ဟောပြောခြင်းက ကျွန်ုပ်တို့၏ဝိညာဉ်ရေးကို ဆက်လက်သန်စွမ်းစေ

၁။ ဟောပြောခြင်းလုပ်ငန်းသည် ကျွန်ုပ်တို့ကို အဘယ်အကျိုးကျေးဇူးများ ရရှိစေသနည်း။

^၁ ဟောပြောခြင်းလုပ်ငန်းတွင် တက်တက်ကြွကြွပါဝင်ခြင်းက ကျွန်ုပ်တို့၏ဝိညာဉ်ရေးကို သန်စွမ်းစေကာ ကျွန်ုပ်တို့အား ပို၍ပျော်ရွှင်စေသည်။ အမှန်မှာ ဓမ္မအမှုလုပ်ငန်းတွင် ကျွန်ုပ်တို့ပါဝင်ခြင်းသည် အဓိကအားဖြင့် ယေဟောဝါ၏စိတ်တော်နှင့်တွေ့ရန်ဖြစ်သည်။ သို့သော်၊ “တရားစကားတော်ကို ဟောပြောလော့” ဟူသည့်အမိန့်ကို နာခံခြင်းဖြင့် ကျွန်ုပ်တို့သည် ယေဟောဝါ၏ကောင်းချီးများရရှိပြီး အခြားနည်းလမ်းများဖြင့်လည်း အကျိုးကျေးဇူးများ ခံစားကြရသည်။ (၂ တိ. ၄:၂; ဟေရှာ. ၄၈:၁၇၊ ၁၈) ဟောပြောခြင်းသည် ကျွန်ုပ်တို့ကို မည်သို့ခိုင်ခံ့မြဲမြံစေနိုင်ပြီး ပျော်ရွှင်စေသနည်း။

၂။ ဓမ္မအမှုသည် ကျွန်ုပ်တို့ကို မည်သို့ခိုင်ခံ့မြဲမြံစေသနည်း။

^၂ ကျွန်ုပ်တို့ ခိုင်ခံ့မြဲမြံပြီး ကောင်းချီးခံစားရ– ဟောပြောခြင်းသည် လက်ရှိဆင်းရဲခက်ခဲမှုများထက် နိုင်ငံတော်ကောင်းချီးများကို အာရုံစိုက်ရန် ကျွန်ုပ်တို့ကိုလှုံ့ဆော်ပေးသည်။ (၂ ကော. ၄:၁၈) ကျမ်းစာသွန်သင်ရာများကို ရှင်းပြခြင်းက ယေဟောဝါ၏ကတိတော်များအပေါ် ကျွန်ုပ်တို့၏ယုံကြည်ခြင်းကို ခိုင်ခံ့မြဲမြံစေပြီး အမှန်တရားအတွက် ကျေးဇူးတင်လေးမြတ်သည့်စိတ်ကို ပြုစုပျိုးထောင်ပေးသည်။ (ဟေရှာ. ၆၅:၁၃၊ ၁၄) ကျွန်ုပ်တို့သည် အခြားသူများအား “ဤလောကနှင့်မသက်ဆိုင်” ဘဲ ဝိညာဉ်ရေးတွင် တိုးတက် ကြီးထွားစေရန် ကူညီပေးသောအခါ ဤလောကနှင့်သီးခြားနေရန်ဟူသည့် ကျွန်ုပ်တို့၏ ကိုယ်ပိုင်စိတ်ပိုင်းဖြတ်ချက်ကို ခိုင်ခံ့မြဲမြံစေကြသည်။​—ယော. ၁၇:​၁၄၊ ၁၆; ရော. ၁၂:၂။

၃။ ဓမ္မအမှုသည် ခရစ်ယာန်အရည်အသွေးများပြုစုပျိုးထောင်ရာတွင် ကျွန်ုပ်တို့ကို မည်သို့ကူညီပေးသနည်း။

^၃ ဓမ္မအမှုတွင်ပါဝင်ခြင်းသည် ခရစ်ယာန်အရည်အသွေးများကို ပြုစုပျိုးထောင်ရန် ကျွန်ုပ်တို့ကို ကူညီပေးသည်။ ဥပမာ၊ “လူအမျိုးမျိုးတို့တွင် အမျိုးမျိုးဖြစ်လာ” ရန် ကြိုးစားအားထုတ်ခြင်းက သာ၍နှိမ့်ချမှုရှိစေရန် ကျွန်ုပ်တို့ကို အထောက်အကူပြုသည်။ (၁ ကော. ၉:​၁၉-၂၃) ကျွန်ုပ်တို့သည် “အရေဆုတ်ခြင်း၊ ပစ်ထားခြင်းခံရသည့် ထိန်းသူမဲ့သိုးများ” ကိုစကားပြောသောအခါ ကရုဏာပြရန်နှင့် စာနာတတ်ရန် သင်ယူသိရှိခဲ့ရသည်။ (မ. ၉:၃၆) ကျွန်ုပ်တို့သည် လျစ်လျူရှုမှု သို့မဟုတ် ဆန့်ကျင်မှုများကြုံရသော်လည်း ဇွဲရှိရှိလုပ်ဆောင်သောအခါ ခံနိုင်ရည်ရှိလာကြသည်။ ကျွန်ုပ်တို့၏အသက်တာကို အခြားသူများအကျိုးအတွက် ပေးဆက်ခြင်းဖြင့် ကျွန်ုပ်တို့၏ရွှင်လန်းမှုကို တိုးပွားစေကြသည်။​—တ. ၂၀:၃၅။

၄။ သင့်ဓမ္မအမှုနှင့်ပတ်သက်၍ သင်မည်သို့ခံစားရသနည်း။

^၄ ကျွန်ုပ်တို့၏ဝတ်ပြုကိုးကွယ်မှုကို ခံထိုက်သည့် တစ်ပါးတည်းသောပုဂ္ဂိုလ်အား ချီးမွမ်းရသော ဓမ္မအမှုလုပ်ငန်းကို ကျွန်ုပ်တို့ရရှိထားခြင်းက ကောင်းချီးတစ်ရပ်ပင်။ ဓမ္မအမှုက ကျွန်ုပ်တို့ကို ခိုင်ခံ့မြဲမြံစေသည်။ “သတင်းကောင်းကို စေ့စေ့စပ်စပ် သက်သေခံ” ရာတွင် အပြည့်အဝပါဝင်ခြင်းက ကျွန်ုပ်တို့ယောက်တိုင်းအား ကြွယ်ဝသောကောင်းချီးများကို ရရှိစေပါသည်။​—တ. ၂၀:၂၄။