ယင်းတို့ကို အဆင်သင့်ဆောင်ထားပါ။ အခြားသင့်တော်သောအချိန်အခါများကို သင်တွေးမိပါသလော။

▪ လိုရင်းတိုရှင်းမဂ္ဂဇင်းတင်ဆက်ပုံတစ်ခုကို ပြင်ဆင်ပါ– စကားတစ်ခွန်းနှစ်ခွန်းနှင့် ပိုင်နိုင်စွာပြောဆိုနိုင်ဖို့ ကြံစည်ပါ။ အားတက်သရောရှိပါ။ နှလုံးကိုထိမိရန် ကြိုးစားပါ။ တိကျပါ။ ဆောင်းပါးတစ်ခုမှ အချက်တစ်ချက်ကိုရွေးပြီး စကားအနည်းငယ်ဖြင့် ယင်းကိုဖော်ပြကာ မဂ္ဂဇင်းများကို ဝေငှပါ။ အကောင်းဆုံးတင်ဆက်ပုံကား စိတ်ဝင်စားစရာအကြောင်းတစ်ခုကို မေးခွန်းထုတ်ပြီး ယင်းနှင့်သက်ဆိုင်သည့် ကျမ်းစာဆိုင်ရာအဖြေကို ဆောင်းပါးတွင် ညွှန်ပြခြင်းဖြစ်သည်။ ယင်းကို ပြုလုပ်နိုင်မည့်ပုံစံအချို့ကို သုံးသပ်ပါ–

^၃ ရာဇဝတ်မှုများ တိုးများလာခြင်းနှင့်ဆိုင်သော ဆောင်းပါးကို အသင်ပေါ်လွင်စေမည်ဆိုလျှင် ဤသို့မေးနိုင်သည်–

▪ “ရာဇဝတ်မှုကို စိုးရိမ်စရာမရှိဘဲ အိပ်ပျော်နိုင်မဲ့ည ဘယ်လိုများဖြစ်လာနိုင်မယ်လို့ထင်သလဲ။” အခြေအနေကောင်းလာစရာအကြောင်းမရှိဟု အိမ်ရှင်က ယူမှတ်ပေမည်။ လူအများသည် ထိုနည်းတူ ယူဆကြောင်းနှင့် သူစိတ်ဝင်စားမည်ထင်သော ဆောင်းပါးတစ်ခု ပါလာကြောင်းကို ပြောပြနိုင်သည်။ ထိုနောက် ဆောင်းပါးတွင် သင့်တော်သောအချက်တစ်ချက်ကို ညွှန်ပြပါ။

^၄ မိသားစုဘဝနှင့်ပတ်သက်သော ဆောင်းပါးတစ်ခုကို ဖော်ပြလိုလျှင် ဤသို့ပြောလိုပေမည်–

▪ “ဒီအချိန်အခါမှာ ဝမ်းစာရှာပြီး မိသားစုကို ကျွေးမွေးပြုစုဖို့လူအများအတွက် မလွယ်လှဘူး။ ဒီအကြောင်းနဲ့ပတ်သက်တဲ့စာအုပ်တွေလည်း အများကြီးရှိတယ်။ ဒါပေမဲ့ ပြဿနာဖြေရှင်းနည်းနဲ့ပတ်သက်ပြီး ကျွမ်းကျင်သူများတောင် သဘောမတိုက်ဆိုင်နိုင်ကြဘူး။ စိတ်ချနိုင်တဲ့လမ်းပြမှုကို ဘယ်မှာရနိုင်မယ်ထင်သလဲ။” ထို့နောက် သမ္မာကျမ်းစာတွင်ပါသော ဉာဏ်ပညာကိုဖော်ပြသည့် မဂ္ဂဇင်းမှ အကြောင်းအရာတစ်ခုကို အတိအကျဖော်ပြပါ။

