ယေဟောဝါသည် သင်၏စိုးလ်အကြွင်းမဲ့လုပ်ဆောင်မှုကို မြတ်နိုးတော်မူ၏

“လူ၏အမှုကိုသာဆောင်ရွက်သကဲ့သို့မဟုတ်။ သခင်ဘုရား၏အမှုတော်ကိုဆောင်ရွက်သကဲ့သို့၊ ပြုလေသမျှတို့၌ စေတနာစိတ် [“စိုးလ်အကြွင်းမဲ့၊” ကဘ] နှင့်ပြုကြလော့။”—ကောလောသဲ ၃:၂၃။

၁၊ ၂။ (က) ကျွန်ုပ်တို့ရရှိနိုင်သောအကြီးမားဆုံးသော အခွင့်ထူးကားအဘယ်နည်း။ (ခ) ဘုရားသခင်အားအမှုဆောင်ရာတွင် ကျွန်ုပ်တို့လုပ်ဆောင်လိုသည့်အရာအားလုံးကို မလုပ်နိုင်သောအခါများ အဘယ်ကြောင့်ရှိမည်နည်း။

ယေဟောဝါရှင်အား အမှုဆောင်ရခြင်းသည် ကျွန်ုပ်တို့ရရှိနိုင်သည့်အခွင့်အရေးထဲတွင် အကြီးမားဆုံးဖြစ်သည်။ ခရစ်ယာန်များသည် ကိုယ်ကိုယ်တိုင် ဓမ္မအမှုတွင်ပါဝင်ရန်၊ ဖြစ်နိုင်သည့်အခါတိုင်း “ပို၍အပြည့်အဝ” အမှုဆောင်ရန် ဤဂျာနယ်က အကြောင်းရင်းကောင်းဖြင့် ကြာမြင့်စွာကပင် အားပေးခဲ့သည်။ (၁ သက်သာလောနိတ် ၄:၁၊ ကဘ) သို့ရာတွင် ဘုရားသခင်အားအမှုဆောင်ခြင်း၌ ကျွန်ုပ်တို့၏နှလုံးမှလုပ်ဆောင်လိုသမျှကို လုပ်ဆောင်ရန်မှာ အမြဲမဖြစ်နိုင်ပေ။ “ကျွန်မရဲ့အခြေအနေဟာ အချိန်ပြည့်အလုပ်လုပ်ဖို့လိုနေတဲ့အခြေအနေပါ” ဟုလွန်ခဲ့သည့်နှစ်ပေါင်း ၄၀ နီးပါးခန့်က နှစ်ခြင်းယူခဲ့သူ တစ်ကိုယ်ရေညီအစ်မတစ်ဦးက ရှင်းပြသည်။ “လုပ်ရတဲ့အကြောင်းရင်းက တန်ဖိုးကြီးအဝတ်အစားတွေဝယ်ဝတ်ဖို့၊ အားလပ်ရက်ယူပြီး ကြေးကြီးတဲ့ အပျော်ခရီးထွက်ဖို့အတွက်မဟုတ်ဘဲ ဆေးဝါးနဲ့သွားအတွက်ကုန်ကျတာတွေအပါအဝင် လိုအပ်ရာတွေကို ကာမိစေဖို့အတွက်ဖြစ်ပါတယ်။ အကြွင်းအကျန်လေးပဲ ယေဟောဝါကိုပေးနေသလို ကျွန်မခံစားရတယ်။”

^၂ ဘုရားသခင်ကိုချစ်သည့်မေတ္တာက ဟောပြောခြင်းလုပ်ငန်းတွင် ကျွန်ုပ်တို့တတ်နိုင်သမျှလုပ်ဆောင်လိုစိတ်ရှိရန် လှုံ့ဆော်ပေးသည်။ သို့သော် ဘဝအသက်တာအခြေအနေများက ကျွန်ုပ်တို့လုပ်နိုင်သည့်အရာကို ကန့်သတ်လိုက်လေ့ရှိသည်။ မိသားစုဝတ္တရားများအပါအဝင် ကျမ်းဆိုင်ရာအခြားတာဝန်များကို ထမ်းရွက်ခြင်းက ကျွန်ုပ်တို့၏အချိန်နှင့်ခွန်အားကို များစွာစားသွားနိုင်ပါသည်။ (၁ တိမောသေ ၅:၄၊ ၈) ဤ “ခဲယဉ်းသောကာလ” အသက်တာသည် ယခင်ထက်သာ၍ စိန်ခေါ်ချက်ဖြစ်နေသည်။ (၂ တိမောသေ ၃:၁) ဓမ္မအမှုတွင် ကျွန်ုပ်တို့လုပ်လိုသောအရာအားလုံးမလုပ်နိုင်သောအခါ ကျွန်ုပ်တို့ကို အတော်အတန်စိတ်အနှောင့်အယှက်ဖြစ်စေပါသည်။ ကျွန်ုပ်တို့၏ဝတ်ပြုကိုးကွယ်မှုကို ဘုရားသခင်နှစ်သက်ပါ၏လော ဟူ၍တွေးတောကြပေမည်။

စိုးလ်အကြွင်းမဲ့ထမ်းဆောင်မှု၏အလှ

၃။ ကျွန်ုပ်တို့အားလုံးထံမှ ယေဟောဝါ အဘယ်အရာမျှော်လင့်တော်မူသနည်း။

^၃ ဆာလံ ၁၀၃:၁၄ တွင် ယေဟောဝါသည် “ငါတို့ကိုယ်ခန္ဓာကိုသိတော်မူ၏။ ငါတို့သည်မြေမှုန့်ဖြစ်ကြောင်းကို အောက်မေ့တော်မူ၏” ဟူ၍ ကျမ်းစာက ကျွန်ုပ်တို့ကို လှိုက်လှဲစွာအာမခံထားသည်။ အခြားမည်သူတစ်ဦးတစ်ယောက်ထက်မဆို ကျွန်ုပ်တို့၏အကန့်အသတ်ဖြစ်မှုကို ကိုယ်တော်နားလည်တော်မူသည်။ ကျွန်ုပ်တို့ပေးနိုင်သည်ထက် ကိုယ်တော်ပိုမတောင်းဆိုပေ။ ကိုယ်တော် ဘာကိုမျှော်လင့်တော်မူသနည်း။ မည်သူမဆို မိမိ၏ဘဝအခြေအနေမည်သို့ပင်ဖြစ်ပါစေ ဤသို့ပြုနိုင်ပါသည်– “လူ၏အမှုကိုသာဆောင်ရွက်သကဲ့သို့မဟုတ်။ သခင်ဘုရား၏အမှုတော်ကိုဆောင်ရွက်သကဲ့သို့၊ ပြုလေသမျှတို့၌ စေတနာစိတ် [“စိုးလ်အကြွင်းမဲ့၊” ကဘ] နှင့်ပြုကြလော့။ (ကောလောသဲ ၃:၂၃) မှန်ပါသည်၊ ကျွန်ုပ်တို့အားလုံးသည် ကိုယ်တော်အား စိုးလ်အကြွင်းမဲ့အမှုဆောင်ရန် ယေဟောဝါမျှော်လင့်တော်မူ၏။

