သင့်ဆုတောင်းချက်များသည် “နံ့သာပေါင်းကဲ့သို့ . . . ပြင်ဆင်”လျက်ရှိသလော

“အကျွန်ုပ်၏ [ဆုတောင်းချက်] သည် မီးရှို့သောနံ့သာပေါင်းကဲ့သို့ . . . ရှေ့တော်၌ပြင်ဆင်လျက်ရှိပါစေသော။”—ဆာလံ ၁၄၁:၂။

၁၊ ၂။ နံ့သာပေါင်းကို မီးရှို့ခြင်းသည် အဘယ်အရာကိုပုံဆောင်သနည်း။

ယေဟောဝါဘုရားသခင်သည် ဣသရေလလူတို့၏ဝတ်ပြုရာတဲတော်တွင်အသုံးပြုရန် မြင့်မြတ်သောနံ့သာပေါင်းကိုပြင်ဆင်ဖို့ မိမိ၏ပရောဖက်မောရှေအားမိန့်မှာခဲ့သည်။ နံ့သာလေးမျိုးကိုဆတူရောစပ်ရန် ဘုရားသခင်တောင်းဆိုထားသည်။ (ထွက်မြောက်ရာ ၃၀:၃၄-၃၈) အမှန်တကယ်ပင် သင်းပျံ့မွှေးကြိုင်လှပေ၏။

^၂ ဣသရေလလူမျိုးဆောင်သွင်းခံရသည့် ပညတ်ပဋိညာဉ်က နေ့စဉ် နံ့သာပေါင်းကိုမီးရှို့ရန်စီစဉ်ခဲ့သည်။ (ထွက်မြောက်ရာ ၃၀:၇၊ ၈) နံ့သာပေါင်းကိုအသုံးပြုခြင်းက ထူးခြားသောအဓိပ္ပာယ်ရှိသလော။ ရှိ၏၊ ဆာလံဆရာက ဤသို့ဖွဲ့ဆိုထားသည်– “အကျွန်ုပ်၏ [ဆုတောင်းချက်] သည် မီးရှို့သောနံ့သာပေါင်းကဲ့သို့လည်းကောင်း၊ လက်ကိုချီခြင်းသည် ညဦးယံပူဇော်သကာကဲ့သို့လည်းကောင်း ရှေ့တော်၌ပြင်ဆင်လျက်ရှိပါစေသော။” (ဆာလံ ၁၄၁:၂) ဗျာဒိတ်ကျမ်းတွင် တမန်တော်ယောဟန်က ဘုရားသခင့်ကောင်းကင်ပလ္လင်ပတ်လည်ရှိသူများ၌ နံ့သာပေါင်းနှင့်ပြည့်သောရွှေဖလားများရှိသည်ဟုဖော်ပြထားသည်။ ထို့နောက် “နံ့သာပေါင်း” သည် “သန့်ရှင်းသူတို့၏ [“ဆုတောင်းချက်များ၊” ကဘ]” ဖြစ်သည်ဟူ၍မှုတ်သွင်းခံမှတ်တမ်းကဆို၏။ (ဗျာဒိတ် ၅:၈) ထို့ကြောင့် သင်းပျံ့မွှေးကြိုင်သောမီးရှို့ရာနံ့သာပေါင်းသည် ယေဟောဝါ၏ကျေးကျွန်များနေ့ရောညပါဆက်သသည့် နှစ်သက်ဖွယ်ရာဆုတောင်းချက်များကိုပုံဆောင်ပါသည်။—၁ သက်သာလောနိတ် ၃:၁၀; ဟေဗြဲ ၅:၇။

၃။ ‘ကျွန်ုပ်တို့၏ဆုတောင်းချက်များကို ဘုရားသခင်အားဆက်သသည့် နံ့သာပေါင်းကဲ့သို့ ပြင်ဆင်’ ရန်အဘယ်အရာကထောက်ကူသင့်သနည်း။

^၃ ကျွန်ုပ်တို့၏ဆုတောင်းချက်များသည် ဘုရားသခင်လက်ခံဖွယ်ဖြစ်ဖို့ဆိုလျှင် ယေရှုခရစ်၏နာမတော်မှတစ်ဆင့်ဆုတောင်းကြရမည်။ (ယောဟန် ၁၆:၂၃၊ ၂၄) သို့သော် ကျွန်ုပ်တို့ဆုတောင်းချက်များ၏အရည်အသွေးကို မည်သို့တိုးတက်စေနိုင်မည်နည်း။ သမ္မာကျမ်းစာပုံနမူနာတချို့ကိုသုံးသပ်ခြင်းက ကျွန်ုပ်တို့၏ဆုတောင်းချက်များကို ယေဟောဝါရှေ့တော်၌ နံ့သာပေါင်းအဖြစ်ပြင်ဆင်ရန်ထောက်ကူသင့်သည်။—သု. ၁၅:၈။

ယုံကြည်ခြင်းနှင့်ဆုတောင်းလော့

၄။ ယုံကြည်ခြင်းသည် နှစ်သက်ဖွယ်သောဆုတောင်းချက်နှင့် မည်သို့ဆက်စပ်သနည်း။

^၄ ကျွန်ုပ်တို့၏ဆုတောင်းချက်များသည် သင်းပျံ့မွှေးကြိုင်သောနံ့သာပေါင်းအဖြစ် ဘုရားသခင်ထံတက်ရောက်ဖို့ဆိုလျှင် ယုံကြည်ခြင်းဖြင့်ဆုတောင်းရမည်။ (ဟေဗြဲ ၁၁:၆) ခရစ်ယာန်အကြီးအကဲများသည် ကျမ်းစာဆိုင်ရာအကူအညီရလိုသော ဝိညာဉ်ရေးဖျားနာနေသူတစ်ဦးကိုတွေ့သည့်အခါ သူတို့၏ “ယုံကြည်ခြင်းနှင့်ပြည့်စုံသောဆုတောင်းချက်သည် လူနာကိုချမ်းသာရစေ” လိမ့်မည်။ (ယာကုပ် ၅:၁၅၊ ကဘ) ယုံကြည်ခြင်းဖြင့်တောင်းသောဆုတောင်းချက်များသည် ကျွန်ုပ်တို့ကောင်းကင်ခမည်းတော်၏စိတ်တော်နှင့်တွေ့သည်၊ ဘုရားသခင့်နှုတ်မြွက်စကားတော်ကိုစိတ်အားထက်သန်စွာလေ့လာခြင်းသည် ထိုနည်းတူဖြစ်သည်။ ဆာလံဆရာက သဘောထားမှန်ဖြင့် ဤသို့သီဆိုခဲ့သည်– “နှစ်သက်သောပညတ်တော်တို့အား လက်တို့ကိုချီ၍၊ အထုံးအဖွဲ့တော်တို့ကို ဆင်ခြင်အောက်မေ့ပါမည်။ ပညတ်တော်တို့ကို အကျွန်ုပ်ယုံကြည်သည်ဖြစ်၍၊ ကောင်းသောဉာဏ်နှင့်ပညာတော်အတတ်ကို သွင်းပေးတော်မူပါ။” (ဆာလံ ၁၁၉:၄၈၊ ၆၆) ‘လက်တို့ကိုဆန့်ချီ’ ၍နှိမ့်ချစွာဆုတောင်းပြီး ဘုရားသခင့်ပညတ်တော်များကိုလိုက်လျှောက်ခြင်းဖြင့် ယုံကြည်ခြင်းတင်ပြကြစို့လေ။

