၁ ဘုရင်များ
၂၂ ဆီးရီးယားပြည်နဲ့ အစ္စရေးပြည်ဟာ သုံးနှစ်လုံး စစ်မဖြစ်ဘဲ ငြိမ်းချမ်းနေတယ်။ ၂ သုံးနှစ်မြောက်မှာ ယုဒဘုရင် ယောရှဖတ်က+ အစ္စရေးဘုရင်ဆီ ဆင်းသွားတယ်။+ ၃ အစ္စရေးဘုရင်က မင်းမှုထမ်းတွေကို “ရာမုတ်ဂိလဒ်မြို့ကို+ ငါတို့ပိုင်မှန်း မသိကြဘူးလား။ အဲဒီမြို့ကို ဆီးရီးယားဘုရင်ဆီကနေ ပြန်သိမ်းဖို့ ငါတို့ ဘာလို့တွန့်ဆုတ်နေကြတာလဲ” ဆိုပြီးပြောတယ်။ ၄ ယောရှဖတ်ကိုလည်း “ရာမုတ်ဂိလဒ်မြို့ကို တိုက်တဲ့အခါ ငါနဲ့အတူ စစ်ချီမလား” လို့မေးတော့ ယောရှဖတ်က “ကျုပ်ဟာ မင်းကြီးနဲ့ တစ်စိတ်တစ်ဝမ်းတည်းပါပဲ။ ကျုပ်ရဲ့လူတွေလည်း မင်းကြီးရဲ့လူတွေနဲ့ တစ်စိတ်တစ်ဝမ်းတည်းပါပဲ။ ကျုပ်ရဲ့မြင်းတွေကလည်း မင်းကြီးရဲ့ မြင်းတွေလိုပါပဲ” ဆိုပြီးပြန်ပြောတယ်။+
၅ ဒါပေမဲ့ ယောရှဖတ်က “ယေဟောဝါဘုရား ဘာပြောမလဲ သိနိုင်ဖို့ အရင်ဆုံး မေးမြန်းကြည့်ပါဦး”+ လို့ပြောတော့၊ ၆ အစ္စရေးဘုရင်က ပရောဖက် ၄၀၀ လောက်ကို စုရုံးပြီး “ရာမုတ်ဂိလဒ်မြို့ကို တိုက်ရမလား၊ မတိုက်ရဘူးလား” လို့မေးတယ်။ သူတို့ကလည်း “သွားတိုက်ခိုက်ပါ။ ယေဟောဝါဘုရားက အဲဒီမြို့ကို မင်းကြီးလက်ထဲ အပ်လိမ့်မယ်” လို့ပြန်ဖြေကြတယ်။
၇ ယောရှဖတ်က “ယေဟောဝါဘုရားရဲ့ ပရောဖက်တစ်ယောက်မှမကျန်တော့ဘူးလား။ ကျန်တယ်ဆိုရင် သူကတစ်ဆင့် မေးမြန်းကြည့်ရအောင်”+ လို့ပြောတယ်။ ၈ အစ္စရေးဘုရင်က “လူတစ်ယောက်တော့ ကျန်သေးတယ်။ အိမလရဲ့သား မိက္ခာယဆိုတဲ့ လူပေါ့။ သူကတစ်ဆင့် ယေဟောဝါဘုရားကို မေးမြန်းလို့ရတယ်။+ ဒါပေမဲ့ သူ့ကို ငါသိပ်မုန်းတယ်။+ အဲဒီလူက ငါနဲ့ပတ်သက်ပြီး ဘယ်တော့မှ အကောင်း မဟောတတ်ဘူး။ မကောင်းတာတွေကိုပဲ ဟောတတ်တယ်”+ လို့ပြောတဲ့အခါ ယောရှဖတ်က “မင်းကြီး ဒီလိုတော့ မပြောသင့်ပါဘူး” ဆိုပြီးပြောတယ်။
၉ ဒါနဲ့ အစ္စရေးဘုရင်က နန်းတွင်းအရာရှိ တစ်ယောက်ကိုခေါ်ပြီး “အိမလရဲ့သား မိက္ခာယကို ချက်ချင်းခေါ်ခဲ့”+ လို့ အမိန့်ပေးလိုက်တယ်။ ၁၀ ရှမာရိမြို့ တံခါးဝနားက ကောက်နယ်တလင်းမှာ အစ္စရေးဘုရင်နဲ့ ယုဒဘုရင် ယောရှဖတ်က မင်းဝတ်တန်ဆာတွေ ဆင်မြန်းပြီး ရာဇပလ္လင်ကိုယ်စီနဲ့ ထိုင်နေတယ်။ ပရောဖက်တွေကတော့ သူတို့ရှေ့မှာ ပရောဖက်ပြုနေတယ်။+ ၁၁ ခေနာနာရဲ့သား ဇေဒကိက သံဦးချိုတွေလုပ်ပြီး “ယေဟောဝါဘုရား ပြောတာက ‘မင်းက ဒီဦးချိုတွေနဲ့ ခွေ့ပြီး ဆီးရီးယားတွေကို အစတုံးဖျက်ဆီးလိမ့်မယ်’” လို့ အာဟပ်မင်းကို ပြောတယ်။ ၁၂ သူဟောတဲ့အတိုင်းပဲ တခြားပရောဖက်အားလုံးကလည်း “ရာမုတ်ဂိလဒ်မြို့ကို သွားတိုက်ခိုက်ပါ၊ မင်းကြီး အောင်ပွဲဆင်လိမ့်မယ်။ ယေဟောဝါဘုရားက အဲဒီမြို့ကို မင်းကြီးလက်ထဲ အပ်လိမ့်မယ်” လို့ ပြောကြတယ်။
၁၃ မိက္ခာယကို သွားခေါ်တဲ့ တမန်ကလည်း “ပရောဖက်တွေက မင်းကြီးအတွက် ကောင်းတာကိုပဲ တစ်ညီတည်း ဟောနေကြတယ်။ ခင်ဗျားလည်း သူတို့လို ကောင်းတာတွေချည်းပဲ ဟောပါ” လို့တိုက်တွန်းတော့၊+ ၁၄ မိက္ခာယက “အသက်ရှင်နေတဲ့ဘုရား ယေဟောဝါကို တိုင်တည်ပြီးပြောမယ်၊ ယေဟောဝါပြောခိုင်းတာကိုပဲ ကျွန်တော်ပြောမယ်” လို့ပြန်ဖြေတယ်။ ၁၅ အဲဒီနောက် အခစားဝင်တဲ့အခါ အစ္စရေးဘုရင်က “မိက္ခာယ၊ ရာမုတ်ဂိလဒ်မြို့ကို ငါတို့တိုက်ရမလား။ မတိုက်ရဘူးလား” လို့မေးတယ်။ သူက ချက်ချင်းပဲ “သွားတိုက်ခိုက်ပါ၊ မင်းကြီး အောင်ပွဲဆင်လိမ့်မယ်။ ယေဟောဝါဘုရားက အဲဒီမြို့ကို မင်းကြီးလက်ထဲအပ်လိမ့်မယ်” လို့ပြောတယ်။ ၁၆ ဒါနဲ့ အစ္စရေးဘုရင်က “ယေဟောဝါဘုရားရဲ့ နာမည်ကိုသုံးပြီး မှန်သောစကားကိုပဲပြောဖို့ မင်းကို ဘယ်နှစ်ခါ ကျိန်ဆိုခိုင်းရမလဲ” လို့ပြောလိုက်တော့၊ ၁၇ မိက္ခာယက “အစ္စရေးတွေဟာ ထိန်းသူမရှိတဲ့ သိုးတွေလို တောင်ပေါ်မှာ တကွဲတပြား ဖြစ်နေတာကို ကျွန်တော်မြင်တယ်။+ ‘ဒီလူတွေအားလုံး သခင် မရှိတဲ့အတွက် ကိုယ့်အိမ်ကိုယ့်ရာဆီ အေးအေးဆေးဆေး ပြန်ကြပါစေ’ လို့ ယေဟောဝါဘုရား ပြောတယ်” ဆိုပြီး လျှောက်တင်တယ်။
၁၈ အဲဒီအခါ အစ္စရေးဘုရင်က ယောရှဖတ်ကို “‘ဒီလူဟာ ငါနဲ့ပတ်သက်ပြီး ကောင်းတာတွေကို မဟောဘဲ မကောင်းတာတွေကိုပဲ ဟောလိမ့်မယ်’ လို့ ငါပြောတယ် မဟုတ်လား” ဆိုပြီးပြောတယ်။+
