သိုးထိန်းခုနစ်ယောက်နဲ့ မင်းညီမင်းသားရှစ်ယောက်က ယနေ့ ကျွန်ုပ်တို့အတွက် ဘာအဓိပ္ပာယ်ရှိသလဲ

၁။ ဆီးရီးယားဘုရင်နဲ့ အစ္စရေးဘုရင်ရဲ့ အကြံအစည် ဘာကြောင့် အောင်မြင်မှာ မဟုတ်သလဲ။

ဘီစီ ၇၆၂ နဲ့ ၇၅၉ ကြား၊ ဘီစီရှစ်ရာစု တစ်ချိန်ချိန်မှာ အစ္စရေးဘုရင်နဲ့ ဆီးရီးယား (ရှုရိ) ဘုရင်ဟာ ယုဒနိုင်ငံကိုတိုက်ဖို့ စစ်ကြေညာခဲ့တယ်။ ဘာရည်ရွယ်ချက်နဲ့လဲ။ ဂျေရုဆလင်ကို သိမ်းပိုက်၊ ဘုရင်အာခတ်ကို နန်းချပြီး ဘုရင်ဒါဝိဒ်ရဲ့ အမျိုးအနွယ်မဟုတ်သူတစ်ယောက်ကို နန်းတင်ဖို့ပဲ။ (ဟေရှာ. ၇:၅၊ ၆) ဒါပေမဲ့ အစီအစဉ်က အောင်မြင်မှာ မဟုတ်ဘူး။ ဒါဝိဒ်ရဲ့ သားစဉ်မြေးဆက်ကပဲ အမြဲ ဘုရင်ဖြစ်ရမယ်လို့ ယေဟောဝါ ကတိပေးပြီးသားဖြစ်တယ်။ ယေဟောဝါရဲ့စကားတော်က အမြဲပြည့်စုံတယ်။—ယောရှု ၂၃:၁၄; ၂ ရာ. ၇:၁၆။

၂-၄။ ဟေရှာယ ၇:၁၄၊ ၁၆ က (က) ဘီစီ ရှစ်ရာစုမှာ (ခ) ပထမရာစုမှာ ဘယ်လိုပြည့်စုံခဲ့သလဲ။

^၂ အစပိုင်းမှာတော့ ဆီးရီးယားနဲ့ အစ္စရေးက စစ်ပွဲမှာ အနိုင်ရနေပုံပေါက်တယ်။ စစ်ပွဲတစ်ပွဲတည်းမှာပဲ အာခတ်ဘက်က စစ်သား ၁၂၀,၀၀၀ သေဆုံးခဲ့တယ်။ ဘုရင့်သား မာသေယလည်း အသတ်ခံရတယ်။ (၆ ရာ. ၂၈:၆၊ ၇) ဒါကို ယေဟောဝါ ကြည့်နေတယ်။ ကိုယ်တော်ဟာ ဒါဝိဒ်ကိုပေးခဲ့တဲ့ ကတိကို သတိရပြီး တကယ်အားရှိစေတဲ့ သတင်းတစ်ခုပြောဖို့ ပရောဖက်ဟေရှာယကို စေလွှတ်လိုက်တယ်။

^၃ ဟေရှာယ ဒီလိုပြောခဲ့တယ်– “မိန်းမပျိုတစ်ယောက်က ကိုယ်ဝန်ဆောင်ပြီး သားကိုမွေးလိမ့်မယ်။ အဲဒီသားကို ဧမာနွေလလို့ နာမည်ပေးလိမ့်မယ်။ . . . အဲဒီသားက မကောင်းတာကိုပယ်ပြီး ကောင်းတာကိုရွေးတတ်တဲ့အရွယ်မရောက်ခင် မင်းကြီးကြောက်တဲ့ ဘုရင်နှစ်ပါး [ဆီးရီးယားနဲ့ အစ္စရေးဘုရင်] ရဲ့ပြည်ဟာ လုံးဝစွန့်ပစ်ခံရ” မယ်။ (ဟေရှာ. ၇:၁၄၊ ၁၆၊ ကဘ) ဒီပရောဖက်ပြုချက်ရဲ့ ပထမပိုင်းက မေရှိယမွေးဖွားခြင်းနဲ့ သက်ဆိုင်တာတော့ မှန်ပါတယ်။ (မ. ၁:၂၃) ဒါပေမဲ့ ဆီးရီးယားဘုရင်နဲ့ အစ္စရေးဘုရင်ဟာ ယေရှုကမ္ဘာပေါ်မှာရှိနေတဲ့ ပထမရာစုမှာ ယုဒပြည်ကို မတိုက်ခိုက်တော့ဘူး။ ဒါကြောင့် ဧမာနွေလနဲ့ပတ်သက်တဲ့ ပရောဖက်ပြုချက်ဟာ ဟေရှာယအချိန်မှာလည်း ပြည့်စုံရမှာဖြစ်တယ်။ ဘယ်လိုပြည့်စုံခဲ့သလဲ။

