စာရှုသူများထံမှ မေးခွန်းလွှာ

“မိမိ၌အသက်ရှိ” ဟူသည် အဘယ်အရာကိုဆိုလိုသနည်း။

ယေရှုခရစ်သည် “မိမိ၌အသက်ရှိ” ခြင်းအဖြစ်နှင့် ကိုယ်တော်၏နောက်လိုက်များလည်း ‘သူတို့၌အသက်ရှိ’ ၏ဟု သမ္မာကျမ်းစာကဖော်ပြထားသည်။ (ယောဟန် ၅:၂၆; ၆:၅၃) သို့သော် ဤကျမ်းချက်နှစ်ချက်သည် အဓိပ္ပာယ်ချင်းမတူပေ။

“ခမည်းတော်သည် ကိုယ်၌အသက်ရှိတော်မူသည့်နည်းတူ၊ သားတော်သည် မိမိ၌အသက်ရှိရသောအခွင့်ကို ပေးတော်မူ၏” ဟု ယေရှုက မိန့်တော်မူခဲ့သည်။ ထိုမှတ်သားလောက်ဖွယ် ဖော်ပြချက်ကိုမမိန့်မြွက်မီ ယေရှုက ဤသို့မိန့်တော်မူခဲ့သည်– “ငါအမှန်အကန်ဆိုသည်ကား၊ ငါ့စကားကိုနားထောင်၍ ငါ့ကိုစေလွှတ်တော်မူသောသူကို ယုံကြည်သောသူသည် ထာဝရအသက်ကိုရသည်၊ . . . သေလွန်သောသူတို့သည် ဘုရားသခင်သားတော်၏စကားသံကိုကြား၍၊ ကြားသောအားဖြင့် အသက်ရှင်ရမည့်အချိန်ကာလသည် လာ၍ ယခုပင်ရောက်လျက်ရှိ၏။” ဤတွင် ယေရှုက ဘုရားသခင့်ရှေ့တော်၌ မျက်နှာသာရ ရပ်တည်မှုကို လူသားတို့အား ပေးနိုင်စွမ်းရှိခြင်းဖြစ်သည့် မိမိကို ခမည်းတော်ပေးသနားတော်မူသော သာမန်ထက်ထူးကဲသည့်တန်ခိုးတော်ကို ရည်ညွှန်းနေခြင်းဖြစ်သည်။ ထိုထက်မက ယေရှုသည် သေခြင်း၌အိပ်ပျော်နေသူတို့ကို ပြန်ရှင်စေပြီး သူတို့၌အသက်ရှိစေနိုင်သည်။ ယေရှုသည် “မိမိ၌အသက်ရှိ” ခြင်းအဖြစ်က ဤတန်ခိုးတော်များကို ကိုယ်တော်ရထားကြောင်း ဆိုလိုခြင်းဖြစ်သည်။ ခမည်းတော်ကဲ့သို့ပင် သားတော်သည်လည်း “မိမိ၌အသက်ရှိရသောအခွင့်” ရှိတော်မူ၏။ (ယောဟန် ၅:၂၄-၂၆) ကိုယ်တော့်နောက်လိုက်များနှင့်ပတ်သက်၍ကော အသို့နည်း။

