ယေဟောဝါဘုရားအကြောင်း မျက်မမြင်တွေ သိလာအောင် ကူညီပေးပါ

၁။ မျက်မမြင်တွေကို သနားကြင်နာကြောင်း ယေရှု ဘယ်လိုဖော်ပြခဲ့သလဲ။

^၁ ယေရှု အသတ်ခံရဖို့ ရက်အနည်းငယ်ပဲ လိုတော့တယ်။ ဂျေရိခိုမြို့ကနေ ကိုယ်တော် ထွက်လာချိန်မှာ မျက်မမြင်သူတောင်းစားနှစ်ယောက်က ‘အိုသခင်၊ ကျွန်ုပ်တို့ကို သနားတော်မူပါ’ ဆိုပြီး အော်ဟစ်ကြတယ်။ ရှေ့မှာကြုံရမယ့် ဆိုးရွားတဲ့ဒုက္ခတွေအကြောင်း ယေရှု စဉ်းစားနေပေမဲ့ ခဏရပ်လိုက်ပြီး သူတို့နှစ်ယောက်ကို ကုသပေးလိုက်တယ်။ (မ. ၂၀:၂၉-၃၄) မျက်မမြင်တွေအပေါ်ထားတဲ့ ယေရှုရဲ့ သနားကြင်နာမှုကို ဘယ်လိုတုပနိုင်မလဲ။

၂။ မျက်မမြင်တစ်ဦးကိုတွေ့တဲ့အခါ ကျွန်ုပ်တို့ ဘယ်လို ကူညီပေးနိုင်မလဲ။

^၂ ကူညီထောက်မပေးပါ– မျက်မမြင်တစ်ဦးကို တွေ့တယ်ဆိုရင် ကိုယ့်ကိုယ်ကိုယ် မိတ်ဆက်ပြီး သူ့ကို ကူညီပေးမယ်လို့ ပြောပါ။ မျက်မမြင်တွေကို လူတွေက ဒုက္ခပေးတတ်တာမို့ အစပိုင်းမှာ သင့်ကို မယုံသင်္ကာ ဖြစ်နိုင်ပါတယ်။ ဒါပေမဲ့ သင်က စိတ်ရင်းမှန်နဲ့ ဖော်ရွေမှုရှိတယ်ဆိုရင် သူတို့ သံသယကင်းသွားပြီး စိတ်ပေါ့ပါးသွားမှာပါ။ ဒီအချက်ကို သိထားသင့်ပါတယ်– မျက်စိမမြင်တဲ့ပုံစံ တစ်ဦးနဲ့တစ်ဦး မတူညီကြပါ။ ဒါကြောင့် အခြေအနေပေါ်မူတည်ပြီး သူတို့ကို ဘယ်လောက်ထိကူညီပေးရမလဲဆိုတာ ဆုံးဖြတ်ပါ။ လိုအပ်တဲ့အကူအညီကို ပေးပြီးနောက် သင်က ကျမ်းစာပညာပေးလုပ်ငန်းမှာ ပါဝင်နေတာဖြစ်ကြောင်း ပြောပြနိုင်ပါတယ်။ ဆာလံ ၁၄၆:၈ ဒါမှမဟုတ် ဟေရှာယ ၃၅:၅၊ ၆ တို့လို ကျမ်းချက်တစ်ချက် ဖတ်ပြချင်တယ်လို့ ပြောပါ။ မျက်မမြင်စာ ဖတ်နိုင်တဲ့သူဖြစ်မယ်ဆိုရင် ကျမ်းစာအကြောင်းရှင်းပြထားတဲ့ မျက်မမြင်စာပေ လိုချင်သလားလို့ မေးပါ။ jw.org ဝက်ဘ်ဆိုက်ပေါ်ကလည်း အသံဖိုင်တွေ ရရှိအောင် သင် ကူညီပေးနိုင်ပါတယ်။ သူ့ကွန်ပျူတာမှာ စာသားကို အသံထွက်ဖတ်ပြပေးတဲ့ စခရင်ရီဒါ ပရိုဂရမ် (screen reader program) ရှိတယ်ဆိုရင် jw.org ဝက်ဘ်ဆိုက်ပေါ်က စာပေတွေ၊ မျက်မမြင်တွေအတွက် RTF (Rich Text Format) ဖိုင်ပုံစံနဲ့တင်ထားတဲ့ စာပေတွေကို သူ နှစ်သက်နိုင်ပါတယ်။—“မျက်မမြင်တစ်ဦးကို ကူညီပေးတဲ့အခါ” လေးထောင့်ကွက်ကို ကြည့်ပါ။