^၄ အဲဒီကြေညာချက်ကို ဟေရှာယပြောပြီး သိပ်မကြာခင်မှာ သူ့ဇနီးမှာ ကိုယ်ဝန်ရှိလာတယ်။ မွေးလာတဲ့သားကို မဟေရရှာလ လဟာရှဗတ်လို့ ခေါ်တယ်။ ဒီကလေးက ဟေရှာယပြောခဲ့တဲ့ “ဧမာနွေလ” ဖြစ်နိုင်တယ်။a အဲဒီအချိန်တုန်းကဆိုရင် ကလေးတစ်ယောက် မွေးလာတဲ့အခါ အထူးအဖြစ်အပျက်တစ်ခုကို အမှတ်ရစေဖို့ သူ့ကို နာမည်တစ်ခု ပေးနိုင်တယ်။ ဒါပေမဲ့ သူ့ကို မိဘတွေ၊ ဆွေမျိုးတွေက နာမည်နောက်တစ်မျိုးနဲ့ ခေါ်နိုင်တယ်။ (၂ ရာ. ၁၂:၂၄၊ ၂၅) ယေရှုကို ဧမာနွေလလို့ခေါ်ခဲ့တယ်ဆိုတဲ့ အထောက်အထား မရှိဘူး။—ဟေရှာယ ၇:၁၄; ၈:၃၊ ၄ တို့ကိုဖတ်ပါ။

၅။ ဘုရင်အာခတ်ဟာ ဘယ်မိုက်မဲတဲ့ဆုံးဖြတ်ချက် ချခဲ့သလဲ။

^၅ အစ္စရေးနဲ့ ဆီးရီးယားက ယုဒကိုတိုက်ခိုက်ဖို့ အာရုံစိုက်နေချိန်မှာ နောက်နိုင်ငံတစ်ခုဖြစ်တဲ့ အဆီးရီးယား (အာရှုရိ) ကလည်း ယုဒကိုတိုက်ဖို့ စီစဉ်နေတယ်။ အဆီးရီးယားဟာ တန်ခိုးအရှိန်အဝါ တဖြည်းဖြည်း ကြီးလာပြီး ရန်လိုတဲ့ နိုင်ငံတစ်ခုဖြစ်တယ်။ ဟေရှာယ ၈:၃၊ ၄ အရ ယုဒကို မတိုက်ခိုက်ခင်မှာပဲ အဆီးရီးယားက ဆီးရီးယားနဲ့ အစ္စရေးကို အနိုင်ယူလိုက်မှာဖြစ်တယ်။ ယုဒဘုရင်အာခတ်ဟာ ဟေရှာယကတစ်ဆင့်ပြောတဲ့ ဘုရားသခင့်စကားကို ယုံကြည်စိတ်ချသင့်တယ်။ အဲဒီအစား သူက အဆီးရီးယားနဲ့ မိုက်မဲတဲ့သဘောတူညီချက်တစ်ခု လုပ်ခဲ့တယ်။ ဆိုးကျိုးကတော့ နောက်ပိုင်းမှာ အဆီးရီးယားဟာ ယုဒနိုင်ငံအပေါ် ဖိနှိပ်အုပ်ချုပ်ခဲ့တယ်။ (၄ ရာ. ၁၆:၇-၁၀) ယုဒရဲ့ခေါင်းဆောင်၊ သိုးထိန်းအာခတ်ဟာ သူ့လူတွေကို ကာကွယ်ပေးသင့်တယ်။ ဒါပေမဲ့ သူ မကာကွယ်ပေးခဲ့ဘူး။ ကျွန်ုပ်တို့ ကိုယ့်ကိုယ်ကို ဒီလိုမေးသင့်တယ်– ‘ငါ အရေးကြီးတဲ့ဆုံးဖြတ်ချက်တွေ ချရတဲ့အခါ ယေဟောဝါကို ယုံကြည်အားကိုးသလား၊ ဒါမှမဟုတ် လူကို အားကိုးသလား။—သု. ၃:၅၊ ၆။

ကွဲပြားခြားနားတဲ့ သိုးထိန်းအသစ်

၆။ ဟေဇကိဟာ အာခတ်နဲ့ ဘယ်လိုကွာခြားသလဲ။

^၆ အာခတ်ဟာ ဘီစီ ၇၄၆ မှာ သေဆုံးသွားပြီး သူ့ရဲ့သားဟေဇကိ ဘုရင်ဖြစ်လာတယ်။ အစ္စရေးလူတွေဟာ ဆင်းရဲတယ်၊ ယေဟောဝါကိုလည်း ဝတ်မပြုကြတော့ဘူး။ ဟေဇကိ ဘုရင်ဖြစ်လာပြီဆိုတော့ သူ အရင်ဆုံး ဘာလုပ်မလဲ။ တိုင်းပြည်ရဲ့စီးပွားရေး ပြန်ကောင်းလာအောင် လုပ်မလား။ မလုပ်ပါဘူး။ ဟေဇကိဟာ ယေဟောဝါကိုချစ်တယ်၊ တိုင်းပြည်မှာရှိတဲ့လူတွေအတွက် သိုးထိန်းကောင်းဖြစ်တယ်။ သူ အရင်ဆုံးလုပ်တာက လူတွေ ယေဟောဝါကို ပြန်ဝတ်ပြုကိုးကွယ်လာဖို့ ကူညီပေးတာဖြစ်တယ်။ ဟေဇကိဟာ ယေဟောဝါ သူ့ကို ဘာလုပ်စေချင်တယ်ဆိုတာ သိတာနဲ့ ချက်ချင်းလုပ်ဆောင်ခဲ့တယ်။ ကျွန်ုပ်တို့အတွက် စံနမူနာကောင်းပါပဲ။—၆ ရာ. ၂၉:၁-၁၉။

