နိုင်ငံသားဖြစ်စေ၊ နိုင်ငံခြားသားဖြစ်စေဘုရားသခင်သင့်အားကြိုဆို

“မြေမျက်နှာတစ်ပြင်လုံးပေါ်တွင်နေထိုင်ရန် လူတစ်ယောက်အားဖြင့်လူမျိုးအားလုံးကို ကိုယ်တော်ဖြစ်စေတော်မူခဲ့သည်။”— တမန်တော် ၁၇:၂၆၊ ကဘ ။

၁။ ယနေ့နေရာများစွာတွင် တိုင်းတစ်ပါးယဉ်ကျေးမှုရှိသူများကိုလက်ခံရာတွင် မည်သည့်အကြပ်အတည်းများရှိနေသနည်း။

သတင်းမှတ်တမ်းများက နိုင်ငံများစွာတွင် နိုင်ငံခြားသားများ၊ တိုင်းတစ်ပါးမှလာရောက်အခြေချနေထိုင်သူများ၊ ဝင်ရောက်ခိုလှုံသူဒုက္ခသည်များတိုးပွားနေခြင်းကို ဖော်ပြသည်။ လူသန်းပေါင်းများစွာတို့သည် အာရှ၊ အာဖရိက၊ ဥရောပ၊ အမေရိကဒေသအချို့မှ ဖြစ်ချင်ရာဖြစ်ပြောင်းရွှေ့နေကြသည်။ မရှုမလှဆင်းရဲမွဲတေမှု၊ ပြည်တွင်းစစ် သို့မဟုတ် နှိပ်စက်ညှဉ်းဆဲမှုများမှ လွတ်ရာလွတ်ကြောင်းအတွက်ဖြစ်နိုင်သည်။ သို့သော် အခြားနေရာက သူတို့ကိုလက်ခံသလော။ “ဥရောပရှိလူမျိုးများရောယှက်မှုသည် အပြောင်းအလဲဖြစ်စပြုလာသည်နှင့်အမျှ အချို့နိုင်ငံများက မိမိတို့သည် တစ်ချိန်က တိုင်းတစ်ပါးယဉ်ကျေးမှုကိုလက်ခံနိုင်မည်ထင်သော်လည်း ယခုလက်မခံနိုင်တော့ကြောင်း သိရှိလာကြသည်” ဟု Time မဂ္ဂဇင်းကဖော်ပြသည်။ “အလိုမရှိ” သောခိုလှုံသူ ၁၈,၀၀၀,၀၀၀ နှင့်ပတ်သက်၍ “လူမျိုးများကိုတည်ငြိမ်အောင်လုပ်ရန်စိန်ခေါ်မှုကိုသူတို့ရင်ဆိုင်နေရဆဲဖြစ်သည်” ဟု Time မဂ္ဂဇင်းကပြောခဲ့သည်။

၂၊ ၃။ (က) လက်ခံခြင်းနှင့်ပတ်သက်၍ အဘယ်အားရှိဖွယ်အာမခံချက်ကို ကျမ်းစာကပေးထားသနည်း။ (ခ) လူသားများနှင့်ဘုရားသခင်မည်သို့ဆက်ဆံကြောင်း ကျမ်းစာစောင်များတွင်ဖော်ပြချက်ကို ကျွန်ုပ်တို့စစ်ဆေးကြည့်ခြင်းသည် အဘယ်ကြောင့်အကျိုးကျေးဇူးရှိနိုင်သနည်း။

^၂ ဤကိစ္စတွင် မည်သို့ပင်ဖြစ်ပျက်နေပါစေ၊ ပကတိနိုင်ငံသားဖြစ်စေ၊ မှီတင်းနေထိုင်သူဖြစ်စေ၊ ခိုလှုံသူဖြစ်စေ ဘုရားသခင်ကြိုဆိုလက်ခံတော်မူကြောင်း သမ္မာကျမ်းစာက ဖော်ပြထားသည်။ (တမန်တော် ၁၀:၃၄၊ ၃၅) ‘ဒါပေမယ့်၊ အဲဒါဘယ်လိုပြောနိုင်မှာလဲ။ ဘုရားသခင်ဟာ သူ့ရဲ့လူမျိုးတော်အဖြစ် ရှေးဣသရေလလူမျိုးတစ်မျိုးထဲကိုပဲ တခြားလူမျိုးကနေသီးခြားဖြစ်အောင်ရွေးချယ်ခဲ့တယ်မဟုတ်လား’ ဟု အချို့မေးကောင်းမေးမည်။

^၃ သို့ဆိုလျှင် ရှေးခေတ်လူများနှင့် ဘုရားသခင်မည်သို့ဆက်ဆံခဲ့သည်ကို ကြည့်ကြစို့။ ယနေ့ မှန်သောဝတ်ပြုကိုးကွယ်သူများရရှိနိုင်သည့် အခွင့်ထူးများနှင့်ပတ်သက်နေသော ပရောဖက်ပြုချက်များကိုလည်း ကျွန်ုပ်တို့စစ်ဆေးကြည့်နိုင်သည်။ ဤပရောဖက်ပြုချက်ဆိုင်ရာအကြောင်းအရာများကို ပြန်လည်သုံးသပ်ခြင်းသည် သင့်အားများစွာအားရှိစေမည့် တိုးတက်သိနားလည်လာခြင်းကိုဖြစ်စေမည်။ ကြီးစွာသောဒုက္ခကိုကပ်ကျော်မည့် “အသီးအသီးဘာသာစကားကိုပြောသော လူအမျိုးအနွယ်ခပ်သိမ်း” တို့ထဲမှတစ်ဦးချင်းနှင့် ဘုရားသခင်မည်သို့ဆက်ဆံမည်ကိုလည်း ညွှန်ပြသည်။—ဗျာဒိတ် ၇:၉၊ ၁၄-၁၇။

‘လူမျိုးအပေါင်းတို့ကောင်းချီးမင်္ဂလာခံစားကြရမည်’

၄။ လူမျိုးရှုပ်ထွေးမှုမည်သို့ပေါ်ပေါက်ခဲ့သနည်း။ သို့သော် ဘုရားသခင်မည်သို့စီစဉ်ဆောင်ရွက်ခဲ့သနည်း။

