ကျမ်းပိုဒ် ရှင်းပြချက်များ
ယေရမိ ၁၁:၁၁—“ဘေးအန္တရာယ်ကို သူတို့အပေါ်၌ ငါသက်ရောက်စေမည်”
“ဒါကြောင့် ယေဟောဝါ ပြောတာက– ‘မလွတ်မြောက်နိုင်တဲ့ ဘေးဆိုးကို သူတို့အပေါ် ငါကျရောက်စေမယ်။ သူတို့ အော်ဟစ်အကူအညီတောင်းတဲ့အခါ ငါနားမထောင်ဘူး။”—ယေရမိ ၁၁:၁၁၊ ကမ္ဘာသစ်ဘာသာပြန်ကျမ်း။
“သို့ဖြစ်၍ ထာဝရဘုရား မိန့်တော်မူသည်ကား သူတို့မလွတ်နိုင်သော ဘေးအန္တရာယ်ကို သူတို့အပေါ်၌ ငါသက်ရောက်စေမည်။ သူတို့သည် ငါ့ကိုအော်ဟစ်သော်လည်း ငါနားမထောင်ဘဲနေမည်။”—ယေရမိ ၁၁:၁၁၊ ယုဒသန်ကျမ်း။
ယေရမိ ၁၁:၁၁ ရဲ့ အဓိပ္ပာယ်
ပရောဖက် ယေရမိခေတ်က ဂျူးတွေကို ဘုရားသခင်ပြောခဲ့တဲ့ စကားတွေပါ။ ယေဟောဝါaရဲ့ ဖြောင့်မတ်တဲ့ ပညတ်တွေနဲ့ ပရောဖက်တွေကတစ်ဆင့်ရရှိတဲ့ မေတ္တာပါဆုံးမမှုကို လျစ်လျူရှုခြင်းကြောင့် ခံစားရတဲ့ ဆိုးကျိုးကနေ ကာကွယ်ပေးမှာ မဟုတ်ဘူးလို့ ဂျူးတွေကို ပြောနေတာဖြစ်တယ်။—ပညာအလိမ္မာ ၁:၂၄-၃၂။
“ဒါကြောင့် ယေဟောဝါ ပြောတာက။” အရှေ့ကျမ်းပိုဒ်တွေနဲ့ တစ်ဆက်တည်းဖြစ်ကြောင်း “ဒါကြောင့်” ဆိုတဲ့ စကားလုံးက သိသာစေတယ်။ ယေရမိ ၁၁:၁-၁၀ ဟာ ယေဟောဝါဘုရားနဲ့ ဘိုးဘေးတွေ ဖွဲ့ခဲ့တဲ့ ပဋိညာဉ်ကို ဂျူးတွေ ချိုးဖောက်တဲ့အကြောင်းပါ။ (ထွက်မြောက်ရာ ၂၄:၇) ဂျူးတွေက ဖန်ဆင်းရှင်ကို ဝတ်ပြုမယ့်အစား အယူဖောက်ပြန်ပြီး ရုပ်တုတွေ ကိုးကွယ်ကြတယ်။ ကလေးတွေကို မီးရှို့ပူဇော်တဲ့အထိ မကောင်းမှုအမျိုးမျိုး လုပ်လာကြတယ်။—ယေရမိ ၇:၃၁။
“ဘေးဆိုးကို သူတို့အပေါ် ငါကျရောက်စေမယ်။” ဘုရားသခင် တစ်ခုခု ပြုလုပ်တယ်လို့ ကျမ်းစာဆိုတဲ့အခါ အများအားဖြင့် ဖြစ်ခွင့်ပြုတာကို ဆိုလိုတာပါ။ ဒါဆို ဘုရားသခင်က ဂျူးတွေအပေါ် ဘေးဆိုး ကျရောက်တာကို ဘယ်လိုနည်းနဲ့ ဖြစ်ခွင့်ပြုခဲ့သလဲ။ မိမိတို့ကို အကျိုးပြုတဲ့ ယေဟောဝါရဲ့ စံနှုန်းတွေကို မလိုက်နာဘဲ ဘုရားအတုအယောင်တွေကို ကိုးကွယ်ခြင်းအားဖြင့် ဂျူးတွေ ကိုယ့်ဒုက္ခကိုယ်ရှာကြတယ်။ ဘုရားရဲ့ ကာကွယ်ပေးမှုလည်း ဆုံးရှုံးသွားတဲ့အတွက် အင်အားကြီးရန်သူ ဗာဗုလုန်ဘုရင်က ဂျေရုဆလင်ကို သိမ်းပိုက်ပြီး ပြည်သားတွေကို သုံ့ပန်းတွေအဖြစ် ဖမ်းခေါ်သွားတယ်။ ဂျူးတွေ ယုံကြည်အားကိုးပါတယ်ဆိုတဲ့ ဘုရားအတုအယောင်တွေက သူတို့ကို မကယ်တင်နိုင်ခဲ့ဘူး။—ယေရမိ ၁၁:၁၂။ ၂၅:၈၊ ၉။
