ကျွန်ုပ်တို့ပိုင်ဆိုင်တဲ့ အမွေ

၁။ လူသားတွေအကျိုးအတွက် ယေဟောဝါ ဘာပေးခဲ့သလဲ။

ယေဟောဝါဟာ ထာဝစဉ်တည်ရှိတဲ့ ဘုရားသခင်ဖြစ်ပြီး ကျွန်ုပ်တို့ ထာဝစဉ်အသက်ရှင်နိုင်ဖို့ ဘာလုပ်ရမယ်ဆိုတာကို ဖော်ပြပေးတယ်။ အဲဒီလမ်းညွှန်ချက်တွေက မပြောင်းလဲဘူး။ “ယေဟောဝါဘုရား၏ တရားစကားတော်မူကား ထာဝစဉ်တည်မြဲ၏” လို့ သမ္မာကျမ်းစာက ပြောတယ်။ (၁ ပေ. ၁:၂၃-၂၅) ရေးသားထားတဲ့ပုံစံနဲ့ သမ္မာကျမ်းစာပေးထားလို့ ယေဟောဝါကို ကျွန်ုပ်တို့ ကျေးဇူးတင်သင့်ပါတယ်။

၂။ ဘုရားသခင်က မိမိနဲ့ပတ်သက်ပြီး ကျွန်ုပ်တို့ကို ဘာသိစေချင်သလဲ။

^၂ ယေဟောဝါက လူတွေကို သူ့ရဲ့နာမည် သိစေချင်တယ်။ ကောင်းကင်နဲ့မြေကြီး ဖန်ဆင်းခြင်းအကြောင်းပြောတဲ့အခါမှာ ယေဟောဝါရဲ့နာမည်ကို ဦးဆုံးအကြိမ်အဖြစ် ဖော်ပြခဲ့တယ်။ (က. ၂:၄၊ ကဘ) ကျောက်ပြားတွေပေါ်မှာ ပညတ်တော်ဆယ်ပါး ပေးခဲ့တုန်းက ဘုရားသခင်ဟာ မိမိရဲ့နာမည်ကို အံ့ဩစရာကောင်းတဲ့နည်းနဲ့ အကြိမ်အတော်များများ ရေးသားခဲ့တယ်။ ဥပမာ၊ ‘ငါက သင့်ရဲ့ဘုရားသခင် ယေဟောဝါဖြစ်တယ်’ ဆိုတဲ့စကားနဲ့ ပထမဆုံးပညတ်ကို အစပျိုးထားတယ်။ (ထွ. ၂၀:၁-၁၇၊ ကဘ) ကျွန်ုပ်တို့ ဘုရားသခင့်နာမည်ကို မသိနိုင်အောင် စာတန်က သမ္မာကျမ်းစာကို ဖျက်ဆီးပစ်ဖို့ ကြိုးစားခဲ့တယ်။ ဒါပေမဲ့ ယေဟောဝါ ခွင့်မပြုခဲ့ဘူး။—ဆာ. ၇၃:၂၈။

၃။ ဘုရားသခင်က ကျွန်ုပ်တို့ကို သမ္မာကျမ်းစာကနေ ဘာသိစေချင်သလဲ။

^၃ လူတွေမှာ ဘုရားသခင်နဲ့ပတ်သက်ပြီး လွဲမှားတဲ့အယူအဆများစွာ ရှိတယ်။ ဒါပေမဲ့ ယေဟောဝါက ကျွန်ုပ်တို့ကို အမှန်တရားအကြောင်း သိစေချင်တယ်။ သမ္မာကျမ်းစာမှာ အမှန်တရားအကြောင်း ရှင်းရှင်းလင်းလင်း ဖော်ပြထားတဲ့အတွက် ဝမ်းသာစရာပါပဲ။ (ဆာလံ ၄၃:၃၊ ၄ ကိုဖတ်ပါ။a) လောက,ကလူတွေ အမှောင်ထုထဲ ရောက်နေချိန်မှာ ကျွန်ုပ်တို့ကတော့ ပုံဆောင်အလင်းအောက်မှာ ရှိနေကြတယ်။—၁ ယော. ၁:၆၊ ၇။

တန်ဖိုးထားရမယ့်အမွေ ပိုင်ဆိုင်ထား

၄၊ ၅။ ၁၉၃၁ ခုနှစ်ကစပြီး ကျွန်ုပ်တို့ ဘယ်အခွင့်ထူး ရရှိခဲ့သလဲ။

^၄ ခရစ်ယာန်တွေဖြစ်တဲ့ ကျွန်ုပ်တို့မှာ အဖိုးတန်အမွေတစ်ခုရှိတယ်။ “တိုင်းပြည်တစ်ပြည်၏ အမွေအနှစ်သည် ၄င်းတို့တွင်ရှိသော အရည်အသွေး၊ ဓလေ့ထုံးစံ သို့မဟုတ် မျိုးဆက်တစ်ဆက်ပြီးတစ်ဆက် နှစ်ပေါင်းများစွာ လက်ဆင့်ကမ်းလာသည့် လူနေမှုဘဝပုံစံဖြစ်သည်” လို့အဘိဓာန်တစ်အုပ်က ဆိုတယ်။ ကျွန်ုပ်တို့ရရှိတဲ့ အမွေထဲမှာ သမ္မာကျမ်းစာမှာပါတဲ့ တိကျမှန်ကန်တဲ့အသိပညာအကြောင်း၊ ဘုရားသခင်အကြောင်းနဲ့ ကိုယ်တော့်ရည်ရွယ်ချက်တွေအကြောင်း ရှင်းရှင်းလင်းလင်း နားလည်ရခြင်းပါဝင်တယ်။ အဲဒီအမွေထဲမှာ ကိုယ်တော့်နာမည်နဲ့ အခေါ်ခံရတဲ့ အထူးအခွင့်အရေးလည်းပါတယ်။