^၄ ရေလွှမ်းမိုးပြီးနောက် လူသားအားလုံးဆင်းသက်ရာဖြစ်သော နောဧ၏မိသားစုဝင်တို့သည်စစ်မှန်သောဝတ်ပြုသူများဖြစ်ခဲ့ကြသည်။ သို့သော် ထိုစည်းလုံးမှုသည် မကြာမီပြောင်းလဲသွားတော့သည်။ မကြာမီပင် လူအချို့တို့သည် ဘုရားသခင်၏အလိုတော်ကိုလျစ်လျူရှုပြီး ရဲတိုက်တစ်ခုကိုဆောက်လုပ်လာကြသည်။ ယင်းက လူသားများကို အရပ်ရပ်သို့ကွဲပြားသွားစေပြီး သီးခြားဘာသာစကားပြောသည့်အုပ်စုများဖြစ်စေခဲ့သည်။ (ကမ္ဘာဦး ၁၁:၁-၉) သို့သော် စစ်မှန်သောဝတ်ပြုရေးသည် အာဗြဟံဖြစ်ပေါ်လာမည့်မျိုးရိုးတွင် ဆက်လက်တည်ရှိမြဲဖြစ်သည်။ ဘုရားသခင်သည် သစ္စာရှိအာဗြဟံကို ကောင်းချီးပေးခဲ့ပြီး သူ၏သားစဉ်မြေးဆက်ကို လူမျိုးကြီးဖြစ်စေမည်အကြောင်း ကတိပေးတော်မူခဲ့သည်။ (ကမ္ဘာဦး ၁၂:၁-၃) ထိုလူမျိုးသည် ရှေးဣသရေလလူမျိုးပင်ဖြစ်သည်။

၅။ အာဗြဟံနှင့်ဘုရားသခင်ဆက်ဆံပုံမှ အဘယ်ကြောင့်ကျွန်ုပ်တို့ခွန်အားယူနိုင်သနည်း။

^၅ သို့တစေ၊ ယေဟောဝါသည် ဣသရေလလူမျိုးမှလွဲလျှင် အခြားလူမျိုးများကိုဖယ်ထုတ်ထားခဲ့ခြင်းမဟုတ်ပါ။ အကြောင်းမှာ ကိုယ်တော်၏ရည်ရွယ်တော်မူချက်သည် လူသားအားလုံးအတွက်ဖြစ်သည်။ “သင်၏အမျိုးအနွယ်အားဖြင့် လူမျိုးအပေါင်းတို့သည် ကောင်းချီးမင်္ဂလာကို ခံရကြလိမ့်မည် ဟု ငါ၏စကားကိုသင်နားထောင်သောကြောင့်” ဟူသော အာဗြဟံအား ဘုရားသခင်ပေးသည့် ကတိတော်ကိုကြည့်ခြင်းအားဖြင့် ယင်းအချက်ကို ကျွန်ုပ်တို့ရှင်းလင်းစွာသိမြင်နိုင်သည်။ (ကမ္ဘာဦး ၂၂:၁၈) နှစ်ရာစုများစွာတစ်လျှောက် ဘုရားသခင်သည် ဣသရေလလူမျိုးအား သီးသန့်ဆက်ဆံခဲ့ပြီး လူမျိုးဆိုင်ရာပညတ်ဥပဒေသပေးခြင်း၊ ကိုယ်တော့်ဗိမာန်တော်တွင်ယဇ်ပူဇော်ရန် ယဇ်ပုရောဟိတ်များကိုစီစဉ်ပေးခြင်း၊ သူတို့အခြေချနေထိုင်ရန် ကတိတော်ပြည်ကိုပေးခဲ့ခြင်းများ ပြုခဲ့သည်။

၆။ ဣသရေလလူမျိုးများနှင့်ဘုရားသခင်ပြုခဲ့သောအစီအစဉ်က အားလုံးအတွက်မည်သို့အကျိုးကျေးဇူးရှိသနည်း။

^၆ ဣသရေလလူမျိုးများအား ဘုရားသခင်ပေးခဲ့သောပညတ်တရားသည် အခြားလူမျိုးအားလုံးအတွက်ပါ ကောင်းသည်။ အကြောင်းမှာ လူသားသည်အပြစ်နှင့်ပြည့်ဝပြီး အပြစ်များကို အစဉ်အမြဲဖြေလွတ်ပေးနိုင်မည့် စုံလင်သောပူဇော်သက္ကာလိုအပ်ကြောင်းကို ရှင်းလင်းစွာဖော်ပြသည်။ (ဂလာတိ ၃:၁၉။ ဟေဗြဲ ၇:၂၆-၂၈၊ ၉:၉၊ ၁၀:၁-၁၂) သို့ရာတွင် လူမျိုးအပေါင်းအား ကောင်းချီးမင်္ဂလာခံစားစေမည့် အာဗြဟံ၏မျိုးနွယ်သည် ပေါ်ထွန်းလာပြီး ထိုအရည်အချင်းပြည့်မီရန် မည်သည့်အာမခံချက်ရှိခဲ့သနည်း။ ဤတွင်လည်း ဣသရေလလူမျိုးများအားပေးခဲ့သောပညတ်တရားက ဖြစ်မြောက်စေခဲ့သည်။ သက်ရှိကလေးငယ်များကိုမီးရှို့ပူဇော်ခြင်းစသည့် မသန့်ရှင်းသောအကျင့်အကြံနှင့်ထုံးတမ်းများအားဖြင့် နာမည်ဆိုးနေသောခါနာန်လူမျိုးများနှင့် အပြန်အလှန်စုံဖက်ခြင်းကို တားမြစ်ခဲ့သည်။ (ဝတ်ပြုရာ ၁၈:၆-၂၄။ ၂၀:၂၊ ၃။ တရားဟောရာ ၁၂:၂၉-၃၁။ ၁၈:၉-၁၂) သူတို့နှင့်သူတို့၏အကျင့်များလုံးလုံးဖျက်ဆီးခြင်းခံရမည်ဟု ဘုရားသခင်စီရင်ချက်ချခဲ့သည်။ ယင်းသည် တိုင်းတစ်ပါးသားများအပါအဝင် အားလုံးအတွက်ရေရှည်ကောင်းကျိုးဖြစ်ထွန်းစေခဲ့သည်။ ကတိထားရာမျိုးနွယ်၏မျိုးရိုးပျောက်ပျက်မသွားရန် ယင်းကထိန်းသိမ်းပေးသည်။—ဝတ်ပြုရာ ၁၈:၂၄-၂၈။ တရားဟောရာ ၇:၁-၅၊ ၉:၅၊ ၂၀:၁၅-၁၈။

