ဘုရားရေးရာ စိတ်ထားဖြင့်ပေးကမ်းသူများအတွက် ထာဝရပျော်ရွှင်မှုရှိ

၁၊ ၂။ (က) အများဆုံးပေးကမ်းစွန့်ကြဲသူကားမည်သူနည်း။ လူသားအားပေးတော်မူသည့် အကြီးမြတ်ဆုံးဆုကားအဘယ်နည်း။ (ခ) ကိုယ်တော်၏အကြီးမြတ်ဆုံးဆုကိုပေးရာတွင် အဘယ်အရည်အချင်းကိုဘုရားသခင်တင်ပြတော်မူသနည်း။

ယေဟောဝါဘုရားသခင်သည် ရှိရှိသမျှတွင်အများဆုံးပေးကမ်းစွန့်ကြဲသူဖြစ်သည်။ ကောင်းကင်မြေကြီးကို ဖန်ဆင်းတော်မူသောကိုယ်တော်ရှင်နှင့်ပတ်သက်၍ ခရစ်ယာန်တပည့်တော်ယာကုပ် ဤသို့ရေးသားခဲ့ခြင်းဖြစ်သည်။ “ကောင်းမြတ်စုံလင်သောဆုကျေးဇူးရှိသမျှတို့သည် အလင်းတို့၏အဘထံတော်ကသက်ရောက်သည်ဖြစ်၍ အထက်အရပ်မှလာကြ၏။ ထိုအဘသည် ရွေ့လျော့တိမ်းယိမ်းခြင်းမရှိ၊ ပြောင်းလဲခြင်းအရိပ်နှင့်ကင်းလွတ်တော်မူ၏။” (ယာကုပ် ၁:၁၇) ပေးကမ်းသမျှဆုတို့တွင် အကြီးမြတ်ဆုံးဆုကိုပေးသောသခင်သည် ယေဟောဝါရှင်ပင်ဖြစ်သည်။ လူသားတို့အားပေးကမ်းသည့် အကြီးမြတ်ဆုံးဆုကျေးဇူးအကြောင်း ဤသို့ဆိုထားသည်။ “ဘုရားသခင်၏သားတော်ကိုယုံကြည်သောသူအပေါင်းတို့သည် ပျက်စီးခြင်းသို့မရောက်၊ ထာဝရအသက်ကိုရစေခြင်းငှာ ဘုရားသခင်သည် မိမိ၌တစ်ပါးတည်းသောသားတော်ကိုစွန့်တော်မူသည်တိုင်အောင် လောကီသားတို့ကိုချစ်တော်မူ၏။”—ယောဟန် ၃:၁၆။

^၂ ထိုစကားများကိုမြွက်ဆိုခဲ့သူမှာ ဘုရားသခင်၏တစ်ပါးတည်းသောသားကိုယ်တော်တိုင်ပင်ဖြစ်သည်။ ဖခင်ကြောင့်အသက်ရှင်ခွင့်ရသည့်ပြင် ဘဝပျော်မွေ့ရာအရာခပ်သိမ်းပြင်ဆင်ပေးသည့်အဘကို တစ်ပါးတည်းသောသားဖြစ်သူသည် အလွန်ချစ်မြတ်နိုးပါလိမ့်မည်။ သို့သော်ဘုရားသခင့်မေတ္တာတော်သည် ဤသားတစ်ပါးတည်းအပေါ်သာထားသည်မဟုတ်။ အခြားဝေနေယျသတ္တဝါများအား ဤဆုကျေးဇူးခံစားစေရန် ဘုရားသခင်သည် ထူးခြားစွာမေတ္တာတင်ပြရန်လိုအပ်တော်မူမည်။ (ရောမ ၅:၈-၁၀ နှင့်နှိုင်းယှဉ်။) ယင်း၏ရှေ့နောက်စကားတွင် ‘စွန့်ပေးသည်’ ဟူသောစကားလုံး၏အဓိပ္ပာယ်မည်မျှလေးနက်သည်ကိုသုံးသပ်သည့်အခါ မေတ္တာတော်ကြီးမားကြောင်း သာ၍ထင်ရှားပေသည်။

ဘုရားသခင်၏ “ချစ်တော်မူသောသားတော်” ဆုကျေးဇူး

၃။ “ချစ်တော်မူသောသားတော်” အပြင် ကောင်းကင်ခမည်းတော်၏မေတ္တာကို မည်သူတို့ခံစားရသနည်း။

^၃ ဤတစ်ပါးတည်းသော “ချစ်တော်မူသောသားတော်” နှင့်အတူ ဘုရားသခင်သည် အချိန်အတန်ကြာကောင်းကင်ဘဝဂ်ဝယ်ကျိန်းဝပ်တော်မူခဲ့သည်။ (ကောလောသဲ ၁:၁၃) ထိုအချိန်ကာလအတွင်း ယင်းသားအဖသည် မည်သူနှင့်မျှမတူ တစ်ဦးအပေါ်တစ်ဦးမေတ္တာတိုးပွားကြ၏။ တစ်ပါးတည်းသောသားတော်မှတစ်ဆင့် ဘုရားသခင်အသက်ရှင်စေတော်မူသော အခြားဝေနေယျသတ္တဝါများအဖြစ် ယေဟောဝါဘုရား၏အိမ်ထောင်အဝင်ဖြစ်ကြရာ ချစ်မြတ်နိုးခံရကြပါသည်။ သို့ဖြင့်ဘုရားသခင့်အိမ်ထောင်စုတွင် မေတ္တာလွှမ်းမိုးခဲ့ပေသည်။ ယင်းကြောင့်လည်း “ဘုရားသခင်သည် ချစ်ခြင်းမေတ္တာဖြစ်တော်မူသည်” ဟုသမ္မာကျမ်းစာမှန်ကန်စွာဖော်ကျူးထားသည်။ (၁ ယောဟန် ၄:၈) ဤအတွက်ဘုရားသခင့်အိမ်ထောင်စုတွင် ခမည်းတော်ယေဟောဝါဘုရားချစ်မြတ်နိုးခံရသူများရှိပါလိမ့်မည်။

