သတင်းကောင်း ကို ဥပဒေအရ ကာကွယ်ခြင်း

လူသည် မြို့များကိုတည်ဆောက်စဉ်ကတည်းက မြို့ရိုးများကိုလည်းတည်ဆောက်ခဲ့သည်။ အထူးသဖြင့် ရှေးလွန်လေပြီးသောကာလများ၌ အဆိုပါခံတပ်အကာအရံများသည် ကာကွယ်မှုဖြစ်ခဲ့သည်။ ရန်ပြုတိုက်ခိုက်သူများက မြို့ရိုးတံတိုင်းချိုးဖျက်ခြင်း သို့မဟုတ် မြို့ရိုးအောက်ခြေမှဝင်ရောက်လာခြင်းတို့ကို ကာကွယ်ရန် ခုခံကာကွယ်သူများသည် ယင်းမြို့ရိုးပေါ်မှ တိုက်ခိုက်နိုင်ခဲ့ကြ၏။ မြို့သူမြို့သားများသာမက ပတ်ဝန်းကျင်မြို့များတွင်နေထိုင်ကြသူများသည်လည်း မြို့ရိုးအတွင်း ခိုလှုံမှုရှာဖွေလေ့ရှိသည်။—၂ ဓမ္မရာဇဝင် ၁၁:၂၀-၂၄; ဟေရှာယ ၂၅:၁၂။

အလားတူ၊ ယေဟောဝါသက်သေများသည် ဥပဒေဆိုင်ရာမြို့ရိုးတစ်ခုကို တည်ဆောက်ခဲ့ကြသည်။ ယေဟောဝါသက်သေများသည် အသင်းအဖွဲ့လိုက်ခင်မင်ဖော်ရွေစွာ နေတတ်သူများဖြစ်ကြောင်း လူအများသိဖြစ်သောကြောင့် သက်သေခံများကို လူ့အဖွဲ့အစည်းမှ သီးခြားနေစေရန် ၎င်းမြို့ရိုးကိုတည်ဆောက်ခဲ့ခြင်းမဟုတ်ချေ။ ယင်းအစား၊ ၎င်းသည် လူခပ်သိမ်းအတွက် အခြေခံလွတ်လပ်ခွင့်များ၏ တရားဝင်အာမခံချက်များကို ခိုင်ခံ့စေသည်။ တစ်ချိန်တည်းတွင် သက်သေခံများလွတ်လပ်စွာ ဝတ်ပြုနိုင်ကြရန် တရားဝင်အခွင့်အရေးများကို ကာကွယ်ပေးသည်။ (မဿဲ ၅:၁၄-၁၆ နှိုင်းယှဉ်။) အဆိုပါမြို့ရိုးသည် သူတို့၏ဝတ်ပြုမှုနှင့် ဘုရားသခင့်နိုင်ငံတော်သတင်းကောင်း ဟောပြောခြင်းအခွင့်အရေးကို ကာကွယ်ပေးသည်။ ၎င်းမြို့ရိုးကား အဘယ်နည်း၊ ယင်းကို မည်သို့တည်ဆောက်ခဲ့သနည်း။

ကာကွယ်သည့် ဥပဒေမြို့ရိုးကိုတည်ဆောက်ခြင်း

ယေဟောဝါသက်သေများသည် နိုင်ငံအများအပြားတွင် ဘာသာရေးလွတ်လပ်မှုရှိကြသည်မှန်သော်လည်း အချို့နိုင်ငံများတွင် ခိုင်လုံသောအကြောင်းမရှိဘဲ တိုက်ခိုက်ခံနေကြရသည်။ စုရုံးစည်းဝေးခြင်းအားဖြင့် သို့မဟုတ် တစ်အိမ်မှတစ်အိမ်ဟောပြောခြင်းအားဖြင့် လွတ်လပ်စွာဝတ်ပြုခြင်းကို စောဒကတက်လာခဲ့ကြသောအခါ ဥပဒေအရ သူတို့ကြိုးစားဖြေရှင်းခဲ့ကြသည်။ ကမ္ဘာတစ်ဝန်းတွင် သက်သေခံများသည် ဥပဒေဆိုင်ရာအမှုတွဲ ထောင်ပေါင်းများစွာ ရင်ဆိုင်နေကြရ၏။a အမှုအားလုံးမနိုင်ခဲ့ပါ။ သို့ရာတွင် အောက်တရားရုံးများမှ ပယ်ချခံရသောအခါ အထက်တရားရုံးများသို့ အယူခံဝင်လေ့ရှိသည်။ အဘယ်ရလဒ်ရရှိခဲ့သနည်း။

