သမ္မာကျမ်းစာ အမှန်တကယ်သွန်သင်ရာမှာ အဘယ်နည်း လေ့လာခြင်းမှ ပျော်ရွှင်မှုရယူပါ

^၁ “ဘုရားရေးရာနာခံမှု” ခရိုင်စည်းဝေးကြီးများ၏ စိတ်လှုပ်ရှားဖွယ်ကဏ္ဍတစ်ခုမှာ သမ္မာကျမ်းစာ အမှန်တကယ်သွန်သင်ရာမှာ အဘယ်နည်း ဟူသောစာအုပ် ထုတ်ဝေခြင်းဖြစ်သည်။ ဤစာအုပ်ကို မကြာမီ ကျယ်ကျယ်ပြန့်ပြန့် အသုံးပြုကြတော့မည်၊ အထူးသဖြင့် အိမ်တွင်းကျမ်းစာသင်အံမှုများကျင်းပရာတွင်ဖြစ်၏။ ထို့ကြောင့် ဤစာအုပ်အသစ်နှင့် ကောင်းစွာအကျွမ်းတဝင်ရှိနေဖို့လိုသည်။ ၂၀၀၆၊ ဧပြီ ၁၇ ရက်အပတ်မှစ၍ အသင်းတော်စာအုပ်ကြီးသင်တန်းတွင် ယင်းကိုလေ့လာကြမည်ဖြစ်ရာ ထိုသို့အကျွမ်းတဝင်ရှိနိုင်မည်ဖြစ်သည်။

^၂ အသင်းတော်စာအုပ်ကြီးသင်တန်း ကြီးကြပ်မှူးသည် အခန်းတစ်ခန်းစီ၏ အစတွင်ဖော်ပြထားသည့်မေးခွန်းများကို အာရုံစိုက်စေပါမည်။ ထို့နောက် စာမျက်နှာအောက်ဘက်ရှိ မေးခွန်းများကိုအသုံးပြု၍ သင်တန်းကျင်းပမည်။ အဓိကကျမ်းချက်များကို ဖတ်ရှုဆွေးနွေးမည်။ အခန်းတစ်ခန်းစီ၏အဆုံးရှိ “သမ္မာကျမ်းစာသွန်သင်ရာ” လေးထောင့်ကွက်တွင် အခန်း၏နိဒါန်းမေးခွန်းများအတွက် ကျမ်းစာအဖြေများပါရှိသောကြောင့် အကြောင်းအရာကိုသုံးသပ်ရာတွင် ယင်းလေးထောင့်ကွက်သည် အထောက်အကူဖြစ်မည်။ ဤစာအုပ်သည် အကြောင်းအရာများကို ရိုးရိုးရှင်းရှင်းရှင်းနှင့် စိတ်ဝင်စားဖွယ် ဆွေးနွေးထားသောကြောင့် မှတ်ချက်ပေးရသည်ကို သင် ပျော်မွေ့ပေမည်။

^၃ ဤစာအုပ်၏ နောက်ဆက်တွဲက အကြောင်းအရာအမျိုးမျိုးကို အသေးစိတ်ဖော်ပြပေးသည်။ ကျမ်းစာသင်သားများသည် အကြောင်းအရာတစ်ခုနှင့်ပတ်သက်၍ ထပ်ဆင့်သိဖို့လိုအပ်သည့်အခါ ယင်းကို ကျွန်ုပ်တို့အသုံးပြုနိုင်ပါလိမ့်မည်။ အသင်းတော်စာအုပ်ကြီးသင်တန်းတွင် နောက်ဆက်တွဲအပိုင်းများကို ရံဖန်ရံခါ ဆွေးနွေးပါမည်။ စာအုပ်ကြီးသင်တန်းအပိုဒ်ဖတ်သူသည် အကြောင်းအရာတစ်ခုနှင့်ဆိုင်သည့် နောက်ဆက်တွဲအကြောင်းအရာအားလုံးကို ဖတ်ရှုမည်။ ရှည်သောဆောင်းပါးများကို အပိုင်းများခွဲ၍ ဆွေးနွေးမည်။ နောက်ဆက်တွဲတွင် လေ့လာရန်မေးခွန်းများမပါချေ။ သို့သော် ကြီးကြပ်မှူးသည် အဓိကအချက်များကိုပေါ်လွင်စေသည့် မေးခွန်းများမေးခြင်းဖြင့် တက်ရောက်သူများထံမှ အဖြေများနှိုက်ယူနိုင်သည်။

^၄ အသင်းတော်စာအုပ်ကြီးသင်တန်းတွင် သမ္မာကျမ်းစာသွန်သင်ရာ စာအုပ်ကို ခပ်သွက်သွက်လေ့လာသွားမည်။ ဤစာအုပ်ကို အခြားသူများ၊ အထူးသဖြင့် ကျမ်းစာအသိပညာနည်းသူ သို့မဟုတ် လုံးဝမရှိသူများနှင့်လေ့လာသည့်အခါ ထိုနှုန်းအတိုင်းသွားရန် ကျွန်ုပ်တို့မမျှော်လင့်ကြပါ။ (တ. ၂၆:၂၈၊ ၂၉) အိမ်တွင်းကျမ်းစာသင်အံမှုများတွင် ကျမ်းချက်များကို ပို၍စေ့စေ့စပ်စပ်ဆွေးနွေးခြင်း၊ ရုပ်ပုံများကိုရှင်းပြခြင်း စသည်တို့ကိုပြုလုပ်ဖို့လိုပေမည်။ ထို့ကြောင့် သမ္မာကျမ်းစာ အမှန်တကယ်သွန်သင်ရာမှာ အဘယ်နည်း စာအုပ်ကို လေ့လာသည့်အခါ အပတ်တိုင်းတက်ရောက်ရန်နှင့် အပြည့်အဝပါဝင်ရန် သင် ပန်းတိုင်ထားပါ။