၄။ သားတော်ကိုစွန့်ခြင်းကား ဘုရားသခင်အတွက် နှစ်ကိုယ်ကြားပေါင်းသင်းမှုဖြတ်တောက်ခြင်းထက်မက မည်သို့ဖြစ်သနည်း။ မည်သူ့အကျိုးအလိုငှာဖြစ်သနည်း။

^၄ ယေဟောဝါရှင်နှင့် ကိုယ်တော်၏သားဦးတို့စပ်ကြား နှောင်ကြိုးသည် စည်းကြပ်လွန်းလှသဖြင့် “ဘုရားသခင်၏သားတော်ကိုယုံကြည်သောသူအပေါင်းတို့သည် ပျက်စီးခြင်းသို့မရောက်၊ ထာဝရအသက်ကိုရစေခြင်းငှာ ဘုရားသခင်သည် မိမိ၌တစ်ပါးတည်းသောသားတော်ကိုစွန့်တော်မူသည်တိုင်အောင် လောကီသားတို့ကိုချစ်တော်မူ၏။”—ယောဟန် ၃:၁၆။

သူတို့၏ရင်းနှီးချစ်ခင်သောပေါင်းသင်းမှုကို ဖြတ်တောက်ပစ်ပါက အလွန်ဆုံးရှုံးမှုကြီးဖြစ်ပေလိမ့်မည်။ (ကောလောသဲ ၁:၁၅) သို့သော်ဤတစ်ပါးတည်းသောသားတော်ကို ‘စွန့်ပေးခြင်း’ ကား “ချစ်တော်မူသောသားတော်” နှင့်နှစ်ကိုယ်ကြားပေါင်းသင်းမှုဖြတ်တောက်ခြင်းထက်မက ဘုရားသခင်အဖို့နစ်နာဆုံးရှုံးမှုဖြစ်ပါသည်။ သားတော်သေဆုံးရသည့်အတွက် ဘုရားသခင်၏စကြဝဠာအိမ်ထောင်သားအဖြစ်မှ ခေတ္တပျောက်ဆုံးရသည့်အဖြစ်မျိုးကို သားတော်အားယေဟောဝါခံစေရသည်အထိ စွန့်လွှတ်တော်မူခဲ့ရသည်။ ဤသို့သေရခြင်းသည် ဘုရားသခင်၏အိမ်ထောင်စုအဝင်မဖြစ်ခဲ့ဖူးသောသူတို့အကျိုးအလိုငှာဖြစ်သည့်အတွက် “ဘုရားသခင်၏ဝေနေယျသတ္တဝါတို့၏အထွတ်” ဟုသမ္မာကျမ်းစာခေါ်ဆိုသည့် တစ်ပါးတည်းသောသားတော်ကိုစွန့်သည့်ဆုထက် သာ၍တန်ဖိုးကြီးမားသောဆုကို လူသားအတွက်ယေဟောဝါပေးနိုင်စရာမရှိပါ။—ဗျာဒိတ် ၃:၁၄။

၅။ (က) အာဒံအမျိုးအနွယ်၏အဖြစ်ဆိုးကားအဘယ်နည်း။ ကိုယ်တော်၏သစ္စာရှိသားတစ်ဦးထံမှ ဘုရားသခင်၏တရားမျှတမှုကား အဘယ်အရာတောင်းဆိုသနည်း။ (ခ) ဘုရားသခင်၏အကြီးမြတ်ဆုံးသောဆုကျေးဇူးကား ကိုယ်တော်တိုင်မှ အဘယ်အရာတောင်းဆိုပါသနည်း။

^၅ ပထမလူမောင်နှံစုံ အာဒံနှင့်ဧဝတို့သည် ဘုရားသခင့်အိမ်ထောင်သားအဖြစ်ကို တန်ဖိုးမထားခဲ့ကြပါ။ ဘုရားသခင်ကိုပြစ်မှားကြသည့်အတွက် ဧဒင်ဥယျာဉ်မှနှင်ထုတ်ခံရပြီးနောက် ဘုရားသခင့်အိမ်ထောင်စုအဝင်မဖြစ်ကြတော့သည်သာမက သေဒဏ်သင့်နေကြပါသည်။ ထိုကြောင့်သူတို့၏သားသမီးများ ဘုရားသခင့်မျက်နှာသာနှင့်တွေ့ရန်သာမက သေဒဏ်မှလွတ်မြောက်ကြစေရန်ပြုလုပ်ပေးဖို့လိုနေပါသည်။ ယင်းအတွက် ဘုရားသခင်၏တရားမျှတခြင်းသဘောတရားအရ ယေဟောဝါဘုရားသခင်၏သစ္စာရှိသားတစ်ပါးသည် သေစားသေရန် သို့မဟုတ် ရွေးဖိုးအဖြစ်အသေခံရန်လိုနေပါ၏။ ထိုကြောင့်ပြဿနာကား၊ အရွေးခံရသူသည် အပြစ်သားများအကျိုးအလိုငှာ သေစားသေလိုပါမည်လော။ ထို့ပြင်ဤအမှုဖြစ်ပျက်လာစေရန် အနန္တတန်ခိုးရှင်ကိုယ်တော်တိုင် တန်ခိုးပြရပါဦးမည်။ နှိုင်းယှဉ်ပြချက်မရှိ ကြီးမားသောချစ်ခြင်းမေတ္တာကိုဘုရားသခင်ထင်ရှားပြဖို့လည်းလိုပါမည်။—ရောမ ၈:၃၂။