^၅ ကျွန်ုပ်တို့ရဲ့နာမည်သစ်ကို ၁၉၃၁ ခုနှစ်၊ အမေရိကန်နိုင်ငံ၊ အိုဟိုင်အိုပြည်နယ်၊ ကိုလံဘတ်စ်မြို့မှာကျင်းပတဲ့ စည်းဝေးကြီးမှာ ရရှိခဲ့တာဖြစ်တယ်။ စည်းဝေးကြီးအစီအစဉ်စာရွက်ပေါ်မှာ အတိုကောက်စာလုံးနှစ်လုံး ပုံနှိပ်ထားတယ်။ ညီအစ်ကိုညီအစ်မတွေက အဲဒီစာလုံးရဲ့အဓိပ္ပာယ်က ဘာဖြစ်မလဲလို့ စဉ်းစားခဲ့ကြတယ်။ တချို့သူတွေ ခန့်မှန်းတာ မှန်တယ်။ အဲဒါက ကျွန်ုပ်တို့ခံယူမယ့်နာမည်အသစ်ရဲ့ အတိုကောက်စာလုံးတွေပဲ။ အဲဒီအချိန်မတိုင်ခင်တုန်းကတော့ ကျွန်ုပ်တို့ကို ကျမ်းစာကျောင်းသားများလို့ ခေါ်တယ်၊ ဒါပေမဲ့ ၁၉၃၁၊ ဇူလိုင် ၂၆ မှာ ကျင်းပတဲ့စည်းဝေးကြီးမှာ တက်ရောက်သူအားလုံးဟာ အဲဒီအချိန်ကစပြီး ယေဟောဝါသက်သေဆိုတဲ့နာမည်ကို ခံယူဖို့ သဘောတူခဲ့ကြတယ်။ အဲဒါက တကယ်စိတ်လှုပ်ရှားစရာကောင်းတယ်။ အကြောင်းကတော့ ကျွန်ုပ်တို့ဟာ ကျမ်းစာကိုအခြေခံတဲ့ နာမည်တစ်ခုကို ရရှိခဲ့ကြလို့ပဲ။ (ဟေရှာယ ၄၃:၁၂ ကိုဖတ်ပါ။) “စည်းဝေးကြီးကျင်းပတဲ့နေရာတစ်ခုလုံး သိမ့်သိမ့်တုန်သွားစေတဲ့ လက်ခုပ်သြဘာသံကို ကျွန်တော် ဘယ်တော့မှ မေ့မှာမဟုတ်ဘူး” လို့ ညီအစ်ကိုတစ်ယောက်က ပြောပြတယ်။ ကမ္ဘာပေါ်မှာရှိတဲ့ ဘယ်ဘာသာရေးအဖွဲ့ကမှ ဒီနာမည်ကို မခံယူချင်ကြဘူး၊ ဒါပေမဲ့ ဘုရားသခင်က ကျွန်ုပ်တို့ကို ဒီနာမည်အသုံးပြုခွင့်ပေးခဲ့တာ အနှစ် ၈၀ ကျော်ရှိပြီ။ ယေဟောဝါသက်သေဖြစ်ရတာ ဘယ်လောက်တောင် အခွင့်ထူးလိုက်သလဲ။