၄။ ယေဟောဝါအား စိုးလ်အကြွင်းမဲ့အမှုဆောင်ခြင်းဟူသည် ဘာကိုဆိုလိုသနည်း။

^၄ ယေဟောဝါအား စိုးလ်အကြွင်းမဲ့အမှုဆောင်ခြင်းမည်သည် အဘယ်အရာကိုဆိုလိုသနည်း။ “စိုးလ်အကြွင်းမဲ့” ဟုပြန်ဆိုသော ဂရိအသုံးအနှုန်း၏စာသားအတိုင်းအဓိပ္ပာယ်မှာ “စိုးလ်မှ” ဟူ၍ဖြစ်သည်။ “စိုးလ်” သည် သူ၏ကာယနှင့်စိတ်ပိုင်းဆိုင်ရာ အရည်အသွေးများပါဝင်သော လူပုဂ္ဂိုလ်တစ်ခုလုံးကိုရည်ညွှန်းသည်။ ထို့ကြောင့် စိုးလ်အကြွင်းမဲ့အမှုဆောင်ခြင်းသည် ကျွန်ုပ်တို့ကိုယ်ကိုပေးဆက်ခြင်းဖြစ်ပြီး ဘုရားသခင်လုပ်ငန်းတော်တွင် ဖြစ်နိုင်သမျှအပြည့်အဝတိုးချဲ့ရန် ကျွန်ုပ်တို့၏အစွမ်းအစအားလုံးနှင့် အစွမ်းခွန်အားကိုအသုံးပြုခြင်းဖြစ်သည်။ ရိုးရိုးလေးဆိုရသော် ကျွန်ုပ်တို့စိုးလ်လုပ်နိုင်သည့်အရာအားလုံးကို လုပ်ဆောင်ခြင်းဟုအဓိပ္ပာယ်ရ၏။—မာကု ၁၂:၂၉၊ ၃၀။

၅။ ဓမ္မအမှုတွင် အားလုံးတန်းတူညီတူ မလုပ်ဆောင်ကြောင်း တမန်တော်များ၏ပုံနမူနာက မည်သို့တင်ပြသနည်း။

^၅ စိုးလ်အကြွင်းမဲ့ဟူသည် ဓမ္မအမှုတွင် တူညီသောအတိုင်းအတာဖြင့် ကျွန်ုပ်တို့အားလုံးလုပ်ဆောင်ရမည်ဟူ၍ဆိုလိုခြင်းလော။ စိုးလ်တစ်ဦးမှတစ်ဦး အခြေအနေနှင့်အရည်အချင်းများခြားနားကြသည့်အတွက် ထိုသို့ဖြစ်ရန်ခဲယဉ်းပေသည်။ ယေရှု၏သစ္စာရှိတမန်တော်များကို သုံးသပ်ကြည့်ပါ။ သူတို့သည် ထပ်တူပမာဏကို ယောက်တိုင်းမလုပ်ဆောင်နိုင်ကြပါ။ သာဓကအနေဖြင့် ကာနနိတ်လူရှိမုန်နှင့် အာလဖဲ၏သားယာကုပ်တို့ကဲ့သို့သော အချို့သောတမန်တော်များအကြောင်းကို အနည်းအကျဉ်းသာ ကျွန်ုပ်တို့သိရှိကြသည်။ တမန်တော်များအဖြစ် သူတို့၏လုပ်ဆောင်မှုများသည် အကန့်အသတ်သာရှိပုံရသည်။ (မဿဲ ၁၀:၂-၄) ယင်းနှင့်ဆန့်ကျင်လျက် ပေတရုအား “ကောင်းကင်နိုင်ငံတော်၏သော့တို့ကို” ပင်ယေရှုပေးအပ်ခဲ့သောကြောင့် များစွာကြီးလေးသောတာဝန်များကို သူလက်ခံရရှိခဲ့သည်။ (မဿဲ ၁၆:၁၉) သို့တိုင် ပေတရုသည် အခြားသူများထက် ချီးမြှောက်မခံရပါ။ ဗျာဒိတ်ကျမ်းပါ ယေရုရှလင်မြို့သစ်ရူပါရုံကို (စီ.အီး. ၉၆ ခန့်) ယောဟန်လက်ခံရရှိသောအခါ အုတ်မြစ်ကျောက် ၁၂ ခုနှင့် ၎င်းတို့အပေါ်တွင် “တမန်တော် တစ်ဆယ့်နှစ်ပါး၏နာမ” ဖော်ပြထားသည်ကို သူတွေ့ရှိခဲ့သည်။a (ဗျာဒိတ် ၂၁:၁၄) အချို့သူတို့သည် အခြားသူများထက်ပို၍လုပ်ဆောင်နိုင်သည်မှာ ထင်ရှားသော်လည်း တမန်တော်များအားလုံး၏လုပ်ဆောင်မှုကို ယေဟောဝါတန်ဖိုးထားတော်မူ၏။

၆။ ယေရှု၏မျိုးစေ့ကြဲသူပုံဥပမာတွင် “ကောင်းသောမြေ” ၌ကျသောမျိုးစေ့သည် ဘာဖြစ်သွားသနည်း၊ သို့နှင့် အဘယ်မေးခွန်းများပေါ်လာသနည်း။