၁၉ မိက္ခာယက “ယေဟောဝါဘုရား ပြောတာကို နားထောင်ပါ။ ရာဇပလ္လင်ပေါ်မှာ ယေဟောဝါ စံမြန်းနေတာ၊+ လက်ယာဘက်၊ လက်ဝဲဘက်မှာ ကောင်းကင်ဗိုလ်ခြေတွေ ရပ်ပြီး ခစားနေကြတာကို ကျွန်တော်မြင်တယ်။+ ၂၀ ယေဟောဝါက ‘အာဟပ်ကို ရာမုတ်ဂိလဒ်မြို့ဆီ ချီတက်အောင်၊ သူကျဆုံးသွားအောင် ဘယ်သူလှည့်စားမလဲ’ လို့မေးတော့ တစ်ပါးက တစ်မျိုးပြောတယ်။ နောက်တစ်ပါးကလည်း တစ်မျိုးပြောတယ်။ ၂၁ အဲဒီနောက် ကောင်းကင်တမန်*+ တစ်ပါး ရှေ့ထွက်လာပြီး ယေဟောဝါရှေ့မှာခစားတယ်။ ပြီးတော့ ‘ကျွန်တော်လှည့်စားမယ်’ တဲ့။ ယေဟောဝါက ‘ဘယ်လို လှည့်စားမှာလဲ’ လို့မေးတော့၊ ၂၂ သူက ‘ကျွန်တော်သွားပြီး သူ့ပရောဖက်တွေ လိမ်လည်ဟောပြောအောင် လုပ်ပါ့မယ်’+ လို့ဖြေတယ်။ ဘုရားသခင်က ‘သူ့ကို မင်းလှည့်စားနိုင်လိမ့်မယ်။ အောင်လည်း အောင်မြင်လိမ့်မယ်။ သွားပြီး အဲဒီအတိုင်းလုပ်ပါ’ လို့ပြောတယ်။ ၂၃ ဒါကြောင့် မင်းကြီးရဲ့ပရောဖက်အားလုံး လိမ်လည်ဟောပြောအောင်လုပ်ဖို့ ကောင်းကင်တမန်ကို ယေဟောဝါ ခွင့်ပြုလိုက်တာပါ။+ ဒါပေမဲ့ မင်းကြီး ဘေးဆိုးကြုံရမယ်လို့ ယေဟောဝါ အမိန့်ချပြီးသားပါပဲ”+ လို့ပြန်လျှောက်တင်တယ်။
၂၄ အဲဒီအခါ ခေနာနာရဲ့သား ဇေဒကိက ရှေ့တိုးလာပြီး မိက္ခာယကို ပါးရိုက်တယ်။ “ငါ့ဆီမှာ ယေဟောဝါရဲ့ စွမ်းအားတော် မရှိတော့ဘူး၊ မင်းကပဲ စွမ်းအားတော် လမ်းညွှန်တဲ့အတိုင်း ဟောနေတယ်ပေါ့ ဟုတ်လား” ဆိုတော့၊+ ၂၅ မိက္ခာယက “အတွင်းခန်းထဲ ခင်ဗျားဝင်ပုန်းတဲ့နေ့ကျရင် သိရမှာပါ” လို့ဖြေတယ်။ ၂၆ အဲဒီအခါ အစ္စရေးဘုရင်က “မိက္ခာယကိုဖမ်းပြီး မြို့ဝန်အာမုန်နဲ့ သားတော်ယောရှဆီ အပ်လိုက်စမ်း။ ၂၇ ပြီးတော့ ‘ဒီလူကို အကျဉ်းချထားလိုက်။+ ငါချောချောမောမော ပြန်လာတဲ့အချိန်အထိ သူ့ကို မဝရေစာ ကျွေးထားလိုက်။’ ငါ ဒီလိုအမိန့်ချတယ်ဆိုတာ သူတို့ကိုပြောပြလိုက်” ဆိုပြီး အမိန့်ပေးတယ်။ ၂၈ မိက္ခာယကလည်း “မင်းကြီးသာ တကယ်ပဲ ချောချောမောမော ပြန်ရောက်တယ်ဆိုရင် ကျွန်တော့်ကို ယေဟောဝါဘုရား ပြောတာမဟုတ်ဘူးလို့ မှတ်ပါ”+ လို့လျှောက်ပြီးနောက် “ဒီမှာရှိနေတဲ့ ခင်ဗျားတို့အားလုံးလည်း မှတ်ထားကြ” ဆိုပြီး ပြောတယ်။
