ဤနေ့ကား ကယ်တင်ရာနေ့ရက်!

“ယခုပင်နှစ်သက်ဖွယ်သောအချိန်ဖြစ်၏။ ယခုပင် ကယ်တင်ရာနေ့ရက်ကာလဖြစ်၏။”—၂ ကောရိန္သု ၆:၂၊ သမ္မာ။

၁။ ဘုရားသခင်နှင့် ခရစ်တော်တို့ရှေ့ မျက်နှာသာရအနေအထားရှိရန် အဘယ်အရာလိုသနည်း။

ယေဟောဝါသည် လူသားတို့အားတရားစီရင်ရာနေ့ကို ချိန်းချက်ထားတော်မူပြီ။ (တမန်တော် ၁၇:၃၁) ထိုနေ့ရက်သည် ကျွန်ုပ်တို့အတွက် ကယ်တင်ရာနေ့ရက်ဖြစ်ဖို့ဆိုလျှင် ကိုယ်တော်နှင့် ကိုယ်တော်၏ခန့်အပ်ခံတရားသူကြီး ယေရှုခရစ်တို့ရှေ့ မျက်နှာသာရအနေအထားရှိရန်လိုသည်။ (ယောဟန် ၅:၂၂) ထိုအနေအထားရှိရန် ဘုရားသခင့်နှုတ်မြွက်စကားတော်နှင့်ညီညွတ်သောအကျင့်အပြင် အခြားသူများကို ယေရှု၏စစ်မှန်သောတပည့်များဖြစ်လာစေရန်ကူညီပေးဖို့ ကျွန်ုပ်တို့ကိုတွန်းအားပေးသည့် ယုံကြည်ခြင်းရှိဖို့လိုသည်။

၂။ လူ့လောကသည် ဘုရားသခင်နှင့်အဘယ်ကြောင့်စိမ်းကားနေရသနည်း။

^၂ အမွေရထားသောအပြစ်ကြောင့် လူ့လောကသည် ဘုရားသခင်နှင့်စိမ်းကားနေသည်။ (ရောမ ၅:၁၂; ဧဖက် ၄:၁၇၊ ၁၈) ထို့ကြောင့် ကျွန်ုပ်တို့ ဟောပြောသောသူတို့သည် ကိုယ်တော်နှင့်ပြန်လည်သင့်မြတ်လာမှသာလျှင် ကယ်တင်ခြင်းရနိုင်မည်ဖြစ်သည်။ တမန်တော်ပေါလုသည် ကောရိန္သုမြို့ရှိခရစ်ယာန်များထံစာရေးသောအခါ ယင်းကိုရှင်းလင်းစေခဲ့သည်။ တရားစီရင်ခြင်း၊ ဘုရားသခင်နှင့်မိတ်သဟာယဖွဲ့ခြင်း၊ ကယ်တင်ခြင်းတို့နှင့်ပတ်သက်၍ ပေါလုမည်သို့ပြောခဲ့သည်ကိုသိရန် ၂ ကောရိန္သု ၅:၁၀–၆:၁၀ ကိုသုံးသပ်ကြည့်ကြစို့။

“လူများကိုနှိုးဆော်သွေးဆောင်ရသည်”

၃။ ပေါလုသည် အဘယ်နည်းဖြင့် “လူများကိုနှိုးဆော်သွေးဆောင်” ခဲ့ပြီး၊ ယနေ့ ယင်းကို ကျွန်ုပ်တို့ အဘယ်ကြောင့်လုပ်သင့်သနည်း။

^၃ ပေါလုသည် ဤသို့ရေးသားသောအခါ ဟောပြောခြင်းနှင့် တရားစီရင်ခြင်းကိုဆက်စပ်ခဲ့သည်– “ငါတို့ရှိသမျှသည် ကိုယ်ခန္ဓာ၌ကျင့်သောအကျင့်၊ ကောင်းမကောင်းရှိသည်အတိုင်း အကျိုးအပြစ်ကိုအသီးအသီးခံစေခြင်းငှာ၊ ခရစ်တော်၏တရားပလ္လင်ရှေ့၌ ပေါ်လာရကြမည်။ သို့ဖြစ်၍ သခင်ဘုရားနှင့်ဆိုင်သော ကြောက်မက်ဖွယ်အကြောင်းအရာတို့ကို ငါတို့သည်သိလျှင်၊ လူများကိုနှိုးဆော်သွေးဆောင်ရသည်။” (၂ ကောရိန္သု ၅:၁၀၊ ၁၁) တမန်တော်သည် သတင်းကောင်းဟောပြောခြင်းအားဖြင့် ‘လူများကို နှိုးဆော်သွေးဆောင်လျက်’ နေခဲ့သည်။ ကျွန်ုပ်တို့ကောအသို့နည်း။ ဤစနစ်ဆိုး၏ဆုံးခန်းကို ကျွန်ုပ်တို့ရင်ဆိုင်နေကြရသောကြောင့် ယေရှု၏မျက်နှာသာရတရားစီရင်မှုနှင့် ကယ်တင်ခြင်း၏ရင်းမြစ် ယေဟောဝါဘုရားသခင်၏သဘောတော်နှင့်တွေ့ရန် လိုအပ်သောခြေလှမ်းများလှမ်းဖို့ အခြားသူများကို အတတ်နိုင်ဆုံးနှိုးဆော်သွေးဆောင်သင့်သည်။

၄၊ ၅။ (က) ယေဟောဝါ၏လုပ်ငန်းတော်တွင် ကျွန်ုပ်တို့၏ပြီးမြောက်အောင်မြင်မှုများကို အဘယ်ကြောင့်မဝါကြွားသင့်သနည်း။ (ခ) ပေါလုသည် “ဘုရားသခင်အဖို့” အဘယ်ကြောင့်ဝါကြွားခဲ့ရသနည်း။