^၆ အလားတူပင် ဟောပြောခြင်းနှင့်စပ်လျဉ်း၍ ကျွန်ုပ်တို့အားလုံးထံမှ တူညီသောပမာဏဖြင့် ယေဟောဝါမတောင်းဆိုပေ။ ယေရှုသည် ယင်းကို မျိုးကြဲခြင်းပုံဥပမာတွင်ဖော်ပြခဲ့ကာ ဟောပြောခြင်းလုပ်ငန်းကို မျိုးစေ့ကြဲခြင်းဖြင့် ခိုင်းနှိုင်းခဲ့သည်။ အစေ့တို့သည် ခြားနားသောမြေလွှာပေါ်ရောက်သွားကြခြင်းက သတင်းစကားကြားနာသူများထင်ရှားပြသသော ခြားနားသည့် နှလုံးသားအခြေအနေကို ပုံတင်ပြသည်။ ယေရှုက “အချို့သောအစေ့တို့သည် ကောင်းသောမြေ၌ကျသဖြင့်၊ အဆသုံးဆယ်၊ အဆခြောက်ဆယ်၊ အဆတစ်ရာပွားများ၍ အသီးသီးကြ၏” ဟူ၍ရှင်းပြခဲ့သည်။ (မဿဲ ၁၃:၃-၈၊ ၁၈-၂၃) ၎င်းအသီးမှာ အဘယ်အရာဖြစ်ပြီး အဘယ်ကြောင့် အမျိုးမျိုးသောပမာဏဖြင့် သီးကြသနည်း။

၇။ ကြဲလိုက်သည့်မျိုးစေ့၏အသီးကား အဘယ်နည်း၊ အဘယ်ကြောင့် ပမာဏအမျိုးမျိုးဖြစ်ရသနည်း။

^၇ ကြဲဖြန့်သောမျိုးစေ့သည် “ဘုရားသခင့်နိုင်ငံတော်၏တရားစကား” ဖြစ်သောကြောင့် အသီးသီးခြင်းသည် တရားစကားကိုပျံ့နှံ့စေခြင်း၊ ယင်းကို အခြားသူများအားပြောပြခြင်းကို ရည်ညွှန်းသည်။ (မဿဲ ၁၃:၁၉) အဆသုံးဆယ်မှ အဆခြောက်ဆယ်၊ အဆတစ်ရာဟူ၍ အသီးပမာဏအမျိုးမျိုးဖြစ်ရခြင်းမှာ အသက်တာတွင် စွမ်းရည်နှင့်အခြေအနေအရပ်ရပ် ခြားနားကြသောကြောင့်ဖြစ်သည်။ ကျန်းမာရေးကောင်း၍ သက်လုံကောင်းသူတစ်ဦးသည် နာတာရှည်ရောဂါကြောင့် သို့မဟုတ် အသက်အရွယ်ကြီးရင့်လာခြင်းကြောင့် ခွန်အားလျော့နည်းနေသောသူထက် ဟောပြောခြင်းတွင် ပို၍အချိန်ပေးနိုင်ပေမည်။ မိသားစုတာဝန်များမှလွတ်ကင်းသူ ငယ်ရွယ်သူလူလွတ်တစ်ဦးသည် မိသားစုကိုထောက်ပံ့ရန်အတွက် အချိန်ပြည့်လုပ်ကိုင်ရသူတစ်ဦးထက် ပို၍လုပ်ဆောင်နိုင်ပေမည်။—သု. ၂၀:၂၉ နှိုင်းယှဉ်။

၈။ သူတို့စိုးလ်ကပေးနိုင်သလောက် အတတ်နိုင်ဆုံးပေးဆက်သူတို့ကို ယေဟောဝါ မည်သို့ရှုမြင်တော်မူသနည်း။

^၈ ဘုရားသခင့်အမြင်တွင် အဆတစ်ရာသီးသောသူထက် အဆသုံးဆယ်သာသီးသော စိုးလ်အပြည့်လုပ်ဆောင်သူသည် သစ္စာရှိမှုလျော့နည်းနေခြင်းလော။ လုံးဝမဟုတ်ပါလေ! အသီးပမာဏကွဲပြားမည်ဖြစ်သော်လည်း ကျွန်ုပ်တို့၏အမှုဆောင်ခြင်းသည် ကျွန်ုပ်တို့၏စိုးလ်ကပေးနိုင်သော အတတ်နိုင်ဆုံးလုပ်ဆောင်ခြင်းဖြစ်နေသရွေ့ ယေဟောဝါနှစ်သက်တော်မူ၏။ ခြားနားသော အသီးပမာဏအားလုံးသည် “ကောင်းသောမြေ” နှလုံးသားများမှဖြစ်ကြကြောင်းကို သတိရပါ။ ဂရိအသုံးအနှုန်း (ကာ.လော့စ်) ကိုပြန်ဆိုထားသည့် “ကောင်းသော” ဟူသည် “လှပသည်၊” “နှလုံးပျော်မွေ့သည်၊ မျက်စိပသာဒဖြစ်သည်” ဟူ၍ဖြစ်သည်။ ကျွန်ုပ်တို့အတတ်နိုင်ဆုံးလုပ်ဆောင်သောအခါ ယေဟောဝါ၏မျက်မှောက်တော်၌ ကျွန်ုပ်တို့၏နှလုံးလှပနေကြောင်းကို သိရှိရခြင်းသည် အလွန်ပင် စိတ်သက်သာမှုဖြစ်စေပါသည်တကား!