၇။ လေဝိသားတွေဟာ ဘာကြောင့် နန်းတက်စဘုရင်အသစ်ရဲ့ ကူညီပေးမှု လိုအပ်သလဲ။

^၇ လူတွေ ယေဟောဝါကို ပြန်ဝတ်ပြုကိုးကွယ်လာအောင် ကူညီပေးရာမှာ လေဝိသားတွေဟာ အရေးကြီးတဲ့တာဝန်ရထားတယ်။ ဒါကြောင့် ဟေဇကိဟာ လေဝိသားတွေနဲ့တွေ့ပြီး သူတို့ကို ထောက်မပေးမယ်လို့ ကတိပေးခဲ့တယ်။ လေဝိသားတွေနဲ့ တွေ့ဆုံစည်းဝေးတဲ့အချိန်မှာ ဘုရင်က “ကိုယ်တော့်ရှေ့မှာရပ်ပြီး . . . အမှုဆောင်ဖို့ ခင်ဗျားတို့ကို ယေဟောဝါ ရွေးချယ်ထား” တယ်လို့ပြောတဲ့အခါ သစ္စာရှိလေဝိသားတွေ ဝမ်းသာမျက်ရည် ကျခဲ့မှာပဲ။ (၆ ရာ. ၂၉:၁၁၊ ကဘ) စစ်မှန်တဲ့ဘုရားကို လူတွေဝတ်ပြုကိုးကွယ်ဖို့ ကူညီပေးရမယ်ဆိုတဲ့ ရှင်းလင်းတဲ့အမိန့်တစ်ခုကို လေဝိသားတွေ ရရှိခဲ့ကြတယ်။

၈။ လူတွေ ယေဟောဝါကို ပြန်ဝတ်ပြုလာစေဖို့ ဟေဇကိ နောက်ထပ် ဘာလုပ်ခဲ့သလဲ။ ဘာအကျိုးရခဲ့သလဲ။

^၈ ဟေဇကိဟာ ကြီးကျယ်တဲ့ပသခါပွဲတစ်ခု ကျင်းပဖို့ ယုဒနဲ့ အစ္စရေးမှာရှိတဲ့ လူအားလုံးကို ဖိတ်ခေါ်ခဲ့တယ်။ ပသခါပွဲပြီးသွားတဲ့အခါ လူတွေဟာ ခုနစ်ရက်ကြာတဲ့ အဇုမပွဲ (တဆေးမဲ့မုန့်ပွဲ) ကို တစ်ဆက်တည်း ကျင်းပခဲ့တယ်။ ပွဲတော်အတွင်းမှာ လူတွေ သိပ်ပျော်ကြလို့ နောက်ထပ်ခုနစ်ရက် ဆက်ကျင်းပခဲ့တယ်။ ကျမ်းစာမှာ ဒီလိုဖော်ပြထားတယ်– “ဒီလိုနဲ့ ဂျေရုဆလင်မြို့မှာ အကြီးအကျယ်ရွှင်လန်းနေကြတယ်။ အစ္စရေးဘုရင်ဒါဝိဒ်ရဲ့သား ရှောလမုန်လက်ထက်ကစပြီး ဂျေရုဆလင်မြို့မှာ အဲဒီလိုမျိုးမဖြစ်ဖူးလို့ပဲ။” (၆ ရာ. ၃၀:၂၅၊ ၂၆၊ ကဘ) လူတွေဟာ ပွဲတော်ကြောင့် သိပ်အားရှိခဲ့မှာ သေချာတယ်။ ၂ ရာဇဝင်ချုပ် ၃၁:၁ (ကဘ) မှာ သူတို့ဟာ ပွဲတော်ကျင်းပပြီးတာနဲ့ “ဝတ်ပြုရေးကျောက်တိုင်တွေကို ချိုးဖျက်ပြီး ဝတ်ပြုရေးသစ်တိုင်တွေကို ခုတ်လှဲကြတယ်။ အထွတ်အမြတ်နေရာတွေနဲ့ ယဇ်ပလ္လင်တွေကို ဖြိုဖျက်ကြတယ်” လို့ဖတ်ရတယ်။ လူတွေ ယေဟောဝါထံ ပြန်လှည့်လာကြပြီ။ ဒါက မကြာခင်မှာ ကြုံတွေ့ရတော့မယ့် ဒုက္ခတွေအတွက် သူတို့ကို အသင့်ဖြစ်စေဖို့ ကူညီပေးခဲ့တယ်။