၅။ ကျွန်ုပ်တို့သည် ဉာဏ်ပညာကင်းမဲ့နေလျှင် အဘယ်အရာပြုလုပ်သင့်သနည်း။

^၅ ကျွန်ုပ်တို့သည် အခက်အခဲတစ်ခုကိုကိုင်တွယ်ဖြေရှင်းရန် လိုအပ်သောဉာဏ်ပညာကင်းမဲ့နေသည်ဆိုကြပါစို့။ ကျမ်းစာပရောဖက်ပြုချက်တစ်ခုသည် ယခုပြည့်စုံနေကြောင်း မသေမချာဖြစ်ကောင်းဖြစ်ပေမည်။ ယင်းကြောင့် ကျွန်ုပ်တို့၏ဝိညာဉ်ရေးကိုယိမ်းယိုင်စေမည့်အစား ဉာဏ်ပညာအတွက်ဆုတောင်းကြစို့။ (ဂလာတိ ၅:၇၊ ၈; ယာကုပ် ၁:၅-၈) ဘုရားသခင်သည် ကျွန်ုပ်တို့ကိုထူးခြားသောနည်းဖြင့်ဖြေကြားပေးလိမ့်မည်ဟု မမျှော်လင့်နိုင်သည်မှာမှန်ပါသည်။ ကိုယ်တော်၏လူမျိုးအားလုံးလုပ်ဆောင်ရန် ကိုယ်တော်မျှော်လင့်ထားရာကိုလုပ်ဆောင်ခြင်းဖြင့် ကျွန်ုပ်တို့သည် စိတ်ရင်းမှန်နှင့်ဆုတောင်းကြောင်း ဖော်ပြရန်လိုသည်။ “သစ္စာနှင့်သတိပညာရှိသောကျွန်” မှတစ်ဆင့်ပြင်ဆင်ပေးသော စာအုပ်စာတမ်းများအကူအညီဖြင့် ယုံကြည်ခြင်းတည်ဆောက်ပေးသော ကျမ်းစာလေ့လာမှုပြုရန်လိုသည်။ (မဿဲ ၂၄:၄၅-၄၇၊ သမ; ယောရှု ၁:၇၊ ၈) ဘုရားသခင့်လူမျိုးတို့၏အစည်းအဝေးများတွင် မှန်မှန်ပါဝင်ခြင်းဖြင့် အသိပညာတိုးများနေဖို့လည်းလိုသည်။—ဟေဗြဲ ၁၀:၂၄၊ ၂၅။

၆။ (က) ကျွန်ုပ်တို့၏ခေတ်နှင့် သမ္မာကျမ်းစာပရောဖက်ပြုချက်များအကြောင်း အဘယ်အရာကို ကျွန်ုပ်တို့အားလုံးသိထားသင့်သနည်း။ (ခ) ကျွန်ုပ်တို့သည် ယေဟောဝါ၏နာမတော်အားရိုသေလေးမြတ်ခြင်းရှိစေရန် ဆုတောင်းခြင်းအပြင် အဘယ်အရာကိုလည်းပြုသင့်သနည်း။

^၆ ယနေ့၊ တချို့သောခရစ်ယာန်များသည် ကိုယ်ကျိုးစီးပွားများနှင့် အသက်မွေးလုပ်ငန်းများအတွက်လုံးပန်းနေကြရာ ‘ဆုံးခန်းကာလ’ အဆုံးတွင်ရောက်ရှိနေကြကြောင်းကို သတိမေ့နေကြသည်။ (ဒံယေလ ၁၂:၄) ကောင်းကင်ဘုရင်အဖြစ် ခရစ်တော်ကိုယေဟောဝါနန်းတင်သည့် ၁၉၁၄ ခုနှစ်တွင် ကိုယ်တော်စတင်ရောက်ရှိနေပြီဖြစ်၍ ရန်သူများ၏အလယ်တွင်အုပ်စိုးနေပြီဖြစ်ကြောင်း ကျမ်းစာအထောက်အထားများ၌ ထိုသူတို့၏ယုံကြည်ခြင်းကိုပြန်လည်နှိုးဆွရန် သို့မဟုတ် ပြန်လည်ခိုင်ခံ့လာစေရန် ယုံကြည်သူချင်းများက လျောက်ပတ်စွာဆုတောင်းပေးနိုင်ကြပါသည်။ (ဆာလံ ၁၁၀:၁၊ ၂; မဿဲ ၂၄:၃) . . . “မဟာဗာဗုလုန်” ပျက်စီးခြင်း၊ ယေဟောဝါ၏လူမျိုးကို မာဂေါဂပြည်မှဂေါဂမင်းစာတန့်တိုက်ခိုက်မှုနှင့် အာမဂေဒုန်စစ်ပွဲတွင် အတိုင်းအဆမဲ့တန်ခိုးရှင်ဘုရားသခင်က သူတို့ကိုကယ်တင်ခြင်းစသည့် ကြိုတင်ဟောထားသောဖြစ်ရပ်များသည် အထိတ်တလန့် ရုတ်တရက်ရောက်ရှိလာနိုင်ပြီး အချိန်တိုလေးအတွင်း တစ်ခုမကျန်ဖြစ်ပျက်နိုင်ကြောင်းကို ကျွန်ုပ်တို့အားလုံးသိမှတ်သင့်သည်။ (ဗျာဒိတ် ၁၆:၁၄၊ ၁၆; ၁၈:၁-၅; ယေဇကျေလ ၃၈:၁၈-၂၃) ထို့ကြောင့် ဝိညာဉ်ရေးတွင်နိုးကြားနေကြဖို့ ဘုရားသခင့်အကူအညီကိုတောင်းဆိုကြစို့။ ယေဟောဝါ၏နာမတော်သန့်ရှင်းမြင့်မြတ်ရန်၊ ကိုယ်တော့်နိုင်ငံတော်တည်ထောင်ရန်နှင့် အလိုတော်သည်ကောင်းကင်ဘုံ၌ပြည့်စုံသကဲ့သို့ မြေကြီးပေါ်တွင်ပြည့်စုံရန် စိတ်အားထက်သန်စွာဆုတောင်းကြစို့။ မှန်ပါသည်၊ ယုံကြည်ခြင်းဆက်တင်ပြကာ စိတ်ရိုးမှန်ဖြင့်ဆုတောင်းကြောင်းသက်သေထူကြစို့လေ။ (မဿဲ ၆:၉၊ ၁၀) မှန်ပါသည်၊ ယေဟောဝါကိုချစ်မြတ်နိုးသူအားလုံးသည် ဘုရားသခင့်နိုင်ငံတော်နှင့် ကိုယ်တော်၏ဖြောင့်မတ်ခြင်းကိုရှေ့ဦးစွာရှာကြပြီး အဆုံးမတိုင်မီ သတင်းကောင်းဟောပြောခြင်းလုပ်ငန်းတွင် အတတ်နိုင်ဆုံးပါဝင်နိုင်ကြပါစေ။—မဿဲ ၆:၃၃; ၂၄:၁၄။