၆။ ကျွန်ုပ်တို့ရရှိထားတဲ့အမွေထဲမှာ ဘာ ပါဝင်သလဲ။

^၆ ကျွန်ုပ်တို့ရရှိထားတဲ့ နောက်ထပ်အမွေတစ်ခုက သမ္မာကျမ်းစာမှာပါတဲ့ ရှေးခေတ်ကျေးကျွန်တွေအကြောင်းဖြစ်တယ်။ ဥပမာ၊ အာဗြဟံ၊ ဣဇာက်နဲ့ ယာကုပ်အကြောင်း စဉ်းစားကြည့်ပါ။ သူတို့တွေဟာ ယေဟောဝါနှစ်သက်တဲ့ ဘဝပုံစံအတိုင်း ဘယ်လိုအသက်ရှင်မယ်ဆိုတာ မိသားစုလိုက် ဆွေးနွေးခဲ့ကြမှာဖြစ်တယ်။ ဒါကြောင့် ယောသပ်ဟာ ပေါတိဖာမယားနဲ့ လိင်အကျင့်ယိုယွင်းဖို့ ငြင်းဆန်နိုင်ခဲ့တာဖြစ်တယ်။ (က. ၃၉:၇-၉) ပထမရာစုတုန်းက ခရစ်ယာန်တွေဟာ တစ်ဦးနဲ့တစ်ဦး ဘုရားသခင်အကြောင်း ဝေမျှပြောဆိုခဲ့ကြတယ်။ အဲဒီအထဲမှာ ခရစ်ယာန်အသင်းတော်တွေကို တမန်တော်ပေါလု ပြောပြခဲ့တဲ့ သခင့်ညစာစားပွဲနဲ့ပတ်သက်တဲ့အကြောင်းတွေပါတယ်။ (၁ ကော. ၁၁:၂၊ ၂၃) ယနေ့အချိန်မှာ “စွမ်းအားတော်၏ လမ်းပြမှုကိုခံယူ၍ အမှန်တရားနှင့်အညီ” ဘုရားသခင်ကို ဝတ်ပြုနိုင်ဖို့ လိုအပ်တဲ့အသေးစိတ်အချက်အလက်တွေကို သမ္မာကျမ်းစာမှာ ရေးသားထားတယ်။ (ယောဟန် ၄:၂၃၊ ၂၄ ကိုဖတ်ပါ။) သမ္မာကျမ်းစာဟာ လူသားအားလုံးကို ကူညီပေးနိုင်တယ်၊ ဒါပေမဲ့ ယေဟောဝါရဲ့လူတွေဖြစ်တဲ့ ကျွန်ုပ်တို့ဟာ သမ္မာကျမ်းစာကို အထူး တန်ဖိုးထားလေးမြတ်သင့်တယ်။

၇။ ကျွန်ုပ်တို့ရရှိထားတဲ့အမွေထဲမှာ ဘယ်ကတိတော် ပါဝင်သလဲ။

^၇ ယနေ့အချိန်မှာလည်း ယေဟောဝါဟာ မိမိရဲ့လူတွေကို ကူညီပေးနေတယ်။ (ဆာ. ၁၁၈:၇) ကျွန်ုပ်တို့ကို ကာကွယ်ဖို့ ကိုယ်တော်လုပ်ဆောင်နေတဲ့အရာတွေကို ကျွန်ုပ်တို့ရဲ့စာပေတွေမှာ ဖတ်နိုင်တယ်။ ဒါက နှိပ်စက်ညှဉ်းပန်းခံနေရချိန်မှာတောင် လုံခြုံတယ်လို့ ခံစားရစေတယ်။ ကျွန်ုပ်တို့ရရှိထားတဲ့ အမွေထဲမှာ အားရှိစရာ ဒီကတိတော်လည်း ပါဝင်တယ်– “‘သင့်ကိုတိုက်ခိုက်ဖို့လုပ်တဲ့ ဘယ်လက်နက်မှ အောင်မြင်မှာမဟုတ်ဘူး။ တရားရင်ဆိုင်တဲ့အခါ သင့်ကိုဆန့်ကျင်ပြောဆိုဖို့ ထတဲ့သူမှန်သမျှကို သင်ပြစ်တင်စီရင်လိမ့်မယ်။ ဒါက ယေဟောဝါရဲ့ကျေးကျွန်တွေပိုင်ဆိုင်ရမယ့် အမွေဖြစ်တယ်။ သူတို့ရဲ့ဖြောင့်မတ်ခြင်းက ငါ့ဆီကနေလာတယ်’ လို့ ယေဟောဝါပြောတယ်။” (ဟေရှာ. ၅၄:၁၇၊ ကဘ) စာတန့်လက်နက်တိုက်ထဲက ဘယ်လက်နက်ကမှ ကျွန်ုပ်တို့ကို အစဉ်အမြဲကျရှုံးနေအောင် မလုပ်နိုင်ဘူး။

၈။ ဒီဆောင်းပါးနဲ့ နောက်ဆောင်းပါးမှာ ဘယ်အကြောင်းတွေကို ဆွေးနွေးကြမလဲ။

^၈ စာတန်က သမ္မာကျမ်းစာကို ဖျက်ဆီးပစ်ဖို့၊ ယေဟောဝါဆိုတဲ့နာမည် ပျောက်ကွယ်သွားစေဖို့နဲ့ အမှန်တရားကို ဖုံးကွယ်ထားဖို့ ကြိုးစားခဲ့တယ်။ ဒါပေမဲ့ စာတန်ဟာ ယေဟောဝါကို ယှဉ်ပြိုင်နိုင်တဲ့ ပြိုင်ဘက်မဟုတ်ဘူး၊ ကိုယ်တော်က သူ့ရဲ့ကြိုးစားအားထုတ်မှုတွေကို တားဆီးခဲ့တယ်။ ဒီဆောင်းပါးနဲ့ နောက်ဆောင်းပါးမှာ (၁) သမ္မာကျမ်းစာနဲ့ အဲဒီမှာပါတဲ့ သတင်းတရားကို ဘုရားသခင် ကာကွယ်ခဲ့ပုံ၊ (၂) ယေဟောဝါက မိမိရဲ့နာမည်ကို လူတွေသိအောင် လုပ်ဆောင်ခဲ့ပုံ၊ (၃) ယနေ့အချိန်မှာ ကျွန်ုပ်တို့ အမှန်တရားအကြောင်းသိနိုင်ဖို့ ဘုရားသခင် လုပ်ဆောင်ပုံတို့ကို ဆွေးနွေးပါလိမ့်မယ်။

