“ကြီးကြပ်မှူးသည် . . . ကိုယ်ကိုချုပ်တည်းသောသူဖြစ်ရမည်”

“ကြီးကြပ်မှူးသည် . . . ကိုယ်ကိုချုပ်တည်းသောသူဖြစ်ရမည်။—တိတု ၁:၇၊ ၈၊ ကဘ။

၁၊ ၂။ အောရိန်းချ်နယ်မှဝီလီယမ်သည် ချုပ်တည်းခြင်းနှင့်ပတ်သက်သောအဘယ်စံနမူနာပြခဲ့သနည်း။ အဘယ်ကောင်းကျိုးဖြစ်ထွန်းခဲ့သနည်း။

စိတ်လှုပ်ရှားမှုများကို ထိန်းချုပ်ခြင်းနှင့်စပ်လျဉ်း၍ ဂရုပြုထိုက်သည့်နမူနာတစ်ရပ်ကို သမိုင်းကတင်ပြထားသည်။ ၁၆ ရာစုနှစ်လယ်လောက်တွင် ငယ်ရွယ်သောဒတ်ချ်မင်းသား၊ အောရိန်းချ်နယ်မှ ဝီလီယမ်သည် ပြင်သစ်ဘုရင်ဒုတိယမြောက်ဟင်နရီနှင့်အတူတောကစားထွက်နေခဲ့ကြသည်။ ဘုရင်က ပြင်သစ်နှင့်နယ်သာလန်ပြည်မှစ၍ ခရစ်ယာန်ဘောင်နိုင်ငံအားလုံးမှ အခြားတစ်ဖက်ဂိုဏ်းဝင်ရှိရှိသမျှကို သုတ်သင်ပယ်ရှားရန်သူနှင့်စပိန်ဘုရင်တို့၏အကြံအစည်ကို ဝီလီယမ်အားဖွင့်ပြောပြသည်။ ဟင်နရီဘုရင်က ဝီလီယမ်သည် သူကဲ့သို့ပင်သစ္စာရှိတစ်ဦးဖြစ်သည်ဟူသော စိတ်အထင်နှင့်ထိုလျှို့ဝှက်အကြံအစည်၏အသေးစိတ်အကြောင်းရှိသမျှကို ဖွင့်ဟပြောပြလိုက်သည်။ ဝီလီယမ်၏ရင်းနှီးသောမိတ်ဆွေအများမှာ အခြားတစ်ဖက်ဂိုဏ်းဝင်များဖြစ်ကြသောကြောင့် ထိုအကြောင်းကိုကြားရသည့်အခါ သူသည်အလွန်တရာထိတ်လန့်တုန်လှုပ်သွားသော်လည်း မိမိ၏ခံစားချက်ကိုဖော်မပြပဲ ပြောပြသမျှအသေးစိတ်အကြောင်းရှိသမျှကို အထူးစိတ်ဝင်စားကြောင်းပြသခဲ့သည်။

^၂ သို့ရာတွင်ဝီလီယမ်သည် အခြေအနေပေးလာသည်နှင့်တစ်ပြိုင်နက် ၄င်းအကြံအစည်ပျက်ပြားအောင်စတင်လှုပ်ရှားဆောင်ရွက်ခဲ့ရာ နောက်ဆုံး၌နယ်သာလန်နိုင်ငံကို စပိန်အုပ်ချုပ်မှုအောက်မှလွတ်မြောက်စေခဲ့သည်။ ဝီလီယမ်သည် ထိုအကြံအစည်ကိုကြားကြားချင်း ကိုယ့်ကိုယ်ကိုချုပ်တည်းနိုင်ခဲ့သောကြောင့် “ဝီလီယမ်တေမိ” (William the Silent) အမည်တွင်ခဲ့လေသည်။ ဝီလီယမ်သည် “ဒတ်ချ်သမ္မတနိုင်ငံတော်၏လွတ်လပ်ရေးနှင့်ကြီးမြတ်ခြင်းအတွက် အုတ်မြစ်ချပေးခဲ့သူအစစ်အမှန်ဖြစ်သည်” ဟူ၍သမိုင်း တွင်ရစ်လောက်အောင်ကျော်ကြားအောင်မြင်ခဲ့သည်။

၃။ အကြီးအကဲများ ကိုယ်ကိုချုပ်တည်းကြလျှင် မည်သူတို့ကောင်းကျိုးခံစားရကြသနည်း။

^၃ ဝီလီယမ်တေမိ၏စောင့်စည်းထိန်းချုပ်နိုင်မှုကြောင့် သူသည်မိမိကိုယ်တိုင်နှင့်မိမိပြည်သူများအတွက် ကြီးမားစွာအကျိုးပြုခဲ့လေသည်။ ထိုနည်းအတိုင်းပင် ဝိညာဉ်တော်အသီးဖြစ်သောကိုယ်ကိုယ်ကိုချုပ်တည်းခြင်းကို ယနေ့ခရစ်ယာန်အကြီးအကဲများ၊ သို့မဟုတ်ကြီးကြပ်မှူးများ ထင်ရှားတင်ပြသင့်သည်။ (ဂလာတိ ၅:၂၂၊ ၂၃) ဤအရည်အချင်းကို တင်ပြခြင်းအားဖြင့် သူတို့သည် မိမိတို့ကိုယ်ကိုဖြစ်စေ၊ အသင်းတော်ကိုဖြစ်စေအကျိုးပြုကြသည်။ တစ်ဖက်တွင် ကိုယ်ကိုချုပ်တည်းခြင်းမရှိပါက ကြီးမားသောထိခိုက်နစ်နာမှုများကိုဖြစ်ပေါ်စေနိုင်သည်။

