သင့်ဘဝမှာ ဘုရားသခင့်လက်တော် ကူညီပေးပုံကို မြင်တွေ့သလား

၁၊ ၂။ ဘုရားနဲ့ပတ်သက်ပြီး လူတချို့ ဘယ်လိုထင်ကြသလဲ။

လူအတော်များများဟာ ကိုယ်ဘာလုပ်လုပ် ဘုရားအတွက် အရေးမပါဘူးလို့ ထင်ကြတယ်။ လူတွေဘာဖြစ်ဖြစ် ဘုရားဂရုမစိုက်ပါဘူးလို့ ယူဆကြတယ်။ ဥပမာ၊ ၂၀၁၃၊ နိုဝင်ဘာတုန်းက လေမုန်တိုင်းကြီးတစ်ခုကြောင့် ဖိလစ်ပိုင်နိုင်ငံရဲ့ နေရာအတော်များများ ပျက်စီးသွားတယ်။ “ဘုရားက တခြားတစ်နေရာရာ ရောက်နေတာဖြစ်မယ်” လို့ မြို့ကြီးတစ်ခုရဲ့ မြို့တော်ဝန် ပြောတယ်။

^၂ လူတချို့ကတော့ သူတို့ရဲ့လုပ်ရပ်ကို ဘုရားမမြင်နိုင်ဘူးလို့ ထင်ကြတယ်။ (ဟေရှာ. ၂၆:၁၀၊ ၁၁; ၃ ယော. ၁၁) တမန်တော်ပေါလုခေတ်က လူတချို့လည်း အဲဒီလိုပဲ ထင်ခဲ့တယ်။ သူတို့ဟာ “ဘုရားသခင်ကို တိကျမှန်ကန်စွာ သိကျွမ်းလိုစိတ်မရှိ” တဲ့ မဖြောင့်မတ်သူ၊ ဆိုးညစ်သူ၊ လောဘကြီးသူ၊ မိုက်မဲသူတွေဖြစ်တယ်လို့ ပေါလုပြောတယ်။—ရော. ၁:၂၈၊ ၂၉။

၃။ (က) ကိုယ့်ကိုယ်ကိုယ် ဘယ်မေးခွန်းတွေ မေးသင့်သလဲ။ (ခ) ကျမ်းစာမှာ ဘုရားသခင်ရဲ့ “လက်” ဟာ အများအားဖြင့် ဘာကိုဆိုလိုသလဲ။

^၃ ကျွန်တော်တို့ကော ဘယ်လိုလဲ။ ကိုယ့်လုပ်ရပ်မှန်သမျှကို ယေဟောဝါ မြင်တွေ့မှန်း ကျွန်တော်တို့သိတယ်။ ဒါပေမဲ့ ကျွန်တော်တို့ကို ယေဟောဝါ တကယ်စိတ်ဝင်စားတယ်ဆိုတာ ယုံရဲ့လား။ ဘဝမှာ ဘုရားသခင့်လက်တော် ကူညီပေးပုံကို မြင်တွေ့သလား။ ကျမ်းစာမှာ ဘုရားသခင့် “လက်” ဟာ အများအားဖြင့် ကိုယ်တော့်တန်ခိုးစွမ်းအားကို ဆိုလိုတယ်။ မိမိကျေးကျွန်တွေကို ကူညီပေးဖို့၊ ရန်သူတွေကို ရှုံးနိမ့်စေဖို့ တန်ခိုးတော်ကို ယေဟောဝါအသုံးပြုတယ်။ (တရားဟောရာ ၂၆:၈ ကိုဖတ်ပါ။) လူတချို့ “ဘုရားသခင်ကို မြင်ရကြ” မယ်လို့ ယေရှုပြောတယ်။ (မ. ၅:၈) အဲဒီလူတွေထဲမှာ ကျွန်တော်တို့ ပါသလား။ “ဘုရားသခင်ကို” ဘယ်လိုနည်းနဲ့ “မြင်” နိုင်သလဲ။ ဘဝမှာ ဘုရားသခင့်လက်တော် ကူညီပေးပုံကို မြင်တွေ့ခဲ့တဲ့ ကျမ်းစာပုံနမူနာတွေနဲ့ မမြင်တွေ့ခဲ့တဲ့ ကျမ်းစာပုံနမူနာတွေအကြောင်း လေ့လာကြည့်ကြစို့။ ဘုရားသခင့်လက်တော်ကို မြင်နိုင်ဖို့ ယုံကြည်ခြင်းက ဘယ်လိုကူညီပေးတယ်ဆိုတာကိုလည်း ဆွေးနွေးကြစို့။