ယေဟောဝါအား ကျေးဇူးတင်ချီးမွမ်းလော့

၇။ ၁ ရာဇဝင်ချုပ် ၂၉:၁၀-၁၃ တွင် တစ်စိတ်တစ်ဒေသမှတ်တမ်းတင်ထားသော ဒါဝိဒ်၏ဆုတောင်းချက်နှင့်ပတ်သက်၍ အဘယ်အရာက သင့်ကိုစွဲမှတ်စေသနည်း။

^၇ ‘ကျွန်ုပ်တို့၏ဆုတောင်းချက်များကို နံ့သာပေါင်းကဲ့သို့ပြင်ဆင်’ ရန်အရေးကြီးသည့်နည်းတစ်နည်းမှာ ဘုရားသခင်အားလှိုက်လှဲစွာကျေးဇူးတင်ချီးမွမ်းခြင်းဖြင့်ဖြစ်သည်။ ဘုရင်ဒါဝိဒ်သည် ယေဟောဝါ၏ဗိမာန်တော်ဆောက်လုပ်ရန်အတွက် သူနှင့်ဣသရေလလူများလှူဒါန်းခဲ့ကြချိန်တွင် ထိုသို့ဆုတောင်းခဲ့သည်။ “အကျွန်ုပ်တို့အဘ ဣသရေလ၏ဘုရားသခင်ထာဝရဘုရား၊ ကိုယ်တော်သည် ကမ္ဘာအဆက်ဆက်မင်္ဂလာရှိတော်မူစေသတည်း။ အိုထာဝရဘုရား၊ ကိုယ်တော်သည် ဘုန်းတန်ခိုးအာနုဘော်၊ အောင်မြင်ခြင်းအခွင့်၊ အာဏာတော်နှင့်ပြည့်စုံတော်မူ၏။ ကောင်းကင်မြေကြီး၌ ရှိရှိသမျှကို ပိုင်တော်မူ၏။ အိုထာဝရဘုရား၊ ကိုယ်တော်သည်အစိုးရတော်မူ၏။ ခပ်သိမ်းသောသူတို့၏အထွတ်၊ မြင့်မြတ်တော်မူ၏။ ဂုဏ်အသရေနှင့် စည်းစိမ်ဥစ္စာသည် ကျေးဇူးတော်ကြောင့်သာဖြစ်၏။ ကိုယ်တော်သည် ခပ်သိမ်းသောသူတို့ကို အုပ်စိုးတော်မူ၏။ ခွန်အားအစွမ်းသတ္တိကိုပေးပိုင်တော်မူ၏။ ခပ်သိမ်းသောသူတို့အား ကြီးမြတ်သောအခွင့်နှင့် ခိုင်ခံ့သောအခွင့်ကို ပေးပိုင်တော်မူ၏။ သို့ဖြစ်၍ အကျွန်ုပ်တို့၏ဘုရားသခင်၊ ကျေးဇူးတော်ကြီးလှပါသည်ဟု အကျွန်ုပ်တို့သည်ဝန်ခံ၍ ဘုန်းကြီးသောနာမတော်ကို ချီးမွမ်းကြပါ၏” ဟုဒါဝိဒ်ဆုတောင်းခဲ့သည်။—၁ ရာဇဝင်ချုပ် ၂၉:၁၀-၁၃။

၈။ (က) ဆာလံ ၁၄၈ မှ ၁၅၀ ပါအဘယ်ချီးမွမ်းစကားများသည် အထူးသဖြင့်သင့်နှလုံးကိုထိမိသနည်း။ (ခ) ဆာလံ ၂၇:၄ တွင်ပါသောသဘော ကျွန်ုပ်တို့၌ရှိမည်ဆိုလျှင် အဘယ်သို့ပြုလုပ်ကြမည်နည်း။