ကိုယ်ကိုချုပ်တည်းခြင်း—အကြီးအကဲများ အတွက်လိုအပ်ချက်တစ်ခု

၄။ တမန်တော်ပေါလု၏အဘယ်သြဝါဒစကားက အကြီးအကဲများ ကိုယ်ကိုချုပ်တည်းရန်လိုကြောင်းအလေးအနက်ထင်ရှားစေသနည်း။

^၄ ကိုယ်တိုင်လည်းအကြီးအကဲဖြစ်သောပေါလုသည် ကိုယ်ကိုချုပ်တည်းခြင်း၏အရေးကြီးမှုကို ကောင်းစွာသဘောပေါက်သည်။ ဧဖက်မြို့မှ သူ့ထံသို့ရောက်လာကြသောအကြီးအကဲများအား ဩဝါဒစကားပြောကြားရာ၌ “သိုးအုပ်တစ်အုပ်လုံးကိုလည်းကောင်း၊ ကိုယ်ကိုလည်းကောင်းဂရုပြုကြလော့” ဟုမှာကြားခဲ့သည်။ သူတို့ကိုယ်ကိုဂရုပြုခြင်းဆိုရာ၌ အခြားအရာများအပြင် ကိုယ်ကိုချုပ်တည်းခြင်း၊ သူတို့၏အပြုအမူကိုသတိပြုခြင်းလည်းပါဝင်သည်။ တိမောသေထံစာရေးသားရာ၌လည်း ပေါလုသည် ဤအချက်ကိုပင်အလေးအနက်ထား၍ဤသို့မှာကြားခဲ့သည်။ “ကိုယ်ကိုလည်းကောင်း၊ ကိုယ်ဆုံးမသြဝါဒကိုလည်းကောင်းသတိပြု၍အမြဲတည်နေလော့။” ဤသြဝါဒစကားများကိုထောက်ရှုခြင်းအားဖြင့် ပေါလုသည်လူအချို့တို့၏ကိုယ်တိုင်မလုပ်ပဲ သူတစ်ပါးကိုဆရာလုပ်တတ်သည့်လူ့သဘောလူ့မနောကို ကောင်းစွာနားလည်ကြောင်းထင်ရှားသည်။ သို့ဖြစ်သောကြောင့် မိမိတို့ကိုယ်ကိုဂရုစိုက်ရန်လိုကြောင်း သူရှေးဦးစွာအလေးအနက်ပြောကြားထားရခြင်းဖြစ်သည်။—တမန်တော် ၂၀:၂၈၊ သမ။ ၁ တိမောသေ ၄:၁၆။

၅။ ခရစ်ယာန်အကြီးအကဲများကိုမည်သို့ခန့်အပ်သနည်း။ သူတို့အတွက်လိုအပ်သည့်အရည်အချင်းများကို မည်သည့်ကျမ်းချက်များ၌မှတ်တမ်းတင်ထားသနည်း။

^၅ နှစ်ပေါင်းများစွာတစ်လျှောက်အတွင်း အကြီးအကဲများ၏ကျမ်းပေးတာဝန်များသည် တစ်စတစ်စနှင့်ရှင်းလင်းပီပြင်လာခဲ့သည်။ ယနေ့၊ အသင်းတော်အကြီးအကဲဆိုသည်မှာ ခန့်အပ်ရသောရာထူးဖြစ်ကြောင်းသိမြင်လာသည်။ အကြီးအကဲများကို ယေဟောဝါသက်သေများ၏အုပ်ချုပ်ရေးအဖွဲ့ကသော်လည်းကောင်း၊ ထိုအဖွဲ့မှတိုက်ရိုက်လွဲအပ်ထားသည့် ကိုယ်စားလှယ်များကလည်းကောင်း ခန့်အပ်ပါသည်။ ထိုအဖွဲ့ကတစ်ဖန် “သစ္စာနှင့်သတိပညာရှိသောကျွန်” ကိုကိုယ်စားပြုသည်။ (မဿဲ ၂၄:၄၅-၄၇၊ သမ) ခရစ်ယာန်ကြီးကြပ်မှူး သို့မဟုတ် အကြီးအကဲဖြစ်ရန်လိုအပ်သောအရည်အချင်းများအကြောင်းကို ၁ တိမောသေ ၃:၁-၇ နှင့်တိတု ၁:၅-၉ တွင်အဓိကအားဖြင့်တမန်တော်ပေါလုပေးထားသည်။

၆၊ ၇။ အကြီးအကဲများအတွက် သီးခြားပြဌာန်းထားသည့်အဘယ်အရည်အချင်းများက ကိုယ်ကိုချုပ်တည်းခြင်းရှိဖို့တောင်းဆိုထားသနည်း။

^၆ ပေါလုက ၁ တိမောသေ ၃:၂၊ ၃ တွင်ကြီးကြပ်မှူးတစ်ဦးသည် မယုတ်မလွန်ကျင့်ကြံသူဖြစ်ရမည်ဟုဖော်ပြထားသည်။ အကြီးအကဲတစ်ဦးအနေဖြင့်ဤသို့ကျင့်ကြံ၍ စနစ်ကျသူဖြစ်နိုင်ရန် ကိုယ်ကိုချုပ်တည်းခြင်းရှိရပေမည်။ ကြီးကြပ်မှူးအဖြစ်အရည်အချင်းပြည့်မီသူသည် သူတစ်ပါးကိုရိုက်ပုတ်သူ၊ ရန်လိုသူမဟုတ်ပေ။ ဤအရည်အချင်းရှိနိုင်ရန် အကြီးအကဲသည်ကိုယ်ကိုချုပ်တည်းဖို့လိုသည်။ ထိုမျှမက၊ အကြီးအကဲတစ်ဦးအနေဖြင့် သေသောက်ကြူးသူမဖြစ်ရန်လည်း ကိုယ်ကိုချုပ်တည်းရမည်ဖြစ်သည်။—Reference Bible အောက်ခြေမှတ်ချက်များကိုလည်းရှု။

