“သင်တို့အားအဖိုးနှင့် ဝယ်တော်မူသည်”

“သင်တို့သည် အဖိုးနှင့်ဝယ်တော်မူသောသူဖြစ်သောကြောင့်. . . သင်တို့၏ကိုယ်ခန္ဓာနှင့် ဘုရားသခင်၏ဂုဏ်တော်ကို ထင်ရှားစေကြလော့။”—၁ ကောရိန္သု ၆:၂၀။

၁၊ ၂။ (က) “သေခြင်းမှထွက်မြောက်ရာလမ်းများကို” ဘာကဖွင့်ပေးသနည်း။ (ခ) ခရစ်တော်၏ပူဇော်သက္ကာတရားဝင်ရန် ဘာပြုလုပ်ရမည်ဖြစ်ပြီး၊ ဘာအားဖြင့်ပုံတင်ပြခဲ့သနည်း။

“ဘုရားသခင်သည်ငါတို့အဖို့ ကယ်တင်တော်မူခြင်းအမှုများကို ပြုတတ်သောဘုရားဖြစ်တော်မူ၏။ ဘုရားရှင်ထာဝရဘုရား [ယေဟောဝါ၊ NW] သည်သေခြင်းမှထွက်မြောက်ရာလမ်းများကို ပိုင်တော်မူ၏။” (ဆာလံ ၆၈:၂၀၊ သမ္မာ) ယေရှုခရစ်၏ ပူဇော်သက္ကာသည် ထိုလမ်းကိုဖွင့်ပေးခဲ့သည်။ သို့သော်ထိုပူဇော်သက္ကာသည် တရားဝင်ဖြစ်နိုင်ဖို့ ခရစ်တော်သည်ဘုရားရှင်ကိုယ်နှိုက်ရှေ့ ကိုယ်တိုင်ရောက်ရှိခဲ့ရသည်။

^၂ အပြစ်ဖြေရာနေ့တွင် ယဇ်ပုရောဟိတ်ကြီးသည် အသန့်ရှင်းဆုံးအခန်းသို့ ဝင်သောအခါ ယင်းကိုပုံတင်ပြသည်။ (ဝတ်ပြုရာ ၁၆:၁၂-၁၅) ပေါလုက “ယခုမှာလူလက်ဖြင့်မလုပ်. . . ယဇ်ပုရောဟိတ်မင်းဖြစ်သော ခရစ်တော်ယေရှုသည် ငါတို့အဖို့ထာဝရရွေးနှုတ်ခြင်း ကျေးဇူးကိုခံရ၍ ဆိတ်အသွေး၊ နွားကလေးအသွေးနှင့်မဟုတ် မိမိအသွေးတော်နှင့် သန့်ရှင်းရာဌာနထဲသို့ တစ်ခါတည်းဝင်တော်မူ၏။ ထိုသို့နှင့်အညီ၊ မှန်သောသန့်ရှင်းရာဌာနတို့၏ပုံဖြစ်သောလူတို့လက်ဖြင့်လုပ်သော သန့်ရှင်းရာဌာနထဲသို့ ခရစ်တော်သည်မဝင်ဘဲ ငါတို့အတွက်ကြောင့် ယခုဘုရားသခင်၏ရှေ့တော်၌ ကိုယ်ကိုပြခြင်းငှာဝင်တော်မူ၏။”—ဟေဗြဲ ၉:၁၁၊ ၁၂၊ ၂၄။

သွေး၏တန်ခိုး

၃။ (က) သွေးကိုယေဟောဝါအားဝတ်ပြုသူများသည် မည်သို့ရှုမြင်ပြီး၊ အဘယ်ကြောင့်နည်း။ (ခ) သွေးသည်အပြစ်များကို တရားဝင်ဖြေလွှတ်နိုင်စွမ်းရှိကြောင်း ဘာကတင်ပြသနည်း။

^၃ ခရစ်တော်၏အသွေးတော်သည် ကျွန်ုပ်တို့၏ကယ်တင်ခြင်းတွင် မည်သည့်ကဏ္ဍမှပါဝင်သနည်း။ နောဧအချိန်မှစ၍ စစ်မှန်သောဝတ်ပြုသူများသည် သွေးကိုသန့်ရှင်းမြင့်မြတ်သည်ဟု ရှုမြင်ကြသည်။ (ကမ္ဘာဦး ၉:၄-၆) သွေးသည်အသက်ရှင်ရေးတွင် အရေးပါသောကဏ္ဍတွင်ပါဝင်လေသည်။ အကြောင်းမှာ၊ သမ္မာကျမ်းစာက “ကိုယ်ခန္ဓာအသက် [စိုးလ်] သည်အသွေး၌တည်သည်” ဟုဆိုထားသည်။ (ဝတ်ပြုရာ ၁၇:၁၁) ထို့ကြောင့်တိရစ္ဆာန်တစ်ကောင်ကိုပူဇော်သောအခါ ၄င်း၏သွေးကိုယေဟောဝါရှင်ရှေ့တော်၌ သွန်းလောင်းရန်မောရှေပညတ်ကတောင်းဆိုခဲ့လေသည်။ အချို့အချိန်များတွင် သွေးသည်ယဇ်ပလ္လင်၏ဦးချိုတွင်ထည့်သည်။ ရှင်းနေသည်မှာ၊ ပူဇော်သက္ကာ၏ အပြစ်ဖြေရာတန်ခိုးသည် ယင်း၏သွေးတွင်တည်ရှိလေသည်။ (ဝတ်ပြုရာ ၈:၁၅။ ၉:၉) “ပညတ်တရားအတိုင်း ခပ်သိမ်းသောအရာတို့ကိုကုန်မတတ် အသွေးအားဖြင့်စင်ကြယ်စေတတ်၏။ အသွေးမသွန်းလောင်းဘဲ အပြစ်လွှတ်ခြင်းမရှိ။”—ဟေဗြဲ ၉:၂၂။

၄။ (က) သွေးကိုအသုံးပြုခြင်းအား ဘုရားရှင်ကန့်သတ်ထားခြင်းက ဘာရည်ရွယ်ချက်ကို ဖြစ်မြောက်စေသနည်း။ (ခ) ယေရှုအသေခံရပုံနည်းသည် ဘာထူးခြားသနည်း။