၂၀ ရာစု၏ဆယ်စုနှစ်များတစ်လျှောက် နိုင်ငံများစွာတွင် အောင်မြင်ခဲ့သောအမှုတွဲများကြောင့် နောက်ဆက်ဖြစ်ပွားသည့်အမှုများတွင် ယေဟောဝါသက်သေများသည် အယူခံဝင်ဖို့အတွက် စိတ်ချရသောအစဉ်အလာများရှိခဲ့သည်။ နံရံတစ်ခုရှိအုတ်များ သို့မဟုတ် ကျောက်များနည်းတူ ဤအနိုင်ရသောစီရင်ချက်များသည် ကာကွယ်ပေးသော ဥပဒေဆိုင်ရာမြို့ရိုးဖြစ်လာလေသည်။ အစဉ်အလာရှိသည့် ယင်းမြို့ရိုးပေါ်မှ သက်သေခံများသည် လွတ်လပ်စွာဝတ်ပြုနိုင်ကြရန်အတွက် ဆက်၍အမှုဆိုင်ခဲ့ကြသည်။

ဥပမာ၊ ၁၉၄၃၊ မေ ၃ ရက်၌ အမေရိကန်ပြည်ထောင်စုတရားရုံးချုပ်က ဆုံးဖြတ်ချက်ချခဲ့သော မာဒေါ့ခ် နှင့် ပဲင်စီလ်ဘေးနီးယား၏ဓနသဟာယ အမှုကိုသုံးသပ်ကြည့်ပါ။ ဤအမှုဖြစ်ပေါ်ခဲ့သောမေးခွန်းမှာ ယေဟောဝါသက်သေများသည် သူတို့၏ဘာသာရေးစာအုပ်စာတမ်းများ ဖြန့်ချိရန်အတွက် စီးပွားဖြစ်လှည့်လည်ရောင်းချခွင့် လိုင်စင်ရှိသင့်မရှိသင့်ကိစ္စဖြစ်သည်။ ယေဟောဝါသက်သေများက မိမိတို့ကို ထိုသို့ပြုလုပ်ရန် မလိုဟုအခိုင်အမာပြောဆိုကြသည်။ သူတို့၏ဟောပြောခြင်းလုပ်ငန်းသည် စီးပွားဖြစ်မဟုတ်၊ ဘယ်သောအခါမျှလည်း စီးပွားလုပ်ခဲ့ခြင်းမရှိချေ။ သူတို့၏ဦးတည်ချက်မှာ ငွေအတွက်မဟုတ်ဘဲ သတင်းကောင်းဟောပြောရန်အတွက်သာဖြစ်သည်။ (မဿဲ ၁၀:၈; ၂ ကောရိန္သု ၂:၁၇) မာဒေါ့ခ်ဆုံးဖြတ်ချက်၌ တရားရုံးက ဘာသာရေးစာအုပ်စာတမ်းဖြန့်ချိခြင်းအတွက် ကြိုတင်သတ်မှတ်ချက်အဖြစ် အခွန်ဆောင်လိုင်စင်ရှိခြင်းသည် အခြေခံဥပဒေနှင့်မကိုက်ညီဟု သက်သေခံများအဆိုကို သဘောတူထောက်ခံခဲ့သည်။b ၎င်းဆုံးဖြတ်ချက်သည် အရေးပါသောအစဉ်အလာတစ်ခုဖြစ်ခဲ့ကာ ထိုအချိန်ကတည်းက သက်သေခံများသည် ယင်းကိုထောက်ပြ၍ အမှုပေါင်းများစွာတွင် အောင်မြင်စွာအယူခံဝင်ခဲ့ကြသည်။ ယင်းမာဒေါ့ခ်ဆုံးဖြတ်ချက်သည် ဥပဒေအရကာကွယ်ခြင်းမြို့ရိုး၌ ခိုင်ခံ့သောအုတ်တစ်ချပ်ကဲ့သို့ဖြစ်ခဲ့ပြီ။