^၄ သို့ရာတွင် ကျွန်ုပ်တို့၏ခရစ်ယာန်ဓမ္မအမှုကို ဘုရားသခင်ကောင်းချီးပေးခဲ့မည်ဆိုလျှင် မဝါကြွားသင့်ချေ။ ကောရိန္သုမြို့တွင် လူအချို့သည် ကိုယ်ကိုယ်၌ဖြစ်စေ၊ အခြားသူများ၌ဖြစ်စေ မာန်မာနနှင့်ယစ်မူးနေခဲ့ကြရာ အသင်းတော်တွင်စိတ်ဝမ်းကွဲပြားမှုများ ဖြစ်ပေါ်စေသည်။ (၁ ကောရိန္သု ၁:၁၀-၁၃; ၃:၃၊ ၄) ဤအခြေအနေကိုဖော်ပြကာ ပေါလုကဤသို့ရေးသားခဲ့သည်– “ငါတို့သည် သင်တို့ရှေ့၌ တစ်ဖန် ကိုယ်ကိုကိုယ်ချီးမွမ်းကြသည်မဟုတ်။ စိတ်သဘောကိုမထောက်၊ အသွေးအဆင်းကိုထောက်၍ ဝါကြွားသောသူတို့၏စကားကို သင်တို့သည်ချေနိုင်မည်အကြောင်း၊ ငါတို့ကြောင့် ဝါကြွားခြင်းအခွင့်ကိုသာပေးကြ၏။ ငါတို့သည် သူရူးဖြစ်လျှင် ဘုရားသခင်အဖို့ဖြစ်ကြ၏။ စိတ်ကောင်းသောသူဖြစ်လျှင် သင်တို့အဖို့ဖြစ်ကြ၏။” (၂ ကောရိန္သု ၅:၁၂၊ ၁၃) မာနထောင်လွှားသောသူများသည် အသင်းတော်၏စည်းလုံးမှုနှင့် ဝိညာဉ်ရေး၌ စိတ်ဝင်စားနေကြသည်မဟုတ်ပါ။ သူတို့သည် ဘုရားသခင့်ရှေ့မှောက်တွင် နှလုံးကောင်းရှိရန် ယုံကြည်သူချင်းများကိုကူညီပေးမည့်အစား အသွေးအဆင်းကိုထောက်၍ ဝါကြွားလိုခဲ့ကြသည်။ ထို့ကြောင့် ပေါလုသည် ထိုအသင်းတော်ကိုပြစ်တင်ဆုံးမပြီးနောက် ဤသို့ဆိုခဲ့သည်– “ဝါကြွားသောသူသည် ထာဝရဘုရား၌သာဝါကြွားစေ။”—၂ ကောရိန္သု ၁၀:၁၇၊ သမ္မာ။

^၅ ပေါလုကိုယ်တိုင် ဝါကြွားခဲ့သည်မဟုတ်လော။ တမန်တော်ဖြစ်ရခြင်းအကြောင်း သူပြောဆိုခဲ့သောကြောင့် လူအချို့ကထိုသို့ယူမှတ်ခဲ့ကြပေမည်။ သို့သော် သူသည် “ဘုရားသခင်အဖို့” ဝါကြွားခဲ့ရ၏။ ကောရိန္သုမြို့သားများ ယေဟောဝါထံမှ မပျောက်သွားစေရန် တမန်တော်ဖြစ်ရသည့် မိမိ၏အထောက်အထားများအကြောင်းကို သူဝါကြွားခဲ့ရခြင်းဖြစ်သည်။ တမန်တော်အတုအယောင်များသည် သူတို့ကိုလမ်းလွဲနေစေကြရာ ဘုရားသခင်ထံသို့ပြန်လှည့်လာစေရန် ပေါလုဤသို့ပြုခဲ့ရခြင်းဖြစ်သည်။ (၂ ကောရိန္သု ၁၁:၁၆-၂၁; ၁၂:၁၁၊ ၁၂၊ ၁၉-၂၁; ၁၃:၁၀) သို့တိုင် ပေါလုသည် သူ၏ပြီးမြောက်အောင်မြင်မှုများကြောင့် လူတို့မိမိကိုအထင်ကြီးစေရန် အဆက်မပြတ်မကြိုးစားခဲ့ပါ။—သု. ၂၁:၄။

ခရစ်တော်၏မေတ္တာသည် သင့်ကိုအနိုင်အထက် သွေးဆောင်သလော

၆။ ခရစ်တော်၏မေတ္တာသည် ကျွန်ုပ်တို့ကိုမည်သို့အကျိုးပြုသင့်သနည်း။

^၆ စစ်မှန်သောတမန်တော်တစ်ပါးအဖြစ် ပေါလုသည် ယေရှု၏ရွေးနုတ်ဖိုးပူဇော်သကာအကြောင်း အခြားသူများကိုသွန်သင်ပေးခဲ့သည်။ ယင်းသည် ပေါလု၏ဘဝတွင်အရေးပါသောအရာတစ်ခုဖြစ်ခဲ့ရာ သူကဤသို့ရေးသားခဲ့သည်– “တစ်ယောက်သောသူသည် လူအပေါင်းတို့အတွက်ကြောင့် အသေခံသည်မှန်လျှင်၊ လူအပေါင်းတို့သည် သေလျက်နေကြသည်ဟူ၍လည်းကောင်း၊ အသက်ရှင်သောသူတို့သည် တစ်ဖန် ကိုယ်အလိုသို့လိုက်၍မရှင်၊ သူတို့အတွက်ကြောင့်အသေခံပြီးမှ ထမြောက်တော်မူသောသူ၏အလိုသို့လိုက်၍ ရှင်စေမည်အကြောင်း၊ လူအပေါင်းတို့အတွက်ကြောင့် အသေခံတော်မူသည်ဟူ၍လည်းကောင်း၊ ငါတို့သည် သဘောထားလျက်၊ ခရစ်တော်၏ချစ်ခြင်းမေတ္တာတော်သည် ငါတို့ကိုအနိုင်အထက်သွေးဆောင်၏။” (၂ ကောရိန္သု ၅:၁၄၊ ၁၅) ယေရှုသည် ကျွန်ုပ်တို့အတွက် သူ၏အသက်ကိုစွန့်သည့်အထိ မေတ္တာပြခဲ့သည်တကား! ယင်းက ကျွန်ုပ်တို့ကိုအမှန်တကယ်ပင် အနိုင်အထက်သွေးဆောင်သင့်သည်။ ကျွန်ုပ်တို့အတွက် ယေရှုအသက်စွန့်ခဲ့ခြင်းကို ကျေးဇူးတင်စွာဖြင့် ကျွန်ုပ်တို့သည် ယေဟောဝါ၏ချစ်မြတ်နိုးသောသားတော်မှတစ်ဆင့် ပြင်ဆင်ပေးခဲ့သော ကယ်တင်ခြင်းသတင်းကောင်းကိုထက်ထက်သန်သန်ကြွေးကြော်ရန် လှုံ့ဆော်ပေးခြင်းခံသင့်၏။ (ယောဟန် ၃:၁၆; ဆာလံ ၉၆:၂ နှိုင်းယှဉ်။) “ခရစ်တော်၏ချစ်ခြင်းမေတ္တာတော်သည်” ဘုရားသခင့်နိုင်ငံတော်သတင်းဟောပြောခြင်းနှင့် တပည့်ဖြစ်စေခြင်းလုပ်ငန်းတွင် ထက်သန်စွာပါဝင်ရန် သင့်ကိုအနိုင်အထက်သွေးဆောင်နေပါသလော။—မဿဲ ၂၈:၁၉၊ ၂၀။