^၄ ထို့ကြောင့်ပညတ်တရားအောက်တွင် သွေးကိုအလွဲသုံးစားမှုဟူသမျှကို သေဒဏ်အပြစ်ပေးနိုင်သည်။ (ဝတ်ပြုရာ ၁၇:၁၀) ပစ္စည်းတစ်ခုသည် ရှားပါးလျှင် သို့မဟုတ် ယင်းကိုအသုံးပြုခြင်းအား တင်းကျပ်စွာကန့်သတ်ထားလျှင် ၄င်း၏တန်ဖိုးသည်မြှင့်တက်လာကြောင်း ကျွန်ုပ်တို့အားလုံးသိကြသည်။ ယင်းကိုအသုံးပြုခြင်းအား ယေဟောဝါရှင်၏ထိန်းချုပ်ထားခြင်းက သွေးကိုသာမန်တန်ဖိုးမျှသာရှိသောအရာမဟုတ်ဘဲ တန်ဖိုးကြီးလှသောအရာအဖြစ် ရှုမြင်မည့်အကြောင်း သေချာစေသည်။ (တမန်တော် ၁၅:၂၉။ ဟေဗြဲ ၁၀:၂၉) ၄င်းသည်ခရစ်တော်အသွေးတော်လုပ်ဆောင်မည့် ကြီးမြတ်သောရည်ရွယ်ချက်နှင့်အညီဖြစ်သည်။ လျောက်ပတ်စွာပင်၊ ကိုယ်တော်သည် မိမိ၏အသွေးတော်သွန်းစေမည့်အသွင်ဖြင့် သေဆုံးခဲ့လေသည်။ သို့ဖြင့်၊ ခရစ်တော်သည် မိမိ၏လူ့ကိုယ်ခန္ဓာကိုပူဇော်ရုံမဟုတ်ဘဲ မိမိ၏စိုးလ်ကိုသွန်းလောင်းပြီး၊ စုံလင်သောလူသားတစ်ဦးအနေနှင့် မိမိ၏အသက်ကိုပူဇော်လိုက်ကြောင်းထင်ရှားလေသည်။ (ဟေရှာယ ၅၃:၁၂) ခရစ်တော်သည်ထိုအသက်တာပိုင်ဆိုင်မှုကို မစုံလင်သောကြောင့် ပေးအပ်လိုက်ခြင်းမဟုတ်ချေ။ ထို့ကြောင့်၊ ကိုယ်တော်၏သွန်းလောင်းလိုက်သောအသွေးတော်သည် တန်ဖိုးကြီးလှပြီး၊ လူသားတို့၏အပြစ်များအတွက်ဖြေရန် ဘုရားသခင်ရှေ့တော်၌ဆက်သနိုင်ခဲ့လေသည်။

၅။ (က) ကောင်းကင်သို့ခရစ်တော် ဘာယူဆောင်သွားသနည်း။ အဘယ့်ကြောင့်နည်း။ (ခ) ဘုရားရှင်သည်ခရစ်တော်၏ပူဇော်သက္ကာကို လက်ခံကြောင်းမည်သို့ထင်ရှားသနည်း။

^၅ ခရစ်တော်သည်သူ၏ပကတိသွေးကို ကောင်းကင်ထဲသို့မယူဆောင်သွားနိုင်ချေ။ (၁ ကောရိန္သု ၁၅:၅၀) သို့အစား၊ သွေးကတင်စားသော ကိုယ်တော်ပူဇော်လိုက်သည့် စုံလင်သောလူ့အသက်၏ တရားဝင်တန်ဖိုးကို ယူဆောင်သွားခဲ့သည်။ ဘုရားရှင်ရှေ့တော်မှောက်၌၊ ထိုအသက်ကိုရွေးနှုတ်ဖိုးအဖြစ် အပြစ်သားများအတွက် လဲလှယ်ရန် နည်းလမ်းအတိုင်းဆက်သနိုင်ခဲ့သည်။ ထိုပူဇော်သက္ကာကိုယေဟောဝါလက်ခံကြောင်း ၃၃ စီအီးတွင်ထင်ရှားလာသည်။ ယေရုရှလင်ရှိတပည့်တော် ၁၂၀ အပေါ်တွင်သန့်ရှင်းသောဝိညာဉ်တော် သက်ရောက်သောအခါဖြစ်သည်။ (တမန်တော် ၂:၁-၄) ထို့ကြောင့်ခရစ်တော်သည် လူသားအမျိုးအနွယ်ကို ဝယ်ယူတော်မူခြင်းအားဖြင့် ပိုင်ဆိုင်တော်မူခဲ့သည်။ (ဂလာတိ ၃:၁၃။ ၄:၅။ ၂ ပေတရု ၂:၁) သို့ဖြင့်၊ ရွေးနှုတ်ဖိုးအကျိုးကျေးဇူးသည် လူသားတို့ထံစီးဆင်းနိုင်ခဲ့လေသည်။

ရွေးနှုတ်ဖိုးအကျိုးကျေးဇူးကို ဦးစွာခံစားရသူများ

၆။ ခရစ်တော်၏ရွေးနှုတ်ဖိုး အကျိုးကျေးဇူးကိုခံစားနိုင်ရန် ဘုရားရှင်သည်မည်သည့်အစီအစဉ်များ ပြုလုပ်ပေးခဲ့သနည်း။

^၆ သို့သော်၊ ယင်းကလူသားများသည် ရုပ်ခန္ဓာစုံလင်မှုကို ချက်ချင်းရမည်ဟု မဆိုလိုချေ။ အကြောင်းမှာ၊ လူသား၏အပြစ်များကိုမပယ်ရှင်းမီ ခန္ဓာစုံလင်မှုကို မရရှိနိုင်ချေ။ (ရောမ ၇:၁၈-၂၄) မည်သို့မည်ပုံနှင့် ဘယ်သောအခါ အပြစ်များကိုပယ်ရှင်းမည်နည်း။ ဘုရားရှင်သည်ဦးစွာ ၁၄၄၀၀၀ ကိုခရစ်တော်ယေရှုနှင့်အတူ ‘အကျွန်ုပ်တို့၏ဘုရားသခင့်ရှေ့မှာ၊ ရှင်ဘုရင်အရာ၌လည်းကောင်း၊ ယဇ်ပုရောဟိတ်အရာ၌လည်းကောင်း ခန့်ထား၍ မြေကြီးပေါ်မှာစိုးစံရသော အခွင့်ကိုပေးတော်မူ၏။’ (ဗျာဒိတ် ၅:၉၊ ၁၀။ ၇:၄။ ၁၄:၁-၃) သူတို့အားဖြင့်ရွေးနှုတ်ဖိုးအကျိုးကျေးဇူးကို အနှစ်တစ်ထောင်ကြာအတွင်း လူသားတို့အပေါ်တဖြည်းဖြည်း အသုံးပြုသွားမည်။—၁ ကောရိန္သု ၁၅:၂၄-၂၆။ ဗျာဒိတ် ၂၁:၃၊ ၄။

