ကယ်တင်ခြင်း

အဓိပ္ပာယ်သတ်မှတ်ချက်– အန္တရာယ် သို့မဟုတ် ဖျက်ဆီးခြင်းဘေးမထိအောင် စောင့်ရှောက်ကာကွယ်ခြင်း၊ ကယ်နုတ်ခြင်းဖြစ်၏။ ဖိစီးသူ သို့မဟုတ် နှိပ်စက်ညှဉ်းပန်းသူတို့လက်မှ ကယ်နုတ်ခြင်းဖြစ်နိုင်သည်။ ယေဟောဝါသည် ခရစ်ယာန်စစ်အားလုံးကို လက်ရှိစနစ်ဆိုးမှလည်းကောင်း၊ အပြစ်နှင့်သေခြင်း၏အချုပ်အနှောင်မှလည်းကောင်း ကယ်တင်ရန် သားတော်အားဖြင့် စီစဉ်တော်မူ၏။ “နောက်ဆုံးကာလ” အတွင်း အသက်ရှင်နေကြသူ ယေဟောဝါ၏သစ္စာရှိကျေးကျွန်လူအုပ်ကြီးအဖို့ ကယ်တင်ခြင်းသည် ဆင်းရဲဒုက္ခကြီးထဲက လွတ်မြောက်ခြင်းပါဝင်မည်။

ဘုရားသခင်သည် မဟာကရုဏာတော်ကြောင့် အဆုံးတွင် လူသားအားလုံးကို ကယ်တင်တော်မူမည်လော

၂ ပေတရု ၃:၉ က တစ်လောကလုံးကယ်တင်ခြင်းရမည်ကို အရိပ်အမြွက်ပြသလော။ ထိုကျမ်းချက်က ဤသို့ဆို၏– “ထာဝရဘုရားသည် နှောင့်နှေးတော်မူသည်ဟု အချို့တို့မှတ်ယူကြသည့်အတိုင်း ကတိတော်ကိုဖြည့်ရန် နှောင့်နှေးတော်မူသည်မဟုတ်။ မည်သူမျှမပျက်စီးဘဲ ရှိသမျှတို့နောင်တရခွင့်ရှိစေရန် သင်တို့အပေါ်တွင် စိတ်ရှည်တော်မူ၏။” (သမ) ဘုရားသခင်၏ ကရုဏာပြည့်ဝသည့်ဆန္ဒမှာ အာဒံ့သားမြေးအားလုံး နောင်တရကြရန်ဖြစ်၏။ နောင်တရသူတို့၏အပြစ်ကိုလွှတ်ဖို့လည်း ရက်ရောစွာစီစဉ်ထားလေပြီ။ သို့တစေ၊ ထိုအစီစဉ်ကိုလက်ခံရန် မည်သူ့ကိုမျှ အတင်းအကျပ်ပြုတော်မမူ။ (တရားဟောရာ ၃၀:၁၅-၂၀ နှင့်နှိုင်း။) ၎င်းကို လူများစွာတို့က ငြင်းပယ်ကြ၏။ ရေနစ်နေလျက်နှင့် ကယ်လိုသူစေတနာရှင်ပစ်ပေးသော အသက်ကယ်ပစ္စည်းကိုမယူ၊ တွန်းဖယ်လိုက်သူနှင့်တူသည်။ သို့ရာတွင် နောင်တမရလျှင် ထာဝရငရဲမီးဒဏ်ခံရမည်ဟူ၍ကား မဟုတ်ကြောင်းသတိပြုသင့်၏။ ၂ ပေတရု ၃:၉ ဆိုသည့်အတိုင်း နောင်တမရသူတို့သည် “ပျက်စီး” လိမ့်မည်။ အခန်းငယ် ၇ ကလည်း “အဓမ္မလူတို့ကိုဖျက်ဆီး” ခြင်းအကြောင်း ဆို၏။ တစ်လောကလုံး ကယ်တင်ခြင်းရမည်ဟုမဆိုပါ။​—“ငရဲ” ဟူသောခေါင်းစဉ်ကိုလည်းရှု။