၇။ “ဇာတိအမျိုးကိုထောက်၍ အဘယ်သူကိုမျှမသိမမှတ်” ဟူသည် အဘယ်အဓိပ္ပာယ်ရှိသနည်း။

^၇ ဘိသိက်ခံများသည် မိမိတို့အတွက် ခရစ်တော်ပြုခဲ့သမျှကိုကျေးဇူးတင်စွာ မိမိတို့အသက်တာများကိုအသုံးပြုကြခြင်းအားဖြင့် သူတို့သည် ‘ကိုယ်အလိုသို့လိုက်၍အသက်မရှင်၊ . . . သူ၏အလိုသို့လိုက်၍ အသက်ရှင်’ နေကြသည်။ “သို့ဖြစ်လျှင်၊ ယခုမှစ၍ ငါတို့သည် ဇာတိအမျိုးကိုထောက်၍ အဘယ်သူကိုမျှမသိမမှတ်။ ဇာတိအမျိုးကိုထောက်၍ ခရစ်တော်ကိုအထက်ကသိမှတ်သော်လည်း၊ ယခုမှစ၍ ထိုသို့သောသိမှတ်ခြင်းမရှိ” ဟုပေါလုဆိုခဲ့သည်။ (၂ ကောရိန္သု ၅:၁၆) ခရစ်ယာန်များသည် တစ်ပါးအမျိုးသားများထက် ဂျူးများကိုဖြစ်စေ၊ ဆင်းရဲသူတို့ထက်ချမ်းသာသောသူတို့ကိုဖြစ်စေ မျက်နှာသာပေးခြင်းဖြစ်သည့် ဇာတိသဘောမျိုးဖြင့် လူတို့ကိုမရှုမြင်ရချေ။ ဘိသိက်ခံများသည် ယုံကြည်သူချင်းများနှင့်ဝိညာဉ်ရေးဆက်ဆံမှုရှိခြင်းကို အရေးပေးကြသောကြောင့် ဘိသိက်ခံများသည် “ဇာတိအမျိုးကိုထောက်၍ အဘယ်သူကိုမျှမသိမမှတ်” ကြချေ။ ‘ဇာတိသဘောအရ ခရစ်တော်ကိုအထက်ကသိမှတ်ခဲ့’ သူတို့သည် ယေရှုမြေကြီးပေါ်ရှိစဉ် ကိုယ်တော်အားတွေ့မြင်ခဲ့သူများသာမဟုတ်ခဲ့ပါ။ မေရှိယကိုစောင့်မျှော်ခဲ့ကြသူအချို့သည် ခရစ်တော်အား ဇာတိသဘောအရတစ်ချိန်ကယူမှတ်ခဲ့ကြလျှင်ပင် ထိုသို့မယူမှတ်ကြတော့ချေ။ ကိုယ်တော်သည် ရွေးနုတ်ဖိုးအဖြစ် ခန္ဓာကိုယ်ကိုပေးဆက်ခဲ့ပြီး အသက်ပေးသောနာမ်ဝိညာဉ်အဖြစ် ရှင်ပြန်ထမြောက်ခဲ့၏။ ကောင်းကင်အသက်တာသို့ထမြောက်သော အခြားသူများသည် ယေရှုခရစ်အား ဇာတိသဘောဖြင့် တစ်ခါမျှမမြင်ဖူးဘဲ သူတို့၏ခန္ဓာကိုယ်များကိုစွန့်လွှတ်ခဲ့ကြမည်ဖြစ်သည်။—၁ ကောရိန္သု ၁၅:၄၅၊ ၅၀; ၂ ကောရိန္သု ၅:၁-၅။

၈။ လူတို့သည် မည်သို့ “ခရစ်တော်၌ရှိ” လာသနည်း။

^၈ ဘိသိက်ခံများကိုပင် ပေါလုကဤသို့ဆက်ဆိုခဲ့သည်– “လူမည်သည်ကား၊ ခရစ်တော်၌ရှိလျှင် အသစ်ပြုပြင်သောသတ္တဝါဖြစ်၏။ ဟောင်းသောအရာတို့သည်ပြောင်းလဲ၍ ခပ်သိမ်းသောအရာတို့သည် အသစ်ဖြစ်ကြပြီ။” (၂ ကောရိန္သု ၅:၁၇) “ခရစ်တော်၌ရှိ” သည်ဆိုရာ၌ ကိုယ်တော်နှင့်တစ်လုံးတစ်ဝတည်းဖြစ်ခြင်းကိုဆိုလိုသည်။ (ယောဟန် ၁၇:၂၁) ယေဟောဝါသည် မိမိ၏သားတော်ထံသို့ ထိုသူကိုဆွဲဆောင်ပြီး သန့်ရှင်းသောဝိညာဉ်တော်ဖြင့် သူ့ကိုဖြစ်ဖွားစေသောအခါ ထိုသူအတွက် ဤဆက်ဆံရေးဖြစ်ပေါ်လာသည်။ ဘုရားသခင်၏ဝိညာဉ်တော်ဖွားသားတစ်ဦးအဖြစ် ကောင်းကင်နိုင်ငံတော်တွင် ခရစ်တော်နှင့်အတူတွဲဖက်ခွင့်အလားအလာဖြင့် သူသည် “အသစ်ပြုပြင်သောသတ္တဝါ” ဖြစ်ခဲ့၏။ (ယောဟန် ၃:၃-၈; ၆:၄၄; ဂလာတိ ၄:၆၊ ၇) ထိုဘိသိက်ခံခရစ်ယာန်များသည် ထူးမြတ်သောလုပ်ငန်းတော်အခွင့်အရေးကို ပေးအပ်ခြင်းခံခဲ့ကြရသည်။

“သင်တို့သည် ဘုရားသခင်နှင့်မိတ်သဟာယဖွဲ့ကြလော့”