^၅ လူမှုရေးပြဿနာတစ်ခုကို ဖော်ပြသည့် ဆောင်းပါးကို တင်ပြလိုလျှင် ဤသို့ပြုနိုင်ပေမည်–

▪ “ယနေ့ လူအတော်များများဟာ ဖိစီးမှုအမျိုးမျိုးကို ခံနေကြရတယ်။ ဒီလိုနေထိုင်ဖို့ ဘုရားသခင်က မရည်ရွယ်ခဲ့ဘူး။” ထိုနောက် ဆောင်းပါးပါ ကျမ်းစာအခြေခံသည့်အကြောင်းသည် ဘဝပြဿနာများကို ယခုပင်ဖြေရှင်းနိုင်ကြောင်းနှင့် အနာဂတ်တွင် အမြဲဖြေရှင်းနိုင်ဖို့ မျှော်လင့်ချက်ကိုပါ မည်သို့ပေးနိုင်ကြောင်းကို ဖော်ပြပါ။

^၆ မဂ္ဂဇင်းများ၏အဖိုးအခကို ဖော်ပြရန် မဝံ့မရဲမဖြစ်ပါနှင့်။ ကျွန်ုပ်တို့၏စာပေများသည် လောကီမဂ္ဂဇင်းများထက် အလွန်အဖိုးနည်းသည်။ ကျွန်ုပ်တို့၏သတင်းတရားသည် အသက်ကယ်ဆယ်သည်။ သူတို့၏စာပေများမူကား သေစေတတ်သည်။

^၇ ဂုဏ်သိက္ခာရှိပါ– ကင်းမျှော်စင်မဂ္ဂဇင်းသည် အနှစ် ၁၀၀ ကျော်ရှိပြီ။ သို့သော် ယနေ့တိုင်ရှင်သန်နေသည်။ ယင်းသည် ဂုဏ်သိက္ခာရှိသောမဂ္ဂဇင်းဖြစ်သည်။ အမြင့်မြတ်ဆုံးသောဘုရင်နှင့် ကိုယ်တော်၏နိုင်ငံတော်သတင်းစကားကို ဖော်ပြသည်။ ထို့ကြောင့် ကျွန်ုပ်တို့လည်း ဂုဏ်သိက္ခာရှိရမည်။ ဘုရားသခင်၏ ဓမ္မအမှုဆောင်များပီသစွာ ကြော့ရှင်းသပ်ရပ်စွာ ဖြီးလိမ်းဆင်ယင်ပြီး လျောက်ပတ်သောစကားများကို ပြောဆိုရမည်။ လူတို့နှင့်စကားစမြည်ပြောဆိုသည့်အခါ ကြင်နာခြင်း၊ ချစ်ခြင်းတင်ပြကာ သူတို့ကို စိတ်ဝင်စားပါ။ သင့်မဂ္ဂဇင်းအိတ်ကို သပ်ရပ်သန့်ရှင်းစေပါ။ သင့်မဂ္ဂဇင်းများကို သပ်ရပ်စွာ စီထားပါ။—၁ တိ. ၂:၉၊ ၁၀။

^၈ မဂ္ဂဇင်းလမ်းကြောင်းများ– ရပ်ကွက်များကို နှံ့စပ်အောင် မှန်မှန်အမှုဆောင်နေကြသော်လည်း မဂ္ဂဇင်းလမ်းကြောင်းများ ရှိသူတို့သည် မဂ္ဂဇင်းများစွာဝေငှနိုင်ကြသည်။ မဂ္ဂဇင်းလမ်းကြောင်းများမှ အိမ်တွင်းကျမ်းစာသင်အံမှုများ ရနိုင်စရာအကြောင်းရှိသည်။