၇။ ဘုရားသခင်သည် ဧည့်သည်အဖြစ်နေထိုင်သူများကိုလက်ခံကြိုဆိုကြောင်း အဘယ်ကနဦးဖော်ပြချက်ရှိသနည်း။

^၇ ပညတ်တရားတည်ဆဲကာလ၊ ဘုရားသခင်သည်ဣသရေလလူမျိုးကို အထူးလူမျိုးအဖြစ်သတ်မှတ်ထားစဉ်၌ပင် ဣသရေလလူမျိုးမဟုတ်သူများကို ကရုဏာပြတော်မူခဲ့သည်။ ကိုယ်တော်ထိုသို့ပြုလိုသည့်စိတ်ဆန္ဒသည် ဣသရေလလူမျိုးများအီဂျစ်အချုပ်အနှောင်မှလွတ်မြောက်ပြီး မိမိတို့၏ပြည်သို့ချီတက်သွားနေစဉ်က ပေါ်လွင်သည်။ “ရောနှောနေသောလူအုပ်ကြီးသည်လည်း သူတို့နှင့်အတူလိုက်ကြ၏။” (ထွက်မြောက်ရာ ၁၂:၃၈၊ ကဘ ) ပါမောက္ခ စီ၊ အက်ဖ်၊ ခီးလ်က သူတို့ကို “နိုင်ငံခြားသားအုပ်စုတစ်စု . . . မတူသောလူမျိုးများမှ ရောနှောနေသည့်လူများ” ဟုသတ်မှတ်သည်။ (ဝတ်ပြုရာ ၂၄:၁၀။ တောလည်ရာ ၁၁:၄) အများစုမှာ စစ်မှန်သောဝတ်ပြုရေးကိုလက်ခံသော အီဂျစ်လူမျိုးများဖြစ်ဖွယ်ရှိသည်။

နိုင်ငံခြားသားများကိုကြိုဆိုလက်ခံခြင်း

၈။ ဂိဗောင်လူမျိုးများသည် ဘုရားသခင့်လူများနှင့် မည်သို့နေခွင့်ရလာသနည်း။

^၈ ဘုရားသခင်၏အမိန့်တော်အရ ယုတ်ညံ့သောလူမျိုးများရှိသည့် ကတိထားရာပြည်ကို ဣသရေလလူမျိုးများသိမ်းပိုက်စဉ် ယေရုရှလင်မြို့မြောက်ဘက်တွင်နေထိုင်သော ဂိဗောင်ခေါ်နိုင်ငံခြားသားများကို ဘုရားသခင်လွတ်မြောက်စေခဲ့သည်။ သူတို့သည် ယောရှုထံသို့ ပုံမှားရိုက်ထားသည့်သံတမန်များကိုစေလွှတ်ပြီး ငြိမ်းချမ်းရေးအတွက်အသနားခံခဲ့ကြသည်။ သူတို့၏ပရိယာယ်ပေါ်လာသောအခါ ယောရှုက ဂိဗောင်လူမျိုးများသည် “ပရိသတ်အပေါင်းတို့အဖို့နှင့် ယေဟောဝါ၏ယဇ်ပလ္လင်အတွက် ထင်းခွေ၊ ရေခပ်သူများဖြစ်ရမည်” ဟုစည်းမျဉ်းချမှတ်ခဲ့သည်။ (ယောရှု ၉:၃-၂၇) ယနေ့ မှီတင်းနေထိုင်သူများစွာတို့လည်း လူသစ်အဝင်ဖြစ်ရန် နှိမ့်ချစွာအမှုဆောင်ခြင်းတာဝန်များကို လက်ခံယူကြသည်။

၉။ ဣသရေလလူမျိုးအလယ် နိုင်ငံခြားသားများနှင့်ပတ်သက်၍ ရာခပ်နှင့်သူမ မိသားစု၏ပုံသက်သေက မည်သို့အားရှိဖွယ်ဖြစ်သနည်း။

^၉ နိုင်ငံခြားသားအုပ်စုလိုက်ကိုသာ ဘုရားသခင်လက်ခံကြိုဆိုခြင်းမဟုတ်ဘဲ တစ်ဦးချင်းတစ်ယောက်ချင်းကိုလည်း လက်ခံကြောင်းသိရခြင်းသည် သင့်အတွက်အားရှိစရာဖြစ်ပေမည်။ ယနေ့တိုင်းနိုင်ငံအချို့သည် လူမှုရေးအဆင့်အတန်းရှိသူ၊ ရင်းနှီးမြှုပ်နှံနိုင်သောကြွယ်ဝသူ၊ အဆင့်မြင့်ပညာတတ်သူများကိုသာ အခြေချနေထိုင်ခွင့်ပေးကြသည်။ ယခုကလေးတွင်ကျွန်ုပ်တို့မြင်ခဲ့ရသော ဂိဗောင်လူမျိုးများ၏အဖြစ်အပျက်မှာကဲ့သို့ပင် ယေဟောဝါမူကား ထိုသို့မဟုတ်ပါ။ ယင်းတို့အထဲတွင် လူမှုရေးအဆင့်အတန်းမြင့်မားမှုမရှိသော ခါနာန်လူမျိုးတစ်ဦးလည်းပါဝင်သည်။ ကျမ်းစာကသူမကို “ပြည်တန်ဆာရာခပ်” ဟုခေါ်သည်။ မှန်သောဘုရားသခင်ကို သူမ,ယုံကြည်ခြင်းကြောင့် ယေရိခေါမြို့ကျဆုံးသောအခါ သူမနှင့်သူမ၏အိမ်သားများလွတ်မြောက်ခဲ့ကြသည်။ ရာခပ်သည်နိုင်ငံခြားသားတစ်ဦးဖြစ်သော်လည်း ဣသရေလလူမျိုးများသည် သူမကိုလက်ခံခဲ့သည်။ သူမသည် ကျွန်ုပ်တို့တုပသင့်သည့် ယုံကြည်ခြင်းစံပြဖြစ်ခဲ့သည်။ (ဟေဗြဲ ၁၁:၃၀၊ ၃၁၊ ၃၉၊ ၄၀။ ယောရှု ၂:၁-၂၁။ ၆:၁-၂၅) သူမသည် မေရှိယ၏ဘိုးဘေးပင်ဖြစ်ခဲ့သည်။—မဿဲ ၁:၅၊ ၁၆။

