သမ္မာကျမ်းစာသွန်သင်ရာစာအုပ်ကို အသုံးပြုရာတွင် ကြီးမြတ်သောဆရာကို တုပခြင်း

၁။ ယေရှု မည်သို့သွန်သင်ခဲ့သနည်း။

^၁ ကြီးမြတ်သောဆရာယေရှုသည် ရိုးရှင်းသည့်နည်းဖြင့် သွန်သင်လေ့ရှိသည်။ တစ်ခါတစ်ရံ နားထောင်သူများ စဉ်းစားလာစေရန် သူတို့၏ရှုမြင်ပုံကို ဦးစွာမေးမြန်းသည်။ (မ. ၁၇:၂၄-၂၇) ဘုရားသခင့်နှုတ်ကပါဌ်တော်ကို အာရုံစိုက်စေသည်။ (မ. ၂၆:၃၁; မာ. ၇:၆) တပည့်များ ဆက်၍သင်ယူသွားရမည်ကို သိထားသဖြင့် အကြောင်းအရာမြောက်မြားစွာ သွန်သင်ပေးခြင်းမပြုခဲ့ပေ။ (ယော. ၁၆:၁၂) မိမိသွန်သင်ရာကို တပည့်များ ယုံကြည်နားလည်ခြင်းရှိမရှိကိုလည်း ကိုယ်တော်ဂရုစိုက်ခဲ့သည်။ (မ. ၁၃:၅၁) ထပ်တူနည်းများဖြင့် သွန်သင်နိုင်ရန် ရည်ရွယ်၍ သမ္မာကျမ်းစာသွန်သင်ရာစာအုပ်ကို ထုတ်ဝေထားသည်။

၂။ နိဒါန်းမေးခွန်းများကို မည်သို့အသုံးပြုနိုင်သနည်း။

^၂ နိဒါန်းမေးခွန်းများ– အခန်းတစ်ခန်းကိုစတင်လေ့လာစဉ် ခေါင်းစဉ်အောက်ရှိ နိဒါန်းမေးခွန်းများကို အာရုံစိုက်စေပါ။ သင်သား၏သိလိုစိတ်ကိုနှိုးဆွပေးရန် ထိုမေးခွန်းများကို အသုံးပြုပါ။ သို့မဟုတ် မေးခွန်းများကို တိုတိုတုတ်တုတ်ဖြေဆိုစေနိုင်သည်။ သူ၏မှတ်ချက်များကို အသေးစိတ်ဆွေးနွေးရန်၊ ဖြေဆိုချက်အမှားတိုင်းကို ပြုပြင်ပေးရန် မလိုပါ။ သူ့မှတ်ချက်များအတွက် ကျေးဇူးတင်ကြောင်းပြောပြီး အကြောင်းအရာကို စတင်ဆွေးနွေးပါ။ နိဒါန်းမေးခွန်းများကို သူဖြေဆိုပုံက ပို၍အာရုံစိုက်ရှင်းပြဖို့လိုသည့် အကြောင်းအရာကိုသိရှိစေနိုင်မည်။

၃။ လေ့လာမှုကို မည်သို့ရိုးရှင်းစေနိုင်သနည်း။

^၃ ကျမ်းချက်များ– လေ့လာမှုတွင် ကျမ်းစာကိုအခြေခံသင့်သည်။ (ဟေဗြဲ ၄:၁၂) သို့သော် ကိုးကားထားသော ကျမ်းချက်တိုင်းကို ဖတ်ရန်မလိုပေ။ ကျွန်ုပ်တို့၏ယုံကြည်ချက်များအတွက် အခြေခံဖြစ်သောကျမ်းချက်များကို အလေးပေးပါ။ နောက်ခံအခြေအနေကို ဖော်ပြသောကျမ်းချက်များကို ဖတ်စရာလိုမည် မဟုတ်ပေ။ သမ္မာကျမ်းစာသွန်သင်ရာစာအုပ်သည် အမှန်တရားကို ရိုးရှင်းသောနည်းဖြင့် တင်ဆက်ထားသည်။ ထို့ကြောင့် လေ့လာမှုကို ရိုးရှင်းစေပါ။ အဓိကအချက်များကို အာရုံစိုက်ပါ။ အသေးစိတ်အချက်များကို အကျယ်ချဲ့ရှင်းပြခြင်း သို့မဟုတ် ပြင်ပအကြောင်းအရာများကို ထည့်သွင်းရှင်းပြခြင်းတို့ကို ရှောင်ပါ။

