ကပ်ရောဂါဘေး မတိုင်ခင် ဆောက်လုပ်ပြီးစီးသွားတဲ့ စီမံကိန်းများ

နှစ်စဉ် လူသောင်းနဲ့ချီ နှစ်ခြင်းခံတဲ့အတွက် ယေဟောဝါကို စုဝေးဝတ်ပြုနိုင်ဖို့ အဆောက်အအုံတွေ ပိုလိုအပ်လာတယ်။ ဒါကြောင့် ကမ္ဘာတစ်ဝန်းမှာ ရှိတဲ့ ဒေသဆိုင်ရာ ဒီဇိုင်း/ဆောက်လုပ်ရေးဌာနက ၂၀၂၀ လုပ်ငန်းတော်နှစ်အတွင်း ဝတ်ပြုရာခန်းမ အလုံးပေါင်း ၂,၇၀၀ ကျော်ကို ဆောက်လုပ်ဖို့၊ ပြုပြင်မွမ်းမံဖို့ စီစဉ်ထားတယ်။a

ဖြစ်ချင်တော့ ကိုဗစ် ၁၉ ကပ်ရောဂါကြောင့် အစီအစဉ်တွေ နှောင့်နှေးခဲ့ရတယ်။ အုပ်ချုပ်ရေးအဖွဲ့ရဲ့ ပုံနှိပ်ထုတ်ဝေရေး ကော်မတီက ညီအစ်ကို/မတွေကို ကာကွယ်ဖို့၊ အစိုးရထုတ်ပြန်တဲ့ စည်းကမ်းတွေကို လိုက်နာနိုင်ဖို့ ကမ္ဘာတစ်ဝန်း ဆောက်လုပ်ရေး စီမံကိန်းအများစုကို ရပ်ဆိုင်းလိုက်ပါတယ်။ ဒါပေမဲ့ ကပ်ရောဂါ မဖြစ်ခင် ၂၀၂၀ လုပ်ငန်းတော်နှစ်အတွင်း ဝတ်ပြုရာခန်းမ အလုံးပေါင်း ၁,၇၀၀ ကျော် ဆောက်လုပ်ခြင်း၊ ပြုပြင်မွမ်းမံခြင်း ပြီးစီးခဲ့တယ်။ ဒါ့အပြင် ဌာနခွဲစီမံကိန်း ၁၀၀ ကျော် ပြီးစီးသွားတယ်။ ဆောက်လုပ်ရေး စီမံကိန်း နှစ်ခုက ညီအစ်ကိုတွေအတွက် ဘယ်လို အကျိုးရှိစေကြောင်း သုံးသပ်ကြည့်ပါ။

ကင်မရွန်း ဌာနခွဲ။ ဒူအာလာမြို့မှာ တည်ရှိတဲ့ ဌာနခွဲအဟောင်းက သေးသွားတဲ့အတွက် အကြီးစား ဆောက်လုပ်မွမ်းမံဖို့ လိုနေတယ်။ ပုံနှိပ်ထုတ်ဝေရေး ကော်မတီက ဌာနခွဲကို ပြုပြင်မွမ်းမံဖို့ စဉ်းစားပေမဲ့ ပြုပြင်စရိတ်က ဌာနခွဲအဆောက်အအုံ ကာလပေါက်စျေးထက် များနေတယ်။ အသစ်ဆောက်ဖို့၊ ရှိပြီးသား အဆောက်အအုံတစ်ခုကို ဝယ်ယူပြီး ပြုပြင်မွမ်းမံဖို့ စဉ်းစားကြတယ်။ ဒါပေမဲ့ အဲဒီလို လုပ်ဖို့ အခြေအနေ မပေးပြန်ဘူး။

အဲဒီအတောအတွင်း အစိုးရက ဒူအာလာမြို့ မြောက်ပိုင်းမှာရှိတဲ့ အစည်းအဝေးခန်းမရှေ့ လမ်းကို ခင်းတော့မယ်ဆိုတာ ညီအစ်ကိုတွေ သိသွားတယ်။ ဒီလမ်းသာ ကောင်းသွားရင် သွားလာရ၊ သယ်ပို့ရ ပိုလွယ်မယ်။ ဌာနခွဲ လိုနေတာလည်း အဲဒါပဲ။ ဒါကြောင့် အစည်းအဝေးပွဲခန်းမ ခြံဝန်းထဲ ဌာနခွဲအသစ် ဆောက်ဖို့ အုပ်ချုပ်ရေးအဖွဲ့က ခွင့်ပြုလိုက်တယ်။