ဘုရားသခင့်လက်တော်ကို မမြင်တွေ့ခဲ့သူများ

၄။ အစ္စရေးလူမျိုးရဲ့ ရန်သူတွေဟာ ဘုရားသခင့်လက်တော်ကို ဘာကြောင့် မမြင်တွေ့ခဲ့ကြသလဲ။

^၄ ရှေးခေတ်တုန်းက လူများစွာဟာ အစ္စရေးတွေကို ဘုရားသခင် ဘယ်လိုကူညီခဲ့မှန်း မြင်ခွင့်၊ ကြားခွင့် ရရှိခဲ့ကြတယ်။ ဘုရားသခင်က အံ့ဖွယ်အမှုတွေအားဖြင့် မိမိလူမျိုးကို အီဂျစ်ပြည်ကနေ ကယ်ထုတ်ပြီး ကတိထားရာပြည်ရဲ့ဘုရင်တွေကို ရှုံးနိမ့်စေခဲ့တယ်။ (ယောရှု ၉:၃၊ ၉၊ ၁၀) အဲဒီသတင်းကို ဂျော်ဒန်မြစ်အနောက်ဘက်မှာရှိတဲ့ ဘုရင်အားလုံးနီးပါး ကြားရ၊ မြင်ရပေမဲ့ ‘ယောရှုနှင့် အစ္စရေးအမျိုးသားတို့ကို စစ်တိုက်ခြင်းငှာ တညီတညွတ်တည်း စည်းဝေး’ ကြတယ်။ (ယောရှု ၉:၁၊ ၂) အစ္စရေးတွေကို လာတိုက်ခိုက်ချိန်မှာ ဘုရားသခင့်လက်တော်ကို အဲဒီဘုရင်တွေ မြင်တွေ့ခဲ့ရတယ်။ ယေဟောဝါရဲ့ မဟာတန်ခိုးကြောင့် ‘ရန်သူတွေကို အစ္စရေးတွေ နှိမ်နင်းလို့ မပြီးမချင်း နေရော၊ လရော ရပ်တန့်နေတယ်။’ (ယောရှု ၁၀:၁၃၊ ကဘ) ရန်သူတွေရဲ့ စိတ်နှလုံးကို ယေဟောဝါ “ခိုင်မာ” စေတဲ့အတွက် အစ္စရေးတွေကို သူတို့လာတိုက်ခိုက်ကြတယ်။ (ယောရှု ၁၁:၂၀) အစ္စရေးတွေဘက်ကနေ ယေဟောဝါ တိုက်ခိုက်ပေးမှန်း အသိအမှတ်မပြုတဲ့အတွက် သူတို့ အကြီးအကျယ်ရှုံးနိမ့်ခဲ့တယ်။

၅။ မင်းဆိုးအာဟပ်ဟာ ဘာကို အသိအမှတ်မပြုခဲ့သလဲ။

^၅ နောက်ပိုင်း၊ မင်းဆိုးအာဟပ်ဟာ ဘုရားသခင့်လက်တော်ကို မြင်တွေ့ဖို့ အကြိမ်များစွာ အခွင့်အရေးရခဲ့တယ်။ “ငါ့အခွင့်မရှိဘဲ အင်တန်ကာလပတ်လုံး မိုးမရွာ၊ နှင်းမကျရ” လို့ အာဟပ်ကို ဧလိယပြောတယ်။ (၃ ရာ. ၁၇:၁) အဲဒီလိုဖြစ်အောင် ယေဟောဝါပဲ လုပ်နိုင်တယ်။ ဒါပေမဲ့ အဲဒါကို အာဟပ် အသိအမှတ်မပြုဘူး။ နောက်ပိုင်း၊ ယေဟောဝါဆီ ဧလိယဆုတောင်းတဲ့အခါ ကောင်းကင်ကနေ မီးကျစေခြင်းအားဖြင့် ကိုယ်တော်အဖြေပေးခဲ့တာကို အာဟပ် မြင်ခဲ့ရတယ်။ အဲဒီနောက် မိုးခေါင်တဲ့ဘေးကို ယေဟောဝါ အဆုံးသတ်ပေးတော့မှာဖြစ်ပြီး မိုးရွာစေတော့မယ်လို့ အာဟပ်ကို ဧလိယပြောတယ်။ (၃ ရာ. ၁၈:၂၂-၄၅) ဒီအံ့ဖွယ်အမှုအားလုံးကို အာဟပ် မြင်တွေ့ခဲ့တာတောင် ယေဟောဝါရဲ့တန်ခိုးကို အသိအမှတ်မပြုခဲ့ဘူး။ ဒီကနေ ဘာသင်ယူနိုင်သလဲ။ ကျွန်တော်တို့က ကိုယ့်ဘဝမှာ ဘုရားသခင့်လက်တော် အလုပ်လုပ်ပုံကို မြင်တွေ့ဖို့ ကြိုးစားရမယ်။

