ဒီနေ့အချိန်မှာ ယေဟောဝါဘုရားသခင့်အလိုတော်ကို ဘယ်သူတွေ ဆောင်ရွက်နေကြသလဲ

ဘရိုရှာကို အသုံးပြုနိုင်ပုံ ကျမ်းစာသင်သားတွေ အဖွဲ့အစည်းအကြောင်း သိနိုင်အောင် ရည်ရွယ်ထားတဲ့ ဘရိုရှာအသစ်

၁။ ယေဟောဝါဘုရားသခင့်အလိုတော်ဘရိုရှာကို ထုတ်ဝေရတဲ့ ရည်ရွယ်ချက်သုံးခုက ဘာလဲ။

^၁ ဒီနေ့အချိန်မှာ ယေဟောဝါဘုရားသခင့်အလိုတော်ကို ဘယ်သူတွေ ဆောင်ရွက်နေကြသလဲဆိုတဲ့ ဘရိုရှာကို သင် စအသုံးပြုနေပြီလား။ အဲဒီဘရိုရှာကို ထုတ်ဝေရတဲ့ ရည်ရွယ်ချက်က (၁) ယေဟောဝါသက်သေတွေအနေနဲ့ ကျွန်ုပ်တို့ကို ကျမ်းစာသင်သားတွေ သိကျွမ်းလာဖို့၊ (၂) ကျွန်ုပ်တို့ရဲ့လုပ်ဆောင်မှုတွေကို သူတို့သိရှိလာစေဖို့နဲ့ (၃) ကျွန်ုပ်တို့အဖွဲ့အစည်းရဲ့ လုပ်ဆောင်ပုံတွေကို ပြောပြဖို့ ဖြစ်ပါတယ်။ ဒီဘရိုရှာအသစ်မှာ အခန်းတွေက တစ်မျက်နှာစီပဲရှိတယ်။ ဒါကြောင့် ကျမ်းစာသင်အံမှုပြီးတိုင်း အခန်းတစ်ခန်းကို ငါးမိနစ်ကနေ ဆယ်မိနစ်အတွင်းမှာ အပြီးဖတ်နိုင်ပါတယ်။

၂။ ဘရိုရှာရဲ့ အပြင်အဆင်နဲ့ ထူးခြားချက်ကို ဖော်ပြပါ။

^၂ ဘရိုရှာကို ပြင်ဆင်ထားပုံ– ဒီဘရိုရှာကို အပိုင်းသုံးပိုင်း ခွဲထားပါတယ်။ အပိုင်းတစ်ပိုင်းစီမှာ ယေဟောဝါဘုရားသခင့် အဖွဲ့အစည်းရဲ့ လုပ်ဆောင်မှုအသီးသီးကို ဆွေးနွေးထားပါတယ်။ အခန်း ၂၈ ခန်းရဲ့ ခေါင်းစဉ်တွေကို မေးခွန်းပုံစံနဲ့ ဖော်ပြထားပြီး အဲဒီမေးခွန်းကို စာလုံးမည်းနဲ့ရေးထားတဲ့ ခေါင်းစဉ်ငယ်တွေက ဖြေဆိုထားပါတယ်။ ဒီဘရိုရှာထဲမှာပါတဲ့ နိုင်ငံပေါင်း ၅၀ ကျော်က ဓာတ်ပုံတွေဟာ ကျွန်ုပ်တို့ရဲ့လုပ်ငန်းကို နိုင်ငံတကာမှာ လုပ်ဆောင်နေတယ်ဆိုတာ ဖော်ပြတယ်။ အခန်းတော်တော်များများမှာ “ထပ်ဆင့်လေ့လာကြည့်ပါ” ဆိုတဲ့ လေးထောင့်ကွက်ရှိတယ်။ အဲဒီအကွက်မှာပါတဲ့ အကြံပြုချက်တွေကို ကျမ်းစာသင်သား လိုက်နာဖို့ သင် အားပေးနိုင်ပါတယ်။

၃။ ယေဟောဝါဘုရားသခင့်အလိုတော်ဘရိုရှာကို ဘယ်လိုအသုံးပြုနိုင်သလဲ။

^၃ အသုံးပြုနိုင်ပုံ– မေးခွန်းပုံစံဖြစ်တဲ့ အခန်းရဲ့ခေါင်းစဉ်ကိုပြပြီး စတင်ပါ။ အဲဒီနောက် အခန်းကို အတူတူဖတ်တဲ့အခါ စာလုံးမည်းနဲ့ရေးထားတဲ့ ခေါင်းစဉ်ငယ်တွေကို ပေါ်လွင်စေပါ။ ပြီးတော့ စာမျက်နှာရဲ့အောက်ဆုံးက ပြန်လည်သုံးသပ်တဲ့ မေးခွန်းတွေကို ဆွေးနွေးပါ။ အခန်းတစ်ခုလုံးကို တောက်လျှောက်ဖတ်ပြီး ဒါမှမဟုတ် အပိုဒ်လိုက်ဖတ်ပြီး ဆွေးနွေးနိုင်ပါတယ်။ ရည်ညွှန်းထားတဲ့ ဘယ်ကျမ်းချက်ကို ဖတ်မယ်၊ မဖတ်ဘူးဆိုတာ ကိုယ့်ဘာသာကိုယ် ချင့်ချိန်ဆုံးဖြတ်ပါ။ ရုပ်ပုံတွေနဲ့ “ထပ်ဆင့်လေ့လာကြည့်ပါ” ဆိုတဲ့ လေးထောင့်ကွက်တွေကို သုံးသပ်ဖို့ မမေ့ပါနဲ့။ ပုံမှန်အားဖြင့်တော့ အခန်းတွေကို အစဉ်လိုက် ဆွေးနွေးသင့်ပါတယ်။ ဒါပေမဲ့ သင်သား လောလောဆယ် စိတ်ဝင်စားတဲ့အခန်းကို သွားပြီး လေ့လာဆွေးနွေးလို့လည်း ရပါတယ်။ ဥပမာ၊ စည်းဝေးပွဲ ဒါမှမဟုတ် ခရိုင်စည်းဝေးကြီး ရောက်လာတော့မယ်ဆိုရင် အခန်း ၁၁ ကို ဆွေးနွေးနိုင်ပါတယ်။

၄။ ဘရိုရှာအသစ်ကို ရရှိထားတဲ့အတွက် သင် ဘာကြောင့် ဝမ်းသာတာလဲ။

^၄ တစ်ယောက်ယောက်က ကျွန်ုပ်တို့နဲ့အတူ ကျမ်းစာလေ့လာနေတယ်ဆိုရင် သူ့ကို ကောင်းကင်ခမည်းတော်နဲ့ သိကျွမ်းလာအောင် ကူညီပေးနိုင်ပါတယ်။ ဘုရားသခင့်အဖွဲ့အစည်းအကြောင်းကိုလည်း သူ့ကို သွန်သင်ပေးဖို့လိုတယ်။ (သု. ၆:၂၀) အဲဒီလိုလုပ်ဆောင်ဖို့ လွယ်ကူစေတဲ့ ဒီဘရိုရှာအသစ်ကို ကျွန်ုပ်တို့ ရရှိထားတဲ့အတွက် အလွန်ပဲ ဝမ်းသာကြပါတယ်။