၁ ကောရိန္သု ၁၅:၂၂ က အဆုံး၌ လူသားအားလုံး ကယ်တင်ခြင်းရကြမည်ကို သက်သေထူသလော။ ၎င်းက “လူအပေါင်းတို့သည် အာဒံအားဖြင့် သေခြင်းသို့ရောက်သည်နည်းတူ၊ လူအပေါင်းတို့သည် ခရစ်တော်အားဖြင့် အသက်ရှင်ခြင်းသို့ရောက်ရကြလတ္တံ့” ဟုဆိုပါသည်။ ပတ်ဝန်းကျင်အခန်းငယ်များတင်ပြသည့်အတိုင်း ရှင်ပြန်ထမြောက်ခြင်းအကြောင်း ဆွေးနွေးနေခြင်းဖြစ်သည်။ မည်သူများထမြောက်မည်နည်း။ အာဒံ့အပြစ်ကြောင့်သေရ (အခန်းငယ် ၂၁ ကိုကြည့်။) သော်လည်း ဟေဗြဲ ၁၀:၂၆-၂၉ ပါ စိတ်လိုကိုယ်လျောက် လွန်ကျူးခြင်းအပြစ်ကို ကိုယ်တိုင်မပြုသူများ ထမြောက်လာမည်။ ယေရှုသည် ဟေးဒီးစ်မှ ထမြောက်တော်မူသည် (တ. ၂:၃၁) နည်းတူ၊ ဟေးဒီးစ်၌ရှိသမျှသူများလည်း ရှင်ပြန်ထမြောက်ခြင်းအားဖြင့် “အသက်ရှင်ခြင်းသို့ရောက်ရကြလတ္တံ့။” (ဗျာ. ၁:၁၈; ၂၀:၁၃) ဤသူများအားလုံး ထာဝရကယ်တင်ခြင်းရကြမည်လော။ သူတို့ရှေ့ ၌ ထိုအခွင့်အလမ်းပွင့်လျက်နေသော်လည်း ယောဟန် ၅:၂၈၊ ၂၉ ဆိုသည့်အတိုင်း လူတိုင်း စွဲကိုင်ကြမည်မဟုတ်။ ထိုကျမ်းချက်အရ အချို့တို့သည် “အပြစ်စီရင်” ခံရကြလိမ့်မည်။

တိတု ၂:၁၁ ကိုမည်သို့ဆိုမည်နည်း။ RS ပြန်ဆိုချက်အတိုင်း ၎င်းက “လူအားလုံး၏ကယ်တင်ခြင်း” အကြောင်းကိုဆိုထားသည်။ ယောဟန် ၁၂:၃၂၊ ရောမ ၅:၁၈ နှင့် ၁ တိမောသေ ၂:၃၊ ၄ စသောအခြားကျမ်းချက်များလည်း RS, KJ, NE, TEV စသည်တို့၌ အလားတူသဘောကို တင်ပြ၏။ ထိုကျမ်းချက်များပါ “အားလုံး၊” “လူတိုင်း” ဟူသောဂရိအသုံးအနှုန်းသည် pas (ဖာ့စ်) ဟူသောစကားလုံး၏ ပြောင်းလဲသောပုံစံများဖြစ်ကြသည်။ Vine ပြုစုသော ဓမ္မသစ်ကျမ်းစကားဆိုင်ရာအဖွင့်အဘိဓာန် (လန်ဒန်၊ ၁၉၆၂၊ အတွဲ ၁၊ စ. ၄၆) ၌ တင်ပြသည့်အတိုင်း pas သည် “အမျိုးအစားတိုင်း” ဟူ၍လည်း အဓိပ္ပာယ်ရှိသည်။ ထို့ကြောင့် အထက်ကျမ်းချက်များ၌ “အားလုံး” ဟူသော စကားအစား၊ “အမျိုးတိုင်း” ဟူ၍ဖြစ်စေ၊ ကဘ သုံးစွဲသကဲ့သို့ “အမျိုးစုံသော” ဟူ၍ဖြစ်စေ သုံးစွဲနိုင်သည်။ အဘယ်အသုံးအနှုန်းမှန်ကန်သနည်း။ “အားလုံး” လော၊ “အမျိုးစုံသော” ဟူသောအသုံးအနှုန်း၏သဘောလော။ အဘယ်အသုံးအနှုန်းသည် ကျမ်းစာ၏ကျန်အပိုင်းများနှင့်လည်း ညီညွတ်သနည်း။ ဒုတိယအသုံးအနှုန်းတည်း။ တမန်တော် ၁၀:၃၄၊ ၃၅; ဗျာဒိတ် ၇:၉၊ ၁၀; ၂ သက်သာလောနိတ် ၁:၉ တို့ကိုသုံးသပ်ပါ။ (မှတ်ချက်– အခြားဘာသာပြန်သူများလည်း ဂရိစကားလုံး၏ထိုအဓိပ္ပာယ်ကို သတိပြုမိကြပေသည်။ မဿဲ ၅:၁၁ ၌သူတို့၏ပြန်ဆိုပုံက သာဓကပြနေသည်။​—“အမျိုးစုံသော၊” RS, TEV; “အမျိုးတိုင်း၊” NE; “နည်းမျိုးစုံသော၊” KJ။)

