ရောမ ၆:၂၃—‘အပြစ်တရား၏ အခကား သေခြင်းပေတည်း။ ဘုရားသခင် ပေးတော်မူသော ဆုကျေးဇူးတော်ကား ထာဝရအသက်ပေတည်း’

“အပြစ်က ပေးတဲ့ အခဟာ သေခြင်းပဲ။ ဘုရားသခင် ပေးတဲ့ ဆုကျေးဇူးကတော့ သခင်ခရစ်တော် ယေရှုအားဖြင့် ထာဝရအသက်ပဲ။”—ရောမ ၆:၂၃၊ ကမ္ဘာသစ် ဘာသာပြန်ကျမ်း။

“အပြစ်တရား၏ အခကား သေခြင်းပေတည်း။ ဘုရားသခင် ပေးတော်မူသော ဆုကျေးဇူးတော်ကား၊ ငါတို့သခင် ယေရှုခရစ်အားဖြင့် ထာဝရအသက်ပေတည်း။”—ရောမ ၆:၂၃၊ ယုဒသန်ကျမ်း။

ရောမ ၆:၂၃ ရဲ့ အဓိပ္ပာယ်

အပြစ်သားတွေ ဖြစ်လို့ လူတွေ သေရတာ ဖြစ်ကြောင်း ဒီစကားတွေနဲ့ တမန်တော် ပေါလု ရှင်းပြတယ်။ ဒါပေမဲ့ သစ္စာရှိ ဝတ်ပြုသူတွေကို ထာဝရအသက် ဆုကျေးဇူးဆိုတဲ့ သိပ်ကောင်းတဲ့ မျှော်လင့်ချက် ဘုရား ပေးထားတယ်။

“အပြစ်က ပေးတဲ့ အခဟာ သေခြင်းပဲ။” လူအားလုံးဟာ မွေးရာပါ မစုံလင်သူတွေ ဖြစ်လို့ အပြစ် လုပ်ချင်စိတ် ရှိကြတယ်။a (ဆာလံ ၅၁:၅။ ဒေသနာ ၇:၂၀) မွေးကတည်းက အပြစ် ပါလာလို့ မလွှဲမရှောင်နိုင် အိုကြ၊ သေကြရတယ်။—ရောမ ၅:၁၂။

ဒီအချက် ပေါ်လွင်စေဖို့ လုပ်ခ ပေးတဲ့ သခင်နဲ့ အပြစ်ကို ပေါလု ခိုင်းနှိုင်းထားတယ်။ အလုပ်သမားဟာ ကိုယ့်လုပ်အားအတွက် လုပ်ခ မျှော်သလိုပဲ လူတွေဟာ မစုံလင်မှုကြောင့် သေကို သေရမယ်ဆိုတာ မျှော်လင့်ထားနိုင်တယ်။

ဒါပေမဲ့ “လူတစ်ယောက် သေဆုံးပြီဆိုရင် အပြစ်ရဲ့ လက်အောက်ကနေ လွတ်မြောက်သွားပြီ” လို့လည်း ပေါလု ရှင်းပြတယ်။ (ရောမ ၆:၇) လုပ်ခဲ့သမျှ အပြစ်ကနေ လွတ်သွားတာ။ ဒါကြောင့် သေလွန်သူတွေဟာ အတိတ်က အမှားတွေကြောင့် တစ်နေရာရာမှာ ဒုက္ခ ဆက်ခံရစရာအကြောင်း လုံးဝ မရှိဘူး။ သေလွန်သူတွေ ဘာမှ မစဉ်းစားနိုင်ဘူး၊ မလုပ်နိုင်ဘူး၊ မခံစားနိုင်ဘူးလို့ ကျမ်းစာမှာ ရှင်းရှင်းလင်းလင်း ဖော်ပြထားတယ်။—ဒေသနာ ၉:၅။

“ဘုရားသခင် ပေးတဲ့ ဆုကျေးဇူးကတော့ သခင်ခရစ်တော် ယေရှုအားဖြင့် ထာဝရအသက်ပဲ။” အပြစ်က ပေးတဲ့ “အခ” နဲ့ မတူဘဲ ဘုရားကတော့ ထာဝရအသက် ဆုကျေးဇူး ပေးတယ်။ “ဆုကျေးဇူး” ဆိုတဲ့ မူရင်း အသုံးအနှုန်းကို “ကရုဏာ လက်ဆောင်” လို့လည်း ပြန်ဆိုနိုင်တယ်။ မရထိုက်ဘဲ ရတဲ့ အရာတစ်ခုခုကို ဆိုလိုတာပါ။ အပြစ်သား တစ်ယောက်မှ ကယ်တင်ခြင်း၊ ထာဝရအသက် ရအောင် ကိုယ့်ဘာသာ မလုပ်နိုင်ဘူး။ (ဆာလံ ၄၉:၇၊ ၈) ဒါပေမဲ့ ယေရှုကို ယုံကြည်သက်ဝင်သူတွေကို ထာဝရအသက် ဆိုတဲ့ အဖိုးမဖြတ်နိုင်တဲ့ လက်ဆောင် ဘုရား ပေးတယ်။—ယောဟန် ၃:၁၆။ ရောမ ၅:၁၅၊ ၁၈။

ရောမ ၆:၂၃ ရဲ့ အထက်အောက်စကား

အေဒီ ၅၆ လောက်မှာ ရောမမြို့က ခရစ်ယာန်တွေဆီ ဒီစာကို ပေါလု ရေးခဲ့တယ်။ ဘုရားကရုဏာနဲ့ပတ်သက်ပြီး အဲဒီခေတ်က ခရစ်ယာန်တချို့ တလွဲ ယူဆထားကြပုံရတယ်။ ဂရိ အတွေးအခေါ် လွှမ်းမိုးနေတဲ့အတွက် အပြစ် ကျူးလွန်လေ ဘုရားခွင့်လွှတ်မှု ခံစားရလေလို့ ထင်နေကြပုံပဲ။ (ရောမ ၆:၁) တချို့ကျတော့ မောရှေပညတ်အောက်မှာ မရှိတော့လို့ အပြစ်တွေအတွက် စာရင်းရှင်းစရာ မလိုတော့ဘူးလို့ စောဒကတက်ကြတယ်။ (ရောမ ၆:၁၅) ဒါပေမဲ့ ခရစ်ယာန်တွေအနေနဲ့ ကိုယ့်ဘဝမှာ အပြစ်ကို ကြီးစိုးခွင့် ပြုထားရင် ဘုရားကရုဏာ ခံစားရမှာ မဟုတ်ကြောင်း စာထဲမှာ ပေါလု အလေးပေး ဖော်ပြထားတယ်။—ရောမ ၆:၁၂-၁၄၊ ၁၆။

အပြစ်သားအဖြစ် မွေးလာပေမဲ့ ဘုရားကို ဝတ်ပြုနေသူတွေမှာ မျှော်လင့်ချက် ရှိသေးကြောင်း ပေါလုရဲ့ စကားတွေက စိတ်ချစေတယ်။ ဘုရားရဲ့ ကိုယ်ကျင့်တရား စံနှုန်းတွေကို လိုက်နာမယ်၊ မှားယွင်းတဲ့ အလိုဆန္ဒတွေနောက် မလိုက်ဘူးဆိုရင် ထာဝရအသက် ပေးမယ်လို့ ဘုရား ကတိပေးထားတယ်။—ရောမ ၆:၂၂။

ရောမကျမ်း ခြုံငုံသုံးသပ်ချက်ကို သိနိုင်ဖို့ ဒီဗီဒီယိုတိုမှာ ကြည့်ပါ။