၆။ အပြစ်ရှိလူသားတို့နှင့်ပတ်သက်နေသည့်အခြေအနေနှင့်အညီ ဘုရားသခင်၏သားတော်သည် မည်သို့အကျိုးဆောင်ပေးနိုင်သနည်း။ ယင်းနှင့်စပ်လျဉ်း၍ ဘုရားသခင်မည်သို့ဆိုသနည်း။

^၆ အပြစ်ရှိလူသားတို့နှင့်ပတ်သက်နေသည့် ထူးခြားသောအခြေအနေနှင့်အညီ အကျိုးဆောင်ပေးနိုင်သူကား ယေဟောဝါ၏သားဦးတစ်ပါးတည်းသာဖြစ်သည်။ ဘုရားသခင်ဖြစ်ပေါ်စေသည့်အိမ်ထောင်သားများအပေါ် ကောင်းကင်ခမည်းတော်၏ပုံသဏ္ဌာန်အတိုင်း မေတ္တာထားတော်မူသည့်အတွက် ဘုရားသခင့်သားများတွင် ကိုယ်တော်သည် သူမတူအောင်ထူးခြားသည်။ ဝေနေယျသတ္တဝါအပေါင်းတို့သည် ကိုယ်တော်အားဖြင့်ဖြစ်ဖွားလာသည့်အတွက် သူတို့ကိုများစွာချစ်မြတ်နိုးမည်အမှန်။ ထို့ပြင် “သားတော်သည် ဘုရားသခင်၏ဘုန်းတော်ရောင်ခြည်နှင့် ဇာတိအဖြစ်တော်၏ပုံသဏ္ဌာန်ဖြစ်” တော်မူသဖြင့် ချစ်ခြင်းမေတ္တာသည် ယေဟောဝါ၏တစ်ပါးတည်းသောသားတော်ယေရှုခရစ်၏ အထူးခြားဆုံးအရည်အချင်းဖြစ်သည်။ (ဟေဗြဲ ၁:၃) အပြစ်ရှိလူသားတို့အကျိုးအလိုငှာအသက်ပေးခြင်းဖြင့် ကြီးမားသောမေတ္တာတင်ပြလိုကြောင်းကို တမန်တော် ၁၂ ပါးအားယေရှုဤသို့မိန့်တော်မူသည်။ “လူသားသည် သူတစ်ပါးကိုစေစားခြင်းငှာမလာ၊ သူတစ်ပါးအစေကိုခံခြင်းငှာလည်းကောင်း၊ မိမိအသက်ကိုစွန့်၍ လူများကိုရွေးခြင်းငှာလည်းကောင်း ကြွလာသတည်း။”—မာကု ၁၀:၄၅။ ယောဟန် ၁၅:၁၃ ကိုလည်းကြည့်ပါ။

၇၊ ၈။ (က) လူ့လောကသို့ယေရှုခရစ်ကို ယေဟောဝါစေလွှတ်ရခြင်းရည်ရွယ်ချက်ကားအဘယ်နည်း။ (ခ) တစ်ပါးတည်းသောသားတော်ကို အဘယ်လုပ်ငန်းဆောင်ရွက်ရန် ဘုရားသခင်စေလွှတ်တော်မူသနည်း။

^၇ ဆင်းရဲဒုက္ခရောက်နေသောလောကအတွင်း ယေရှုအားယေဟောဝါဘုရားသခင်စေလွှတ်ခဲ့ရသည့် အကြောင်းထူးတစ်ရပ်ရှိသည်။ စေ့ဆော်ချက်မှာ ဘုရားသခင့်မေတ္တာတော်ပင်ဖြစ်ကြောင်း ယေရှုကိုယ်တော်တိုင် ဤသို့ဆိုသည်။ “ဘုရားသခင်၏သားတော်ကိုယုံကြည်သောသူအပေါင်းတို့သည် ပျက်စီးခြင်းသို့မရောက်၊ ထာဝရအသက်ကိုရစေခြင်းငှာ ဘုရားသခင်သည်မိမိ၌တစ်ပါးတည်းသောသားတော်ကိုစွန့်တော်မူသည်တိုင်အောင် လောကီသားတို့ကိုချစ်တော်မူ၏။ လောကီသားတို့အားအပြစ်စီရင်ခြင်းငှာ ဘုရားသခင်သည်သားတော်ကို ဤလောကသို့စေလွှတ်တော်မူသည်မဟုတ်။ လောကီသားတို့သည် ကိုယ်တော်အားဖြင့် ကယ်တင်ခြင်းသို့ရောက်မည်အကြောင်း စေလွှတ်တော်မူ၏။”—ယောဟန် ၃:၁၆၊ ၁၇။

^၈ လောကီသားတို့ကိုတရားစီရင်ခြင်းငှာမဟုတ် ကယ်တင်ခြင်းငှာ တစ်ပါးတည်းသောသားတော်ကို မေတ္တာရှင်ယေဟောဝါဘုရား စေလွှတ်တော်မူသည်။ တရားစီရင်စေခြင်းငှာ ဘုရားသခင့်သားတော်အားစေလွှတ်တော်မူလျှင် လောကီသားတို့အတွက် အဘယ်မျှော်လင့်ချက်မျှရှိမည်မဟုတ်။ ထိုအတွက်ကြွလာခဲ့ပါက လူ့အိမ်ထောင်စုအပေါ် ယေရှုခရစ်၏စီရင်ချက်မှာ သေဒဏ်ပင်ဖြစ်မည်။ (ရောမ ၅:၁၂) သို့ဖြစ်၍ မြင့်မြတ်သောမေတ္တာတော်ကိုထူးခြားစွာတင်ပြခြင်းဖြင့် တရားမျှတခြင်းနှင့်အညီခံသင့်သောသေဒဏ်ကို ဘုရားသခင်ချေဖျက်တော်မူသည်။