ယေဟောဝါရဲ့လက်တော်ကို မြင်တွေ့ခဲ့သူများ

၆၊ ၇။ ဂိဗောင်မြို့သားတွေနဲ့ ရာခပ် ဘာကို အသိအမှတ်ပြုခဲ့သလဲ။

^၆ ဂိဗောင်မြို့သားတွေဟာ ဝန်းကျင်ကလူမျိုးတွေနဲ့ သိပ်ကွာခြားတယ်။ ဘုရားသခင့်လက်တော်ကို သူတို့မြင်တွေ့ခဲ့တယ်။ အစ္စရေးတွေနဲ့ တိုက်ခိုက်မယ့်အစား မဟာမိတ်ဖွဲ့ဖို့ ကြိုးစားခဲ့တယ်။ ဘာကြောင့်လဲ။ ယေဟောဝါအကြောင်း၊ ကိုယ်တော်လုပ်ဆောင်ခဲ့တာတွေအကြောင်း ကြားရလို့ဖြစ်တယ်လို့ သူတို့ပြောတယ်။ (ယောရှု ၉:၃၊ ၉၊ ၁၀) အစ္စရေးတွေဘက်ကနေ ယေဟောဝါ တိုက်ခိုက်နေမှန်း သူတို့ ပညာရှိရှိ အသိအမှတ်ပြုခဲ့ကြတယ်။

^၇ ရာခပ်လည်း ယေဟောဝါရဲ့လက်တော်ကို မြင်တွေ့ခဲ့တယ်။ သူဟာ အစ္စရေးလူမျိုးမဟုတ်ဘူး။ ဒါပေမဲ့ အစ္စရေးတွေကို အီဂျစ်ပြည်ကနေ ယေဟောဝါ ဘယ်လိုကယ်တင်ခဲ့မှန်း သူကြားတဲ့အတွက် ‘ယေဟောဝါဘုရားက ရှင်တို့ကို ဒီပြည်ပေးမယ်ဆိုတာ ကျွန်မသိတယ်’ လို့ အစ္စရေးသူလျှိုနှစ်ယောက်ကို ပြောတယ်။ သူနဲ့ သူ့မိသားစုကို ယေဟောဝါ ကယ်တင်နိုင်မှန်း ရာခပ်ယုံကြည်တယ်။ ဒါကြောင့် အန္တရာယ်ရှိမှန်းသိပေမဲ့ ယေဟောဝါကို ယုံကြည်ကြောင်း တင်ပြခဲ့တယ်။—ယောရှု ၂:၉-၁၃၊ ကဘ; ၄:၂၃၊ ၂၄။

၈။ ဘုရားသခင့်လက်တော်ကို အစ္စရေးတချို့ ဘယ်လိုအသိအမှတ်ပြုခဲ့ကြသလဲ။

^၈ ဧလိယဆုတောင်းလို့ ကောင်းကင်ကနေ မီးကျလာတာကို မြင်ခဲ့တဲ့ အစ္စရေးတချို့ကတော့ မင်းဆိုးအာဟပ်နဲ့မတူဘူး။ အဲဒီလို မီးကျစေသူဟာ ဘုရားသခင်ဖြစ်တယ်ဆိုတာ သူတို့အသိအမှတ်ပြုခဲ့တယ်။ ‘ယေဟောဝါဟာ စစ်မှန်တဲ့ဘုရားပဲ’ လို့ သူတို့ပြောတယ်။ (၃ ရာ. ၁၈:၃၉၊ ကဘ) ဘုရားသခင့်တန်ခိုးကို မြင်ခဲ့ရမှန်း သူတို့ သေချာသိတယ်။