တစ်ဦးနှင့်တစ်ဦးမနှိုင်းယှဉ်

၉၊ ၁၀။ (က) ကျွန်ုပ်တို့၏နှလုံးက အဘယ်အပြုသဘောမပါသော စဉ်းစားသုံးသပ်ခြင်းပုံစံကို ဖြစ်ပေါ်စေနိုင်သနည်း။ (ခ) အခြားသူတို့၏လုပ်ဆောင်မှုနှင့် ကျွန်ုပ်တို့လုပ်ဆောင်မှုကို ယေဟောဝါနှိုင်းယှဉ်တော်မမူကြောင်း ၁ ကောရိန္သု ၁၂:၁၄-၂၆ ပါသရုပ်ဖော်ထားချက်က မည်သို့တင်ပြသနည်း။

^၉ သို့ရာတွင် ကျွန်ုပ်တို့၏မစုံလင်သောနှလုံးက အရာများကိုခြားနားစွာ အကဲဖြတ်စီရင်မိပေမည်။ ယင်းက ကျွန်ုပ်တို့၏အမှုဆောင်မှုကို အခြားသူများနှင့် ခိုင်းနှိုင်းပေမည်။ ‘ဓမ္မအမှုမှာ တခြားသူတွေက ကျွန်တော့်ထက်ပိုပြီးလုပ်ဆောင်နေကြတယ်။ ဘယ်လိုလုပ်ပြီး ကျွန်တော့်ရဲ့အမှုဆောင်ခြင်းကို ယေဟောဝါနှစ်သက်တော့မှာလဲ’ ဟူ၍တွက်ဆမိကြပေမည်။—၁ ယောဟန် ၃:၁၉-၂၀ နှိုင်းယှဉ်။

^၁၀ ယေဟောဝါ၏အတွေးအခေါ်နှင့် နည်းလမ်းတော်များသည် ကျွန်ုပ်တို့ထက်များစွာပိုမြင့်ပါသည်။ (ဟေရှာယ ၅၅:၉) ကျွန်ုပ်တို့ကြိုးစားအားထုတ်မှုအပေါ် ယေဟောဝါ၏အမြင်ကို ၁ ကောရိန္သု ၁၂:၁၄-၁၆ မှ ထိုးထွင်းသိမြင်မှု အချို့ကိုရရှိသည်။ ထိုတွင် အသင်းတော်ကို မျက်စိ၊ လက်၊ ခြေထောက်၊ နားအစရှိသည့်အင်္ဂါများရှိသော ခန္ဓာကိုယ်တစ်ခုအဖြစ်ခိုင်းနှိုင်းထားသည်။ ပကတိခန္ဓာကိုယ်အကြောင်းကို တစ်ခဏတာ သုံးသပ်ကြည့်ပါ။ သင်၏မျက်စိနှင့် လက်ကိုနှိုင်းယှဉ်မည် သို့မဟုတ် သင့်ခြေထောက်နှင့် နားကိုနှိုင်းယှဉ်မည်ဆိုလျှင် မည်မျှသရော်ဖွယ်ကောင်းလိုက်မည်ဖြစ်ခြင်း! အင်္ဂါအသီးသီးသည် ခြားနားသောလုပ်ငန်းဆောင်တာကို လုပ်ဆောင်ကြသည်၊ သို့တိုင် အင်္ဂါအားလုံးအသုံးဝင်ပြီး တန်ဖိုးရှိကြသည်ချည်းဖြစ်သည်။ အလားတူပင် အခြားသူများ ပို၍လုပ်ဆောင်ကြသည်ဖြစ်စေ၊ သူတို့အနည်းငယ်လုပ်ဆောင်ကြသည်ဖြစ်စေ သင်၏စိုးလ်အကြွင်းမဲ့အမှုဆောင်ခြင်းကို ယေဟောဝါမြတ်နိုးတော်မူ၏။—ဂလာတိ ၆:၄။

၁၁၊ ၁၂။ (က) အချို့သူတို့သည် “အသရေနည်း” သူများ သို့မဟုတ် “တင့်တယ်ခြင်းမရှိသော” သူများဖြစ်ကြသည်ဟု အဘယ်ကြောင့် ခံစားကြသနည်း။ (ခ) ကျွန်ုပ်တို့၏လုပ်ဆောင်မှုကို ယေဟောဝါ မည်သို့ရှုမြင်တော်မူသနည်း။

^၁၁ ကျန်းမာရေးချို့တဲ့ခြင်း၊ အသက်အရွယ်ကြီးရင့်လာခြင်း၊ သို့မဟုတ် အခြားအခြေအနေအရပ်ရပ်၏ အကန့်အသတ်ဖြစ်မှုကြောင့် “အသရေနည်း” သူများ သို့မဟုတ် “တင့်တယ်ခြင်းမရှိသော” သူများဖြစ်ကြသည်ဟု မကြာခဏ ခံစားရပေမည်။ သို့သော် ယေဟောဝါ၏ရှုမြင်ပုံမှာ ထိုသို့မဟုတ်ပေ။ သမ္မာကျမ်းစာက ကျွန်ုပ်တို့အား ဤသို့ဆိုသည်– “အသရေနည်းဟန်ရှိသောအင်္ဂါတို့အားလည်း၊ သာ၍ကြီးသောအသရေကိုပေးတတ်၏။ တင့်တယ်ခြင်းမရှိသောအင်္ဂါတို့သည် သာ၍ကြီးသောတင့်တယ်ခြင်းကိုခံရကြ၏။” (၁ ကောရိန္သု ၁၂:၂၂-၂၄) ထို့ကြောင့် ယောက်စီယောက်တိုင်းသည် ယေဟောဝါအတွက် တန်ဖိုးရှိနိုင်သည်။ ကျွန်ုပ်တို့၏အကန့်အသတ်ဖြစ်မှုဘောင်အတွင်းရှိ ကျွန်ုပ်တို့၏အမှုဆောင်ခြင်းကို ကိုယ်တော်တန်ဖိုးထားတော်မူ၏။ ထိုသို့သောနားလည်မှုနှင့် မေတ္တာရှိသောဘုရားသခင်အား အမှုဆောင်ရာတွင် တတ်နိုင်သမျှလုပ်ဆောင်ရန် သင်၏နှလုံးသည် သင့်အားမလှုံ့ဆော်ပေလော။

^၁၂ ယေဟောဝါအတွက်အရေးကြီးသည်မှာ တစ်ဦးတစ်ယောက်လုပ်နိုင်သလောက်ကို သင်လုပ်ဆောင်ခြင်းမဟုတ်ဘဲ အသင်ကိုယ်တိုင်—သင့်စိုးလ်—ကလုပ်ဆောင်နိုင်သည့်အရာကို လုပ်ဆောင်ခြင်းသည်သာ ဖြစ်သည်။ မိမိ၏မြေကြီးအသက်တာအဆုံးပိုင်းအတွင်း အလွန်အခြေအနေကွာခြားသော အမျိုးသမီးနှစ်ဦးအား ယေရှု၏ဆက်ဆံပုံက ကျွန်ုပ်တို့တစ်ဦးစီ၏ကြိုးပမ်းမှုများကို ယေဟောဝါတန်ဖိုးထားတော်မူကြောင်း စိတ်ထိမိသွားစေသည့်နည်းနှင့် ပြသခဲ့သည်။