၉။ ယေဟောဝါပေးတော်မူသမျှကို ဆာလံဆရာဒါဝိဒ် မည်သို့ယူမှတ်သနည်း။

^၉ အရာခပ်သိမ်းတွင် ယေဟောဝါ၏အထူးခြားဆုံးအရည်အချင်းဖြစ်သည့် ချစ်ခြင်းမေတ္တာကို ကိုယ်တော်တင်ပြတော်မူ၏။ သစ္စာရှိကျေးကျွန်တို့အား ကောင်းမြတ်ရာများကို လိုသည်ထက်ပိုလျှံ၍ပေးထားတော်မူသည်ဟု မှန်ကန်စွာပြောဆိုနိုင်ပါသည်။ ဤအတိုင်းပင်ဒါဝိဒ်ယူမှတ်ခဲ့၍ ဘုရားသခင်ကိုဤသို့ချီးမွမ်းသည်။ “ကိုယ်တော်ကိုကြောက်ရွံ့သောသူတို့အဖို့သိုထားတော်မူ၍ လူသားတို့ရှေ့မှာ ကိုယ်တော်ကိုခိုလှုံသောသူတို့အဖို့ပြုပြင်တော်မူသောဆုကျေးဇူးတော်သည် အလွန်ကြီးလှပါ၏။” (ဆာလံ ၃၁:၁၉) ဣသရေလလူမျိုးကိုဒါဝိဒ်အုပ်စိုးစဉ်၊ ဘုရားသခင်အထူးရွေးချယ်ခံရသည့်လူမျိုးအဝင်ဖြစ်သည့် တစ်သက်တာပတ်လုံး ယေဟောဝါ၏ကောင်းမြတ်ခြင်းကိုကြွယ်ဝများပြားစွာ ထပ်ခါတလဲခံစားခဲ့ရပါသည်။

ဣသရေလလူမျိုးဆုံးရှုံးခဲ့သည့် ဘုရားသခင့်အထံတော်မှကြီးမြတ်သောဆုကျေးဇူး

၁၀။ ရှေးဣသရေလလူမျိုးသည် အခြားမည်သည့်လူမျိုးနှင့်မျှ အဘယ်ကြောင့်မတူသနည်း။

^၁၀ ယေဟောဝါအားဘုရားသခင်အဖြစ်ကိုးကွယ်ရခြင်းကြောင့် ရှေးဣသရေလလူမျိုးသည် အခြားမည်သည့်လူမျိုးနှင့်မျှမတူပါ။ စေ့စပ်ရေးမှူးအဖြစ် ပရောဖက်မောရှေကိုအသုံးပြုကာ အာဗြဟံ၊ ဣဇာက်နှင့်ယာကုပ်တို့၏အမျိုးအနွယ်ကို ယေဟောဝါရှင်သည် မိမိနှင့်ပဋိညာဉ်ဖွဲ့စေတော်မူသည်။ ဤပုံစံအတိုင်း အခြားမည်သည့်လူမျိုးနှင့်မျှ ကိုယ်တော်မဆက်ဆံပါ။ ထိုကြောင့်မှုတ်သွင်းခံဆာလံဆရာ ဤသို့ကြွေးကြော်နိုင်ခဲ့ခြင်းဖြစ်သည်။ “နှုတ်ကပါဌ်အမိန့်တော်ကို ယာကုပ်အမျိုး၌လည်းကောင်း၊ စီရင်ထုံးဖွဲ့တော်မူချက်များကို ဣသရေလအမျိုး၌လည်းကောင်းဖော်ပြတော်မူ၏။ အခြားတစ်ပါးသောအမျိုးသားတို့၌ ထိုသို့ပြုတော်မမူ။ စီရင်တော်မူချက်များကို သူတို့မသိရကြ။ ဟာလေလုယ။”—ဆာလံ ၁၄၇:၁၉၊ ၂၀။

၁၁။ ဘုရားသခင့်မျက်နှာသာခံအခြေအနေကို အဘယ်အချိန်တိုင်အောင် ဣသရေလလူမျိုးခံစားရသနည်း။ သူတို့၏တော်စပ်ပုံပြောင်းလဲခြင်းအကြောင်း ယေရှုမည်သို့ဆိုသနည်း။