၁၀။ ဣသရေလနိုင်ငံတွင် နိုင်ငံခြားသားများကိုလက်ခံခြင်းသည် မည်သည့်အပေါ်တွင်မူတည်သနည်း။

^၁၀ ဣသရေလလူမျိုးမဟုတ်သူများသည် မှန်သောဘုရားသခင်၏စိတ်တော်နှင့်တွေ့ရန် ကြိုးစားခဲ့ကြသောကြောင့် ကတိထားရာပြည်တော်တွင် သူတို့ကြိုဆိုခြင်းခံရကြသည်။ ဣသရေလလူမျိုးတို့သည် ယေဟောဝါကိုဝတ်မပြုသူများအား အထူးသဖြင့်ဘာသာရေးအရ မပေါင်းသင်းကြရန် တားမြစ်ခံရကြသည်။ (ယောရှု ၂၃:၆၊ ၇၊ ၁၂၊ ၁၃။ ၃ ဓမ္မရာဇဝင် ၁၁:၁-၈။ သု၊ ၆:၂၃-၂၈) သို့ရာတွင် ဣသရေလလူမျိုးမဟုတ်သော မှီတင်းနေထိုင်သူများစွာတို့သည် အခြေခံပညတ်များကိုလိုက်နာကြသည်။ အချို့တို့သည် အရေဖျားလှီးဘာသာပြောင်းဝင်သူများပင်ဖြစ်လာကြပြီး ယေဟောဝါသည် မိမိ၏လူစုအဝင်အဖြစ် သူတို့ကိုလက်ခံတော်မူသည်။—ဝတ်ပြုရာ ၂၀:၂။ ၂၄:၂၂။ တောလည်ရာ ၁၅:၁၄-၁၆။ တမန်တော် ၈:၂၇။a

၁၁၊ ၁၂။ (က) ဝတ်ပြုသူနိုင်ငံခြားသားများကို ဣသရေလလူမျိုးတို့မည်သို့ဆက်ဆံရသနည်း။ (ခ) ယေဟောဝါ၏ပုံသက်သေကိုတုပခြင်းတွင် ကျွန်ုပ်တို့အဘယ်ကြောင့်တိုးတက်ရမည်နည်း။

^၁၁ ဝတ်ပြုသူနိုင်ငံခြားသားများအားဘုရားသခင်ရှုမြင်ပုံကို ဣသရေလလူမျိုးများတုပရန် ကိုယ်တော်လမ်းညွှန်ခဲ့သည်။ “သင်နှင့်အတူနေသောဧည့်သည်ကို ကိုယ်အမျိုးသားချင်းကဲ့သို့မှတ်ရမည်။ ကိုယ်နှင့်အမျှချစ်ရမည်။ သင်တို့သည် အဲဂုတ္တု [အီဂျစ်] ပြည်၌ဧည့်သည်ဖြစ်ဖူးပြီ။” (ဝတ်ပြုရာ ၁၉:၃၃၊ ၃၄။ တရားဟောရာ ၁:၁၆။ ၁၀:၁၂-၁၉) ကျွန်ုပ်တို့သည် ပညတ်တရားအောက်၌မရှိစေကာမူ ယင်းသည် ကျွန်ုပ်တို့ကို သင်ခန်းစာပေးသည်။ အခြားလူမျိုး၊ အနွယ်၊ ယဉ်ကျေးမှုတို့ကို ကျွန်ုပ်တို့အထင်သေးပြီး မုန်းတီးသောအဖြစ်သို့ရောက်ရန် အလွန်လွယ်ကူသည်။ ထို့ကြောင့် ကျွန်ုပ်တို့မိမိကိုယ်ကိုကောင်းစွာမေးမြန်းသင့်သည်မှာ “ထိုငှဲ့ကွက်သည့်စိတ်ကို ကျွန်ုပ်ပယ်ရှားပြီး ယေဟောဝါ၏ပုံသက်သေကိုလိုက်နေပါသလော” ဟူ၍ဖြစ်သည်။

^၁၂ ဘုရားသခင်လက်ခံကြိုဆိုကြောင်း ဣသရေလလူမျိုးများတွင် မျက်မြင်သက်သေရှိကြသည်။ “ကိုယ်တော်၏လူဣသရေလအမျိုးမဟုတ်၊ တစ်ပါးအမျိုးသား [နိုင်ငံခြားသား၊ ကဘ ] တို့သည် . . . နာမတော်ကိုထောက်သဖြင့် ဝေးသောပြည်မှရောက်လာ၍ ဤအိမ်တော်ကိုမှီခိုလျက်ဆုတောင်းလျှင် ကျိန်းဝပ်တော်မူရာကောင်းကင်ဘုံမှ နားထောင်တော်မူပါ။ . . . မြေကြီးသားအပေါင်းတို့သည် ကြောက်ရွံ့လျက် နာမတော်ကိုသိစေခြင်းငှာ . . . ပြုတော်မူပါ” ဟုရှောလမုန်မင်းဆုတောင်းခဲ့သည်။—၃ ဓမ္မရာဇဝင် ၈:၄၁-၄၃။ ၂ ရာဇဝင်ချုပ် ၆:၃၂၊ ၃၃။

၁၃။ ဘုရားသခင်သည် ဣသရေလလူမျိုးများနှင့်ဆက်ဆံရေးပြောင်းလဲရန်အစီအစဉ်ကို အဘယ်ကြောင့်ပြုလုပ်ခဲ့သနည်း။