ယေဟောဝါကို အားကိုးတဲ့ဘုရင်

၉။ (က) အစ္စရေးနိုင်ငံရဲ့အစီအစဉ် ဘယ်လို ပျက်သွားသလဲ။ (ခ) အစပိုင်းမှာ သနာခရိပ်ဟာ ယုဒပြည်မှာ ဘယ်လိုအောင်မြင်မှု ရခဲ့သလဲ။

^၉ ဟေရှာယပြောခဲ့သလိုပဲ အဆီးရီးယားဟာ မြောက်ပိုင်းအစ္စရေးနိုင်ငံကို တိုက်ခိုက်အောင်မြင်ပြီး လူတွေကို သုံ့ပန်းအဖြစ် ခေါ်သွားတယ်။ ဒီလိုနဲ့ ယုဒပြည်ရဲ့ ဒါဝိဒ်မင်းဆက်နေရာမှာ တခြားဘုရင်တစ်ပါး တင်မြှောက်မယ့် အစ္စရေးနိုင်ငံရဲ့အစီအစဉ် ပျက်သွားတယ်။ ဒါပေမဲ့ အဆီးရီးယားမှာ ဘာအကြံအစည်တွေ ရှိသလဲ။ အခု သူတို့ ယုဒပြည်ကို သိမ်းပိုက်ဖို့လာနေပြီ။ ကျမ်းစာမှာ ဒီလိုပြောတယ်– “ဟေဇကိမင်းနန်းစံ ၁၄ နှစ်မှာ အဆီးရီးယားဘုရင် သနာခရိပ်က ယုဒပြည်ရဲ့ခံတပ်မြို့အားလုံးကို ချီတက်တိုက်ခိုက်ပြီး သိမ်းယူတယ်။” သနာခရိပ်ဟာ ယုဒပြည်ရဲ့ မြို့ ၄၆ မြို့ကို သိမ်းပိုက်ခဲ့တယ်။ အဲဒီအချိန်မှာသာ သင် ဂျေရုဆလင်မြို့မှာ ရှိနေမယ်ဆိုရင် ဘယ်လိုခံစားရမလဲ။ ယုဒပြည်ရဲ့မြို့တွေဟာ တစ်မြို့ပြီးတစ်မြို့ အဆီးရီးယားလက်ထဲ ကျကုန်ပြီ။—၄ ရာ. ၁၈:၁၃၊ ကဘ။

၁၀။ ပရောဖက်မိက္ခာရဲ့စကားတွေက ဟေဇကိအတွက် ဘာကြောင့် အားပေးမှုဖြစ်စေခဲ့မလဲ။

^၁၀ ဟေဇကိဟာ အန္တရာယ်ကို သိမြင်ခဲ့တယ်၊ ဒါပေမဲ့ သူ အထိတ်တလန့်မဖြစ်ခဲ့ဘူး။ သစ္စာမရှိတဲ့ သူ့အဖေ အာခတ်လုပ်ခဲ့သလို ယေဟောဝါကို မကိုးကွယ်တဲ့နိုင်ငံတစ်ခုဆီမှာ အကူအညီ မတောင်းခဲ့ဘူး။ ယေဟောဝါကို သူ ယုံကြည်အားကိုးခဲ့တယ်။ (၆ ရာ. ၂၈:၂၀၊ ၂၁) ရန်သူ အဆီးရီးယားနဲ့ပတ်သက်ပြီး ပရောဖက်မိက္ခာ ကြိုဟောခဲ့တဲ့ ဒီစကားတွေကို သူသိမှာပဲ– “အဆီးရီးယားလူ . . . ကိုတိုက်ဖို့ သိုးထိန်းခုနစ်ယောက်အပြင် မင်းညီမင်းသားရှစ်ယောက်ကို ငါတို့တင်မြှောက်ကြမယ်။ သူတို့က အဆီးရီးယားပြည်ကို . . . ဓားနဲ့ဒဏ်ပေးလိမ့်မယ်။” (မိ. ၅:၅၊ ၆၊ ကဘ) ယေဟောဝါထံကလာတဲ့ ဒီစကားတွေက ဟေဇကိကို အားရှိစေခဲ့မှာ သေချာတယ်။ ယေဟောဝါဟာ အဆီးရီးယားကို တိုက်ခိုက်ဖို့ ထူးခြားတဲ့စစ်တပ်ကို အသုံးပြုမယ်ဆိုတာ အဲဒီစကားတွေက ဖော်ပြတယ်။

၁၁။ သိုးထိန်းခုနစ်ယောက်၊ မင်းညီမင်းသားရှစ်ယောက်နဲ့ပတ်သက်တဲ့ ပရောဖက်ပြုချက်က ဘယ်အချိန်မှာ အရေးပါဆုံးနည်းနဲ့ ပြည့်စုံမလဲ။