၉။ ဒီနေ့ခေတ်မှာ ယေဟောဝါရဲ့လက်တော်ကို ဘယ်လိုမြင်တွေ့နိုင်သလဲ။

^၉ ဘုရားသခင့်လက်တော်ကို မြင်တွေ့ရခြင်းဟာ ဘာကိုဆိုလိုမှန်း ကျမ်းစာထဲက ပုံနမူနာကောင်းနဲ့ ပုံနမူနာဆိုးတွေကနေ ကျွန်တော်တို့ သိရှိခဲ့ကြတယ်။ ယေဟောဝါနဲ့ ကိုယ်တော့်အရည်အသွေးတွေအကြောင်း သိလာတဲ့အခါ ကျွန်တော်တို့လည်း ကိုယ်တော့်လက်တော်ကို ကိုယ့်ရဲ့ “ဉာဏ်မျက်စိ” နဲ့ မြင်တွေ့နိုင်တယ်။ (ဧ. ၁:၁၈) မိမိလူမျိုးကို ယေဟောဝါ ကူညီပေးမှန်း မြင်တွေ့ခဲ့တဲ့ ရှေးခေတ်နဲ့ ဒီနေ့ခေတ် သစ္စာရှိကျေးကျွန်တွေကို ကျွန်တော်တို့ တုပချင်တယ်။ ဒါပေမဲ့ ဒီနေ့ခေတ်မှာ လူတွေကို ယေဟောဝါ ကူညီပေးနေတဲ့ အထောက်အထား ရှိသလား။

ဒီနေ့ခေတ်မှာ ဘုရားသခင့်လက်တော် ကူညီပေးတဲ့ အထောက်အထား

၁၀။ ဒီနေ့ခေတ်မှာ လူတွေကို ယေဟောဝါ ကူညီပေးနေတဲ့ ဘာအထောက်အထား ရှိသလဲ။ (ဆောင်းပါးအစမှာပါတဲ့ ရုပ်ပုံကိုကြည့်ပါ။)

^၁၀ ဒီနေ့ခေတ်မှာ လူတွေကို ယေဟောဝါ ကူညီပေးနေတဲ့ အထောက်အထား တောင်ပုံရာပုံရှိတယ်။ ကူညီပေးဖို့ ဘုရားသခင်ဆီ ဆုတောင်းပြီးနောက် ချက်ချင်းအဖြေရခဲ့သူတွေရဲ့ တွေ့ကြုံမှုတွေကို ကျွန်တော်တို့ မကြာခဏ ကြားရလေ့ရှိတယ်။ (ဆာ. ၅၃:၂) ဥပမာ၊ ညီအစ်ကို အယ်လန်ဟာ ဖိလစ်ပိုင်နိုင်ငံရဲ့ ကျွန်းငယ်လေးမှာ ဟောပြောနေတုန်း အမျိုးသမီးတစ်ယောက်နဲ့ တွေ့တယ်။ သူ့ကိုတွေ့တာနဲ့ အဲဒီအမျိုးသမီး ငိုပါလေရော။ “သက်သေခံတွေ ရှာတွေ့ပါစေလို့ ယေဟောဝါဆီ ဒီမနက်ပဲ အဲဒီအမျိုးသမီး ဆုတောင်းခဲ့တာ” လို့ ညီအစ်ကို အယ်လန် ပြောပြတယ်။ အဲဒီအမျိုးသမီးဟာ ဆယ်ကျော်သက်တုန်းက သက်သေခံတွေနဲ့ ကျမ်းစာလေ့လာခဲ့တယ်။ ဒါပေမဲ့ အိမ်ထောင်ကျပြီးနောက် ဒီကျွန်းကို ပြောင်းလာပြီး ဆက်မလေ့လာဖြစ်တော့ဘူး။ သူ့ဆုတောင်းချက်ကို ယေဟောဝါ ချက်ချင်းအဖြေပေးခဲ့လို့ တအားစိတ်ထိမိသွားတယ်။ တစ်နှစ်မပြည့်ခင်လေးမှာပဲ သူ့ဘဝကို ယေဟောဝါဆီ ဆက်ကပ်အပ်နှံခဲ့တယ်။

