‘သင်၏အဖိုးထိုက်သောအရာများဖြင့် ယေဟောဝါအား ဂုဏ်ပြုလော့’ —မည်သို့နည်း

“သင်၏ အဖိုးထိုက်သောအရာများနှင့် အဦးသီးသောအသီးအနှံရှိသမျှတို့ဖြင့် ယေဟောဝါအား ဂုဏ်ပြုလော့။” လွန်ခဲ့သောနှစ်ပေါင်း ၂,၆၀၀ ခန့်ကရေးသားခဲ့သည့် ဤပညာရှိမှုတ်သွင်းခံစကားများတွင် ယေဟောဝါ၏ကောင်းချီးများ အလျှံပယ်ခံစားရရန် သော့ချက်ပါရှိသည်။ အကြောင်းမှာ ကျမ်းရေးသူက ဤသို့ညွှန်ပြသည်– “သို့ပြုလျှင်၊ သင်၏စပါးကျီတို့သည် ကြွယ်ဝ၍ စပျစ်သီးနယ်ရာတန်ဆာတို့ကို အသစ်သောစပျစ်ရည်လျှံလိမ့်မည်။”—သု. ၃:၉၊ ကဘ၊ ၁၀။

သို့သော် ဘုရားသခင်အား ဂုဏ်ပြုခြင်းဟူသည် မည်သည့်အဓိပ္ပာယ်ရှိသနည်း။ ယေဟောဝါအား ဂုဏ်ပြုရန် ကျွန်ုပ်တို့၌ရှိသည့် အဖိုးထိုက်သောအရာများကား အဘယ်နည်း။ ယင်းနှင့် ကျွန်ုပ်တို့ မည်သို့ဂုဏ်ပြုမည်နည်း။

‘ယေဟောဝါအား ဂုဏ်ပြုလော့’

ကျမ်းစာတွင် ဂုဏ်ပြုခြင်းအတွက် အဓိကဟေဗြဲစာလုံး ကာဗွောဒ်ဟ် (ka·vohdh’‏) သည် စာသားအတိုင်းဆိုလျှင် “လေးလံခြင်း” ဟူ၍အဓိပ္ပာယ်ရသည်။ ထို့ကြောင့် ဂုဏ်ပြုခံရသူ သို့မဟုတ် သူမအား အချိန်စီးသူ၊ စိတ်စွဲမှတ်စေသူ၊ အရေးပါအရာရောက်သူအဖြစ် ယူမှတ်လေ့ရှိကြသည်။ “ဂုဏ်ပြု” အတွက် အခြားဟေဗြဲစာလုံး ရည်ကား (yeqar’‏) ကို “အဖိုးထိုက်သော” နှင့် “အဖိုးထိုက်သောအရာများ” ဟူ၍လည်းပြန်ဆိုထားသည်။ ထိုနည်းတူ သမ္မာကျမ်းစာတွင် “ဂုဏ်ပြု” ဟူ၍ဘာသာပြန်ဆိုသည့် ဂရိစာလုံးမှာ တိမဲ (ti·me’‏) ဖြစ်ပြီး ကြည်ညိုခြင်း၊ လေးမြတ်ခြင်း၊ အဖိုးထိုက်ခြင်းဟူသော အဓိပ္ပာယ်ရသည်။ ထို့ကြောင့် လူတစ်ဦးသည် အခြားသူတစ်ဦးအား အလွန်ရိုသေလေးစားမှုပြခြင်းအားဖြင့် ဂုဏ်ပြုတတ်ကြသည်။