^၁၁ ကျွန်ုပ်တို့၏ခေတ်သက္ကရာဇ် ၃၃ ခုနှစ်တွင် ယေရှုခရစ်တော်အား မေရှိယသခင်အဖြစ်လက်မခံ၊ ငြင်းပယ်ခဲ့ချိန်တွင် ဣသရေလလူမျိုးသည် ဘုရားသခင့်မျက်နှာသာရသောအခွင့်အရေးကိုဆုံးရှုံးခဲ့သည်။ ကြေကွဲစွာဖြင့် ဤသို့ယေရှုကြွေးကြော်ခဲ့ရသောအချိန်သည် ဣသရေလလူမျိုးအတွက် အမှန်ဝမ်းနည်းစရာကောင်းသောနေ့ရက်ဖြစ်ပေသည်။ “အိုယေရုရှလင်မြို့၊ ယေရုရှလင်မြို့၊ သင်သည်ပရောဖက်တို့ကိုသတ်မြဲရှိ၏။ သင်ရှိရာသို့စေလွှတ်သောသူတို့ကိုလည်း ကျောက်ခဲနှင့်ပစ်မြဲရှိ၏။ ကြက်မသည် မိမိသားငယ်တို့ကိုအတောင်အောက်၌စုရုံးသကဲ့သို့ သင်၏သားတို့ကိုစုရုံးစေခြင်းငှာ ကြိမ်ဖန်များစွာငါအလိုရှိပြီ။ သင်မူကားအလိုမရှိ။ သင်တို့နေသောအိမ်သည်သင်တို့၌ဆိတ်ညံလျက်ကျန်ရစ်ရ၏။” (မဿဲ ၂၃:၃၇၊ ၃၈) ယခင်ကယေဟောဝါ၏မျက်နှာသာတော်ခံရသော ဣသရေလလူမျိုးသည် ဘုရားသခင့်ထံတော်မှထူးမြတ်သောဆုကျေးဇူးကိုဆုံးရှုံးလေပြီဖြစ်ကြောင်း ယေရှု၏စကားများကတင်ပြပါသည်။ မည်သို့အားဖြင့်နည်း။

၁၂။ ‘ယေရုရှလင်မြို့မှသားငယ်တို့’ ကားမည်သူများနည်း။ သူတို့အားစုရုံးသည်ဆိုရာ၌ ယေရှုအဘယ်အရာကိုဆိုလိုသနည်း။

^၁၂ “သားငယ်တို့” ဟူသောစကားလုံးကိုအသုံးပြုတော်မူခြင်းအားဖြင့် ယေရုရှလင်မြို့၌နေထိုင်၍ ဂျူးလူမျိုးတစ်မျိုးလုံးကိုတင်စားသော ဇာတိပကတိဂျူးများကိုသာ ယေရှုရည်ညွှန်းတော်မူ၏။ ‘ယေရုရှလင်မြို့မှသားငယ်တို့’ ကိုယေရှုစုရုံးရန်ကား ဤ “သားငယ်တို့” အားဘုရားသခင်နှင့်ပဋိညာဉ်သစ်ဖွဲ့စေရန်ဖြစ်သည်။ ကိုယ်တော်တိုင်သည် ယေဟောဝါနှင့်ဤဇာတိပကတိဂျူးများစပ်ကြား စေ့စပ်ပေးသူဖြစ်ပေမည်။ (ယေရမိ ၃၁:၃၁-၃၄) ဘုရားသခင့်မေတ္တာကြီးမားတော်မူသဖြင့် ယင်းအားဖြင့် အပြစ်လွှတ်ခံရမည်ဖြစ်သည်။ (မာလခိ ၁:၂ နှိုင်းယှဉ်။) ဤသည်ကား ကြီးမားသောဆုအမှန်ဖြစ်ပေမည်။

၁၃။ ဘုရားသခင့်သားတော်ကို ဣသရေလလူမျိုးငြင်းပယ်ခဲ့ခြင်းကား အဘယ်ဆုံးရှုံးမှုဖြစ်ပေါ်စေသနည်း။ သို့သော်ယေဟောဝါ၏ရွှင်လန်းမှု အဘယ်ကြောင့် မလျော့နည်းသနည်း။

^၁၃ ကိုယ်တော်၏ပရောဖက်ပြုနှုတ်ကပါဌ်တော်နှင့်အညီ ပဋိညာဉ်သစ်ဝင်စားသောဆုကို ဂျူးမဟုတ်သူတို့အားမပေးမီ စောင့်ဆိုင်းသင့်သလောက် ယေဟောဝါစောင့်နေတော်မူသည်။ သို့သော်ဘုရားသခင့်သားတော်မေရှိယကိုငြင်းပယ်ခြင်းဖြင့် ဇာတိပကတိဣသရေလလူမျိုးသည် ဤကြီးမြတ်သောဆုကျေးဇူးကိုဆုံးရှုံးခဲ့သည်။ ထိုကြောင့်သားတော်အားငြင်းပယ်ခြင်းကိုကာမိရန် ဂျူးလူမျိုးမဟုတ်သူတို့ထံ ဤဆုကျေးဇူးကိုယေဟောဝါကမ်းလှမ်းပေးတော်မူသည်။ ဤနည်းဖြင့်ကြီးမြတ်တော်မူသောပေးကမ်းရှင်ယေဟောဝါသည် ဆက်၍ရွှင်လန်းဝမ်းမြောက်နိုင်တော်မူသည်။

ပေးကမ်းခြင်းကြောင့်ပျော်ရွှင်ရခြင်း

၁၄။ ယေရှုခရစ်သည် စကြဝဠာတွင်အဘယ်ကြောင့်အပျော်ရွှင်ဆုံးဖြစ်တော်မူသနည်း။

^၁၄ ယေဟောဝါသည် “ရွှင်လန်းသောဘုရား” ဖြစ်တော်မူသည်။ (၁ တိမောသေ ၁:၁၁) သူတစ်ထူးကိုပေးကမ်းခြင်းမှလည်း ကိုယ်တော်ပျော်ရွှင်မှုခံစားရ၏။ စီအီးပထမရာစုတွင် ကိုယ်တော်၏တစ်ပါးတည်းသောသားတော် ဤသို့ဆိုသည်။ “ခံယူခြင်းထက်ပေးကမ်းခြင်း၌ ပျော်ရွှင်မှုသာ၍ရှိ၏။” (တမန်တော် ၂၀:၃၅) ဤမူနှင့်အညီ ဖန်ဆင်းရှင်၏စကြဝဠာတစ်ခွင် ဝေနေယျသတ္တဝါအပေါင်းတို့တွင် ယေရှုသည် အပျော်ရွှင်ဆုံးဖြစ်လေပြီ။ မည်သို့နည်း။ ယေဟောဝါဘုရားသခင်အပြင် လူသားအကျိုးအလိုငှာမိမိအသက်ကိုစွန့်လွှတ်ခြင်းအားဖြင့် ယေရှုခရစ်သည် အကြီးမြတ်ဆုံးသောဆုကိုပေးသနားတော်မူခဲ့ပြီ။ အမှန်သော်ကား ကိုယ်တော်သည် ‘ဝမ်းမြောက်သောအရှင်’ ဖြစ်တော်မူသည်။ (၁ တိမောသေ ၆:၁၅) ဤနည်းဖြင့်ပေးကမ်းခြင်း၌ပျော်ရွှင်မှုသာ၍ရှိခြင်းကို ယေရှုလက်တွေ့ပြတော်မူသည်။

