တွေ့ကြုံမှုများ

◼ ဩစတြေးလျ– ပညာတတ်တစ်ယောက်ဖြစ်တဲ့ဂျွန်ဟာ ကလေးဘဝမှာ ချာ့ချ်တက်ခဲ့ပေမဲ့ “ဘုရားမဲ့ဝါဒီ” တစ်ယောက် ဖြစ်လာတယ်။ ရှေ့ဆောင်ညီအစ်ကိုက သူ့ကို သက်ရှိများသည် ဖန်ဆင်းခံရခြင်းလော ဘရိုရှာ ဝေငှပေးခဲ့ပြီး လည်ပတ်မှုပြန်သွားတဲ့အခါ သက်ရှိတွေရဲ့မူလအစ ဘရိုရှာ ထပ်ပေးခဲ့တယ်။ ရှေ့ဆောင်ညီအစ်ကိုဟာ နောက်ဆုံးထုတ်မဂ္ဂဇင်းတွေ၊ ဖန်ဆင်းခြင်း ဒါမှမဟုတ် ကျမ်းစာပရောဖက်ပြုချက်အကြောင်းပါတဲ့ စာပေတွေ ယူလာပေးပြီး သူ့ရဲ့စိတ်ဝင်စားမှုကို ဆက်နှိုးဆွပေးခဲ့တယ်။ ဂျွန် လက်ခံလိမ့်မယ်လို့ သူယူဆတဲ့အခါ သမ္မာကျမ်းစာ—ဘုရားသခင့်နှုတ်မြွက်လော၊ လူ့နှုတ်ထွက်လော စာအုပ်ကို ထပ်ပေးတယ်။ စာအုပ်ကိုဖတ်ပြီးတဲ့အခါ ဂျွန်ဟာ ဘုရားသခင်ကို တဖြည်းဖြည်းနဲ့ ယုံကြည်စပြုလာပြီ။ ရှေ့ဆောင်က သမ္မာကျမ်းစာသွန်သင်ရာစာအုပ်နဲ့ မိတ်ဆက်ပေးပြီး စာမျက်နှာ ၂၀၊ အပိုဒ် ၈ နဲ့ စာမျက်နှာ ၂၃-၂၄ မှာရှိတဲ့ အပိုဒ် ၁၃-၁၆ ကို ပြတယ်။ စာပိုဒ်တွေထဲမှာညွန်းထားတဲ့ ကျမ်းချက်တွေက သူ့ကိုအရမ်းစိတ်စွဲမှတ်သွားစေခဲ့တာကြောင့် “ကျမ်းစာကို လေ့လာချင်တယ်” လို့ပြောလာတယ်။

◼ မက္ကဆီကို– သမ္မာကျမ်းစာကို ဘုရားသခင်ဆီကလာတဲ့စာအုပ်လို့ မယူမှတ်ဘူးဆိုပြီး လူတစ်ယောက်က ပြောတယ်။ ဒါနဲ့ ကြေညာသူက သမ္မာကျမ်းစာဟာ ဘုရားသခင်ဆီကလာတယ်ဆိုတာကို သိစေတဲ့ အထောက်အထားတွေကို ပြပေးလို့ရမလားလို့ ကမ်းလှမ်းခဲ့တယ်။ အတော်ကြာပြန်လည်ပတ်ပြီးနောက်မှာတော့ ကျမ်းစာထဲကနေ သိရှိလာတဲ့အရာတွေကြောင့် အဲဒီလူရဲ့စိတ်နှလုံး ပျော့ပျောင်းလာတယ်။ အထူးသဖြင့် ဘုရားသခင်ရဲ့စံနှုန်းတွေကို သိလာတဲ့အခါဖြစ်တယ်။ ကြေညာသူညီအစ်ကိုကို သူဒီလိုပြောခဲ့တယ်– “ခင်ဗျားနဲ့ ကျမ်းစာစဖတ်တဲ့အချိန်တုန်းက ကျမ်းစာကို တခြားအကြံပေးစာအုပ်တွေနဲ့ အတူတူပဲလို့ထင်ခဲ့မိတာ။ ဒါပေမဲ့ အခု အဲဒီလိုမဟုတ်တော့ဘူး။ ကျမ်းစာမှာပါတဲ့ ကိုယ်ကျင့်တရားနဲ့ဆိုင်တဲ့ လမ်းညွှန်ချက်တွေက ကျွန်တော့်နှလုံးကို ထိမိစေတယ်။”