^၁၃ မေရှိယဆင်းသက်လာမည့်မျိုးဆက်ကို ကာကွယ်စောင့်ထိန်းမည့် မိမိလူမျိုးတော်အဖြစ် ဣသရေလလူမျိုးတို့ကို ယေဟောဝါဆက်လက်အသုံးပြုစဉ် ထူးခြားထင်ရှားသည့်ပြောင်းလဲမှုများဖြစ်မည့်အကြောင်းကို ဘုရားသခင်ကြိုပြောတော်မူခဲ့သည်။ ရှေးယခင်က ဣသရေလလူမျိုးများပညတ်ပဋိညာဉ်အောက်တွင်နေရန်သဘောတူခဲ့စဉ်က “မင်းစည်းစိမ်ရှိသောယဇ်ပုရောဟိတ်မျိုး၊ သန့်ရှင်းသောလူမျိုး” ဖြစ်ခွင့်ကို ဘုရားသခင်သူတို့အားပေးခဲ့သည်။ (ထွက်မြောက်ရာ ၁၉:၅၊ ၆) သို့ရာတွင် ဣသရေလလူမျိုးတို့သည် နှစ်ရာစုပေါင်းများစွာ သစ္စာမဲ့ကြောင်းပြသခဲ့ကြသည်။ ထို့ကြောင့် သူတို့၏အပြစ်နှင့်အမှားများမှခွင့်လွှတ်ခြင်းခံရကြရန် “ဣသရေလအမျိုး၏အိမ်တော်” အဖြစ်ဖွဲ့စည်းပါဝင်သောသူများအားဖြင့် ပဋိညာဉ်သစ်တစ်ခုကို ဖြစ်မြောက်စေတော်မူမည်အကြောင်း ယေဟောဝါကြိုပြောခဲ့သည်။ (ယေရမိ ၃၁:၃၃၊ ၃၄) ပဋိညာဉ်သစ်သည် လူများစွာကို အပြစ်မှသန့်စင်ပေးစေနိုင်သည့် ပူဇော်သက္ကာကိုပေးနိုင်သောမေရှိယကို စောင့်နေခဲ့သည်။—ဟေရှာယ ၅၃:၅-၇၊ ၁၀-၁၂။

ကောင်းကင်မှဣသရေလလူမျိုး

၁၄။ အဘယ် “ဣသရေလလူမျိုး” သစ်ကို ဘုရားသခင်လက်ခံခဲ့သနည်း။ အဘယ်သို့နည်း။

^၁၄ ဤအရာအားလုံးမည်သို့ပြည့်စုံလာသည်ကိုနားလည်ရန် ခရစ်ယာန်ဂရိကျမ်းစာက ကျွန်ုပ်တို့ကိုကူညီပေးသည်။ ယေရှုသည် မိမိသေခြင်းအားဖြင့် ပညတ်တရားကိုပြည့်စုံစေပြီး လုံးလုံးလျားလျားအပြစ်လွတ်ခြင်းကိုအခြေချခဲ့သော မေရှိယဖြစ်သည်။ လူတစ်ဦးသည် ထိုအကျိုးကိုခံစားရရန် ပကတိအရေဖျားလှီးသည့်ဂျူးတစ်ဦးဖြစ်ရန်မလိုပါ။ တမန်တော်ပေါလုက ပဋိညာဉ်သစ်အထဲတွင် “အတွင်းအားဖြင့် ယုဒလူဖြစ်သောသူသည် ယုဒလူမှန်၏။ အရေဖျားလှီးခြင်းလည်း ကျမ်းဟောင်းတရားအားဖြင့်မဟုတ်ဘဲ ဝိညာဉ်တော်တရားအားဖြင့် စိတ်နှလုံးနှင့်စပ်ဆိုင်၏” ဟုရေးခဲ့သည်။ (ရောမ ၂:၂၈၊ ၂၉၊ ၇:၆) ယေရှု၏ပူဇော်သက္ကာ၌ယုံကြည်ခြင်းတင်ပြသူများသည် အပြစ်လွှတ်ခြင်းခံရပြီး “ဘုရားသခင်၏ဣသရေလ” ဟုခေါ်သောဝိညာဏလူမျိုးအဖြစ်ဖွဲ့စည်းထားသည့် ‘ဝိညာဏဂျူး’ များအဖြစ် သူတို့ကိုဘုရားသခင်လက်ခံခဲ့သည်။—ဂလာတိ ၆:၁၆။

၁၅။ ဝိညာဏဣသရေလလူမျိုးတွင်ပါဝင်ရန်အတွက် ပင်ကိုယ်ဇာတိလူမျိုးသည်အဘယ်ကြောင့် အကြောင်းမဟုတ်သနည်း။

^၁၅ မှန်ပါသည်၊ ဝိညာဏဣသရေလလူမျိုးအဝင်ဖြစ်ရခြင်းသည် လူမျိုးတစ်မျိုးတစ်နွယ်နှင့်ဆိုင်သောနောက်ခံအပေါ်မူမတည်ပါ။ ယေရှု၏တမန်တော်များကဲ့သို့သော အချို့တို့သည်ဇာတိဂျူးများဖြစ်ကြသည်။ ရောမတပ်မှူးကော်နေလိကဲ့သို့သောအခြားသူများမူ အရေဖျားမလှီးသောတစ်ပါးအမျိုးသားများဖြစ်ကြသည်။ (တမန်တော် ၁၀:၃၄၊ ၃၅၊ ၄၄-၄၈) ဝိညာဏဣသရေလလူမျိုးနှင့်ပတ်သက်၍ “ဂရိသို့မဟုတ်ဂျူး၊ အရေဖျားလှီးသူသို့မဟုတ်မလှီးသူ၊ နိုင်ငံခြားသား၊ သကုသိလူ၊ ကျွန်၊ လူလွတ်မရှိ” ဟူ၍ပေါလုမှန်ကန်စွာပြောခဲ့သည်။ (ကောလောသဲ ၃:၁၁။ ကဘ ) ဘုရားသခင့်ဝိညာဉ်တော်အားဖြင့်ဘိသိက်ပေးခြင်းခံရသူတို့သည် “ရွေးချယ်တော်မူသောလူမျိုး၊ မင်းစည်းစိမ်ရှိသောယဇ်ပုရောဟိတ်၊ သန့်ရှင်းသောလူမျိုး၊ အထူးပိုင်ဆိုင်ရာလူမျိုး” များဖြစ်လာကြသည်။—၁ ပေတရု ၂:၉၊ ကဘ ။ ထွက်မြောက်ရာ ၁၉:၅၊ ၆ နှင့်နှိုင်းယှဉ်ပါ။