၁၅။ ယေဟောဝါသည် အဘယ်အမှုကိုပုံသက်သေအနေနှင့် အမြဲပြုနေတော်မူမည်နည်း။ အသိဉာဏ်ရှိဝေနေယျသတ္တဝါများသည် ကိုယ်တော်၏ပျော်ရွှင်မှုကို အနည်းနှင့်အများမည်သို့ခံစားရမည်နည်း။

^၁၅ ယေရှုခရစ်မှတစ်ဆင့် ဝေနေယျသတ္တဝါအပေါင်းတို့ကို ယေဟောဝါဘုရားအမြဲရက်ရောစွာပေးတော်မူမည်ဖြစ်၍ ပေးကမ်းခြင်းတွင် အကောင်းဆုံးပုံသက်သေအစဉ်ဖြစ်တော်မူလိမ့်မည်။ ဘုရားသခင်ကိုယ်တော်တိုင် ကောင်းမြတ်သောဆုများပေးခြင်း၌ပျော်မွေ့တော်မူသည်နည်းတူ ဝေနေယျသတ္တဝါအပေါင်း၏နှလုံး၌လည်း ရက်ရောသောသဘောကိုထည့်သွင်းထားတော်မူ၏။ ဤနည်းဖြင့်သူတို့သည် ကိုယ်တော်၏သဘောထားကိုရောင်ပြန်ဟပ်၍ အတုယူကြသဖြင့် ကိုယ်တော်ခံစားရသောပျော်ရွှင်မှုကို အနည်းနှင့်အများခံစားကြရသည်။ (ကမ္ဘာဦး ၁:၂၆။ ဧဖက် ၅:၁) လျော်ကန်စွာဖြင့်တပည့်နောက်လိုက်များအား ယေရှုဤသို့မိန့်တော်မူ၏။ “သူတစ်ပါးအားပေးကြလော့။ ပေးလျှင်သူတစ်ပါးသည် သင်တို့အားပေးကြလိမ့်မည်။ အမှန်ခြင်ရုံမျှမက သိပ်နှက်လျက်၊ လှုပ်လျက်၊ လျှံလျက်ရှိခြင်းနှင့်သင်တို့ရင်ခွင်၌ပေးကြလိမ့်မည်။ အကြောင်းမူကား၊ အကြင်ချိန်၊ တင်းပမာဏာနှင့်သင်တို့သည်သူတစ်ပါးအားပေး၏၊ ထိုပမာဏအတိုင်း ကိုယ်ခံကြရမည်။”—လုကာ ၆:၃၈။

၁၆။ လုကာ ၆:၃၈ တွင်အဘယ်ပေးကမ်းခြင်းအကြောင်း ယေရှုရည်ညွှန်းနေသနည်း။

^၁၆ ပေးကမ်းတတ်သည့်အကျင့်ကောင်းကို တပည့်တော်များရှေ့ ယေရှုချမှတ်ပေးတော်မူသည်။ ခံယူသူများထံမှ ကောင်းသောတုံ့ပြန်မှုတွေ့ရမည်ဟုယေရှုဆိုသည်။ လုကာ ၆:၃၈ တွင်ဥစ္စာပစ္စည်းပေးကမ်းခြင်းကိုသာ ယေရှုဆိုလိုနေခြင်းမဟုတ်ပါ။ ကိုယ်တိုင်ဆင်းရဲမွဲတေသွားသည်တိုင် ပေးကမ်းရမည်ဟူ၍တပည့်တော်များအား မှာကြားနေတော်မူခြင်းမဟုတ်။ စိတ်ဝိညာဉ်ကျေနပ်ရောင့်ရဲသောသဘောရှိစေမည့်လမ်းစဉ်ကို ကိုယ်တော်ညွှန်ကြားပေးနေခြင်းဖြစ်သည်။

ထာဝရပျော်ရွှင်မှုအမှန်ရမည်သေချာ

၁၇။ ဤနောက်ဆုံးကာလတွင် ကိုယ်တော်၏သက်သေများအပေါ် အဘယ်ကြီးမြတ်သောဆုကျေးဇူးကိုဘုရားသခင်ပေးသနားတော်မူသနည်း။