^၁၁ သိုးထိန်းခုနစ်ယောက်၊ မင်းညီမင်းသားရှစ်ယောက်နဲ့ ပတ်သက်တဲ့ ပရောဖက်ပြုချက်ဟာ ယေရှုကိုမွေးဖွားပြီးနောက်မှာ အရေးပါဆုံးနည်းနဲ့ ပြည့်စုံမှာဖြစ်တယ်။ ယေရှုဟာ အစ္စရေးကိုအုပ်စိုးမယ့်သူ၊ ရှေးအချိန်ကတည်းက ရှိခဲ့သူဖြစ်တယ်။ (မိက္ခာ ၅:၁၊ ၂ ကိုဖတ်ပါ။) ဒီပရောဖက်ပြုချက်ဟာ ရှေးခေတ် “အဆီးရီးယား” နဲ့တူတဲ့ရန်သူက ယေဟောဝါရဲ့ကျေးကျွန်တွေကို တိုက်ခိုက်မယ့် အနာဂတ်မှာပြည့်စုံမယ်။ ရန်သူတွေကို တိုက်ခိုက်ဖို့အတွက် ယေဟောဝါက မိမိရဲ့သား ဦးဆောင်တဲ့ ဘယ်စစ်တပ်ကို အသုံးပြုမလဲ။ ဒီမေးခွန်းကို ဆောင်းပါးရဲ့နောက်ပိုင်းမှာ ဆွေးနွေးပါမယ်။ အရင်ဆုံး အဆီးရီးယားတွေ ကျူးကျော်တိုက်ခိုက်ချိန်မှာ ဟေဇကိ ဘာလုပ်ခဲ့သလဲဆိုတာကို ကြည့်ကြစို့။

ဟေဇကိ ပညာရှိရှိလုပ်ဆောင်ခဲ့

၁၂။ ဟေဇကိနဲ့ သူ့လူတွေဟာ ဘုရားသခင့်လူမျိုးကို ကာကွယ်ဖို့ ဘာလုပ်ခဲ့ကြသလဲ။

^၁၂ ပြဿနာတစ်ခုကို ကျွန်ုပ်တို့ မဖြေရှင်းနိုင်ဘူးလို့ ခံစားရတဲ့အခါ ကျွန်ုပ်တို့ လိုအပ်တဲ့အကူအညီကိုပေးဖို့ ယေဟောဝါ အမြဲ လိုလိုလားလားရှိတယ်။ ဒါပေမဲ့ ပြဿနာကိုဖြေရှင်းဖို့ ကျွန်ုပ်တို့ဘက်က လုပ်နိုင်တာအားလုံးကို လုပ်ဖို့ ကိုယ်တော်မျှော်လင့်တယ်။ ဟေဇကိက သူလုပ်နိုင်တာကို လုပ်ခဲ့တယ်။ ဟေဇကိဟာ “မှူးမတ်တွေ၊ စစ်သည်တွေနဲ့ တိုင်ပင်ပြီး” “မြို့ပြင်မှာရှိတဲ့ စမ်းရေတွင်းတွေကို ပိတ်ပစ်ဖို့ ဆုံးဖြတ်လိုက်တယ်။ . . . ဒါ့အပြင် [ဟေဇကိ] ကခိုင်မာတဲ့စိတ်ပိုင်းဖြတ်ချက်နဲ့အတူ ပြိုပျက်နေတဲ့ မြို့ရိုးတစ်ခုလုံးကို ပြန်တည်ဆောက်ပြီးနောက် အဲဒီမြို့ရိုးပေါ်မှာ မျှော်စင်တွေ တည်ဆောက်တယ်။ အပြင်မှာလည်း နောက်မြို့ရိုးတစ်ခုတည်တယ်။ . . . လက်နက်တွေ၊ ဒိုင်းလွှားတွေလည်း အများကြီးလုပ်တယ်။” (၆ ရာ. ၃၂:၃-၅၊ ကဘ) အဲဒီအချိန်အတွင်းမှာ ယေဟောဝါဟာ ဟေဇကိ၊ သူ့ရဲ့မှူးမတ်တွေနဲ့ သစ္စာရှိပရောဖက်တွေကို သုံးပြီး မိမိရဲ့လူတွေကို ကာကွယ်၊ ထိန်းကျောင်းပေးခဲ့တယ်။

၁၃။ အဆီးရီးယားရဲ့တိုက်ခိုက်မှုအတွက် ပြင်ဆင်ရာမှာ ဟေဇကိဟာ ဘယ်အရေးကြီးဆုံးအချက်ကို လုပ်ခဲ့သလဲ။ ဟေဇကိရဲ့စကားတွေက လူတွေအတွက် ဘယ်လို အကူအညီဖြစ်စေခဲ့သလဲ။