^၇ တိတု ၁:၇၊ ၈ တွင်ကြီးကြပ်မှူးသည် ကိုယ်ကိုချုပ်တည်းသူဖြစ်ရမည်ဟု ပေါလုအထူးပြုဖော်ပြထားသည်။ သို့သော်ဤအခန်းငယ်များ၌ ကိုယ်ကိုချုပ်တည်းခြင်းနှင့်ပတ်သက်နေသည့်အခြားလိုအပ်သော စည်းကမ်းချက်မည်မျှရှိသည်ကို ဂရုပြုမှတ်သားပါ။ ဥပမာ၊ ကြီးကြပ်မှူးသည် အပြစ်တင်ခွင့်နှင့်ကင်းလွတ်သောသူ၊ အပြစ်ဆိုဖွယ်မရှိသူဖြစ်ရမည်။ အကြီးအကဲတစ်ဦးသည် ကိုယ်ကိုချုပ်တည်းခြင်းမရှိလျှင် ဤစည်းကမ်းချက်များကိုမုချ ပြည့်မီနိုင်မည်မဟုတ်ပေ။

အခြားသူတို့နှင့်ဆက်ဆံရာတွင်

၈။ အကြံပေးဆုံးမရာတွင် အကြီးအကဲများရှိအပ်သည့်အဘယ်အရည်အချင်းများက ကိုယ်ကိုချုပ်တည်းခြင်းရှိဖို့လိုကြောင်း ပဓာနပြုထားသနည်း။

^၈ ၄င်းပြင်၊ ကြီးကြပ်မှူးသည် ယုံကြည်သူချင်းတို့နှင့်ဆက်ဆံရာတွင်လည်း သည်းခံစိတ်ရှည်ရမည်ဖြစ်သည်။ ဤသို့ပြုနိုင်အောင် ကိုယ်ကိုချုပ်တည်းခြင်းရှိရပေမည်။ ဥပမာ၊ ဂလာတိ ၆:၁ တွင်ဤသို့ဖတ်ရသည်။ “ညီအစ်ကိုတို့၊ လူသည်သတိလစ်၍တစ်စုံတစ်ခုသောဒုစရိုက်ကိုပြုမိလျှင်၊ ဝိညာဉ်ဆုကျေးဇူးကိုခံရသောသင်တို့ [အဓိကအားဖြင့်အကြီးအကဲတို့] သည်အပြစ်သွေးဆောင်ခြင်းနှင့် ကိုယ်တိုင်လွတ်မည်အကြောင်း၊ ကိုယ်ကိုသတိပြုလျက်သိမ်မွေ့နူးညံ့သောသဘောနှင့် ထိုသို့သောသူကိုမစ၍၊ သူ၏နေရာ၌တည်မြဲတည်စေပြန်ကြလော့။” နူးညံ့သိမ်မွေ့သောသဘောကိုပြသနိုင်ရန် ကိုယ်ကိုချုပ်တည်းခြင်းရှိဖို့လိုသည်။ ယင်းအကြောင်းနှင့်ပတ်သက်၍မိမိကိုယ်ကိုသတိပြုရာ၌လည်း ကိုယ်ကိုချုပ်တည်းခြင်းအကျုံးဝင်သည်။ အလားတူစွာ အကြီးအကဲတစ်ဦးထံ ပူဆွေးသောကရောက်နေသူတစ်ယောက် အကူအညီတောင်းလာသည့်အခါ၌ ကိုယ်ကိုချုပ်တည်းရန်အထူးအရေးကြီးသည်။ အကြီးအကဲအနေဖြင့် ထိုသူအပေါ်မည်သို့ပင်သဘောထားစေကာမူကြင်နာမှု၊ သည်းခံမှုနှင့်နားလည်မှုရှိရပေမည်။ အလျင်စလိုအကြံဉာဏ်ပေးမည့်အစား အကြီးအကဲအနေဖြင့်တစ်ဖက်သား၏စကားကိုစိတ်ပါလက်ပါနားထောင်ပြီး ထိုသူအားစိတ်ဒုက္ခပေးနေသည့်အရာသည်အဘယ်အရာဖြစ်သည်ကို သိအောင်ကြိုးစားသင့်သည်။

၉။ အလွန်စိတ်ထိခိုက်နေသောညီအစ်ကိုများနှင့် ဆက်ဆံရာတွင် အဘယ်သြဝါဒစကားကို အကြီးအကဲများနှလုံးသွင်းအပ်သနည်း။