၇။ (က) ပဋိညာဉ်သစ်ကားအဘယ်နည်း။ မည်သူများစပ်ကြားဖွဲ့ပြီး၊ မည်သည့်ရည်ရွယ်ချက်အတွက်နည်း။ (ခ) ပဋိညာဉ်သစ်ဖြစ်မြောက်လာနိုင်ရန် အဘယ်ကြောင့်သေခြင်းလိုအပ်ပြီး၊ ခရစ်တော်၏သေခြင်းသည် မည်သည့်ကဏ္ဍတွင်ပါဝင်သနည်း။

^၇ ထိုအခြေအနေသို့ရောက်ရန်၊ ၁၄၄၀၀၀ သောဘုရင်-ယဇ်ပုရောဟိတ်များကို “လူတို့အထဲကရွေးနှုတ်” တော်မူ၏။ (ဗျာဒိတ် ၁၄:၄) ယင်းကို “ပဋိညာဉ်သစ်” အားဖြင့်ပြီးမြောက်စေတော်မူ၏။ ဤပဋိညာဉ်သည် ထိုတွင်ပါဝင်သူများ ဘုရင်များနှင့်ယဇ်ပုရောဟိတ်များအဖြစ်ထမ်းဆောင်ရန် ယေဟောဝါဘုရားရှင်နှင့် ဝိညာဏဣသရေလစပ်ကြား သဘောတူညီချက်ကန်ထရိုက်ဖြစ်သည်။ (ယေရမိ ၃၁:၃၁-၃၄။ ဂလာတိ ၆:၁၆။ ဟေဗြဲ ၈:၆-၁၃။ ၁ပေတရု ၂:၉) သို့သော်၊ ဘုရားရှင်နှင့်မစုံလင်သောလူသားစပ်ကြားတွင် ပဋိညာဉ်ကိုမည်သို့ဖွဲ့နိုင်ခဲ့သနည်း။ ပေါလုကရှင်းပြခဲ့သည်။ “စာချုပ်သည့်အမှုမှာလည်း (ဘုရားရှင်နှင့်မစုံလင်သောလူစပ်ကြား) စာချုပ်တည်လျှင် စာချုပ်သောသူသည် ဧကန်သေရမည်မှန်ပြီ။ အကယ်၍မသေလျှင် ထိုစာချုပ်သည်မတည်။ သေမှတည်၏။”—ဟေဗြဲ ၉:၁၆၊ ၁၇။

၈၊ ၉။ ရွေးနှုတ်ဖိုးသည်ပဋိညာဉ်သစ်နှင့် မည်သို့ဆက်နွယ်သနည်း။

^၈ ထို့ကြောင့်၊ ရွေးနှုတ်ဖိုးပူဇော်သက္ကာသည် ပဋိညာဉ်သစ်၏အခြေခံဖြစ်ပြီး ယေရှုသည်အာမခံစေ့စပ်သူဖြစ်လေသည်။ “ဘုရားသခင်တစ်ဆူတည်းရှိတော်မူ၏။ ဘုရားသခင်နှင့်လူတို့စပ်ကြားမှာ၊ လူဖြစ်သောယေရှုခရစ်တည်းဟူသော အာမခံတစ်ပါးတည်းရှိ၏။ ထိုအာမခံသည်လူအပေါင်းတို့ကို ရွေးအံ့သောငှာ ကိုယ်ကိုယ်ကိုစွန့်တော်မူပြီ။ ကာလအချိန်တန်မှသက်သေခံခြင်းရှိ၏။” (၁ တိမောသေ ၂:၅၊ ၆) ထိုစကားသည် ပဋိညာဉ်သစ်ဖွဲ့ခြင်းခံခဲ့ရသော ၁၄၄၀၀၀ နှင့်အထူးသက်ဆိုင်လေသည်။

^၉ ဇာတိဣသရေလများနှင့် ဘုရားရှင်ပဋိညာဉ်ဖွဲ့ခဲ့စဉ်က တိရစ္ဆာန်အသွေးများကို ပူဇော်သက္ကာအဖြစ်မပူဇော်မခြင်း ယင်းသည်တရားမဝင်ခဲ့ချေ။ (ဟေဗြဲ ၉:၁၈-၂၁) အလားတူပင်၊ ပဋိညာဉ်သစ်အလုပ်လုပ်ဆောင်နိုင်ဖို့ ခရစ်တော်သည် “ပဋိညာဉ်တရား၏အသွေး” ကိုသွန်းလောင်းရသည်။ (မဿဲ ၂၆:၂၈။ လုကာ ၂၂:၂၀) ခရစ်တော်သည်ယဇ်ပုရောဟိတ်ကြီးနှင့် “ပဋိညာဉ်သစ်၏အာမခံအဖြစ်” လုပ်ဆောင်သောကြောင့် ဘုရားရှင်သည်ယေရှု၏အသွေးတန်ဖိုးကို ပဋိညာဉ်သစ်အတွင်းသို့ ခေါ်ဆောင်လာသူတို့အပေါ် အသုံးပြုခဲ့သည်။ သူတို့အားတရားဝင် လူသားဖြောင့်မတ်သူများအဖြစ်သတ်မှတ်သည်။ (ဟေဗြဲ ၉:၁၅။ ရောမ ၃:၂၄။ ၈:၁၊ ၂။) သို့ပြီးမှဘုရားရှင်သည်သူတို့အား ပဋိညာဉ်သစ်ထဲသို့ကောင်းကင် ဘုရင်-ယဇ်ပုရောဟိတ်များအဖြစ် ဆောင်သွင်းနိုင်မည်။ သူတို့၏အာမခံနှင့်ယဇ်ပုရောဟိတ်ကြီးအဖြစ် ယေရှုသည်သူတို့အား ဘုရားရှင်ရှေ့သန့်ရှင်းသောအခြေအနေတွင်ရှိရန် ကူညီပေးသည်။—ဟေဗြဲ ၂:၁၆။ ၁ ယောဟန် ၂:၁၊ ၂။