^၁၃ နောက်တစ်ဆင့်အနေနဲ့ ဟေဇကိဟာ စမ်းရေတွင်းတွေကိုပိတ်တာ၊ မြို့ရိုးတွေတည်ဆောက်တာထက် ပိုအရေးကြီးတဲ့ အလုပ်တစ်ခုကို လုပ်ခဲ့တယ်။ သူက သိုးထိန်းကောင်းဖြစ်တဲ့အတွက် လူတွေကို စုဝေးပြီး ဒီစကားတွေနဲ့ အားပေးခဲ့တယ်– “အဆီးရီးယားဘုရင် . . . ကြောင့် မကြောက်နဲ့။ မထိတ်လန့်နဲ့။ ငါတို့ဘက်မှာရှိသူတွေဟာ သူ့ဘက်မှာရှိသူတွေထက် ပိုများတယ်။ သူက လူ့လက်ရုံးကို အားကိုးနေတာ။ ငါတို့ဘက်မှာတော့ ငါတို့ကိုကူညီပေးမယ့်၊ တိုက်ပွဲတွေကို တိုက်ခိုက်ပေးမယ့် ငါတို့ရဲ့ဘုရားသခင် ယေဟောဝါရှိတယ်။” သူတို့အတွက် ယေဟောဝါ တိုက်ခိုက်ပေးမယ်ဆိုတာကို ဟေဇကိ သတိပေးခဲ့တယ်။ အဲဒီစကားတွေက ဘုရားသခင်အပေါ် ယုံကြည်ခြင်းရှိဖို့နဲ့ ရဲရင့်ဖို့ အကူအညီဖြစ်စေခဲ့တယ်။ ပရောဖက်ကတစ်ဆင့် ယေဟောဝါ ကတိပေးခဲ့တဲ့အတိုင်းပဲ ဟေဇကိနဲ့ သူ့ရဲ့မှူးမတ်တွေ၊ စစ်သည်တွေနဲ့ ပရောဖက်မိက္ခာ၊ ဟေရှာယတို့ဟာ သိုးထိန်းကောင်းတွေဖြစ်ကြောင်း ပြသခဲ့ကြတယ်။—၆ ရာ. ၃၂:၇၊ ၈၊ ကဘ; မိက္ခာ ၅:၅၊ ၆ ကိုဖတ်ပါ။b

၁၄။ ရာဗာရှာခ ဘာပြောသလဲ။ လူတွေ ဘယ်လို တုံ့ပြန်ခဲ့ကြသလဲ။

^၁၄ အဆီးရီးယားဘုရင်နဲ့ သူ့ရဲ့စစ်တပ်ဟာ ဂျေရုဆလင် အနောက်တောင်ဘက်မှာရှိတဲ့ လာခိရှမြို့မှာ တပ်ချခဲ့တယ်။ အဲဒီကနေ တမန်သုံးယောက်ကို ဂျေရုဆလင်ကို စေလွှတ်ပြီး လက်နက်ချအညံ့ခံဖို့ အမိန့်ပေးခဲ့တယ်။ အဓိကပြောရေးဆိုခွင့်ရှိတဲ့ ရာဗာရှာခဟာ ဂျေရုဆလင်မြို့သားတွေကို ဟေဗြဲစကားနဲ့ ပြောခဲ့တယ်။ အရင်ဆုံး သူက ဂျေရုဆလင်ကလူတွေ ဟေဇကိပြောတာကို နားမထောင်ဘဲ အဆီးရီးယားတွေဆီမှာ လက်အောက်ခံဖို့ ပြောခဲ့တယ်။ အဲဒီနောက် သူတို့ကို ဇိမ်ကျကျ နေရမယ့်ပြည်ကို ပို့ပေးမယ်လို့ လိမ်ညာပြီး ကတိပေးခဲ့တယ်။ (၄ ဓမ္မရာဇဝင် ၁၈:၃၁၊ ၃၂ ကိုဖတ်ပါ။) တခြားလူမျိုးတွေရဲ့ဘုရားတွေက သူတို့ကို ဝတ်ပြုတဲ့လူတွေကို မကာကွယ်နိုင်ဘူး၊ ယေဟောဝါလည်း ဂျူးတွေကို ကာကွယ်နိုင်မှာမဟုတ်ဘူးလို့ ရာဗာရှာခက ပြောတယ်။ လူတွေဟာ ပညာရှိရှိပဲ အဲဒီအလိမ်အညာစကားနဲ့ စွပ်စွဲချက်တွေကို လျစ်လျူရှုခဲ့ကြတယ်။ ယနေ့အချိန်မှာလည်း ယေဟောဝါရဲ့ကျေးကျွန်တွေဟာ သူတို့ရဲ့စံနမူနာကို လိုက်လျှောက်ကြတယ်။—၄ ဓမ္မရာဇဝင် ၁၈:၃၅၊ ၃၆ ကိုဖတ်ပါ။

၁၅။ ဂျေရုဆလင်မြို့သားတွေ ဘာလုပ်ဖို့ လိုအပ်ခဲ့သလဲ။ မြို့ကို ယေဟောဝါ ဘယ်လို ကာကွယ်ခဲ့သလဲ။