^၈ တင့်တယ်သောကျေးဇူးတင်ချီးမွမ်းစကားများပါတကား! ကျွန်ုပ်တို့၏ဆုတောင်းချက်များသည် ထိုသို့အပြောကောင်းချင်မှကောင်းမည်ဖြစ်သော်လည်း ထိုကဲ့သို့လှိုက်လှိုက်လှဲလှဲ တောင်းနိုင်သည်။ ဆာလံကျမ်းတွင် ကျေးဇူးတင်ချီးမွမ်းသည့်ဆုတောင်းချက် များစွာပါ၏။ နှစ်သက်ဖွယ်ချီးမွမ်းစကားများကို ဆာလံ ၁၄၈ မှ ၁၅၀ တွင်တွေ့ရသည်။ ဘုရားသခင်အားကျေးဇူးတင်ကြောင်းကို ဆာလံကျမ်းများစွာ၌ ဖော်ပြထားသည်။ “ထာဝရဘုရား၏တင့်တယ်ခြင်းအသရေတော်ကိုဖူးမြင်၍၊ ဗိမာန်တော်၌မွေ့လျော်ခြင်းအလိုငှာ၊ ထာဝရဘုရား၏အိမ်တော်မှာ တစ်သက်လုံးနေရမည်အကြောင်းတည်းဟူသောအခွင့်တစ်ခုကို ထာဝရဘုရား၌ငါဆုတောင်းပြီ။ ထိုအခွင့်ကိုရှာရဦးမည်” ဟုဒါဝိဒ်သီဆိုခဲ့သည်။ (ဆာလံ ၂၇:၄) ယေဟောဝါ၏ပရိသတ်များအလယ်တွင်ပြုသောအမှုအားလုံးကို တက်ကြွစွာလုပ်ကိုင်ခြင်းဖြင့် အဆိုပါဆုတောင်းချက်များနှင့်အညီလုပ်ဆောင်ကြစို့။ (ဆာလံ ၂၆:၁၂) နေ့စဉ်ပင် ထိုသို့ပြုလုပ်ကာ ဘုရားသခင့်နှုတ်မြွက်စကားတော်ကိုဆင်ခြင်ခြင်းဖြင့် ယေဟောဝါထံ နှလုံးသားထဲမှကျေးဇူးတင်ချီးမွမ်းခြင်းဖြင့်ချဉ်းကပ်ရန် အကြောင်းများစွာ ကျွန်ုပ်တို့၌ရှိစေပါလိမ့်မည်။

ယေဟောဝါ၏အကူအညီကိုနှိမ့်ချစွာရှာယူ

၉။ ဘုရင်အာသသည် မည်သို့ဆုတောင်းခဲ့ပြီး၊ အဘယ်အကျိုးရရှိခဲ့သနည်း။

^၉ ကျွန်ုပ်တို့သည် ယေဟောဝါ၏သက်သေများအဖြစ် နှလုံးအကြွင်းမဲ့ဝတ်ပြုနေမည်ဆိုလျှင် အကူအညီတောင်းဆိုချက်များကို ကိုယ်တော်နားညောင်းကြောင်းစိတ်ချနိုင်သည်။ (ဟေရှာယ ၄၃:၁၀-၁၂) ယုဒဘုရင် အာသကိုသုံးသပ်ကြည့်ပါ။ သူစိုးစံသည့် (ဘီ.စီ.အီး. ၉၇၇-၉၃၇) ၄၁ နှစ်အနက်ပထမ ၁၀ နှစ်တွင်ငြိမ်းချမ်းသာယာခဲ့သည်။ နောက်ပိုင်းတွင် ယုဒပြည်သည် အီသီယိုးပီးယားဘုရင်ဇေရဦးစီးသော လူတစ်သန်းရှိတပ်၏ ဝင်ရောက်ကျူးကျော်ခြင်းကိုခံခဲ့ရသည်။ အရေအတွက်အားဖြင့် အကြီးအကျယ်ကွာခြားခဲ့သော်လည်း အာသနှင့်သူ၏လူတို့သည် ကျူးကျော်သူများကို ထွက်၍ရင်ဆိုင်ခဲ့ကြသည်။ အာသသည် စစ်ပွဲမတိုင်မီ စိတ်အားထက်သန်စွာဆုတောင်းခဲ့သည်။ ကယ်နုတ်နိုင်သော ယေဟောဝါ၏တန်ခိုးတော်ကို သူအသိအမှတ်ပြုခဲ့၏။ ဤရှင်ဘုရင်သည် အကူအညီရရန် ဤသို့အနူးအညွတ်တောင်းဆိုခဲ့သည်– “အကျွန်ုပ်တို့သည် ကိုယ်တော်ကိုခိုလှုံ၍၊ နာမတော်ကိုအမှီပြုလျက်၊ ဤအလုံးအရင်းကြီးကို တိုက်ခြင်းငှာသွားပါ၏။ အိုထာဝရဘုရား၊ ကိုယ်တော်သည် အကျွန်ုပ်တို့၏ဘုရားသခင်ဖြစ်တော်မူ၏။ လူသည် ကိုယ်တော်ကိုနိုင်သောအခွင့် ရှိစေတော်မမူပါနှင့်။” ယေဟောဝါသည် မိမိ၏နာမတော်အတွက် ယုဒပြည်ကိုကယ်တင်ခဲ့သောကြောင့် အကြီးအကျယ်အောင်ပွဲခံခဲ့ကြရသည်။ (၂ ရာဇဝင်ချုပ် ၁၄:၁-၁၅) ဘုရားသခင်သည် ကျွန်ုပ်တို့ကို စမ်းသပ်ခံရခြင်းမှကယ်နုတ်သည်ဖြစ်စေ၊ ယင်းကိုခံရပ်နိုင်ရန် ခွန်အားပေးသည်ဖြစ်စေ ကိုယ်တော့်ထံမှ အကူအညီတောင်းခံခြင်းကို ကိုယ်တော်သည် အမှန်ပင်နားညောင်းတော်မူသည်။

၁၀။ ကျွန်ုပ်တို့သည် အရေးကိစ္စတစ်ခုကို မည်သို့ကိုင်တွယ်ရမှန်းမသိသောအခါ ဘုရင်ယောရှဖတ်၏ဆုတောင်းချက်က မည်သို့ထောက်ကူနိုင်သနည်း။