^၉ အထူးသဖြင့် အလွန်စိတ်ထိခိုက်နေသူနှင့် ဆက်ဆံသည့်အခါယာကုပ် ၁:၁၉ မှသြဝါဒစကားသည် အလွန်ပင်ဆီလျော်လှပေသည်။ “ငါချစ်သောညီအစ်ကိုတို့၊ ခပ်သိမ်းသောသူတို့သည် နားကြားခြင်းငှာလျင်မြန်ကြစေ။ စကားပြောခြင်းငှာလည်းကောင်း၊ အမျက်ထွက်ခြင်းငှာလည်းကောင်းနှေးကြစေ။” မှန်ပါသည်၊ အထူးသဖြင့် စိတ်ဆိုးမာန်ဆိုးနှင့် စိတ်လိုက်မာန်ပါတုံ့ပြန်မှုမျိုးနှင့်ရင်ဆိုင်ရသည့်အခါ အကြီးအကဲတစ်ဦးအနေဖြင့် ထပ်တူသဘောမျိုးနှင့်မတုံ့ပြန်မိရန် သတိထားဆင်ခြင်အပ်သည်။ တစ်ဖက်မှစိတ်လိုက်မာန်ပါစွပ်စွဲပြောဆိုမှုကို စိတ်လိုက်မာန်ပါပြန်၍စွပ်စွဲပြောဆိုခြင်းမပြုမိအောင် “အဆိုးအတွက်အဆိုးကိုမတုံ့မပြန်” မိအောင်ကိုယ်ကိုချုပ်တည်းခြင်းရှိရပေမည်။ (ရောမ ၁၂:၁၇၊ သမ) ကလဲ့စားချေခြင်းသည် အခြေအနေကိုပို၍ဆိုးရွားစေရုံသာရှိမည်။ ထို့ကြောင့်ဘုရားသခင့်နှုတ်ကပါဌ်တော်က အကြီးအကဲများအား “ဖြည်းညင်းစွာပြန်ပြောခြင်းသည်ဒေါသကိုငြိမ်းစေတတ်၏” ဟူ၍သတိပေးခြင်းအားဖြင့် ကောင်းမြတ်သောသြဝါဒကိုထပ်၍ပေးထားသည်။—သု၊ ၁၅:၁၊ သမ္မ ။

အကြီးအကဲစည်းဝေးနှင့်တရားရေးအမှုကြားနာစဉ်တွင် ကိုယ်ကိုချုပ်တည်းခြင်း

၁၀၊ ၁၁။ အကြီးအကဲစည်းဝေးများ၌ အဘယ်သို့ဖြစ်ပျက်ခဲ့သဖြင့် ထိုသို့သောအချိန်အခါများ၌ ကိုယ်ကိုချုပ်တည်းခြင်းရှိဖို့လိုအပ်ကြောင်းပြဆိုသနည်း။

^၁၀ ခရစ်ယာန်အကြီးအကဲများ ကိုယ်ကိုချုပ်တည်းရန် ဂရုစိုက်ရမည့်အခြားနေရာတစ်နေရာမှာ အကြီးအကဲစည်းဝေးကျင်းပနေစဉ်အတွင်းဖြစ်သည်။ အမှန်တရားနှင့်တရားမျှတမှုကို ရှေးရှု၍အေးဆေးတည်ငြိမ်စွာပြောဆိုနိုင်ရန် တစ်ခါတစ်ရံစိတ်ချုပ်တည်းခြင်းများစွာရှိဖို့လိုသည်။ ဆွေးနွေးပွဲတွင်အထက်စီးမှ ဩဇာညောင်းလိုသည့်သဘောကိုရှောင်ရှားရန်အတွက်လည်း ကိုယ်ကိုချုပ်တည်းခြင်းရှိရမည်။ အကြီးအကဲတစ်ဦး၌ ဤသို့သောစရိုက်မျိုးရှိနေပါက အခြားအကြီးအကဲတစ်ယောက်ကကြင်နာစွာဖြင့်အကြံပေးသင့်သည်။—၃ ယောဟန် ၉ နှိုင်းယှဉ်။

^၁၁ ၄င်းပြင်အကြီးအကဲစည်းဝေး၌ စိတ်အားထက်သန်လွန်းသောအကြီးအကဲတစ်ဦးသည် စိတ်တက်ကြွလှုပ်ရှားရုံမျှမက အော်ကြီးဟစ်ကျယ်ပင်ပြောမိဆိုမိနိုင်ပေသည်။ ထိုသို့သောအပြုအမူမျိုးသည် ကိုယ်ကိုချုပ်တည်းခြင်း ကင်းမဲ့ခြင်းကိုကောင်းစွာဖော်ပြသည့်လက္ခဏာပင်ဖြစ်သည်။ ဤသို့သောလုပ်ရပ်သည် ကိုယ့်အကျိုးကိုကိုယ်နှစ်ပြန်ဖျက်ဆီးခြင်းပင်ဖြစ်သည်။ တစ်ဖက်၌လူတစ်ဦးသည် ကိုယ်ကိုချုပ်တည်းခြင်းမရှိလျှင်မရှိသည့်အတိုင်းအတာအထိ သူသည်ဆင်ခြင်တုံတရားအပေါ်စိတ်လှုပ်ရှားမှုကို လွှမ်းမိုးစေခြင်းအားဖြင့် မိမိကိုယ်တိုင်၏ရပ်တည်ချက်ကို အားနည်းသွားစေသည်။ အခြားတစ်ဖက်၌ စိတ်တက်ကြွလှုပ်ရှားမှုဖြစ်သည့် အတိုင်းအတာအထိသူသည်အကြီးအကဲချင်းတို့နှင့် ကတောက်ကဆတ်သဘောကွဲလွဲစေနိုင်သည့်ပြင် မသင့်မမြတ် ရန်လိုသည့်သဘောမျိုးပင်ဖြစ်ပွားစေနိုင်သည်။ ထို့ပြင်၊ အကြီးအကဲများသတိမထားကြပါက သဘောကွဲလွဲမှုကြောင့် အချင်းချင်းစိတ်ဝမ်းပင်ကွဲသွားနိုင်သည်။ ဤသို့ဖြင့် သူတို့ကိုယ်တိုင်၏အကျိုးလည်း ထိခိုက်နစ်နာနိုင်သည့်ပြင် အသင်းတော်၏အကျိုးပါထိခိုက်နစ်နာစေနိုင်သည်။—တမန်တော် ၁၅:၃၆-၄၀ နှိုင်းယှဉ်။