သမ္မာကျမ်းစာကို ယေဟောဝါကာကွယ်ခဲ့

၉–၁၁။ ယေဟောဝါက သမ္မာကျမ်းစာကို ဘယ်လိုကာကွယ်ခဲ့သလဲ။

^၉ သမ္မာကျမ်းစာကို ဖျက်ဆီးဖို့ ကြိုးစားအားထုတ်မှုတွေ အများကြီးရှိပေမဲ့ ယေဟောဝါ ကာကွယ်ခဲ့တယ်။ ကက်သလစ်ချာ့ချ်ဟာ လူတွေ သမ္မာကျမ်းစာဖတ်တာကို တားမြစ်ခဲ့တယ်။ ၁၂၂၉ ခုနှစ်မှာ ပြင်သစ်ချာ့ချ်ကောင်စီက လူတွေ ကိုယ်ပိုင်ဘာသာစကားနဲ့ သမ္မာကျမ်းစာဖတ်တာက မှားတယ်လို့ ဥပဒေထုတ်ခဲ့တယ်။ ၁၂၃၄ ခုနှစ်မှာ စပိန်မှာလည်း အဲဒီလို ဥပဒေကိုထုတ်ခဲ့တယ်။ နောက်ပိုင်း ၁၅၅၉ ခုနှစ်မှာ စတုတ္ထမြောက် ပုပ်ရဟန်းမင်း ပေါလ်က ချာ့ချ်ခွင့်ပြုချက်မရှိဘဲ ပုံနှိပ်ခွင့် ဒါမှမဟုတ် လက်ဝယ်ပိုင်ဆိုင်ခွင့် မရှိတဲ့ စာအုပ်စာရင်းမှာ သမ္မာကျမ်းစာကို ထည့်သွင်းခဲ့တယ်။

^၁၀ သမ္မာကျမ်းစာကို ဖျက်ဆီးဖို့ အမျိုးမျိုး ကြိုးစားအားထုတ်ကြပေမဲ့ ယေဟောဝါ ကာကွယ်ခဲ့တယ်။ ၁၃၈၂ ခုနှစ်လောက်မှာ ဂျွန် ဝိကလိဖ်ဟာ ပထမဆုံးအနေတဲ့ သမ္မာကျမ်းစာကို အင်္ဂလိပ်ဘာသာစကားနဲ့ ထုတ်ဝေခဲ့တယ်။ ကျမ်းစာဘာသာပြန်သူ နောက်တစ်ယောက်က ဝီလျံတင်ဒေးဖြစ်ပြီး သူဟာ ၁၅၃၆ ခုနှစ်မှာ သေဒဏ်ပေးခံခဲ့ရတယ်။ သူ့ကို သစ်တိုင်မှာချည်ထားတဲ့အခါ သူက “သခင်၊ အင်္ဂလန်ဘုရင်ရဲ့ မျက်စိကို ဖွင့်ပေးပါ” လို့ အော်ပြောခဲ့တယ်။ အဲဒီနောက် သူ့ကို လည်မျိုညှစ်သတ်ပြီး မီးရှို့လိုက်တယ်။

^၁၁ ၁၅၃၅ ခုနှစ်မှာ မိုင်းလ်စ် ကာဗာဒေးလ်ကလည်း သမ္မာကျမ်းစာကို အင်္ဂလိပ်လို ဘာသာပြန်ခဲ့တယ်။ ကာဗာဒေးလ်ဟာ သူ့ရဲ့ဘာသာပြန်ကျမ်းတစ်ပိုင်းမှာ တင်ဒေးရဲ့ ဘာသာပြန်ကျမ်းကို အသုံးပြုခဲ့ပြီး ကျန်တဲ့အပိုင်းကိုတော့ လက်တင်နဲ့ မာတင်လူသာ ဂျာမန်ဘာသာပြန်ကျမ်းကနေ ဘာသာပြန်ခဲ့တယ်။ ယနေ့အချိန်မှာတော့ ကျွန်ုပ်တို့ဟာ ရှင်းလင်း တိကျပြီး အမှုဆောင်လုပ်ငန်းမှာလည်း အသုံးဝင်တဲ့ ကမ္ဘာသစ်ဘာသာပြန် သမ္မာကျမ်းစာကို ရရှိနေပါပြီ။ စာတန် ဒါမှမဟုတ် ဘယ်လူသားတစ်ဦးတစ်ယောက်ကမှ ကျမ်းစာကို မဖျက်ဆီးပစ်နိုင်ခဲ့ဘူး။

မိမိနာမည်ကို ယေဟောဝါ ကာကွယ်ခဲ့

၁၂။ ဘုရားသခင့်နာမည်ကို လူတွေသိစေဖို့ ကမ္ဘာသစ်ဘာသာပြန်ကျမ်းက ဘယ်ကဏ္ဍကနေ ပါဝင်ခဲ့သလဲ။