ဂုဏ်ပြုခြင်းတွင် အခြားရှုထောင့်လည်းရှိသေးသည်။ တစ်ခါက ရှေးခေတ်ပါးရှားရှင်ဘုရင် အာရွှေရုအား လုပ်ကြံမည့်အကြံအစည်ကို ဖော်ထုတ်ခဲ့သူ သစ္စာရှိယုဒအမျိုးသား မော်ဒကဲနှင့်ပတ်သက်သော အကြောင်းအရာကို သုံးသပ်ကြည့်ပါ။ နောက်ပိုင်း၌ မော်ဒကဲ၏လုပ်ဆောင်မှုအတွက် သူ့ကိုဂုဏ်ပြုဖို့ ဘာမျှမလုပ်ဆောင်ပေးသေးကြောင်း ဘုရင်သိရှိခဲ့သောအခါ နန်းရင်းဝန်ဟာမန်ကို ဘုရင်မင်းနှစ်သက်သူအား အကောင်းဆုံးမည်သို့ဂုဏ်ပြုရမည်အကြောင်း မေးမြန်းခဲ့သည်။ ဟာမန်သည် ဤဂုဏ်ပြုခံရသူမှာ မိမိဖြစ်မည်ကို ထင်မြင်ခဲ့သော်လည်း သူ၏ထင်မြင်ပုံသည် မှားလိုက်လေခြင်း! မည်သို့ဆိုစေ၊ ဟာမန်က ထိုသူအား “မင်းမြောက်တန်ဆာ” ဝတ်ဆင်စေပြီး “စီးတော်မြင်း” ကိုစီးစေသင့်ကြောင်း လျှောက်တင်ခဲ့သည်။ နိဂုံးချုပ်အနေနှင့် သူက ထိုသူအား “မြင်းတော်ကို စီးစေပြီးလျှင် မြို့တော်လမ်းမ၌ ဆောင်သွားလျက် ရှင်ဘုရင်ချီးမြှောက်ခြင်းငှာ အလိုတော်ရှိသောသူ၌ ဤသို့ပြုရသည်ဟု သူ့ရှေ့မှာကြွေးကြော်ပါစေ” ဟုလျှောက်တင်၏။ (ဧသတာ ၆:၁-၉) ဤအဖြစ်အပျက်၌ လူတစ်ဦးကို ဂုဏ်ပြုရာတွင် လူသားအားလုံးက သူ့အား အလွန်ကြည်ညိုလေးစားကြဖို့အလိုငှာ လူသိရှင်ကြားချီးမြှောက်ခြင်းပါဝင်သည်။

ထိုနည်းတူစွာ ယေဟောဝါအား ဂုဏ်ပြုခြင်းတွင် ရှုထောင့်နှစ်မျိုးရှိသည်– ကိုယ်တိုင်ကိုယ်ကျ ကိုယ်တော့်ကို အလွန်ရိုသေလေးစားမှုပြခြင်းနှင့် ကိုယ်တော့်နာမတော်ကို လူထုရှေ့ကြေညာခြင်းလုပ်ငန်းတော်တွင် ပါဝင်ခြင်းနှင့်ထောက်ပံ့ပေးခြင်းဖြင့် လူသိရှင်ကြားချီးမွမ်းခြင်းတို့ဖြစ်သည်။

“သင်၏အဖိုးထိုက်သောအရာများ” —ယင်းတို့ကားအဘယ်နည်း

ကျွန်ုပ်တို့၏အဖိုးထိုက်သောအရာများထဲတွင် ကျွန်ုပ်တို့၏အသက်၊ အချိန်၊ အစွမ်းအစများနှင့် ခွန်အားတို့ပါဝင်မည်မှာ သေချာပါသည်။ ကျွန်ုပ်တို့၏ ရုပ်ပစ္စည်းပိုင်ဆိုင်ရာများကော အသို့နည်း။ ဆင်းရဲသောမုဆိုးမက အလွန်အဖိုးနည်းသောကြေးနီဒ င်္ဂါးနှစ်ပြားကို ဗိမာန်တော်ဘဏ္ဍာတိုက်ထဲသို့ သွင်းချသည်ကို ယေရှုမြင်ခဲ့သောအခါ ကိုယ်တော်ပြောသောစကားတော်ကို သုံးသပ်ကြည့်ပါ။ ကိုယ်တော်က ဤသို့မိန့်တော်မူခဲ့သည်– “ထိုဆင်းရဲသောမုဆိုးမသည် အခြားသောသူအပေါင်းထက်သာ၍သွင်းချပြီ။ အကြောင်းမူကား၊ ထိုသူအပေါင်းတို့သည် မိမိတို့ကြွယ်ဝသော စည်းစိမ်ထဲကနုတ်၍ ဘုရားသခင်၏အလှူတော်စုထဲသို့ သွင်းချကြ၏။ ထိုမိန်းမမူကား၊ အလွန်ဆင်းရဲလျက်ပင် မိမိအသက်မွေးစရာဥစ္စာရှိသမျှကို သွင်းချလေပြီဟုမိန့်တော်မူ၏။” (လုကာ ၂၁:၁-၄) ဤမုဆိုးမသည် ယေဟောဝါ၏ဝတ်ပြုမှုကို မြှင့်တင်ပေးဖို့ သူမ၏ရုပ်ပစ္စည်းပိုင်ဆိုင်ရာများကို အသုံးပြုခြင်းအတွက် သူမကို ယေရှုချီးမွမ်းခဲ့သည်။