ဤကဲ့သို့သောအမှုများသည် လူခပ်သိမ်းအတွက် ဘာသာရေးလွတ်လပ်မှု အတော်အတန်ရရှိစေခဲ့သည်။ အမေရိကန်ပြည်ထောင်စုတွင် တရားမအခွင့်အရေးကိုခုခံကာကွယ်ခြင်းနှင့်ပတ်သက်၍ သက်သေခံများ၏ဆောင်ရွက်မှုအကြောင်း စင်စနက်တီတက္ကသိုလ်မှ ဥပဒေပြန်လည်သုံးသပ်ခြင်းစာစောင်က ဤသို့ဆိုသည်– “ယေဟောဝါသက်သေများသည် အထူးသဖြင့် စကားပြောဆို၊ ဝတ်ပြုကိုးကွယ်ရေးကို ကာကွယ်သောကန့်သတ်ချက်များ တိုးချဲ့ခဲ့ခြင်းအားဖြင့် ဖွဲ့စည်းပုံအခြေခံဥပဒေဖြစ်ပေါ်လာပုံအပေါ် အကြီးအကျယ်သြဇာလွှမ်းမိုးခဲ့ပြီ။

မြို့ရိုးကိုခိုင်ခံ့စေခြင်း

ဥပဒေဆိုင်ရာအောင်ပွဲတစ်ခုစီဖြင့် မြို့ရိုးသည် ပိုမိုခိုင်ခံ့လာ၏။ ယေဟောဝါသက်သေများသာမက ကမ္ဘာအနှံ့ရှိ လွတ်လပ်မှုကိုချစ်မြတ်နိုးသူအားလုံးတို့အတွက် အကျိုးဖြစ်ထွန်းခဲ့သော ၁၉၉၀ ပြည့်လွန်နှစ်များက စီရင်ချက်အချို့ကို သုံးသပ်ကြည့်ပါ။

ဂရိ။ ၁၉၉၃၊ မေလ ၂၅ ရက်နေ့တွင် ဂရိနိုင်ငံသားတစ်ဦးသည် အခြားသူများအား မိမိ၏ဘာသာရေးယုံကြည်ချက်များကို သွန်သင်ပေးခွင့်ရှိကြောင်း လူ့အခွင့်အရေးဆိုင်ရာ ဥရောပတရားရုံးက ထောက်ခံခဲ့သည်။ ထိုအချိန်က အသက် ၈၄ နှစ်ရှိ မီနော့စ် ကိုကီနာကိစ်သည် အမှုစစ်ခံခဲ့ရသည်။ ယေဟောဝါသက်သေတစ်ဦးဖြစ်သည့်ကိုကီနာကိစ်ကို ယေဟောဝါသက်သေတစ်ဦးအဖြစ် ၁၉၃၈ ခုနှစ်ကတည်းက အကြိမ်ပေါင်း ၆၀ ကျော်ဖမ်းဆီးချုပ်နှောင်ခဲ့ကာ ဂရိတရားရုံးများရှေ့မှောက် ၁၈ ကြိမ်တိုင်ခေါ်သွင်းခံခဲ့ရပြီး ခြောက်နှစ်ကျော် ထောင်ချခံခဲ့ရသည်။ သူသည် အဓိကအားဖြင့် ၁၉၃၀ ပြည့်လွန်နှစ်များက ထုတ်ဆင့်ထားသောဘာသာသွင်းခြင်းကိုတားမြစ်သည့် ဂရိဥပဒေကြောင့် အပြစ်ရှိသည်ဟု အမိန့်ချခံခဲ့ရသည်—ယင်းဥပဒေကြောင့် ၁၉၃၈ မှ ၁၉၉၂ ခုနှစ်အထိ ယေဟောဝါသက်သေ ၂၀,၀၀၀ နီးပါးဖမ်းဆီးခံခဲ့ရသည်။ ဂရိအစိုးရသည် ကိုကီနာကိစ်၏ဘာသာရေးလွတ်လပ်မှုကို နှောင့်ယှက်ခဲ့သည့်အတွက် သူ့အား နစ်နာကြေးဒေါ်လာ ၁၄,၄၀၀ ပေးစေရန် ဥရောပတရားရုံးက အမိန့်ချခဲ့သည်။ ယင်းစီရင်ချက်၌ ယေဟောဝါသက်သေများသည် အမှန်ပင် “လူသိများသောဘာသာ” တစ်ခုဖြစ်သည်ဟု တရားရုံးကပြဋ္ဌာန်းခဲ့သည်။—စက်တင်ဘာ ၁၊ ၁၉၉၃ ကင်းမျှော်စင် စာမျက်နှာ ၂၇-၃၁ ရှု။