ဒီစီမံကိန်းမှာ သက်သေခံတွေနဲ့ အငှားဆောက်လုပ်ရေးလုပ်သားတွေ အတူလုပ်ဆောင်ကြတယ်။ ဒါက အချိန်နဲ့ ငွေ အကုန်အကျ သက်သာစေတယ်။ ဒီစီမံကိန်းအတွက် ကုန်ကျစရိတ်က ထင်ထားတာထက် ယူအက်စ်ဒေါ်လာ နှစ်သန်းကျော် သက်သာသွားတယ်။ ဗေသလမိသားစုက ကိုဗစ် ၁၉ မဖြစ်ပွားခင် ဒီအဆောက်အုံသစ်ဆီ ပြောင်းရွှေ့နိုင်ခဲ့ကြတယ်။

ကင်မရွန်း ဗေသလအိမ်သားတွေက နေထိုင်ဖို့၊ အလုပ်လုပ်ဖို့ ပိုအဆင်ပြေသွားပြီ။ သူတို့အတွက် ဌာနခွဲသစ်ဟာ ယေဟောဝါဆီက လက်ဆောင်ပါ။ “ဒီလက်ဆောင်ကို အလွန် တန်ဖိုးထားကြောင်း ပြတဲ့အနေနဲ့ အလုပ် ပိုကြိုးစားချင်စိတ် ပေါ်လာတယ်” ဆိုပြီး မောင်နှံတစ်စုံ ပြောတယ်။

တိုဂျိုလဘာ ဘာသာပြန်ရုံးခွဲ၊ မက္ကဆီကို။ တိုဂျိုလဘာ ဘာသာပြန်အဖွဲ့က မက္ကဆီကိုစီးတီးအနီး၊ ဗဟိုအမေရိကဌာနခွဲမှာ နှစ်များစွာ အမှုဆောင်ခဲ့တယ်။ ဒါပေမဲ့ ကီလိုမီတာ ၁,၀၀၀ လောက် (မိုင် ၆၂၀) ဝေးတဲ့ အယ်လတာ မီရန်နိုနဲ့ လက်စ် မာဂရီးတာမြို့မှာ တိုဂျိုလဘာ ဘာသာစကားကို အပြောများတယ်။ ဒါကြောင့် ဘာသာပြန်တွေက ဘာသာစကား အပြောင်းအလဲတွေကို အမီလိုက်ဖို့ ခက်နေတယ်။ ဌာနခွဲကလည်း တိုဂျိုလဘာလို ဘာသာပြန်တာ၊ အသံသွင်းတာတွေကို ကူညီပေးနိုင်မယ့် ညီအစ်ကို/မတွေကို အနီးနားမှာ ရှာဖို့ ခက်တယ်။

ဒါကြောင့် အုပ်ချုပ်ရေးအဖွဲ့ စာပေပြုစုရေး ကော်မတီက ဘာသာပြန်အဖွဲ့ကို တိုဂျိုလဘာ စကားပြောတဲ့ဒေသမှာ ပြောင်းရွှေ့စေချင်တယ်။ ဒါကြောင့် ဌာနခွဲက ရှိနှင့်ပြီးသား အဆောက်အအုံကို ဝယ်ပြီး ပြုပြင်မွမ်းမံဖို့ ဆုံးဖြတ်လိုက်တယ်။ ဒါက အသစ်ဆောက်တာ၊ ငှားတာထက် အကုန်အကျ သက်သာတယ်။