၄။ လေ့လာမှုပြုစဉ် နောက်ဆက်တွဲကို ဆွေးနွေးသင့်မသင့် မည်သို့ဆုံးဖြတ်နိုင်သနည်း။

^၄ နောက်ဆက်တွဲ– အဓိကအကြောင်းအရာကို ထပ်ဆင့်ရှင်းပြသည့် နောက်ဆက်တွဲ ၁၄ ခုပါရှိသည်။ ယင်းတို့ကို လေ့လာမှုပြုစဉ် ရှင်းပြလိုက ရှင်းပြနိုင်သည်။ လေ့လာသည့်အကြောင်းအရာကို သင်သား သဘောပေါက်လက်ခံမည်ဆိုလျှင် သက်ဆိုင်သောနောက်ဆက်တွဲကို သူ့ဘာသာဖတ်ရှုစေနိုင်သည်။ ဥပမာ၊ ယေရှုသည် မေရှိယဖြစ်ကြောင်း သင်သားလက်ခံသည်ဆိုလျှင် “ယေရှုခရစ်ကား မည်သူနည်း” ဟူသည့် အခန်း ၄ ကိုဆွေးနွေးစဉ် “ယေရှုခရစ်—ကတိထားရာမေရှိယ” နောက်ဆက်တွဲကို ဆွေးနွေးဖို့လိုမည်မဟုတ်ပေ။ လေ့လာမှုပြုစဉ် နောက်ဆက်တွဲ သို့မဟုတ် ယင်းမှအပိုင်းတစ်ပိုင်းကို ဆွေးနွေးခြင်းဖြင့် အကျိုးရှိနိုင်သည့် အချိန်အခါများလည်း ရှိပေမည်။

၅။ နောက်ဆက်တွဲကို ဆွေးနွေးမည်ဆိုပါက မည်သို့လုပ်ဆောင်နိုင်သနည်း။

^၅ နောက်ဆက်တွဲကို ဆွေးနွေးမည်ဆိုပါက မေးခွန်းများကို ကြိုတင်ပြင်ဆင်ဖို့လိုသည်။ အဓိကအကြောင်းအရာကို ဆွေးနွေးသကဲ့သို့ နောက်ဆက်တွဲမှအပိုဒ်များကို ဆွေးနွေးပါ။ သို့မဟုတ် လေ့လာမှုပြုစဉ် သင်သား၏အခြေအနေပေါ်မူတည်ပြီး နောက်ဆက်တွဲကို ပြန်သုံးသပ်လိုပေမည်။ ဤနည်းဖြင့် သူ့ဘာသာဖတ်ရှုထားရာကို ပိုနားလည်နိုင်ရန် သင်ကူညီပေးနိုင်မည်။

၆။ ပြန်လည်သုံးသပ်ရန် လေးထောင့်ကွက်ကို မည်သို့အသုံးပြုနိုင်သနည်း။

^၆ ပြန်လည်သုံးသပ်ရန် လေးထောင့်ကွက်–  အခန်းတစ်ခုစီ၏အဆုံးမှ လေးထောင့်ကွက်တွင် နိဒါန်းမေးခွန်းများ၏အဖြေကို ဖော်ပြထားသည်။ လေးထောင့်ကွက်ပါအချက်များကိုသုံးကာ အဓိကအချက်များကို ပြန်လည်သုံးသပ်နိုင်သည်။ လေးထောင့်ကွက်ပါအချက်များနှင့် ပူးတွဲပါကျမ်းချက်များကို ဖတ်ရှုဆွေးနွေးခြင်းက အကျိုးရှိကြောင်း ကြေညာသူအချို့ တွေ့ရှိခဲ့ကြပြီ။ သူတို့သည် ထိုအချက်များကို ပူးတွဲပါကျမ်းချက်များက မည်သို့ထောက်ခံကြောင်း သင်သားအား အတိုချုပ်ရှင်းပြစေသည်။ ဤနည်းဖြင့် အဓိကအချက်များကိုသာမက ကျမ်းစာက ယင်းတို့ကိုမည်သို့ထောက်ခံကြောင်း သင်သား အမှန်နားလည်,မလည်၊ ယင်းကို သူလက်ခံ,မခံ သိရှိစေသည်။ ထို့ပြင် အခြားသူများအား အမှန်တရားရှင်းပြရာတွင် ကျမ်းစာအသုံးပြုတတ်ရန် သင်သားကိုကူညီပေးသည်။

၇။ သွန်သင်ခြင်းနှင့် တပည့်ဖြစ်စေခြင်းလုပ်ငန်းတွင် သမ္မာကျမ်းစာသွန်သင်ရာစာအုပ်ကို မည်သို့အသုံးပြုနိုင်သနည်း။

^၇ သွန်သင်ခြင်းနှင့် တပည့်ဖြစ်စေခြင်းလုပ်ငန်းတွင် အထိရောက်ဆုံးနည်းမှာ ယေရှု၏သွန်သင်နည်းများကို တုပခြင်းဖြစ်သည်။ (မ. ၂၈:၁၉၊ ၂၀) ယင်းသို့တုပနိုင်ရန် သမ္မာကျမ်းစာသွန်သင်ရာစာအုပ်က ကူညီပေးပါသည်။ ရိုးရှင်း၍ စိတ်ဝင်စားဖွယ်နည်းဖြင့် အခြားသူများကို သမ္မာတရားသွန်သင်ပေးရာတွင် ထိုစာအုပ်ကို ကောင်းစွာအသုံးပြုပါလေ။