၁၆၊ ၁၇။ (က) ဝိညာဏဣသရေလလူမျိုးများသည် ဘုရားသခင်၏ရည်ရွယ်ချက်တွင် မည်သည့်ကဏ္ဍမှပါဝင်သနည်း။ (ခ) ဘုရားသခင်၏ဣသရေလလူမျိုးမဟုတ်သူများကို ထည့်စဉ်းစားရန်အဘယ်ကြောင့်သင့်လျော်သနည်း။

^၁၆ ဘုရားသခင့်ရည်ရွယ်တော်မူချက်တွင် ဝိညာဏဣသရေလလူမျိုးများအတွက် မည်သည့်အနာဂတ်ရှိသနည်း။ ယေရှုဤသို့အဖြေပေးထားသည်။ “သိုးစုငယ်၊ သင်တို့သည်မကြောက်ကြနှင့်။ သင်တို့အဘသည် သင်တို့အား နိုင်ငံကိုပေးခြင်းငှာအလိုတော်ရှိတော်မူ၏။” (လုကာ ၁၂:၃၂) “ကောင်းကင်တွင် နိုင်ငံသားဖြစ်ခွင့်ရှိ” သောဘိသိက်ခံများသည် သိုးသငယ်၏နိုင်ငံတော်အုပ်ချုပ်ရေးတွင် အမွေခံဖက်များဖြစ်ကြမည်။ (ဖိလိပ္ပိ ၃:၂၀၊ ကဘ ။ ယောဟန် ၁၄:၂၊ ၃။ ဗျာဒိတ် ၅:၉၊ ၁၀) ကျမ်းစာက ဤသူတို့သည် ‘ဣသရေလလူမျိုးများထဲမှ တံဆိပ်ခတ်ခြင်း’ ခံရသူများနှင့် “လူတို့အထဲကရွေးနှုတ်၍ ဘုရားသခင်နှင့်သိုးသငယ်အဖို့ အဦးသီးသောအသီး” ဟုဖော်ပြထားသည်။ သူတို့၏အရေအတွက်မှာ ၁၄၄၀၀၀ ဖြစ်သည်။ သို့သော်၊ ဤသူများကိုတံဆိပ်ခတ်ပြီးနောက် အခြားသောအုပ်စုတစ်စုကို ယောဟန်ဖော်ပြသည်။ ‘အသီးအသီးသောဘာသာစကားကိုပြောသော လူအမျိုးအနွယ်ခပ်သိမ်းတို့အထဲမှထွက်၍ အဘယ်သူမျှမရေတွက်နိုင်သောလူအုပ်ကြီး’ ဖြစ်သည်။—ဗျာဒိတ် ၇:၄၊ ၉။ ၁၄:၁-၄။

^၁၇ ‘ဝိညာဏဣသရေလလူမျိုးအဝင်မဟုတ်သည့် လူအုပ်ကြီးကဲ့သို့ကြီးစွာသောဒုက္ခကိုကပ်ကျော်မည့် သန်းပေါင်းများစွာသောသူတို့ကား မည်သို့နည်း’ ဟုအချို့သိလိုကြပေမည်။ ယနေ့ အနည်းငယ်သာကျန်တော့သည့် ဝိညာဏဣသရေလလူမျိုးများနှင့် သူတို့မည်သို့ပတ်သက်နေကြသနည်း။b

ပရောဖက်ပြုချက်မှနိုင်ငံခြားသားများ

၁၈။ ဗာဗုလုန်သုံ့ပန်းဘဝမှ ဣသရေလလူမျိုးများပြန်လာရန် မည်သည့်အရာကဖြစ်စေသနည်း။

^၁၈ ဣသရေလလူမျိုးများသည် ပညတ်ပဋိညာဉ်အောက်တွင်ရှိသော်လည်း ယင်းအပေါ်သစ္စာမစောင့်သိကြသောအချိန်ကိုပြန်ကြည့်လျှင် ဣသရေလလူမျိုးများကိုဗာဗုလုန်လူမျိုးများအားဖြင့်ဖျက်ဆီးရန် ဘုရားသခင်ဆုံးဖြတ်တော်မူခဲ့ကြောင်း ကျွန်ုပ်တို့တွေ့ရသည်။ ဘီစီအီး ၆၀၇ ခုနှစ်ရောက်သောအခါ ဣသရေလလူမျိုးများသည် အနှစ် ၇၀ ကြာ သုံ့ပန်းများဖြစ်ခဲ့ရကြသည်။ ထို့နောက် ဘုရားသခင်သည် လူမျိုးတော်ကို ပြန်လည်ဝယ်ယူခဲ့သည်။ အုပ်ချုပ်သူဇေရုဗဗေလ၏ဦးဆောင်မှုအားဖြင့် ဇာတိဣသရေလလူမျိုးအကြွင်းအကျန်သည် မိမိတို့၏ပြည်သို့ပြန်ခဲ့ကြသည်။ မေဒိ [မီးဒီးစ်] နှင့် ပေရသိ [ပါးရှား] ဘုရင်တို့သည် ဗာဗုလုန်ကိုဖျက်ဆီးပြီး ပြည်တော်ပြန်သူများကို ရိက္ခာအကူအညီများပင်ပေးခဲ့ကြသည်။ ဟေရှာယကျမ်းက ဤအဖြစ်အပျက်ကို ကြိုပြောထားသည်။ (ဟေရှာယ ၁:၁-၉။ ၃:၁-၂၆။ ၁၄:၁-၅။ ၄၄:၂၁-၂၈။ ၄၇:၁-၄) ဧဇရက ကျွန်ုပ်တို့အား ပြည်တော်ပြန်ခရီးစဉ်၏ အသေးစိတ်မှတ်တမ်းကို ပေးထားသည်။—ဧဇရ ၁:၁-၁၁၊ ၂:၁၊ ၂။

၁၉။ ဣသရေလလူမျိုးများပြန်လာလျှင် နိုင်ငံခြားသားများပါလာမည်နှင့်ပတ်သက်၍ အဘယ်ပရောဖက်ပြုဖော်ပြချက်ရှိသနည်း။