၂၉ အစ္စရေးဘုရင်နဲ့ ယုဒဘုရင်ယောရှဖတ်က ရာမုတ်ဂိလဒ်မြို့ကို ချီတက်သွားကြတယ်။+ ၃၀ အစ္စရေးဘုရင်က “ငါရုပ်ဖျက်ပြီး တိုက်ပွဲဝင်မယ်။ မင်းကြီးကတော့ မင်းဝတ်တန်ဆာတွေ ဆင်မြန်းထားပါ” လို့ ယောရှဖတ်ကို ပြောတယ်။ ပြီးတော့ ရုပ်ဖျက်ပြီး+ တိုက်ပွဲဝင်တယ်။ ၃၁ ဆီးရီးယားဘုရင်က မြင်းရထားတပ်မှူး+ ၃၂ ယောက်ကို “အစ္စရေးဘုရင်ကိုပဲ တိုက်ကြ။ တခြားလူ ကြီးကြီးငယ်ငယ်မှန်သမျှ တိုက်မနေနဲ့” လို့ မှာထားတယ်။ ၃၂ မြင်းရထားတပ်မှူးတွေက ယောရှဖတ်ကို မြင်တာနဲ့ “ဒါ အစ္စရေးဘုရင်ပဲ ဖြစ်ရမယ်” ဆိုပြီး သူ့ကိုတိုက်ဖို့ လိုက်ကြတယ်။ ယောရှဖတ်လည်း အော်ဟစ်အကူအညီ တောင်းတယ်။ ၃၃ မြင်းရထားတပ်မှူးတွေက အစ္စရေးဘုရင် မဟုတ်မှန်း သိသွားတဲ့အခါ ဆက်မလိုက်တော့ဘဲ ချက်ချင်း ပြန်လှည့်သွားကြတယ်။
၃၄ ဒါပေမဲ့ စစ်သည်တစ်ယောက်က မြားတစ်စင်းကို အမှတ်မထင်ပစ်လွှတ်လိုက်တာ အစ္စရေးဘုရင် အာဟပ်ဝတ်ထားတဲ့ ချပ်ဝတ်တန်ဆာရဲ့ အဆက်ကြားမှာ ထိမှန်သွားတယ်။ ဒါနဲ့ အာဟပ်မင်းက ရထားထိန်းကို “ပြန်လှည့်တော့။ ငါ့ကို စစ်မြေပြင်ကနေ ခေါ်ထုတ်သွားပါ။ ငါအကြီးအကျယ် ဒဏ်ရာရနေပြီ”+ လို့ အမိန့်ပေးတယ်။ ၃၅ အဲဒီတစ်နေ့လုံး တိုက်ပွဲအပြင်းအထန်ဖြစ်တယ်။ အာဟပ်မင်းက မြင်းရထားထဲမှာ လူကိုမှီပြီး ဆီးရီးယားတွေဘက်ကို မျက်နှာမူထားတယ်။ ဒဏ်ရာကသွေးတွေလည်း မြင်းရထားထဲမှာ စီးကျနေတယ်။ ညနေပိုင်းရောက်တော့ ကွယ်လွန်သွားတယ်။+ ၃၆ နေဝင်ချိန်မှာ “ကိုယ့်မြို့ကိုယ့်ရွာကို ပြန်ကြ”+ ဆိုတဲ့ ဟစ်အော်သံကို စခန်းတစ်လျှောက်လုံး ကြားရတယ်။ ၃၇ အာဟပ်မင်း ကွယ်လွန်သွားတဲ့အတွက် ရှမာရိမြို့ဆီ သယ်သွားပြီး အဲဒီမြို့မှာ သင်္ဂြိုဟ်လိုက်ကြတယ်။ ၃၈ ရှမာရိရေကန်မှာ စစ်မြင်းရထားကို ဆေးတဲ့အခါ ယေဟောဝါ ပြောခဲ့တဲ့အတိုင်း သူ့သွေးကို ခွေးတွေလျက်ကြတယ်။ အဲဒီရေကန်မှာ ပြည့်တန်ဆာတွေ ရေချိုးကြတယ်။+
၃၉ အာဟပ်ရဲ့ ကျန်တဲ့သမိုင်းကြောင်းတွေ၊ လုပ်ဆောင်ခဲ့တာတွေ၊ သူတည်ဆောက်ခဲ့တဲ့ ဆင်စွယ်နန်းတော်နဲ့+ မြို့တွေအကြောင်းကို အစ္စရေးဘုရင်တွေရဲ့ ရာဇဝင်မှတ်တမ်းမှာ ရေးထားတယ်။ ၄၀ အာဟပ် ကွယ်လွန်သွားပြီးနောက်+ သားတော်အာခဇိက+ ထီးနန်းဆက်ခံတယ်။