အကျိုးကျေးဇူးကို ဘာသာပြန်တစ်ယောက် အခုလို ရှင်းပြတယ်။ “ဌာနခွဲမှာ ဘာသာပြန်အဖြစ် ဆယ်နှစ်လောက် အမှုဆောင်ပေမဲ့ ကိုယ့်ဘာသာစကား ပြောတဲ့ မိသားစုတစ်စုနဲ့မှ ဆုံခွင့် မရခဲ့ဘူး။ အခုတော့ ကျွန်တော်တို့ရုံးက တိုဂျိုလဘာစကားပြောသူတွေရှိတဲ့ မြို့မှာ ရှိနေပြီ။ တိုဂျိုလဘာစကားပြောသူတွေနဲ့ နေ့တိုင်း ဆုံရတယ်။ ဝေါဟာရ ပိုကြွယ်ဝလာလို့ ဘာသာပြန်အရည်အသွေး ပိုတိုးတက်လာတယ်။”

၂၀၂၁ လုပ်ငန်းတော်နှစ်အတွက် စီမံကိန်းများ

၂၀၂၁ လုပ်ငန်းတော်နှစ်မှာ အခြေအနေ ခွင့်ပြုရင် ဘာသာပြန်ရုံးခွဲ ၇၅ ခုနဲ့ ကျမ်းစာသင်တန်း အဆောက်အအုံတွေအတွက် လုပ်ဆောင်ဖို့ အစီအစဉ်တွေ ရှိတယ်။ နယူးယောက်၊ ရာမပိုမှာ ရှိတဲ့ ကမ္ဘာ့ဌာနချုပ် စီမံကိန်း အပါအဝင် အကြီးစား ဌာနခွဲ စီမံကိန်း ရှစ်ခုအပြင် အာဂျင်တီးနားနဲ့ အီတလီဌာနခွဲတွေ နေရာပြောင်းရွှေ့ခြင်းတို့ လုပ်ဆောင်မယ်။ ဝတ်ပြုရာခန်းမသစ် ၁,၀၀၀ ကျော် လိုအပ်နေတယ်။ လက်ရှိ ဝတ်ပြုရာနေရာ ၆,၀၀၀ ကျော်က စုဝေးဝတ်ပြုဖို့ အဆင်မပြေတော့လို့ အစားထိုးဖို့ လိုနေပြီ။ နောက်ထပ် ခန်းမ အလုံးပေါင်း ၄,၀၀၀ လည်း ပြုပြင်မွမ်းမံဖို့ လိုနေတယ်။

ဒီလို ဆောက်လုပ်ရေး၊ ပြုပြင်မွမ်းမံခြင်းအတွက် ငွေကို ဘယ်က ရသလဲ။ ဗဟိုအမေရိက ဌာနခွဲ ကော်မတီဝင် ညီအစ်ကို လာဇရို ဂွန်ဇေလက်က တိုဂျိုလဘာ ဘာသာပြန်ရုံးခွဲ စီမံကိန်းအတွက် ဆွေးနွေးချိန်မှာ အခုလို ဖြေထားတယ်။ “ကျွန်တော်တို့ရဲ့ ဌာနခွဲနယ်မြေမှာ ငွေကြေး သိပ်မပြေလည်ကြဘူး။ ဒါကြောင့် ညီအစ်ကို အသင်းအပင်းရဲ့ ထောက်ပံ့မှုသာ မပါရင် တိုင်းရင်းသား ညီအစ်ကို/မတွေအတွက် ဘာသာပြန်ရုံး ဆောက်နိုင်မယ် မထင်ဘူး။ ကမ္ဘာတစ်ဝန်းက ညီအစ်ကိုတွေရဲ့ အလှူငွေကြောင့် ဘာသာပြန်တွေဟာ ကိုယ့်ဘာသာစကားပြောတဲ့ နယ်ခံတွေနဲ့ ပိုနီးနီးစပ်စပ် ရှိလာတယ်။ အခုလို ရက်ရက်ရောရော ထောက်ပံ့ပေးနေတဲ့ ကမ္ဘာချီ ညီအစ်ကို အသင်းအပင်းကို လှိုက်လှိုက်လှဲလှဲ ကျေးဇူးတင်ပါတယ်။” ကမ္ဘာချီလုပ်ငန်းအတွက် donate.jw.org ကနေ သင့်ရဲ့ ထည့်ဝင်လှူဒါန်းမှုကြောင့် ဒီလိုဆောက်လုပ်ရေး စီမံကိန်းတွေ လုပ်ဆောင်နိုင်တာပါ။