အချို့သူများ ဘယ်တော့မျှကယ်တင်ခြင်းရမည်မဟုတ်ဟု တပ်အပ်ဆိုသောကျမ်းချက်များရှိသလော

၂ သက်. ၁:၉၊ ၁၀– “ထိုသူတို့သည် သခင်ဘုရား၏မျက်နှာတော်နှင့်လည်းကောင်း၊ တန်ခိုးရှိသောဘုန်းတော်နှင့်လည်းကောင်း ကွာ၍ ထာဝရပျက်စီးခြင်းတည်းဟူသောအပြစ်ဒဏ်ကို ခံရကြလတ္တံ့။” (ဖြည့်စွက်စာလုံးစောင်း။)

ဗျာ. ၂၁:၈– “ကြောက်တတ်သောသူ၊ မယုံကြည်သောသူ၊ စက်ဆုပ်ရွံရှာဖွယ်သောသူ၊ လူအသက်ကိုသတ်သောသူ၊ မတရားသောမေထုန်၌မှီဝဲသောသူ၊ ပြုစားတတ်သောသူ၊ ရုပ်တုကိုကိုးကွယ်သောသူ၊ သစ္စာပျက်သောသူအပေါင်းတို့မူကား၊ ဒုတိယသေခြင်းတည်းဟူသော ကန့်နှင့်လောင်သောမီးအိုင်ထဲ၌ မိမိတို့အဖို့ကိုရကြလိမ့်မည်။”

မ. ၇:၁၃၊ ၁၄– “ကျဉ်းသောတံခါးကိုဝင်ကြလော့။ ပျက်စီးခြင်းသို့ရောက်သောလမ်းနှင့်တံခါးသည် ကျယ်ဝန်းသည်ဖြစ်၍ ဝင်သောသူတို့သည် များကြ၏။ အသက်ရှင်ခြင်းသို့ရောက်သောလမ်းနှင့်တံခါးသည် အလွန်ကျဉ်းမြောင်းသည်ဖြစ်၍ တွေ့ဝင်သောသူတို့သည် နည်းကြ၏။”

တစ်ကြိမ်ကယ်တင်ခြင်းရလျှင် အစဉ်ကယ်တင်ခြင်းရပြီလော

ယု. ၅– “ထိုကြောင့် သင်တို့သည် သိနှင့်သော်လည်း ငါသည် သတိပေး၍ပြောချင်သောအကြောင်းအရာဟူမူကား၊ ထာဝရဘုရားသည် ဣသရေလလူတို့ကို အဲဂုတ္တုပြည်မှ ကယ်လွှတ်တော်မူပြီးလျှင် မယုံကြည်သောသူတို့ကို တစ်ဖန်ဖျက်ဆီး တော်မူ၏။” (ဖြည့်စွက်စာလုံးစောင်း။)