၁၂။ အဘယ်အခြေအနေကို ကိုင်တွယ်ရာတွင်အကြီးအကဲများသည် ကိုယ်ကိုချုပ်တည်းခြင်းရှိရန်သတိထားရမည်နည်း။

^၁၂ အကြီးအကဲများသည် မျက်နှာလိုက်ခြင်း၊ အာဏာကိုအလွဲသုံးခြင်းမပြုမိအောင်လည်း ကိုယ်ကိုချုပ်တည်းရန်အထူးလိုအပ်သည်။ သွေးဆောင်ခြင်းနောက်ပါရန်၊ လူတစ်ဦး၏အပြောအဆို၊ အလုပ်အကိုင်ပေါ်မစုံလင်သောလူ့ဆင်ခြင်သုံးသပ်မှု လွှမ်းမိုးသွားရန်အထူးပင်လွယ်ကူလှသည်တကား။ အကြီးအကဲများသည် မိမိတို့သားသမီး သို့မဟုတ် ဆွေမျိုးအချို့မကောင်းသောအမူအကျင့်ပြုမိသည့်အခါ၌ ပြတ်ပြတ်သားသားအရေးယူလုပ်ဆောင်ခြင်းမပြုဘဲနေသည်ကို မကြာခဏတွေ့ရသည်။ ထိုသို့သောအခြေအနေမျိုး၌ သွေးသားတော်စပ်မှုကြောင့် တရားမျှတစွာအရေးယူခြင်းကို အတားအဆီးမဖြစ်စေရန် ကိုယ်ကိုချုပ်တည်းဖို့လိုသည်။—တရားဟောရာ ၁၀:၁၇။

၁၃။ တရားရေးအမှုကြားနာစစ်ဆေးရာတွင် အကြီးအကဲများသည် အဘယ်ကြောင့်အထူးသဖြင့် ကိုယ်ကိုချုပ်တည်းရန်လိုသနည်း။

^၁၃ ကိုယ်ကိုချုပ်တည်းခြင်းရှိရန် အထူးအရေးကြီးသည့်အခြေအနေတစ်ခုမှာ တရားရေးအမှုစစ်ဆေးကြားနာသည့်အခါ၌ဖြစ်သည်။ အကြီးအကဲများအနေဖြင့်စိတ်လှုပ်ရှားခြင်း အလွန်အမင်းလွှမ်းမိုးခြင်းမခံရအောင် ကိုယ်ကိုချုပ်တည်းရန်အထူးလိုအပ်သည်။ မျက်ရည်ကျပြသည်နှင့် လွယ်လွယ်နှင့်စိတ်တိမ်းညွတ်ခြင်းမဖြစ်သင့်ပေ။ တစ်ချိန်တည်း၌အကြီးအကဲတစ်ဦးသည် အယူဖောက်ပြန်သူများနှင့် ဆက်ဆံရသည့်အခါဖြစ်တတ်သကဲ့သို့ စွပ်စွဲရှုတ်ချပြောဆိုခံရသည့်အခါ၌ ဣန္ဒြေမပျက်အောင်သတိထားသင့်ပေသည်။ ဤနေရာတွင် “သခင်ဘုရား၏ကျွန်သည် ရန်မတွေ့ရ။ ခပ်သိမ်းသောသူတို့အားဖြည်းညင်းစွာပြုသောသူ . . . ဖြစ်ရမည်” ဟူသောပေါလု၏စကားသည် အလွန်တရာဆီလျော်ပေသည်။ ဖိစီးနှောင့်ယှက်ခံရသည့်အခါ ဖြည်းညင်းစွာပြုနိုင်ရန် ကိုယ်ကိုချုပ်တည်းခြင်းရှိရပေမည်။ “သခင်ဘုရား၏ကျွန်သည် . . . သည်းခံနိုင်သောသူဖြစ်ရမည်။ ဆီးတားငြင်းခုံသောသူတို့ကို နူးညံ့သိမ်မွေ့စွာဆုံးမရမည်” ဟုပေါလုဆက်လက်၍ဆိုထားသည်။ အတိုက်အခံနှင့်ရင်ဆိုင်ရသောအခါ နူးညံ့သိမ်မွေ့ခြင်းရှိရန်၊ သည်းခံမှုရှိရန်ကိုယ်ကိုချုပ်တည်းရပေမည်။—၂ တိမောသေ ၂:၂၄၊ ၂၅။

ဆန့်ကျင်ဘက်လိင်ရှင်နှင့်ဆက်ဆံရာတွင် ကိုယ်ကိုချုပ်တည်းခြင်း

၁၄။ ဆန့်ကျင်ဘက်လိင်ရှင်များနှင့်ဆက်ဆံရာတွင် အကြီးအကဲများသည် အဘယ်ကောင်းမြတ်သောသြဝါဒစကားကိုလိုက်နာအပ်သနည်း။