ထိုသို့ဆိုလျှင် ရှောလမုန်ဖော်ပြခဲ့သော အဖိုးထိုက်သောအရာများထဲတွင် ကျွန်ုပ်တို့တွင်ရှိနိုင်မည့် ရုပ်ပစ္စည်းပိုင်ဆိုင်ရာအချို့လည်း ပါဝင်သည်မှာရှင်းနေပါသည်။ “အဦးသီးသောအသီးအနှံရှိသမျှ” ဟူသောဖော်ပြချက်သည် ယေဟောဝါအား ကျွန်ုပ်တို့၏တန်ဖိုးရှိသောအရာများထဲမှ အကောင်းဆုံးကိုပေးခြင်းဖြစ်သည်ဟု အဓိပ္ပာယ်ရသည်။

သို့သော် ဘုရားသခင်ကို ပစ္စည်းဥစ္စာများပေးခြင်းသည် မည်သို့ဂုဏ်ပြုနိုင်သနည်း။ အရာအားလုံးသည် ကိုယ်တော်ပိုင်ဆိုင်နှင့်ပြီးသား အရာများမဟုတ်လော။ (ဆာလံ ၅၀:၁၀; ၉၅:၃-၅) ဒါဝိဒ်မင်းကြီးသည် ယေဟောဝါအား လှိုက်လှိုက်လှဲလှဲဆုတောင်းရာတွင် “ခပ်သိမ်းသောအရာသည် အထံတော်မှဖြစ်ပါ၏” ဟုဝန်ခံခဲ့သည်။ ဒါဝိဒ်နှင့်သူ၏လူတို့သည် ဗိမာန်တော်ဆောက်လုပ်ရေးအတွက် အလှူငွေများစွာလှူဒါန်းရာတွင် မင်းကြီးက “ကိုယ်တော်၏ဥစ္စာထဲကသာ ကိုယ်တော်အားပေးလှူပါ၏” ဟုမြွက်ဆိုခဲ့သည်။ (၁ ရာဇဝင်ချုပ် ၂၉:၁၄၊ သမ္မာ) ထို့ကြောင့် ကျွန်ုပ်တို့သည် ယေဟောဝါအား လက်ဆောင်များဆက်သသောအခါတွင် ကိုယ်တော်၏ကောင်းမြတ်သောနှလုံးဖြင့် ပေးထားသောအရာများထဲမှ ပြန်လည်ဆက်သခြင်းမျှသာဖြစ်သည်။ (၁ ကောရိန္သု ၄:၇) သို့သော် အထက်တွင်ဖော်ပြသကဲ့သို့ ယေဟောဝါအား ဂုဏ်ပြုရာတွင် အခြားသူများ၏ရှေ့မှောက်မှာ ကိုယ်တော်ကို ချီးမွမ်းခြင်းပါဝင်သည်။ စစ်မှန်သောဝတ်ပြုမှုတိုးတက်ဖို့အတွက် ဥစ္စာပစ္စည်းများအသုံးပြုခြင်းသည် ဘုရားသခင်ကို ဂုဏ်ပြုရာရောက်၏။ ယေဟောဝါအား ဤနည်းဖြင့် ဂုဏ်ပြုသောထူးခြားသည့်ပုံနမူနာများ ကျမ်းစာတွင်ပါရှိသည်။

အတိတ်မှ ပုံနမူနာများ

လွန်ခဲ့သောနှစ်ပေါင်း ၃,၅၀၀ ခန့်က ဣသရေလလူများအတွက် ယေဟောဝါကို ဝတ်ပြုကိုးကွယ်ဖို့နေရာအဖြစ် တောကန္တာရတွင် တဲတော်ဆောက်လုပ်ရန် အချိန်ရောက်လာသောအခါ ဘုရားသခင်ပေးသောပုံစံအရ တန်ဖိုးရှိပစ္စည်းအမျိုးမျိုးလိုအပ်လာခဲ့သည်။ ယေဟောဝါက မောရှေကို ‘ကြည်ညိုသော စေတနာစိတ်ရှိသမျှသောသူတို့သည် . . . ယေဟောဝါအားလှူသောအလှူကိုဆောင်ခဲ့ကြစေ’ မှာထားတော်မူသည်။ (ထွက်မြောက်ရာ ၃၅:၅၊ ၉၊ သမ္မာ) မှတ်တမ်းက ဆက်လက်ပြီး ဤသို့ဖော်ပြသည်– “မိမိစိတ်နှလုံးနှိုးဆော်သောသူ၊ စေတနာစိတ်ထက်သန်သောသူအပေါင်းတို့သည် တွေ့ဆုံရာတဲတော်လုပ်ဖို့လည်းကောင်း၊ အမှုတော်ဆောင်ရွက်စရာရှိသမျှဖို့လည်းကောင်း၊ သန့်ရှင်းသောအဝတ်ဖို့လည်းကောင်း ထာဝရဘုရားအားလှူရသောအလှူဝတ္ထုကို ဆောင်လျက်လာကြ၏။” (ထွက်မြောက်ရာ ၃၅:၂၁၊ သမ္မာ) အမှန်အားဖြင့် သူတို့၏စေတနာစိတ်နှင့်လှူသောအလှူသည် လူများ၏ “အလှူဆောင်ခြင်းအမှုကို ဆီးတားရ” သည့်အထိ အလုပ်အတွက် လိုအပ်သည်ထက်ပို၍ပင် ရလာခဲ့သည်။—ထွက်မြောက်ရာ ၃၆:၅၊ ၆။