မ. ၂၄:၁၃– “အကြင်သူသည် အဆုံးတိုင်အောင်တည်ကြည်၏၊ ထိုသူသည် ကယ်တင်ခြင်းသို့ ရောက်လိမ့်မည်။” (ထို့ကြောင့် လူတစ်ယောက် ယေရှုပေါ်စတင်ယုံကြည်စဉ် သူနောက်ဆုံးကယ်တင်ခြင်းရမည် မရမည်ဟူသောအချက် မဆုံးဖြတ်သေးချေ။)

ဖိ. ၂:၁၂– “သင်တို့သည် ငါ့မျက်မှောက်၌နားထောင်သည်သာမက၊ မျက်ကွယ်၌လည်း အစဉ်နားထောင်ကြသည်နှင့်အညီ၊ ကြောက်ရွံ့တုန်လှုပ်သောစိတ်နှင့် ကိုယ်ကိုကယ်တင်ခြင်းငှာ ကိုယ်တိုင်ကြိုးစားအားထုတ်ကြလော့။” (ဖိလိပ္ပိ ၁:၁ တင်ပြသည့်အတိုင်း ထိုစကားမှာ ဖိလိပ္ပိမြို့ရှိ “သူတော်စင်များ၊” သို့မဟုတ်၊ သန့်ရှင်းသူများထံ ရေးသည့်စကားဖြစ်သည်။ ကိုယ့်ကိုယ်ကို အယုံမကြီးလွန်းရန်၊ နောက်ဆုံး၌ မိမိတို့ကယ်တင်ခြင်းရမည်မရမည် မသေချာသေးဟူသောအချက်ကို သတိရကြရန် သူတို့ကို ပေါလုတိုက်တွန်းလိုက်သည်။)

ဟေဗြဲ ၁၀:၂၆၊ ၂၇– “အကြောင်းမူကား၊ သမ္မာတရားကိုသိပြီးမှ ကိုယ်အလိုသို့လိုက်၍ပြစ်မှားပြန်လျှင် နောက်တစ်ဖန်အပြစ်ဖြေသောယဇ်ကို ပူဇော်ရာအခွင့်မရှိဘဲ ဒဏ်စီရင်ခြင်းကိုခံရမည်ဟု ကြောက်မက်ဖွယ်သောမျှော်လင့်ရသောအကြောင်း၊ ငြင်းဆန်သောသူတို့ကိုဖျက်ဆီးဖို့ရာ အမျက်တော်မီးလောင်ခြင်းကိုခံရသောအကြောင်းရှိ၏။” (သို့ဖြစ်၍ လူတစ်ဦး “ကယ်တင်ခြင်း” ရပြီးနောက်၌ အဘယ်အပြစ်ကိုပြုစေကာမူ ကယ်တင်ခြင်းလက်လွတ်ဆုံးရှုံးရမည်မဟုတ် ဟူသောအချက်ကို ကျမ်းစာက သဘောမတူချေ။ သစ္စာစောင့်ထိန်းရန် ကျမ်းစာကတိုက်တွန်း၏။ ဟေဗြဲ ၆:၄-၆ ကိုလည်းရှု။ သန့်ရှင်းသောဝိညာဉ်တော်ဖြင့်ဘိသိက်ခံရသူပင် ကယ်တင်ခြင်းမျှော်လင့်ချက် ဆုံးရှုံးနိုင်ဖို့အကြောင်းရှိသည်ကို တင်ပြထားသည်။)