^၁၄ အကြီးအကဲများသည် ဆန့်ကျင်ဘက်လိင်ရှင်တို့နှင့်ဆက်ဆံရသည့်အခါ၌ အထူးသတိဝီရိယရှိရပေမည်။ အကြီးအကဲတစ်ဦးအနေဖြင့် ညီအစ်မတစ်ဦးထံတစ်ဦးတည်း သိုးထိန်းလည်ပတ်မှုပြုရန်မလျော်ကန်ပေ။ အခြားအကြီးအကဲတစ်ယောက်ယောက်၊ သို့မဟုတ် ဓမ္မအမှုထမ်းတစ်ယောက်ယောက်နှင့်သွားသင့်သည်။ ဤပြဿနာကို နားလည်ဟန်တူသောကြောင့် ပေါလုကအကြီးအကဲဖြစ်သူတိမောသေအား “အသက်ကြီးသောမိန်းမတို့ကိုအမိကဲ့သို့လည်းကောင်း၊ မိန်းမပျိုတို့ကိုအလွန်စင်ကြယ်သောအခြင်းအရာနှင့်တကွ နှမကဲ့သို့လည်းကောင်းမှတ်၍ကျင့်လော့” ဟူ၍သြဝါဒပေးခဲ့သည်။ (၁ တိမောသေ ၅:၁၊ ၂) ဖခင်တစ်ဦး၏အမူအရာမျိုးဖြင့် ညီအစ်မတစ်ဦး၏ပခုံးပေါ်တွင် လက်တင်သည့်အကြီးအကဲအချို့ကိုတွေ့ဖူးသည်။ ထိုသူတို့သည် မိမိတို့ကိုယ်ကိုလှည့်စားနေခြင်းဖြစ်နိုင်သည်။ အကြောင်းမှာ စင်ကြယ်သောခရစ်ယာန်ညီနောင်ရင်းချာ ချစ်ခင်စုံမက်သောစိတ်ကြောင့်မဟုတ်ပဲ စိတ်ကူးယဉ်သာယာမှုအာရုံနှိုးဆွသောစိတ်ကြောင့် ထိုသို့ပြုမူခြင်းဖြစ်နိုင်သည်။—၁ ကောရိန္သု ၇:၁ နှိုင်းယှဉ်။

၁၅။ အကြီးအကဲတစ်ဦး ကိုယ်ကိုချုပ်တည်းခြင်းမရှိသည့်အခါ ယေဟောဝါ၏နာမတော်အသရေပျက်နိုင်ကြောင်း အဖြစ်အပျက်တစ်ခုကမည်သို့ထင်ရှားပေါ်လွင်စေသနည်း။

^၁၅ အသင်းတော်အတွင်းရှိ ညီအစ်မများနှင့်ဆက်ဆံရာတွင်အကြီးအကဲအချို့ ကိုယ်ကိုချုပ်တည်းခြင်းမရှိသဖြင့် သမ္မာတရား၏ဂုဏ်ရောင် များစွာညှိုးနွမ်းခဲ့ရသည်။ လွန်ခဲ့သောနှစ်အနည်းငယ်က အကြီးအကဲတစ်ဦးသည် သက်သေခံမဟုတ်သည့်လင်သားရှိသူခရစ်ယာန်ညီအစ်မတစ်ယောက်နှင့်ဖောက်ပြားမိသဖြင့် နှင်ထုတ်ခံလိုက်ရသည်။ ထိုအကြီးအကဲဟောင်းကိုနှင်ထုတ်လိုက်ကြောင်းကြေညာသည့်ည၌ အခဲမကျေသောခင်ပွန်းဖြစ်သူသည် ရိုင်ဖယ်သေနတ်နှင့်နိုင်ငံတော်ခန်းမအတွင်းသို့ ခြေလှမ်းကျဲကျဲနှင့်ဝင်လာပြီး ထိုဖောက်ပြားသူနှစ်ဦးကိုပစ်ခတ်လိုက်သည်။ သို့သော်တစ်ယောက်မျှမသေပါ။ သူလည်းချက်ချင်းပင်လက်နက်ချလိုက်သည်။ သို့ရာတွင် နောက်တစ်နေ့ထုတ်သတင်းစာကြီးတစ်စောင်၏မျက်နှာဖုံးတွင် ‘ဘုရားရှိခိုးကျောင်းအတွင်းပစ်ခတ်မှုဖြစ်’ ဟူသောသတင်းပါရှိလာသည်။ ထိုအကြီးအကဲ၏ကိုယ်ကိုချုပ်တည်းခြင်းကင်းသည့်လုပ်ရပ်ကြောင့် အသင်းတော်နှင့်ယေဟောဝါ၏နာမတော်မည်မျှအသရေပျက်ရသည်တကား။

အခြားနေရာများ၌ကိုယ်ကိုချုပ်တည်းခြင်း

၁၆။ လူထုဟောပြောချက်ပေးစဉ်တွင် အကြီးအကဲများ အဘယ်ကြောင့်ကိုယ်ကိုချုပ်တည်းရန်သတိထားရမည်နည်း။

^၁၆ အကြီးအကဲတစ်ဦးအနေဖြင့် လူထုဟောပြောပွဲပေးရာတွင်လည်း ကိုယ်ကိုချုပ်တည်းခြင်းရှိရန်အထူးလိုအပ်သည်။ လူထုဟောပြောချက်ပေးသူသည် စိတ်ချယုံကြည်မှုနှင့် ဣန္ဒြေသိက္ခာရှိမှုတွင် စံပြဖြစ်သင့်သည်။ အချို့သည်ပရိသတ်ရွှင်မြူးစေလိုသည့်သဘောဖြင့် ရယ်စရာမောစရာများကိုပြောတတ်ကြသည်။ ဤသို့ပြုခြင်းသည် ပရိသတ်အားသဘောတွေ့မနောခွေ့စေလိုသည့်သွေးဆောင်မှု စိတ်အလိုကိုလိုက်သောသဘောမျိုးပြသရာရောက်နိုင်သည်။ သွေးဆောင်မှုစိတ်အလိုလိုက်ခြင်းမှန်သမျှသည် ကိုယ်ကိုချုပ်တည်းခြင်းကင်းမဲ့ခြင်းပင်ဖြစ်သည်မှာ ဆိုဖွယ်မရှိပေ။ ဟောပြောချက်ပေးရာတွင် အချိန်ကျော်ခြင်းသည်လည်း ကိုယ်ကိုချုပ်တည်းမှုမရှိ၊ ကောင်းစွာပြင်ဆင်မှုမရှိဟုပြောနိုင်သည်။