နောက်ပုံနမူနာကိုလည်း သုံးသပ်ကြည့်ပါ။ တဲတော်၏အခန်းကဏ္ဍပြီးဆုံးပြီးနောက်ပိုင်း ဗိမာန်တော်တည်ဆောက်ရန်ပြင်ဆင်သောအခါ မိမိ၏သားရှောလမုန်တည်ဆောက်မည့် ဗိမာန်တော်အတွက် ဒါဝိဒ်ကိုယ်တိုင် အလှူငွေများပြားစွာထည့်ဝင်ခဲ့ပါသည်။ အခြားသူများလည်း ပါဝင်ကြဖို့ ဆင့်ခေါ်ချက်ကို ထုတ်ပြန်လိုက်သောအခါ လူများတို့သည် ယေဟောဝါအတွက် အဖိုးတန်သောလက်ဆောင်များကို ယူဆောင်လာခဲ့ကြသည်။ ငွေနှင့်ရွှေကပင် ကာလတန်ဖိုး ၅၀ ဘီလီယံခန့်ရှိပေမည်။ “လူများတို့သည် . . . ထက်သန်သောစေတနာစိတ်ရှိ၍ . . . လှူဒါန်းသောကြောင့် ဝမ်းမြောက်ကြ၏။”—၁ ရာဇဝင်ချုပ် ၂၉:၃-၉၊ သမ္မာ; ၂ ရာဇဝင်ချုပ် ၅:၁။

ကျွန်ုပ်တို့ခေတ်တွင် ‘စေတနာစိတ်ဖြင့်လှူသောအလှူ’

ကျွန်ုပ်တို့ခေတ်တွင် စေတနာစိတ်နှင့်လှူခြင်းဖြင့် ရွှင်လန်းမှုတွင် မည်သို့ပါဝင်နိုင်သနည်း။ ယခုအချိန်၌ ကမ္ဘာပေါ်တွင် ဆက်လက်လုပ်ဆောင်လျက်ရှိသော အရေးကြီးဆုံးလုပ်ငန်းမှာ ဘုရားသခင့်နိုင်ငံတော်ဟောပြောခြင်းနှင့် တပည့်ဖြစ်စေခြင်းလုပ်ငန်းဖြစ်သည်။ (မဿဲ ၂၄:၁၄; ၂၈:၁၉၊ ၂၀; တမန်တော် ၁:၈) ယေဟောဝါသည် မိမိ၏သက်သေများအား မြေကြီးဆိုင်ရာ ဘုရားသခင့်နိုင်ငံတော်အကျိုးစီးပွားကို အပ်နှင်းဖို့ သင့်လျော်ကြောင်း သိမြင်တော်မူသည်။—ဟေရှာယ ၄၃:၁၀။

ယနေ့ ယေဟောဝါသက်သေများ လုပ်ကိုင်လျက်ရှိသော လုပ်ငန်းတော်တွင် ငွေရေးကြေးရေးထောက်ပံ့မှုလိုအပ်နေသည်မှာ သိသာထင်ရှားပါသည်။ ဘုရားသခင့်နိုင်ငံတော်ခန်းမများ၊ အစည်းအဝေးခန်းမများ၊ ဌာနခွဲရုံးများ၊ စက်ရုံများနှင့် ဗေသလအိမ်များ ဆောက်လုပ်မှုနှင့်ပြုပြင်ထိန်းသိမ်းမှုတို့တွင် ငွေလိုအပ်ပါသည်။ အသီးသီးဘာသာစကားဖြင့် ကျမ်းစာနှင့် ကျမ်းစာကိုအခြေခံသော စာအုပ်စာတမ်းများ ထုတ်ဝေခြင်းနှင့် ဖြန့်ဖြူးခြင်းတွင် စရိတ်စကလိုအပ်သည်။ ဤအဖွဲ့အစည်းဆိုင်ရာ စရိတ်စကများကို မည်သို့ရရှိသနည်း။ ထက်သန်သောစေတနာစိတ်နှင့် လှူသောအလှူအားဖြင့် ဖြစ်ပါသည်တကား!

