အစည်းအဝေးများတွင်အဖြေပေးခြင်းဖြင့်တစ်ဦးကိုတစ်ဦးတည်ဆောက်ပေးကြလော့

^၁ ဟေဗြဲ ၁၀:၂၄ တွင် ‘မေတ္တာစိတ်ရှိစေရန်နှင့် ကောင်းသောအကျင့်ကိုကျင့်စေရန် တစ်ဦးကိုတစ်ဦးတိုက်တွန်းနှိုးဆော်’ ကြဖို့ ကျွန်ုပ်တို့ကိုတိုက်တွန်းထားသည်။ ယင်းတွင် အသင်းတော်အစည်းအဝေးများ၌ အဓိပ္ပာယ်ရှိသောအဖြေများပေးခြင်းဖြင့် တစ်ဦးကိုတစ်ဦး တည်ဆောက်ပေးခြင်းပါဝင်သည်။ ကျွန်ုပ်တို့ အဘယ်ကြောင့် အဖြေပေးသင့်သနည်း။ ယင်းကို ကျွန်ုပ်တို့ မည်သို့လုပ်ဆောင်နိုင်သနည်း။ မည်သူတို့ အကျိုးခံစားရမည်နည်း။

^၂ သင်၏နားလည်မှုကို တိုးမြှင့်ပေးပြီး သင့်အား ဝိညာဉ်ခွန်အားရှိစေသည့် ရိုးရှင်းသောဖွင့်ဟတင်ပြချက်များကို အခြားသူများထံမှကြားရခြင်းဖြင့် သင် အကျိုးခံစားရသည့်အကြိမ်များစွာကို စဉ်းစားကြည့်ပါ။ သူတို့အတွက် ထိုအတိုင်းပင်လုပ်ဆောင်ရန်အခွင့်အရေး သင့်တွင်ရှိပါသည်။ သင်ပါဝင်ဖြေဆိုသောအခါ တက်ရောက်သူအားလုံးကို အားရှိစေရန် “ဝိညာဉ်ဆုကျေးဇူးတစ်စုံတစ်ရာကို ဝေမျှ” လိုသည့်သင့်ဆန္ဒကို တင်ပြသည်။—ရော. ၁:၁၁၊ ၁၂၊ သမ။

^၃ ကောင်းသောအဖြေများ ပေးနိုင်ပုံ– အပိုဒ်ရှိအချက်တိုင်းကိုဖော်ပြသည့် ရှည်လျားသောအဖြေများကို မပေးပါနှင့်။ အဖြေရှည်လျှင် တိကျသည့်အဖြေကိုညွှန်ပြရန် အထမမြောက်ဖြစ်စေကာ အခြားသူများကို ပါဝင်ရခြင်းမှ စိတ်ပျက်စေနိုင်သည်။ အပိုဒ်နှင့်စပ်လျဉ်း၍ ဦးဆုံးပေးသည့်အဖြေသည် တိုတုတ်ပြီး ပုံနှိပ်မေးခွန်း၏တိုက်ရိုက်အဖြေ ဖြစ်သင့်သည်။ ထို့နောက် ထပ်ဆင့်အဖြေပေးသူများသည် အကြောင်းအရာ၏လက်တွေ့ကျသက်ဆိုင်မှုကို တင်ပြနိုင်သည် သို့မဟုတ် ကျမ်းချက်များသက်ဆိုင်ပုံကို တင်ပြနိုင်သည်။ ကျောင်းလမ်းညွှန်စာအုပ်၊ စာမျက်နှာ ၈၆-၈ ကိုရှု။

^၄ သင်သည် အဖြေပေးရမည်ကိုစဉ်းစားပြီး အတော်အတန်စိုးရိမ်နေပါက တိုတုတ်သည့်အဖြေတစ်ခုကို ကြို၍ပြင်ထားပါ၊ ထိုအပိုဒ်အတွက် သင့်ကိုခေါ်ဖို့ သင်တန်းမှူးအား ပြောထားပါ။ အစည်းအဝေးအချို့တွင် သင်ထိုသို့ပြုလုပ်ပြီးနောက် ပါဝင်ရခြင်းသည် ပို၍လွယ်ကူလာမည်။ လူအများရှေ့ မိမိတို့၏စကားပြောဆိုနိုင်စွမ်းကို ယုံကြည်စိတ်ချမှုမရှိကြောင်း ဖော်ပြခဲ့ကြသည့် မောရှေနှင့်ယေရမိကို ပြန်အမှတ်ရပါ။ (ထွ. ၄:၁၀; ယေ. ၁:၆၊ အောက်ခြေမှတ်ချက်။) သို့သော် ယေဟောဝါသည် သူတို့အား မိမိအစားစကားပြောဆိုရန် ကူညီခဲ့ရာ သင့်ကိုလည်း ကိုယ်တော်ကူညီတော်မူလိမ့်မည်။

^၅ သင့်အဖြေများမှ မည်သူတို့အကျိုးခံစားရမည်နည်း။ သင်ကိုယ်တိုင်အကျိုးခံစားရ၏၊ အကြောင်းမှာ သင့်အဖြေများသည် သင်၏စိတ်နှင့်နှလုံးတွင် သမ္မာတရားကို ပို၍မြဲမြံစွာစွဲမှတ်သွားစေပြီး ယင်းက နောင်တွင် အကြောင်းအရာကိုပြန်မှတ်မိရန် ပို၍လွယ်ကူစေသောကြောင့်ဖြစ်သည်။ ထို့အပြင် အခြားသူများသည် သင်၏တည်ဆောက်မှုပေးသော ဖွင့်ဟတင်ပြချက်များကိုကြားရခြင်းမှ အကျိုးခံစားရသည်။ အတွေ့အကြုံရှိသူ၊ လူငယ်၊ ရှက်တတ်သူဖြစ်စေ၊ လူသစ်ဖြစ်စေ အားလုံးတို့သည် အသင်းတော်အစည်းအဝေးများတွင် သူတို့၏ယုံကြည်ခြင်းကို ကြိုးစားတင်ပြကြသောအခါ ကျွန်ုပ်တို့ကိုအားရှိစေပါသည်။

^၆ အစည်းအဝေးများတွင် တစ်ဦးကိုတစ်ဦးတည်ဆောက်ပေးရန် သူတို့ကိုအသုံးပြုသောအခါ ‘အချိန်တန်၍ပြောသောစကားများသည် အလွန်လျောက်ပတ်’ ကြောင်း ကျွန်ုပ်တို့အမှန်ပင်တွေ့ရှိကြသည်!—သု. ၁၅:၂၃။