၉။ ဘုရားသခင်နှင့်မိတ်သဟာယဖွဲ့စေနိုင်ရန် အဘယ်အရာကိုကိုယ်တော်ပြုခဲ့သနည်း။

^၉ ယေဟောဝါသည် “အသစ်ပြုပြင်သောသတ္တဝါ” ကိုမျက်နှာသာပေးခဲ့ပြီတကား! ပေါလုက ဤသို့ဆိုသည်– “ခပ်သိမ်းသောအရာများသည် ဘုရားသခင်မှဖြစ်ကြ၏။ ဘုရားသခင်သည် ခရစ်တော်အားဖြင့် ငါတို့ကိုရန်ငြိမ်းစေ၍ ကိုယ်တော်နှင့်မိတ်သဟာယဖွဲ့စေတော်မူ၏။ ထိုမိတ်သဟာယဖွဲ့ခြင်းတရားနှင့်ဆိုင်သော အမှုတော်ဆောင်ရွက်ခြင်းကို ငါတို့၌အပ်ပေးတော်မူ၏။ ထိုတရားဟူမူကား၊ ဘုရားသခင်သည် ခရစ်တော်၌၊ လောကသားတို့၏အပြစ်များကို မှတ်တော်မမူ။ ရန်ကိုငြိမ်းစေ၍ ကိုယ်တော်နှင့်မိတ်သဟာယဖွဲ့စေတော်မူ၏။ ထိုမိတ်သဟာယတရားကိုလည်း ငါတို့၌အပ်ပေးတော်မူ၏။” (၂ ကောရိန္သု ၅:၁၈၊ ၁၉၊ သမ္မာ) လူသားသည် အာဒံအပြစ်ပြုခဲ့စဉ်ကတည်းက ဘုရားသခင်နှင့်စိမ်းကားခဲ့သည်။ သို့သော် ယေဟောဝါသည် မေတ္တာပါစွာ ခရစ်တော်၏ပူဇော်သကာအားဖြင့် ကိုယ်တော်တိုင်အစပြုပြီး မိတ်သဟာယဖွဲ့သည့်နည်းလမ်းကိုဖွင့်ပေးခဲ့သည်။—ရောမ ၅:၆-၁၂။

၁၀။ ယေဟောဝါသည် မိတ်သဟာယဖွဲ့ ခြင်း အမှုတော်ကို မည်သူတို့အား အပ်နှင်းခဲ့သနည်း၊ ယင်းကိုထမ်းဆောင်ရန် သူတို့အဘယ်အရာပြုခဲ့ကြသနည်း။

^၁၀ ယေဟောဝါသည် ဘိသိက်ခံများကို မိတ်သဟာယဖွဲ့ခြင်းဓမ္မအမှုတော်ကိုအပ်နှင်းခဲ့ရာ ပေါလုကဤသို့ပြောဆိုနိုင်ခဲ့သည်– “ထိုကြောင့် ငါတို့သည် ခရစ်တော်၏အတွက်သံတမန်ဖြစ်ကြ၏။ ‘သင်တို့သည် ရန်ငြိမ်း၍ ဘုရားသခင်နှင့်မိတ်သဟာယဖွဲ့ကြလော့’ ဟုဘုရားသခင်သည် ငါတို့အားဖြင့် နှိုးဆော်သွေးဆောင်တော်မူသကဲ့သို့၊ ငါတို့သည် ခရစ်တော်၏အတွက် တောင်းပန်သွေးဆောင်တတ်ကြ၏။” (၂ ကောရိန္သု ၅:၂၀၊ သမ္မာ) ရှေးအချိန်က စစ်မှုကိုရှောင်လွှဲနိုင်ရန် အများအားဖြင့် ရန်လိုစဉ်ကာလအတွင်း သံတမန်များကိုစေလွှတ်လေ့ရှိခဲ့ကြသည်။ (လုကာ ၁၄:၃၁၊ ၃၂) အပြစ်ရှိသောလူ့လောကသည် ဘုရားသခင်နှင့်စိမ်းကားနေသောကြောင့် ကိုယ်တော်သည် မိတ်သဟာယဖွဲ့နိုင်သည့်နည်းလမ်းများကိုသိရှိစေရန် ဘိသိက်ခံသံတမန်များကိုစေလွှတ်ခဲ့ပေပြီ။ ခရစ်တော်အတွက်ကိုယ်စားလှယ်များအဖြစ် ဘိသိက်ခံများက ဤသို့တောင်းပန်ကြသည်– “သင်တို့သည် ဘုရားသခင်နှင့်မိတ်သဟာယဖွဲ့ကြလော့။” ဤသို့အနူးအညွတ်တောင်းပန်ခြင်းသည် ဘုရားသခင်နှင့်ငြိမ်သက်မှုရှိရန်ရှာပြီး ခရစ်တော်အားဖြင့် ကိုယ်တော်ရရှိစေသည့် ကယ်တင်ခြင်းကျေးဇူးကိုလက်ခံရန် ကရုဏာပါစွာတိုက်တွန်းခြင်းဖြစ်သည်။

၁၁။ ရွေးနုတ်ဖိုးကိုယုံကြည်ခြင်းအားဖြင့် ဘုရားသခင်ရှေ့ဖြောင့်မတ်သည့်အနေအထားကို နောက်ဆုံးတွင် မည်သူတို့ရရှိခဲ့ကြသနည်း။

^၁၁ ရွေးနုတ်ဖိုးကိုယုံကြည်ကြောင်းတင်ပြသူအားလုံးသည် ဘုရားသခင်နှင့်မိတ်သဟာယပြန်ဖွဲ့နိုင်သည်။ (ယောဟန် ၃:၃၆) ပေါလုက ဤသို့ဆိုသည်– “ဘုရားသခင် [ယေဟောဝါ] သည် အပြစ်နှင့်ကင်းစင်သောအရှင် [ယေရှု] ကိုငါတို့အတွက် အပြစ်ဖြစ်စေတော်မူ၏။ အကြောင်းမူကား၊ ငါတို့သည် ထိုအရှင်အားဖြင့် ဘုရားသခင်၏ဖြောင့်မတ်ခြင်းဖြစ်မည်အကြောင်းတည်း။” (၂ ကောရိန္သု ၅:၂၁၊ သမ္မာ) စုံလင်သောသူယေရှုသည် မွေးရာပါအပြစ်တရားမှကယ်နုတ်ခံရသည့် အာဒံ၏မျိုးဆက်အားလုံးအတွက် အပြစ်ဖြေရာယဇ်ဖြစ်ခဲ့သည်။ သူတို့သည် ယေရှုအားဖြင့် “ဘုရားသခင်၏ဖြောင့်မတ်ခြင်း” ဖြစ်လာကြသည်။ ဤဖြောင့်မတ်ခြင်း သို့မဟုတ် ဘုရားသခင်ရှေ့ဖြောင့်မတ်သည့်အနေအထားသည် ခရစ်တော်၏တွဲဖက်အမွေခံ ၁၄၄,၀၀၀ တို့အတွက်ဦးဆုံးဖြစ်လာသည်။ ကိုယ်တော်အနှစ်တစ်ထောင်အုပ်စိုးချိန်အတွင်း ထာဝရအဘယေရှုခရစ်၏ မြေကြီးဆိုင်ရာသားသမီးများသည် စုံလင်သည့်လူသားများအဖြစ် ဖြောင့်မတ်သည့်အနေအထားရရှိကြလိမ့်မည်။ သူတို့သည် ဘုရားသခင်အားသစ္စာရှိပြီး ထာဝရအသက်ဆုကျေးဇူးရစေရန် စုံလင်ခြင်းအဖြစ်၌ ဖြောင့်မတ်သည့်အနေအထားရှိရန် သူတို့ကိုကိုယ်တော်မြှင့်တင်ပေးပါလိမ့်မည်။—ဟေရှာယ ၉:၆; ဗျာဒိတ် ၁၄:၁; ၂၀:၄-၆၊ ၁၁-၁၅။