အလှူငွေအများစုကို ဥစ္စာအသင့်အတင့်သာရှိသည့်—ယေရှုသတိပြုမိသည့် မုဆိုးမကဲ့သို့သော—သူများထံမှရရှိ၏။ သူတို့သည် ယေဟောဝါအား ဂုဏ်ပြုရာရောက်သော ဤကဏ္ဍကို လက်လွတ်မခံလိုရကား “တတ်နိုင်သမျှ” ငွေကြေးအနည်းအကျဉ်းကို လှူဒါန်းကြ၊ တစ်ခါတစ်ရံတွင် “တတ်နိုင်သမျှထက်မက” ပင်လှူဒါန်းကြသည်။—၂ ကောရိန္သု ၈:၃၊ ၄။

“အသီးသီးတို့သည် ပူပန်စွာ၊ မလွှဲသာစွာမဟုတ်၊ စိတ်ပြဋ္ဌာန်းပြီးသည့်အတိုင်းလှူစေ။ ဘုရားသခင်သည် ရွှင်လန်းစွာပေးကမ်းသူကို နှစ်သက်တော်မူ၏” ဟုတမန်တော်ပေါလုက ကောရိန္သုရှိခရစ်ယာန်တို့ကို ပြောခဲ့သည်။ (၂ ကောရိန္သု ၉:၇၊ သမ္မာ) ရွှင်လန်းစွာ လှူဒါန်းဖို့အတွက် ကောင်းစွာစီစဉ်ထားခြင်း လိုအပ်သည်။ ပေါလုက ဆက်ပြီး “ငါရောက်လာသောအခါ လှူဒါန်း၍ စုထားစရာမရှိစေခြင်းငှာ၊ ခုနစ်ရက်နေ့တွင် ပထမနေ့ရက်၌ အသီးသီးကောင်းစားသည်အတိုင်း၊ မိမိတို့ဥစ္စာတစ်ဖို့ကို ထုတ်၍စုထားကြလော့” ဟုဆိုခဲ့သည်။ (၁ ကောရိန္သု ၁၆:၂) ထိုနည်းတူစွာ၊ ယနေ့ ဘုရားသခင့်နိုင်ငံတော်လုပ်ငန်းတိုးချဲ့ရေးအတွက် တစ်ဦးချင်းအနေနှင့် စေတနာစိတ်ဖြင့်လှူဒါန်းလိုသူများသည် ထိုရည်ရွယ်ချက်အတွက် မိမိတို့ဝင်ငွေအချို့ကို ဖယ်ထားနိုင်သည်။

ယေဟောဝါအား ဂုဏ်ပြုသူများကို ကိုယ်တော် ကောင်းချီးပေး

ရုပ်ပစ္စည်းကြွယ်ဝချမ်းသာခြင်းကိုယ်နှိုက်က ဝိညာဉ်ရေးကြွယ်ဝချမ်းသာခြင်းကို မဖြစ်စေသော်လည်း ယေဟောဝါအား ဂုဏ်ပြုဖို့ ကျွန်ုပ်တို့၏အဖိုးတန်အရာများ—အချိန်၊ ခွန်အားနှင့် ရုပ်ပစ္စည်းများ—ကိုရက်ရက်ရောရော အသုံးပြုလျှင် ကြွယ်ဝသောကောင်းချီးများ ခံစားရပေမည်။ ယင်းသို့ဖြစ်ရခြင်းမှာ ဘုရားသခင်သည် ကျွန်ုပ်တို့ကို ဤသို့အခိုင်အမာမိန့်တော်မူထားသောကြောင့်ဖြစ်သည်– “စွန့်ကြဲတတ်သောသူသည် ကြွယ်ဝလိမ့်မည်။ သူတစ်ပါးကို ရေလောင်းသောသူသည် ကိုယ်တိုင်ရေလောင်းခြင်းအကျိုးကို ခံရလိမ့်မည်။”—သု. ၁၁:၂၅။