၁၁၊ ၁၂။ (က) မိမိကျေးကျွန်တွေကို ယေဟောဝါ ဘယ်လိုကူညီပေးနေသလဲ။ (ခ) ညီအစ်မတစ်ယောက်ကို ယေဟောဝါ ဘယ်လိုကူညီပေးခဲ့သလဲ။ ရှင်းပြပါ။

^၁၁ ယေဟောဝါရဲ့ကျေးကျွန်များစွာဟာ ဆေးလိပ်၊ မူးယစ်ဆေးနဲ့ ညစ်ညမ်းရုပ်ပုံကြည့်တဲ့ အကျင့်ဆိုးတွေကို ဖြတ်ခဲ့တုန်းက ယေဟောဝါရဲ့လက်တော် ကူညီပေးတာကို မြင်တွေ့ခဲ့ကြတယ်။ အဲဒီအကျင့်ဆိုးတွေကို ဖြတ်ဖို့ ကိုယ့်အစွမ်းနဲ့ကိုယ် ကြိုးစားခဲ့ပေမဲ့ မအောင်မြင်ဘူးလို့ သူတို့ပြောတယ်။ ဒါပေမဲ့ ယေဟောဝါဆီ အကူအညီတောင်းတဲ့အခါ “သာမန်ထက် ထူးကဲသောတန်ခိုးတော်” ကို ပေးတဲ့အတွက် နောက်ဆုံး အဲဒီအကျင့်ဆိုးတွေကို ဖြတ်နိုင်ခဲ့တယ်။—၂ ကော. ၄:၇; ဆာ. ၃၇:၂၃၊ ၂၄။

^၁၂ ကိုယ်ရေးကိုယ်တာပြဿနာတွေကို ခံရပ်နိုင်ဖို့လည်း ယေဟောဝါ ကူညီပေးတယ်။ ညီအစ်မအေမီ အဲဒီလိုကြုံတွေ့ခဲ့တယ်။ ပစိဖိတ်သမုဒ္ဒရာရဲ့ ကျွန်းငယ်လေးတစ်ခုမှာ နိုင်ငံတော်ခန်းမနဲ့ သာသနာပြုအိမ် ဆောက်လုပ်ရေးမှာ ကူညီပေးဖို့ သူတာဝန်ကျတယ်။ ယဉ်ကျေးမှုက မတူ၊ လျှပ်စစ်မီးနဲ့ရေ ခဏခဏပြတ်၊ မိုးရွာတဲ့အခါ လမ်းတွေ ရေလျှံတဲ့အပြင် ဟိုတယ်အခန်းကျဉ်းလေးမှာ နေရတယ်။ အိမ်ကိုလည်း တအားလွမ်းတယ်။ တစ်နေ့၊ အတူအလုပ်လုပ်နေတဲ့ ညီအစ်မတစ်ယောက်ကို သူ အော်မိတယ်။ ပြီးမှ တအားစိတ်မကောင်းဖြစ်သွားတယ်။ မှောင်မည်းနေတဲ့ ဟိုတယ်အခန်းထဲ ပြန်ရောက်တဲ့အခါ ယေဟောဝါဆီ ဆုတောင်းပြီး အကူအညီတောင်းခဲ့တယ်။ လျှပ်စစ်မီးပြန်လာတဲ့အခါ ဂိလဒ်ကျောင်းဆင်းပွဲတစ်ခုနဲ့ပတ်သက်တဲ့ ကင်းမျှော်စင် ဆောင်းပါးတစ်ပုဒ် ဖတ်မိတယ်။ သူကြုံနေရတဲ့ ပြဿနာတွေအကြောင်း အဲဒီဆောင်းပါးမှာ ဆွေးနွေးထားတယ်။ “အဲဒီညမှာ ကျွန်မကို ယေဟောဝါ စကားပြောနေသလို ခံစားခဲ့ရတယ်။ ကိုယ့်တာဝန်ကို ဆက်လုပ်ဆောင်နိုင်ဖို့ ခွန်အားရခဲ့တယ်” လို့သူပြောတယ်။—ဆာ. ၄၄:၂၅၊ ၂၆; ဟေရှာ. ၄၁:၁၀၊ ၁၃။