မြေကြီးပေါ်တွင် အရာများကိုစုသိမ်းခြင်း

၁၀၊ ၁၁။ (က) ရွေးနှုတ်ဖိုးသည် ဘိသိက်ခံခရစ်ယာန်များသာမက မည်သို့သက်ဆိုင်သနည်း။ (ခ) လူအုပ်ကြီးသည်မည်သူများဖြစ်၍ သူတို့သည်ဘုရားရှင်နှင့်မည်သို့ရပ်တည်မှု ရရှိထားသနည်း။

^၁၀ သူတို့၏အပြစ်ကိုလွှတ်ခြင်းတည်းဟူသော ရွေးနှုတ်ဖိုးအားဖြင့်ဖြေလွှတ်ခြင်းကို ဘိသိက်ခံခရစ်ယာန်များသာခံစားရပါသလော။ မဟုတ်ပါ။ ကောလောသဲ ၁:၁၄၊ ၂၀ တွင်ဖော်ပြသည့်အတိုင်း သစ်တိုင်ပေါ်တွင်သွန်းသောအသွေးအားဖြင့် ရန်ငြိမ်းခြင်းအမှုကိုပြုလုပ်ကာ ဘုရားရှင်သည်မိမိကိုယ်နှိုက်နှင့် အခြားအရာခပ်သိမ်းကို မိတ်သဟာယဖွဲ့လျက်ရှိသည်။ ဤတွင်မြေကြီးပေါ်ရှိအရာများအပါအဝင် ကောင်းကင်၌ရှိသောအရာများ (၁၄၄၀၀၀) ပါဝင်သည်။ ပထမပိုင်းသူများသည် မြေကြီးပေါ်ပရဒိသုတွင် စုံလင်သောအသက်တာကိုခံစားမည့်လူသားများဖြစ်သည့် မြေကြီးအသက်တာရရှိမည့်သူများဖြစ်သည်။ အထူးသဖြင့် ၁၉၃၅ ခုနှစ်မှစ၍ထိုသူများကို စုရုံးရန်တညီတညွတ်တည်း ကြိုးပမ်းခဲ့ကြသည်။ ဗျာဒိတ် ၇:၉-၁၇ ကသူတို့အား ဘုရားရှင်နှင့်သိုးသငယ်ထံမှ ကယ်တင်ခြင်းရရှိသည့် “လူအုပ်ကြီး” ဟုဖော်ပြထားသည်။ သူတို့သည် “ကြီးစွာသောဒုက္ခကြီး” ကိုကျော်နင်းပြီး၊ ‘အသက်စမ်းရေတွင်းသို့လမ်းပြ’ ခံရရန်လိုသေးသည်။ အကြောင်းမှာ၊ ဗျာဒိတ် ၂၀:၅ ကခရစ်တော်၏အနှစ်တစ်ထောင်အုပ်ချုပ်မှုအောက်တွင် သူတို့သည်လုံးလုံးလျားလျား အသက်ရှင်လာမည့်အကြောင်းတင်ပြထားသည်။ နောက်ဆုံးစမ်းသပ်ခြင်းကို သူတို့၏စုံလင်သောလူသားအခြေအနေ၌ အောင်မြင်သွားသူတို့သည် မြေကြီးပေါ်တွင်ထာဝရအသက်ရရန် ဖြောင့်မတ်သည်ဟုသတ်မှတ်ခြင်းခံရမည်။—ဗျာဒိတ် ၂၀:၇၊ ၈။

^၁၁ သို့သော်ဦးစွာအနေနှင့် လူအုပ်ကြီးသည် “မိမိတို့ဝတ်လုံကို သိုးသငယ်၏အသွေး၌လျှော်၍ ဖြူစေသောသူဖြစ်ကြသတည်း။” (ဗျာဒိတ် ၇:၁၄) ခရစ်တော်သည်သူတို့အတွက် ပဋိညာဉ်သစ်၏ အာမခံအနေနှင့် မလုပ်ဆောင်ခဲ့ချေ။ သို့သော်လည်း ဘုရားသခင်နိုင်ငံတော်၏လုပ်ငန်းအားဖြင့် သူတို့သည်ဤပဋိညာဉ်မှအကျိုးခံစားရသည်။ ခရစ်တော်သည်သူတို့အတွက် လုပ်ဆောင်လျက်ရှိသည်။ ယဇ်ပုရောဟိတ်ကြီးအနေနှင့် ကိုယ်တော်အားဖြင့် ယေဟောဝါရှင်သည် ရွေးနှုတ်ဖိုးကိုအသုံးပြုလျက် ဘုရားရှင်၏မိတ်ဆွေများအနေနှင့် လက်ရှိဖြောင့်မတ်သောအဖြစ်ကို သတ်မှတ်ခံခဲ့ရသည်။ (ယာကုပ် ၂:၂၃ နှင့်နှိုင်းယှဉ်) အနှစ်တစ်ထောင်အတွင်းတွင် သူတို့သည်တဖြည်းဖြည်းနှင့် “[နောက်ဆုံးတွင်သူတို့သည်] ဘုရားသခင်သားတို့၏ထူးမြတ်သော လွှတ်ခြင်းချမ်းသာတည်းဟူသော ဖောက်ပြန်ပျက်စီးခြင်းအနှောင်အဖွဲ့မှ ကယ်လွှတ်ခြင်းချမ်းသာကိုဝင်စား” ခွင့်ရရှိမည်။—ရောမ ၈:၂၁။

၁၂။ ခရစ်ယာန်ခေတ်မတိုင်မီ သစ္စာရှိသူများကိုဘုရားရှင်သည် မည်သည့်အခြေခံပေါ်မူတည်ပြီး ဆက်ဆံခဲ့သနည်း။

^၁၂ ဘုရားရှင်ရှေ့ရပ်တည်ချက်နှင့်စပ်လျဉ်း၍ လူအုပ်ကြီးအဝင်တို့သည် ခရစ်ယာန်ခေတ်မတိုင်မီဝတ်ပြုသူများနှင့် အနည်းငယ်ကွာခြားပုံရပေသည်။ သို့သော်လည်း၊ ဘုရားရှင်သည်ဤနောက်လူများကို အနာဂတ်ရွေးနှုတ်ဖိုးပြင်ဆင်ပေးချက် အပေါ်မူတည်၍ ဆက်ဆံသည်။ (ရောမ ၃:၂၅၊ ၂၆) သူတို့သည်သူတို့၏အပြစ်များကို အခိုက်အတန့်အားဖြင့်သာ အပြစ်လွှတ်ခြင်းခံစားရသည်။ (ဆာလံ ၃၂:၁၊ ၂) သူတို့ထံမှ “အပြစ်များကို” လုံးဝကယ်လွှတ်မည့်အစား တိရစ္ဆာန်ပူဇော်သက္ကာတို့သည် “အပြစ်များကိုအောက်မေ့စေသည်။”—ဟေဗြဲ ၁၀:၁-၃။