^၉ မဂ္ဂဇင်းများပေးရန် မှန်မှန်ပြန်လည်ပတ်သွားသည့်အခါ အိမ်ရှင်သည် သင်နှင့်ပိုရင်းနှီးလာပေမည်။ ပိုရင်းနှီးလာလေ ကျမ်းစာအကြောင်းပြောဆိုရန် ပိုလွယ်ကူလာလေဖြစ်မည်။ ယင်းမှတစ်ဆင့် တိုးတက်မှုရှိသော အိမ်တွင်းကျမ်းစာသင်အံမှုတစ်ခု ဖြစ်လာနိုင်သည်။ မဂ္ဂဇင်းများကို တန်ဖိုးထားသူများအား နှစ်စဉ်ကြေးကမ်းလှမ်းကြည့်ပါ။ အိမ်ရှင်နှင့်တွေ့ဆုံတိုင်း ပြန်လည်ပတ်မှုတစ်ခု မှတ်တမ်းသွင်းဖို့လည်း မမေ့ပါနှင့်။

^၁၀ မဂ္ဂဇင်းများကို အမြဲလက်ခံယူသော်လည်း “ရှင်ပြောတာကို ကျွန်မ မယုံဘူး” ဟူ၍ပြောသော အမျိုးသမီးတစ်ဦးထံ ညီအစ်မတစ်ယောက်သည် မှန်မှန်ပြန်သွားသည်။ နောင်တစ်ကြိမ်တွင် သူမ၏ယောက်ျားနှင့် တွေ့ဆုံသည်။ ခင်မင်စွာ စကားစမြည်ပြောဆိုပြီးနောက် ကျမ်းစာသင်အံမှုပြုလုပ်ရန် စီစဉ်နိုင်ခဲ့သည်။ သင်အံမှုတွင် ပါဝင်လာသည့် သားသုံးယောက်နှင့်လည်း ညီအစ်မဖြစ်သူသည် ခင်မင်လာသည်။ နောက်ဆုံး ထိုမိခင်နှင့် သူမ၏သားများသည် ယေဟောဝါထံ ဆက်ကပ်အပ်နှံပြီး နှစ်ခြင်းခံကြသည်။ ယနေ့အထိ ယင်းမိသားစုမှ ၃၅ ဦးသည် သမ္မာတရားကိုလက်ခံခဲ့ကြပြီ။ ဤသို့ဖြစ်ရခြင်းမှာ ညီအစ်မသည် သူမ၏မဂ္ဂဇင်းလမ်းကြောင်းသို့ ပြန်သွားသောကြောင့်ဖြစ်သည်!

^၁၁ မဂ္ဂဇင်းလမ်းကြောင်း စတင်နိုင်သည့် နည်းအမျိုးမျိုးရှိသည်။ မဂ္ဂဇင်းများဝေငှထားသည့် နေရာများကို ရေးမှတ်ထားပြီး နောက်ဆုံးထုတ်စာစောင်များကို နှစ်ပတ်တစ်ခါ ပြန်သွားပြခြင်းအားဖြင့် လမ်းကြောင်းစတင်နိုင်သည်။ တစ်နည်းမှာ “ကျွန်ုပ်တို့၏နောက်စာစောင်တွင်” ခေါင်းစဉ်အောက်ပါ အကြောင်းကိုအသုံးပြုခြင်းအားဖြင့်ဖြစ်သည်။ ပြန်သွားသည့်အခါ နောက်ဆုံးတစ်ခေါက်က ပြောဆိုခဲ့သောဆောင်းပါး ပါလာကြောင်းကို အိမ်ရှင်အားပြောပြပါ။ သို့မဟုတ် ပြန်လည်ပတ်မှုပြုလုပ်သည့်အခါ သင်ဤသို့ပြောနိုင်သည်– “ဒီအကြောင်းကို ဖတ်တုန်းက ခင်ဗျားလည်း စိတ်ဝင်စားမှာပဲလို့ ထင်မိတယ်။ . . . ” ထို့နောက် ဆောင်းပါးပါအကြောင်း အနည်းအကျဉ်း ပြောပြီး ဝေငှပါ။ ပြန်လည်ပတ်သွားပြီးသည့်အခါ သင့်တစ်အိမ်မှတစ်အိမ်မှတ်တမ်းပေါ်တွင် (၁) အိမ်ရှင်အမည်၊ (၂) အိမ်ရှင်၏လိပ်စာ၊ (၃) ပြန်လည်ပတ်သွားသည့် ရက်စွဲ၊ (၄) ဝေငှခဲ့သော စာစောင်များနှင့် (၅) ဆွေးနွေးခဲ့သော ဆောင်းပါးစသည်အချက်ငါးခုတို့ကို ရေးမှတ်ထားပါ။ ကြေညာသူအချို့သည် သူတို့၏မဂ္ဂဇင်းလမ်းကြောင်းတွင် လည်ပတ်စရာနေရာ ၄၀ သို့မဟုတ် ထိုထက်မကရှိသည်တိုင် အောင်မြင်မှုရရှိကြပြီ!