မက္ကစီကို။ ၁၉၉၂၊ ဇူလိုင် ၁၆ ရက်တွင် မက္ကစီကို၌ ဘာသာရေးလွတ်လပ်မှုကာကွယ်ခြင်းခြေလှမ်းကို အကြီးအကျယ်လုပ်ဆောင်ခဲ့သည်။ ထိုနေ့၌ပင် ဘာသာရေးအဖွဲ့အစည်းများနှင့် လူထုဝတ်ပြုရေးဥပဒေကို ပြဋ္ဌာန်းခဲ့၏။ အဆိုပါဥပဒေကြောင့် ဘာသာရေးအဖွဲ့အစည်းတစ်ခုသည် လိုအပ်သည်အတိုင်း မှတ်ပုံတင်ခြင်းအားဖြင့် ဘာသာရေးအဖွဲ့အစည်းတစ်ခုအဖြစ် တရားဝင်အဆင့်ရရှိနိုင်သည်။ ယခင်က ယေဟောဝါသက်သေများသည် တိုင်းပြည်ရှိအခြားဘာသာများကဲ့သို့ အမှန်ပင်တည်ရှိသော်လည်း တရားဝင်အဆင့်မရရှိခဲ့ချေ။ ၁၉၉၃၊ ဧပြီ ၁၃ ရက်တွင် သက်သေခံများသည် မှတ်ပုံတင်ဖို့အတွက် လျှောက်လွှာတင်ခဲ့သည်။ ဝမ်းသာစရာကား ၁၉၉၃၊ မေ ၇ ရက်နေ့တွင် သူတို့သည် လာ တောရီ ဒဲလ် ဗီခီအား၊ အေ. အာရ်နှင့် လိုစ် တက်စ်တီဂိုစ် ဒီ ဂျီဟိုဗာ အဲန် မက္ကစီကို၊ အေ. အာရ်ဟု တရားဝင်မှတ်ပုံတင်ပြီးရာ ယင်းတို့နှစ်ခုစလုံး ဘာသာရေးအဖွဲ့အစည်းများဖြစ်သည်။—ဇူလိုင် ၂၂၊ ၁၉၉၄ နိုးလော့! [လိပ်] စာမျက်နှာ ၁၂-၁၄ ရှု။

ဘရာဇီး။ ၁၉၉၀၊ နိုဝင်ဘာလတွင် ဘရာဇီးအပြည်ပြည်ဆိုင်ရာ လူမှုဖူလုံရေးအဖွဲ့အစည်း (အိုင်အဲန်အက်စ်အက်စ်) ကဗေသလ (ယေဟောဝါသက်သေများ၏ဌာနခွဲရုံးအမည်) ရှိစေတနာ့ဝန်ထမ်းခရစ်ယာန်ဓမ္မအမှုဆောင်သူများသည် ဘာသာရေးအမှုဆောင်များအဖြစ် ယူမှတ်ခံရတော့မည်မဟုတ်သည့်အတွက်ကြောင့် ဘရာဇီးအလုပ်သမားဥပဒေအောက်ရောက်လာကြောင်း ကင်းမျှော်စင်အသင်း၏ဌာနခွဲရုံးကို အသိပေးခဲ့သည်။ သက်သေခံများသည် ဤစီရင်ချက်ကို အယူခံဝင်ခဲ့ကြသည်။ ထိုအခါ ဗေသလရှိအမှုဆောင်များကို လောကအလုပ်သမားများအဖြစ်မဟုတ်ဘဲ တရားဝင်ဘာသာရေးအဖွဲ့တစ်ဖွဲ့၏အသင်းသားများအဖြစ် အတည်ပြုသည့်စီရင်ချက်ကို ဘရာဇီးမြို့ရှိ နိုင်ငံတော်ရှေ့နေချုပ်၏တရားရေးအကြံပေးဌာနက ၁၉၉၆၊ ဇွန် ၇ ရက်၌ထုတ်ပြန်ခဲ့သည်။