^၁၇ ဤနောက်ဆုံးကာလတွင် ကိုယ်တော်၏သက်သေများအပေါ် ဝေနေယျသတ္တဝါအပေါင်း၏ခေါင်းဖြစ်တော်မူသောယေဟောဝါရှင်သည် ထူးမြတ်သောဆုကျေးဇူးပေးထားပြီတကား။ ဘုရားသခင့်နိုင်ငံတော်သတင်းကောင်းကို ကျွန်ုပ်တို့အား ပေးထားတော်မူ၏။ မင်းရိုက်ရာကိုခံယူထားသောယေရှုခရစ်တော်အုပ်စိုးသည့် တည်ထောင်ပြီးသောဘုရားသခင့်နိုင်ငံအကြောင်းကြေညာရန်အခွင့်ထူးကို ကျွန်ုပ်တို့ရရှိထားကြပါသည်။ (မဿဲ ၂၄:၁၄။ မာကု ၁၃:၁၀) အမြင့်မြတ်ဆုံးသောဘုရားသခင်၏သက်သေခံများအဖြစ်ဟောပြောကြေညာရခြင်းသည် ပြိုင်ဘက်မရှိဆုကျေးဇူးဖြစ်သည်။ ဘုရားသခင်ကိုအတုယူကာ အကောင်းဆုံးနည်းဖြင့်ပေးကမ်းနိုင်သည်ကား ဤအစီစဉ်စနစ်ဆိုးမကုန်ဆုံးမီ ဘုရားသခင့်နိုင်ငံတော်သတင်းကို သူတစ်ပါးအားကြေညာခြင်းဖြစ်သည်။

၁၈။ ယေဟောဝါသက်သေများအနေနှင့် အဘယ်အရာကိုအခြားသူတို့အားပေးရမည်နည်း။

^၁၈ ဘုရားသခင့်နိုင်ငံတော်သတင်းကိုကြေညာရာတွင် တမန်တော်ပေါလုကြုံတွေ့ခဲ့ရသောအခက်အခဲများအကြောင်း သူဖော်ပြထားပါသည်။ (၂ ကောရိန္သု ၁၁:၂၃-၂၇) ယေဟောဝါ၏မျက်မှောက်ခေတ်သက်သေခံများလည်း အခက်အခဲများကို ထပ်တူကြုံတွေ့ရမည်။ ဘုရားသခင့်နိုင်ငံနှင့်ဆိုင်သောမျှော်လင့်ချက်ကို သူတစ်ပါးရရှိစေရန် ကိုယ်ကျိုးများစွာစွန့်လွှတ်ကြရပေမည်။ အထူးသဖြင့်ကျွန်ုပ်တို့သည် ရှက်ကြောက်တတ်သူများဖြစ်မည်ဆိုလျှင် သူစိမ်းများအိမ်ဝသို့သွားချင်စိတ်ရှိကြမည်မဟုတ်ပါ။ သို့သော်ခရစ်တော်၏နောက်လိုက်များအနေနှင့် “နိုင်ငံတော်နှင့်ယှဉ်သောသတင်းကောင်း” ကိုသူတစ်ပါးအားဟောပြောခြင်းအားဖြင့် ဝိညာဉ်ရေးရာများပေးကမ်းခွင့်ကို မရှောင်ကြဉ်နိုင်ပါ။ (မဿဲ ၂၄:၁၄) ယေရှု၏စိတ်ထားမျိုးကို ကျွန်ုပ်တို့မွေးမြူကြရမည်။ သေဘေးနှင့်ကြုံတွေ့နေရချိန်တွင် ကိုယ်တော်ဤသို့ဆုတောင်းတော်မူ၏။ “အကျွန်ုပ်အဘ . . . အကျွန်ုပ်အလိုရှိသည်အတိုင်းမဖြစ်ပါစေနှင့်။ ကိုယ်တော်အလိုရှိသည်အတိုင်းဖြစ်ပါစေသော။” (မဿဲ ၂၆:၃၉) နိုင်ငံတော်သတင်းကောင်းပေးကမ်းခြင်းကိစ္စတွင် ယေဟောဝါကျေးကျွန်များသည် မိမိတို့အလိုမဟုတ်၊ ဘုရားသခင့်အလိုတော်ကို ဆောင်ရွက်ကြရမည်။

၁၉။ “အစဉ်အမြဲတည်သောဗိမာန်” များကိုပိုင်ဆိုင်သူတို့ကား အဘယ်သူများနည်း။ သူတို့နှင့်မည်သို့မိတ်သဟာယဖွဲ့နိုင်မည်နည်း။

^၁၉ ဤသို့ပေးကမ်းခြင်း၌ အချိန်နှင့်အစွမ်းအစများကိုပါပေးရပေမည်။ သို့သော်ဘုရားရေးရာစိတ်ထားဖြင့်ပေးကမ်းသူများဖြစ်ကြမည်ဆိုလျှင် ကျွန်ုပ်တို့၏ပျော်ရွှင်မှုသည် ထာဝရဖြစ်ပါလိမ့်မည်။ အဘယ်ကြောင့်နည်း။ ယေရှုဤသို့မိန့်တော်မူသောကြောင့်တည်း။ “သင်တို့သည် . . . အစဉ်အမြဲတည်သောဗိမာန်၌ သင်တို့ကိုလက်ခံသောအဆွေရှိစေခြင်းငှာ မမြဲသောလောကီစည်းစိမ်ကိုသုံးဆောင်ကြလော့။” (လုကာ ၁၆:၉) “အစဉ်အမြဲတည်သောဗိမာန်” ပိုင်ရှင်များနှင့်မိတ်ဆွေဖွဲ့နိုင်ရန် “မမြဲသောလောကီစည်းစိမ်ကိုသုံးဆောင်” ရန်ရည်ရွယ်ချက်ရှိသင့်သည်။ ဖန်ဆင်းရှင်အဖြစ် ယေဟောဝါရှင်သည် အရာခပ်သိမ်းကိုပိုင်ဆိုင်တော်မူ၏။ ကိုယ်တော်၏သားဦးသည်လည်း အမွေစားအမွေခံအဖြစ် တွဲဖက်ပိုင်ဆိုင်သူဖြစ်တော်မူ၏။ (ဆာလံ ၅၀:၁၀-၁၂။ ဟေဗြဲ ၁:၁၊ ၂) သူတို့နှင့်မိတ်ဆွေဖြစ်ရန် သူတို့မျက်နှာသာနှင့်တွေ့သောနည်းဖြင့် ဥစ္စာစည်းစိမ်ကိုအသုံးပြုရကြမည်။ ယင်း၌သူတစ်ပါးအကျိုးအလိုငှာ စည်းစိမ်ဥစ္စာကိုသဘောထားမှန်ဖြင့်အသုံးပြုခြင်းပါဝင်သည်။ (မဿဲ ၆:၃၊ ၄။ ၂ ကောရိန္သု ၉:၇ နှိုင်းယှဉ်။) ယေဟောဝါဘုရားသခင်နှင့်ယေရှုခရစ်တို့နှင့်ဖွဲ့ထားသော မိတ်သဟာယကိုမြဲမြံစေရန် ငွေကိုလျောက်ပတ်သင့်လျော်စွာအသုံးပြုနိုင်ပါသည်။ ဥပမာ၊ တကယ်လိုလျက်နေသောသူတို့အား ကျွန်ုပ်တို့၌ရှိရာကို စိတ်စေတနာနှင့်ပေးကမ်းခြင်း၊ ဘုရားသခင့်နိုင်ငံတော်၏အမှုရေးရာများကို တိုးပွားများပြားစေရန် ကျွန်ုပ်တို့၏အစွမ်းအစများကိုသုံးစွဲခြင်းအားဖြင့်ဖြစ်သည်။—သု၊ ၁၉:၁၇။ မဿဲ ၆:၃၃။