၁၇၊ ၁၈။ အကြီးအကဲတစ်ဦးအနေဖြင့် မိမိ၏တာဝန်အရပ်ရပ်ကို မျှမျှတတထမ်းဆောင်နိုင်ရန် ကိုယ်ကိုချုပ်တည်းခြင်းသည် အဘယ်အခန်းကဏ္ဍမှပါဝင်သနည်း။

^၁၇ ဝီရိယရှိသောအကြီးအကဲတိုင်းအနေဖြင့် မိမိ၏အချိန်နှင့်စွမ်းအားစိုက်ထုတ်ရန်လိုအပ်သည့်ကိစ္စအရပ်ရပ်ကို မျှမျှတတထမ်းဆောင်သင့်သည်။ အစွန်းတစ်ဖက်သို့မရောက်အောင် ကိုယ်ကိုချုပ်တည်းခြင်းရှိရမည်။ အချို့အကြီးအကဲများသည် မိမိတို့၏မိသားစုကိုဥပေက္ခာပြုထားသည့်အထိ အသင်းတော်ကိစ္စများနှင့်သာလုံးပမ်းနေကြသည်။ သို့နှင့်ညီအစ်မတစ်ဦးက သူမထံသို့ သိုးထိန်းလည်ပတ်မှုကောင်းစွာပြုလုပ်သည့်အကြီးအကဲဖြစ်သူ၏ဇနီးအား ဤအကြောင်းပြောပြသည့်အခါ၌ အကြီးအကဲ၏ဇနီးက “ကျွန်မကိုလည်းတစ်ခါတလေများ သူသိုးထိန်းလည်ပတ်မှုလုပ်ပေးရင်သိပ်ကောင်းမှာဘဲ” ဟုရုတ်တရက်ပြောလိုက်မိသည်။—၁ တိမောသေ ၃:၂၊ ၄၊ ၅။

^၁၈ အကြီးအကဲသည် ကိုယ်ပိုင်လေ့လာမှုပြုလုပ်သည့် အချိန်နှင့်လယ်ကွင်းဓမ္မအမှု သို့မဟုတ်သိုးထိန်းလည်ပတ်မှုအတွက်အသုံးပြုသောအချိန်တို့ကို မျှမျှတတရှိစေရန်အတွက်လည်း ကိုယ်ကိုချုပ်တည်းရန်လိုအပ်သည်။ လူ့နှလုံး၏လှည့်စားတတ်သည့်သဘောကိုထောက်ရှုခြင်းအားဖြင့် အကြီးအကဲတစ်ဦးသည် သူအထူးနှစ်သက်ပျော်ရွှင်သည့်အရာအတွက် ပေးသင့်ပေးထိုက်သည့်အချိန်ထက်များစွာ ပိုပေးမိရန်အလွန်ပင်လွယ်ကူပါသည်။ သူသည်စာအုပ်ကိုနှစ်သက်သူဖြစ်လျှင် ကိုယ်ပိုင်လေ့လာမှုအတွက်ပေးသင့်သည်ထက် အချိန်ပိုပေးမိနိုင်ပေသည်။ တစ်အိမ်တက်ဆင်းဓမ္မအမှုသည် ပိုခက်သည်ဟုသူယူဆလျှင် ယင်းကိုရှောင်လွဲရန်အတွက် သိုးထိန်းလည်ပတ်မှုပြုလုပ်ခြင်းကိုအကြောင်းပြပြီး အမျိုးမျိုးဆင်ခြေဆင်လက်ပေးကောင်းပေးပေမည်။

၁၉။ ကိုယ်ကိုချုပ်တည်းခြင်း လိုအပ်ကြောင်းအလေးအနက်ထင်ရှားစေသည့်အဘယ်တာဝန်ကို အကြီးအကဲများရရှိထားသနည်း။