ကယ်တင်ခြင်းရရန် ယုံကြည်ခြင်းအပြင် အခြားအရာလိုသေးသလော

ဧ. ၂:၈၊ ၉– “ယုံကြည်သောအားဖြင့် ကျေးဇူးတော် (“မခံစားထိုက်သောကျေးဇူးတော်၊” ကဘ) ကြောင့် ကယ်တင်ခြင်းသို့ရောက်ရ၏။ ကိုယ်အလိုအလျောက် ရောက်သည်မဟုတ်။ ဘုရားသခင် သနားတော်မူရာဖြစ်သတည်း။ ကိုယ်ကုသိုလ်ကြောင့် ကယ်တင်တော်မူခြင်းသို့ ရောက်သည်မဟုတ်။ သို့ ဖြစ်၍ အဘယ်သူမျှ ဝါကြွားစရာအခွင့်မရှိ။” (ကယ်တင်ခြင်းအစီအစဉ် တစ်ရပ်လုံး ဘုရားသခင့်မခံစားထိုက်သော ကျေးဇူးတော်ကြောင့်ဖြစ်သည်။ အာဒံ့သားမြေးတစ်ဦးသည် မည်မျှပင်မွန်မြတ်သောကုသိုလ်ကိုပြုစေကာမူ ထိုကုသိုလ်ဖြင့် ကယ်တင်ခြင်းရဖို့အကြောင်း လုံးဝမရှိ။ ကယ်တင်ခြင်းသည် ဘုရားသခင့်လက်ဆောင်ဖြစ်၍ သားတော့်ယဇ်သကာ၏ အပြစ်ဖြေနိုင်စွမ်းတန်ဖိုးပေါ် ယုံကြည်သောသူတို့အား ပေးတော်မူ၏။)

ဟေဗြဲ ၅:၉– “[ယေရှုသည်] ယုံကြည်နားထောင် သူအပေါင်းတို့အား ထာဝရကယ်တင်ခြင်းကျေးဇူးကိုပြုသောသူ ဖြစ်တော်မူ [၏။]” (ဖြည့်စွက်စာလုံးစောင်း။) (ခရစ်ယာန်များ “ယုံကြည်သောအားဖြင့်” ကယ်တင်ခြင်းရသည်ဟူသောအချက်နှင့် ဖီလာဆန့်ကျင်သလော။ လုံးဝမဆန့်ကျင်ပါ။ နားထောင်ခြင်းမှာ ယုံကြည်ခြင်းစစ်မှန်ကြောင်းသာဓကပြခြင်းသာဖြစ်သည်။)

ယာ. ၂:၁၄၊ ၂၆– “တစ်စုံတစ်ယောက်သောသူက ငါသည် ယုံကြည်ခြင်းရှိ၏ဟုပြောလျက် အကျင့်ကိုမကျင့်ဘဲနေလျှင် အဘယ်အကျိုးရှိသနည်း။ ထိုယုံကြည်ခြင်းသည် ထိုသူကိုကယ်တင်နိုင်သလော။ ဝိညာဉ်နှင့်ကင်းသောကိုယ်သည် အသေဖြစ်သကဲ့သို့၊ အကျင့်နှင့်ကင်းသောယုံကြည်ခြင်းသည် အသေဖြစ်၏။” (လူသည် မိမိ၏အလုပ်ဖြင့် ကယ်တင်ခြင်းကို ရထိုက်၍ရ သည်မဟုတ်။ သို့တစေ၊ ယုံကြည်ခြင်းအစစ်ရှိလျှင် အလုပ်လည်းရှိလိမ့်မည်​—ဘုရားသခင်နှင့်ခရစ်တော်အမိန့်များကို နာခံသောအလုပ်၊ မိမိယုံကြည်ခြင်းနှင့် မေတ္တာကို ထင်ရှားစေသောအလုပ်များဖြစ်ပေသည်။ ထိုသို့အလုပ်မျိုးမပါလျှင် သူ့ယုံကြည်ခြင်း အသေဖြစ်၏။)

တ. ၁၆:၃၀၊ ၃၁– “အကျွန်ုပ်သည် ကယ်တင်ခြင်းသို့ရောက်အံ့သောငှာ အဘယ်သို့ပြုရပါမည်နည်း။ . . . ထိုသူတို့ [ပေါလုနှင့်သိလ] ကလည်း သခင်ယေရှုခရစ်ကိုယုံကြည်လော့။ ယုံကြည်လျှင် သင်နှင့်သင်၏အိမ်သူအိမ်သားတို့သည် ကယ်တင်ခြင်းသို့ရောက်ကြလိမ့်မည်ဟု ပြောဆို [၏။]” (ထိုသူနှင့်သူ့အိမ်သားများ တကယ်ယုံကြည်ကြလျှင် ယုံကြည်သည့်အတိုင်း ပြုကြမည်မဟုတ်လော။ မုချ။)