ကျေးဇူးတင်လေးမြတ်သော အမျိုးသမီး၏ “အဖိုးများစွာထိုက်သော” လက်ဆောင်

၁၃။ (က) ဆီမွှေးကို ယေရှု၏ခေါင်းတော်နှင့် ခြေတော်ပေါ်သို့ မာရိသွန်းလောင်းရန်ဖြစ်ပေါ်စေသည့်အခြေအနေများကား အဘယ်နည်း။ (ခ) မာရိဆီမွှေး၏ ပစ္စည်းတန်ဖိုးကား မည်မျှနည်း။

^၁၃ နိသန်လ ၈ ရက်၊ သောကြာနေ့ညနေပိုင်းတွင် ယေရုရှလင်မှ နှစ်မိုင်ခန့်ကွာဝေးသော သံလွင်တောင်၏ အရှေ့ဘက်ဆင်ခြေလျှော၌တည်ရှိသည့် ရွာငယ်လေးဖြစ်သော ဗေသနိရွာသို့ယေရှုရောက်ရှိလာသည်။ ဤရွာတွင် ယေရှုချစ်သောသူငယ်ချင်းများဖြစ်သည့် မာရိ၊ မာသနှင့် သူတို့၏မောင်လာဇရုတို့နေထိုင်ကြသည်။ မကြာခဏပင် သူတို့၏အိမ်တွင် ယေရှုတည်းခိုခဲ့ဖွယ်ရှိသည်။ သို့သော် စနေနေ့ညနေပိုင်းတွင် ယေရှုနှင့်ကိုယ်တော့်မိတ်ဆွေများသည် ယခင်က လူနူဖြစ်ခဲ့ဖူး၍ ယေရှု၏ကုသပေးမှုခံခဲ့ရဖွယ်ဖြစ်သူ ရှိမုန်၏အိမ်တွင်ညစာသုံးဆောင်ကြသည်။ စားပွဲပေါ်တွင် ယေရှုလဲလျောင်းနေစဉ် မာရိသည် မိမိ၏မောင်ကိုထမြောက်စေသူအတွက် သူမ၏နက်ရှိုင်းသောမေတ္တာကိုပြသသည့်အနေဖြင့် နှိမ့်ချသည့်အမှုအရာတစ်ခုပြုလုပ်ခဲ့သည်။ သူမသည် “အဖိုးများစွာထိုက်သော” ရေမွှေးထည့်ထားသည့်ဘူးကိုဖွင့်လိုက်သည်။ အမှန်ပင် တန်ဖိုးကြီးမားလှပေသည်! ယင်းသည် တစ်နှစ်စာလုပ်ခနှင့်ညီမျှသည့် ဒေနာရိအပြား ၃၀၀ အဖိုးတန်၏။ ယင်းဆီမွှေးကို ယေရှု၏ခေါင်းတော်နှင့်ခြေတော်ပေါ်သို့ သူမသွန်းလောင်းလိုက်သည်။ ခြေတော်ကိုခြောက်သွေ့စေရန် သူမ၏ဆံပင်ဖြင့်ပင်သုတ်တော်မူ၏။—မာကု ၁၄:၃; လုကာ ၁၀:၃၈-၄၂; ယောဟန် ၁၁:၃၈-၄၄; ၁၂:၁-၃။

၁၄။ (က) မာရိ၏အပြုအမူကို တပည့်တော်များ မည်သို့တုံ့ပြန်ကြသနည်း။ (ခ) မာရိဘက်မှနေ၍ ယေရှုမည်သို့ကာကွယ်ပေးတော်မူသနည်း။

^၁၄ တပည့်တော်များ ဒေါသထွက်သွားကြသည်! ‘အဘယ်ကြောင့် အကျိုးမဲ့ဆုံးစေသနည်း’ ဟုမေးမြန်းကြသည်။ ယုဒရှကာယုတ်က ခိုးဝှက်လိုသည့်ဆန္ဒကိုဖုံးကွယ်ကာ ဆင်းရဲသားတို့၏အကျိုးကိုထောက်သည့်သဘောဖြင့် “ဒေနာရိအပြားသုံးရာမကသောအဖိုးနှင့်ရောင်း၍ ဆင်းရဲသောသူတို့အားပေးစရာကောင်းသည်” ဟုဆို၏။ မာရိသည် တိတ်ဆိတ်စွာနေလိုက်သည်။ သို့ရာတွင် ယေရှုက တပည့်တော်များကို ဤသို့မိန့်တော်မူလိုက်သည်– “ထိုမိန်းမကိုရှိစေတော့။ အဘယ်ကြောင့်နှောင့်ယှက်ကြသနည်း။ သူသည်ငါ၌ကောင်းသော [ကာ.လော့စ်၏ပုံစံတစ်မျိုး] အမှုကိုပြုပြီ။ . . . ဤမိန်းမသည်တတ်နိုင်သမျှပြုပြီ။ ငါ့အလောင်းကိုသင်္ဂြိုဟ်မည်ဟု ပြင်ဆင်ခြင်းငှာ၊ ငါ့ကိုယ်၌ဆီမွှေးနှင့်လူးနှင့်သတည်း။ ငါအမှန်ဆိုသည်ကား၊ ဧဝံဂေလိတရားကို မြေတစ်ပြင်လုံးတွင်ဟောသောအရပ်ရပ်တို့၌ ဤမိန်းမကိုအောက်မေ့စရာဖို့ သူပြုသောဤအမှုကိုကြားပြောရကြလတ္တံ့။” ယေရှု၏နွေးထွေးသောစကားများက မာရိ၏နှလုံးကို အလွန်ပင်ငြိမ်သက်မှုရှိစေပါမည်တကား!—မာကု ၁၄:၄-၉; ယောဟန် ၁၂:၄-၈။

၁၅။ မာရိပြုလုပ်ခဲ့သည့်အရာက ယေရှုကို အဘယ်ကြောင့် အလွန်ထိမိသွားစေသနည်း၊ ၎င်းမှ စိုးလ်အကြွင်းမဲ့အမှုဆောင်ခြင်းနှင့်ပတ်သက်၍ အဘယ်အရာသင်ယူရရှိသနည်း။