^၁၂ စီးပွားရေးရပ်ကွက်– စီးပွားရေးရပ်ကွက်တွင် အမှုဆောင်သောကြေညာသူများသည် မဂ္ဂဇင်းများစွာ ဝေငှနိုင်ခဲ့ပြီ။ တစ်ဆိုင်မှတစ်ဆိုင် လုပ်ငန်းကို စမ်းကြည့်ဖူးပြီလော။ အသင်းတော်အချို့သည် ဤလုပ်ငန်းတွင် အနည်းအကျဉ်းသာပါဝင်ကြောင်း သိရှိရသည်။ အစအဦးတွင် ဆိုင်ခန်းများသို့သွားရန် အချို့သူများသည် မဝံ့မရဲဖြစ်ကြသော်လည်း နှစ်ခါသုံးခါသွားကြပြီးနောက် စိတ်ဝင်စားစရာမက အကျိုးဖြစ်ထွန်းကြောင်းကိုလည်း တွေ့ရှိကြသည်။ အတွေ့အကြုံရှိသော ကြေညာသူ သို့မဟုတ် ရှေ့ဆောင်တစ်ဦး၏အကူအညီကို တောင်းဆိုကြည့်ပါလေ။

^၁၃ တစ်ဆိုင်မှတစ်ဆိုင် အမှုဆောင်ခြင်းသည် အခွင့်အရေးသာသည့်အပိုင်းများရှိသည်။ ဆိုင်ဖွင့်ချိန်တွင် လူမရှိသည့်နေရာ မရှိသလောက်ဖြစ်သည်။ စီးပွားလုပ်သူတို့သည် ကျမ်းစာကို စိတ်မဝင်စားကြစေကာမူ များသောအားဖြင့် ရည်မွန်ကြသည်။ စောစောအမှုဆောင်ထွက်ပါ; လက်သင့်ခံမှု ပိုကောင်းပေလိမ့်မည်။ မိမိကိုယ်ကို မိတ်ဆက်ပြီးနောက် လုပ်ငန်းရှင်များကို အိမ်တွင် မတွေ့နိုင်သည့်အတွက် သူတို့၏အလုပ်ခွင်တွင် မိနစ်အနည်းငယ်တွေ့ဆုံပြီး နောက်ဆုံးထုတ် ကင်းမျှော်စင် နှင့် နိုးလော့! တို့ကို လာပို့ပေးကြောင်း ပြောနိုင်သည်။ လုပ်ငန်းရှင်များစွာတို့သည် နောက်ဆုံးကမ္ဘာ့အဖြစ်အပျက်များကို သိလိုသော်လည်း စာဖတ်ဖို့အချိန် များများမရသောကြောင့် ကျွန်ုပ်တို့၏မဂ္ဂဇင်းများကို တန်ဖိုးထားကြကြောင်း ပြောပြပါ။ ဤမဂ္ဂဇင်းများသည် ဘာသာရေး၊ နိုင်ငံရေးနှင့် စီးပွားရေးငဲ့ကွက်မှုမပါဘဲ သိသင့်သောအကြောင်းများကို ရှုထောင့်အသစ်ဘက်မှ စဉ်းစားကြည့်စေသည်။ စီးပွားရေးရပ်ကွက်တွင် တွေ့ရှိသော စိတ်ဝင်စားသူများထံပြန်သွားရန် မဂ္ဂဇင်းလမ်းကြောင်း စီစဉ်ထားနိုင်သည်။