၂၀။ (က) “အစဉ်အမြဲတည်သောဗိမာန်” များသို့ ယေဟောဝါနှင့်ယေရှု အဘယ်ကြောင့်ပို့ဆောင်ပေးနိုင်သနည်း။ ထိုနေရာများကား အဘယ်အရပ်များတွင်ဖြစ်နိုင်မည်နည်း။ (ခ) အဘယ်အခွင့်အရေးကို ကျွန်ုပ်တို့ထာဝရရရှိနိုင်မည်နည်း။

^၂၀ ယေဟောဝါဘုရားသခင်နှင့်ယေရှုခရစ်သည် ထာဝစဉ်အသက်ရှင်တော်မူသောကြောင့် ကျွန်ုပ်တို့၏ထာဝရမိတ်ဆွေများဖြစ်နိုင်ကြပါသည်။ “အစဉ်အမြဲတည်သောဗိမာန်” များထဲ ကျွန်ုပ်တို့အားပို့ဆောင်ပေးနိုင်ကြပါသည်။ သန့်ရှင်းသောကောင်းကင်တမန်များနှင့်အတူ ကောင်းကင်အရပ်၌ဖြစ်စေ၊ ပြန်လည်ထူထောင်ထားသော ပရဒိသုမြေကြီးပေါ်၌ပင်ဖြစ်သည့်ထိုအရပ်များသို့ ပို့ဆောင်ပေးနိုင်တော်မူ၏။ (လုကာ ၂၃:၄၃) ယေရှုခရစ်တော်ကို ဘုရားသခင်သည်မေတ္တာရှိစွာဖြင့်စွန့်လွှတ်တော်မူခြင်းကြောင့် ဤအမှုများဖြစ်စေနိုင်တော်မူသည်။ (ယောဟန် ၃:၁၆) ကိုယ်တော်တိုင်ထူးခြားသောပျော်ရွှင်မှုခံစားရခြင်းငှာ ယေရှုမှတစ်ဆင့် ဝေနေယျသတ္တဝါအပေါင်းတို့အား ယေဟောဝါဘုရားသခင်သည်ဆက်၍ပေးကမ်းတော်မူမည်။ အမှန်မှာ၊ အချုပ်အခြာအာဏာရှင်ယေဟောဝါဘုရားသခင်နှင့် တစ်ပါးတည်းသောသားတော်၊ ကျွန်ုပ်တို့ကယ်တင်ရှင်သခင် ယေရှုခရစ်၏မင်းရိုက်ရာအောက်တွင် ကျွန်ုပ်တို့ကိုယ်တိုင် ထာဝစဉ်ပေးကမ်းစွန့်ကြဲခွင့်ကို ရရှိလိမ့်မည်။ ယင်းက ဘုရားရေးရာစိတ်ထားဖြင့် ပေးကမ်းသူများအတွက် ထာဝရပျော်ရွှင်မှုဖြစ်စေမည်တကား။

သင်မှတ်မိသလော

▫ ဘုရားသခင်၏အကြီးမြတ်ဆုံးဆုပေးကမ်းရန် ကိုယ်တော်အတွက် အဘယ်နစ်နာဆုံးရှုံးမှုများပါဝင်သနည်း။

▫ သားတော်အားအဘယ်လုပ်ငန်းဆောင်ရွက်ရန် ဘုရားသခင်စေလွှတ်တော်မူသနည်း။

▫ စကြဝဠာတစ်ခွင် အပျော်ရွှင်ဆုံးဝေနေယျသတ္တဝါကား အဘယ်သူနည်း။ အဘယ်ကြောင့်နည်း။

▫ ဘုရားရေးရာသဘောထားဖြင့်ပေးကမ်းသူများသည် ထာဝရပျော်ရွှင်မှုကို မည်သို့ခံစားရမည်နည်း။

[စာမျက်နှာ ၁၀ ပါ ရုပ်ပုံ]

ရွေးနှုတ်ဖိုးပူဇော်သက္ကာအဖြစ် ဆုကျေးဇူးအနေနှင့်သားတော်ကိုဘုရားသခင်စွန့်တော်မူခြင်းကို သင်တန်ဖိုးထားပါသလော