“နှစ်သက်ဖွယ်သောအချိန်”

၁၂။ ယေဟောဝါ၏သံအမတ်များနှင့် သံတမန်များအားဖြင့် အဘယ်အရေးကြီးသောအမှုတော်ကို ဆောင်ရွက်နေကြသနည်း။

^၁၂ ကယ်တင်ခြင်းရရန် ပေါလု၏စကားများနှင့်အညီ ကျွန်ုပ်တို့လုပ်ဆောင်ရမည်– “သင်တို့သည် ဘုရားသခင်၏ကျေးဇူးတော်ကို အကျိုးမဲ့မခံကြနှင့်ဟု ငါတို့သည် ကိုယ်တော် [ယေဟောဝါ] ၏လုပ်ဖော်ဆောင်ဖက်ဖြစ်၍ သင်တို့ကိုနှိုးဆော်သွေးဆောင်ကြ၏။ ဗျာဒိတ်တော်အချက်ဟူမူကား၊ ‘နှစ်သက်ဖွယ်သောအချိန်၌ သင်၏ [စကား] ကိုငါနားထောင်ပြီ။ ကယ်တင်ရာနေ့ရက်ကာလ၌ သင့်ကိုငါမစပြီ’ ဟုလာသည်နှင့်အညီ ယခုပင်နှစ်သက်ဖွယ်သောအချိန်ဖြစ်၏။ ယခုပင် ကယ်တင်ရာနေ့ရက်ကာလဖြစ်၏။” (၂ ကောရိန္သု ၆:၁၊ ၂၊ သမ္မာ) ယေဟောဝါ၏ဘိသိက်ခံသံအမတ်များနှင့် ကိုယ်တော်၏ “အခြားသိုး” သံတမန်များသည် ကောင်းကင်ခမည်းတော်၏မခံစားထိုက်သောကရုဏာတော်ကို အချည်းနှီးမခံယူကြချေ။ (ယောဟန် ၁၀:၁၆) ဤ “နှစ်သက်ဖွယ်သောအချိန်” တွင် သူတို့သည် ဖြောင့်မတ်စွာကျင့်ကြံပြီး ခရစ်ယာန်ဓမ္မအမှုကိုဇွဲရှိရှိဆောင်ရွက်ခြင်းအားဖြင့် ဘုရားသခင့်မျက်နှာသာတော်ခံစားရရန် ကြိုးစားနေကြပြီး ဤအချိန်သည် “ကယ်တင်ရာနေ့ရက်” ဖြစ်သည်ဟု ကမ္ဘာသားများကိုအကြောင်းကြားနေကြသည်။

၁၃။ ဟေရှာယ ၄၉:၈ ၏လိုရင်းအချက်ကားအဘယ်နည်း၊ ယင်းသည် ပထမအကြိမ်မည်သို့ပြည့်စုံခဲ့သနည်း။

^၁၃ ပေါလုသည် ဤသို့ဆိုသော ဟေရှာယ ၄၉:၈ ကိုကိုးကားခဲ့သည်– “ထာဝရဘုရားမိန့်တော်မူသည်ကား၊ ‘နှစ်သက်ဖွယ်သောအချိန်၌ သင်၏စကားကိုနားထောင်ပြီ။ ကယ်တင်ရာကာလ၌ သင့်ကိုမစပြီ။ သင့်ကိုလည်းငါစောင့်ရှောက်၍ သင်သည်ပြည်တော်ကိုပြုပြင်လျက်၊ ဆိတ်ညံသောအမွေခံရာအရပ်တို့ကို အမွေပေးစေမည်အကြောင်း . . . လူမျိုးအားပဋိညာဉ်တရားကိုပြုစရာဖို့ သင့်ကိုခန့်ထားမည်။’” ဤပရောဖက်ပြုချက်သည် ဗာဗုလုန်သုံ့ပန်းဘဝမှဣသရေလလူများ လွတ်မြောက်လာပြီးနောက် လူဆိတ်ညံရာပြည်တော်သို့ပြန်သွားချိန်တွင် ပထမအကြိမ်ပြည့်စုံခဲ့သည်။—ဟေရှာယ ၄၉:၃၊ ၉။

၁၄။ ယေရှု၏ကိစ္စတွင် ဟေရှာယ ၄၉:၈ မည်သို့ပြည့်စုံခဲ့သနည်း။

^၁၄ ဟေရှာယပရောဖက်ပြုချက်၏ နောက်ထပ်ပြည့်စုံမှုအနေဖြင့် ယေဟောဝါသည် “မြေကြီးစွန်းတိုင်အောင် ငါ၏ကယ်တင်ခြင်းကိုပြုစုစိမ့်သောငှာ၊ သင့်ကိုတစ်ပါးအမျိုးသားတို့လင်းစရာ” အဖြစ်ကိုယ်တော့် “ကျွန်” ယေရှုကိုခန့်အပ်ထားသည်။ (ဟေရှာယ ၄၉:၆၊ ၈; ဟေရှာ ၄၂:၁-၄၊ ၆၊ ၇; မဿဲ ၁၂:၁၈-၂၁ နှိုင်းယှဉ်။) “နှစ်သက်ဖွယ်သောအချိန်” သည်ကမ္ဘာပေါ်ယေရှုရှိခဲ့စဉ်က ကိုယ်တော်နှင့်သက်ဆိုင်သည်မှာ ရှင်းနေသည်။ ကိုယ်တော်ဆုတောင်းခဲ့ရာ ဘုရားသခင် “နားထောင်” တော်မူခဲ့သည်။ ယေရှုသည် ပြည့်ဝစုံလင်စွာ သမာဓိစောင့်သိခဲ့ရာ ထိုနေ့ရက်သည် ကိုယ်တော့်အတွက်ကယ်တင်ခြင်းနေ့ရက်ဖြစ်ခဲ့သဖြင့် ကိုယ်တော်သည် “ယုံကြည်နားထောင်သောသူအပေါင်းတို့အား ထာဝရကယ်တင်ခြင်းကျေးဇူးကိုပြု” သောသူဖြစ်လာလေသည်။—ဟေဗြဲ ၅:၇၊ ၉; ယောဟန် ၁၂:၂၇၊ ၂၈။