၃။ ကျွန်ုပ်တို့ဒေသထဲက မျက်မမြင်တွေကို ဘယ်လို ရှာဖွေနိုင်မလဲ။

^၃ မျက်မမြင်တွေကို ရှာပါ– တစ်အိမ်မှတစ်အိမ် အမှုဆောင်လုပ်ငန်းမှာ မျက်မမြင်တွေကို တွေ့ရခဲပါတယ်။ သူတို့အများစုက အိမ်ကိုလာတဲ့သူတွေနဲ့ စကားပြောရမှာကို ကြောက်လို့ဖြစ်တယ်။ ဒါကြောင့် သူတို့ကို သက်သေခံဖို့ ကြိုးစား “ရှာဖွေ” ပါ။ (မ. ၁၀:၁၁) မျက်မမြင်အလုပ်ဖော် ဒါမှမဟုတ် မျက်မမြင်အတန်းဖော်တစ်ဦးဦး သင့်အသိထဲမှာ ရှိသလား။ ရှိတယ်ဆိုရင် သူ့ကို ကိုယ်ဘက်ကစပြီး စကားပြောပါ။ သင့်ဒေသမှာ မျက်မမြင်ကျောင်းရှိတယ်ဆိုရင် ကျောင်းစာကြည့်တိုက်အတွက် အဖွဲ့အစည်းထုတ် မျက်မမြင်စာပေတချို့ လှူဒါန်းလိုကြောင်း ကမ်းလှမ်းပါ။ မျက်မမြင်မိသားစုဝင်ရှိတဲ့ တစ်ယောက်ယောက်ကိုများ သင်သိသလား။ သင့်ဒေသမှာ မျက်မမြင်တွေကို ကူညီပေးနေတဲ့ ဒါမှမဟုတ် ပြုစုစောင့်ရှောက်ပေးနေတဲ့ အဖွဲ့အစည်းတွေရှိသလား။ မျက်မမြင်တွေကို ယေဟောဝါသက်သေတွေ ကူညီပေးချင်ကြောင်း သူတို့ရဲ့ မိသားစုဝင်တွေ၊ အစောင့်တွေ၊ ဦးစီးကြီးကြပ်ပေးသူတွေကို ပြောပြပါ။ ပြီးတော့ မျက်မမြင်စာပေတွေ၊ အသံဖိုင်တွေ ပေးလို့ရမလားလို့ မေးပါ။ မကြာခင်မှာ မျက်စိပြန်မြင်လာအောင် ဘုရားသခင် လုပ်ပေးမယ်ဆိုတဲ့အကြောင်း ပြောပြပါ။ ကျမ်းစာကို မျက်မမြင်စာနဲ့ ဖတ်ရှုခွင့်ရခဲ့လို့ အကျိုးခံစားရတဲ့ မျက်မမြင်တစ်ဦးရဲ့တွေ့ကြုံမှုအကြောင်း ဖော်ပြထားတဲ့ jw.org ဝက်ဘ်ဆိုက်ပေါ်က ဒါသာ မရှိရင် ကျွန်တော် လူဖြစ်ရှုံးပြီ [အင်္ဂလိပ်] ဆိုတဲ့ ဗီဒီယိုကိုလည်း ပြပေးနိုင်ပါတယ်။ လာရတဲ့အကြောင်းရင်းကို သင် ရှင်းပြပေးမယ်ဆိုရင် မျက်မမြင်တစ်ဦးစီနဲ့ ဆက်သွယ်နိုင်ဖို့ လမ်းစပွင့်သွားနိုင်ပါတယ်။