^၁၀ ကျွန်ုပ်တို့သည် အရေးကိစ္စတစ်ခုကို မည်သို့ကိုင်တွယ်ရမှန်းမသိလျှင် ကျွန်ုပ်တို့၏အကူအညီတောင်းခံချက်များကို ယေဟောဝါနားညောင်းမည်ဖြစ်ကြောင်း ယုံကြည်စိတ်ချနိုင်ပါသည်။ ဘီ.စီ.အီး. ၉၃၆ မှစ၍ ၂၅ နှစ်စိုးစံခဲ့သူယုဒဘုရင် ယောရှဖတ်ခေတ်တွင် ယင်းကိုတွေ့ရှိခဲ့ရသည်။ ယုဒနိုင်ငံသည် မောဘ၊ အာမ္မုန်နှင့် စိရတောင်သား တပ်ပေါင်းစုကြီး၏ခြိမ်းခြောက်မှုကိုခံရချိန်တွင် ယောရှဖတ်က ဤသို့အသနားခံခဲ့သည်– “အိုအကျွန်ုပ်တို့ဘုရားသခင်၊ သူတို့ကိုမစီရင်ဘဲနေတော်မူမည်လော။ အကျွန်ုပ်တို့ကို တိုက်အံ့သောငှာလာသော ဤအလုံးအရင်းကြီးကို၊ အကျွန်ုပ်တို့သည် ဆီးတားခြင်းငှာမတတ်နိုင်ပါ။ အဘယ်သို့ပြုရမည်ကိုမသိပါ။ ကိုယ်တော်ကိုသာမျှော်ကြည့်လျက် နေကြပါသည်။” ယေဟောဝါသည် ထိုနှိမ့်ချသောဆုတောင်းချက်ကိုနားညောင်းကာ ရန်သူများအား အချင်းချင်းသတ်ဖြတ်စေခြင်းဖြင့် ယုဒပြည်အတွက်စစ်တိုက်ပေးခဲ့သည်။ ယင်းအကြောင်းကြောင့် ပတ်ဝန်းကျင်နိုင်ငံများသည် ကြောက်ရွံ့လာကြပြီး ယုဒပြည်တွင်မူ ငြိမ်သက်ခြင်းရှိခဲ့၏။ (၂ ရာဇဝင်ချုပ် ၂၀:၁-၃၀) ကျွန်ုပ်တို့သည် အရေးကိစ္စတစ်ခုကိုရင်ဆိုင်ရန် လိုအပ်သောဉာဏ်ပညာကင်းမဲ့သောအခါ ယောရှဖတ်ကဲ့သို့ဆုတောင်းနိုင်သည်– ‘ကျွန်ုပ်တို့သည် အဘယ်သို့ပြုရမည်ကိုမသိကြပါ၊ ယေဟောဝါကိုသာ မျှော်လင့်လျက်နေကြပါ၏။’ သန့်ရှင်းသောဝိညာဉ်တော်သည် အခက်အခဲကိုဖြေရှင်းရန် လိုအပ်သောကျမ်းချက်များကို ပြန်သတိရစေပေမည်၊ သို့မဟုတ် ဘုရားသခင်သည် လူ့ဆင်ခြင်တုံတရားထက်သာလွန်သောနည်းဖြင့် ကျွန်ုပ်တို့ကိုကူညီပေမည်။—ရောမ ၈:၂၆၊ ၂၇။

၁၁။ ယေရုရှလင်မြို့ရိုးနှင့်စပ်လျဉ်း၍ နေဟမိ၏ဆောင်ရွက်ချက်များမှ ဆုတောင်းခြင်းအကြောင်း အဘယ်အရာသိရှိနိုင်သနည်း။

^၁၁ ဘုရားသခင့်အကူအညီရဖို့ စွဲစွဲမြဲမြဲဆုတောင်းကြရပေမည်။ နေဟမိသည် ပျက်စီးနေသောယေရုရှလင်မြို့ရိုးနှင့် ယုဒပြည်သားများ၏ ဆိုးရွားသောအခြေအနေကြောင့် ငိုကြွေးမြည်တမ်းကာ အစာရှောင်လျက် ဆုတောင်းခဲ့သည်။ (နေဟမိ ၁:၁-၁၁) သူ၏ဆုတောင်းချက်များသည် သင်းပျံ့မွှေးကြိုင်သောနံ့သာပေါင်းကဲ့သို့ ဘုရားသခင်ထံတက်ရောက်ခဲ့သည်။ တစ်နေ့တွင် ပါရှန်းဘုရင်အာတဇေရဇ်မင်းကြီးသည် စိတ်ညှိုးငယ်နေသောနေဟမိအား “အဘယ်သို့တောင်းလျှောက်ချင်သနည်း” ဟုမေးမြန်းခဲ့သည်။ သူသည် ‘ဘုရားသခင်အားချက်ချင်းဆုတောင်းပြီးမှ လျှောက်လေ၏’ ဟုနေဟမိဖော်ပြသည်။ အသံတိတ်ပြုခဲ့သော ထိုဆုတောင်းချက်တိုသည် နားညောင်းခံခဲ့ရ၏၊ အကြောင်းမှာ နေဟမိသည် ပျက်စီးနေသောမြို့ရိုးကို ပြန်လည်တည်ဆောက်ရန်ရှိသည့်အတိုင်း ယေရုရှလင်မြို့သို့သွားခြင်းဖြင့် သူ၏နှလုံးသားဆန္ဒပြည့်ဝစေရန် အခွင့်ရခဲ့သောကြောင့်ဖြစ်သည်။—နေဟမိ ၂:၁-၈။

သင်မည်သို့ ဆုတောင်းရမည်ကို ယေရှုသင်ကြားပေးပါစေ

၁၂။ သင့်ကိုယ်ပိုင်စကားဖြင့် ယေရှု၏စံပြဆုတောင်းချက်မှ အဓိကအချက်များကို မည်သို့အချုပ်ဖော်ပြမည်နည်း။

^၁၂ ကျမ်းစာ၌ မှတ်တမ်းတင်ထားသောဆုတောင်းချက်အားလုံးတွင် အထူးသွန်သင်မှုပေးရာမှာ သင်းပျံ့မွှေးကြိုင်သောနံ့သာပေါင်းအဖြစ် ယေရှုခရစ်တင်ဆက်ခဲ့သော စံပြဆုတောင်းချက်ဖြစ်သည်။ လုကာခရစ်ဝင်ကျမ်းက ဤသို့ဆိုသည်– “တပည့်တော်တစ်ယောက်က ‘သခင်၊ ဆုတောင်းစေခြင်းငှာ ယောဟန်သည် မိမိတပည့်တို့အား နည်းပေးသကဲ့သို့ အကျွန်ုပ်တို့အား နည်းပေးတော်မူပါ’ ဟုလျှောက်သော်၊ ကိုယ်တော်က ‘သင်တို့သည်ဆုတောင်းလျှင် မြွက်ဆိုရမည်မှာ၊ “ကောင်းကင်ဘုံ၌ရှိတော်မူသော အကျွန်ုပ်တို့အဘ၊ ကိုယ်တော်၏နာမတော်အား ရိုသေလေးမြတ်ခြင်းရှိပါစေသော။ နိုင်ငံတော်တည်ထောင်ပါစေသော။ အလိုတော်သည် ကောင်းကင်ဘုံ၌ပြည့်စုံသကဲ့သို့ မြေကြီးပေါ်မှာပြည့်စုံပါစေသော။ အသက်မွေးလောက်သောအစာကို အကျွန်ုပ်တို့အား နေ့ရက်အစဉ်အတိုင်း ပေးသနားတော်မူပါ။ အကျွန်ုပ်တို့ကိုပြစ်မှားသောသူရှိသမျှတို့၏အပြစ်ကို အကျွန်ုပ်တို့သည်လွှတ်တော်မူသောကြောင့် အကျွန်ုပ်တို့၏အပြစ်များကိုလွှတ်တော်မူပါ။ အပြစ်သွေးဆောင်ရာသို့မလိုက်မပါစေ. . . [“နှင့်၊” ကဘ]” ဟုဆုတောင်းကြလော့’ ဟုမိန့်တော်မူ၏။” (လုကာ ၁၁:၁-၄; မဿဲ ၆:၉-၁၃) အလွတ်ရွတ်ဆိုရန်အတွက်မဟုတ်ဘဲ လမ်းညွှန်တစ်ရပ်အဖြစ်ရည်ရွယ်ထားသည့် ဤဆုတောင်းချက်ကို သုံးသပ်ကြည့်ကြစို့။