၁၅။ ဝိညာဉ်ရေးဣသရေလလူများသည် အဘယ်အချိန်ကတည်းက ဘုရားသခင်၏ကျေးဇူးတော်ကိုခံစားထိုက်ကြောင်းသက်သေထူရန် ကြိုးစားခဲ့ကြရသနည်း၊ အဘယ်ရည်ရွယ်ချက်ဖြင့်နည်း။

^၁၅ ဟေရှာယ ၄၉:၈ သည်ဘိသိက်ခံများနှင့်သက်ဆိုင်ကြောင်း ပေါလုဖော်ပြပေးကာ ကိုယ်တော်ပြင်ဆင်ပေးသည့် “နှစ်သက်ဖွယ်သောအချိန်” နှင့် “ကယ်တင်ရာနေ့ရက်” အတွင်း ကိုယ်တော့်သဘောတော်နှင့်တွေ့ရန် မကြိုးစားဘဲနေခြင်းအားဖြင့် “ဘုရားသခင်၏ကျေးဇူးတော်ကို အကျိုးမဲ့မခံကြ” ရန်အနူးအညွတ်တောင်းပန်ခဲ့သည်။ ပေါလုက ဤသို့ထပ်ဆင့်ခဲ့သည်– “ယခုပင်နှစ်သက်ဖွယ်သောအချိန်ဖြစ်၏။ ယခုပင် ကယ်တင်ရာနေ့ရက်ကာလဖြစ်၏။” (၂ ကောရိန္သု ၆:၂၊ သမ္မာ) စီ.အီး. ၃၃ ပင်တေကုတ္တေပွဲနေ့ကတည်းက ဝိညာဉ်ရေးဣသရေလလူများအနေနှင့် “နှစ်သက်ဖွယ်သောအချိန်” သည်သူတို့အတွက် “ကယ်တင်ရာနေ့ရက်” ဖြစ်စေရန် ဘုရားသခင့်မခံစားထိုက်သောကရုဏာတော်ကို ခံစားထိုက်ကြောင်းသက်သေထူရန် ကြိုးပမ်းခဲ့ကြရသည်။

‘ဘုရားသခင့်အမှုတော်ဆောင်များမှန်ကြောင်း ကိုယ်ကိုကိုယ်ထင်ရှားစွာပြခြင်း’

၁၆။ ပေါလုသည် အဘယ်ခဲယဉ်းသောအခြေအနေများတွင် ဘုရားသခင့်အမှုဆောင်မှန်ကြောင်း ထင်ရှားစွာပြခဲ့သနည်း။

^၁၆ ကောရိန္သုအသင်းတော်နှင့်ပေါင်းသင်းခဲ့သူအချို့သည် ဘုရားသခင့်ကျေးဇူးတော်ကိုမခံစားထိုက်ကြောင်းထင်ရှားသည်။ ပေါလုသည် “ထိမိ၍လဲစရာအကြောင်း တစ်စုံတစ်ခုကိုမျှမပြု” မိအောင်ရှောင်ခဲ့သော်လည်း သူ၏တမန်တော်အခွင့်အရာကိုကြိုးစားဖျက်ဆီးရန် သူ့ကိုရှုတ်ချခဲ့ကြသည်။ သူသည် “ညှဉ်းဆဲခံခြင်း၊ ဆင်းရဲခြင်း၊ မလွတ်နိုင်သောဘေးဥပဒ်နှင့်တွေ့ခြင်း၊ အရိုက်အပုတ်ခံခြင်း၊ ထောင်ထဲ၌နေခြင်း၊ သူတစ်ပါးရုန်းရင်းခတ်ပြုခြင်း၊ အမှုကိုလုပ်ဆောင်ခြင်း၊ မအိပ်ဘဲစောင့်နေခြင်း၊ မွတ်သိပ်ခြင်း” တို့အားဖြင့် ဘုရားသခင့်ဓမ္မအမှုဆောင်မှန်ကြောင်း ထင်ရှားစွာပြခဲ့သည်။ (၂ ကောရိန္သု ၆:၃-၅) ထို့နောက် ပေါလုက သူ့ကိုအတိုက်အခံပြုသူများသည် ဓမ္မအမှုဆောင်များဖြစ်မည်ဆိုလျှင် သူသည် ထောင်ချခြင်း၊ ရိုက်နှက်ခြင်း၊ အန္တရာယ်များနှင့် ဆင်းရဲခက်ခဲခြင်းများကိုပို၍ခံစားခဲ့ရသောကြောင့် “အထူးသဖြင့်ဖြစ်၏” ဟုအကြောင်းပြခဲ့သည်။—၂ ကောရိန္သု ၁၁:၂၃-၂၇။

၁၇။ (က) ကျွန်ုပ်တို့သည် အဘယ်အရည်အသွေးများကိုပြသခြင်းအားဖြင့် ဘုရားသခင့်အမှုဆောင်များမှန်ကြောင်း ထင်ရှားစွာပြနိုင်သနည်း။ (ခ) “ဖြောင့်မတ်သောလက်နက်များ” ကားအဘယ်နည်း။