၄။ ဂျဲနက်ရဲ့အဖြစ်ကနေ ဘာသင်ယူနိုင်မလဲ။

^၄ မျက်မမြင်ညီအစ်မဂျဲနက်က မျက်မမြင်တွေနေတဲ့နေရာကို သွားလည်ပြီး မျက်မမြင်မိန်းကလေးတစ်ဦးနဲ့ စကားစမြည်ပြောခဲ့တယ်။ သူ့ကို ဂျဲနက် အခုလိုပြောတယ်– “ယေရှုက အနာဂတ်မှာ မျက်မမြင်အားလုံးအတွက် ဘာလုပ်ပေးမလဲဆိုတာ သိစေချင်လို့ မျက်မမြင်တွေကို ကုသပေးခဲ့တယ်။” ဗျာဒိတ် ၂၁:၃၊ ၄ ကိုလည်း အတူတူဆွေးနွေးကြပြီး အဲဒီကျမ်းစာကတိကို ဘုရားနိုင်ငံတော်က ဘယ်လိုဖြစ်မြောက်အောင် လုပ်ပေးမလဲဆိုတာကိုပါ ရှင်းပြခဲ့တယ်။ မိန်းကလေးက ခဏလေးငြိမ်သွားပြီး ခုလိုပြောတယ်– “မျက်မမြင်တစ်ယောက်က အခုလိုပြောတာကို ကျွန်မ တစ်ခါမှ မကြားဖူးဘူး။ မျက်စိမြင်သူအများစုက ဘာပြောလဲဆိုတော့ လူတွေမျက်မမြင်ဖြစ်ရတာ သူတို့က၊ သူတို့ရဲ့ဘိုးဘေးတွေက မကောင်းတာ တစ်ခုခုလုပ်ခဲ့လို့တဲ့။” ဂျဲနက်က မိန်းကလေးဆီ မျက်မမြင်တွေ ဖတ်လို့ရတဲ့ပုံစံနဲ့ သွန်သင်ရာစာအုပ်ကို အီးမေးလ်နဲ့ ပို့ပေးလိုက်တယ်။ အခုဆိုရင် တစ်ပတ်ကိုနှစ်ကြိမ် သူနဲ့အတူ ကျမ်းစာလေ့လာနေပါတယ်။

၅။ ကျွန်ုပ်တို့က ယေရှုလို မျက်မမြင်တွေကို မကုပေးနိုင်ပေမဲ့ သူတို့ကို သနားမယ်ဆိုရင် ဘာအခွင့်အရေး ရမလဲ။

^၅ ကျွန်ုပ်တို့က ယေရှုလုပ်ခဲ့သလို မျက်မမြင်တွေကို မကုပေးနိုင်ကြပါဘူး။ ဒါပေမဲ့ ပကတိမျက်စိကွယ်သူတွေအပါအဝင် စာတန်ကြောင့် ဉာဏ်မျက်စိကွယ်နေသူတွေပါ ဘုရားသခင့်စကားတော်ရဲ့ အမှန်တရားကို နားလည်လာအောင် ကျွန်ုပ်တို့ ကူညီပေးနိုင်ပါတယ်။ (၂ ကော. ၄:၄) ဂျေရိခိုမြို့နားက မျက်မမြင်နှစ်ယောက်ကို ယေရှု “သနား” လို့ ကုသပေးလိုက်တာဖြစ်တယ်။ (မ. ၂၀:၃၄) ကျွန်ုပ်တို့လည်း မျက်မမြင်တွေကို အလားတူ သနားမယ်ဆိုရင် မျက်မမြင်ဝေဒနာကို ထာဝစဉ်နိဂုံးချုပ်ပေးမယ့် ယေဟောဝါဘုရားအကြောင်း မျက်မမြင်တချို့ သိရှိလာအောင် သင်ပေးခွင့်ရမှာဖြစ်ပါတယ်။