ဒါဝိဒ်မင်းကြီးကွယ်လွန်ပြီးနောက် သားတော်ရှောလမုန်သည် ခမ်းနားထည်ဝါသောဗိမာန်တော်တည်ဆောက်ဖို့ မိမိ၏ခမည်းတော် စုဆောင်းခဲ့သည့် စေတနာစိတ်ဖြင့်လှူသောအလှူငွေများကို ယေဟောဝါညွှန်ကြားသည့်အတိုင်း အသုံးပြုခဲ့သည်။ ရှောလမုန်သည် ဘုရားသခင်ကို သစ္စာရှိရှိဝတ်ပြုနေခဲ့သမျှကာလပတ်လုံး “ယုဒအမျိုးနှင့် ဣသရေလအမျိုးသားတို့သည် ဒန်မြို့မှစ၍ ဗေရရှေမြို့တိုင်အောင် . . . ငြိမ်ဝပ်စွာနေရကြ၏။” (၃ ဓမ္မရာဇဝင် ၄:၂၅) ဣသရေလလူမျိုးတို့သည် ‘မိမိတို့၏ အဖိုးတန်အရာများနှင့် ယေဟောဝါအား ဂုဏ်ပြု’ နေသမျှကာလပတ်လုံး သူတို့၏ သိုလှောင်ခန်းတို့သည် ပြည့်လျှံကာ စပျစ်သီးနယ်ရာတန်ဆာတို့လည်း ပြည့်လျှံနေခဲ့ပါသည်။

နောက်ပိုင်းတွင် ပရောဖက်မာလခိအားဖြင့် ယေဟောဝါဤသို့မိန့်တော်မူခဲ့သည်– “ငါသည် မိုးကောင်းကင်ပြတင်းပေါက်တို့ကိုဖွင့်၍ ကောင်းချီးမင်္ဂလာကို အကုန်အစင်သွန်းလောင်းမည်၊ မသွန်းလောင်းမည်ကို ထိုသို့စုံစမ်းကြလော့ဟု ကောင်းကင်ဗိုလ်ခြေအရှင်ထာဝရဘုရားမိန့်တော်မူ၏။” (မာလခိ ၃:၁၀) ယနေ့ ယေဟောဝါ၏ကျေးကျွန်များ မွေ့လျော်နေကြသော ဝိညာဉ်ရေးကောင်းစားမှုက ဘုရားသခင်ကတိတည်ကြောင်း သက်သေထင်ရှားပြနေပေသည်။

ဘုရားသခင့်နိုင်ငံတော် အကျိုးစီးပွားတိုးတက်ခြင်းတွင် ကျွန်ုပ်တို့၏အပိုင်းကို ကျွန်ုပ်တို့လုပ်ဆောင်သောအခါ ယေဟောဝါအမှန်ပင် အားရကျေနပ်တော်မူ၏။ (ဟေဗြဲ ၁၃:၁၅၊ ၁၆) ကျွန်ုပ်တို့သည် “ဘုရားသခင်၏နိုင်ငံတော်နှင့် ဖြောင့်မတ်ခြင်းတရားတော်ကို ရှေ့ဦးစွာရှာကြ” လျှင်ကျွန်ုပ်တို့အားထောက်မဖို့ ကိုယ်တော်ကတိပြုထားသည်။ (မဿဲ ၆:၃၃) ကြီးစွာသောရွှင်လန်းခြင်းနှလုံးနှင့် ‘ကျွန်ုပ်တို့၏ အဖိုးတန်အရာများဖြင့် ယေဟောဝါအား ဂုဏ်ပြု’ နိုင်ကြပါစေ။

[စာမျက်နှာ ၂၈ ပါ လေးထောင့်ကွက်]

လူအချို့စိတ်စေတနာဖြင့် ပေးကမ်းနည်းများ ကမ္ဘာချီလုပ်ငန်းအတွက် ပါဝင်လှူဒါန်းခြင်း

များစွာသောသူတို့သည် “ကမ္ဘာချီလုပ်ငန်းအတွက်အလှူငွေ—မဿဲ ၂၄:၁၄” ဟုရေးထားသောအလှူငွေသေတ္တာတွင်ထည့်ဝင်ရန် မိမိတို့၏ငွေကြေးများကို စီမံခန့်ခွဲထားကြသည်။ အသင်းတော်များသည် ယင်းအလှူငွေများကို ဘရွတ်ကလင်နယူးယောက်ဌာနချုပ် သို့မဟုတ် ဒေသခံဌာနခွဲရုံးသို့ လစဉ်ပေးပို့ကြသည်။