၁၃။ “ကျွန်ုပ်တို့အဘ၊ ကိုယ်တော်၏နာမတော်အား ရိုသေလေးမြတ်ခြင်းရှိပါစေသော” ဟူသည့်စကားလုံး၏အဓိပ္ပာယ်ကို သင်မည်သို့ရှင်းပြမည်နည်း။

^၁၃ “ကျွန်ုပ်တို့အဘ၊ ကိုယ်တော်၏နာမတော်အား ရိုသေလေးမြတ်ခြင်းရှိပါစေသော။” အဘဟူ၍ ယေဟောဝါအားခေါ်ဆိုရခြင်းသည် ကိုယ်တော်၏ဆက်ကပ်အပ်နှံထားသောကျေးကျွန်များအတွက် အခွင့်ထူးတစ်ရပ်ဖြစ်သည်။ မည်သည့်စိုးရိမ်ပူပန်မှုအတွက်မဆို ကြင်နာသောဖခင်တစ်ဦးထံ ချဉ်းကပ်တတ်သည့်ကလေးများအလား ဘုရားသခင်ထံရိုသေလေးစားစွာ မှန်မှန်ဆုတောင်းနေသင့်သည်။ (ဆာလံ ၁၀၃:၁၃၊ ၁၄) ယေဟောဝါ၏နာမတော်အား ကဲ့ရဲ့စရာဖြစ်နေသမျှကို ဖယ်ရှားပစ်ရန် တွေ့မြင်လိုစိတ်ပြင်းပြခြင်းကြောင့် ကျွန်ုပ်တို့၏ဆုတောင်းချက်များသည် ကိုယ်တော်၏နာမတော် ရိုသေလေးမြတ်ခံရခြင်းကိုလိုလားကြောင်း တင်ပြသင့်သည်။ မှန်ပါသည်၊ ယေဟောဝါ၏နာမတော်အား သန့်ရှင်းမှု သို့မဟုတ် မြင့်မြတ်မှုအဖြစ် သီးသန့်ထားစေလိုကြသည်။—ဆာလံ ၅:၁၁; ၆၃:၃၊ ၄; ၁၄၈:၁၂၊ ၁၃; ယေဇကျေလ ၃၈:၂၃။

၁၄။ “နိုင်ငံတော်တည်ထောင်ပါစေသော” ဟုဆုတောင်းခြင်းသည် အဘယ်အဓိပ္ပာယ်ရှိသနည်း။

^၁၄ “နိုင်ငံတော်တည်ထောင်ပါစေသော။” ဘုရားသခင့်နိုင်ငံတော်သည် ကိုယ်တော့်သားတော်နှင့် ယေရှု၏ဘက်တော်သား “သန့်ရှင်းသူများ” အုပ်စိုးသောကောင်းကင်မေရှိယအစိုးရအားဖြင့်ဖော်ပြသည့် ယေဟောဝါ၏အုပ်ချုပ်မှုဖြစ်သည်။ (ဒံယေလ ၇:၁၃၊ ၁၄၊ ၁၈၊ ၂၇; ဗျာဒိတ် ၂၀:၆) ဘုရားသခင့်ပိုင်သအုပ်စိုးမှုကို ဆန့်ကျင်သူ မြေကြီးသားများကို မြင်ကွင်းမှဖယ်ရှားပစ်ခြင်းဖြင့် မကြာမီ “တည်ထောင်” တော့မည်ဖြစ်သည်။ (ဒံယေလ ၂:၄၄၊ ၄၅) ထိုအခါ ယေဟောဝါ၏အလိုတော်သည် ကောင်းကင်ဘုံ၌ပြည့်စုံသကဲ့သို့ မြေကြီးပေါ်၌ပြည့်စုံပါလိမ့်မည်။ (မဿဲ ၆:၁၀) ယင်းသည် စကြဝဠာပိုင်သအုပ်စိုးရှင်အား သစ္စာရှိစွာဝတ်ပြုနေသူအားလုံးအတွက် မည်မျှရွှင်လန်းစေမည်တကား!

၁၅။ ‘နေ့ရက်အစဉ်အစာ’ အတွက် ယေဟောဝါအားတောင်းလျှောက်ခြင်းက အဘယ်အရာကိုဖော်ပြသနည်း။

^၁၅ “အသက်မွေးလောက်သောအစာကို အကျွန်ုပ်တို့အား နေ့ရက်အစဉ်အတိုင်းပေးသနားတော်မူပါ။” “နေ့ရက်အစဉ်” အစာကိုယေဟောဝါအားတောင်းခြင်းက စားနပ်ရိက္ခာအလျှံပယ်ရှိစေရန်မဟုတ်ဘဲ နေ့ရက်အစဉ်စားသုံးစရာအတွက်သာ တောင်းလျှောက်ခြင်းဖြစ်ကြောင်းဖော်ပြသည်။ ကျွန်ုပ်တို့သည် ဘုရားသခင်၏ထောက်မမှုကိုကိုးစားကြသော်လည်း အစာရေစာနှင့် အခြားလိုအပ်ရာများရရှိရန် အလုပ်လည်းလုပ်ကြပြီး ကျွန်ုပ်တို့ရရှိနိုင်သည့် သင့်တော်သောမည်သည့်နည်းကိုမဆို အသုံးပြုကြသည်။ (၂ သက်သာလောနိတ် ၃:၇-၁၀) ဤပြင်ဆင်ချက်များကို ကောင်းကင်ထောက်မပေးရှင်၏ မေတ္တာ၊ ဉာဏ်ပညာနှင့်တန်ခိုးတော်တို့ကြောင့် ရရှိထားကြရာ ကိုယ်တော်အား ကျွန်ုပ်တို့အမှန်တကယ်ပင်ကျေးဇူးတင်သင့်သည်။—တမန်တော် ၁၄:၁၅-၁၇။