^၁၂ ယေဟောဝါဟာ သမ္မာကျမ်းစာထဲကနေ မိမိရဲ့နာမည် ပျောက်ပျက်မသွားအောင် ကာကွယ်စောင့်ရှောက်ခဲ့တယ်။ ကမ္ဘာသစ်ဘာသာပြန်ကျမ်းကို ထုတ်ဝေတဲ့အခါ ညီအစ်ကိုတွေဟာ ဘုရားသခင့်နာမည် ယေဟောဝါ ပါတဲ့နေရာတိုင်းမှာ ပြန်ထည့်ဖို့ အသေအချာလုပ်ဆောင်ခဲ့ကြတယ်။ ဘုရားသခင့်နာမည်ဟာ ဟေဗြဲကျမ်းစောင်တွေမှာ ၆,၉၇၃ ကြိမ်ပါဝင်ပြီး ခရစ်ယာန်ဂရိကျမ်းမှာ ၂၃၇ ကြိမ် ပါတယ်။ အခုဆိုရင် ကမ္ဘာသစ်ဘာသာပြန်ကျမ်းကို ဘာသာစကား ၁၁၆ မျိုးနဲ့ရရှိနိုင်ပြီး အုပ်ရေ ၁၇၈,၅၄၅,၈၆၂ ထက်မက ပုံနှိပ်ခဲ့ပြီးဖြစ်တယ်။

၁၃။ လူသားတွေကို စဖန်ဆင်းကတည်းက လူတွေ ဘုရားသခင့်နာမည်ကို သိတယ်လို့ ဘာကြောင့် ပြောနိုင်သလဲ။

^၁၃ လူသားတွေကို စဖန်ဆင်းကတည်းက လူတွေဟာ ဘုရားသခင့်နာမည်ကို သိခဲ့ကြတယ်။ “ယေဟောဝါရဲ့ကူညီမစမှုကြောင့် သားယောက်ျားကို ငါမွေးပြီ” လို့ ဧဝပြောတာကို ကြည့်ခြင်းအားဖြင့် အာဒံနဲ့ ဧဝက ဘုရားသခင့်နာမည်ကိုသိခဲ့တယ်၊ ဘုရားသခင့်နာမည် အသံထွက်အတိအကျကို သူတို့ သိခဲ့တယ်။ (က. ၄:၁၊ ကဘ) နောဧလည်း အဲဒီနာမည်ကို အသုံးပြုခဲ့တယ်။ ရေလွှမ်းမိုးပြီးနောက်ပိုင်းမှာ ဟာမက သူ့ဖခင် နောဧကို မလေးမစားလုပ်တဲ့အခါ နောဧက “ရှေမရဲ့ဘုရားသခင် ယေဟောဝါ ချီးမွမ်းခံရပါစေ။ [ဟာမရဲ့သား] ခါနန်က ရှေမဆီမှာ ကျွန်ခံရပါစေ” လို့ ပြောခဲ့တယ်။ (က. ၉:၂၆၊ ကဘ) ဘုရားသခင်ကိုယ်တိုင်ကလည်း “ငါက ယေဟောဝါဖြစ်တယ်။ အဲဒီနာမည်က ငါ့နာမည်ပဲ။ ငါ့ရဲ့ဂုဏ်ကျက်သရေကို ဘယ်သူ့ကိုမှ ငါမပေးဘူး။” “ငါတစ်ပါးတည်းသာ ယေဟောဝါဖြစ်တယ်။ ငါကလွဲလို့ တခြားဘုရားသခင်မရှိဘူး” လို့ ပြောခဲ့တယ်။ (ဟေရှာ. ၄၂:၈၊ ကဘ; ဟေရှာ. ၄၅:၅၊ ကဘ) ကမ္ဘာပေါ်မှာရှိတဲ့လူတွေ ယေဟောဝါဆိုတဲ့နာမည်ကိုသိနိုင်ဖို့ ကိုယ်တော် အသေအချာ လုပ်ဆောင်ခဲ့တယ်။ ယေဟောဝါရဲ့နာမည်ကိုအသုံးပြုပြီး ကိုယ်တော့်သက်သေဖြစ်ခွင့်ရတာက အခွင့်ထူးပါပဲ။ အဲဒါက “ငါတို့ ဘုရားသခင်ရဲ့နာမည်နဲ့ အောင်လံတွေလွှင့်ထူပါမယ်” လို့ ပြောတာနဲ့တူတယ်။—ဆာ. ၂၀:၅၊ ကဘ။

၁၄။ သမ္မာကျမ်းစာအပြင် တခြား ဘယ်နေရာတွေမှာလည်း ဘုရားသခင့်နာမည်ကို တွေ့ရသလဲ။

^၁၄ ဘုရားသခင့်နာမည်က သမ္မာကျမ်းစာမှာပဲ ပါတာမဟုတ်ဘူး။ ဥပမာ ပင်လယ်သေအရှေ့ဘက် ၁၃ မိုင် (၂၁ ကီလိုမီတာ) အကွာမှာရှိတဲ့ ဒီဘန်မှာတွေ့ရှိခဲ့တဲ့ မောဘကျောက်တုံးကို လေ့လာကြည့်ပါ။ ကျောက်တုံးပေါ်မှာ အစ္စရေးဘုရင် ဩမရိအကြောင်းနဲ့ မောဘဘုရင်မေရှာက သူ အစ္စရေးလူတွေနဲ့ တိုက်ခိုက်ခဲ့တဲ့အကြောင်း ပြောပြတာကို ဖော်ပြထားတယ်။ (၃ ရာ. ၁၆:၂၈; ၄ ရာ. ၁:၁; ၃:၄၊ ၅) အဲဒီကျောက်တုံးပေါ်မှာ ဘုရားသခင့်နာမည်ကို တက်တြာဂရမ်မီတန်လို့ခေါ်တဲ့ ဟေဗြဲအက္ခရာလေးလုံးနဲ့ ရေးထားတာလည်း ပါတယ်။ တက်တြာဂရမ်မီတန်ကို အစ္စရေးနိုင်ငံမှာတွေ့ရတဲ့ လာခိရှမြို့က အိုးခြမ်းကွဲတွေမှာလည်း တွေ့ရတယ်။