^၁၉ ပြန်လည်ဝယ်ယူခြင်းနှင့် ဘုရားသခင်၏လူမျိုးတော်ပြန်လာခြင်းကို ဟေရှာယကြိုတင်ဟောပြောရာတွင် တုန်လှုပ်ဖွယ်ဤပရောဖက်ပြုချက်ကိုပြုခဲ့သည်။ “တစ်ပါးအမျိုးသားတို့ [လူမျိုးများ၊ ကဘ] သည် သင်၏အလင်းသို့လည်းကောင်း၊ ရှင်ဘုရင်တို့သည် သင်၏ပေါ်ထွန်းခြင်းအရောင်သို့လည်းကောင်း လာကြလိမ့်မည်။” (ဟေရှာယ ၅၉:၂၀။ ၆၀:၃) ယင်းအချက်သည် ရှောလမုန်ဆုတောင်းချက်၌ပါသကဲ့သို့ လူမျိုးခြားတစ်ဦးစီအားကြိုဆိုလက်ခံခြင်းထက်မကပါ။ ဟေရှာယက ထူးခြားသောအခြေအနေအပြောင်းအလဲတစ်ခုကို ညွှန်ပြနေခဲ့ခြင်းဖြစ်သည်။ “လူမျိုးများ” သည် ဣသရေလလူမျိုးနှင့်အတူ အမှုဆောင်ကြလိမ့်မည်။ “တစ်ပါးအမျိုးသား [နိုင်ငံခြားသား၊ ကဘ] တို့သည် သင်၏မြို့ရိုးကိုတည်ကြလိမ့်မည်။ ရှင်ဘုရင်တို့သည်လည်း သင့်ကိုပြုစုကြလိမ့်မည်။ အကြောင်းမူကား၊ ငါသည်သင့်ကိုအမျက်ထွက်၍ဒဏ်ခတ်သော်လည်း စေတနာစိတ်နှင့်သနားဦးမည်။”—ဟေရှာယ ၆၀:၁၀။

၂၀၊ ၂၁။ (က) ဣသရေလလူမျိုးများအဖမ်းခံရရာမှပြန်လွတ်မြောက်လာခြင်းသည် အဘယ်ခေတ်သစ်ဆင်တူချက်များရှိသနည်း။ (ခ) နောက်ပိုင်းတွင် ‘သားများနှင့်သမီးများ’ သည် ဝိညာဏဣသရေလလူမျိုးနှင့် မည်သို့ပူးပေါင်းပါဝင်လာခဲ့ကြသနည်း။

^၂၀ ဣသရေလလူမျိုးများ ပြည်နှင်ခံရပြီး ပြည်တော်ပြန်ခြင်းတို့သည် ယခုခေတ်ရှိဝိညာဏဣသရေလလူမျိုးတို့နှင့် ဆင်တူသည့်အချက်များစွာရှိသည်။ ပထမကမ္ဘာစစ်မတိုင်မီက ဘိသိက်ခံခရစ်ယာန်အကြွင်းအကျန်တို့သည် ဘုရားသခင်၏အလိုတော်နှင့် အပြည့်အဝမညီညွတ်သေးချေ။ ခရစ်ယာန်ဘောင်ချာ့ချ်များမှပါလာသော အယူအဆနှင့်အကျင့်အကြံအချို့ကို လက်ကိုင်ထားဆဲဖြစ်ခဲ့သည်။ စစ်ဖြစ်ချိန်အတွင်းဖြစ်သောကြောင့်တစ်ကြောင်း၊ ဓမ္မဆရာတို့၏သွေးထိုးပေးမှုကြောင့်တစ်ကြောင်းတို့ကြောင့် ဝိညာဏဣသရေလလူမျိုးအကြွင်းအကျန်များမှဦးဆောင်သူတို့သည် မတရားထောင်ချခံခဲ့ကြရသည်။ စီအီး ၁၉၁၉ ခုနှစ်၌စစ်ကြီးပြီးသွားသောအခါ ပကတိအကျဉ်းထောင်ထဲတွင်ရောက်နေကြသော ထိုဘိသိက်ခံတို့သည် ထောင်မှလွတ်ပြီးတရားသေလွှတ်ခြင်းခံခဲ့ကြရသည်။ ယင်းက ဘုရားသခင့်လူများသည် မဟာဗာဗုလုန်၏အချုပ်အနှောင်မှ လွတ်မြောက်လာသည့်အထောက်အထားပင်ဖြစ်သည်။ ကိုယ်တော့်လူများသည် ဝိညာဏပရဒိသုကို ဆက်၍တည်ဆောက်ချဲ့ထွင်လာခဲ့ကြသည်။—ဟေရှာယ ၃၅:၁-၇၊ ၆၅:၁၃၊ ၁၄။

^၂၁ ယင်းကို ဟေရှာယ၏ဖော်ပြချက်၌ရည်ညွှန်းထားသည်။ “ခပ်သိမ်းသောသူတို့သည်စုဝေး၍ သင့်ထံသို့လာကြ၏။ သင်၏သားသမီးတို့သည် အဝေးကလာ၍ သင်၏အနားမှာမွေးစားခြင်းကို ခံကြလိမ့်မည်။ ထိုအခါသင်သည် ကြောက်ရွံ့ခြင်းနှင့်ရွှင်လန်းခြင်းရှိလိမ့်မည်။ နှလုံးတုန်လှုပ်၍ ဝမ်းမြောက်လိမ့်မည်။ အကြောင်းမူကား၊ သမုဒ္ဒရာ၏ကြွယ်ဝခြင်းသည် သင့်ဘက်သို့ပြောင်းလဲ၍ တစ်ပါးအမျိုးသားတို့ [လူမျိုးများ၊ ကဘ] ၏စည်းစိမ်သည် သင့်လက်သို့ရောက်လိမ့်မည်။” (ဟေရှာယ ၆၀:၄၊ ၅) ထိုနောက်ပိုင်းဆယ်စုနှစ်များအတွင်း ‘သားများနှင့်သမီးများ’ သည် ဝိညာဏဣသရေလလူမျိုး၏အပြီးသတ်နေရာများကိုရယူရန် ဝိညာဉ်တော်နှင့်ဘိသိက်ခံခြင်းအားဖြင့် ဆက်၍ဝင်ရောက်လာကြသည်။