စေတနာအလျောက်ငွေကြေးအလှူငွေများကို Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483,သို့မဟုတ် သင့်နိုင်ငံကိုကြည့် ရှုသော အသင်း၏ရုံးသို့လည်း တိုက်ရိုက်ပေးပို့နိုင်သည်။ ကျောက်မျက်ရတနာနှင့် အခြားတန်ဖိုးရှိအရာများကိုလည်း လှူဒါန်းနိုင်ပါသည်။ ဤသို့ပေးပို့လှူဒါန်းရာတွင် လုံးလုံးလျားလျားလှူဒါန်းကြောင်း ဖော်ပြသည့်စာတိုကလေးပါ ထည့်ပေးသင့်သည်။

ကန့်သတ်ချက်ဖြင့်လှူဒါန်းခြင်းအစီအစဉ်

လှူဒါန်းသူ၏ကိုယ်ရေးကိုယ်တာ လိုအပ်ချက်ရှိပါက ပြန်လည်ပေးအပ်ဖို့ အထူးအစီအစဉ်ဖြင့် ကင်းမျှော်စင်အသင်းသို့ ငွေကြေးလွှဲအပ်ထားပေးနိုင်သည်။ ထပ်မံသိလိုပါက အထက်တွင် ဖော်ထားသောလိပ်စာရှိ Treasurer’s Office ကိုစာရေးမေးမြန်းနိုင်သည်။

ပေးကမ်းရန် စီစဉ်ထားခြင်း

ငွေကြေးလုံးလုံးလျားလျားပေးအပ်ခြင်းနှင့် ကန့်သတ်ချက်ဖြင့် ငွေလှူဒါန်းခြင်းအပြင် ကမ္ဘာချီနိုင်ငံတော်လုပ်ငန်းကို အထောက်အကူပြုရန် အခြားပေးကမ်းနည်းများရှိသည်။

အာမခံ– ကင်းမျှော်စင်အသင်းအမည်ဖြင့် အသက်အာမခံကြေးခံစားခွင့်များ၊ အငြိမ်းစားခံစားခွင့်များကို ပြုလုပ်ပေးနိုင်သည်။ သို့ပြုလိုလျှင် အသင်းမကိုအကြောင်းကြားပါ။

ဘဏ်စာရင်းများ– ဘဏ်ရှင်းတမ်းများ၊ ငွေစုစာအုပ်များ၊ အငြိမ်းစားခံစားခွင့်စာရင်း (ပင်စင်စာအုပ်) များကို ဒေသန္တရဘဏ်စည်းကမ်းများအရ ကင်းမျှော်စင်အသင်းထံအပ်နှံသို့မဟုတ် ကာယကံရှင်သေဆုံးမှ လွှဲပြောင်းပေးရန် စီစဉ်နိုင်သည်။ ယင်းအစီအစဉ်တစ်စုံတစ်ခုအတွက် အသင်းမကိုအကြောင်းကြားပါ။

အစုရှယ်ယာလက်မှတ်နှင့် ငွေချေးစာချုပ်များ– အစုရှယ်ယာလက်မှတ်များနှင့် ငွေချေးစာချုပ်များကို ကင်းမျှော်စင်အသင်းသို့ လုံးလုံးလျားလျားပေးအပ်၍ဖြစ်စေ၊ ထပ်မံဝင်ငွေများကို လှူဒါန်းသူအားပေးရသည့် အစီအစဉ်ဖြင့်ဖြစ်စေ လှူဒါန်းနိုင်သည်။

အိမ်ရာအဆောက်အအုံများ– ရောင်းချနိုင်သော အိမ်ရာအဆောက်အအုံများကို ကင်းမျှော်စင်အသင်းသို့ လုံးလုံးလျားလျားဖြစ်စေ၊ လှူဒါန်းသူအသက်ရှင်နေသရွေ့နေထိုင်ရန် အပိုင်းကိုချန်လှပ်၍ဖြစ်စေ ပေးအပ်လှူဒါန်းနိုင်သည်။ ဤသို့ပေးလှူရန် စာချုပ်စာတမ်းမပြုမီ အသင်းမကို အကြောင်းကြားသင့်သည်။