ဂျပန်။ ဂျပန်နိုင်ငံရှိ လူတိုင်း၏အကျိုးအတွက် ပညာရေးနှင့်ဘာသာရေးလွတ်လပ်ခွင့်ဆိုင်ရာ စီရင်ချက်တစ်ခုကို ဂျပန်တရားရုံးချုပ်က ၁၉၉၆၊ မတ် ၈ ရက်နေ့တွင် ထုတ်ပြန်ခဲ့သည်။ ကိုဘီမြူနီစပယ်ကုန်ထုတ်စက်မှုလက်မှုကောလိပ်သည် ကိုယ်ခံပညာသင်ကြားဖို့ငြင်းပယ်ခဲ့သော ကူနီဟီတို ကိုဘာယာရှီကို ကျောင်းထုတ်ခြင်းအားဖြင့် ဥပဒေကိုချိုးဖောက်ခဲ့သည်ဟု တရားရုံးတစ်ခုလုံးက သဘောတူညီစွာ စီရင်ခဲ့သည်။ ဂျပန်နိုင်ငံဖွဲ့စည်းပုံ အခြေခံဥပဒေက အတည်ပြုထားသော ဘာသာရေးလွတ်လပ်မှုကို အခြေခံ၍တရားရုံးချုပ်က ဤသို့ပထမဦးဆုံးအကြိမ် စီရင်ချက်ချခဲ့ခြင်းဖြစ်သည်။ အဆိုပါသက်သေခံလူငယ်သည် မိမိ၏ကျမ်းစာဖြင့် လေ့ကျင့်ထားသောကိုယ်ကိုကိုယ်သိသောစိတ်ကြောင့် ဤစစ်ရေးလေ့ကျင့်ခြင်းသည် ဟေရှာယ ၂:၄ ၌ဖော်ပြထားသည့် “သူတို့ဓားလက်နက်များကို ထွန်သွားဖြစ်စေခြင်းငှာလည်းကောင်း၊ လှံများကို တံစဉ်ဖြစ်စေခြင်းငှာလည်းကောင်း ထုလုပ်ကြလိမ့်မည်။ တစ်ပြည်ကိုတစ်ပြည်စစ်မတိုက်၊ စစ်အတတ်ကိုလည်း နောက်တစ်ဖန်မသင်ရကြ” ဟူသောကျမ်းစာမူများနှင့်မအပ်စပ်ဟု ယူမှတ်ခဲ့သည်။ တရားရုံး၏စီရင်ချက်သည် နောက်နောင်ဖြစ်ပေါ်မည့်အမှုများအတွက် အစဉ်အလာတစ်ခုဖြစ်လာပါသည်။—၁၉၉၆၊ နိုဝင်ဘာ ၁ ကင်းမျှော်စင် စာမျက်နှာ ၁၉-၂၁ ရှု။