^၁၅ ဟေဇကိ စိတ်အနှောင့်အယှက်ဖြစ်နေမယ်ဆိုတာ နားလည်နိုင်ပါတယ်။ ဒါပေမဲ့ သူဟာ တခြားနိုင်ငံက အကူအညီတောင်းမယ့်အစား ဟေရှာယကတစ်ဆင့် ယေဟောဝါရဲ့အကူအညီကို တောင်းခံခဲ့တယ်။ ပရောဖက်ဟေရှာယက ဟေဇကိကို ဒီလိုပြောခဲ့တယ်– “အဆီးရီးယားဘုရင်နဲ့ပတ်သက်ပြီး ယေဟောဝါ ဒီလိုပြောတယ်– ‘သူက ဒီမြို့ထဲကို ဝင်လာမှာမဟုတ်ဘူး။ မြို့ထဲကို မြားတစ်ချောင်းမှ ပစ်ရမှာမဟုတ်ဘူး။’” (၄ ရာ. ၁၉:၃၂၊ ကဘ) ဂျေရုဆလင်မြို့သားတွေဟာ ရဲရင့်ပြီး စိတ်အားမလျှော့ဖို့ပဲ လိုတယ်။ သူတို့အတွက် ယေဟောဝါ တိုက်ခိုက်ပါလိမ့်မယ်။ ကိုယ်တော် တိုက်ခိုက်ပေးခဲ့တယ်။ “အဲဒီညမှာပဲ ယေဟောဝါရဲ့ကောင်းကင်တမန်က ထွက်လာပြီး အဆီးရီးယားတပ်စခန်းမှာရှိတဲ့ လူ ၁၈၅,၀၀၀ ကိုသတ်ပစ်လိုက်တယ်။” (၄ ရာ. ၁၉:၃၅၊ ကဘ) ဂျေရုဆလင်မြို့သားတွေဟာ ဟေဇကိ စမ်းရေတွင်းကိုပိတ်ခဲ့တာ၊ မြို့ရိုးဆောက်ခဲ့တာကြောင့် မဟုတ်ဘဲ ယေဟောဝါရဲ့တန်ခိုးတော်ကြောင့် ကာကွယ်ခံခဲ့ရတယ်။

ယနေ့အချိန်အတွက် သင်ခန်းစာ

၁၆။ ယနေ့အချိန်မှာ (က) ဂျေရုဆလင်မြို့သားတွေ၊ (ခ) “အဆီးရီးယား၊” (ဂ) သိုးထိန်းခုနစ်ယောက်နဲ့ မင်းညီမင်းသားရှစ်ယောက်က ဘယ်သူတွေကို ပုံဆောင်သလဲ။

^၁၆ သိုးထိန်းခုနစ်ယောက်၊ မင်းညီမင်းသားရှစ်ယောက်နဲ့ပတ်သက်တဲ့ ပရောဖက်ပြုချက်ဟာ ကျွန်ုပ်တို့အချိန်မှာ အဓိကပြည့်စုံနေပါတယ်။ ရှေးအချိန်က ဂျေရုဆလင်မြို့သားတွေဟာ အဆီးရီးယားရဲ့ တိုက်ခိုက်ခြင်းကို ခံခဲ့ရတယ်။ မကြာခင်မှာ ရှေးခေတ် “အဆီးရီးယား” နဲ့တူတဲ့ရန်သူဟာ ယေဟောဝါရဲ့လူမျိုးကို ဖျက်ဆီးဖို့ တိုက်ခိုက်ပါလိမ့်မယ်။ အဲဒီတိုက်ခိုက်မှုကို ကျမ်းစာမှာ “မာဂေါဂပြည်သား ဂေါဂမင်း” ရဲ့တိုက်ခိုက်မှု၊ “မြောက်ရှင်ဘုရင်” ရဲ့တိုက်ခိုက်မှု၊ “မြေကြီးဘုရင်များ” ရဲ့တိုက်ခိုက်မှုလို့လည်း ခေါ်တယ်။ (ယေဇ. ၃၈:၂၊ ၁၀-၁၃; ဒံ. ၁၁:၄၀၊ ၄၄၊ ၄၅; ဗျာ. ၁၇:၁၄; ၁၉:၁၉) ဒီတိုက်ခိုက်မှုတွေက တစ်ခုတည်းကိုပဲ ရည်ညွှန်းသလား။ ကျွန်ုပ်တို့ မသိကြဘူး။ ကျမ်းစာက တိုက်ခိုက်မှုတစ်မျိုးတည်းကိုပဲ နာမည်အမျိုးမျိုးနဲ့ခေါ်တာ ဖြစ်နိုင်တယ်။ “အဆီးရီးယား” လို့ခေါ်တဲ့ ဒီရက်စက်တဲ့ရန်သူကို ယေဟောဝါ ဘယ်စစ်တပ်သုံးပြီး တိုက်ခိုက်မယ်လို့ မိက္ခာပရောဖက်ပြုချက်မှာ ဖော်ပြထားသလဲ။ အလွန်ထူးခြားတဲ့ စစ်တပ်တစ်တပ်ကို သုံးမှာဖြစ်တယ်။ ဒီစစ်တပ်ကို “သိုးထိန်းခုနစ်ယောက်၊” “မင်းညီမင်းသားရှစ်ယောက်” နဲ့ဖွဲ့စည်းထားတယ်လို့ ကျမ်းစာမှာဖော်ပြထားတယ်။ (မိ. ၅:၅၊ ကဘ) သူတို့က ဘယ်သူတွေလဲ။ အသင်းတော်အကြီးအကဲတွေပါပဲ။ (၁ ပေ. ၅:၂) ယနေ့အချိန်မှာ ယေဟောဝါဟာ မိမိရဲ့အဖိုးတန်သိုးတွေကို ထိန်းကျောင်းဖို့၊ “အဆီးရီးယား” နဲ့တူတဲ့ ရန်သူရဲ့ အနာဂတ်တိုက်ခိုက်မှုအတွက် မိမိရဲ့လူတွေကို အားပေးဖို့ သစ္စာရှိအကြီးအကဲများစွာကို အသုံးပြုနေတယ်။c သူတို့က ‘အဆီးရီးယားပြည်ကို ဓားနဲ့ ဒဏ်ပေးလိမ့်မယ်’ လို့မိက္ခာပရောဖက်ပြုချက်မှာ ဖော်ပြထားတယ်။ (မိ. ၅:၆၊ ကဘ) ရန်သူကို တိုက်ခိုက်ရာမှာ သူတို့အသုံးပြုတဲ့ လက်နက်တွေထဲက တစ်ခုက “ဘုရားသခင့် တရားစကားတော်တည်းဟူသော စွမ်းအားတော်ဓား” ပါပဲ။—ဧ. ၆:၁၇; ၂ ကော. ၁၀:၄။