၁၃။ မိမိလူမျိုးရဲ့ ဟောပြောခွင့်ကို ခုခံကာကွယ်ဖို့ ယေဟောဝါ ကူညီပေးခဲ့တဲ့ ဘာအထောက်အထားရှိသလဲ။

^၁၃ သတင်းကောင်းကို ခုခံကာကွယ်ပြီး တရားဥပဒေအရ အတည်ဖြစ်စေဖို့လည်း မိမိလူမျိုးကို ယေဟောဝါ ကူညီပေးတယ်။ (ဖိ. ၁:၇) ဥပမာ၊ ဟောပြောခြင်းလုပ်ငန်းကို တားဆီးပိတ်ပင်ဖို့ အစိုးရတချို့ ကြိုးစားတဲ့အခါ ကျွန်တော်တို့ တရားရုံးအထိတက်ပြီး ခုခံကာကွယ်ခဲ့ကြတယ်။ တစ်ကမ္ဘာလုံးမှာ အမှုပေါင်း ၂၆၈ မှုလောက် အနိုင်ရခဲ့တယ်။ အဲဒီထဲက ၂၄ မှုကို လူ့အခွင့်အရေးဆိုင်ရာ ဥရောပတရားရုံးမှာ ၂၀၀၀ ပြည့်နှစ်ကစပြီး အနိုင်ရခဲ့တာဖြစ်တယ်။ ဘုရားသခင့်လက်တော်ကို ဘယ်သူမှမတားဆီးနိုင်မှန်း သိပ်ထင်ရှားတယ်။—ဟေရှာ. ၅၄:၁၇; ဟေရှာယ ၅၉:၁ ကိုဖတ်ပါ။

၁၄။ မိမိလူမျိုးကို ဘုရားသခင်ကူညီပေးတဲ့ နောက်ထပ် ဘာအထောက်အထား ရှိသလဲ။

^၁၄ တစ်ကမ္ဘာလုံးမှာ သတင်းကောင်းဟောပြောနေတာကလည်း ဘုရားသခင့်လက်တော် ကူညီပေးတဲ့ ထပ်ဆင့်အထောက်အထားဖြစ်တယ်။ (မ. ၂၄:၁၄; တ. ၁:၈) လူမျိုးပေါင်းစုံနဲ့ဖွဲ့စည်းထားတဲ့ ညီအစ်ကိုအသင်းအပင်းရဲ့ စည်းလုံးမှုကလည်း ယေဟောဝါရဲ့ အကူအညီကြောင့်ပဲ။ ယေဟောဝါကို ဝတ်မပြုသူတွေတောင် ထူးခြားလှတဲ့ အဲဒီစည်းလုံးမှုကြောင့် “ဘုရားသခင်သည် သင်တို့တွင် အမှန်ရှိတော်မူသည်” လို့ ဝန်ခံကြတယ်။ (၁ ကော. ၁၄:၂၅) မိမိလူမျိုးကို ဘုရားသခင် ကူညီပေးနေတဲ့ အထောက်အထား အများကြီးရှိပါတယ်။ (ဟေရှာယ ၆၆:၁၄ ကိုဖတ်ပါ။) သင်ကော ဘယ်လိုလဲ။ သင့်ဘဝမှာ ယေဟောဝါရဲ့လက်တော် ကူညီပေးတာကို မြင်တွေ့သလား။