“အသွေးကို . . . ကြဉ်ရှောင်ရမည်” ဟူသောသမ္မာကျမ်းစာအမိန့်နှင့် မအပ်စပ်သောဆေးဝါးကုသမှုကို ငြင်းဆန်ခဲ့သော မီဆာအီ တာခီဒါးအမည်ရှိ သက်သေခံတစ်ဦး၏ အခွင့်အရေးကို ထောက်ခံကြောင်း တိုကျိုအထက်တရားရုံးက ၁၉၉၈၊ ဖေဖော်ဝါရီ ၉ ရက်နေ့တွင် အရေးပါသောစီရင်ချက်နောက်တစ်ခု ထုတ်ပြန်ခဲ့သည်။ (တမန်တော် ၁၅:၂၈၊ ၂၉) ယင်းအမှုကို တရားရုံးချုပ်သို့ အယူခံဝင်ထားပြီး အထက်တရားရုံး၏စီရင်ချက်ကို အတည်ပြုမပြု စောင့်ကြည့်ရမည်။

ဖိလစ်ပိုင်။ ၁၉၉၃၊ မတ် ၁ ရက်၌ထုတ်ပြန်ခဲ့သော စီရင်ချက်တစ်ခုတွင် . . . အလေးပြုခြင်းကို လေးစားစွာငြင်းပယ်ခဲ့သဖြင့် ကျောင်းထုတ်ခံခဲ့ရသော သက်သေခံလူငယ်များ၏အမှုတွင် ဖိလစ်ပိုင်တရားရုံးချုပ်က တညီတညွတ်တည်း ယေဟောဝါသက်သေများကို အနိုင်ပေးခဲ့သည်။

အနိုင်ရသောတရားရုံးဆုံးဖြတ်ချက်တိုင်းသည် ယေဟောဝါသက်သေများအတွက်သာမက လူခပ်သိမ်း၏ လုပ်ပိုင်ခွင့်ကိုကာကွယ်သည့် ဥပဒေဆိုင်ရာမြို့ရိုးကို ပိုမိုခိုင်ခံ့စေသော ထပ်ဆင့်ကျောက်တစ်လုံး သို့မဟုတ် အုတ်တစ်ချပ်နှင့်တူ၏။

မြို့ရိုးကိုကာကွယ်ခြင်း

ယေဟောဝါသက်သေများသည် အသိအမှတ်ပြုခံရသော အခြားဘာသာများကဲ့သို့ ၁၅၃ နိုင်ငံတွင် ဥပဒေအရမှတ်ပုံတင်ထားပြီး လွတ်လပ်မှုများစွာခံစားနေကြရသည်။ သူတို့သည် အရှေ့ဥရောပနှင့် ယခင်ဆိုဗီယက်ပြည်ထောင်စုတွင် ဆယ်စုနှစ်များစွာ နှိပ်စက်ညှဉ်းပန်းမှုနှင့်ပိတ်ပင်မှုခံရပြီးနောက် ယခု အယ်လ်ဘေးနီးယား၊ ဘယ်လာရုစ်၊ ချက်ခ်သမ္မတနိုင်ငံ၊ ဂျော်ဂျီယာ၊ ဟန်ဂေရီ၊ ကာဇက်စတန်၊ ကီရ်ဂျစ်စတန်၊ ရိုမေးနီးယားနှင့် စလိုဗားကီးယားစသောနိုင်ငံများတွင် တရားဝင်အသိအမှတ်ပြုခံနေကြရပြီ။ သို့ရာတွင် ကြာမြင့်စွာကပင် တရားရေးစနစ်များရှိပြီးဖြစ်သော အနောက်ဥရောပနိုင်ငံအချို့အပါအဝင် အချို့နိုင်ငံများတွင် ယေဟောဝါသက်သေများ၏လုပ်ပိုင်ခွင့်များကို အကြီးအကျယ်စောဒကတက်နေကြသည် သို့မဟုတ် ငြင်းပယ်နေကြသည်။ အတိုက်အခံပြုသူများသည် သက်သေခံများကို အတိုက်အခံပြု၍ ‘မင်း၏အခွင့်နှင့် မတရားသောအကြံကိုပြုစု’ ရန်ကြိုးစားအားထုတ်နေကြသည်။ (ဆာလံ ၉၄:၂၀) ဤသူတို့မည်သို့တုံ့ပြန်ကြသနည်း။c