၁၅။ စက်ပ်တွားဂျင့်ကျမ်းဆိုတာ ဘာလဲ၊ အဲဒါကို ဘာကြောင့် လိုအပ်တာလဲ။

^၁၅ ဘုရားသခင့်နာမည် မပျောက်ပျက်အောင် ထိန်းသိမ်းရာမှာ လွန်ခဲ့တဲ့ အနှစ် ၂,၀၀၀ ကျော်က ကျမ်းစာဘာသာပြန်သူတွေလည်း ပါတယ်။ ဂျူးတွေ ဗာဗုလုန်မှာ ပြည်နှင်ဒဏ်ဘဝနဲ့ အနှစ် ၇၀ နေပြီးတဲ့နောက် တချို့သူတွေဟာ ယုဒနဲ့ အစ္စရေးကို မပြန်ကြတော့ဘူး။ ဘီစီ တတိယရာစုရောက်တဲ့အခါ ဂျူးများစွာက ဂရိစကားပြောတဲ့ အီဂျစ်ပြည်၊ အလက်ဇန္ဒြီးယားမြို့ကို ပြောင်းရွှေ့ခဲ့ကြတယ်။ အဲဒီဂျူးတွေမှာ ဂရိလိုဘာသာပြန်ထားတဲ့ ဟေဗြဲကျမ်းစောင် လိုအပ်လာတယ်။ အဲဒီဂရိဘာသာပြန်ကျမ်းကို ဘီစီ ဒုတိယရာစုမှာ ဘာသာပြန်ဆိုပြီးစီးခဲ့ပြီး စက်ပ်တွားဂျင့်ကျမ်း လို့ခေါ်တယ်။ အဲဒီကျမ်းတချို့မှာ ယေဟောဝါဆိုတဲ့နာမည်ကို ဟေဗြဲလို ထည့်ထားတယ်။

၁၆။ ဘေးဆာလံကျမ်းမှာ ဘုရားသခင့်နာမည်ကို ဘယ်လို ဖော်ပြထားသလဲ။

^၁၆ အင်္ဂလန်ရဲ့လက်အောက်ခံနယ်မြေဖြစ်တဲ့ အမေရိကန်မှာ ဦးဆုံးထုတ်ဝေခဲ့တဲ့ ကျမ်းစောင်က ဆာလံကျမ်းဖြစ်တယ်။ အဲဒီမှာ ဘုရားသခင့်နာမည်ပါတယ်။ အဲဒါကို ဟေဗြဲကနေ အဲဒီအချိန်တုန်းက အသုံးပြုတဲ့အင်္ဂလိပ်စကားနဲ့ ဘာသာပြန်ခဲ့ပြီး ဘေးဆာလံကျမ်းလို့ ခေါ်တယ်၊ ၁၆၄၀ ခုနှစ်မှာ ပထမဆုံးပုံနှိပ်ခဲ့တယ်။ ဘုရားသခင့်နာမည်ပါတဲ့ ကျမ်းပိုဒ်က ဆာလံ ၁:၁၊ ၂ စတဲ့ကျမ်းချက်တွေဖြစ်တယ်၊ အဲဒီမှာ “ကောင်းချီးခံစားရသူသည်” လူဆိုးတို့၏အကြံအစည်အတိုင်း မသွားလာဘဲ “ယေဟိုးဗား၏တရား၌ စွဲလမ်းနေသည်” လို့ ဘာသာပြန်ထားတယ်။ ဘုရားသခင့်နာမည်နဲ့ပတ်သက်တဲ့ ထပ်ဆင့်အကြောင်းအရာတွေကို ထာဝစဉ်တည်တံ့သွားမည့် မြင့်မြတ်သောနာမတော် ဘရိုရှာမှာကြည့်ပါ။

အမှန်တရားကို ယေဟောဝါကာကွယ်

၁၇၊ ၁၈။ (က) အမှန်တရားဆိုတာ ဘာလဲ။ (ခ) “သတင်းကောင်းနှင့်ဆိုင်သော အမှန်တရား” မှာ ဘာပါသလဲ။

^၁၇ “အမှန်တရားရဲ့ဘုရားသခင် ယေဟောဝါ” ကို ကျွန်ုပ်တို့ ပျော်ရွှင်စွာ အမှုဆောင်နေကြတယ်။ (ဆာ. ၃၁:၅၊ ကဘ) အမှန်တရားဆိုတာ ဘာလဲ။ အကြောင်းအရာတစ်ခုနဲ့ပတ်သက်တဲ့ အချက်အလက်အမှန်တွေဖြစ်တယ်။ “အမှန်တရား” လို့ပြန်ဆိုတဲ့ ဟေဗြဲနဲ့ ဂရိစကားလုံးက တစ်စုံတစ်ခုရဲ့ မှန်ကန်မှုနဲ့ ယုံကြည်စိတ်ချထိုက်မှုကို ဖော်ပြတယ်။

