တိုင်းရင်းသား အစုတွေမှာ ဘာသာရေး လွတ်လပ်ခွင့်ကို ကာကွယ်ခြင်း

လူဦးရေ သန်းရာချီ ရှိတဲ့ လက်တင် အမေရိကမှာ ကိုယ်ပိုင် ဘာသာစကား၊ ယဉ်ကျေးမှု ရှိတဲ့ တိုင်းရင်းသား သန်းချီ နေထိုင်ကြတယ်။ တိုင်းရင်းသား များစွာဟာ ယေဟောဝါသက်သေတွေ ဖြစ်ပြီး ကိုယ်ပိုင် ယဉ်ကျေးမှုကို မြတ်နိုးကြတယ်။ လူတွေကို ကျမ်းစာအမှန်တရား သိစေချင်လို့ လက်တင် အမေရိကမှာ ပြောဆိုတဲ့ တိုင်းရင်းသား ဘာသာစကား ၁၃၀ ကျော်နဲ့ အဖွဲ့အစည်းထုတ် စာပေတွေကို ဘာသာပြန်၊ ဖြန့်ဝေပေးကြတယ်။a ဒါပေမဲ့ ယေဟောဝါဘုရားကို ကိုးကွယ်လို့၊ ကျမ်းစာနဲ့ မညီတဲ့ လူမျိုးစု ဓလေ့ထုံးစံတွေ မလိုက်လို့ ဆန့်ကျင်ခံရကြတယ်။ သင်တို့ရဲ့ အလှူငွေတွေနဲ့ အဲဒီညီအစ်ကို/မတွေကို ဘယ်လို ကူညီပေးခဲ့သလဲ။

အိမ်ပြန်လာနိုင်ဖို့ ကူညီပေး

မက္ကဆီကိုနိုင်ငံ၊ ဟာလစ္စကိုပြည်နယ် တောင်တန်းဒေသ၊ ဟွီချိုလ် တိုင်းရင်းသား အစုမှာ နေထိုင်တဲ့ ညီအစ်ကို/မတွေဟာ ကျမ်းစာနဲ့ မညီတဲ့ ဘာသာရေး ဓလေ့ထုံးစံတွေမှာ မပါဝင်ရတဲ့ အကြောင်း လေးလေးစားစား ပြောပြကြပေမဲ့ အမုန်းခံရကြတယ်။b ၂၀၁၇၊ ဒီဇင်ဘာ ၄ ရက်မှာ ယေဟောဝါသက်သေ အုပ်စုတစ်စုနဲ့ အတူ ရှိနေတဲ့ တခြားသူတွေကို အကြမ်းဖက် လူအုပ် တိုက်ခိုက်ခဲ့တယ်။ အစုထဲကနေ အတင်းအကြပ် မောင်းထုတ်တယ်။ ပိုင်ဆိုင်ရာတွေ ဖျက်ဆီးတယ်။ ပြန်လာရင် သတ်ပစ်မယ်လို့ ခြိမ်းခြောက်ခဲ့တယ်။

အနီးအနားက မြို့မှာ နေထိုင်တဲ့ သက်သေခံတွေက ညီအစ်ကို/မတွေရဲ့ လတ်တလော လိုအပ်ရာတွေကို ဖြည့်ဆည်းပေးခဲ့ကြတယ်။ ဒါပေမဲ့ အိမ်ပြန်နိုင်ဖို့ကော။ “ရှေ့နေ ငှားဖို့ မတတ်နိုင်ကြဘူး။ တရားရေး အကြံဉာဏ်ကို ဘယ်သူ့ဆီ တောင်းရမလဲ ဆိုတာလည်း မသိကြဘူး” လို့ ညီအစ်ကို ဩဂတ်စတင်း ရှင်းပြတယ်။

ညီအစ်ကို/မတွေရဲ့ လွတ်လပ်စွာ ဝတ်ပြုခွင့် ထိပါးလာပြီ ဖြစ်လို့ ဗဟို အမေရိက ဌာနခွဲက ချက်ချင်း အရေးတယူ ဆောင်ရွက်ခဲ့တယ်။ ဦးဆုံး၊ ဒီရာဇဝတ်မှုတွေကို စုံစမ်းစစ်ဆေးပေးဖို့ ဒေသခံ အာဏာပိုင်တွေကို တောင်းဆိုခဲ့တယ်။ အဲဒီနောက် ယေဟောဝါသက်သေများရဲ့ အုပ်ချုပ်ရေးအဖွဲ့၊ ညှိနှိုင်းရေးမှူးများ ကော်မတီဆီကနေ ခွင့်ပြုချက် ရယူတယ်။ ကမ္ဘာ့ဌာနချုပ်မှာ ရှိတဲ့ တရားရေးဌာနနဲ့ ပူးပေါင်း လုပ်ဆောင်နိုင်ဖို့၊ ဟွီချိုလ် ညီအစ်ကို/မတွေ ကိုယ်စား အမှု ဖွင့်နိုင်ဖို့ပါ။ နောက်ဆုံးမှာ မက္ကဆီကို နိုင်ငံရဲ့ အမြင့်ဆုံး တရားရုံး၊ အမျိုးသား တရားရုံးချုပ်အထိ အမှု ရောက်သွားတယ်။