ယေဟောဝါသက်သေများသည် အစိုးရအားလုံးနှင့် ပူးပေါင်းဆောင်ရွက်လိုသည့်အပြင် တရားဝင်လွတ်လပ်စွာဝတ်ပြုလိုကြသည်။ သတင်းကောင်းဟောပြောခြင်းအပါအဝင် ဘုရားသခင့်မိန့်မှာချက်များနာခံခြင်းကို တားမြစ်မည့်ဥပဒေများ သို့မဟုတ် တရားရုံးမှစီရင်ချက်များသည် တရားမဝင်ဟု သူတို့အခိုင်အမာယုံကြည်ကြသည်။ (မာကု ၁၃:၁၀) သင့်မြတ်သောသဘောတူညီချက်များမရရှိနိုင်လျှင် ယေဟောဝါသက်သေများသည် ဘုရားပေးအခွင့်နှင့်ဝတ်ပြုရခြင်းကို တရားဝင်ခုခံကာကွယ်ရန် အယူခံဝင်နိုင်သမျှနည်းများဖြင့် ဥပဒေဘောင်အတွင်း လုပ်ဆောင်ရပါလိမ့်မည်။ ယေဟောဝါသက်သေများသည် ဘုရားသခင်၏ကတိတော်ကို လုံးဝယုံကြည်စိတ်ချကြသည်– “သင့်တစ်ဖက်၌လုပ်သောလက်နက်တစ်စုံတစ်ခုကိုမျှ အထမမြောက်ရ။”—ဟေရှာယ ၅၄:၁၇။

[စာမျက်နှာ ၂၁ ပါ လေးထောင့်ကွက်]

ယေဟောဝါသက်သေများ၏အခွင့်အရေးများကို ခုခံကာကွယ်ခြင်း

ယေဟောဝါသက်သေများခံရသည့် နှိပ်စက်ညှဉ်းပန်းမှုကြောင့် သူတို့သည် ကမ္ဘာအနှံ့ရှိ တရားရုံးများနှင့်အစိုးရများထံသို့ ပို့ဆောင်ခံခဲ့ကြရပြီ။ (လုကာ ၂၁:၁၂၊ ၁၃) ယေဟောဝါသက်သေများသည် မိမိတို့၏အခွင့်အရေးများကို ဥပဒေအရခုခံကာကွယ်ရာတွင် အတတ်နိုင်ဆုံးကြိုးစားခဲ့ကြသည်။ တိုင်းနိုင်ငံများစွာတွင် တရားဘက်ဆိုင်ရာအောင်ပွဲများရရှိခဲ့သဖြင့် ယေဟောဝါသက်သေများ၏အောက်ပါအခွင့်အရေးများအပါအဝင် တရားဝင်လွတ်လပ်မှုကို ကာကွယ်ပေးရန်အထောက်အကူရရှိခဲ့သည်–

◻ စီးပွားဖြစ် အရောင်းအဝယ်ပြုသူများအပေါ်တင်သည့် ကန့်သတ်ချက်များကင်းလွတ်လျက် တစ်အိမ်မှတစ်အိမ်ဟောပြောနိုင်ခြင်း—မာဒေါ့ခ် နှင့် ပဲင်စီလ်ဘေးနီးယား၏ဓနသဟာယ ယူ.အက်စ်. တရားရုံးချုပ် (၁၉၄၃); ကိုကီနာကိစ် နှင့် ဂရိ၊ လူ့အခွင့်အရေးဆိုင်ရာ ဥရောပတရားရုံး (အီးစီအိပ်ချ်အာ) (၁၉၉၃)။

◻ ဝတ်ပြုရေးအတွက် လွတ်လပ်စွာစည်းဝေးရခြင်း—မားနူးဆာခီစ်အပါအဝင် အခြားသူများ နှင့် ဂရိ၊ အီးစီအိပ်ချ်အာ (၁၉၉၆)။

◻ အမျိုးသားအလံ သို့မဟုတ် အထိမ်းအမှတ်ကို တာဝန်သိတတ်စွာဖြင့် လေးစားမှုမည်သို့ပြသနိုင်ကြောင်း ကိုယ်တိုင်ဆုံးဖြတ်ခြင်း—အနောက်ဗာဂျီးနီးယားပြည်နယ် ပညာရေးဘုတ်အဖွဲ့ နှင့် ဘာနက်၊ ယူ.အက်စ်. တရားရုံးချုပ် (၁၉၄၃); ဖိလစ်ပိုင်တရားရုံးချုပ် (၁၉၉၃); အိန္ဒိယတရားရုံးချုပ် (၁၉၈၆)။