၁၆။ ကျွန်ုပ်တို့သည် ဘုရားသခင့်ခွင့်လွှတ်မှုကို မည်သို့ရနိုင်သနည်း။

^၁၆ “အကျွန်ုပ်တို့ကိုပြစ်မှားသောသူရှိသမျှတို့၏အပြစ်ကို အကျွန်ုပ်တို့သည်လွှတ်သောကြောင့် အကျွန်ုပ်တို့၏အပြစ်များကိုလွှတ်တော်မူပါ။” ကျွန်ုပ်တို့သည် မစုံလင်သောအပြစ်သားများဖြစ်ကြသောကြောင့် ယေဟောဝါ၏စုံလင်သောစံနှုန်းများကို အပြည့်အဝမမီနိုင်ကြချေ။ ထို့ကြောင့် ယေရှု၏ရွေးနုတ်ဖိုးပူဇော်သကာပေါ်အခြေခံ၍ ကိုယ်တော့်ခွင့်လွှတ်မှုရရန် ဆုတောင်းဖို့လိုသည်။ သို့သော် ကျွန်ုပ်တို့၏အပြစ်များအတွက် ထိုယဇ်သကာအကျိုးကိုခံစားရရန် “[ဆုတောင်းချက်] ကိုနားထောင်တော်မူသောဘုရား” ကပြုလုပ်ပေးစေလိုလျှင် နောင်တရ၍ မည်သည့်ပဲ့ပြင်မှုကိုမဆိုခံယူရန်အသင့်ရှိရမည်။ (ဆာလံ ၆၅:၂; ရောမ ၅:၈; ၆:၂၃; ဟေဗြဲ ၁၂:၄-၁၁) ထို့အပြင် “အကျွန်ုပ်တို့ကိုပြစ်မှားသောသူရှိသမျှတို့၏အပြစ်ကိုလွှတ်” မှသာလျှင် ဘုရားသခင်၏ခွင့်လွှတ်မှုကိုရဖို့ မျှော်လင့်နိုင်သည်။—မဿဲ ၆:၁၂၊ ၁၄၊ ၁၅။

၁၇။ “အပြစ်သွေးဆောင်ရာသို့မလိုက်မပါစေ” ပါနှင့်ဟူသောစကားသည် အဘယ်အရာကိုဆိုလိုသနည်း။

^၁၇ “အပြစ်သွေးဆောင်ရာသို့မလိုက်မပါစေ” ပါနှင့်။ ယေဟောဝါခွင့်ပြုခြင်းမျှသာဖြစ်သည့်အရာများကို ကိုယ်တော်ပြုသည်ဟု သမ္မာကျမ်းစာကတစ်ခါတစ်ရံဆိုသည်။ (ရုသ ၁:၂၀၊ ၂၁) ဘုရားသခင်သည် ကျွန်ုပ်တို့ပြစ်မှားရန်မသွေးဆောင်ပါ။ (ယာကုပ် ၁:၁၃) အဆိုးပြုရန်သွေးဆောင်မှုများသည် [စာတန်]၊ အပြစ်ပြုလိုသောကျွန်ုပ်တို့၏အသွေးအသားနှင့် ဤလောကမှအစပြုသည်။ ဘုရားသခင်အား ကျွန်ုပ်တို့ပြစ်မှားရန် ဉာဏ်ဆင်သွေးဆောင်သူသည် စာတန်ဖြစ်သည်။ (မဿဲ ၄:၃; ၁ သက်သာလောနိတ် ၃:၅) “အပြစ်သွေးဆောင်ရာသို့ မလိုက်မပါစေ” ပါနှင့်ဟု ကျွန်ုပ်တို့တောင်းလျှောက်သောအခါ ကိုယ်တော်အားမနာခံရန်သွေးဆောင်ခံရချိန်တွင် မလိုက်မပါမိစေရန် ဘုရားသခင်အားတောင်းလျှောက်ခြင်းဖြစ်သည်။ “မကောင်းသောအမှုအရာ” စာတန်ကိုအရှုံးပေးပြီး အနိုင်မခံမိစေရန် ကျွန်ုပ်တို့ကို ကိုယ်တော်လမ်းညွှန်ပေးနိုင်သည်။—မဿဲ ၆:၁၃; ၁ ကောရိန္သု ၁၀:၁၃။

သင့်ဆုတောင်းချက်များနှင့်အညီကျင့်ဆောင်ပါ

၁၈။ သာယာသောအိမ်ထောင်ရေးနှင့် မိသားစုဘဝအတွက်ဆုတောင်းခြင်းနှင့်အညီ မည်သို့လုပ်ဆောင်နိုင်သနည်း။

^၁၈ ယေရှု၏စံပြဆုတောင်းချက်သည် အဓိကအချက်များကိုခြုံငုံဖော်ပြထားသော်လည်း မည်သည့်ကိစ္စအတွက်မဆို ကျွန်ုပ်တို့ဆုတောင်းနိုင်သည်။ ဥပမာ၊ ကျွန်ုပ်တို့၏ဆန္ဒဖြစ်သော သာယာသောအိမ်ထောင်ရေးအတွက် ဆုတောင်းနိုင်ပေသည်။ မထိမ်းမြားမီအထိ စင်ကြယ်စွာနေနိုင်ရန် ချုပ်တည်းခြင်းရှိဖို့အတွက် ဆုတောင်းနိုင်ပေသည်။ သို့သော် အကျင့်ယိုယွင်းသောစာပေနှင့် အပန်းဖြေမှုများကိုရှောင်ခြင်းဖြင့် ကျွန်ုပ်တို့၏ဆုတောင်းချက်များနှင့်အညီကျင့်ဆောင်ကြစို့လေ။ “သခင်ဘုရား၌သာထိမ်းမြား” ရန်လည်းစိတ်ပိုင်းဖြတ်ထားကြစို့။ (၁ ကောရိန္သု ၇:၃၉; တရားဟောရာ ၇:၃၊ ၄) ထိမ်းမြားပြီးနောက် ဘုရားသခင့်သွန်သင်ချက်ကိုလိုက်လျှောက်ခြင်းအားဖြင့် ပျော်ရွှင်မှုရရန် ဆုတောင်းချက်များနှင့်အညီကျင့်ဖို့လို၏။ ကျွန်ုပ်တို့၌ သားသမီးများရှိလျှင် ယေဟောဝါ၏သစ္စာရှိကျေးကျွန်များဖြစ်လာကြဖို့ ဆုတောင်းရုံနှင့်မလုံလောက်ပါ။ သမ္မာကျမ်းစာလေ့လာခြင်းအားဖြင့်ဖြစ်စေ၊ သူတို့နှင့်အတူ ခရစ်ယာန်အစည်းအဝေးများကို မှန်မှန်တက်ရောက်ခြင်းအားဖြင့်ဖြစ်စေ သူတို့၏စိတ်ထဲတွင် ဘုရားသခင့်အမှန်တရားကိုစွဲမှတ်စေရန် ကျွန်ုပ်တို့အတတ်နိုင်ဆုံးလုပ်ဆောင်ကြရမည်။—တရားဟောရာ ၆:၅-၉; ၃၁:၁၂; သု. ၂၂:၆။