◼ အမေရိကန်ပြည်ထောင်စု– မောင်နှံတစ်စုံဟာ လူအများရှေ့သက်သေခံခြင်းမှာ ပါဝင်နေစဉ် ဘုရားသခင်ကိုတော့ယုံပေမဲ့ သမ္မာကျမ်းစာကို အနောက်တိုင်းသားတွေရဲ့စာအုပ်လို့ ယူဆနေတဲ့ ထိုင်ဝမ်အမျိုးသမီးတစ်ယောက်နဲ့ ဆုံတွေ့ခဲ့တယ်။ သူဟာ ချမ်းသာသူတစ်ယောက်ဖြစ်ပေမဲ့ ဘဝကအဓိပ္ပာယ်မရှိဘူးလို့ ခံစားနေရသူဖြစ်တယ်။ သူ့ဘဝအဓိပ္ပာယ်ရှိလာအောင် ကျမ်းစာက ကူညီပေးနိုင်မယ်အထင်နဲ့ စာပေတွေတင်ထားတဲ့ စားပွဲနား ချဉ်းကပ်လာတယ်။ မောင်နှံစုံဟာ သမ္မာကျမ်းစာသွန်သင်ရာစာအုပ်နဲ့ တည်မြဲသောငြိမ်းချမ်းရေးနှင့် ပျော်ရွှင်မှု—ယင်းတို့ကို ရှာတွေ့နိုင် (အင်္ဂလိပ်) ဆိုတဲ့ဘရိုရှာကိုသုံးပြီး အမျိုးသမီးနဲ့ ကျမ်းစာသင်အံမှုစခဲ့ကြတယ်။ သွန်သင်ရာစာအုပ်ထဲက အခန်း ၂ ကိုလေ့လာမယ့်အစား ဘရိုရှာထဲက “လူသားအားလုံးကို ကောင်းကျိုးဖြစ်စေတဲ့ လမ်းညွှန်စာအုပ်” ဆိုတဲ့ အခန်းကို လေ့လာခဲ့ကြတယ်။ အဲဒီအခန်းထဲက ဦးဆုံးစာပိုဒ် ၆ ပိုဒ်ကို သုံးသပ်ပြီးတဲ့အခါ သမ္မာကျမ်းစာဟာ တခြားဘယ်ဘာသာရေးစာအုပ်ထက်မဆို ပိုသာတယ်ဆိုပြီး အံ့သြစွာနဲ့မှတ်ချက်ချခဲ့တယ်။ ပြည့်စုံခဲ့ပြီးဖြစ်တဲ့ သမ္မာကျမ်းစာပရောဖက်ပြုချက်တွေကို လေ့လာပြီးတဲ့အခါ “သမ္မာကျမ်းစာလို တိကျမှန်ကန်တဲ့ တခြားစာအုပ်မရှိဘူး” လို့ ပြောခဲ့တယ်။

◼ ဂျပန်– အိမ်ရှင်က ဘုရားကိုမယုံဘူးလို့ ပြောခဲ့ပေမဲ့ ကြေညာသူက နိုးလော့! မဂ္ဂဇင်းမှာပါတဲ့ “ဒါက သူ့အလိုလို ဖြစ်လာနိုင်ပါ့မလား” ဆောင်းပါးတွေကို ဝေငှပေးဖို့ သူ့ဆီ ခဏတစ်ဖြုတ် ပြန်လည်ပတ်မှုတွေ ဆက်လုပ်ခဲ့တယ်။ တဖြည်းဖြည်းနဲ့ အိမ်ရှင်ရဲ့သဘောထားပြောင်းလဲလာပြီး ဖန်ဆင်းရှင်ရှိရမယ်လို့ ပြောလာတယ်။ အခု အိမ်ရှင်ဟာ ဘုရားသခင်ရှိတယ်ဆိုတာ ယုံကြည်လာပြီး လူမျိုးအားလုံးအတွက် သတင်းကောင်း ဘရိုရှာနဲ့ ကျမ်းစာလေ့လာနေပါတယ်။

◼ ကနေဒါ– အိမ်ထဲကနေထွက်လာပြီး ကားဆီကိုသွားနေတဲ့အမျိုးသမီးတစ်ယောက်ကို ညီအစ်မက နောက်ဆုံးထုတ်မဂ္ဂဇင်းတွေ ဝေငှခဲ့တယ်။ ပြန်လည်ပတ်တဲ့အခါ အမျိုးသမီးက သူဟာ ဘုရားသခင်ကို ယုံလည်းမယုံဘူး၊ စိတ်လည်းမဝင်စားဘူးလို့ ပြောတယ်။ ညီအစ်မဟာ လွယ်လွယ်လေးလက်မလျှော့ခဲ့ဘူး၊ သူ့အတွက် ကျေနပ်ပျော်ရွှင်ဖွယ်အသက်တာ—မည်သို့ရရှိနိုင်သနည်း ဘရိုရှာ ယူလာပေးဖို့ စိတ်ပိုင်းဖြတ်လိုက်တယ်။ နောက်ထပ်တစ်ခေါက်ပြန်သွားတဲ့အခါ ဘုရားသခင်အကြောင်း စိတ်မဝင်စားဘူးဆိုတာသိပေမဲ့ သူဟာ ကြင်ဖော်မဲ့မိဘဖြစ်တယ်ဆိုတာ သိထားတဲ့အတွက် သူ့အကြောင်းကို ဆက်စဉ်းစားနေမိတယ်လို့ ညီအစ်မက ပြောပြလိုက်တယ်။ ပြီးတော့ အကြံဉာဏ်ကောင်းကို ဘယ်မှာရှာတွေ့နိုင်မလဲဆိုတာ ဖော်ပြထားတဲ့ ဘရိုရှာ စာမျက်နှာ ၄၊ အပိုဒ် ၆ ကို ပြတယ်။ အဲဒီနောက် အမျိုးသမီးကို သားသမီးပြုစုပျိုးထောင်ခြင်းအကြောင်းပါတဲ့ အခန်း ၂ ကိုဖတ်ဖို့ အားပေးတယ်။ အမျိုးသမီးဟာ ဘရိုရှာကို ဝမ်းသာအားရ လက်ခံခဲ့တယ်။