သင်မှတ်မိသလော

နောက်ဆုံးထုတ်ကင်းမျှော်စင်များကို သင်အသေအချာသုံးသပ်ပြီးပြီလော။ သို့ဖြစ်လျှင်အောက်ပါအချက်များကို သင်ပြန်သတိရပေမည်။

▫ ပေါလုသည် ၁ တိမောသေ ၂:၅၊၆ တွင်ယေရှုကို “အာမခံ” ဟုရည်ညွှန်းရာ၌ မည်သို့သောသဘောဖြင့် သုံးနှုန်းသနည်း။

ဤကျမ်းပိုဒ်တွင်ပေါလုသည် “အာမခံ” အတွက်ဂရိတ်စကားလုံး မီစီတီးစ် (me·si΄tes) စကားလုံးကိုအသုံးပြုခဲ့ပြီး၊ ယင်းသည်တရားဝင်ဆိုလိုချက်ရှိသောကြောင့် ဘာသာအများတွင်ရှိသော ကျယ်ပြန့်သည့်သဘောနှင့် ဤစကားလုံးကိုသူအသုံးပြုခြင်းမဟုတ်ချေ။ ထို့ကြောင့်ပေါလုကယေရှုသည် ဘုရားနှင့်လူသားအားလုံးစပ်ကြား အာမခံဖြစ်ကြောင်း ပြောဆိုနေခြင်းမဟုတ်ချေ။ သို့အစား၊ ခရစ်တော်၏ဘိသိက်ခံနောက်လိုက်များကို ကိုယ်တော်နှင့်အတူကိုယ်တော်ကောင်းကင်နိုင်ငံတော်တွင်ပါဝင်ရန် အခြေခံဖြစ်စေသည့် ပဋိညာဉ်၏တရားဝင်အာမခံအဖြစ် ယေရှုအားရည်ညွှန်းနေခြင်းဖြစ်သည်။ (၂ ကောရိန္သု ၅:၁၊ ၅။ ဧဖက် ၁:၁၃၊ ၁၄။ ဟေဗြဲ ၈:၇-၁၃)—၈/၁၅၊ စာမျက်နှာ ၃၀၊ ၃၁။

▫ မဿဲ ၂၅:၃၄ တွင်ယေရှုသည်သိုးကဲ့သို့သောသူများကို “ကမ္ဘာတည်သည်ကာလမှစ၍ သင်တို့အတွက်ပြင်ဆင်သောနိုင်ငံကို အမွေခံကြ” ဟုဆိုရာ၌ ကိုယ်တော်ဘာကိုဆိုလိုသနည်း။

ဤသိုးကဲ့သို့သောသူများသည် ကောင်းကင်တွင်ကိုယ်တော်နှင့်အတူအုပ်ချုပ်မည်ဟု ယေရှုမဆိုလိုခဲ့ချေ။ သို့အစား၊ သိုးများသည်ရွေးနှုတ်ရမည့်လူသားတို့၏ “ကမ္ဘာတည်သည်မှစ၍” သူတို့အတွက်ပြင်ဆင်ထားသော မြေကြီးနိုင်ငံကိုအမွေခံကြမည်။ ဤသို့သောနည်းဖြင့်သူတို့သည် သူတို့၏ “ထာဝရအဘ” ဘုရင်ယေရှုခရစ်၏ မြေကြီးဆိုင်ရာကလေးများဖြစ်လာကြမည်။ (ဟေရှာယ ၉:၆၊ ၇)—၉/၁၊ စာမျက်နှာ ၂၀။

▫ ခသ ၃၃ မတိုင်မီသေဆုံးခဲ့သော ထမြောက်လာမည့်သစ္စာရှိသူများကိုကြိုဆိုရန် ဘိသိက်ခံအကြွင်းအကျန်များ အသက်ရှင်ရန်လိုအပ်မည်လော။

မလိုအပ်ပါ။ ကြီးစွာသောဒုက္ခကြီးကိုကျော်မည့် လူအုပ်ကြီးအများစုကိုယခုတွင် အဖွဲ့အစည်းဆိုင်ရာတာဝန်များ ထမ်းဆောင်နိုင်ရန် လေ့ကျင့်လျက်ရှိသည်။ ထို့ကြောင့်သူတို့သည် ထိုအခြေအနေများကို ကိုင်တွယ်နိုင်မည်ဖြစ်ပြီး၊ ထမြောက်လာမည့်သူများကို “ကောင်းကင်သစ်” အောက်ရှိ “မြေကြီးသစ်” နှင့်အကျွမ်းဝင်စေမည်။ (၂ ပေတရု ၃:၁၃) ၉/၁၊ စာမျက်နှာ ၂၁။

▫ “ကယ်တင်ခြင်းခံရရန်” အဘယ်အရာများအကြုံးဝင်သနည်း။ (တမန်တော် ၁၆:၃၀)

အဓိကလိုအပ်ချက်မှာ “သခင်ယေရှုခရစ်ကိုယုံကြည်လော့။ ယုံကြည်လျှင်. . .သင်သည်ကယ်တင်ခြင်းသို့ရောက်လိမ့်မည်။” (တမန်တော် ၁၆:၃၁) ယင်းတွင်ဘုရားရှင်၏ တိကျသောရည်ရွယ်ချက်များနှင့် ကိုယ်တော်၏ကယ်တင်ခြင်းနည်းလမ်းတော် အသိပညာများရယူရန်ပါဝင်သည်။ ထို့နောက်ယေရှုခရစ်ကိုကယ်တင်ခြင်းအတွက် ကိုယ်စားလှယ်ချုပ်အဖြစ် ယုံကြည်ရမည်။ (ယောဟန် ၃:၁၆။ တိတု ၂:၁၄) ယင်းကခရစ်ယာန်ဖြစ်သူကို ကယ်တင်ခြင်းခံရသောအခြေအနေတွင်ရှိစေသည်။ သို့သော်ယခုသူသည်၊ ဘုရားအလိုတော်ထမ်းဆောင်ရာ၌ စွဲမြဲရမည်ဖြစ်ပြီး၊ သူ၏အသက်တာတစ်လျှောက်တွင် ဘုရားရှင်၏တောင်းဆိုချက်များအားလုံးကို စွဲမြဲစွာလိုက်နာရမည်။ သို့မှသာ၊ သူသည်ထာဝရအသက်အတွက် ကယ်တင်ခံရမည်။ (မဿဲ ၂၄:၁၃)—၉/၁၅၊ စာမျက်နှာ ၇။

