ကျွန်ုပ်တို့ခေတ်အတွက် သတိပေးပုံနမူနာများကိုဂရုပြုရန် လှိုက်လှဲသောမေတ္တာရပ်ခံချက်

ကျွန်ုပ်တို့အားလုံးသည် ကျွန်ုပ်တို့ခေတ်အတွက်သတိပေးပုံနမူနာများ ဗီဒီယိုခွေတွင် တင်ဆက်ခဲ့သည့်ကျမ်းစာပြဇာတ်မှ သင်ယူရရှိခဲ့သောသင်ခန်းစာများကို နှလုံးသွင်းခြင်းအားဖြင့် သမာဓိဆက်လက်ထိန်းသိမ်းရန်သန္နိဋ္ဌာန်ကို ခိုင်မာစေနိုင်သည်။ ယင်းကိုမကြည့်မီ ကျေးဇူးပြု၍ တောလည်ရာအခန်းကြီး ၂၅ နှင့် ကျမ်းစာစောင်များအပေါ် ထိုးထွင်းသိမြင်ခြင်း၊ အတွဲ ၂၊ စာမျက်နှာ ၄၁၉၊ အပိုဒ် ၃-၅ ပါနောက်ခံအကြောင်းအရာကိုဖတ်ပါ။ ထို့နောက် ဤမေးခွန်းများကို ဖြေပါ– မောဘလူမျိုးများကား မည်သူတို့နည်း၊ သူတို့ကိုစစ်မဆင်နွှဲရန် မောရှေအား ယေဟောဝါ အဘယ်ကြောင့်မိန့်ကြားခဲ့သနည်း။ (တရား. ၂:၉) ဗာလမ်သည် ဣသရေလလူမျိုးကိုဖျက်ဆီးရန် မောဘလူမျိုးအားအသုံးပြုဖို့ မည်သို့ကြံစည်ခဲ့သနည်း။ ကတိထားရာပြည်သို့မဝင်မီလေးတွင် ဣသရေလလူမျိုးများစွာ ကျဆုံးခဲ့ကြရသော အရေးပါသည့်စမ်းသပ်မှုတစ်ခုကို ကျွန်ုပ်တို့ အဘယ်ကြောင့်မမေ့သင့်သနည်း။—၁ ကော. ၁၀:၁၁၊ ၁၂။

သတိပေးပုံနမူနာများ ဗီဒီယိုခွေကိုကြည့်နေစဉ် ဘုရားသခင်အပေါ် သစ္စာရှိကြောင်းသက်သေထူကာ ကိုယ်တော့်မျက်နှာသာခံစားလိုပါက ယနေ့ ကျွန်ုပ်တို့ အလေးအနက်ထားရမည့် အောက်ပါဘဝကဏ္ဍလေးခုအကြောင်းကို စဉ်းစားပါ။ (၁) သဘောထား– ဣသရေလလူအချို့သည် ယေဟောဝါနှင့် ကိုယ်တော့်အစီအစဉ်အပေါ် မှားယွင်းသောသဘောထားကို မည်သို့ပြသခဲ့ကြသနည်း။ ယင်းအစား အဘယ်သဘောထားကို ထင်ဟပ်ပြသရန် ကျွန်ုပ်တို့ကြိုးစားသင့်သနည်း။ (၂) အပေါင်းအသင်းများ– ယေဟောဝါသည် ဣသရေလလူမျိုးအား မောဘလူမျိုးနှင့် အဘယ်ကြောင့် မိတ်ဆွေများမဖြစ်စေလိုခဲ့သနည်း။ (ထွ. ၃၄:၁၂; သု. ၁၃:၂၀) ကျွန်ုပ်တို့၏မိတ်ဆွေများကို အဘယ်ကြောင့် ပညာရှိရှိရွေးချယ်ရမည်နည်း။ (၃) အကျင့်စာရိတ္တ– မကောင်းသောအပေါင်းအသင်းများက ဣသရေလလူမျိုး ၂၃,၀၀၀ ခန့်ကို အဘယ်ကြီးလေးသောအပြစ်သို့ ဦးတည်ပေးခဲ့သနည်း။ (၁ ကော. ၁၀:၈) ယနေ့ ဘုရားသခင့်လူမျိုးအချို့ကို မည်သည့်အရာက အကျင့်ယိုယွင်းရန်သွေးဆောင်သနည်း၊ သို့သော် ကျွန်ုပ်တို့ကိုယ်ကို မည်သို့ကာကွယ်နိုင်သနည်း။ (၄) ဝတ်ပြုရေး– ဣသရေလလူမျိုးသည် ဝတ်ပြုရေးသန့်ရှင်းမှုနှင့်စပ်လျဉ်း၍ မည်သို့စမ်းသပ်ခံခဲ့ရသနည်း။ ယနေ့ အချို့သူတို့ အဘယ်ပါးနပ်သော ရုပ်တုကိုးကွယ်မှုအသွင်ကို လက်လျှော့အရှုံးပေးမိနိုင်သနည်း၊ သို့သော် ယင်းကို ကျွန်ုပ်တို့ မည်သို့ရှောင်ကြဉ်နိုင်သနည်း။—ကော. ၃:၅။

ပြဇာတ်တွင် ယာမိန်သည် သူ၏စာရိတ္တဆိုင်ရာသမာဓိအတွက် မည်သို့ကောင်းချီးခံစားခဲ့ရသနည်း။ ဤဗီဒီယိုခွေအားဖြင့် အုပ်ချုပ်ရေးအဖွဲ့က စစ်မှန်သောခရစ်ယာန်အားလုံးကို လှိုက်လှဲစွာ မေတ္တာရပ်ခံနေသောအရာကား အဘယ်နည်း။ သင်သည် အိမ်ထောင်ဦးစီးတစ်ဦးဖြစ်လျှင် ဤအစီအစဉ်ကို သင့်အိမ်သားများ ထပ်ခါထပ်ခါကြည့်ရှုခြင်းသည် ပညာရှိရာရောက်မည်ဟု အဘယ်ကြောင့်ယူမှတ်သနည်း။