^၁၈ ယနေ့အချိန်မှာ ကျွန်ုပ်တို့ အမှန်တရားအကြောင်း သိရှိအောင် ယေဟောဝါလုပ်ဆောင်ပေးခဲ့ပြီး ပိုပြီးသင်ယူနိုင်ဖို့လည်း လုပ်ဆောင်ပေးနေတယ်။ (၂ ယော. ၁၊ ၂) “ဖြောင့်မတ်သူတွေရဲ့လမ်းကတော့ မွန်းတည့်ချိန်ရောက်တဲ့အထိ လင်းသထက်လင်းလာတဲ့ အရုဏ်ဦးအလင်းရောင်နဲ့တူတယ်” လို့ သုတ္တံ ၄:၁၈ (ကဘ) မှာဖော်ပြထားတဲ့အတိုင်းပါပဲ။ ယေရှုက သူ့ရဲ့ဆုတောင်းချက်တစ်ခုမှာ “ကိုယ်တော်၏တရားစကားတော်သည် အမှန်တရားဖြစ်ပါ၏” လို့ ပြောခဲ့တယ်။ (ယော. ၁၇:၁၇) သမ္မာကျမ်းစာမှာ “သတင်းကောင်းနှင့်ဆိုင်သော အမှန်တရား” ပါရှိတယ်၊ အဲဒီထဲမှာ ခရစ်ယာန်သွန်သင်ချက်အားလုံး ပါဝင်တယ်။ (ဂလ. ၂:၁၄) အဲဒီသွန်သင်ချက်တွေထဲမှာ ယေဟောဝါရဲ့နာမည်၊ ကိုယ်တော့် အကြွင်းမဲ့ပိုင်သအုပ်စိုးခွင့်၊ ယေရှုရဲ့ ရွေးနုတ်ဖိုးပူဇော်သကာ၊ ရှင်ပြန်ထမြောက်ခြင်းနဲ့ နိုင်ငံတော်နဲ့ပတ်သက်တဲ့အမှန်တရားတွေပါတယ်။ အမှန်တရားကို ဖျောက်ဖျက်ပစ်ဖို့ စာတန်ကြိုးစားနေတဲ့ကြားက ဘုရားသခင် ဘယ်လိုကာကွယ်ခဲ့တယ်ဆိုတာ ကြည့်ကြစို့။

စာတန်ရဲ့အကြံကို ယေဟောဝါ ပျက်ပြားစေ

၁၉၊ ၂၀။ နိမ်ရောဒဆိုတာ ဘယ်သူလဲ၊ သူ့ရဲ့ ဘယ်အကြံအစည် ပျက်ပြားသွားခဲ့သလဲ။

^၁၉ ရေလွှမ်းမိုးဘေးပြီးတဲ့နောက်မှာ “ယေဟောဝါကိုဆန့်ကျင်သူ၊ ခွန်အားကြီးတဲ့မုဆိုး နိမ်ရောဒလိုပဲ” ဆိုတဲ့ ဆိုရိုးစကားပေါ်လာတယ်။ (က. ၁၀:၉၊ ကဘ) နိမ်ရောဒက ယေဟောဝါဘုရားကိုဆန့်ကျင်ခဲ့သူဖြစ်တဲ့အတွက် သူဟာ တကယ်ပဲ စာတန်အတွက် အလုပ်လုပ်သူဖြစ်တယ်။ နိမ်ရောဒဟာ ဘုရားသခင့်သားတော်ယေရှုကို အတိုက်အခံလုပ်ခဲ့သူတွေနဲ့ တူတယ်။ အဲဒီလူတွေကို ယေရှု ဒီလိုပြောခဲ့တယ်– ‘သင်တို့သည် သင်တို့၏အဖတည်းဟူသော စာတန်မှ ဆင်းသက်ကြ၏။ သင်တို့အဖ၏ အလိုဆန္ဒအတိုင်း ပြုလိုကြ၏။ . . . သူ၌ အမှန်တရားမရှိသောကြောင့် အမှန်တရား၌ မတည်မနေ။’—ယော. ၈:၄၄။