၁၃။ ကျွန်ုပ်တို့တွင်ခရစ်ယာန်ခေတ်မတိုင်မီ ဘုရားရှင်၏ကျေးကျွန်များထက် မည်သည့်သာလွန်ချက်ရှိသနည်း။

^၁၃ ယင်းသည်ယနေ့ခရစ်ယာန်စစ်များနှင့် ကွာခြားသည်။ သူတို့သည်ပေးအပ်ပြီးဖြစ်သော ရွေးနှုတ်ဖိုးအပေါ်အခြေခံ၍ ဝတ်ပြုကြသည်။ သူတို့၏ယဇ်ပုရောဟိတ်ကြီးအားဖြင့် သူတို့သည် “ရဲရင့်သောစိတ်နှင့်ကျေးဇူးပလ္လင်တော်သို့ တိုးဝင်ချဉ်းကပ်ကြ” သည်။ (ဟေဗြဲ ၄:၁၄-၁၆) ဘုရားသခင်နှင့်မိတ်သဟာယဖွဲ့ခြင်းသည် ဖြစ်ပေါ်လာမည့်မျှော်လင့်ချက်မဟုတ်ဘဲ လက်ရှိဖြစ်ရပ်မှန်ဖြစ်လေသည်။ (၂ ကောရိန္သု ၅:၂၀) သူတို့ပြစ်မှားသောအခါ အမှန်ပင်အပြစ်လွှတ်ခြင်း ရရှိနိုင်သည်။ (ဧဖက် ၁:၇) သူတို့သည်အမှန်တကယ်ကြည်လင်သော ဩတ္တပ္ပစိတ်ကို ခံစားရသည်။ (ဟေဗြဲ ၉:၉။ ၁၀:၂၂။ ၁ ပေတရု ၃:၂၁) ဤကောင်းချီးများသည် အနာဂတ်တွင်ယေဟောဝါရှင်၏ ကျေးကျွန်များခံစားရမည့် ဘုရားသခင့်သားတို့၏ ထူးမြတ်သောလွှတ်ခြင်းချမ်းသာ၏ ရှေ့ပြေးအရသာဖြစ်လေသည်။

ဘုရားသခင့်ဉာဏ်ပညာနှင့်မေတ္တာတော် ကျယ်ဝန်းနက်နဲပုံ

၁၄၊ ၁၅။ ရွေးနှုတ်ဖိုးသည် ယေဟောဝါ၏ဖြောင့်မတ်ခြင်း၊ မေတ္တာအပါအဝင် ကိုယ်တော်၏မမီနိုင်သော ဉာဏ်ပညာတော်ကို မည်သို့ပေါ်လွင်စေသနည်း။

^၁၄ ရွေးနှုတ်ဖိုးသည် ယေဟောဝါရှင်ထံမှ ထူးမြတ်လှသောဆုကျေးဇူးပါတကား။ ယင်းသည်လွယ်လင့်တကူသဘောပေါက်နိုင်သော်လည်း ပညာအရှိဆုံးသူကိုပင် မိန်းမောသွားရန် နက်ရှိုင်းနက်နဲသည်။ ရွေးနှုတ်ဖိုး၏လုပ်ဆောင်ချက်များအပေါ် ကျွန်ုပ်တို့၏သုံးသပ်ချက်သည် အပေါ်ယံမျှသာဖြစ်သည်။ သို့ပင်ငြားလည်း တမန်တော်ပေါလုနှင့်အတူ ကျွန်ုပ်တို့လည်းကြွေးကြော်ပါသည်။ “ဘုရားသခင်၏ပညာနှင့်ဉာဏ်တော်သည် အလွန်ကျယ်ဝန်းနက်နဲစွတကား။ စီရင်တော်မူချက်တို့ကို အဘယ်သူမျှစစ်၍မကုန်နိုင်။ ကြွတော်မူရာလမ်းတို့ကို လိုက်၍ရှာသော်လည်း မတွေ့မမီနိုင်။” (ရောမ ၁၁:၃၃) ယေဟောဝါရှင်၏ဉာဏ်ပညာတော်သည် လူသားများကိုကယ်တင်နိုင်ကြောင်းနှင့်ကိုယ်တော်၏အချုပ်အခြာကို ထင်ရှားစေနိုင်ကြောင်း တင်ပြသည်။ ရွေးနှုတ်ဖိုးအားဖြင့် “ဘုရားသခင်၏ဖြောင့်မတ်ခြင်းတရားသည် ထင်ရှားခဲ့ပြီ. . . ယေရှုခရစ်၏အသွေးတော်ကိုယုံကြည်ခြင်းအားဖြင့် ထိုခရစ်တော်ကိုအပြစ်ဖြေစရာအကြောင်းဖြစ်စေခြင်းငှာ ခန့်ထားတော်မူပြီ။”—ရောမ ၃:၂၁-၂၆။

^၁၅ ခရစ်ယာန်ခေတ်မတိုင်မီ ကိုးကွယ်သူများကျူးလွန်ခဲ့သော အပြစ်များကိုခွင့်လွှတ်သည့်အတွက် ဘုရားရှင်ကိုအပြစ်တင်၍မရချေ။ ထို့ပြင်၊ ဘိသိက်ခံများကိုမိမိ၏သားများအဖြစ် ဖြောင့်မတ်သည် သို့မဟုတ် လူအုပ်ကြီးကိုမိမိ၏အဆွေအဖြစ် သတ်မှတ်ရာ၌ ဘုရားရှင်ကိုအပြစ်ဖို့၍မရချေ။ (ရောမ ၈:၃၃) မိမိအတွက်ကြီးစွာသောကုန်ကျမှုဖြင့် ဘုရားရှင်သည်လုံးဝတရားဝင်စွာ၊ သို့မဟုတ် ဖြောင့်မှန်စွာဖြေရှင်းခြင်းဖြင့် ယေဟောဝါသည်မတရားသောအုပ်စိုးရှင်ဖြစ်သည်ဟု စာတန်၏မုသာစွဲချက်ကို လုံးလုံးလျားလျားချေပလိုက်ပါသည်တကား။ ထိုသို့ဖြင့်၊ မိမိ၏သတ္တဝါများအပေါ် ဘုရားရှင်၏ကိုယ်ကျိုးမဲ့မေတ္တာကို စောဒကမတက်နိုင်အောင် တင်ပြခဲ့လေသည်။—ရောမ ၅:၈-၁၁။