ဒီအဖြစ်ဆိုးတွေ ဖြစ်ခွင့်ပြုတဲ့အတွက် ဘုရားသခင်ကို မတရားဘူး၊ မကောင်းဘူးလို့ ပြောလို့မရဘူး။ “မကောင်းတဲ့အရာတွေနဲ့ ဘုရားသခင်ကို ဘယ်သူမှ စမ်းသပ်လို့ မရသလို ဘုရားသခင်ကလည်း ဘယ်သူ့ကိုမှ မကောင်းတဲ့အရာနဲ့ မစမ်းသပ်ဘူး” ဆိုပြီး ယာကုပ် ၁:၁၃ မှာ ဆိုတယ်။
“သူတို့ အော်ဟစ်အကူအညီတောင်းတဲ့အခါ ငါနားမထောင်ဘူး။” “လက်တွေ သွေးစွန်းနေ” သူတွေ၊ ဘုရားအတုအယောင်တွေကို အားကိုးတဲ့သူတွေရဲ့ ဆုတောင်းသံကို ယေဟောဝါ နားမထောင်ဘူး။ (ဟေရှာယ ၁:၁၅။ ၄၂:၁၇) ကိုယ့်အမှားကြောင့် တကယ်နောင်တရပြီး ဘုရားဆီ နှိမ့်ချတဲ့စိတ်နဲ့ ပြန်လာသူတွေရဲ့ ဆုတောင်းစကားကိုတော့ လက်ခံနားထောင်ပေးတယ်။—ဟေရှာယ ၁:၁၆-၁၉။ ၅၅:၆၊ ၇။
ယေရမိ ၁၁:၁၁ အထက်အောက်စကား
ဘီစီ ၆၂၇ မှာ ယေဟောဝါက ယေရမိကို ပရောဖက်အဖြစ် ခန့်အပ်တယ်။ ယေရမိက ယုဒပြည်သားတွေကို ဘုရား တရားစီရင်တော့မယ့်အကြောင်း နှစ်ပေါင်း ၄၀ လုံးလုံး သတိပေးတယ်။ ဒါပေမဲ့ သူတို့ နားမထောင်ဘူး။ အဲဒီအတောအတွင်း ယေရမိက ယေရမိ ၁၁:၁၁ ပါ စကားကို ရေးသားတယ်။ နောက်ဆုံး ဘီစီ ၆၀၇ မှာ ကြိုဟောတဲ့အတိုင်း ဖြစ်ပျက်ခဲ့တယ်။ ဂျေရုဆလင်မြို့ကို ဗာဗုလုန်တွေ ဖျက်ဆီးလိုက်တယ်။—ယေရမိ ၆:၆-၈။ ၃၉:၁၊ ၂၊ ၈၊ ၉။
ယေရမိကျမ်းမှာ မျှော်လင့်ချက်ပေးတဲ့ သတင်းစကားတွေလည်း ပါရှိတယ်။ ယေဟောဝါ အခုလို ပြောတယ်– ‘ဗာဗုလုန်မှာ အနှစ် ၇၀ ပြည့်တဲ့အခါ ငါ့ရဲ့ ကတိအတိုင်း မင်းတို့ကို ဒီနေရာ (ဂျူးတွေရဲ့ နေရင်းပြည်) ငါပြန်ခေါ်လာမယ်။’ (ယေရမိ ၂၉:၁၀) ဗာဗုလုန်ကို မီးဒီးယားနဲ့ ပါးရှားလူမျိုး သိမ်းပိုက်ပြီးနောက်ပိုင်း ဘီစီ ၅၃၇ မှာ “ကတိအတိုင်း” ယေဟောဝါ လုပ်ဆောင်ခဲ့တယ်။ ဗာဗုလုန်အင်ပါယာအနှံ့ ကွဲလွင့်သွားတဲ့ ဂျူးတွေ နေရင်းပြည် ပြန်ဖို့၊ စစ်မှန်တဲ့ဝတ်ပြုရေး ပြန်လည်တည်ထောင်ဖို့ လမ်းဖွင့်ပေးခဲ့တယ်။—၂ ရာဇဝင်ချုပ် ၃၆:၂၂၊ ၂၃။ ယေရမိ ၂၉:၁၄။
ယေရမိကျမ်း ခြုံငုံသုံးသပ်ချက်ကို သိနိုင်ဖို့ ဗီဒီယိုကို ကြည့်ပါ။
a ဟီဘရူးအက္ခရာလေးလုံးနဲ့ ရေးသားထားတဲ့ ဘုရားသခင့်နာမည်ကို မြန်မာလို ယေဟောဝါဆိုပြီး ပြန်ဆိုတယ်။ ဘာသာပြန်ကျမ်းအများစုက ဘုရားသခင့်နာမည်နေရာမှာ “သခင်၊” “ဘုရားသခင်” ကို အစားထိုးခဲ့တယ်။ အကြောင်းရင်းကို သိဖို့ “ယေဟောဝါဆိုတာ ဘယ်သူလဲ” ဆောင်းပါးကို ကြည့်ပါ။