^၁၅ မာရိပြုလုပ်ခဲ့သည့်အရာက ယေရှုကိုအလွန်တရာထိမိစေခဲ့သည်။ ကိုယ်တော့်အမြင်တွင် သူမသည် အမှန်ပင်ချီးမွမ်းခံထိုက်သောအမှုကို လုပ်ဆောင်ခဲ့သည်။ လက်ဆောင်၏တန်ဖိုးသည် ယေရှုအဖို့အရေးမပါသော်လည်း အမှန်မှာ “ဤမိန်းမသည်တတ်နိုင်သမျှပြုပြီ။” သူမသည် အခွင့်အလမ်းကိုယူ၍ သူမပေးနိုင်သည့်အရာကို ပေးခဲ့သည်။ ထိုစကားလုံးကို အခြားဘာသာပြန်ကျမ်းက “သူမတတ်နိုင်သမျှအားလုံးကိုပြုပြီ” သို့မဟုတ် “သူမတတ်စွမ်းနိုင်သည့်အရာကိုပြုပြီ” ဟူ၍ပြန်ဆို၏။ (အမေရိကန်ဘာသာပြန်ကျမ်း; ယေရုရှလင်ကျမ်းစာ) သူမအတတ်နိုင်ဆုံးကိုပေးခဲ့သောကြောင့် မာရိသည် စိုးလ်အကြွင်းမဲ့ပေးဆက်နေခြင်းဖြစ်သည်။ ယင်းသည် စိုးလ်အကြွင်းမဲ့လုပ်ဆောင်ခြင်းဖြစ်ပါသည်။

မုဆိုးမတစ်ဦး၏ “ကြေးနီဒ င်္ဂါးနှစ်ပြား”

၁၆။ (က) ဆင်းရဲသောမုဆိုးမတစ်ဦး၏အလှူငွေကို ယေရှု မည်သို့သတိပြုမိသနည်း။ (ခ) မုဆိုးမ၏ဒ င်္ဂါးပြားများသည် မည်မျှအဖိုးထိုက်သနည်း။

^၁၆ နောက်ရက်အနည်းငယ်အကြာ နိသန်လ ၁၁ ရက်နေ့တွင် ဗိမာန်တော်၌ကြာရှည်စွာနေတော်မူပြီး ထိုတွင် ကိုယ်တော့်လုပ်ပိုင်ခွင့်အာဏာအပေါ် မေးမြန်းခံရကာ အခွန်ပေးခြင်း၊ ထမြောက်ခြင်းနှင့် အခြားကိစ္စရပ်များနှင့်စပ်လျဉ်း၍ ယုံမှားဖွယ်မေးခွန်းများကိုလက်တန်းဖြေဆိုခဲ့သည်။ အခြားအရာများအပြင် “မုဆိုးမအိမ်ကိုလုယူသိမ်းစား” ခြင်းနှင့်စပ်လျဉ်း၍ ကျမ်းတတ်များနှင့် ဖာရိရှဲတို့ကို ကိုယ်တော်ပြစ်တင်ရှုတ်ချတော်မူ၏။ (မာကု ၁၂:၄၀) ထို့နောက် ဂျူးထုံးတမ်းအရ အလှူငွေသေတ္တာ ၁၃ ခုထားရှိသည့်နေရာဖြစ်သော အမျိုးသမီးများစုဝေးရာတံတိုင်းတော်၌ ယေရှုထိုင်တော်မူခဲ့သည်။ ကိုယ်တော်သည် ခဏထိုင်ကာ လူတို့သည် မိမိတို့၏အလှူဒါနများကိုလှူဒါန်းစဉ် ဂရုတစိုက်ကြည့်ရှုတော်မူ၏။ ငွေကြေးချမ်းသာသူ အမြောက်အမြားရောက်လာကြပြီး အချို့မှာ မိမိကိုယ်ကိုဖြောင့်မတ်ကြောင်းထင်ရှားစေရန်နှင့် လူအထင်ကြီးစေရန်ပင် ရောက်လာကြပုံရသည်။ (မဿဲ ၆:၂ နှိုင်းယှဉ်။) ယေရှု၏အကြည့်သည် အမျိုးသမီးတစ်ဦးအပေါ် အာရုံရောက်သွားသည်။ သာမန်မျက်စိဖြင့် သူမနှင့် သူမ၏လှူဖွယ်ပစ္စည်းနှင့်ပတ်သက်သော တစ်စုံတစ်ရာထူးခြားမှုကို သတိပြုမိမည်မဟုတ်ပေ။ သို့သော် ယေရှုသည် အခြားသူများ၏နှလုံးကိုသိရှိနိုင်သူဖြစ်ရာ သူမသည် “ဆင်းရဲသောမုဆိုးမတစ်ယောက်” ဖြစ်ကြောင်း သိလိုက်သည်။ သူမ၏လှူဖွယ်ပစ္စည်းဖြစ်သော “တစ်ပဲလောက်တန်သောကြေးနီဒ င်္ဂါးနှစ်ပြား” ဖြစ်သော တိကျသောပမာဏကိုလည်း ကိုယ်တော်သိရှိတော်မူ၏။b—မာကု ၁၂:၄၁၊ ၄၂။

၁၇။ မုဆိုးမ၏အလှူငွေကို ယေရှု မည်သို့လေးမြတ်သနည်း၊ ဘုရားသခင်အား ပေးကမ်းခြင်းနှင့်စပ်လျဉ်း၍ အဘယ်အရာသိရှိရသနည်း။