သင့်ဘဝမှာ ယေဟောဝါရဲ့လက်တော်ကို မြင်တွေ့သလား

၁၅။ တစ်ခါတလေ ယေဟောဝါရဲ့လက်တော်ကို ဘာကြောင့် မမြင်တွေ့ဘဲ ဖြစ်နိုင်သလဲ။

^၁၅ တစ်ခါတလေ ကိုယ့်ဘဝမှာ ဘုရားသခင့်လက်တော် ကူညီပေးတာကို မမြင်တွေ့ဘဲ ဖြစ်နိုင်တယ်။ ဘာကြောင့်လဲ။ ပြဿနာတွေ များလွန်းလို့ ယေဟောဝါ အရင်က ကူညီပေးခဲ့တာတွေကို မေ့သွားတာဖြစ်နိုင်တယ်။ ဧလိယ အဲဒီလိုဖြစ်ခဲ့တယ်။ သူဟာ သတ္တိရှိသူဖြစ်ပေမဲ့ မိဖုရားယေဇဗေလ ခြိမ်းခြောက်တဲ့အခါ ကြောက်စိတ်ဝင်ခဲ့တယ်။ ယေဟောဝါ အရင်က ကူညီပေးခဲ့တာတွေကို ခဏမေ့သွားတယ်။ “ကိုယ်အသက်သေရမည်အကြောင်း ဆုတောင်း” တဲ့အထိဖြစ်ခဲ့တယ်လို့ ကျမ်းစာပြောတယ်။ (၃ ရာ. ၁၉:၁-၄) အကူအညီနဲ့ ခွန်အားကို သူ ဘယ်ကရနိုင်မလဲ။ ယေဟောဝါကို အားကိုးဖို့ လိုအပ်တယ်။—၃ ရာ. ၁၉:၁၄-၁၈။

၁၆။ ဘုရားသခင်ကို ယောဘမြင်တွေ့ခဲ့သလို မြင်တွေ့ဖို့ ဘာလုပ်နိုင်သလဲ။

^၁၆ ယောဘဟာ ပြဿနာတွေကို အာရုံစိုက်လွန်းလို့ သူ့အခြေအနေကို ယေဟောဝါ မြင်သလို မမြင်တော့ဘူး။ (ယောဘ ၄၂:၃-၆) ကျွန်တော်တို့လည်း ပြဿနာတွေ များလွန်းလို့ ဘုရားသခင့်လက်တော်ကို မြင်တွေ့ဖို့ ခက်ခဲတဲ့အခါတွေ ရှိနိုင်တယ်။ ဒါဆို ဘုရားသခင် လုပ်ပေးခဲ့တာတွေကို မြင်တွေ့ဖို့ ဘာက ကူညီပေးနိုင်သလဲ။ ပြဿနာတွေနဲ့ပတ်သက်ပြီး ကျမ်းစာမှာ ဘာပြောထားတယ်ဆိုတာ တွေးတောဆင်ခြင်ရမယ်။ ကျွန်တော်တို့ကို ယေဟောဝါ ဘယ်လိုကူညီပေးမှန်း နားလည်လာတဲ့အခါ ကိုယ်တော်ဟာ တကယ့်ပုဂ္ဂိုလ်ဖြစ်တယ်လို့ ပိုခံစားလာရပါလိမ့်မယ်။ အဲဒီအခါ “သတင်းတော်ကို အကျွန်ုပ်သည် နားနှင့်ကြားဖူးပါပြီ။ ယခုမူကား ကိုယ်တော်ကို မျက်စိနှင့်မြင်ရပါ၏” လို့ ယောဘလို ပြောနိုင်ပါလိမ့်မယ်။

၁၇၊ ၁၈။ (က) သင့်ဘဝမှာ ယေဟောဝါရဲ့လက်တော်ကို ဘယ်လိုမြင်နိုင်သလဲ။ (ခ) ကျွန်တော်တို့ကို ယေဟောဝါ ကူညီပေးမှန်း ဖော်ပြတဲ့ တွေ့ကြုံမှုတစ်ခု ပြောပြပါ။

^၁၇ သင့်ဘဝမှာ ယေဟောဝါရဲ့လက်တော်ကို ဘယ်လိုမြင်တွေ့နိုင်သလဲ။ ဥပမာငါးခုကို သုံးသပ်ကြည့်ပါ။ ပထမ၊ ဘုရားသခင့်အကူအညီကြောင့် အမှန်တရားကို တွေ့ရှိခဲ့တာလို့ သင် ခံစားမိနိုင်တယ်။ ဒုတိယ၊ အစည်းအဝေးမှာ ဟောပြောချက်တစ်ခု ကြားရပြီးနောက် “ငါလိုနေတာနဲ့ ကွက်တိပဲ” လို့ ပြောခဲ့ရတာမျိုး ရှိသလား။ တတိယ၊ သင့်ဆုတောင်းချက်တစ်ခုကို ယေဟောဝါ အဖြေပေးခဲ့တာမျိုး ဖြစ်နိုင်တယ်။ စတုတ္ထ၊ ယေဟောဝါအတွက် ပိုအမှုဆောင်ချင်တဲ့ဆန္ဒ ပြည့်ဝအောင် ကိုယ်တော် ကူညီပေးခဲ့တာကို သင် ခံစားမိနိုင်တယ်။ ပဉ္စမ၊ ယေဟောဝါအတွက် အချိန်သိပ်မပေးနိုင်လို့ အလုပ်ထွက်လိုက်ပြီးနောက် ‘ငါသည် သင့်ကို အလျှင်းပစ်၍မထား’ ဆိုတဲ့ ကတိအတိုင်း ဘုရားလုပ်ဆောင်ပေးခဲ့တာကို သင် ကြုံတွေ့ရတာမျိုးဖြစ်နိုင်တယ်။ (ဟေဗြဲ ၁၃:၅) ယေဟောဝါနဲ့ ဆက်ဆံရေးခိုင်မြဲနေမယ်ဆိုရင် ဘဝမှာ ကိုယ်တော့်လက်တော် ကူညီပေးပုံကို အလွယ်တကူမြင်တွေ့နိုင်ပါလိမ့်မယ်။