^၁၇ ပေါလုနှင့်သူ၏အပေါင်းအဖော်များကဲ့သို့ ကျွန်ုပ်တို့သည် ဘုရားသခင်၏ဓမ္မအမှုဆောင်မှန်ကြောင်း ထင်ရှားစွာပြနိုင်ပါသည်။ မည်သို့နည်း။ “စင်ကြယ်ခြင်း” သို့မဟုတ် သန့်စင်ခြင်းအားဖြင့်လည်းကောင်း၊ တိကျသောကျမ်းစာအသိပညာနှင့်အညီ ကျင့်ဆောင်ခြင်းအားဖြင့်လည်းကောင်းဖြစ်သည်။ ပြစ်မှားခံရသည့်အခါ၊ သို့မဟုတ် ဒေါသနှိုးဆွခံရသည့်အခါ သည်းခံ “စိတ်ရှည်ခြင်း” အားဖြင့်ဖြစ်စေ၊ အခြားသူများကိုကူညီပေးရာတွင် “ကျေးဇူးပြုခြင်း” အားဖြင့်ဖြစ်စေ အမှုဆောင်မှန်ကြောင်း ထင်ရှားစွာပြနိုင်ပါသည်။ ထို့အပြင် ကိုယ်တော့်သန့်ရှင်းသောဝိညာဉ်တော်လမ်းပြမှုကိုခံယူခြင်း၊ “ချစ်ယောင်မဆောင်အမှန်ချစ်ခြင်း၊” သစ္စာစကားကိုပြောခြင်းနှင့် ခရစ်ယာန်ဓမ္မအမှုကိုဆောင်ရွက်ရန် ကိုယ်တော်ကိုအားထားခြင်းတို့အားဖြင့် ဘုရားသခင်၏ဓမ္မအမှုဆောင်မှန်ကြောင်း ထင်ရှားစွာပြနိုင်သည်။ စိတ်ဝင်စားစရာမှာ ပေါလုသည် “ဖြောင့်မတ်သောအကျင့်တည်းဟူသော လက်နက်များကို လက်ယာဘက် လက်ဝဲဘက်၌ ဝတ်ဆောင်ခြင်းအားဖြင့်” လည်းအမှုဆောင်မှန်ကြောင်းကိုသက်သေထူခဲ့သည်။ ရှေးခေတ်စစ်ပွဲများတွင် လက်ယာဘက်တွင် ဓားကိုင်ကာ လက်ဝဲဘက်တွင် ဒိုင်းလွှားကိုင်လေ့ရှိကြသည်။ မှောက်မှားသောသွန်သင်သူများနှင့် ဝိညာဉ်ရေးစစ်ပွဲတိုက်ခိုက်ရာတွင် ပေါလုသည် အပြစ်ရှိသောဇာတိလက်နက်များဖြစ်သည့် သဘောကောက်ခြင်း၊ လိမ်လည်လှည့်ဖြားခြင်းတို့ကိုအသုံးမပြုခဲ့ချေ။ (၂ ကောရိန္သု ၆:၆၊ ၇; ၁၁:၁၂-၁၄; သု. ၃:၃၂) သူသည် ဖြောင့်မတ်သော “လက်နက်များ” သို့မဟုတ် နည်းလမ်းများဖြင့် စစ်မှန်သောဝတ်ပြုရေးကို တိုးမြှင့်ပေးခဲ့သည်။ ကျွန်ုပ်တို့လည်း ထိုသို့ပြုသင့်သည်။

၁၈။ ကျွန်ုပ်တို့သည် ဘုရားသခင့်အမှုဆောင်များဖြစ်ကြမည်ဆိုလျှင် မည်သို့ပြုမူကြရမည်နည်း။

^၁၈ ကျွန်ုပ်တို့သည် ဘုရားသခင့်ဓမ္မအမှုဆောင်များဖြစ်ကြမည်ဆိုလျှင် ပေါလုနှင့်သူ၏လုပ်ဖော်ဆောင်ဖက်များပြုခဲ့ကြသကဲ့သို့ ကျွန်ုပ်တို့ပြုမူကြရပါလိမ့်မည်။ လေးစားမှုခံရသည်ဖြစ်စေ၊ မခံရသည်ဖြစ်စေ ခရစ်ယာန်များကဲ့သို့ပြုမူကျင့်ကြံကြရလိမ့်မည်။ ကျွန်ုပ်တို့အကြောင်းမကောင်းသတင်းများသည် ကျွန်ုပ်တို့၏ဟောပြောခြင်းလုပ်ငန်းကို ရပ်တန့်စေမည်မဟုတ်၊ ချီးမွမ်းခံရမည်ဆိုလျှင်လည်း ထောင်လွှားသွားကြလိမ့်မည်မဟုတ်ချေ။ အမှန်စကားကိုပြောကြပြီး ဘုရားတရားနှင့်ညီသောအကျင့်များကိုကျင့်သူအဖြစ် အသိအမှတ်ပြုခံရနိုင်သည်။ ရန်သူ၏တိုက်ခိုက်မှုအောက်တွင် သေဘေးကြုံရသောအခါ ယေဟောဝါအားကိုးစားကြပါမည်။ ထို့ပြင် ကျေးဇူးတင်စိတ်ဖြင့် ပဲ့ပြင်ဆုံးမမှုကိုလက်ခံကြပါမည်။—၂ ကောရိန္သု ၆:၈၊ ၉။

၁၉။ ဝိညာဉ်ရေးအရ အဘယ်နည်းဖြင့် ‘လူများကိုရတတ်စေ’ နိုင်ခဲ့သနည်း။

^၁၉ မိတ်သဟာယဖွဲ့ခြင်းဓမ္မအမှုအကြောင်း ဆွေးနွေးခန်းကိုအဆုံးသတ်ရာ၌ ပေါလုက “ဝမ်းနည်းသောသူကဲ့သို့ဖြစ်သော်လည်း အစဉ်ဝမ်းမြောက်သောသူ၊ ဆင်းရဲသောသူကဲ့သို့ဖြစ်သော်လည်း၊ လူများကိုရတတ်စေသောသူ၊ ဥစ္စာတစ်စုံတစ်ခုကိုမျှမပိုင်သောသူကဲ့သို့ဖြစ်သော်လည်း အလုံးစုံတို့ကိုပိုင်သောသူ” များဖြစ်ခဲ့ကြောင်း ကိုယ်တိုင်နှင့်သူ၏အပေါင်းပါများအကြောင်း ပြောပြခဲ့သည်။ (၂ ကောရိန္သု ၆:၁၀) ထိုအမှုဆောင်များသည် သူတို့၏ဝေဒနာများကြောင့် ဝမ်းနည်းကြရသော်လည်း အတွင်းရွှင်လန်းမှုရှိခဲ့ကြသည်။ သူတို့သည် ကာယရေးအရဆင်းရဲကြသော်လည်း ဝိညာဉ်ရေးအရ ‘လူများကိုရတတ်စေခဲ့’ ကြ၏။ အမှန်မှာ၊ သူတို့၏ယုံကြည်ခြင်းက ဝိညာဉ်ရေးအရ သူတို့ကိုချမ်းသာစေခဲ့သောကြောင့် ဘုရားသခင်၏ကောင်းကင်သားများဖြစ်ခွင့်ပါအပါအဝင် ‘အလုံးစုံတို့ကိုပိုင်ဆိုင်ခဲ့ကြ’ ၏။ ထို့အပြင် သူတို့သည် ခရစ်ယာန်ဓမ္မအမှုဆောင်များအဖြစ် ချမ်းသာပျော်ရွှင်သည့်ဘဝကိုပိုင်ဆိုင်ခဲ့ကြသည်။ (တမန်တော် ၂၀:၃၅) သူတို့နည်းတူ ယခုပင်—ဤကယ်တင်ရာနေ့ရက်အတွင်း—ကျွန်ုပ်တို့သည် မိတ်သဟာယအမှုဆောင်ခြင်းတွင်ပါဝင်ခြင်းအားဖြင့် ‘လူများကိုရတတ်စေ’ နိုင်သည်!