သေတမ်းစာနှင့် လွှဲအပ်စာများ– ပစ္စည်းဥစ္စာ သို့မဟုတ် ငွေကြေးများကို ကင်းမျှော်စင်အသင်းသို့ တရားဝင်သေတမ်းစာဖြင့် အမွေပေးလှူဒါန်းနိုင်သည်။ သို့မဟုတ် လွှဲအပ်စာချုပ်တွင် အသင်းမကအကျိုးခံစားခွင့်ရှိသူ အဖြစ်ပါဝင်စေနိုင်သည်။ ဤသို့ဘာသာရေးအဖွဲ့အစည်းကို လွှဲအပ်ရာတွင် အခွန်နှင့်ပတ်သက်သည့် အကျိုးအမြတ်တစ်စုံတစ်ခုကို ဖြစ်ထွန်းစေပေမည်။ သေတမ်းစာ သို့မဟုတ် လွှဲအပ်စာချုပ်တစ်စောင်ကို အသင်းမထံပို့ပေးသင့်သည်။

“ပေးကမ်းရန်စီစဉ်ထားခြင်း” ဝေါဟာရအဓိပ္ပာယ်သက်ရောက်သည့်အတိုင်း ဤလှူဒါန်းမှုများ၏ပုံစံအရ လှူဒါန်းသူဘက်မှ စီစဉ်ထားမှုအချို့လိုအပ်သည်။ ပေးကမ်းရန်စီစဉ်ထားခြင်းနည်းလမ်းအချို့ဖြင့် အသင်းမကိုအကျိုးပြုရန် ဆန္ဒရှိသူများကိုကူညီဖို့ ကမ္ဘာချီဘုရားသခင့်နိုင်ငံတော်လုပ်ငန်းကို အကျိုးပြုဖို့ ပေးကမ်းရန်စီစဉ်ထားခြင်း ဟုခေါင်းစဉ်တပ်ထားသည့် ဘရိုရှာတစ်စောင်ကို ပြင်ဆင်ပြီးခဲ့ပြီ။ အသင်းမက လက်ဆောင်များ၊ သေတမ်းစာနှင့် လွှဲအပ်စာများနှင့်ပတ်သက်၍ မေးမြန်းခြင်းစာများစွာကို ရရှိခဲ့သည့်အတွက် ပြန်လည်ဖြေကြားဖို့ ဤဘရိုရှာကို ရေးသားခဲ့ခြင်းဖြစ်သည်။ ယင်းတွင် မြေယာဆိုင်ရာ၊ ငွေကြေးဆိုင်ရာ၊ အခွန်အတုတ်ဆိုင်ရာစီစဉ်ရေးနှင့်ပတ်သက်သည့် ထပ်ဆင့်အကြောင်းအရာများလည်းပါဝင်ပြီး မိမိ၏မိသားစုနှင့် ကိုယ်ရေးကိုယ်တာအခြေအနေများကို ထည့်စဉ်းစားကာ အကျိုးအရှိဆုံးနှင့်အထိရောက်ဆုံးနည်းလမ်းများကို ရွေးချယ်ဖို့ ကမ္ဘာချီဘုရားသခင့်နိုင်ငံတော်အကျိုးစီးပွားအတွက် အမေရိကန်ပြည်ထောင်စုရှိ လှူဒါန်းလိုသူများကိုကူညီရန် ရည်ရွယ်ထားပါသည်။ ဤဘရိုရှာကို ဖတ်ရှုခြင်းအားဖြင့်၊ ထိုလုပ်ငန်းနှင့်ပတ်သက်၍ ပေးကမ်းရန်စီစဉ်ထားခြင်းဌာနနှင့်ဆွေးနွေးခြင်းအားဖြင့် များစွာသောသူတို့သည် အသင်းမကို ကူညီထောက်ပံ့နိုင်ပြီး တစ်ချိန်တည်းတွင် အခွန်ကင်းလွတ်ခွင့်တိုး၍ရရှိသည်။ ဘရိုရှာကို စာရေး၍ဖြစ်စေ၊ တယ်လီဖုန်းဆက်၍ဖြစ်စေ တောင်းဆိုနိုင်ပါသည်။

ပေးကမ်းရန်စီစဉ်ထားသည့် နည်းတစ်ခုခု၌ စိတ်ဝင်စားသူများသည် Planned Giving Desk, Watch Tower Bible and Tract Society of Pennsylvania, 100 Watchtower Drive, Patterson, New York 12563-9204, telephone (914) 878-7000, သို့မဟုတ် မိမိတို့နိုင်ငံကို ကြည့်ရှုသောအသင်း၏ရုံးသို့ ဆက်သွယ်သင့်ပါသည်။