တိုင်းရင်းသား အစုရဲ့ ယဉ်ကျေးမှုကို တခြားသူတွေ လေးစားရသလို တိုင်းရင်းသား အစုဘက်ကလည်း ကိုယ့်အစုထဲက လူအားလုံးရဲ့ လွတ်လပ်ခွင့်ကို လေးစားရမယ်၊ ကာကွယ်ပေးရမယ် ဆိုပြီး နိုင်ငံတကာ ရှေ့နေများ အဖွဲ့က ရှင်းရှင်းလင်းလင်း ဆွေးနွေးတင်ပြခဲ့တယ်။ ဘယ်နေရာမှာပဲ နေထိုင်ပါစေ လူ့အခွင့်အရေးဆိုတာ ရှိပါတယ်။

၂၀၂၀၊ ဇူလိုင် ၈ ရက်မှာ တရားရုံးချုပ်က ယေဟောဝါသက်သေတွေကို အနိုင်ပေးလိုက်တယ်။ မောင်းထုတ်ခံရသူ အားလုံးကို အစုထဲ ပြန်လာခွင့် ပေးဖို့ အမိန့်ချလိုက်တယ်။ အစောပိုင်းမှာ ဖော်ပြခဲ့တဲ့ ညီအစ်ကို ဩဂတ်စတင်းက ညီအစ်ကို/မအားလုံးရဲ့ ခံစားချက်ကို အခုလို ပြောပြတယ်– “ညီအစ်ကိုတွေရဲ့ လုပ်ဆောင်မှုတွေအတွက် ကျွန်တော်တို့ သိပ်ကျေးဇူးတင်၊ ဝမ်းမြောက်နေကြပါတယ်။ ညီအစ်ကိုတွေသာ မကူညီပေးရင် ကျွန်တော်တို့ ဘာမှ လုပ်တတ်မှာ မဟုတ်ဘူး။”

“လူနည်းစုလေးအတွက် များစွာ လုပ်ဆောင်ပေးခဲ့”

အီကွေဒေါနိုင်ငံ၊ ဆန်ဟွမ်ဒယ် အီလူမန်ရွာမှာ အိုတာဗာလို ချိုင့်ဝှမ်းဒေသက တိုင်းရင်းသား များစွာ နေထိုင်ကြတယ်။ အဲဒီရွာက ညီအစ်ကိုတွေလည်း ဆန့်ကျင်မှု ကြုံခဲ့ကြရတယ်။ ၂၀၁၄ ခုနှစ်မှာ လိုအပ်တဲ့ ခွင့်ပြုချက်အားလုံး ရယူပြီးနောက် ညီအစ်ကိုတွေက နိုင်ငံတော်ခန်းမ စဆောက်ကြတယ်။ ဒါပေမဲ့ ဘုန်းတော်ကြီးတစ်ပါးက လူ ၁၀၀ ကျော် ခေါ်လာပြီး ခန်းမ ဆောက်လုပ်ရေးကို အတင်းအဓမ္မ ရပ်ခိုင်းတယ်။ ရွာသားတွေကလည်း အစည်းအဝေးတွေ မလုပ်ဖို့ ပြောကြတယ်။

ဘာသာရေး လွတ်လပ်ခွင့် ချိုးဖောက်မခံရဖို့ အီကွေဒေါ ဌာနခွဲနဲ့ ကမ္ဘာ့ဌာနချုပ်မှာ ရှိတဲ့ တရားရေး ဌာနတို့ ပူးပေါင်းပြီး တရားရုံးမှာ အမှုဖွင့်လိုက်တယ်။ ယေဟောဝါသက်သေတွေကို မဆန့်ကျင်ဖို့၊ အသင်းတော် အစည်းအဝေးတွေ ပြန်ကျင်းပခွင့် ပြုဖို့၊ နိုင်ငံတော်ခန်းမ ပြီးစီးအောင် ဆောက်လုပ်ခွင့် ပေးဖို့ ရွာသားတွေကို တရားရုံးက အမိန့်ထုတ်ပြန်တယ်။ ရှေ့လျှောက်လည်း ညီအစ်ကိုတွေရဲ့ အခွင့်အရေး ကာကွယ်ခံရဖို့ ကိုယ်စားလှယ်တွေက နိုင်ငံတကာ လူ့အခွင့်အရေးကို တိုင်းရင်းသား လူမျိုးစုတွေ လေးစားဖို့ လိုမလို ဆိုတဲ့ အရေးကြီး မေးခွန်းနဲ့ပတ်သက်ပြီး ဆုံးဖြတ်ချက် ချပေးဖို့ တရားရုံးချုပ်ကို တောင်းဆိုခဲ့တယ်။