^၁၉ အကြီးအကဲဖြစ်သူအနေဖြင့် အတွင်းရေးမပေါက်ကြားရအောင်စောင့်စည်းရမည့်တာဝန်ရှိသည့်အတွက် ကြပ်ကြပ်မတ်မတ်ကိုယ်ကိုချုပ်တည်းရန်အစဉ်နိုးကြားနေဖို့လိုအပ်သည်။ ဤနေရာတွင် “သူတစ်ပါးနှင့်ဆိုင်ရာလျှို့ဝှက်အပ်သောအမှုကိုမဖော်မပြနှင့်” ဟူသောသြဝါဒစကားသည် အထူးဆီလျော်လှသည်။ (သု၊ ၂၅:၉၊ သမ) ဤအချက်သည် အကြီးအကဲများအတွင်း၌အများဆုံးနှင့် အကျယ်ပြန့်ဆုံးချိုးဖောက်နေကြသည့် စည်းကမ်းချက်တစ်ချက်ဖြစ်ဖွယ်ရှိကြောင်း တွေ့ကြုံမှုများက ဖော်ညွှန်းလျက်ရှိသည်။ အကယ်၍အကြီးအကဲတစ်ဦး၌ အချင်းချင်းကောင်းစွာပြောဆိုဆက်ဆံနိုင်သော၊ ဉာဏ်ကောင်း၍ချစ်မြတ်နိုးရသောကြင်သူသက်ထားရှိပါက သူ့အနေဖြင့်လျှို့ဝှက်ထားရမည့်အတွင်းရေးကို သူမနှင့်ဆွေးနွေးခြင်း သို့မဟုတ် အရိပ်အမြွက်ပြောပြခြင်းပြုလုပ်မိနိုင်သည့် အလားအလာရှိနိုင်သည်။ သို့သော်ဤသို့ပြုလုပ်ခြင်းသည် မတော်လျော်သည်သာမကအလွန်ဉာဏ်မဲ့ရာလည်းရောက်သည်။ အစချီပြောရလျှင် ယုံကြည်စွာအပ်နှံထားရာကိုဖောက်ဖျက်ရာရောက်သည်။ ဝိညာဏညီအစ်ကိုညီအစ်မများသည် မိမိတို့၏ကိုယ်ရေးကိုယ်တာကိစ္စ တင်းကျပ်စွာလျှို့ဝှက်ထားမည်ဟူသောစိတ်ချယုံကြည်မှုနှင့် အကြီးအကဲများထံလာ၍အတွင်းရေးကိုရင်ဖွင့်တိုင်ပင်ပြောဆိုခြင်းဖြစ်သည်။ မိမိဇနီးဖြစ်သူအား လျှို့ဝှက်အပ်သည့်ကိစ္စများကိုပြောပြခြင်းသည်မှားသည်၊ ပညာမဲ့ရာရောက်သည်၊ မေတ္တာမဲ့ရာလည်းရောက်သည်။ အဘယ်ကြောင့်ဆိုသော် ဇနီးသည်ဖြစ်သူအပေါ် မလိုအပ်သောဝန်ထုပ်ဝန်ပိုး တင်ပေးလိုက်ရာရောက်သောကြောင့်ဖြစ်သည်။—သု၊ ၁၀:၁၉။ ၁၁:၁၃။

၂၀။ အကြီးအကဲများ ကိုယ်ကိုချုပ်တည်းရန် အဘယ်ကြောင့်ဤမျှအရေးကြီးသနည်း။

^၂၀ ကိုယ်ကိုချုပ်တည်းခြင်းသည် အလွန်တရာအရေးကြီးသည်။ အထူးသဖြင့်အကြီးအကဲများအဖို့အလွန်ပင်အရေးကြီးသည်မှာ ယုံမှားသံသယမရှိပေ။ ယေဟောဝါ၏လူမျိုးတော်ဘောင်တွင် ဦးဆောင်ခွင့်အပ်နှင်းခံရသောကြောင့် အကြီးအကဲတို့သည် ရှင်းလင်းချက်ပေးရန်တာဝန်ပို၍ကြီးမားသည်။ သူတို့၌များစွာအပ်နှင်းထားသဖြင့် များစွာပြန်တောင်းခံရလိမ့်မည်။ (လုကာ ၁၂:၄၈။ ၁၆:၁၀။ ယာကုပ် ၃:၁ နှိုင်းယှဉ်) အခြားသူတို့လိုက်နာစရာစံနမူနာကောင်းပြရန် အကြီးအကဲများ၏တာဝန်နှင့်အခွင့်အရေးဖြစ်သည်။ ထိုထက်မကခန့်အပ်ခံအကြီးအကဲများသည် များသောအားဖြင့်ကိုယ်ကိုချုပ်တည်းခြင်းရှိမရှိပေါ်မူတည်၍ အခြားသူတို့အပေါ်ကောင်းကျိုးဆိုးကျိုးပို၍ပေးနိုင်သည့်အနေအထားတွင် ရှိကြသည်။ ထို့ကြောင့် “ကြီးကြပ်မှူးသည် . . . ကိုယ်ကိုချုပ်တည်းသောသူဖြစ်ရမည်” ဟူ၍ပေါလုပြောခဲ့သည်မှာအံ့သြစရာမဟုတ်ပေ။

သင်သတိရသလော

▫ အကြီးအကဲများအတွက် လိုအပ်သောအဘယ်ကျမ်းစာဆိုင်ရာတောင်းဆိုချက်များက သူတို့ကိုယ်ကိုချုပ်တည်းခြင်းရှိရမည်ဟုပြဆိုသနည်း။

▫ ယုံကြည်သူချင်းတို့နှင့်ဆက်ဆံရာတွင် အကြီးအကဲများအဘယ်ကြောင့်စိတ်ချုပ်တည်းခြင်းရှိရမည်နည်း။

▫ အကြီးအကဲစည်းဝေးများ၌ ကိုယ်ကိုချုပ်တည်းခြင်းမည်သို့တင်ပြသင့်သနည်း။

▫ အကြီးအကဲများ အတွင်းရေးမပေါက်ကြားရအောင်စောင့်စည်းရန်လိုအပ်ခြင်းက အဘယ်စိန်ခေါ်ချက်ကိုဖြစ်ပေါ်စေသနည်း။

[စာမျက်နှာ ၂၇ ပါ ရုပ်ပုံ]

ခရစ်ယာန်အကြီးအကဲများသည် ကိုယ်ကိုချုပ်တည်းသူများ၊ နှုတ်ကိုစောင့်စည်းသူများဖြစ်ရမည်