ယေဟောဝါ၏ကယ်တင်ခြင်းကိုကိုးစားပါ

၂၀။ (က) ပေါလု၏ပြင်းပြသောဆန္ဒကား အဘယ်နည်း။ အဘယ်ကြောင့် အချိန်မဖြုန်းနိုင်ကြသနည်း။ (ခ) ယခု ကျွန်ုပ်တို့သည် ကယ်တင်ရာနေ့ရက်အတွင်း အသက်ရှင်နေကြကြောင်း အဘယ်အရာကဖော်ပြသနည်း။

^၂၀ စီ.အီး. ၅၅ ခန့်၌ ပေါလုသည် ကောရိန္သုမြို့သားများထံ သူ၏ဒုတိယစာစောင်ကိုရေးသားချိန်တွင် ဂျူးအစီအစဉ်စနစ်အတွက် ၁၅ နှစ်ခန့်သာကျန်ရှိတော့သည်။ တမန်တော်သည် ဂျူးများနှင့်တစ်ပါးအမျိုးသားများကို ခရစ်တော်အားဖြင့် ဘုရားသခင်နှင့် မိတ်သဟာယဖွဲ့စေလိုသည့်ဆန္ဒပြင်းပြခဲ့သည်။ ထိုနေ့ရက်သည် ကယ်တင်ရာနေ့ရက်ဖြစ်ရာ အချိန်မဖြုန်းနိုင်ကြချေ။ ကျွန်ုပ်တို့လည်း ၁၉၁၄ ခုနှစ်ကတည်းက အစီအစဉ်စနစ်၏ထပ်တူအဆုံးကာလတွင် ရောက်ရှိနေခဲ့ကြပြီ။ ယခုကမ္ဘာချီထမ်းဆောင်နေသော ဘုရားသခင့်နိုင်ငံတော်သတင်းဟောပြောခြင်းလုပ်ငန်းက ဤနေ့ကိုကယ်တင်ရာနေ့ရက်အဖြစ်မှတ်သားစေသည်။

၂၁။ (က) ၁၉၉၉ အတွက်အဘယ်နှစ်ချုပ်ကျမ်းချက်ကို ရွေးချယ်ထားသနည်း။ (ခ) ဤကယ်တင်ရာနေ့ရက်တွင် ကျွန်ုပ်တို့မည်သို့ပြုလုပ်နေသင့်သနည်း။

^၂၁ ယေရှုခရစ်မှတစ်ဆင့် ကယ်တင်ခြင်းရရန် ဘုရားသခင့်ပြင်ဆင်ပေးချက်အကြောင်းကို လူမျိုးအပေါင်းကြားသိရန်လိုသည်။ တုံ့ဆိုင်းနေရန် အချိန်မရှိချေ။ ပေါလုက ဤသို့ရေးသားခဲ့သည်– ‘ယခုပင် ကယ်တင်ရာနေ့ရက်ဖြစ်၏။’ ၂ ကောရိန္သု ၆:၂ (သမ္မာ) ပါဤစကားများသည် ယေဟောဝါသက်သေများ၏ ၁၉၉၉ ခုနှစ်နှစ်ချုပ်ကျမ်းချက်ဖြစ်ပါလိမ့်မည်။ ကျွန်ုပ်တို့သည် ယေရုရှလင်မြို့နှင့် ယင်း၏ဗိမာန်တော်ပျက်စီးခြင်းထက် သာ၍ဆိုးသောအရာကို ရင်ဆိုင်နေကြရသောကြောင့် မည်မျှလျော်ကန်လှသည်တကား! လက်တစ်ကမ်းလေးတွင် ကမ္ဘာပေါ်ရှိသူတိုင်း၏ ဤစနစ်တစ်ခုလုံးဆုံးခန်းတိုင်ရမည်။ မနက်ဖြန်မဟုတ် ယခုပင် ကျွန်ုပ်တို့ပြုမူဆောင်ရွက်ရမည်။ ကယ်တင်ခြင်းသည် ယေဟောဝါနှင့်စပ်ဆိုင်ကြောင်းကျွန်ုပ်တို့ယုံကြည်ကြမည်၊ ကိုယ်တော်အား ကျွန်ုပ်တို့ချစ်မြတ်နိုးကြမည်၊ ထာဝရအသက်ကို တန်ဖိုးထားကြမည်ဆိုလျှင် ဘုရားသခင့်မခံစားထိုက်သောကရုဏာတော်ကို အချည်းနှီးဖြစ်စေကြလိမ့်မည်မဟုတ်ချေ။ ယေဟောဝါအား လှိုက်လှဲစွာဂုဏ်တင်လိုသည့်စိတ်ဖြင့် ‘ယခုပင်ကယ်တင်ရာနေ့ရက်ဖြစ်၏’ ဟုကျွန်ုပ်တို့ကြွေးကြော်သောအခါ အမှန်ဆိုလိုကြောင်း အပြောနှင့်အလုပ်အားဖြင့် သက်သေထူကြပါမည်။

သင်မည်သို့ဖြေဆိုမည်နည်း

◻ ဘုရားသခင်နှင့်မိတ်သဟာယဖွဲ့ ခြင်းသည် အဘယ်ကြောင့်အလွန်အရေးကြီးသနည်း။

◻ မိတ်သဟာယဖွဲ့ ခြင်းအမှုတော်တွင် ပါဝင်နေကြသော သံအမတ်များနှင့်သံတမန်များကား မည်သူများနည်း။

◻ ကျွန်ုပ်တို့သည် မိမိတို့ကိုယ်ကို ဘုရားသခင့်အမှုဆောင်များမှန်ကြောင်း မည်သို့ထင်ရှားစွာပြနိုင်သနည်း။

◻ ယေဟောဝါသက်သေများ၏ ၁၉၉၉ ခုနှစ် နှစ်ချုပ်ကျမ်းချက်သည် သင့်အတွက်အဘယ်အဓိပ္ပာယ်ရှိသနည်း။

[စာမျက်နှာ ၁၇ ပါ ရုပ်ပုံ]

ပေါလုနည်းတူ သင်သည် အခြားသူများ ဘုရားသခင်နှင့်မိတ်သဟာယဖွဲ့နိုင်ကြရန် ထက်သန်စွာ ဟောပြောကူညီပေးနေသလော

အမေရိကန်ပြည်ထောင်စု

ပြင်သစ်

ကုတ်ဒ်အဗွား

[စာမျက်နှာ ၁၈ ပါ ရုပ်ပုံ]

ဤကယ်တင်ရာနေ့ရက်တွင် ယေဟောဝါဘုရားသခင်နှင့် မိတ်သဟာယဖွဲ့သူ မြောက်မြားစွာတွင် သင်ပါဝင်သလော