၂၀၂၀၊ ဇူလိုင် ၁၆ ရက်မှာ အီကွေဒေါနိုင်ငံရဲ့ အမြင့်ဆုံး တရားရုံး၊ ဖွဲ့စည်းပုံ အခြေခံ တရားရုံးက အမှု ကြားနာတယ်။ အီကွေဒေါနိုင်ငံမှာ ရှိတဲ့ ရှေ့နေ ညီအစ်ကိုတွေက အသင်းတော်ကို ကိုယ်စားပြုပြီး အမှု လိုက်ပေးတယ်။ အတွေ့အကြုံရှိ နိုင်ငံတကာ ရှေ့နေ ညီအစ်ကို လေးယောက်ကလည်း တရားရုံးမှာ လျှောက်လဲပေးတယ်။ ကိုဗစ်-၁၉ ကန့်သတ်ချက်တွေကြောင့် နိုင်ငံအသီးသီးကနေ ဗီဒီယို ချိတ်ဆက်ပြီး လျှောက်လဲကြတယ်။ ဒီလိုမျိုး ဗီဒီယို ချိတ်ဆက်ပြီး လျှောက်လဲဖို့ ကမ္ဘာချီ ယေဟောဝါသက်သေ အဖွဲ့အစည်းကို ကိုယ်စားပြုတဲ့ တရားရေး အဖွဲ့ကို တရားရုံး ခွင့်ပြုပေးတာ ဒါ ဦးဆုံးအကြိမ်ပါပဲ။c တိုင်းရင်းသားတွေဟာ တိုင်းရင်းသား လူမျိုးစုအဝင် ဖြစ်တာနဲ့ပဲ လူ့အခွင့်အရေးတွေ ဆုံးရှုံးမသွားကြောင်း အတည်ပြုဖို့ တရားရေး အဖွဲ့က နိုင်ငံတကာ တရားရေး အဆိုတွေကို ကိုးကားခဲ့ကြတယ်။

အိုတာဗာလို ချိုင့်ဝှမ်းဒေသက ညီအစ်ကို/မတွေက တရားရုံး ဆုံးဖြတ်ချက်ကို မျှော်လင့်တကြီး စောင့်နေခဲ့ကြတယ်။ အဲဒီအတောအတွင်း ရရှိတဲ့ အကူအညီတွေအတွက် သိပ်ကျေးဇူးတင်ကြတယ်။ အီလူမန် ကစ်ချူဝါ စကားပြော အသင်းတော် အကြီးအကဲ ဆီဇာက “လူနည်းစုလေးအတွက် အဖွဲ့အစည်းကတစ်ဆင့် ဒီလောက်ထိ လုပ်ဆောင်ပေးတာ ယေဟောဝါပဲ ရှိတယ်” လို့ ပြောခဲ့တယ်။

အမှုလိုက်ပေးတဲ့ ရှေ့နေအားလုံးဟာ ယေဟောဝါသက်သေတွေ ဖြစ်ပြီး အခမဲ့ ဝိုင်းဝန်း အကြံပေးခဲ့ကြတယ်။ ဒါပေမဲ့ အမှု ဖွင့်ဖို့၊ ပြင်ဆင်ဖို့၊ တရားရုံးမှာ အစီရင်ခံဖို့ အချိန်နဲ့ ငွေကြေး များစွာ ကုန်ခဲ့တယ်။ ရှေ့နေ ညီအစ်ကိုတွေနဲ့ တခြား ညီအစ်ကိုတွေဟာ တရားရုံး အစီရင်ခံစာတွေ ပြင်ဆင်ဖို့ နာရီပေါင်း ၃၈၀ ကျော်၊ မက္ကဆီကိုနိုင်ငံ ကြားနာမှုအတွက် စာရွက်စာတမ်းတွေ ဘာသာပြန်ဖို့ နာရီပေါင်း ၂၄၀ ကျော် အသုံးပြုခဲ့ကြတယ်။ အီကွေဒေါ အမှုအတွက် ကမ္ဘာတစ်ဝန်းက ရှေ့နေ ၄၀ နီးပါးက နာရီပေါင်း ရာနဲ့ချီ အသုံးပြုခဲ့ကြတယ်။ ညီအစ်ကို/မတွေကို ကာကွယ်ပေးဖို့ ကုန်ကျငွေတွေကို ဘယ်ကနေ ရသလဲ။ donate.jw.org မှာ ဖော်ပြထားတဲ့ နည်းအမျိုးမျိုးကို သုံးပြီး ထည့်ဝင်တဲ့ သင်တို့ရဲ့ အလှူငွေကနေ ရတာပါ။ သင်တို့ရဲ့ ရက်ရောမှုအတွက် ကျေးဇူးတင်ပါတယ်။