တစ်နှစ်ခန့်ကြာပြီးနောက် ကိုယ်တော့်ကို နားထောင်နေသူတို့အား ယေရှု ဤသို့တိုက်ရိုက်မိန့်တော်မူသည်– “ငါအမှန်အကန်ဆိုသည်ကား၊ လူသား၏အသားကိုမစား၊ အသွေးကိုမသောက်လျှင် သင်တို့ ၌အသက်မရှိ။ ငါ၏အသားကိုစား၍ ငါ၏အသွေးကိုလည်း သောက်သောသူသည် ထာဝရအသက်ကိုရ၏။ ထိုသူကိုနောက်ဆုံးသောနေ့၌ ငါထမြောက်စေမည်။” (ယောဟန် ၆:၅၃၊ ၅၄) ဤတွင် ယေရှုက ‘သင်တို့ ၌အသက်ရှိ’ ခြင်းကို “ထာဝရအသက်” ရခြင်းနှင့် တူညီစေ၏။ ‘သင်တို့ ၌အသက်ရှိ’ ခြင်း ဟူသော အလားတူသဒ္ဒါတည်ဆောက်ပုံများကို ဂရိကျမ်းစာစောင်များ၏ အခြားနေရာများတွင်လည်း တွေ့ရှိရသည်။ ဥပမာနှစ်ခုမှာ “သင်တို့ ၌ဆားရှိစေ” နှင့် “အပြစ်ဒဏ်ကို ကိုယ်တိုင်၌ခံရကြ၏” တို့ ဖြစ်သည်။ (မာကု ၉:၅၀; ရောမ ၁:၂၇၊ သမ္မာ) ဤဥပမာများတွင် အဆိုပါစကားစုများက အခြားသူများကို ဆားပေးနိုင်ခြင်း၊ သို့မဟုတ် တစ်ဦးတစ်ယောက်အား အပြစ်ဒဏ်ပေးနိုင်ခြင်းကို သတ်မှတ်ဖော်ပြခြင်းမဟုတ်ချေ။ ယင်းအစား အတွင်းပိုင်းပြည့်စုံခြင်း သို့မဟုတ် အပြည့်အဝဖြစ်မှုကို ရည်ညွှန်း၏။ သို့ဖြစ်၍ ယောဟန် ၆:၅၃ တွင် အသုံးပြုထားသော ‘သင်တို့ ၌အသက်ရှိခြင်း’ က တကယ့်ပြည့်ဝသောအသက်တာရရှိခြင်းကိုသာ ဆိုလိုသည်။

ယေရှု၏နောက်လိုက်များကိုယ်နှိုက်၌ အသက်ရှိခြင်းအကြောင်း ရည်ညွှန်းခြင်းနှင့်စပ်လျဉ်း၍ ယေရှုက ကိုယ်တော်၏အသားနှင့် အသွေးကို ဖော်ပြခဲ့သည်။ နောက်ပိုင်းတွင် သခင့်ညစာစားပွဲကို အစပြုချိန်၌ ယေရှုသည် ကိုယ်တော်၏အသားနှင့် အသွေးအကြောင်း ထပ်မံမိန့်တော်မူပြီး ပဋိညာဉ်တရားသစ်အတွင်းသို့ ဆောင်ကြဉ်းခံရလိမ့်မည့် ကိုယ်တော်၏နောက်လိုက်များအား တဆေးမဲ့မုန့်နှင့် စပျစ်ရည်၏အထိမ်းအမှတ်တို့ကို စားသုံးရန် ညွှန်ကြားခဲ့သည်။ ယင်းကြောင့် ယေဟောဝါဘုရားသခင်နှင့်ဖွဲ့သော ပဋိညာဉ်တရားသစ်တွင်ပါဝင်သူ ကောင်းကင်အတန်းအစားခရစ်ယာန်များသာ ထိုသို့သောအသက်တာအပြည့်အဝကို ဝင်စားခွင့်ရှိမည်ဟု ဆိုလိုပါသလော။ လုံးဝမဟုတ်ပါ။ အဆိုပါအဖြစ်အပျက်နှစ်ခုသည် တစ်နှစ်ခြားသည်။ ယောဟန် ၆:၅၃၊ ၅၄ တွင် မှတ်တမ်းတင်ထားသော ယေရှု၏စကားကိုကြားခဲ့သူတို့သည် ခရစ်တော်၏အသားနှင့် အသွေးကိုကိုယ်စားပြုသည့် အထိမ်းအမှတ်များနှင့် ကျင်းပသောနှစ်ပတ်လည်ပွဲအကြောင်း မသိရှိခဲ့ကြချေ။