^၁၄ မိသားစုလိုက် ပြင်ဆင်– သင့်မိသားစုသင်အံမှုတွင် ရပ်ကွက်၌ အသုံးပြုနိုင်သော နောက်ဆုံးထုတ်မဂ္ဂဇင်းများမှ ဆောင်းပါးများကို ဆွေးနွေးရန် အချိန်အနည်းငယ်ကန့်သတ်ပေးနိုင်သည်။ မိသားစုအဝင်ဖြစ်သူ—ကလေးများပါအပါအဝင်—တို့သည် တင်ဆက်ပုံများကိုလည်းကောင်း၊ “မအားဘူး၊” “ကိုယ်ပိုင်ဘာသာရှိတယ်၊” သို့မဟုတ် “စိတ်မဝင်စားဘူး” အစရှိသည့် ကန့်ကွက်ပြောဆိုတတ်သောစကားများကို မည်သို့ဖြေဆိုနိုင်ပုံကိုလည်းကောင်း အလှည့်ကျစီ လေ့ကျင့်နိုင်သည်။ မဂ္ဂဇင်းဝေငှခြင်းလုပ်ငန်း၌ မိသားစုတစ်စုလုံး မှန်မှန်ပါဝင်နိုင်ရန် ဝိုင်းဝန်းကူညီနိုင်သည်။

^၁၅ စာအုပ်ကြီးသင်တန်းမှူးများ ကူညီပေးနိုင်သည်– လက်တွေ့ကျသည့်အခါတိုင်း နိုင်ငံတော်ခန်းမတွင် အသင်းတော်တစ်ခုလုံး စုဝေးတွေ့ဆုံမည့်အစား မဂ္ဂဇင်းနေ့အတွက် လုပ်ငန်းတော်အစည်းအဝေးကို စာအုပ်ကြီးသင်တန်းကျင်းပသည့်နေရာတွင် စီစဉ်ပါ။ လယ်ကွင်းလုပ်ငန်းအစည်းအဝေးကို တာဝန်ယူသူသည် အုပ်စုအတွက် အကြံပေးချက်အတိအကျကိုတင်ပြရန် အသင့်ရှိသင့်သည်။ ယင်းတို့တွင် တင်ဆက်ပုံကောင်းတစ်ခု၊ မိမိအရပ်ဒေသတွင် စိတ်ဝင်စားမှုကို နှိုးဆွပေးရန် နောက်ဆုံးထုတ်စာစောင်များမှ အသုံးပြုနိုင်မည့် အချက်တစ်ချက်နှစ်ချက် ပါဝင်နိုင်သည်။ လယ်ကွင်းလုပ်ငန်းအတွက် အစည်းအဝေးများသည်—အုပ်စုကိုဖွဲ့စည်းခြင်းအပါအဝင်—မကြာရှည်ဘဲ ၁၀ မှ ၁၅ မိနစ်ခန့်သာရှိသင့်သည်။ လယ်ကွင်းလုပ်ငန်းထမ်းဆောင်ချိန်တစ်လျှောက် အုပ်စုတစ်စုလုံး လုပ်ကိုင်ဆောင်ရွက်စရာ ရပ်ကွက်အလုံအလောက်ရှိနေရန် သင်တန်းမှူးများက အသေအချာစီစဉ်ထားသင့်သည်။