၁၉။ ကျွန်ုပ်တို့၏ဓမ္မအမှုအတွက် ဆုတောင်းနေမည်ဆိုလျှင် အဘယ်သို့ပြုလုပ်သင့်သနည်း။

^၁၉ [ခရစ်ယာန်] ဓမ္မအမှုတွင်ကောင်းချီးများခံစားရရန် ကျွန်ုပ်တို့ဆုတောင်းနေကြသလော။ သို့ဆိုလျှင် ဘုရားသခင့်နိုင်ငံတော်ဟောပြောခြင်းလုပ်ငန်းတွင် အဓိပ္ပာယ်ရှိရှိပါဝင်ခြင်းအားဖြင့် ဆုတောင်းချက်များနှင့်အညီ လုပ်ဆောင်ကြစို့။ ထာဝရအသက်လမ်းပေါ်သို့ အခြားသူများရောက်ရှိလာရန် ကူညီပေးခွင့်ရဖို့အတွက် ကျွန်ုပ်တို့ဆုတောင်းမည်ဆိုလျှင် စိတ်ဝင်စားသူများနှင့်ပတ်သက်၍ မှတ်တမ်းကောင်းကောင်းရေးထားရန်လိုပြီး ကျွန်ုပ်တို့၏အချိန်ဇယားတွင် အိမ်တွင်းကျမ်းစာသင်အံမှုများပြုလုပ်ခြင်းပါဝင်ဖို့ လိုလိုလားလားရှိရမည်။ ရှေ့ဆောင်တစ်ဦးအဖြစ် အချိန်ပြည့်ဟောပြောခြင်းလုပ်ငန်းတွင် ပါဝင်လိုလျှင်ကောအသို့နည်း။ သို့ဆိုလျှင် ဟောပြောခြင်းလုပ်ငန်းတွင် တိုးချဲ့ပါဝင်ပြီး ရှေ့ဆောင်များနှင့်အတူ ဓမ္မအမှုတွင်ပါဝင်ခြင်းအားဖြင့် ဆုတောင်းချက်များနှင့်အညီ ပြုလုပ်ဆောင်ရွက်ကြပါစို့။ ဤသို့ပြုလုပ်ခြင်းအားဖြင့် ကျွန်ုပ်တို့၏ဆုတောင်းချက်များနှင့်အညီ ဆောင်ရွက်နေကြကြောင်း ဖော်ပြပါလိမ့်မည်။

၂၀။ နောက်ဆောင်းပါးသည် အဘယ်အရာကိုသုံးသပ်မည်နည်း။

^၂၀ ကျွန်ုပ်တို့သည် ယေဟောဝါအားသစ္စာရှိစွာဝတ်ပြုနေကြမည်ဆိုလျှင် အလိုတော်နှင့်ညီသောဆုတောင်းချက်များကို နားညောင်းတော်မူမည်ဖြစ်ကြောင်း ယုံကြည်စိတ်ချနိုင်၏။ (၁ ယောဟန် ၅:၁၄၊ ၁၅) သမ္မာကျမ်းစာတွင်ဖော်ပြထားသော ဆုတောင်းချက်တချို့ကိုသုံးသပ်ခြင်းဖြင့် အကျိုးပြုသောအချက်အလက်များကို အမှန်ရရှိခဲ့ပြီ။ နောက်ဆောင်းပါးတွင် ‘ဆုတောင်းချက်များကို ယေဟောဝါ၏ရှေ့မှောက်၌ နံ့သာပေါင်းကဲ့သို့ပြင်ဆင်’ လိုသူတို့အတွက် ကျမ်းစာမှအခြားလမ်းညွှန်ချက်များကို သုံးသပ်ပါလိမ့်မည်။

သင်မည်သို့ဖြေဆိုမည်နည်း

◻ ယုံကြည်မှုဖြင့် အဘယ်ကြောင့်ဆုတောင်းသင့်သနည်း။

◻ ကျွန်ုပ်တို့၏ဆုတောင်းချက်များတွင် ကျေးဇူးတင်ချီးမွမ်းခြင်းသည် အဘယ်ကဏ္ဍမှပါဝင်သင့်သနည်း။

◻ ဆုတောင်းခြင်းဖြင့် ယေဟောဝါ၏အကူအညီကို အဘယ်ကြောင့်ယုံကြည်စိတ်ချစွာရှာနိုင်သနည်း။

◻ စံပြဆုတောင်းခြင်း၏ အဓိကအချက်တချို့ကားအဘယ်နည်း။

◻ ကျွန်ုပ်တို့၏ဆုတောင်းချက်များနှင့်အညီ မည်သို့လုပ်ဆောင်နိုင်ကြသနည်း။

[စာမျက်နှာ ၁၂ ပါ ရုပ်ပုံ]

ဘုရင်ယောရှဖတ်ကဲ့သို့ တစ်ခါတစ်ရံ ဤသို့ဆုတောင်းရန်လိုပေမည်– ‘ကျွန်ုပ်တို့သည် အဘယ်သို့ ပြုရမည်ကိုမသိကြပါ၊ ယေဟောဝါကိုသာ မျှော်လင့်လျက်နေကြပါ၏’

[စာမျက်နှာ ၁၃ ပါ ရုပ်ပုံ]

ယေရှု၏စံပြဆုတောင်းချက်နှင့်အညီ သင်ဆုတောင်းသလော