▫ နောဧ၏ယုံကြည်ခြင်းသည် လောကကိုမည်သို့အပြစ်တင်သနည်း။ (ဟေဗြဲ ၁၁:၇)

နောဧ၏နာခံမှုနှင့်ဖြောင့်မတ်သည့်လုပ်ရပ်များက သူ့မိသားစုအပြင်အခြားသူများသည် သူတို့၏အသက်ရှင်ပုံကိုပြောင်းလဲရန် အသင့်ရှိပါက ရေလွှမ်းမိုးခြင်းကပ်ဘေးကို ကျော်နင်းနိုင်ကြောင်းတင်ပြသည်။ သူ၏မစုံလင်သောသွေးသား၊ သူ့ပတ်လည်ရှိကမ္ဘာနှင့်မာရ်နတ်တို့မှ ဖိအားများရှိသော်လည်း ဘုရားစိတ်တော်နှင့်တွေ့သောအသက်တာအတိုင်း နေထိုင်နိုင်ကြောင်းနောဧသက်သေပြခဲ့သည်။—၁၀/၁၊ စာမျက်နှာ ၁၁။

▫ ကျွန်ုပ်တို့သည်စကားပေါ့ပြောခြင်းကိုပင် အဘယ်ကြောင့်ရှောင်သင့်သနည်း။

မည်သူ့ကိုမျှထိခိုက်ရန်မရည်ရွယ်ပဲ ကျွန်ုပ်တို့စကားတစ်ခုပြောမိပေမည်။ သို့သော်ယင်းအပြစ်မဲ့ပုံရသော အတင်းအဖျင်းပြောခြင်းသည် ထပ်ခါတစ်လဲလဲပြောသောအခါ၊ ချဲ့ထွင်သောအခါ သို့မဟုတ် လှည့်လိမ်လိုက်သောအခါ နာကျည်းဖွယ်ဖြစ်လာပြီး၊ အပြောခံရသူ၏သိက္ခာကို ပျက်စီးစေကာ သူ့နာမည်ကောင်းကိုဖျက်ဆီးလိုက်သည်။ (သု ၂၀:၁၉)—၁၀/၁၅၊ စာမျက်နှာ ၁၃။

▫ အိမ်ထောင်ဖက်များသည် ညီမျှသောထမ်းပိုးကိုထမ်းသောအခါ မည်သည့်ကောင်းကျိုးများရရှိသနည်း။

လင်ယောက်ျားနှင့်မယားသည် သူတို့၏ဘုရားကိုကိုးကွယ်ရာ၌ တစ်ဦးနှင့်တစ်ဦးကိုအားပေးနိုင်သော အခြေအနေတွင်ရှိသည်။ ထို့ပြင်သူတို့၏ကွာဟမှုများကိုဖြေရှင်းရာ၌ ကျမ်းစာကိုကြည့်ရှုနိုင်ကြသည်။—၁၁/၁၊ စာမျက်နှာ ၂၀။

▫ ပညတ်တော်ဆယ်ပါးသည်ယနေ့ကျွန်ုပ်တို့အား မည်သို့ကူညီပေးနိုင်သနည်း။

ယင်းတို့သည် ကိစ္စရပ်များအပေါ်ယေဟောဝါ၏အမြင်ကိုဖော်ပြပြီး၊ ဘုရားရှင်နှင့်အိမ်နီးနားခြင်းကိုချစ်ရန် သတိရစေသည်။ (မဿဲ ၂၂:၃၇-၃၉)။ ၂ တိမောသေ ၃:၁၆၊ ၁၇)—၁၁/၁၅၊ စာမျက်နှာ ၅၊ ၆။

▫ ယေရှုနှင့်အခြားအမျိုးသားများကြားခဲ့သော မည်သည့်ချိန်ခါသုံးရပ်တွင် ဘုရားရှင်စကားပြောခဲ့သနည်း။

ပထမဆုံးအကြိမ်မှာ နှစ်ခြင်းဆရာယောဟန်အားဖြင့် ယေရှုနှစ်ခြင်းခံစဉ်ဖြစ်သည်။ (မဿဲ ၃:၁၇) ဒုတိယအကြိမ်မှာယေရှုသည် ယာကုပ်၊ ယောဟန်နှင့်ပေတရုရှေ့မှောက်တွင် ဘုန်းထွန်းတောက်ခဲ့စဉ်ဖြစ်သည်။ (မဿဲ ၁၇:၅) တတိယကြိမ်မှာ၊ ယေရှုမသေမီလေးရက်၊ နိသန်လ ၁၀ ရက်ဗိမာန်တော်တွင် ဘုရားရှင်၏အသံတော်ကို ရပ်နေသောလူအုပ် ကြားခဲ့စဉ်ဖြစ်သည်။ (ယောဟန် ၁၂:၂၈)—၁၂/၁ စာမျက်နှာ ၁၆။