တစ်စုံတစ်ယောက်က ဤသို့ပြောလျှင်​—

‘ကျွန်တော်ကယ်တင်ခြင်းရပြီပဲ’

ဤသို့ ပြန်ပြောနိုင်သည်– ‘သိရတာဝမ်းသာတယ်။ ယေရှုခရစ်ကိုမိတ်ဆွေယုံကြည်မှန်းသိသာတယ်ပေါ့။ ခု ကျွန်တော်လုပ်နေတဲ့အလုပ်ဟာ ယေရှု သူ့နောက်လိုက်တွေကိုစေခိုင်းတဲ့အလုပ်ဖြစ်ပါတယ်။ သူ့နိုင်ငံတော် တည်ထောင်ပြီဆိုတဲ့သတင်းကို လူတွေကိုပြောပြဖို့ဖြစ်တယ်။ (မ. ၂၄:၁၄)’ ထို့နောက် ဤသို့ထပ်၍ဆိုနိုင်သည်– (၁) ‘နိုင်ငံတော်ဟာ ဘာလဲ။ နိုင်ငံတော်လာတဲ့အခါ ဒီလောကဘယ်လိုဖြစ်မလဲ။ (ဒံ. ၂:၄၄၊ ၄၅)’ (၂) ‘ဒီကောင်းကင်အစိုးရအုပ်ချုပ်မှုအောက်မှာ ကမ္ဘာ့အခြေအနေဘယ်လိုနေမလဲ။ (ဆာ. ၃၇:၁၁; ဗျာ. ၂၁:၃၊ ၄)’

သို့မဟုတ် ဤသို့ပြောနိုင်သည်– ‘ဒီလိုဆိုရင် မိတ်ဆွေဟာ တမန်တော် ၄:၁၂ မှာပါတဲ့ တမန်တော်ပေတရုရဲ့စကားကိုတန်ဖိုးထားမှာပါပဲ။ . . . ကျွန်တော်တို့ယုံကြည်ရအောင် ယေရှုနာမတော်ကို ဘယ်သူကပေးတယ် ဆိုပြီးစဉ်းစားဖူးသလား။’ ထို့နောက် ဆက်လက်၍– (၁) ‘ယေရှုကိုယ်တော်တိုင် ကျွန်တော်တို့ကိုပြောပြတယ်။ (ယော. ၁၇:၃)’ (၂) ‘ခမည်းတော်ရဲ့နာမတော်ကို သူထင်ရှားစေပြီဆိုပြီး ပြောတယ်ဆိုတာသတိပြုပါ။ (ယော. ၁၇:၆) ကိုယ်တော်ရဲ့ကိုယ်ပိုင်နာမတော်ဟာဘာလဲ။ ဒါနဲ့တစ်ဆက်ထဲ ဘာတွေကိုပြန်ပြောင်းသတိရသလဲ။ (ထွ. ၃:၁၅; ၃၄:၅-၇)’

‘ခင်ဗျား ကယ်တင်ခြင်းရပြီလား’