ယောဟန် အခန်းကြီး ၆ အရ ယေရှုသည် မိမိ၏အသားကို မန္နမုန့်နှင့် အစပထမခိုင်းနှိုင်း၍ ဤသို့မိန့်တော်မူသည်– “သင်တို့ဘိုးဘေးများသည် တော၌ မန္နကိုစားလျက်သေကြ၏။ ကောင်းကင်မှဆင်းသက်သော မုန့်ကိုစားသောသူသည် သေခြင်းနှင့်ကင်းလွတ်၏။ ငါသည် ကောင်းကင်မှဆင်းသက်သော အသက်မုန့်ဖြစ်၏။ ဤမုန့်ကိုစားသောသူမည်သည်ကား၊ အစဉ်မပြတ်အသက်ရှင်လိမ့်မည်။” ယေရှု၏အသားနှင့်အတူ ကိုယ်တော်၏အသွေးသည် ပကတိမန္နမုန့်ထက် သာ၍အရေးပါသည်။ မည်သို့နည်း။ ကိုယ်တော်၏အသားကို ‘လောကသားတို့အသက်’ ရဖို့အတွက် ပေးခဲ့သဖြင့် ထာဝရအသက်ရရန်အကြောင်းရှိစေသည်။a သို့ဖြစ်၍ ယောဟန် ၆:၅၃ တွင်ပါရှိသော ‘သင်တို့ ၌အသက်ရှိ’ ခြင်းဟူသည့် မိန့်တော်မူချက်သည် ကောင်းကင်တွင်ဖြစ်စေ၊ မြေကြီးပေါ်တွင်ဖြစ်စေ ထာဝအသက်ရမည့်သူအားလုံးနှင့် သက်ဆိုင်သည်။—ယောဟန် ၆:၄၈-၅၁။

ခရစ်တော်၏နောက်လိုက်များသည် ‘သူတို့ ၌အသက်ရှိ’ ခြင်းအဖြစ်၊ သို့မဟုတ် အသက်တာအပြည့်အဝခံစားခွင့်ကို အဘယ်အချိန်တွင်ရရှိကြမည်နည်း။ ဘုရားသခင့်နိုင်ငံတော်အမွေခံ ကောင်းကင်အတန်းအစားများအတွက်မူ မသေနိုင်သောဝိညာဉ်သတ္တဝါများအဖြစ် ကောင်းကင်အသက်တာသို့ ထမြောက်သွားချိန်တွင် ရရှိကြသည်။ (၁ ကောရိန္သု ၁၅:၅၂၊ ၅၃; ၁ ယောဟန် ၃:၂) ယေရှု၏ “အခြားသိုးတို့” မှာမူ ကိုယ်တော်၏အနှစ်တစ်ထောင်အုပ်စိုးမှု ကုန်ဆုံးပြီးနောက် အသက်တာအပြည့်အဝကို ခံစားကြမည်ဖြစ်သည်။ ထိုအချိန်အခါတွင် သူတို့သည် စမ်းသပ်မှုခံရကြပြီးသားဖြစ်ကာ တည်ကြည်မြဲမြံသူများဖြစ်ကြောင်း ထင်ရှား၍ မြေကြီးပရဒိသုတွင် ထာဝစဉ်အသက်ရှင်ရန် ဖြောင့်မတ်သူများဖြစ်ကြောင်း ကြေညာခံရကြပြီးသူများဖြစ်မည်။—ယောဟန် ၁၀:၁၆; ဗျာ. ၂၀:၅၊ ၇-၁၀။

[အောက်ခြေမှတ်ချက်]

[စာမျက်နှာ ၃၁ ပါ ရုပ်ပုံ]

စစ်မှန်သောခရစ်ယာန်အားလုံး ‘သူတို့ ၌ အသက်ရှိ’ နိုင်