ဆုတောင်းခြင်းနဲ့ပတ်သက်ပြီး လူတွေ ပြောဆိုရာ

မာရီယာ၊ ရာအူး၊ အားနီနဲ့ တခြားသူများစွာအတွက် ဆုတောင်းခြင်းဆိုတာ အထူးလက်ဆောင်တစ်ခုပဲ။ ဆုတောင်းခြင်းကတစ်ဆင့် ဘုရားသခင်နဲ့ စကားပြောနိုင်တယ်၊ ကျေးဇူးတင်နိုင်တယ်၊ အကူအညီ တောင်းနိုင်တယ်လို့ သူတို့ ခံစားရတယ်။ ဆုတောင်းခြင်းနဲ့ပတ်သက်ပြီး ကျမ်းစာမှာပါတဲ့ ဒီအာမခံချက်ကို သူတို့ အပြည့်အဝ ယုံကြည်ကြတယ်– “အလိုတော်နဲ့အညီ ဆုတောင်းမယ်ဆိုရင် ဘုရား နားထောင်မယ်ဆိုတာ စိတ်ချတယ်။”—၁ ယောဟန် ၅:၁၄။

ဒါပေမဲ့ လူများစွာကတော့ ဆုတောင်းခြင်းနဲ့ပတ်သက်ပြီး ကျမ်းစာအဆိုကို လက်ခံဖို့ ခက်နေကြတယ်။ စတိဗ်က ဆုတောင်းခြင်းနဲ့ပတ်သက်ပြီး သူ့ရဲ့ ခံစားချက်ကို ဒီလိုပြောပြတယ်။ “ကျွန်တော် အသက် ၁၇ နှစ်တုန်းက သူငယ်ချင်း သုံးယောက်ဟာ မတော်တဆမှု နှစ်ခုကြောင့် သေဆုံးသွားကြတယ်။ တစ်ယောက်က ကားတိုက်ပြီး သေသွားတယ်။ နောက်နှစ်ယောက်က ရေနစ်ပြီး သေသွားတယ်။” စတိဗ် ဘာလုပ်ခဲ့သလဲ။ “ဘာကြောင့် အဲဒီလိုဖြစ်တာလဲဆိုပြီး ဘုရားသခင်ဆီ ဆုတောင်း မေးခဲ့တယ်။ ဒါပေမဲ့ အဖြေ မရဘူး။ အဲဒါကြောင့် ‘ဘာလို့ ဆုတောင်းနေတော့မှာလဲ’ ဆိုပြီး ပြောမိတယ်။” ဆုတောင်းချက်တွေ အဖြေ မရတဲ့အတွက် ဆုတောင်းလည်း အပိုပဲလို့ လူတွေ ယူမှတ်သွားကြတယ်။

တခြားအကြောင်းရင်းတွေကြောင့်လည်း တချို့က ဆုတောင်းဖို့ မလိုဘူးလို့ ယူဆကြတယ်။ ဘုရားသခင်က အားလုံးကို သိနေတယ်ဆိုရင်၊ ကိုယ့်ရဲ့ လိုအပ်ရာတွေ၊ ပြဿနာတွေကို သိနေတယ်ဆိုရင် ဆုတောင်းဖို့ လိုသေးလို့လားဆိုပြီး ပြောကြတယ်။

တချို့ကျတော့လည်း အရင်က လုပ်ခဲ့တဲ့ အမှားတွေကြောင့် သူတို့ရဲ့ ဆုတောင်းချက်ကို ဘုရား နားထောင်မှာ မဟုတ်ဘူးလို့ ခံစားကြရတယ်။ ဂျဲနီ ဒီလိုပြောတယ်– “ကျွန်မရဲ့ အကြီးမားဆုံး ပြဿနာက ကိုယ့်ကိုယ်ကိုယ် တန်ဖိုးမရှိဘူးလို့ ခံစားနေရတာပဲ။ နောင်တရစရာ လုပ်ရပ်တွေကို ကျွန်မ လုပ်ခဲ့တယ်။ ဒါကြောင့် ဆုတောင်းဖို့ မထိုက်တန်ဘူးလို့ ခံစားခဲ့ရတယ်။”

သင်ကော ဆုတောင်းခြင်းနဲ့ပတ်သက်ပြီး ဘယ်လို ခံစားရသလဲ။ သူတို့လိုပဲ ခံစားနေရတယ်၊ သံသယ ရှိနေတယ်ဆိုရင် ကျမ်းစာမှာပါတဲ့ စိတ်ကျေနပ်ဖွယ် အဖြေတွေကနေ နှစ်သိမ့်မှု ရနိုင်ပါတယ်။ ကျမ်းစာအဖြေတွေကို ယုံကြည်စိတ်ချနိုင်တယ်။a ကျမ်းစာမှာ အောက်ပါမေးခွန်းတွေရဲ့ အဖြေကို ရှာတွေ့နိုင်တယ်။

• ဆုတောင်းချက်တွေကို ဘုရားသခင် တကယ် နားထောင်သလား။

• တချို့ဆုတောင်းချက်တွေ ဘာကြောင့် အဖြေ မရသလဲ။

• အဖြေ ရဖို့ ဘယ်လို ဆုတောင်းနိုင်သလဲ။

• ဆုတောင်းခြင်းကနေ ဘယ်လို အကျိုးရနိုင်သလဲ။