၂၂။ “နိုင်ငံခြားသားများ” သည် ဝိညာဏဣသရေလလူမျိုးများနှင့် မည်သို့အတူတကွအလုပ်လုပ်လာကြသနည်း။

^၂၂ ‘သင်၏မြို့ရိုးကိုတည်ကြမည့် နိုင်ငံခြားသားများကား’ မည်သို့နည်း။ ယင်းလည်း ကျွန်ုပ်တို့ခေတ်တွင် ဖြစ်ပေါ်လျက်ရှိသည်။ ၁၄၄,၀၀၀ ကိုခေါ်တော်မူခြင်း ပြီးပြည့်စုံသွားသောအခါ လူမျိုးအားလုံးထဲမှ ကြီးစွာသောလူအုပ်ကြီးသည် ဝိညာဏဣသရေလလူမျိုးနှင့်အတူဝတ်ပြုရန် စတင်စုရုံးလာကြသည်။ ဤလူသစ်များသည် မြေကြီးပရဒိသုတွင်ထာဝရအသက်ရှင်ရန် ကျမ်းစာအခြေပြုသည့်မျှော်လင့်ချက်ကိုရရှိထားကြသည်။ အဆုံးတွင်သူတို့၏သစ္စာရှိအမှုဆောင်ရမည့်နေရာကွာခြားမည်ဖြစ်သော်လည်း ဘိသိက်ခံအကြွင်းအကျန်များကို ဘုရားသခင့်နိုင်ငံတော်သတင်းကောင်းဟောပြောခြင်း၌ ဝမ်းမြောက်ဝမ်းသာကူညီပေးကြသည်။—မဿဲ ၂၄:၁၄။

၂၃။ “နိုင်ငံခြားသားများ” သည် ဘိသိက်ခံများကို မည်သည့်အတိုင်းအတာအထိ ကူညီခဲ့ကြသနည်း။

^၂၃ ယနေ့ ၄,၀၀၀,၀၀၀ ကျော်သော “နိုင်ငံခြားသားများ” သည် ‘ကောင်းကင်နိုင်ငံသားဖြစ်ခွင့်’ ရသူအကြွင်းအကျန်တို့နှင့်အတူ ယေဟောဝါကိုဝတ်ပြုနေကြကြောင်း သက်သေထူနေကြသည်။ သူတို့ထဲမှ များစွာသောယောက်ျားနှင့်မိန်းမများ၊ ပျိုရွယ်သူနှင့်အသက်ကြီးသူများတို့သည် ရှေ့ဆောင်များအဖြစ် အချိန်ပြည့်အမှုတော်ဆောင်နေကြသည်။ ၆၆,၀၀၀ ကျော်ရှိအသင်းတော်အများစုတွင် ထိုလူမျိုးခြားများသည် အကြီးအကဲများ၊ ဓမ္မအမှုထမ်းများအဖြစ် တာဝန်ထမ်းဆောင်နေကြသည်။ “တစ်ပါးအမျိုးသား [ဧည့်သည်၊ ကဘ] တို့သည် ရပ်လျက် သင်တို့၏သိုးစုများကိုထိန်းကျောင်းကြလိမ့်မည်။ တစ်ကျွန်းတစ်နိုင်ငံသားတို့သည် သင်တို့အဖို့လယ်လုပ်၍ စပျစ်ဥယျာဉ်ကိုလည်းပြုစုကြလိမ့်မည်” ဟူသည့်ဟေရှာယ၏စကားများ ဤသို့ပြည့်စုံလာသည်ကို မြင်သောအကြွင်းအကျန်တို့သည် ဝမ်းမြောက်ကြသည်။—ဟေရှာယ ၆၁:၅။

၂၄။ အတိတ်က ဣသရေလလူမျိုး၊ အခြားလူမျိုးများနှင့်ဘုရားသခင်ဆက်ဆံပုံသည် အဘယ်ကြောင့်ကျွန်ုပ်တို့အတွက်အားရှိစရာဖြစ်စေသနည်း။

^၂၄ ထို့ကြောင့်သင်သည် မြေကြီးပေါ်ရှိ မည်သည့်နိုင်ငံသား၊ မှီတင်းနေထိုင်သူ သို့မဟုတ် ခိုလှုံသူပင်ဖြစ်ပါစေ အနန္တတန်ခိုးရှင်လှိုက်လှဲစွာကြိုဆိုလက်ခံသည့် ဝိညာဏနိုင်ငံခြားသားအဝင် ဖြစ်ရသည့်အခွင့်ထူးကြီးသင်၌ရှိသည်။ ကိုယ်တော်၏ကြိုဆိုလက်ခံခြင်းတွင် ယခုနှင့်အနာဂတ်ထာဝစဉ်လုပ်ဆောင်သွားရမည့် အမှုတော်ဆောင်အခွင့်ထူးများပါဝင်သည်။

[အောက်ခြေမှတ်ချက်များ]

သင်သတိထားမိသလော

▫ လူမျိုးအားလုံးထဲမှလူများ လက်ခံကြိုဆိုခြင်းခံရမည်ဟူသောမျှော်လင့်ချက်ကို မည်သည့်နည်းဖြင့်ဘုရားသခင်ပေးခဲ့သနည်း။

▫ ဘုရားသခင်၏အထူးလူမျိုးတော်ဣသရေလအပြင် အခြားလူမျိုးများလည်းကိုယ်တော်ထံချဉ်းကပ်နိုင်ကြောင်း မည်သည့်အချက်ကဖော်ပြသနည်း။

▫ နိုင်ငံခြားသားများသည် ဣသရေလလူမျိုးများနှင့်ပေါင်းသင်းလာမည်ဖြစ်ကြောင်း ပရောဖက်ပြုချက်တွင် ဘုရားသခင်မည်သို့ညွှန်ပြသနည်း။

▫ ဗာဗုလုန်ရောက်ဣသရေလလူမျိုးများပြန်လာခြင်းနှင့် မည်သည့်ဆင်တူချက်ရှိသနည်း။ “နိုင်ငံခြားသား”များမည်သို့ပါဝင်လာကြသနည်း။