^၁၆ မဂ္ဂဇင်းများကို တန်ဖိုးထားလေးမြတ်မှု တင်ပြပါ– ၁၉၉၃ ဇူလိုင် ကျွန်ုပ်တို့၏နိုင်ငံတော်ဓမ္မအမှုပါ “ကင်းမျှော်စင် နှင့် နိုးလော့! ကို ကောင်းစွာအသုံးပြုခြင်း” ဆောင်းပါးတွင် ဤအရေးကြီးသောအချက်ကို တင်ပြထားသည်– “ကင်းမျှော်စင်နှင့်နိုးလော့တို့၏ရက်စွဲသည် တစ်လနှစ်လနောက်ကျစေကာမူ တန်ဖိုးမလျော့သွားပါ။ ယင်းတို့တွင်ပါသောအကြောင်းများသည် အချိန်ကုန်လွန်သွားသည့်အတွက် အရေးမကြီးတော့သည်မဟုတ်ပါ။ . . . ယခင်မဂ္ဂဇင်းများကိုစုပုံစေ၍ လုံးဝမသုံးဘဲထားခြင်းက ဤအဖိုးတန်လက်နက်များကို တန်ဖိုးမထားကြောင်း တင်ပြပါသည်။ . . . ထိုကြောင့် ယခင်မဂ္ဂဇင်းများကိုဘေးဖယ်၍ မေ့လျော့ထားမည့်အစား စိတ်ဝင်စားသူတို့၏လက်ထဲအရောက် ဝေငှပေးခြင်းငှာ အထူးကြိုးစားခြင်းသည် ပို၍ကောင်းမည်မဟုတ်လော။”

^၁၇ ယနေ့ သမ္မာတရားကိုရှာဖွေနေသည့် စိတ်နှလုံးရိုးဖြောင့်သူ မြောက်မြားစွာရှိသည်။ မဂ္ဂဇင်းတစ်စောင်တွင်ပါသောအကြောင်းတစ်ခုသည် သမ္မာတရားသို့ သူတို့ကိုပို့ဆောင်ပေးရန် လိုအပ်နေသည့်အကြောင်းပင် ဖြစ်နေပေမည်! ယေဟောဝါသည် စိတ်လှုပ်ရှားဖွယ်သတင်းတရားကို ကြေညာရန်တာဝန်အပ်နှင်းထားပြီ။ ဤသတင်းကို သူတစ်ပါးကြားသိစေရန် မဂ္ဂဇင်းများက အရေးပါသောကဏ္ဍမှဆောင်ရွက်ပေးသည်။ နောင်တွင် မဂ္ဂဇင်းများဝေငှခြင်းကို အသင်ပိုမိုစိတ်ဝင်စားပါမည်လော။ ဤသီတင်းပတ်ကုန်ရက်များတွင်ပင် ယခုတင်ပြသောအကြံပြုချက်အချို့ကို သင်အသုံးပြုမည်လော။ ထိုသို့ပြုမည်ဆိုလျှင် ကောင်းချီးများစွာရရှိလိမ့်မည်။

လက်တွေ့ကျ အကြံပြုချက်များ–

▪ မဂ္ဂဇင်းများကို ကြိုတင်ဖတ်ပါ။ ဆောင်းပါးများကို ကောင်းစွာသိထားပါ။

▪ သင့်ရပ်ကွက်တွင် လူအများစိတ်ဝင်စားမည့် ဆောင်းပါးတစ်ခုကို ရွေးချယ်ပါ။

▪ ယောက်ျား၊ မိန်းမ၊ သို့မဟုတ် လူငယ်များဖြစ်စေ လူအသီးသီးအတွက် သင့်တော်မည့် တင်ဆက်ပုံကို ပြင်ဆင်ထားပါ။ မဂ္ဂဇင်းသည် အိမ်ရှင်နှင့် မည်သို့သက်ဆိုင်ပြီး မိသားစုတစ်စုလုံးအတွက်ဖြစ်ကြောင်းကို ပြောပြပါ။

▪ လူအများ အိမ်တွင်ရှိမည့်အချိန်၌ လယ်ကွင်းလုပ်ငန်းကို ထမ်းဆောင်ရန် စီစဉ်ပါ။ အသင်းတော်အချို့က မဂ္ဂဇင်းများနှင့် ညနေပိုင်းတွင် သက်သေခံထွက်ဖို့ စီစဉ်သည်။