၁၇။ ကျွန်ုပ်တို့လေ့လာခဲ့တဲ့ အကြောင်းအရာကနေ ဘယ်အချက်လေးချက်ကို အကြီးအကဲတွေ သင်ယူနိုင်သလဲ။

^၁၇ အကြီးအကဲတွေဟာ အခုဆွေးနွေးခဲ့တဲ့အကြောင်းကနေ အကျိုးရှိတဲ့သင်ခန်းစာတချို့ သင်ယူနိုင်တယ်– (၁) “အဆီးရီးယား” ရဲ့အနာဂတ်တိုက်ခိုက်မှုအတွက် အကောင်းဆုံး ကြိုတင်ပြင်ဆင်နိုင်တဲ့အရာက ဘုရားသခင်အပေါ် သင့်ယုံကြည်ခြင်းကို ခိုင်ခံ့အောင်လုပ်ခြင်းနဲ့ သင့်ညီအစ်ကိုတွေကိုလည်း အဲဒီလိုဖြစ်အောင် ကူညီပေးခြင်းဖြစ်တယ်။ (၂) “အဆီးရီးယား” တိုက်ခိုက်တဲ့အချိန်မှာ ယေဟောဝါ ကယ်တင်မယ်ဆိုတာကို သင်အပြည့်အဝ ယုံကြည်စိတ်ချရမယ်။ (၃) အဲဒီအချိန်မှာ ယေဟောဝါရဲ့အဖွဲ့အစည်းကလာတဲ့ ညွှန်ကြားချက်က ထူးဆန်းပုံပေါက်နေနိုင်တယ်။ ဒါပေမဲ့ ကျွန်ုပ်တို့အားလုံးဟာ သဘောတူတူ မတူတူ ညွှန်ကြားချက်အားလုံးကို နာခံဖို့ အသင့်ရှိနေရမယ်၊ အကြောင်းကတော့ ဒီညွှန်ကြားချက်တွေကို နာခံခြင်းက ကျွန်ုပ်တို့ရဲ့အသက်ကို ကယ်တင်မှာဖြစ်လို့ပဲ။ (၄) အကယ်၍ တစ်ယောက်ယောက်က လောကပညာရေး၊ ပစ္စည်းဥစ္စာ၊ လူ့အဖွဲ့အစည်းတွေကို ယုံစားနေမယ်ဆိုရင် အခုအချိန်မှာ သူ့ရဲ့ စဉ်းစားတွေးခေါ်ပုံကို ပြောင်းလဲရမှာဖြစ်တယ်။ အကြီးအကဲတွေဟာ ယေဟောဝါကို အပြည့်အဝ ယုံကြည်အားကိုးမှု မရှိတဲ့သူတွေကို ကူညီဖို့ အသင့်ရှိနေရမယ်။

၁၈။ ဒီကျမ်းစာမှတ်တမ်းကို သတိရတာက အနာဂတ်မှာ ကျွန်ုပ်တို့ကို ဘယ်လိုကူညီပေးနိုင်သလဲ။

^၁၈ ဟေဇကိအချိန်က ဂျေရုဆလင်မြို့သားတွေ အကူအညီမဲ့နေပုံပေါက်သလိုမျိုး ကျွန်ုပ်တို့အချိန်မှာလည်း ကြုံရမယ်။ အဲဒီအချိန်မှာ ဟေဇကိရဲ့စကားတွေက ကျွန်ုပ်တို့ရဲ့ ယုံကြည်ခြင်းကို ခိုင်ခံ့စေဖို့ ကူညီပေးနိုင်ပါတယ်။ ကျွန်ုပ်တို့ရဲ့ရန်သူတွေက ‘လူ့လက်ရုံးကို အားကိုးနေတာ။ ကျွန်ုပ်တို့ဘက်မှာတော့ ကူညီပေးမယ့်၊ တိုက်ပွဲတွေကို တိုက်ခိုက်ပေးမယ့် ကျွန်ုပ်တို့ရဲ့ဘုရားသခင် ယေဟောဝါရှိတယ်’ ဆိုတာကို သတိရကြပါစို့။—၆ ရာ. ၃၂:၈၊ ကဘ။