^၂၀ နိမ်ရောဒဟာ တိုက်ဂရစ်နဲ့ ယူဖရေးတီးစ်မြစ်အကြားမှာ တည်ရှိတဲ့မြို့တွေဖြစ်တဲ့ ဗာဗုလုန်နဲ့ တခြားမြို့တွေကို အုပ်ချုပ်ခဲ့တယ်။ (က ၁၀:၁၀) သူဟာ ဘီစီ ၂၂၆၉ မှာ ဗာဗုလုန်မြို့နဲ့ အဲဒီမှာတည်ရှိတဲ့ ရဲတိုက်ကို တည်ဆောက်ခဲ့တာဖြစ်နိုင်တယ်။ ယေဟောဝါရဲ့အလိုတော်က လူတွေ တစ်ကမ္ဘာလုံးအနှံ့မှာ နေထိုင်ဖို့ဖြစ်တယ်၊ ဒါပေမဲ့ ဗာဗုလုန်ကိုတည်ဆောက်သူတွေက “လာကြ၊ ငါတို့အတွက် မြို့တစ်မြို့နဲ့ မိုးထိအောင်မြင့်တဲ့ မျှော်စင်ကို တည်ဆောက်ကြစို့။ ငါတို့နာမည်ကျော်ကြားအောင် လုပ်ကြစို့။ ဒါမှ မြေတစ်ပြင်လုံးကို ငါတို့ကွဲလွင့်သွားတော့မှာ မဟုတ်ဘူး” လို့ ပြောတယ်။ ဒါပေမဲ့ သူတို့ရဲ့ဆောက်လုပ်ရေးလုပ်ငန်းကို အပြီးမသတ်နိုင်ခဲ့ဘူး၊ အကြောင်းကတော့ ဘုရားသခင်ဟာ “မြေတစ်ပြင်လုံးမှာပြောတဲ့ ဘာသာစကားကို ရှုပ်ထွေးစေလို့ပဲ။” ဒါနဲ့ လူတွေဟာ ဗာဗုလုန်ကနေထွက်ပြီး နေရာအနှံ့ကို ပြောင်းရွှေ့သွားခဲ့ကြတယ်။ (က. ၁၁:၁-၄၊ ၈၊ ၉၊ ကဘ) စာတန်က စစ်မှန်တဲ့ဝတ်ပြုရေးကို ဖျက်ဆီးပစ်ပြီး လူတိုင်း သူ့ကို ဝတ်ပြုကိုးကွယ်အောင် လုပ်ချင်ခဲ့တယ်။ ဒါပေမဲ့ ယေဟောဝါက စစ်မှန်တဲ့ဝတ်ပြုရေးကို ကာကွယ်ခဲ့တယ်၊ အခုအချိန်မှာ ယေဟောဝါကို ဝတ်ပြုကိုးကွယ်သူတွေ တစ်နေ့တခြား တိုးများနေတယ်။

၂၁၊ ၂၂။ (က) မှားယွင်းတဲ့ဝတ်ပြုရေးက စစ်မှန်တဲ့ဝတ်ပြုရေးကို အန္တရာယ်ကျရောက်အောင် ဘာကြောင့် မလုပ်နိုင်ခဲ့တာလဲ။ (ခ) လာမယ့်ဆောင်းပါးမှာ ဘာအကြောင်း ဆွေးနွေးကြမလဲ။

^၂၁ မှားယွင်းတဲ့ဝတ်ပြုရေးက စစ်မှန်တဲ့ဝတ်ပြုရေးကို အန္တရာယ်ကျရောက်အောင် ဘယ်တုန်းကမှ မလုပ်နိုင်ခဲ့ဘူး။ ဘာကြောင့်လဲ။ ကျွန်ုပ်တို့ရဲ့ မဟာသွန်သင်ရှင် ယေဟောဝါက ကျွန်ုပ်တို့မှာ သမ္မာကျမ်းစာရှိဖို့၊ ကိုယ်တော့်နာမည်နဲ့ အမှန်တရားကိုသိရှိဖို့ အသေအချာလုပ်ဆောင်ပေးခဲ့လို့ပဲ။ (ဟေရှာ. ၃၀:၂၀၊ ၂၁) အမှန်တရားနဲ့အညီ ယေဟောဝါကို ဝတ်ပြုခြင်းက ကျွန်ုပ်တို့ကို ပျော်ရွှင်စေတယ်။ ဒါပေမဲ့ အဲဒီလို ဆက်လုပ်ဆောင်နိုင်ဖို့ဆိုရင် နိုးနိုးကြားကြားရှိနေရမယ်၊ ယေဟောဝါကို အပြည့်အဝ မှီခိုအားကိုးပြီး ကိုယ်တော့်သန့်ရှင်းသောစွမ်းအားတော် လမ်းပြမှုနောက် လိုက်နေရမှာဖြစ်တယ်။

^၂၂ လာမယ့်ဆောင်းပါးမှာ ချာ့ချ်တွေက ဘုရားသခင်နဲ့ပတ်သက်တဲ့ မှားယွင်းတဲ့သွန်သင်ချက်တွေကို ဘယ်လိုအစပြုသွန်သင်ပေးခဲ့တယ်ဆိုတာ ဆွေးနွေးကြမယ်။ သမ္မာကျမ်းစာက ဒီမှားယွင်းတဲ့သွန်သင်ချက်တွေကို မသင်ပေးဘူးဆိုတာ ကျွန်ုပ်တို့ သိရမယ်။ ယေဟောဝါက မိမိနဲ့ပတ်သက်တဲ့ အမှန်တရားတွေကို ဖော်ပြပေးခြင်းအားဖြင့် ကျွန်ုပ်တို့ကို ကောင်းချီးပေးတယ်ဆိုတာကိုလည်း သိရပါလိမ့်မယ်။ အဲဒါတွေအားလုံးက ကျွန်ုပ်တို့ရရှိထားတဲ့ အဖိုးတန်အမွေတွေပါပဲ။