◻ သူတို့၏ခရစ်ယာန်ကိုယ်ကိုကိုယ်သိသောစိတ်ကို ချိုးဖောက်သည့် စစ်မှုထမ်းခြင်းကို ငြင်းပယ်ခြင်း—ဂျောဂျဒစ္စ နှင့် ဂရိ၊ အီးစီအိပ်ချ်အာ (၁၉၉၇)။

◻ သူတို့၏ကိုယ်ကိုကိုယ်သိသောစိတ်ကို မချိုးဖောက်သည့်ကုသမှုနှင့်ဆေးဝါးများကို ရွေးချယ်ခြင်း—မာလက်တ် နှင့် ရှူလ်မန်၊ ကနေဒါနိုင်ငံ၊ အွန်တဲရီးယိုပြည်နယ်၊ အယူခံတရားရုံး (၁၉၉၀); ကင်းမျှော်စင် နှင့် အီ.အယ်လ်.အေ.၊ ပွာတီရီကို၊ စံယွာန်၊ အထက်တရားရုံး (၁၉၉၅); ဖော့စ်မိုင် နှင့် နီကိုလောင်၊ နယူးယောက်၊ ယူ.အက်စ်.အေ. အယူခံတရားရုံး (၁၉၉၀)။

◻ ကလေးကိုတာဝန်ယူထိန်းသိမ်းမှုဆိုင်ရာ အငြင်းပွားမှုများတွင် သမ္မာကျမ်းစာအခြေခံထားသော ယုံကြည်ချက်များကို စောဒကတက်ကြသည့်တိုင် ထိုယုံကြည်ချက်များအတိုင်း မိမိတို့သားသမီးများကို ပြုစုပျိုးထောင်ခြင်း—စိန့်တ်လောရင့်တ် နှင့် ဆူဆီ၊ ကနေဒါတရားရုံးချုပ် (၁၉၉၇); ဟောဖ်မာန် နှင့် ဩစတြီးယား၊ အီးစီအိပ်ချ်အာ (၁၉၉၃)။

◻ အသိအမှတ်ပြုထားသော အခြားဘာသာတရားများအသုံးပြုသည့် အေဂျင်စီများကဲ့သို့ ထပ်တူအခွန်ကင်းလွတ်ခွင့်ရသည့် တရားဝင်အေဂျင်စီများရရှိခြင်းနှင့် အသုံးပြုခွင့်ရရှိခြင်း—ပြည်သူလူထု နှင့် ဟဲရင်း၊ ယူ.အက်စ်.အေ.၊ နယူးယောက်၊ အယူခံတရားရုံး (၁၉၆၀)။

◻ အခြားဘာသာတို့၏ အချိန်ပြည့်ဘာသာရေးအမှုထမ်းများနည်းတူ အထူးအချိန်ပြည့်လုပ်ငန်းတစ်မျိုးမျိုးကိုဆောင်ရွက်ရန် ခန့်အပ်ခံရသူများလည်း ထပ်တူအခွန်အကောက်ကင်းလွတ်ခွင့်ရခြင်း—ဘရာဇီးအပြည်ပြည်ဆိုင်ရာ လူမှုဖူလုံရေးအဖွဲ့အစည်း၊ ဘရာဇီးမြို့၊ (၁၉၉၆)။

[အောက်ခြေမှတ်ချက်များ]

[စာမျက်နှာ ၂၀ ပါ ရုပ်ပုံ]

မီနော့စ် ကိုကီနာကိစ်နှင့် သူ့ဇနီး

[စာမျက်နှာ ၂၀ ပါ ရုပ်ပုံ]

ကူနီဟီတို ကိုဘာယာရှီ

[Picture Credit Line on page 19]

ရုပ်ပုံများ၏စွယ်စုံကျမ်းအပြည့်အစုံ /J. G. Heck