ဤသို့ ပြန်ပြောနိုင်သည်– ‘ခုအချိန်အထိတော့ရပြီလို့ဆိုနိုင်ပါတယ်။ ဘာကြောင့်ကျွန်တော် ခုလိုပြောရသလဲဆိုတော့၊ ကိုယ့်ကိုယ်ကိုအယုံမကြီးနဲ့ဆိုတဲ့ ကျမ်းသြဝါဒကိုလည်း ကျွန်တော်သတိပြုမိလို့ပါ။ အဲဒီကျမ်းချက်ကိုသိပါသလား။ (၁ ကော. ၁၀:၁၂)’ ထို့နောက် ဤသို့ထပ်၍ဆိုနိုင်သည်– ‘ဘာအကြောင်းကြောင့်လဲ။ ဒုတိယမွေးခြင်းခံရပြီး ကောင်းကင်အသက်တာမျှော်လင့်ချက်ရှိတဲ့လူ (ဟေဗြဲ ၃:၁) တွေကို တမန်တော်ပေါလု ဒီလိုစာရေးလိုက်တယ်။ . . . (ဟေဗြဲ ၃:၁၂-၁၄) ဘုရားသခင့်နှုတ်ကပါဌ်တော်အသိပညာဘက်မှာ အမြဲတိုးပွားနေမှ ကျွန်တော်တို့ရဲ့ယုံကြည်ခြင်း ခိုင်ခံ့မယ်ဖြစ်တယ်။’

သို့မဟုတ် ဤသို့ပြောနိုင်သည်– ‘အဲဒီမေးခွန်းကို ကျွန်တော်က ဟုတ်ကဲ့လို့ရိုးရိုးကလေးဖြေနိုင်ပါတယ်။ ဒါပေမဲ့ ကျမ်းစာက ကယ်တင်ခြင်းတစ်မျိုးထက်မကရှိတယ် ဆိုပြီးပြောတာ မိတ်ဆွေသိပါသလား။ ဥပမာ၊ ဗျာဒိတ် ၇:၉၊ ၁၀၊ ၁၄ ရဲ့အဓိပ္ပာယ်ကို သုံးသပ်ဖူးပါသလား။ . . . ဒါကြောင့် လာမဲ့ဆင်းရဲဒုက္ခကြီးကိုကပ်ကျော်ပြီး ကယ်တင်ခြင်းရလို့ ဒီကမ္ဘာပေါ်မှာပဲ နေထိုင်သွားကြမဲ့လူတွေရှိပါလိမ့်မယ်။” (မ. ၅:၅)’

‘ခင်ဗျား ယေရှုကို ကယ်တင်ရှင်အဖြစ်လက်ခံသလား’

“ယေရှုခရစ်” ဟူသောခေါင်းစဉ်အောက်၊ စာမျက်နှာ ၂၄၅ ကိုရှု။

‘ခင်ဗျားတို့က ၁၄၄,၀၀၀ ပဲကယ်တင်ခြင်းရမယ်လို့ပြောတယ်’

ဤသို့ ပြန်ပြောနိုင်သည်– ‘ဒါကိုထုတ်ဖော်တင်ပြတဲ့အတွက် ကျေးဇူးတင်တယ်။ ဒါမှလဲ ကျွန်တော်တို့ဘာကို တကယ် ယုံကြည်တယ်ဆိုတာကို ကျွန်တော်ပြောပြနိုင်မယ်။ ကယ်တင်ခြင်းဟာ ယေရှုအားဖြင့် ဘုရားသခင်စီစဉ်တဲ့ ကယ်တင်ခြင်းအစီအစဉ်ကို တကယ်ယုံကြည်ကြောင်း သက်သေပြတဲ့လူမှန်သမျှအတွက် ဖြစ်ပါတယ်။ ဒါပေမဲ့ ကျမ်းစာက ၁၄၄,၀၀၀ သာ ခရစ်တော်ရှိရာ ကောင်းကင်ကိုသွားကြမယ်လို့ဆိုတယ်။ . . . ဒီကျမ်းချက်ပါပဲ။ ဗျာဒိတ် ၁၄:၁၊ ၃။’ ထို့နောက် ဤသို့ထပ်၍ဆိုနိုင်သည်– (၁) ‘သူတို့ ကောင်းကင်မှာဘာလုပ်ကြမလဲ။ (ဗျာ. ၂၀:၆)’ (၂) ‘တစ်ယောက်ယောက်အပေါ်မှာ အုပ်ချုပ်ကြမှာသေချာပါတယ်။ ဘယ်သူတွေအပေါ်မှာအုပ်ချုပ်တာဖြစ်နိုင်မလဲ။ . . . (မ. ၅:၅; ၆:၁၀)’