^၁၈ ကင်ညာနိုင်ငံက ညီအစ်မဆယ်ရာ အခုလိုပြောတယ်– “ကျမ်းစာလေ့လာတာကို သိပ်တန်ဖိုးထားပုံမရတဲ့ ကျမ်းစာသင်သားအကြောင်း ကျွန်မ ဆုတောင်းပြီး သင်အံမှုရပ်လိုက်ရင်ကောင်းမလားလို့ ယေဟောဝါကို မေးခဲ့တယ်။ ‘အာမင်’ လို့ ပြောပြီးတာနဲ့ ချက်ချင်း ဖုန်းမြည်လာတယ်။ ဖုန်းကိုင်လိုက်တော့ အဲဒီကျမ်းစာသင်သားဖြစ်နေတယ်။ အစည်းအဝေးလိုက်လို့ရမလားဆိုပြီး သူမေးလိုက်တဲ့အတွက် ကျွန်မ တော်တော်အံ့သြမှင်တက်သွားတယ်။” ကိုယ့်အတွက် ဘုရားသခင်လုပ်ဆောင်ပေးနေတာတွေကို မြင်နိုင်အောင် ကြိုးစားမယ်ဆိုရင် ဘုရားသခင့်လက်တော်ကို သင် မြင်တွေ့ရပါလိမ့်မယ်။ အာရှတိုက်မှာနေထိုင်တဲ့ ညီအစ်မရော်န်နာ အခုလိုပြောတယ်– “ယေဟောဝါကူညီပေးတာကို မြင်တတ်အောင် သင်ယူရမယ်။ ဒါပေမဲ့ အဲဒီလိုမြင်တွေ့ပြီဆိုတာနဲ့ ကိုယ်တော် သင့်ကို ဘယ်လောက်စိတ်ဝင်စားမှန်း အံ့ဩစရာကောင်းလောက်အောင် သိရှိလာပါလိမ့်မယ်။”

၁၉။ ဘုရားသခင်ကို မြင်တွေ့နိုင်ဖို့ ဘာလိုအပ်သေးသလဲ။

^၁၉ “စိတ်နှလုံးဖြူစင်သူ” တွေဟာ “ဘုရားသခင်ကို မြင်ရကြ” မယ်လို့ ယေရှုပြောတယ်။ (မ. ၅:၈) “စိတ်နှလုံးဖြူစင်” အောင် ဘယ်လိုလုပ်ဆောင်နိုင်သလဲ။ အတွေးအခေါ်ကို သန့်ရှင်းစင်ကြယ်အောင်ထားပြီး မကောင်းတဲ့အကျင့်မှန်သမျှကို ဖြတ်ပစ်ရမယ်။ (၂ ကောရိန္သု ၄:၂ ကိုဖတ်ပါ။) ဘုရားသခင်ကို မြင်တွေ့ဖို့ဆိုရင် ကိုယ်တော်နဲ့ ဆက်ဆံရေးခိုင်မြဲနေရမယ်ဆိုတာ ဒီဆောင်းပါးမှာ သိရှိခဲ့ရတယ်။ နောက်ဆောင်းပါးမှာတော့ ဘဝမှာ ဘုရားသခင့်လက်တော် ကူညီပေးတာကို ပိုသဲသဲကွဲကွဲ မြင်နိုင်အောင် ယုံကြည်ခြင်းက ဘယ်လိုကူညီပေးနိုင်တယ်ဆိုတာ ဆွေးနွေးပါမယ်။