၁၆။ (က) ရွေးနှုတ်ဖိုးသည် ဘုရားရှင့်ကျေးကျွန်များ၏ တည်ကြည်မှုအရေးကိစ္စကိုဖြေရှင်းရန် မည်သို့လုပ်ဆောင်ခဲ့သနည်း။ (ခ) ရွေးနှုတ်ဖိုးသည် လာမည့်ဖြောင့်မတ်သောကမ္ဘာသစ်တွင် ယုံကြည်ခြင်းရှိရန်အခြေခံကို ကျွန်ုပ်တို့အားမည်သို့ပေးသနည်း။

^၁၆ ရွေးနှုတ်ဖိုးပြင်ဆင်ပေးပုံနည်းလမ်းက ဘုရားရှင်ကျေးကျွန်များ၏ တည်ကြည်မှုနှင့်စပ်လျဉ်းသော အရေးကိစ္စကိုလည်း ဖြေရှင်းခဲ့သည်။ ယေရှု၏နာခံမှုတစ်ခုတည်းက ယင်းကိုပြီးမြောက်စေခဲ့သည်။ (သု၊ ၂၇:၁၁။ ရောမ ၅:၁၈၊ ၁၉) ထိုတွင်စာတန်၏အတိုက်အခံကြားမှ သေသည့်တိုင်အောင်သစ္စာစောင့်ခဲ့သော ၁၄၄၀၀၀ ၏အသက်တာကိုလည်း ထပ်ဆင့်လိုက်ပါ။ (ဗျာဒိတ် ၂:၁၀) ဤသူတို့သည် သူတို့၏ဆုလာဘ်အဖြစ် မသေနိုင်သောအဖြစ်—မဖျက်ဆီးနိုင်သောအသက်တာ ကိုရရှိရန် ရွေးနှုတ်ဖိုးကဖြစ်ပေါ်စေသည်။ (၁ ကောရိန္သု ၁၅:၃၃။ ဟေဗြဲ ၇:၁၆) ယင်းကဘုရားရှင်၏ကျေးကျွန်များသည် စိတ်မချရကြောင်း စာတန်၏စွဲချက်ကို မဟုတ်ကြောင်းပြသည်။ ရွေးနှုတ်ဖိုးသည် ကျွန်ုပ်တို့အားဘုရားရှင်၏ကတိတော်များအပေါ် ယုံကြည်ရန်ခိုင်မာသော အခြေခံကိုပေးလေသည်။ ရွေးနှုတ်ဖိုးပူဇော်သက္ကာအားဖြင့် ‘တရားဝင်ချမှတ်ခဲ့သော’ ကယ်တင်ခြင်းစီမံချက်ကို ကျွန်ုပ်တို့တွေ့မြင်နိုင်သည်။ (ဟေဗြဲ ၈:၆) သို့ဖြင့်ဖြောင့်မတ်သောကမ္ဘာသစ်တစ်ခုကို အာမခံထားပါသည်တကား။—ဟေဗြဲ ၆:၁၆-၁၉။

ယင်းကိုအကျိုးမဲ့မခံယူနှင့်

၁၇။ (က) အချို့သည်ရွေးနှုတ်ဖိုးကို အကျိုးမဲ့ခံယူကြောင်း မည်သို့တင်ပြကြသနည်း။ (ခ) ကျွန်ုပ်တို့သည်စာရိတ္တအရသန့်ရှင်းနေရန် ဘာကလှုံ့ဆော်ပေးနိုင်သနည်း။

^၁၇ ရွေးနှုတ်ဖိုးမှအကျိုးခံစားရရန်၊ တစ်ဦးသည်အသိပညာရယူရန်၊ ယုံကြည်ခြင်းတင်ပြရန်နှင့် ကျမ်းစာကျင့်စဉ်များအတိုင်း နေထိုင်ရန်လိုအပ်သည်။ (ယောဟန် ၃:၁၆။ ၁၇:၃) လူနည်းစုသာဖြစ်သော်လည်း ထိုသို့လုပ်ဆောင်ရန်သူတို့ အသင့်ရှိကြသည်။ (မဿဲ ၇:၁၃၊ ၁၄) ခရစ်ယာန်စစ်များအတွင်း၌ပင် အချို့သည် “ဘုရားသခင်၏ကျေးဇူးကို အကျိုးမဲ့” ခံယူကြသည်။” (၂ ကောရိန္သု ၆:၁) ဥပမာ၊ လွန်ခဲ့သည့်နှစ်များအတွင်းက ထောင်ပေါင်းများစွာသည် လိင်အကျင့်ပျက်မှုကြောင့် နှင်ထုတ်ခံခဲ့ရသည်။ ယေဟောဝါရှင်သည်ခရစ်တော်အားဖြင့် ကျွန်ုပ်တို့အတွက်လုပ်ဆောင်ပေးခဲ့သည်ကိုထောက်ရှုလျှင် မည်မျှရှက်ဖွယ်ရာပါတကား။ ရွေးနှုတ်ဖိုးကိုလေးမြတ်ခြင်းက လူတစ်ဦးအား “မိမိအပြစ်ဟောင်း ဆေးကြောကြောင်းကိုမေ့လျော့” ခြင်းမှမရှောင်ရှားစေသင့်ပေလော။ (၂ ပေတရု ၁:၉) ထို့ကြောင့်လျောက်ပတ်စွာပင်၊ ခရစ်ယာန်များကို “သင်တို့သည်အဖိုးနှင့်ဝယ်တော်မူသောသူဖြစ်သောကြောင့်. . . သင်တို့၏ကိုယ်ခန္ဓာနှင့်. . . ဘုရားသခင်၏ဂုဏ်တော်ကို ထင်ရှားစေကြလော့” ဟုပေါလုသတိပေးခဲ့သည်။ (၁ ကောရိန္သု ၆:၂၀) ယင်းကိုသတိရခြင်းက စာရိတ္တအရသန့်ရှင်းစွာရှိနေရန် ကျွန်ုပ်တို့အားတန်ခိုးပါသော လှုံ့ဆော်မှုကိုဖြစ်စေပါသည်တကား။—၁ ပေတရု ၁:၁၄-၁၉။