^၁၇ ယေရှုသည် တပည့်တော်များအား မိမိသွန်သင်ပေးတော့မည့်ဆဲဆဲသင်ခန်းစာကို မျက်မြင်ကိုယ်တွေ့တွေ့ရှိစေလိုတော်မူသောကြောင့် သူတို့ကိုခေါ်လိုက်သည်။ သူမသည် “ဘဏ္ဍာတိုက်ထဲသို့သွင်းချသောသူအပေါင်းတို့ထက် ထိုဆင်းရဲသောမုဆိုးမသည် သာ၍သွင်းချခဲ့ပြီ” ဟုယေရှုဆို၏။ ကိုယ်တော့်အမြင်တွင် သူမသည် တခြားသူများထည့်သည့်အားလုံးပေါင်းထက် သာ၍ထည့်သွင်း၏။ သူမ၏နောက်ဆုံးကျန်ငွေဖြစ်သော “ဥစ္စာရှိသမျှကို” ပေးခဲ့သည်။ ထိုသို့ပြုခြင်းဖြင့် ယေဟောဝါ၏ကြည့်ရှုမှုလက်တော်တွင် မိမိကိုယ်ကိုထားရှိလိုက်သည်။ တန်ဖိုးမရှိသလောက်ဥစ္စာကို လှူဒါန်းခဲ့သောသူအား ဘုရားသခင်ထံပေးကမ်းခြင်း၏စံနမူနာအဖြစ် ရွေးထုတ်ခဲ့သည်။ သို့ရာတွင် ယင်းသည် ဘုရားသခင့်မျက်မှောက်တော်၌ တန်ဖိုးမဖြတ်နိုင်ခဲ့ချေ!—မာကု ၁၂:၄၃၊ ၄၄; ယာကုပ် ၁:၂၇။

စိုးလ်အကြွင်းမဲ့အမှုဆောင်ခြင်းဆိုင်ရာ ယေဟောဝါ၏ရှုမြင်ပုံမှ သင်ယူခြင်း

၁၈။ အမျိုးသမီးနှစ်ဦးကို ယေရှုဆက်ဆံပုံမှ အဘယ်အရာသိရှိရသနည်း။

^၁၈ ထိုအမျိုးသမီးနှစ်ဦးကို ယေရှုဆက်ဆံပုံမှ စိုးလ်အကြွင်းမဲ့အမှုဆောင်ခြင်းဆိုင်ရာ ယေဟောဝါ၏ရှုမြင်ပုံနှင့်ပတ်သက်သည့် စိတ်နှလုံးနွေးထွေးစေသောသင်ခန်းစာကို ကျွန်ုပ်တို့သင်ယူရရှိပါသည်။ (ယောဟန် ၅:၁၉) ယေရှုသည် မုဆိုးမနှင့်မာရိကို နှိုင်းယှဉ်ခြင်းမပြုခဲ့။ မုဆိုးမ၏ဒ င်္ဂါးနှစ်ပြားအပေါ် ကိုယ်တော်၏တန်ဖိုးထားမှုသည် မာရိ၏ “အဖိုးများစွာထိုက်သော” ဆီမွှေးထက် လျော့မသွားချေ။ ဤအမျိုးသမီးတစ်ဦးစီသည် သူတို့အတတ်နိုင်ဆုံးကိုပေးကြသောကြောင့် သူတို့၏လက်ဆောင်နှစ်ခုစလုံးသည် ဘုရားသခင့်မျက်မှောက်တော်တွင် တန်ဖိုးရှိတော်မူ၏။ ထို့ကြောင့် ဘုရားသခင်အား အမှုဆောင်ရာတွင် သင်လုပ်ဆောင်လိုသည့်အရာအားလုံးကို မလုပ်ဆောင်နိုင်သောကြောင့် တန်ဖိုးမရှိပါဟုခံစားရပါက စိတ်မပျက်ပါနှင့်။ သင်အတတ်နိုင်ဆုံးပေးဆောင်သည့်အရာကို ယေဟောဝါနှစ်သက်တော်မူ၏။ ယေဟောဝါသည် “နှလုံးကိုကြည့်ရှုတတ်” ကြောင်း သတိရပါ၊ ထို့ကြောင့် ကိုယ်တော်သည် သင့်နှလုံးသား၏ပြင်းပြသောဆန္ဒများကို အပြည့်အဝသိရှိတော်မူ၏။—၁ ဓမ္မရာဇဝင် ၁၆:၇။

၁၉။ ဘုရားသခင်အားအမှုဆောင်ရာတွင် အခြားသူများလုပ်ဆောင်သည့်အရာကို အဘယ်ကြောင့် မစီရင်သင့်သနည်း။

^၁၉ စိုးလ်အကြွင်းမဲ့အမှုဆောင်ခြင်းဆိုင်ရာ ယေဟောဝါ၏ရှုမြင်ပုံက တစ်ဦးကိုတစ်ဦး ကျွန်ုပ်တို့၏ရှုမြင်ပုံနှင့် ဆက်ဆံခြင်းအပေါ် ဩဇာသက်ရောက်သင့်သည်။ အခြားသူများ၏ကြိုးပမ်းမှုများကို ပြစ်တင်ဝေဖန်ခြင်း သို့မဟုတ် တစ်ဦးတစ်ယောက်၏လုပ်ဆောင်မှုကို အခြားသူတစ်ဦးနှင့်နှိုင်းယှဉ်ခြင်းသည် အလွန်ပင်မေတ္တာကင်းမဲ့ပါသည်တကား! ဝမ်းနည်းစရာကား ခရစ်ယာန်တစ်ဦး ဤသို့ရေးသားခဲ့ခြင်းပင်– “တချို့သူတွေဟာ မင်းရှေ့ဆောင်တစ်ဦးဟုတ်ရင်ဟုတ် ဒါမှမဟုတ်ရင် အလကားဆိုပြီး သဘောသက်ရောက်စေတဲ့အခါတွေရှိတယ်။ ကျွန်မတို့လို မှန်မှန်နိုင်ငံတော်ကြေညာသူများအဖြစ် ‘သာ’ ရှေ့ဆက်သွားဖို့ကြိုးစားရုန်းကန်နေရတဲ့သူတွေလည်း လေးမြတ်ခံရကြောင်း ခံစားရဖို့လိုပါတယ်။” ခရစ်ယာန်ချင်းတစ်ဦး၏ စိုးလ်အကြွင်းမဲ့အမှုဆောင်ခြင်းတွင် အဘယ်အရာပါဝင်ကြောင်းကို စီရင်ချက်ချရန်အတွက် ကျွန်ုပ်တို့တွင် အခွင့်အာဏာမရှိကြောင်း သတိရကြစို့။ (ရောမ ၁၄:၁၀-၁၂) ယေဟောဝါသည် သစ္စာရှိရှိနိုင်ငံတော်ကြေညာသူသန်းပေါင်းများစွာထဲမှ တစ်ဦးစီ၏စိုးလ်အကြွင်းမဲ့လုပ်ဆောင်မှုကို မြတ်နိုးတော်မူ၏၊ သို့အတွက် ကျွန်ုပ်တို့ပါ ထိုသို့ပြုသင့်ပေသည်။