▪ သင့်တင်ဆက်ပုံကို လိုရင်းတိုရှင်းဖြစ်စေပါ။

▪ အမြန်အဆန် စကားမပြောပါနှင့်။ နားထောင်သူသည် စိတ်မဝင်စားပါက အလျင်အမြန်ပြောဆိုခြင်းသည် အထောက်အကူပြုလိမ့်မည်မဟုတ်ပါ။ သက်သောင့်သက်သာရှိပါ။ အိမ်ရှင်အား တုံ့ပြန်ခွင့်ပေးပါ။

မဂ္ဂဇင်းများကို တစ်အိမ်မှတစ်အိမ် ဝေငှခြင်း

▪ ခင်မင်သောအပြုံးနှင့် ကြင်နာသောအသံထားမျိုး ရှိပါ။

▪ မဂ္ဂဇင်းများနှင့်ပတ်သက်၍ အားတက်သရောဖြစ်ပါ။

▪ ဖြည်းဖြည်းနှင့် သဲသဲကွဲကွဲပြောဆိုပါ။

▪ အကြောင်းတစ်ခုတည်းကို သာပြောပါ; တိုတိုတုတ်တုတ်ဖြင့်စိတ်ဝင်စားမှုကို နှိုးဆော်ပြီး ယင်း၏တန်ဖိုးကို အိမ်ရှင်အားဖော်ပြပါ။

▪ ဆောင်းပါးတစ်ခုတည်းကိုသာ ပေါ်လွင်စေပါ။

▪ မဂ္ဂဇင်းတစ်စောင်တည်းကိုသာပြပြီး အခြားတစ်ခုကို တွဲဖက်မဂ္ဂဇင်းအဖြစ် ဝေငှပါ။

▪ အိမ်ရှင်လက်ထဲ မဂ္ဂဇင်းများကို ထည့်ပါ။

▪ ပြန်လာရန်အစီအစဉ်ရှိကြောင်း အိမ်ရှင်ကိုအသိပေးပါ။

▪ မဂ္ဂဇင်းများကို လက်မခံလျှင် ခင်မင်မှုနှင့်အပြုသဘောရှိစိတ်ထားဖြင့် နိဂုံးချုပ်ပါ။

▪ စိတ်ဝင်စားသူနှင့် ဝေငှခဲ့သမျှနေရာများကို တစ်အိမ်မှတစ်အိမ်မှတ်တမ်းတွင် ရေးမှတ်ထားပါ။

မဂ္ဂဇင်းများဝေငှရန် အခွင့်အရေးများ

▪ တစ်အိမ်မှတစ်အိမ် သက်သေခံခြင်း

▪ လမ်းပေါ်တွင် သက်သေခံခြင်း

▪ တစ်ဆိုင်မှတစ်ဆိုင် လုပ်ငန်း

▪ မဂ္ဂဇင်းလမ်းကြောင်း

▪ ညနေပိုင်း သက်သေခံခြင်း

▪ ပြန်လည်ပတ်မှုများ ပြုလုပ်သည့်အခါ

▪ ယခင်က ကျမ်းစာလေ့လာခဲ့သူများထံ ပြန်သွားသည့်အခါ

▪ ခရီးသွားစဉ်၊ ဈေးဝယ်စဉ်

▪ ဆွေမျိုးများ၊ လုပ်ဖော်ကိုင်ဖက်များ၊ အိမ်နီးချင်းများ၊ ကျောင်းနေဖက်များ၊ ဆရာဆရာမများတို့နှင့် စကားစမြည်ပြောဆိုသည့်အခါ

▪ သယ်ယူပို့ဆောင်ရေးယာဉ်များပေါ်တွင်ရှိစဉ်၊ ဧည့်ခန်းများတွင်ရှိနေစဉ်