၁၈။ ကြီးလေးသောအပြစ်တွင်းသို့ ကျရောက်သူခရစ်ယာန်တစ်ဦးသည် ရွေးနှုတ်ဖိုးအကျိုးကျေးဇူးကို မည်သို့ခံစားနိုင်သေးသနည်း။

^၁၈ လူတစ်ဦးသည် ကြီးလေးသောအပြစ် ကျူးလွန်မိလျှင်ကောမည်သို့နည်း။ သူသည်မေတ္တာပါသောကြီးကြပ်ရေးမှူးများ၏ အကူအညီကိုရယူလျက် ရွေးနှုတ်ဖိုးကလုပ်ဆောင်ပေးသော အပြစ်လွှတ်ခြင်း အခွင့်အရေးကိုယူသင့်သည်။ (ယာကုပ် ၅:၁၄၊ ၁၅) ခိုင်မာသောပဲ့ပြင်မှုလိုအပ်ပါက နောင်တရသောခရစ်ယာန်တစ်ဦးသည် ထိုသို့သောဆုံးမမှုကြောင့် နောက်ဆုတ်မသွားသင့်ချေ။ (ဟေဗြဲ ၁၂:၅) ကျွန်ုပ်တို့တွင် ဤထူးမြတ်လှသော ကျမ်းဆိုင်ရာစိတ်ချရသောအကြောင်း ရရှိထားပါသည်။ “ကိုယ်အပြစ်ကိုဖော်ပြတောင်းပန်လျှင် ငါတို့အပြစ်များကိုလွှတ်၍ ဒုစရိုက်ရှိသမျှနှင့်ကင်းစင်စေ. . . တော်မူ၏။”—၁ ယောဟန် ၁:၉။

၁၉။ သမ္မာတရားမသိရှိမီအမှားကြောင့် ခရစ်ယာန်တစ်ဦးသည် မည်သည့်အမြင်ယူမှတ်နိုင်သနည်း။

^၁၉ တစ်ခါတစ်ရံ ခရစ်ယာန်များသည် လွန်ခဲ့ပြီးသောအမှားကြောင့် စိတ်ဓာတ်မကျသင့်ဘဲ ကျသောအခါများလည်းရှိလေသည်။ “အလင်းတရားထဲမရောက်ခင် ကျွန်တော့်ဇနီးနဲ့ကျွန်တော်ဟာ အင်္ဂါဇာတ်ရေယုန်ရောဂါ ရရှိခဲ့ကြတယ်။ ကျွန်တော်တို့ဟာ ယေဟောဝါရှင်ရဲ့သန့်ရှင်းတဲ့အဖွဲ့အစည်းနဲ့မ ‘သင့်လျော်’ ပါဘူးလို့တောင် ကိုယ့်ကိုယ်ကိုမသန့်ရှင်းဘူးလို့ တစ်ခါတစ်ခါခံစားမိတယ်” ဟုစိတ်မကောင်းလျက်ရှိနေသော ညီအစ်ကိုတစ်ဦးက ရေးသားခဲ့သည်။ ခရစ်ယာန်များဖြစ်လာပြီးနောက်တွင်ပင် အချို့ပြီးခဲ့သည့်အမှားများကြောင့် ခံစားရိတ်သိမ်းနေရပေမည်။ (ဂလာတိ ၆:၇) သို့သော်၊ လူတစ်ဦးသည်နောင်တယူပြီးလျှင် ယေဟောဝါမျက်စိ၌ မသန့်ရှင်းဟု ခံစားစရာအကြောင်းမရှိချေ။ “ခရစ်တော်၏အသွေးသည်” “သေခြင်းနှင့်စပ်ဆိုင်သောအကျင့်ကိုပယ်ရှား၍. . . ကိုယ်ကိုကိုယ်သိသောစိတ်ကို စင်ကြယ်စေခြင်းငှာ” တတ်နိုင်တော်မူသည်။—ဟေဗြဲ ၉:၁၄။

၂၀။ ရွေးနှုတ်ဖိုးအပေါ်ယုံကြည်ခြင်းသည် ခရစ်ယာန်တစ်ဦးအား မည်သည့်မလိုအပ်သော အပြစ်ရှိနေသည်ဟူသည့်ခံစားမှုမှ လွတ်မြောက်စေသနည်း။

^၂၀ မှန်ပါသည်၊ ရွေးနှုတ်ဖိုးတွင်ယုံကြည်ခြင်းသည် အပြစ်၏မလိုအပ်သောဝန်ထုပ်ကို ကျွန်ုပ်တို့မှပယ်ရှားရန် ကူညီပေးနိုင်သည်။ ညီအစ်မငယ်တစ်ဦးကဝန်ခံခဲ့သည်။ “ကျွန်မဟာမသန့်ရှင်းတဲ့ တစ်ကိုယ်ရေရာဂစိတ်ဖြေခြင်းနဲ့ ရုန်းကန်နေရတာ အခုဆိုရင် ၁၁ နှစ်ကျော်ရှိပြီ။ ယေဟောဝါရှင်ဟာ ကိုယ်တော်ရဲ့အသင်းတော်ကို ညစ်ညူးစေတဲ့ဒီလောက်ရွံရှာဖွယ်ကောင်းသူကို ဘယ်တော့မှမလိုလားပါဘူးလို့ ခံစားရပြီးအသင်းတော်ထဲက ကျွန်မထွက်မလို့ဆဲဆဲပါဘဲ။” ကျွန်ပ်တို့သည် အသိစိတ်နှင့်မဖြောင့်မတ်မှုကိုတိုက်လှန်ပြီး၊ ယင်းကိုအလျှော့မပေးသ၍ ယေဟောဝါသည် “ကောင်းမြတ်၍ခွင့်လွှတ်ရန်အသင့်” ဖြစ်ကြောင်းကျွန်ုပ်တို့သတိရရမည်။—ဆာလံ ၈၆:၅၊ NW ။

၂၁။ ကျွန်ုပ်တို့အားပြစ်မှားသူများအပေါ် ကျွန်ုပ်တို့ရှုမြင်ပုံကို ရွေးနှုတ်ဖိုးကမည်သို့ထိခိုက်သင့်သနည်း။