၄၁ အစ္စရေးဘုရင် အာဟပ်နန်းစံ လေးနှစ်မြောက်မှာ အာသရဲ့သား ယောရှဖတ်က+ ယုဒပြည်မှာ နန်းတက်တယ်။ ၄၂ အသက် ၃၅ နှစ်မှာ နန်းထိုင်ပြီး ဂျေရုဆလင်မြို့မှာ ၂၅ နှစ် စိုးစံတယ်။ မယ်တော်က ရှိလဟိရဲ့သမီး အဇုဘလို့ ခေါ်တယ်။ ၄၃ ယောရှဖတ်က ခမည်းတော်အာသရဲ့+ လမ်းစဉ်ကို ဆက်လိုက်တယ်။ လမ်းမလွဲသွားဘဲ ယေဟောဝါရှေ့မှာ မှန်ရာကိုလုပ်တယ်။+ အထွတ်အမြတ်နေရာတွေ ရှိနေဆဲဖြစ်လို့ လူတွေက အဲဒီမှာ ယဇ်တွေ ဆက်သပြီး မီးရှို့ပူဇော်နေတုန်းပဲ။+ ၄၄ ယောရှဖတ်ဟာ အစ္စရေးဘုရင်နဲ့လည်း သင့်သင့်မြတ်မြတ် ရှိတယ်။+ ၄၅ ယောရှဖတ်ရဲ့ ကျန်တဲ့သမိုင်းကြောင်းတွေ၊ စွမ်းဆောင်ချက်တွေ၊ စစ်ဆင်နွှဲပုံတွေကို ယုဒဘုရင်တွေရဲ့ ရာဇဝင်မှတ်တမ်းမှာ ရေးထားတယ်။ ၄၆ ခမည်းတော်အာသ လက်ထက်က ကျန်နေသေးတဲ့ ဗိမာန်ပြည့်တန်ဆာ*+ လုပ်တဲ့ ယောက်ျားတွေကိုလည်း တိုင်းပြည်ကနေ ဖယ်ရှားတယ်။+
၄၇ အဲဒီတုန်းက ဧဒုံပြည်မှာ+ ဘုရင် မရှိဘူး။ ဝန်မင်းတစ်ယောက်ကပဲ ဘုရင်အဖြစ် စီမံအုပ်ချုပ်နေတယ်။+
၄၈ ယောရှဖတ်က တာရှိသင်္ဘောတွေ* ဆောက်ပြီး ရွှေတွေသယ်လာဖို့ သြဖိရအရပ်ကို လွှတ်တယ်။+ ဒါပေမဲ့ ဧဇယုန်ဂါဗာအရပ်မှာ သင်္ဘောပျက်သွားတဲ့အတွက် ဆက်မသွားနိုင်တော့ဘူး။+ ၄၉ အာဟပ်ရဲ့သား အာခဇိက “သင်္ဘောထဲမှာ မင်းကြီးရဲ့ အမှုထမ်းတွေနဲ့အတူ ကျွန်တော်ရဲ့ အမှုထမ်းတွေကို လိုက်ခွင့်ပေးပါ” လို့ပြောပေမဲ့ ယောရှဖတ်က သဘောမတူဘူး။
၅၀ အဲဒီနောက် ယောရှဖတ် ကွယ်လွန်သွားတဲ့အတွက်+ သူ့ကို ဒါဝိဒ်ရဲ့မြို့မှာ ဘိုးဘေးတွေနဲ့အတူ သင်္ဂြိုဟ်ကြတယ်။ သားတော် ယဟောရံက+ ထီးနန်းဆက်ခံတယ်။
၅၁ ယုဒဘုရင်ယောရှဖတ် နန်းစံ ၁၇ နှစ်မြောက်မှာ အာဟပ်ရဲ့သား အာခဇိက+ အစ္စရေးပြည်မှာ နန်းတက်လာပြီး ရှမာရိမြို့မှာ နန်းထိုင်တယ်။ အစ္စရေးပြည်ကို ၂ နှစ်စိုးစံတယ်။ ၅၂ သူက ယေဟောဝါရှေ့မှာ မကောင်းတာကို ဆက်လုပ်တယ်။ ခမည်းတော်နဲ့ မယ်တော်ရဲ့ လမ်းစဉ်အတိုင်း၊+ အစ္စရေးတွေကို အပြစ်ကျူးလွန်စေတဲ့ နေဗတ်သား ယေရောဗောင်ရဲ့ လမ်းစဉ်အတိုင်း+ ဆက်လိုက်တယ်။ ၅၃ ဗာလဘုရားကို ဆက်ပြီး ဦးချဝတ်ပြုတယ်။+ ခမည်းတော်လိုပဲ အစ္စရေးတို့ရဲ့ဘုရား ယေဟောဝါကို အမျက်ထွက်အောင်လုပ်တယ်။+