၂၀။ ကျွန်ုပ်တို့၏ဝတ်ပြုသူချင်းတို့နှင့်ပတ်သက်သော မည်သည့်အရာကိုထင်မြင်ယူဆခြင်းသည် များသောအားဖြင့် အကောင်းဆုံးဖြစ်သနည်း။

^၂၀ သို့ဆိုလျှင် အချို့သူများသည် ဓမ္မအမှုတွင်တတ်နိုင်သည်ထက် လျော့၍လုပ်ဆောင်နေပုံရလျှင်ကော အသို့နည်း။ ယုံကြည်သူချင်းတစ်ဦး၏လုပ်ဆောင်မှုကျဆင်းခြင်းက စိုးရိမ်ကြောင့်ကြမှုရှိသောအကြီးအကဲများအနေဖြင့် အကူအညီပေးရန် သို့မဟုတ် အားပေးတိုက်တွန်းရန်လိုအပ်ကြောင်း ဖော်ပြပါသည်။ တစ်ချိန်တည်းတွင် တချို့သူတို့အတွက် စိုးလ်အကြွင်းမဲ့အမှုဆောင်ခြင်းသည် မာရိ၏ဈေးကြီးလှသောဆီမွှေးထက် မုဆိုးမ၏ဒ င်္ဂါးပြားများနှင့် အတော်ကလေးဆင်တူမည်ဖြစ်ကြောင်းကို မမေ့သင့်ပေ။ ကျွန်ုပ်တို့၏ညီအစ်ကိုညီအစ်များသည် ယေဟောဝါကိုချစ်မြတ်နိုးကြပြီး ထိုချစ်ခြင်းမေတ္တာက—အနည်းငယ်မျှသာမဟုတ်ဘဲ—သူတို့တတ်နိုင်သမျှကိုလုပ်ဆောင်ရန် လှုံ့ဆော်ပေးမည်ဟု ထင်မြင်ယူဆခြင်းသည် များသောအားဖြင့် အကောင်းဆုံးဖြစ်သည်။ တာဝန်သိတတ်သော ယေဟောဝါ၏ကျေးကျွန်သည် ဘုရားသခင်အားအမှုဆောင်ရာတွင် သူလုပ်နိုင်သည်ထက်လျော့၍လုပ်ဆောင်ရန် ရွေးချယ်လိမ့်မည်မဟုတ်သည်မှာ သေချာပါသည်!—၁ ကောရိန္သု ၁၃:၄၊ ၇။

၂၁။ မည်သည့်ဆုကျေးဇူးရရှိစေသောလုပ်ငန်းကို များစွာသောသူတို့လုပ်ဆောင်ကြသနည်း၊ အဘယ်မေးခွန်းများပေါ်လာသနည်း။

^၂၁ သို့ရာတွင် များစွာသောဘုရားသခင့်လူတို့အတွက် စိုးလ်အကြွင်းမဲ့အမှုဆောင်ခြင်းသည် ထူးကဲသည့်ဆုကျေးဇူးကိုရရှိစေသောလုပ်ငန်းဖြစ်သည့် ရှေ့ဆောင်ဓမ္မအမှုကို လုပ်ဆောင်ခြင်းဟူ၍ အဓိပ္ပာယ်ရှိသည်။ အဘယ်ကောင်းချီးများ ရရှိစေပါသနည်း။ ထို့ပြင် ကျွန်ုပ်တို့အထဲမှ ရှေ့ဆောင်မလုပ်နိုင်သေးသည့်သူများနှင့်ပတ်သက်၍ကော အသို့နည်း၊ ရှေ့ဆောင်စိတ်ဓာတ်ကို မည်သို့တင်ပြနိုင်သနည်း။ ဤမေးခွန်းများကို နောက်ဆောင်းပါးတွင် ဆွေးနွေးပါလိမ့်မည်။

[အောက်ခြေမှတ်ချက်များ]

သင်မည်သို့ဖြေဆိုမည်နည်း

◻ ယေဟောဝါအား စိုးလ်အကြွင်းမဲ့အမှုဆောင်ခြင်းမည်သည် ဘာကိုဆိုလိုသနည်း။

◻ အခြားသူများနှင့် ကျွန်ုပ်တို့ကို ယေဟောဝါနှိုင်းယှဉ်တော်မမူကြောင်း ၁ ကောရိန္သု ၁၂:၁၄-၂၆ ပါသရုပ်ဖော်ထားချက်က မည်သို့တင်ပြသနည်း။

◻ မာရိ၏ဈေးကြီးလှသောဆီမွှေးနှင့် မုဆိုးမ၏ကြေးနီဒ င်္ဂါးနှစ်ပြားအပေါ် ယေရှု၏ပြောဆိုချက်များမှ စိုးလ်အကြွင်းမဲ့ပေးဆက်ခြင်းအကြောင်း အဘယ်အရာသိရှိရသနည်း။

◻ စိုးလ်အကြွင်းမဲ့အမှုဆောင်ခြင်းဆိုင်ရာ ယေဟောဝါ၏ရှုမြင်ပုံက ကျွန်ုပ်တို့အချင်းချင်းကိုရှုမြင်ပုံအပေါ် မည်သို့သြဇာသက်ရောက်စေသင့်သနည်း။

[စာမျက်နှာ ၁၅ ပါ ရုပ်ပုံ]

မာရိသည် သူမအတတ်နိုင်ဆုံးကိုပေးခဲ့ကာ ယေရှု၏ကိုယ်ခန္ဓာကို “အဖိုးများစွာထိုက်သော” ဆီမွှေးဖြင့်သင်းပျံ့စေသည်

[စာမျက်နှာ ၁၆ ပါ ရုပ်ပုံ]

မုဆိုးမ၏ကြေးနီဒ င်္ဂါးပြားများသည် တန်ဖိုးမရှိသလောက်သောဥစ္စာဖြစ်သော်လည်း ယေဟောဝါ၏မျက်မှောက်တော်၌ တန်ဖိုးမဖြတ်နိုင်ချေ