^၂၁ အခြားသူများကို ကျွန်ုပ်တို့မည်သို့ဆက်ဆံမှုအပေါ်လည်း ရွေးနှုတ်ဖိုးသည် သက်ရောက်မှုရှိသည်။ ပုံပမာပြရသော်၊ သင့်အားခရစ်ယာန်ချင်းတစ်ဦးက ပြစ်မှားသောအခါ သင်မည်သို့တုံ့ပြန်သနည်း။ သင်သည်ခရစ်တော်ကဲ့သို့သော ရှောရှောရှူရှူခွင့်လွှတ်ခြင်းမျိုး တင်ပြပါသလော။ (လုကာ ၁၇:၃၊ ၄) သင်သည် “သနားစုံမက်ခြင်း၊ ဘုရားသခင်သည်ခရစ်တော်ကြောင့် သင်တို့၏အပြစ်ကိုလွှတ်တော်မူသကဲ့သို့ အချင်းချင်းအပြစ်လွှတ်” သလော။ (ဧဖက် ၄:၃၂) သို့မဟုတ် သင်သည်ရန်ငြိုးထားပြီး၊ ရန်တုံ့ပြန်စိတ်မွေးမြူထားသလော။ ယင်းသည်အမှန်ပင် ရွေးနှုတ်ဖိုး၏ရည်ရွယ်ချက်ကို လွတ်သွားရာရောက်ပေမည်။—မဿဲ ၆:၁၅။

၂၂၊ ၂၃။ (က) ရွေးနှုတ်ဖိုးသည် ကျွန်ုပ်တို့၏ပန်းတိုင်များနှင့်အသက်တာပုံစံအပေါ် မည်သို့သက်ရောက်သင့်သနည်း။ (ခ) ရွေးနှုတ်ဖိုးနှင့်စပ်လျဉ်း၍ ခရစ်ယာန်များအားလုံး မည်သည့်ဆုံးဖြတ်ချက် ချထားသင့်သနည်း။

^၂၂ နောက်ဆုံးတွင်၊ ရွေးနှုတ်ဖိုးသည်ကျွန်ုပ်တို့၏ပန်းတိုင်များနှင့် အသက်တာပုံစံအပေါ်လေးနက်သောသက်ရောက်မှုရှိစေသင့်သည်။ ပေါလုကဆိုခဲ့သည်။ “သင်တို့သည်အဖိုးနှင့် ဝယ်တော်မူသောသူဖြစ်၍လူထံ၌. . . ကျွန်မခံကြနှင့်။” (၁ ကောရိန္သု ၇:၂၃) စီးပွားရေးလိုအပ်ချက်များဖြစ်သော—အိမ်၊ အလုပ်အကိုင်၊ စားဝတ်နေရေး—သည်သင့်အသက်တာတွင် အဓိကဖြစ်နေသေးသလော။ သို့မဟုတ်၊ သင်သည်နိုင်ငံတော်ကိုရှေ့ဦးထားပြီး၊ သင့်အားထောက်မမည်ဟု ဘုရားရှင်ကတိတော်အပေါ် သင်ယုံကြည်မှုတင်ပြသလော။ (မဿဲ ၆:၂၅-၃၃) သင်သည်သင့်အလုပ်ရှင်အောက်ကျွန်ခံမည်ဖြစ်သော်လည်း သီအိုကရက်တစ်လုပ်ငန်းများအတွက်မူ အလုံအလောက်နေရာမပေးဘဲ နေမည်လော။ ခရစ်တော်သည် “ကောင်းသောအကျင့်ဘက်၌ စိတ်အားကြီး၍ ပိုင်ထိုက်တော်မူသောအမျိုးကို မိမိအဖို့စင်ကြယ်စေခြင်းငှာလည်းကောင်း၊ ကိုယ်ကိုယ်ကိုစွန့်ကြဲတော်မူပြီ။”—တိတု ၂:၁၄။ ၂ ကောရိန္သု ၅:၁၅။

^၂၃ ဤထူးမြတ်လှသောဆုကျေးဇူး—ရွေးနှုတ်ဖိုးအတွက် “ယေရှုခရစ်အားဖြင့်. . . ဘုရားသခင်၏ကျေးဇူးတော်ကြီးလှ” ပါပေသည်တကား။ (ရောမ ၇:၂၅) ကျွန်ုပ်တို့သည်ဘယ်သောအခါမျှ ရွေးနှုတ်ဖိုး၏ရည်ရွယ်ချက်ကို မလွတ်စေဘဲ ယင်းသည်ကျွန်ုပ်တို့အသက်တာတွင် တကယ့်စွမ်းအားတစ်ခုဖြစ်ပါစေ။ စဉ်းစားပုံ၊ စကားပြောပုံနှင့်အပြုအမူအားဖြင့် ဘုရားရှင်ကိုကျွန်ုပ်တို့အစဉ်ဂုဏ်တင်ကါ ကျွန်ုပ်တို့အားအဖိုးနှင့်ဝယ်ထားကြောင်း ကျေးဇူးတင်စွာဖြင့်သတိရကြပါစို့။

ပြန်လည်သုံးသပ်ရန်မေးခွန်းများ

▫ သွေးသည်သန့်ရှင်းမြင့်မြတ်ကြောင်း အဘယ်ကြောင့်ယူမှတ်သနည်း။ ခရစ်တော်၏အသွေးတော်ကို ကောင်းကင်ရှိဘုရားရှင်ရှေ့တော်၌ မည်သို့ဆက်သခဲ့သနည်း။

▫ ပဋိညာဉ်သစ်ကိုအတည်ပြုရာ၌ ခရစ်တော်၏အသွေးသည် မည်သည့်ကဏ္ဍမှပါဝင်သနည်း။

▫ ရွေးနှုတ်ဖိုးသည်အကြွင်းအကျန်များနှင့် လူအုပ်ကြီးကိုမည်သို့အကျိုးပြုသနည်း။

▫ ကျွန်ုပ်တို့သည်ရွေးနှုတ်ဖိုးကို အကျိုးမဲ့မခံယူကြောင်း မည်သို့တင်ပြနိုင်သနည်း။

[စာမျက်နှာ ၁၉ ပါ ရုပ်ပုံ]

ယဇ်ပူဇော်သက္ကာတစ်ခု၏ အပြစ်ဖြေနိုင်စွမ်းသည် ယင်း၏အသက်သွေးတွင်တည်ရှိသည်

[စာမျက်နှာ ၂၀ ပါ ရုပ်ပုံ]

ဘုရားသခင်၏အပြစ်လွတ်ခြင်းကိုလေးမြတ်သူသည် အခြားသူများအား ခွင့်လွတ်ရန်အသင့်ရှိသည်